الفتنة الكبرى فى الخيار المحلى ؟؟؟

من طرف **ابو مصطفى** الثلاثاء 09 أغسطس 2011, 4:31 pm

تذكير بمساهمة فاتح الموضوع :

السودان بكاملة ورقه مهزوزة
والمناصير سطر في الورقة
لايمكن تكتب على هذا السطر ولا كلمة
طالماً الورقة نفسها تهزها يد جبارة
وفوق كل ذلك محرك نواميس الكون
له الشكر وله المنه على تمكيننا من
الصمود بأرض الأجداد الواعدة بحول الله.
عليها نحيا وعنها ندافع وفيهاومن أجلها نموت.
لكن الشى الملاحظ والغريب فى الامر هذه الايام ان ناس البلد من الخيار المحلى ضيقوا الخناق على الذين كانت رغبتهم فى الرحيل الى المكابراب بالتحديد والبالغ عددهم 700 حسب افادة ناس اللجنة ؟؟ والشى الذى نسمعه فى المساجد بان هؤلاء لازم يقوموا وفورا وكلام من هذا القبيل وفى نفس الوقت هؤلاء الناس رغبتهم الهجرة الى المكابراب وقعدوا معاك يازول الخيار المحلى حتى استلمت 70% من حقوقك وعدوا معاك اربعة سنوات على تلال الجبال وعلى رؤس الحجار وهم مافى شك سوف ياتى فيه يوم يسافرون الى خياراتهم ولكن حتى الان القرى التى يرغبون فى الرحيل اليها لم تفتح ؟؟؟ هذه حاجة والحاجة الثانية ربما تكون هنالك فتنة من ادارة السد فى رحيل هؤلاء الناس من البلد واصلا الغرض الرئيسى ان البلد تكون فارغة من الناس وينقرض اهلها فى بعضهم ؟؟؟ على العموم هذا الموضوع موضوع بالجد خطير وسوف يقع فيه دم اذا الناس لم تمسك اعصابها لانى انا مهجر ورغبتى فى المكابراب وقاعد معاك فوق حجرة البحر بى عيالى وناس الادارية فى المكابراب ما سلمونى بيتى يا اخى ما تجى تقول لى قوم والله ممكن اموت معاك ؟؟؟ وبكل بساطة الناس القائمين على امر البلد لازم يضعوا كل الخطط والتدابير اللازمة لتلافى مثل هذه الكوارث والله يكفينا شر الكوارث والمحن ؟؟؟؟
قديما عندما قامت الفلوجة وبدات تكسر فى منازل الناس الراحلين الى المكابراب حتى لايشقوا صف القبيلة قيل ان قيادة الفلوجة بزعامة حسين زيدان القائد الميدانى هى تتبع الى ادارة السد ؟؟؟ طيب لو قامت فلوجة جديدة لمن تتبع هذه الفلوجة الجديدة ؟؟؟ وهل هى على حق ؟؟؟ ومن المنطقى ان تكون هنالك سلطة بوليسية هى التى ترحل الناس وتتحدث وتفرض سلطة الدولة وليس اشخاص اهالى من هنا وهنالك يعربدون ويسرحون ويصولون ويجولون فى البلد فوضى وقلة ادب ؟؟؟؟

تحياتى
ابو مصطفى

من طرف **ALIHADOWRY** الإثنين 15 أغسطس 2011, 4:24 am

انا استغرب كيف يفكر اهلنا فى الخيار المحلى هل هم يطالبون بحقوقهم التى نزعتها حكومة السودان ام يريدون التمدد فى اراضى المناصير ودائما تجد كل الاحاديث نحن من استبلنا فى الخيار المحلى ونحن اولى بة وقد ذكرتنى مقولة الشهيد محمد احمدطة الناطق باسم جماعة السوء التى حكمت السودان بعد مالبنت مانديها الطير وهى مقولة تفكير فاسد هو يعتقد بانة لة الحق بلهف مال الودان ونساءة فعاد السودان مقسما اخوتى ان كان اصحاب الخيار المحلى يريدون حقوقهم نحن واللة الاى اخر قطرة من دمنا معهم ام ان كانو يريدون سرقة حقوق الاخرين فانا اول مقاوم لهذا التفكير الغريب الذى يرى حقوق الاخرين غنيمة

من طرف **يس مصطفي** الإثنين 15 أغسطس 2011, 4:28 am

اى منصورى مخير فى اختيار ما يريده من الخيارات هذا بديهى لكن كل زول عليه تحمل نتيجة اختياره والذهاب فورا الى ما يريد اليس هذا اختياره اذا فليذهب اليه الامر واضح ولا يحتاج لشرح ما لكم كيف تحكمون ؟؟؟؟

