قصائد ومجادعات شعرية

تذكير بمساهمة فاتح الموضوع :

بعد إذن مشرف منتدى شعراء المناصير .... وإستجابة لطلب بعض الإخوة والأخوات الكرام ... سأبدأ فى هذا البوست بجمع قصائدى ومجادعاتى الشعرية المتناثرة فى منتديات المنتدى :-

الجوال الصامت

أذكر لما دابا ظهرت الجوالات كان اى واحد يتمنى يكون شايلو جوال - أخوكم كان مبهور جدا بتكنولوجيا الجوال وأصريت أشترى واحد والزمن داك كان الناس العندهم جوالات بالعدد وتوكلت واشتريت واحد كان على ما أعتقد اسمه( العنيد) كان مدبلب ذى العنبلوك المدوعل كدى -وكنت أتمنى يدق قدام الشلة عشان اتفنجربو - أها عدا الاسبوع الاول والتانى لا جرس ولا إتصال ولا حس ولا خبر... الكلام ده أزعجنى خلاص ... قومت طوالى سويت قصيدة فيو وقلت :-

أسألوه يا ناس أسألوه--ده السكوت من طبع العنيد
كالصنم جاثم فى محلو--فاقدالاحساس البليد
لا صدى يرجع لينا منو--لا نغم لا ردا يفيد
الدلال اغدقناهو ليهو--وياما فيه نظمت القصيد
لا نفع طبطيبنا ليهو--ولا نفع تغذية الرصيد
البخور بخرناهو ليهو--وبالدعوات أديناه المزيد
علو يرجع من صدودو--ويبدأ يعزف لينا النشيد
وكل نغما ليهو طعمو--وكل يوم يدينا الجديد
والمسافة ثوانى عندو--وكم يقرب لينا البعيد
وعاد دوم تلقانى جنبو--وتبقى دنياي تملى عيد

***************************

دمت ذخرا للمناصير والله ياخوي التفر ماقايلاك شاعر قدر دا والله مبدع شديد ولقد ورتت الابداع ابا عن جد وربنا يحفظك

مشكورة د/ عازه على المرور وعلى الإطراء ... إنها مجرد خواطرمغترب مازال فى بداية الدرب ... الله يعطيك العافية _

لك تحياتى وودى ،،،

ونحن من على البعد نؤازر ونناصر وندعم أهلنا المرابطين والمعتصمين بدامر المجذوب من أجل نيل حقوقهم المشروعة والعادلة وتفاعلا ًمع أهلى المعتصمين جادت قريحتى بالنظم التالى :-

عفارم يا عيال منصورعفارم

حياكم الله يا نسل الأكارم

تاريخكم عريق حافل بالملاحم

تكرموا الضيف وتذودوا عن المحارم

وساعة الحارة سيفكم سنين وصارم

تردوا العادى وتعِفوا عن الغنائم

صناديد ذو بأس وأولو عزائم

قصص أبطالكم شهد بيها الأعاجم

إعتصمتوا الليلة داحرين للمظالم

ظلمتوا كتير ومازال الظلم قائم

أيعقل فى الحق المشروع الواحد يُسَاوَم ؟؟

***************************

ويتوالى النظم :-

عيال منصور حبابكم ألف يا رجّاله

مناصير والنِعِم يا زينة الأخياره

ليكم نرفع القبعات إحترام وإجلاله

ديل أحفاد ود قمر الفارس المغواره

معروف قدرهم ساعة تقوم الحاره

ما برضو الهوان وما برضو إى حقاره

فى القيقر هناك ساعة الجموع تتجاره

ركز عمدانا وإتحزم فى وسط الداره

فج فج للحشود وشق الصفوف بجداره

كم دك دك حصون وهد ليى أسواره

نحنا أصحاب حقوق لم توف فى آجاله

لسنا رعاع ولا ساكت همج وطبالة

دايرين حقنا وبس ما طلبنا إستوزاره

كفانا مرمطة ووعود و إستحقاره

*********************

نسأل الله أن يكون ميدان العدالة بالدامر محط يتلاقى فيه فرقاء الأمس ,تتوحد كلمتهم وصفوفهم ويلتئم شملهم , فالقضية واحدة والهم مشترك والجرح على الكف والكف واحدة :-