هو دا النضم المحلي للذي بقي وناضل من اجله وبعدين ديل العاملين مفتحين يسالوا نفسهم سؤال لو كل الناس هاجرت كان في حاجه اسمها مناصير البلد اعني؟

من طرف **ahmed alkhabir** الإثنين 15 أغسطس 2011, 2:11 pm

الفهم يا جماعة

المهم الفهم العام

اما وقد دلق الاخوة هنا مدادا كثيرا وحديث من شاكلة سيف علي وجيب معاوية والمنافقون و... ,,, كاننا ذاهبون الي بدر الكبري !!!

لماذا نخوض معارك الحكومة نيابة عنها ؟؟؟؟

السبب الاساسي للدعوة الي ترحيل هؤلاء الناس هو الخوف من تاثيرهم علي باقي الناس

طيب قبل كدة ما رحلنا الناس

وتاني ظهروا ناس صارفين حا نرحلم وتاني حايظهروا ناس صارفين !!!!

ونحن نضارب ونحارب حروب الحكومة بالوكالة من غير ان تخسر الحكومة حتي ثمن الترحيل !!!!

التاثير لم يعد بالمجاورة والاحتكاك يعني ما شرط الزول يكون قاعد معاك في البلد عشان يؤثر علي باقي الناس او يستفزهم !!!!!!!!!! الشغل ممكن يكون بالتلفون !!!! وزي مافي ناس كتار صرفوا ليهم من غير ما يكونوا مستحقين حتي الواحد يقولوا ليه اسمك طلع تعال استلم انت خسران شنو ؟؟؟!!!

لا زلت عند ظني اننا نحارب بوسائل بدائية جدا ولا زلنا نجهل اعدائنا الحقيقيين ولا زلنا نتعامل بردود الافعال يسبقنا الاخرون ونحن لازلنا للاسف نهتف يا كرزاي تعال منسل !!!

اعتقد في رايي الشخصي اننا لا بد ان نبحث عن وسائل وخطط اكثر ذكاء وفاعلية

ونبحث في جذور الازمة حتي لا نفقد ما تبقي !

ويبقي السؤال الحقيقي هو :-

هل لو رحل هؤلاء الناس ستحل قضيتنا ؟؟؟؟؟؟؟؟؟؟؟؟

ثم ماذا بعد ان يرحلوا

الشئ الدايرين نسويهو بعد الناس ديل يرحلو احسن نسوي الان الان الان عشان مايرحلوا اخرين

من طرف **حازم** الإثنين 15 أغسطس 2011, 2:53 pm

وطني على كتفي

بقايا الأرض في جسد العروبة

كيف يكون فى خوف من تفريغ المنطقة وفى نفس الوقت عايزين الناس الصرفوا يرحلوا؟
وكيف تصروا على ان الخيار المحلى يسع الجميع وموعود بخيرات ويتحدث اخونا خالد عن ضيق المكان واشكاله فى ايجاد مساحة لبناء منزل؟

من طرف **علي الكليس** الإثنين 15 أغسطس 2011, 3:20 pm

الريس خلد لك التحيه
في اجابه لتساؤلك السابق تجدنا نتفق تمامافي كل كلمه ذكرها الاخ الخبير وتمثل وجهة نظرنا في الموضوع المذكور ولاداعي للتكرار...سلام

من طرف **ابو مصطفى** الإثنين 15 أغسطس 2011, 3:53 pm

كرم الله حامد خلف الله كتب:عندما تقرأ البوست تتعجب وتتوقع حدوث معارك مثل داحث والغبراء ولكن عندما تذهب الى الخيار المحلى لاترى غير الترحيب والكرم وانا قادم البارحة من القناويت والكل لحم دم ولكن الفتنة اراها من خلال افواه بعض القوم فى هذا المنتدى يا ريس . نحن عموما فى القناويت حدنا من منصور للحسين ما فى حشرة تحوم بى وسط كما قال شاعرنا ود فضل الذى رحل لحمنا ودمنا والذى بقى لحمنا ودمنا . ان ضاقت فى المحلى نوسع عليهم فى الخيارات الاخرى . وان ضاقت فى الخيارات الاخرى مرحبا بهم فى المحلى . كفى فتننا يا الناس الضاربين الهمبريب وما عارفين الناس صايميين كيف ؟ لك التحية اخى ابو مصطفى