خلاص إتلاحمت صفوفنا ... كفانا شتات وإنقسام

جموع تتراى للناظر ....... كموج البحر اللطام

خيولنا تسابق خطاها .... ماب يردها تانى اللثام

نعيد تاريخ جدودنا ...... .. سير وملاحم عظام

نفرنا ودايرين حقوقنا .... دا الهدف من الإعتصام

حقوقنا الغُمرت أمامنا .... فى عز الليل والظلام

عمل مقصود ومدبر .... يعرفه صغيرنا الفى الفطام

يريدون نترك ديارنا .... نهيم كما الأنعام والهيام

فقدنا نخيلنا وجروفنا .... وبيوتنا صارت ركام

سدرنا فوق ليى جبالنا ... نصبنا هناك الخيام

فقدنا مصادر رزقنا .... لا تمرلا زاد لا طعام

سنين إتوالت علينا .... نلوك الصبرالمرالزغام

كفانا مهازل كفانا ..... نريد أفعال لا كلام

نحنا بس دايرين حقوقنا .... لا نريد زعزعة النظام

النظام ياما دافعنا عنو .... من دابو يتاتى لحدى ما قام

سألنا كثير عن حقوقنا ...... لم يعيرنا ولاتنا إهتمام

هل دا رد المعروف إلينا ؟؟ .... نظير تضحياتنا الجسام !!

دا الصبر كملناهو حدو ..... عاد الشكية لرب الأنام

الخالق العادل القادر ....... الذى لايغفل لا ينام

وحقنا إما لقيناهو هسع ......أكيد ح نلقاهو قدام


**********************************

الاخ النفر تحياتي

والله اول مرة اشوف البوست دا بالله عليك قاعد فيه تلات ساعت
الله عليك يا رائع

والله يخليك للمناصير ويديك الصحة والعافية

ويخلينا نوثق ليك كتاب انشا ء الله بقدر ما قدم للقبيلة

ولنا عودة..

تشكر الأخ صالح على المرور وعلى المداخله والإطراء وعلى الدعاء الطيب ... منكم نستمد روعتنا _

لك تحياتى وودى ،،،

الباشمهندس الفكى ... حياك الله وأبقاك وحفظك ورعاك ... تشكر على المرور والمداخلة الراقية والإطراء .... نسأل الله الرحمة والمغفرة لأجدادنا الذين كانوا منارات سامقة , منهم نستمد المعرفة ونحاول أن نقتفى أثرهم ولو بعد حين , المشوار طويـــــــــــــــل ... ونحن مازلنا نستقى من ( النز ) _

لك تحياتى وودى ،،،

الأخ النفر لأول مرة أطلع على هذا البوست الجميل كنت أناظرة من بعيد أظنها العين حمتنا نطلع واليوم وجدت فيه الكثير والكثير وده عاوز قعده في البيت يوم الجمعة للاطلاع على هذه الدرر.

ماشاء الله تبارك الله شاعرنا النفر دمت زخرا للمنطقه

د. مصباح ... حياك الله وأبقاك وحفظك ورعاك ... مشكور على المرور والمداخلة والإطراء _

لك تحياتى وودى ،،،

الأخت الفاضلة نجلاء زمراوى ....حياك الله وأبقاك وحفظك ورعاك ودمت ذخرا ً لأهلك ومنتداك ... مشكورة على المرور وعلى الدعوات الطيبات _

لك تحياتى وودى ،،،

القصيدة أدناه نظمتها عندما أطله علينا الوجه الصبوح ...شفيف الروح ...جميل البوح ...شاعرنا المتألق ود بروى وفى معيته قصيدته الرائعة { إعتصم } وذلك فى منتدى قضية المناصير :-

مـــــــــــدد يا إخوان مــــــــــــدد

الليلى طله نجــــــــــــــــــم السعد

نورو عمَ كـــــــــــــــــــــل البلد

ولى حمــــــــــــــاس أهلو وَلقَد

وللبلد باقى درع وســــــــــــند

وليى تاريخه نصـــــــــع وجدد

و للثراث وثــــــــــــــق ومجد

بيى قصـــائد طعم الشـــــــهد

أمانى يا حمـــــــــود ماك ولد

إن شاء الله فى الدارين تسعد

وحفظك الله من الحســـــــــد

ولك تحــــــــــــايانا بلا عدد


**********************

شاعرنا النفر حياك الله وابقاك ....... انت وودبروي اجبرتموني لسماع الشعر لان كلماتكم تحمل معاني صادقه وعبارات حنينه ....تعكس ما بداخلكم من محبه وشوق للبلد وللاهل....
فلك التحيه والتجله
تقبل مروري

حياك الله أختى نجلاء زمراوى .... مشكورة على المرور وعلى المداخله والإطراء ... منكم نستمد روعتنا _

لك تحياتى وودى ،،،

هذه نظمتها فى بوست { ونسة ساكت } للرائع أبو الكرارى ومن داخل راكوبة الونسى العامرى بأهلها والتى تانى ح نطلها قريب قريب .. كيف نفوت الظل الرهيب ؟؟؟... والدعاش والهمبريب ...والنفوس إن شاء الله تطيب ... هى دعوة لكل الأهل :-

ألف مرحب وألفين حباب

والسلام ليى كل الصحاب

الليلى الراكوبه دعاشه هاب

وعبق أريجه يخامر اللباب

والنسيم زى نيلنا منساب

لا فيها كتاحة ولا تراب

وعامرى بالونسى والقرقراب

عاد شن جاب .. ليى جاب

منظر جميل وبديع وخلاب

إذن هى دعوة لكل الصحاب

من برتى حتى كحيلة والكاب

والأهل بالفداء والمكابراب

وللأخوة فى دول الإغتراب

والتحايا موصوله لكل الشباب

المرابطين والحارسين العقاب

والبلاقوا الضيف بكل ترحاب

دايرين للوصال نفتح الباب

علاقات لا يكتنفها الضباب

لا نكد يغشاها ولا إكتئاب

ولا شتم لا تريقه لا سباب

نفوس صافيه بلا عتاب

وساميه فوق هامات السحاب

هى دعوة عسى تجد الإستجاب


********************

أخونا عثمان لك التحية واليوم جمعة سموها المعتصمين جمعة العبور اليوم قعدت بمزاج وقرأت كل القصائد بتمعن أعجبني هذه الدرر التي طلعت من إنسان يملك موهبة الشعر وحسن العبارات التحية لك أخي النفر والغربة تخلي الواحد يبدع ونشكرك على الإبداع.

الدكتور مصباح المصباح ... حياك الله وأبقاك وحفظك ورعاك ... مشكور على المرور والمداخلة والإطراء _ أخى الإبداع نستمده من إرث وقيم أهلنا الطيبين _

لك تحياتى وودى ،،،

غدا ً تهل بشائر النصر ويسطر التاريخ هذه الملحمة المتفردة لعيال منصور الأشاوس _

الإعتصام ... تم شهرين

والرجال ثابتين وصامدين

وكل شبابنا ...متضامنين

والميدان مؤمننو تأمين

كالأسود حامين العرين

رغم كيد .. المرجفين

وتجاهل دولتنا المهين

لم يخورعزمهم ولم يلين

زادهم التقوى واليقين

ورابطهم حبل الله المتين

وبالحقوق العادلة متمسكين

ولن يعودو أبدا خاسرين

وسيردو الصاع صاعين

والنصر قادم ولو بعد حين

*******************

القصائد أدناه منقوله من جرف الروكة ... مجادعة بينى وبين الشاعر الكبير محمد بروى :-

النفر كتب:

مالو ود بروى ما ظهر

وموهو سائل فينا بالمر

يا أبو سفيان أديهو الخبر

قلو جرفك بقى فى خطر

وبقى عديل يلفت للنظر

دخنو طال ولوباهو نور

وكل زول شافو إنبهر

والعين مرات بيتسحر

والله يحبس منو البحر

************************


ود بروى كتب :-

الجرف صاح فوق البحر

والبحر صاحبنا النفر

نغمة حالمة هدية وتر

الرحيق وعصارة زهر

كلمه منو تزيل الكدر

والحديث البمحى الضجر

يعجبك لو خط ونثر

ويطربك لو نَظَمْ وشَعَر

منتدانا بلاك في خطر

إنت نورو وضوو الظهر

وانت سمعوا وانت النظر

من عرفناك صادق الخبر

لاظم في يوم لا فجر

المحل يمحاهو المطر

والأمان ممحاة الخطر


النفر كتب :-

الليلى ود بروى شرف وصل

بالجرف زين إتبختر وقدل

مرحب حباب الشاعر الفحل

وتعظيم سلام للقامة المبجل

النجمو متألق حد ما أفل

وعم نورو الوديان والسهل

ألق بهاهو يبهر للمقل

وخيرو عم كل الأهل

بالكرم يضربو المثل

عمرو لا ضن ولا بخل

دا البشوش حاشاه الزعل

بالخلق والطيب مجمل

وبالأدب والذوق مكمل

نضمو ديمه ينقط عسل

للبلد مجد ... وجمل

وللتراث وثق وأصل

بيشعر محفوظ ومسجل

يدندنبو الصغيروالشاب والكهل

بيهو شاع صيتنا فى كل محل

يا خى بيى غيابك بالنا إنشغل

وفى كل مرة عنك بيى نسأل

الليلى بيقدومك الكل إحتفل

وعمت الفرحة فى كل محل

ود عقيد ليى شعرو إرتجل

جاب شعر بالحيل مدنكل

والحضور كبر... وهلل

والنفر فى القعدة إتعدل

دا الجرف إزدان حلل

فوقو رامى ضل النخل

دى قعدة تطرد .. الملل

فى حضرة الأخوان والأهل

إن شاء الله عاد يتلم الشمل

وقضية أهلنا العادله تنحل

وبالجرف نقدل زين ونخوجل

والونسى تعمر والفرح يكتمل


*****************

عمنا الاستاذ/عثمان النفر هذا فيض من كثير ممانظمته
دلالة على الارث من الشاعر الكبيرود بسوى وانا يادوب
فرغت من الاطلاع على ماكتب اعلاه والمدهش فى ذلك
سرد مناسبة كل خاطرة وكل قصيدة مما يسهل على القارى استيعابها
اضافة الى ذلك ان وضعت كل هذا الاعمال فى بوست واحد كما فعلت انا فى غزل النجوم
لشعراء المناصير المخضرمين وذلك بما يسهل على المتصفح الاطلاع وربط الاحداث ببعضها
دمت شاعرا فذا وذخرا لنا
تقبل المرور

حياك الله أخى عباس ... مشكور على المرور وعلى المداخله الرائعة ... أنت من الشباب الذين يتذوقون الشعر ويهتمون بحفظه وتدوينه _ نسأل الله لك التوفيق _

لك تحياتى وودى ؛؛؛

عدنا والعود أحمد .... فى ليلة برقها يشلع ورعدها يكركر ومطرها صابى وأنا بمنزلى بالجيلى فى رمضان الفات ... سمعت ضجة وأصوات بالشارع المجاور... خرجت من منزلى مسرعا ً للشارع فإذا بى أفاجأ بلمة كبيرة حول حمار كارو واقع على الأرض ويرفس والجماعة شغالين يضربوا فيه بالخشب وعلمت منهم أن هناك سلك كهرباء قاطع الشارع وبفعل المطر الغزير تعرض للتعرية و جاء مارى حمار الكارو وهبش السلك بظفره ... لم تفلح الجهود بإسعاف الحمار والذى لفظ أنفاسه بعد دقائق معدودة ... بعدها سارع الحاضرين بجر الحمار الى خارج الحى سكيتى كده وفى نص الليل حتى يداروا فعلتهم ولا يتعرضوا للقيل والقال ... كان من ضمن الحضور حسن سلمان الشاعر والسر الشاعر وهم جيران شارع الحدث وأنا جارهم الثالث ... فى صباح اليوم التالى للحدث سمعت بأن أحدهم إتصل بالشاعر أب آمنى وحكى له القصة بالكامل وناشده بقصيدة كاربة يشيل فيها حال كل الحاضرين ومن ضمنهم شخصى الضعيف ... وأنا خوفا ً من شيل الحال بادرت بكتابة قصيدة بدأتها بمدح أب آمنى حتى أسلم من لسانه وتطرقت فيها لاحقا ًلحادث الحمار :_