والله اكبر زول بتاع وهم ويبيع الناس الوهم المذكور والمدعو كرم الله حامد خلف الله

وكمان قال نحن فى القناويت بالله انت من القناويت ؟؟؟؟ سبحان الله انها راس الفتنة فى ارض المناصير ؟؟؟؟؟

نحن لا نحكم يا اخى الرشيد وكفانا فتن الامر انتهى والفجر ابلج وكل الناس صرفوا واذا كان المنطق كما تقول انت ما خيارك الخرطوم ؟ دعنا اخى الكريم نمشى لى قدام ؟ كما قال احد العارفيين مشاكل الخزان قامت من القناويت وستحل من القناويت انشاء الله وسنعضدد مبادرة كل الخيارات متاحة لكل المناصير اديك كلام بين قوسيين ( اخونا فنان طبعا بنى فى الطوينة واولادة فى عطبرة وهو يعمل فى الكاب فعندما سالتة لماذا هذا قال نقضى الاجازات فى المحلى ) انتهى فيا اخى الرشيد تعال قضى اجازتك فى المحلى اى شخص يفرز الكيمان بعد دا عند ه هوى نفسى ما عندة شغلة ؟ ياخى ناس المحلى راضين بى ناس المكابراب والفداء انت مالك خلى الخلق لى خالقها وكفاك فتن

فى هذا الشهر الكريم

غفر الله لنا ولك اخى ابو مصطفى فى هذا الشهر الكريم

من طرف **خالد عابدين** الإثنين 15 أغسطس 2011, 4:48 pm

صلاةعلي وطعام معاوية يالخبير وده الحاصل اليوم
أهم حاجة الناس يكون عندها مبدأ وقناعة وحرية في إتخاذ القرار

لم أجد الاجابة على تساؤلي إنما وجدت تساؤلات تحمل في طياتها تبريرات غير مقنعة

السبب الاساسي للدعوة الي ترحيل هؤلاء الناس هو الخوف من تاثيرهم علي باقي الناس

بغض النظر عن التأثير ولكن لماذا يظلوا قاطنين طالما إختاروا خيارا آخر -

هل لو رحل هؤلاء الناس ستحل قضيتنا ؟؟؟؟؟؟؟؟؟؟؟؟

وهل إن حدث العكس ستحل القضية ونحافظ على منطقتنا المناصير

وتاني ظهروا ناس صارفين حا نرحلم وتاني حايظهروا ناس صارفين !!!!

أيوه طوالي وبدون تردد حتى وإن بقى القليل في المناصير هؤلا الذين تبقوا هم الذين يحمونها بصدق وهم الذين يتحملون في سبيلها الصعاب ومر الليالي ومافي حاجة اسمها الحكومة تقلل أو تنقص الخدمات - ديل مواطنين وبني آدميين الحكومة ملزمة برعايتهم وتوفير خدماتهم وهم جزء لايتجزء من الشعب السوداني

وعندما نقول نرحلهم أو يرحلوا (الصارفين) فإننا لانقصد ماحدث سابقا من سلبيات ولكن كما ذكرنا سابقا حتى يوفقوا أوضاعهم - لكن استقرار نهائي لا والله - الا بعد التنازل من هناك

ونحن نضارب ونحارب حروب الحكومة بالوكالة من غير ان تخسر الحكومة حتي ثمن الترحيل

حروب شنو - لاها بدر الكبرى ولاداحس والغبراء - دي 1+1=2

وزي مافي ناس كتار صرفوا ليهم من غير ما يكونوا مستحقين حتي الواحد يقولوا ليه اسمك طلع تعال استلم انت خسران شنو ؟؟؟!!!

فعلا ماهو خسران كسب خيارا أختاره بمحض ارادته ووجب عليه البقاء في ما إختار

الشئ الدايرين نسويهو بعد الناس ديل يرحلو احسن نسوي الان الان الان عشان مايرحلوا اخرين

لا نريد أن نمنع احد من الرحيل والهجرة حتى وإن جاء آخرون بعدهم طالما هذا خيارهم الذي إرتضوه ولكن من إختار فعليه الذهاب إلى ما إختاره فورا وبلا تردد