أب آمنى شاعرنا القدير
وياحفيد الشاعر الكبير
النجموساطع فوق ليى بدير
للتراث أصلت تأصيل
نتوارثو جيلا ًوراء جيل
والشعر سطرتو سطير
فى جزيرة أترم والمقيل
والخضار والوجه الجميل
والرمال والظل الظليل
والقمارى تجود بالهديل
والوزازين عايمه فى النيل
حاضنا الصافى السلسبيل
والنسيم البيشفى العليل
خات نداه بين التناقيل
يا حليل يا حليل يا حليل
البوش وغناء الطنابير
وكت يتنكع فى الداره الشتيل
وينفدع فى رقيصو ويميل
وتبقى عاد الصفقة دنقير
يا حليل .. الزمن الجميل
ما بدوم ... ما دام الظليل
راح سريع فى لحظة بالليل
كلو من ... السد الدخيل
جانا دافر مويتو بالليل
غرق البنيان والنخيل
والسكن بقى عقبة وهجير
لا مساكن لا مشاريع لا بديل
ولا حقوق ولا تعويض نخيل
والحكومة وعود وتخدير
فوقا نم سوًى المسادير
دا الشعريفعل الأفاعيل
ليهو قوة وليهو تأثير
نحن أحفاد ودقمرالشهير
بالفراسة معدومين نظير
وما بنفرط فى حقنا فد شبير
وبيى أحد أبدا ًما بنستجير
نأخدو مرجلة ولا كتر خير
وما بنسيب حقنا لدى الغير
إلا ندفن ... تحت القبير
إنت ياك دخرى المناصير
وللقبيلة باقى ركن ظليل
وتستجيربك ساعة الهجير
والعثم جنبك درفون صغير
لسه بادى والمشوار طويل
إنت ياك أستاذنا الجليل
وفى الشعر ميزانك تقيل
والكبير دائما يظل كبير
عمرو ما بنساق وراء الأقاويل
وما بيحش ... قش التناقيل
الشعر فى الحمار ما بيخيل
حتى لونظمتو وجملتو جميل
إنت زول قامة وزول كبير
هجا الحمير خليهو للغير
الحمار كان طائر اليطير
كلوا من الحسن والسرير
هولوا الموضوع تهويل
وجعلوا من الحبة كوكتيل
الحمار كان ما ناقص عمير
مالو لافى وداجى بالليل
وفى العجاجى والمطرالغزير
وفى الدرب ما قادر يسير
جسمو سايب وكملان ونحيل
وماشى ذى الفاقد الدليل
التقول ضاربو حضير
ومن سناحة حظو المعيسير
هبش سلك الكهرباء بالضفير
وبقى يترعش ويفرفر فرفير
وفجأة طاح وإتكجبر كجبير
وكتر من الرفسى والشخير
والجماعة سووا النفير
الحسن ماسكلو مكرير
والسرير بعود الدمير
زازو الحمار لكيد ودفير
لا من إنقطع صوت الشخير
والحمار راح مثواه الأخير
والجماعة إحتار بهم الدليل
كيف يسترو الجنازة بالليل
وكترو الكوراك والعويل
وقاموا جابو حبلا ً طويل
وربطوه فى الكرعين والصدير
وجروه بسراع بيي ضوء البطاطير
وحتى لا يتركوا للجريمة آثار أو دليل
قاموا جدعوهو فوق فوق للعتامير
وسيدو رضوهو بشوية دنانير
أصلو زولا ً طيب عديل
وللمشاكل ما عندو حيل
أصلو لوكان من الهوامير
دا ما باب رزق أنفتح عديل
منو يغرف ويعبى ويشيل
وكان جرجر الجماعة جرجير
ما الحظ فرص وما بتكرر كثير

********************

حياك الله أخى سامى أحمد محمد وحفظك ورعاك .... مشكور على المرور وعلى المداخله وعلى الإطراء ... منكم نستمد الروعة _
تقبل تحياتى وودى ،،،