شكرا الخبير على وجهة نظرك التي أحترمها

وشكرا الاستاذ علي الكليس على الرد -
ومنتظرينك ياحازم بعد تـاملات محمود درويش

تفريغ الخيار ياأستاذة هويدا ليس بتناقص الأفراد والاسر وهجرتها فقط ولكن أيضا حتى وإن ظلت جميع المناصير عن بكرة أبيها فيه طالموا أنهم قبضوا وبصموا على الخيارات أخرى -هذا هو المبرر لإخلاء المنطقة بطريقة قانونية بحتة وهذا الذي نقصده
وأما أن كيف لايسع المحلي الجميع - فإنه يسعهم جميعا كما وسعهم سابقا ولكني تحدثت عن جزئية معينة قصدتها في الأولوية في الخدمات والسكن الآن لأصحاب الخيار المحلي في خيارهم

سؤال بريء جدا : ممكن ياجماعة الخير اقبض في الفداء ؟ لكن برضو نفسي في المكابراب !! -

من طرف **ahmed alkhabir** الإثنين 15 أغسطس 2011, 4:59 pm

اعتقد ان هناك مطب قانوني او وهمة قانونية كبيرة :-

في يات قانون او يات كتاب دين يات حديث الصرف يصبح ميرر قانوني لاخلاء المنطقة ؟؟؟

من طرف **خالد عابدين** الإثنين 15 أغسطس 2011, 5:09 pm

في يات قانون او يات كتاب دين يات حديث الصرف يصبح ميرر قانوني لاخلاء المنطقة ؟؟؟

طيب والهيلمانة المن زمان وحصر واحصاء وخيارات وغيرو لزومو شنو كان مافي شغل قانوني ؟
ليتك سألت عن أي تنازل وقعه المهجرون على دفاتر النكسة

من طرف **ahmed alkhabir** الإثنين 15 أغسطس 2011, 5:14 pm

نعيد السؤال لانعدام خاصية التعديل :-

في يات قانون او يات كتاب دين يات حديث يصبح صرف الحقوق زريعة لاخلاء المنطقة ؟؟؟؟

الاسئلة دي يا خالد الناس فكرت فيها بتلقي انو القضية دي انجرفت الي ابعاد بعيدة ماعندها اي علاقة بلب القضية

من طرف **(الحاج شرف)** الإثنين 15 أغسطس 2011, 5:15 pm

التوقيع على اوراق رسميه بالتنازل ياخبير
عن كل ممتلكاتى بالمنطقه مقابل التعويض بالمبلغ المبين اعلاه

من طرف **ahmed alkhabir** الإثنين 15 أغسطس 2011, 5:17 pm

خالد عابدين كتب:
في يات قانون او يات كتاب دين يات حديث الصرف يصبح ميرر قانوني لاخلاء المنطقة ؟؟؟
طيب والهيلمانة المن زمان وحصر واحصاء وخيارات وغيرو لزومو شنو كان مافي شغل قانوني ؟
ليتك سألت عن أي تنازل وقعه المهجرون على دفاتر النكسة

ارجو ان تذكر القانون المحدد والذي مثلا تقول المادة رقم كل صرف حقوقه عليه اخلاء المنطقة

طيب القرار رقم سبعين من رئاسة الجمهورية معناه

خلي القوانين والقرارات

نحنا برانا بلدنا ما عندنا فيها قرار !!!!!

من طرف **ahmed alkhabir** الإثنين 15 أغسطس 2011, 5:23 pm

انا زي شايف انو بعض الناس بيعتقدوا انو انا بدعو الي الي صرف الحقوق والبقاء في المحلي

لكن دا ما انا القاصدوا

القاصدوا

هو بالضبط :-

البخلي الناس تمشي تصرف شنو ؟؟؟ رغم انهم ناس خيار محلي في البداية !!!

يعني نحنا بدل ما نعالج الاعراض الجانبية للمرض احسن نعالج المرض زاتو!!!!!!!!!!

من طرف **ahmed alkhabir** الإثنين 15 أغسطس 2011, 5:31 pm

خالد عابدين كتب:
في يات قانون او يات كتاب دين يات حديث الصرف يصبح ميرر قانوني لاخلاء المنطقة ؟؟؟
طيب والهيلمانة المن زمان وحصر واحصاء وخيارات وغيرو لزومو شنو كان مافي شغل قانوني ؟
ليتك سألت عن أي تنازل وقعه المهجرون على دفاتر النكسة

الهيلمانة والاحصاء كان للعدد واثبات الحقوق

الخيارات كانت لتشتيت الناس واعادة تشريدهم

التنازل لا علم لي به وحسب علمي غير قانوني واي زول يوقع حاجة زي دي يبقي مسكين وما عرف حقوقو واي زول بتكلم عن استلام الحقوق كمبرر للاخلاء من المنطقة يبقي مسكين وما عارف حقو