شكرا استاذنا القامة عثمان النفر
كما كن نتوق لمثل هذه الحكاوى من الشعر والتى رجعت بنا
الخاطرة الى مجادعات الشاعرالكبير مع الدميرى والنذير القميرى ابن عمتى
وكذلك الدمرى مع الدميرى حيث كانت تاريخا يحكى
فمثل هذا النوع من الشعر هو الذى يحرك منتدى الشعراء ليكون جاذبا
لك التحيات الخالصة وللاسرة الكريمة

لك خالص التحايا والود أخى عباس ... مشكور على المرور وعلى المداخلة وعلى الإطراء ... منكم نستمد الروعة _

فى بوست {زيارة العضو أبو مصطفي} ... الذى رفع فيه أخونا الطيب عبدالرحيم .. دعوة ضد أخونا حازم الذى لم يلبى عزومته ويطالب بتعويض مجزى عن خسارته ... وقد شكل محكمة تضم مستشارين وحكماء وكان من بينهم شخصى الضعيف وذلك للنظر والبت فى دعواه !!! وحيث أننى على قناعة تامة بأن ناس الجزائر لايعترفوا بالمحاكم ودائما ًما يلجأون لأخد حقهم بضراعهم والشواهد على ذلك كثيرة ... عليه جاءت أفادتى للطيب بالنظم التالى :-

الطيب ... يا زول دماج

روًق المنقة ... والمزاج

ولا تجوط لا تبقى لجلاج

أصلو معروفين ناس دماج

بالضكارة والفراسة والكماج

وعلى المحاكم مافيهم حد لاج

حقهم ياخدوه بيى عكاز وكرباج

وديمة ساحتن عجاجه ... قاج

ديل أسود ... حامين الكجاج

وماب يحوم بيناتن ... كراج

***********************

فى بوست { شرى على لسان المرحوم حبيب بابكر } للأرباب سلمان عقيد ... جاءت مشاركتى بالنظم التالى :-

الحديث عن شرى ذو شجون

مهما نظم لن تسعفنى المتون

دى الجزيرة منارة فى الكون

ودرة سامقة ... وتحفة فنون

ألق بهاها يبهر ويسحر للعيون

مرتع صباى والصدر الحنون

ومن صغير وأنا دابى درفون

ريدها فى وجدانى مكنون

وبيى محاسنها ديمه مفتون

وليى فضائلها تجدنى ممنون

أسال الله فاطر ومبدع الكون

ليها يحفظ ويرعى ويصون

وتبقى درة تبهر للعيون

********************

تسلم شاعرنا النفر ، قصائد حلوة ودعاء طيب لشيرى ، نقول آميين ...

حياك الله أستاذنا وشاعرنا الفكى ... مشكوور على المرور وعلى الإطراء ... تسلم يا زعيم من كل ضيم وترفل فى النعيم _

المرثية المتواضعة بأدناه ... كتبتها فى بوست ود المناصير يرثى الزعيم محمد حجازى ... نسأل الله أن يتغمده بمغفرته ورحمته الواسعة _