انا لدي حقوق مقابل ما اغرقته مياه السد

لدي الحكومة واجب تجاهي انها تقدم لي الخدمات في ارضي التي هي اقدم من الحكومة

من الافضل ان نتماسك

التشتت في مصلحة الحكومة

يعني في ثوابت المفروض الناس تنتبه ليها

من طرف **خالد عابدين** الإثنين 15 أغسطس 2011, 5:53 pm

تمام طالما إنك يالخبير والحمدلله لاتقصد بدعوة الناس الي الصرف والعودة للمحلي وطالما أنك سألت عن السبب الذي يجعل هؤلاء الناس يصرفوا رغم إنهم خيارهم محلي ؟
ممكن نعدل السؤال لجزئين :-
س1/ ما الذي يجعل هؤلاء الناس يصرفوا ويغادروا الي الخيارات الأخرى رغم إنهم كاتوا يؤيدون الخيار المحلي ؟ ( المقصود بهم ناس الفترة الاخيرة )
ج1- ممكن نقول أن هؤلاء ربما إقتنعوا وبات لديهم يقينا أنه لافائدة مرجوة من قيام الخيار المحلي طالما حتى ألان لم يستلم الجميع بقية حقوقهم والخدمات لم تكتمل وو...الخ لذلك فضلوا الهجرة للمشاريع والمساكن الجاهزة والتعويض الفوري - إذن هؤلاء نفد صبرهم ولا أحد يلومهم طالما هم مقتنعين بقرارهم

س2- ماالذي يجعل هؤلاء الناس يصرفوا ويستلموا حواشاتهم ومنازلهم ويعودوا للاستقرار مرة أخرى بالخيار المحلي ؟
ج2 يمكن نسميه طمع يمكن نقول ضعف في النفوس - قابلية للإغراء بالمال طالما تولدت وتسربت لهؤلاء معلومات عن إمكانية الصرف والبيع وقبض الثمن والعودة للإستقرار بالمحلي والاستمتاع بهذا المال بغض النظر عن العواقب الوخيمة

التنازل موجود ووقعه جميع من استلموا وهاجروا

نعم الحكومة ملزمة بتقديم خدماتها لك بالخيار بالمحلي طالما إخترته
لكن كيف تقدم الحكومة خدماتها لمنطقة خالية من السكان

من طرف **ahmed alkhabir** الإثنين 15 أغسطس 2011, 6:00 pm

ملاحظات حول انحرافات مسار القضية

كانت المناصير واصبحت تسمي الخيار المحلي ، خيار يعني تقبل كدة او كدة

الحقوق ثمن ما اغرقته مياه مياه السد من نخيلنا وارضنا وامالنا والامنا ومستقبلنا و... الخ اصبحت ثمنا لما تبقي من الخيار المحلي الذي كان اسمه المناصير وعندما تعكس المتحولات اعلاه تصبح المناصير هي ثمن كم نخلة وكم حوض + بدل ترحيل

هل هذا هو ثمن المناصير ؟؟؟؟؟

وكيف تسربت هذه المفاهيم الخاطئة حتي صارت قوانين وكيف قدر لنا ان مثقفينا ومتعلمينا لا يعرفون حقوقهم وواجباتهم !!!!!

من طرف **ahmed alkhabir** الإثنين 15 أغسطس 2011, 6:08 pm

[quote="خالد عابدين"]

تمام طالما إنك يالخبير والحمدلله لاتقصد بدعوة الناس الي الصرف والعودة للمحلي وطالما أنك سألت عن السبب الذي يجعل هؤلاء الناس يصرفوا رغم إنهم خيارهم محلي ؟
ممكن نعدل السؤال لجزئين :-
س1/ ما الذي يجعل هؤلاء الناس يصرفوا ويغادروا الي الخيارات الأخرى رغم إنهم كاتوا يؤيدون الخيار المحلي ؟ ( المقصود بهم ناس الفترة الاخيرة )
ج1- ممكن نقول أن هؤلاء ربما إقتنعوا وبات لديهم يقينا أنه لافائدة مرجوة من قيام الخيار المحلي طالما حتى ألان لم يستلم الجميع بقية حقوقهم والخدمات لم تكتمل وو...الخ لذلك فضلوا الهجرة للمشاريع والمساكن الجاهزة والتعويض الفوري - إذن هؤلاء نفد صبرهم ولا أحد يلومهم طالما هم مقتنعين بقرارهم

س2- ماالذي يجعل هؤلاء الناس يصرفوا ويستلموا حواشاتهم ومنازلهم ويعودوا للاستقرار مرة أخرى بالخيار المحلي ؟
الناس ديل ما رجعوا ياخالد

ديل لسع مارحلوا

ج2 يمكن نسميه طمع يمكن نقول ضعف في النفوس - قابلية للإغراء بالمال طالما تولدت وتسربت لهؤلاء معلومات عن إمكانية الصرف والبيع وقبض الثمن والعودة للإستقرار بالمحلي والاستمتاع بهذا المال بغض النظر عن العواقب الوخيمة
انا شخصيا لا اري اشكالية في انو زول يجي راجع ما يجي راجع شنو يعني

انا بحاول اقنع الناس انها تسعي لاجل الخيار المحلي لكن الزول الفات مني لو جا راجع لن ارفضه

التنازل موجود ووقعه جميع من استلموا وهاجروا

نعم الحكومة ملزمة بتقديم خدماتها لك بالخيار بالمحلي طالما إخترته
لكن كيف تقدم الحكومة خدماتها لمنطقة خالية من السكان

اذا الحكومة لقت البلد فاضية من الناس معناه نجحت ونحن فشلنا يبقي حلال عليها

من طرف **خالد عابدين** الإثنين 15 أغسطس 2011, 6:16 pm

عندما كتبنا سابقا أنه ليس خيار وإنما أصل نباهي به ونفتخر
وعندها رد حدوري بأن قصدنا هوغير ذلك وأننا نقصد أن ساكنيه هم الاصل وغيرهم غير أصليين

الأزمة صنعها بعض قادتنا عافاهم الله في فترة ما عندما بصموا بالعشرة وبإسم قبيلة بأكملها لم تعطهم تفويضا مكتوبا - بصموا بأنهم موافقون على خياري المكابراب والفداء وقسموا البلد لجزئين -محلية الكاب لنمرة عشرة ومحلية شري للمكابراب
كأنما كانو يظنون أن الطوفان سيغرق كل شبر من ديار منصور

من طرف **ahmed alkhabir** الإثنين 15 أغسطس 2011, 6:30 pm

المشكلة ياخالد عندما تعيد النظر فيما مضي وماقدمنا لاجل ان يقوم الخيار المحلي تجد ان اعظم المعارك التي كان من المفروض ان توجه الي الحكومة او تدفع في اتجاه تعمير المنطقة كانت بين المناصير انفسهم

فتامل

من طرف **ود المناصير** الإثنين 15 أغسطس 2011, 6:33 pm

ما أشبه الليلة بالبارحة ؟

من طرف **علي الكليس** الإثنين 15 أغسطس 2011, 6:58 pm

الريس خالد لك التحيه
المسافه بيننا وبينك ليست بعيده صحيح نحن عندنا عتب ولوم علي الذين غادروا مضارب القبيله ومراتع الصبا ولو كانت كلمتنا واحده من اول يوم ماكان حصل لينا دا كلوا ولكن الذي حصل من اغراء واغواء santa

وفقر مدقع وتزييف للحقائق من ان الخيارت الاخري هي جنة الله في الارض وتزوير في صرف حقوق الناس وتقاعس اشبه بالخيانه في عمل اللجان كان اكبر من طاقة كثير من اخواننا الذين ارتضوا التهجير
لكن اكرر ان من يريدون الخيار المحلي لن يغريهم اي شى وانت واحد منهم وسيدافعون عنه حتي اخر قطره من دمائهم والدوله ماعندها عليهم اي مستند قانوني يجعلها تتخذ ضدهم اي قرار حتي حقوقهم لم يستلموها
اخي خالد نحن لانريد ان نبكي علي اللبن المسكوب ماحصل قد حصل ولاسبيل لارجاعه مره ثانيه وانا ياخالد ماعاوز اقول ليك انا زول مخضرم في هذه القضيه واعرف ناس السد جيدا ويعرفونني هؤلاء القوم يستعملون سياسة النفس الطويل لافراغ المنطقه وهو هدف استراتيجي بالنسبه لهم هل تظن ان توصيل الكهرباء من مروي للمناصير مشكله وهي لا تتعدي ال10كي في ..وهل توصيل الطريق من ابوحمدالي كريمه مشكله ايضا ماهم وصلوه حلفا وما اعتقد ان بتاء ثمانيه الف وحده سكنيه في الخيار المحلي تكلفهم شى مااسامه بتى اربعه الف وحده سكنيه لحامية مروي علي حساب السد ..تكلفة مطار مروي تعمر كل الخيار المحلي
انا عاوز اقول ياخالد ان حجم الاستهداف كبير جدا وياريت نحنا متحدين نقدر نحلوا فمابلك ونحن متفرقون والحصل لناس الخيار المحلي في امري واضح بعد ان قل عددهم نقلوا كل المدرسين وناس الخدمات الصحيه
دعونا نعمر الخيار المحلي باهله وبمن يريد الرجوع والاوبه دعونا ننسي الماضي نتسامح ونتصافي ونتسامي فوق الصغائر ونثبت بلدنا ووالله نحنا لو اتحدنا نحرر القدس فمابالك بالخيار المحلي
ادعوك اخي خالد وعبر هذا المنتدي ان تدعوا لمؤتمر جامع لابناء المنطقه للتفاكر ولو تعذر فليكن علي مستوي اقل من الناس لان المرحله التي نمر بها الان تحتاج لكثير من النقاش وتبادل الاراء وقد يكون لبعض الاخوان اراء جيده تفيد في حل هذه الازمه
تحياتي لراعي البوست العزيز ابو مصطفي