أبكن يا عيون لا تحبسى الدمعات

وأحزن يا قلب لا لا تكتم الآهات

وفضفض يا لسان لا تلجم العبرات

مصابنا جلل لا تستوعبه الكلمات

أسد أب سباع الليلى ودع وفات

وخلا ديارنا مكلومة وعاجه بالبكيات

كان فارس حماها فى شدة الأزمات

كان ضو القبيلة فى أحلك الظلمات

كان عون اليتامى وذوى الحاجات

كان واجه وقبلى وعشاء البايتات

رحل رمز الأصالة و فارس الحوبات

رحل فارس القبيلة ومقنع الكاشفات

رحل لرب كريم وواسع الرحمات

نسأل الله الكريم أن يغفرله الهفوات

ويكرمه بالنعيم فى أوسع الجنات

ولن ننساه أبدا من صالح الدعوات

وذكراه تبقى خالدة مادامت السموات

ويبقى عزانا الخلف ... ما مات

لم يمت من خلف ولاد وبنات

نبتا ً طيبا ً من أفضل الجينات

أولاد أوفياء و شامخى القامات

وبنات فاضلات بالحشمة مطبوعات

وارثيين الكرم ومعاه أحلى صفات

ابراهيم بشوش وناصع القسمات

وشايل من أبوه كتير من الخصلات

وشامخ كالجبل ما تهده إعصارات

*************************

لكي أخي عثمان النفر التحية والتقديروالإمتنان ويا ريت تقدر تجاملنا وتكتب لنا قصيدة.. رثاء لإبن خالنا رجل البر والإحسان المرحوم حسين السيد الحسين.. طيب الله ثراه.. وجزاك الله كل خير

الزعيم عبد الغنى ... الرجل القافلة ... حياك الله وأبقاك وحفظك ورعاك ... نسأل الله المغفرة والرحمة للزعيم حسين السيد ... عفوا ً أخى الكريم ... كنت أتمنى أن ألبى طلبك ... لكن !!! وكما تعلم وأنت من المطلعيين والعارفيين ... القصائد التى تفصل حسب الطلب !!! تفقد مصداقيتها ... فالشعر إحساس وترجمة صادقة لما يجيش بالدواخل وينداح عفو الخاطر _
تقبل تحياتى وودى ،،،

فى بوست جرف الروكة العامر بأهله .... حيث النسيم المنساب والخضرة التى تخامر اللباب وملتقى الصحاب والونسه والقرقراب ... فى إحدى جولاتى بهذا البوست الرائع وجدت صاحب الجرف شاعرنا ود بروى حادر أخونا الطيب (أبومصطفى ) بالقصيدة التاليه :-

سرق السلوكه والطوريي

جرمنا نجيض سواهو قليي

والبتيخ عليهو النيي

يخطف للكتير وشويي

بس تحلف تقول ده حديي

قرون اللوبا يمدغها نيي

اكل التبشه زي الشيي

ده الطيب وليد علويي

ما بتنفع معاهو شكيي

نرفعها لي الأيادي قويي

ولقد ساهم فى الحدريبة كذلك أخونا سامى وودعون الله بقصائد داعمة ومساندة لشاعرنا ودبروى .... وعندما وجدت ثلاثتهم متفزعين على أخى الطيب !!! توجب على ّ أن أدعم وأساند ود أختى ... فكتبت :-

يا إخوانا أهدوا شويى

مالكم ومال ولد علويى

الزول دا مراتبو عليى

وديمه ماسك فى القداميى

مهو زول فارغة نفسو دنيى

زول ضكران ونفسو أبيى

ما بينظر لساقطة أو مرميى

كان حدجايا .. كان طوريى

دا عندو فى الجرف كميى

عندو حقوق وعندو سعيى

موزع منها لفطون وكبجونيى

وغير كدا بييصرف الماهيى

وفنجرى وراكب العربيى

وفاتح بيتو عاملو تكيى

ليى أهل الله والجوديى

زول تكابة وزول حوليى

لسانو ذاكر صباح وعشيى

هو الزول طالب العموديى !!

عاد كيييييف تتهمو بالدونيى ؟؟

أبد ... أبد ماكانت المحريى !!

*********************

يستمر الشاعر ود بروى فى هجائه للطيب الطيب ويحتمى بعصبته ويمدحهم :-

ود عون الله صافي النيي
وسامي الشرف الظابطيي
يا شعرانا مني تحيي
يا العسل المعبي خليي
زولنا عناتو ماها شويي
المعليش بقتلو عصيي
يهرج فوقنا من عصريي
رافض ياخد المرخيي
ماشي الجيلي بالعربيي
ينفخ فوقنا بتل الحيي
ما بتنفع مع الحنيي
والتحنيس والجوديي
أبحمد يوصي وصيي
خايف ما تجيهو بليي
ما قال ابشروا بالطلبيي
والمطلوبه جت مقضيي
الخرفان سميني قويي
والشيات وكمونيي
والعصاره والتقليي
والدخان من الطبليي
وجر جرين من البقنيي
بس يا اخوانا اصبروا شويي
لامن نقبض الماهيي
لو ده كلامو ما هميي
لكن العناده قضيي
خايف ينجلد ضحويي