من طرف **ابو مصطفى** الإثنين 15 أغسطس 2011, 7:09 pm

يا خالد الغريق يتعلق بالقشة ؟؟؟؟ ونحن غرقنا ودى الوقت متعلقين بالدقشة ؟؟؟؟؟ وطيب مالو وما كويس لماذا التمسك بالبقاء فى الخيار المحلى او المناصير القديمة .. بس عشان حاجة واحدة وهى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ الموية ياناس الموية ؟؟؟؟ ياناس الموية ؟؟ انتو شايفين المغيرب نزول الغزلان والارانب بالوديان على شاطى النيل نان جاى تغنى ما جاية تشرب موية ؟؟؟؟

نحن من النيل ما بنقوم ونحن من النيل مابنولى
دحين الداير يقوم على جميع ارضى العالم اليقوم لكن لا يعمل لينا وجع راس قوم قومة بلا وجع راس الله يعدلها علينا وعليكم ؟؟؟

تحياتى
ابو مصطفى

من طرف **علي الكليس** الإثنين 15 أغسطس 2011, 7:14 pm

ود المناصير لك التحيه والتقدير
انت رجل صاحب راي وفكر ومشوره ..اجاباتك المختصره اعرف انها تعني شى انه ماعاجبك الحال لكن كنا نتمني ان نسمع رايك وبوضوح ونحن نثق انه لايخلوا من الحكمه ولانريد ان تحتفظ برايك في صدرك الناس قتلوا هذه المواضيع بحث وانت تتاوق وترجع

من طرف **ود المناصير** الإثنين 15 أغسطس 2011, 7:38 pm

ALIHADOWRY كتب:انا استغرب كيف يفكر اهلنا فى الخيار المحلى هل هم يطالبون بحقوقهم التى نزعتها حكومة السودان ام يريدون التمدد فى اراضى المناصير ودائما تجد كل الاحاديث نحن من استبلنا فى الخيار المحلى ونحن اولى بة وقد ذكرتنى مقولة الشهيد محمد احمدطة الناطق باسم جماعة السوء التى حكمت السودان بعد مالبنت مانديها الطير وهى مقولة تفكير فاسد هو يعتقد بانة لة الحق بلهف مال الودان ونساءة فعاد السودان مقسما اخوتى ان كان اصحاب الخيار المحلى يريدون حقوقهم نحن واللة الاى اخر قطرة من دمنا معهم ام ان كانو يريدون سرقة حقوق الاخرين فانا اول مقاوم لهذا التفكير الغريب الذى يرى حقوق الاخرين غنيمة

علي حدوري ... تناقض في كل شيء ... أين الحقوق التي تسرق ؟ حتى لوسقت ذلك على وجه ـ الإحتمال ـ ثم أراك تائه ..تقول الشهيد محمد احمد طه وتصف جماعته بالسوء ؟ . ثم من هو هذا الشهيد ؟

علي حدوري ذكرت أكثر من مرة أنه يعجبني تمسكك بفكرك بغض النظر أن يروقني أو لا

ولكنك تتحدث هنا عن انك مع الناس لآخر قطرة من دمك وانت تستكثر أن تشاطر الناس احزانهم وتقدم التعازي بالقسم الإجتماعي وترفض ان تقول مبارك أو تهنيء في نجاح أو تواصل الناس هناك ولو بكلمة فيها روح جديدة أو مواساة ... أو هكذا يكون التواصل ؟؟؟؟