مازال شعرائنا يهيمون فى غيهم وهجائهم ... لم تفلح الجودية ولا الوسطاء فى تهدئة الأجواء .... أبو مصطفى يستنجد بخاله وخاله يلبى النداء ويجمع قواه ويحرك سراياه :-

أبشر يا فارس الحوبيى

خالك جاك معاهو سريى

معززة بأسود بريى

مظلله بصقور جويى

بيى تحت الجروف محميى

بزوارق وبارجات بحريى

مدافعه صوته يدوى دويى

حرم ... ما بتجيك أزيى

البلد الظاهر بقت طلقيى !!

وكل زول يرعى بلا قيديى

الظاهرة أصبحت جهويى

حقك ما ب يجيك عفويى

إلا تقلعو بأيادى قوييى

عاد أركز يا ولد علويى

شلق .... وحدر الطاقيى

وأعرض وأردف الصقريى

خلى الدارة عجاجه يلوى لويى

ودوبى وضاهى ود ضحويى

وأقدل فى الجرف جهريى

أجدادك رجال نشميى

فرسان حارة وقداميى

ما بيضارو فى كونيى

أبد ما برضو بالدونيى

وياما جهجهو التركيى

وإنت تملى زول دوغريى

وما عندك دروب ملويى

وعمرك ماب تلف صينيى

منك ماب تجى المرخيى

حقك تاخدو بالزنديى

لا واسطات ولا جوديى

لا رشوات ولا كرويى

وترفع راسنا فى العليى

وصيتك يملإ كل فجيى

وتجيك الجموع طوعيى

تمشى على حداك حفيى

مطأطئى راسه ليك محنيى

وتبصم ليك .. بالعموديى

وترفع ليك تمام جنديى

وتعزف ليك سلام وتحيى

**************

يكفى انك لم تنسى ما عاهدت نفسك عليه
فقد كانت مجادعات رائعة فى جرف ودبروى

تسلم الشاعر النفر علي الروائع ماشااءلله ربنا يحفظك ويسدد خطاك ومتابعين معاك واصل

حياك الله أخى عباس وحيا الله أختى عازة ... مشكووورين على المرور والإطراء وطيب الدعاء _

فى بوست الزعيم الحاج شرف ... موسم فك التسجيلات للمتزوجيين القدامى ... الذى لمح فيه لبعض التجارب ومدى إنبهار وإعجاب البعض بها ...كما دلل ودعم حديثه وصاغ من الشرع الدليل _ فجاءت مداخلتى أدناه :- 


الحاج شرف ود شيخنا الفقير

يا أخى ليك محبة وليك تقدير 

مكنونة فى قلوب أهلى المناصير

وديمة تتواصل .... مع الغير

بإنسجام .... معدوم النظير 

زول بشوش حاشاك تكشير 

والكرم هيلك... ما بيخيل 

وتعرف الواجب يا أصيل 

بس الليله حيرتنا عديل !!

وخضت فى موضوعا ً خطير 

ودار تفك قيد التساجيل !!

وصغت من الشرع الدليل

وإنبهر بتجارب .... الغير

الظاهر سفر جناب المدير!!

شكل ليك ... فراغا ً كبير 

وبقيت تشطح فى التفاكير

وشلت هم كل القوارير

ودار تلم رأسين على خير 

عاد أبدا أنت ودق الصدير

وأركز وسو الصفقة دنقير 

مايبقى كلام بوستات وتنظير

نحن عاد راضين بالمقادير 

وما فينا قدرة تانى لدبيل

والعمر ما فضل الا القليل

نقضيه عبادة وذكر وترتيل

الدبيل كان طاير اليطير

يكفينا فيه تجارب الغير

العدل مهو شيتا ً يسير 

والمدبل ما مرتاح ضمير 

وقتو كلو سرحان وتفكير

وزمنو كلو تمثيل فى تمثيل

وتلقاه تايه ... وفاقد الدليل 

**********************

ما أجمل الشعر حين يدون الأحداث والمناسبات ومايدور بين الإخوان
من أحاديث ومساجلات ، شىء جميل أستاذنا وشاعرنا النفر ...