لك شكري وتقديري

من طرف **خالد عابدين** الإثنين 15 أغسطس 2011, 7:45 pm

شكرا أبومصطفى صاحب البوست
شكرا كرم الله
شكرا الرشيد
شكرا الاستاذ علي الكليس
شكرا ود المناصير
شكرا احمدالخبير
وكل المتداخلين لكم الشكر
صراحة لم أجد الاجابة أو الرأي الواضح على تساؤلي
كل الآراء دارت في حكاية الوحدة والكثرة
والتساؤل هو :- رأيكم دام فضلكم في حكاية أصرف وأقبض وتعال أقعد في بيتك في الخيار المحلي وزول بيسألك مافي - (قلنا وتساءلنا أليس هذا أيضا تفريغ للمنطقة من أهلها ؟

من طرف **ود المناصير** الإثنين 15 أغسطس 2011, 7:54 pm

الأخ علي الكليس شكرا لك على هذه الكلمات ... ولكن ارى أن الفتنة بدأت تطل برأسها من جديد

لو أخذنا رأي احمد الخبير فهل يقبل الناس هناك من يرون فيه الخيانة وبيعهم سابقا ـ

ولو ذهبنا إلى رأي السابق ورأي الاخ خالد عابدين فهل نضمن عدم تناقص الناس وتسسلل بعضهم لواذا إلى بقية الخيارات بعد صبرهم طويلا في إنتظار الحلول ؟

ثم هل نستطيع يا علي الكليس ان نجمع العقلاء من المناصير في كل القبل لكلمة واحدة وهي المناصير في البلد وفي كل الخيارات والشتات ؟ لو ضمنا ذلك أو حتى نسبة الـ 50 % منه فان النجاح في كل الخيارات مضمون بنسبة 100 % .. هذه رؤيتي ولكني لا آمل في نجاحها لا تشاؤما مني ولكن الواقع يقول ذلك

من طرف **ahmed alkhabir** الإثنين 15 أغسطس 2011, 7:55 pm

الاخ خالد تحياتي

طبعا دا سؤال حا يزوغو منو ناس كتيرين

فعلا دا تفريغ للبلد

لكن استمرار الاوضاع علي ماهي عليه برضو تفريغ

النتيجة واحدة

لذلك

وعليه

انا رايي الشخصي انو نحنا ما نخسر زول واعتقد ان معركتنا مازالت في البداية ونحتاج الي كل منصوري وفي ميادين كثيرة

من طرف **علي الكليس** الإثنين 15 أغسطس 2011, 8:48 pm

والتساؤل هو :- رأيكم دام فضلكم في حكاية أصرف وأقبض
وتعال أقعد في بيتك في الخيار المحلي وزول بيسألك مافي - (قلنا وتساءلنا
أليس هذا أيضا تفريغ للمنطقة من أهلها ؟

والله ياريس يمكن نحنا ماقادرين نوصل ليك فهمنا بطريقه كويسه والله ماعارف انت ماقادر تفهمنا ...صحيح كلامك لو الناس كلها صرفت واستلمت بيوتها في الخيارات الاخري لن تكون هناك بلد من ناحيه قانونيه ويجب ان يكون لنا عمل مكثف مع اخواننا الذين يريدون التهجير بعضهم لهم ظروف قاهره نعالج مايمكن علاجه ونقنع من نستطيع ولاتنسي ان ادارة التعليم بالبحيره نقلت 16 معلم لمجرد ورود اسمائهم في كشوفات المهجرين بدون ان يتحروا عنهم ..وقد ذكرت لك في تعليقي السابق ماحصل لناس امري.... وذكرت ايضا ان ناس الخيار المحلي لايبدلونه بكنوز الدنيا ..لاتخاف ياريس علي الخيار المحلي بس خلوه يعمر بالدايره والمابيه ..والحكومه دي مادايمه وسوف تشرق الشمس من جديد ...سلامي

من طرف **خالد عابدين** الإثنين 15 أغسطس 2011, 9:22 pm

ahmed alkhabir كتب:الاخ خالد تحياتي

طبعا دا سؤال حا يزوغو منو ناس كتيرين

فعلا دا تفريغ للبلد

شكرا الاخ أحمد الخبير علي الاجابة

علي الكليس كتب:

...صحيح كلامك لو الناس كلها صرفت واستلمت بيوتها في الخيارات الاخري لن تكون هناك بلد من ناحيه قانونيه

شكرا أستاذنا علي الكليس على الاجابة
هذا ما كنت أصبو إليه

للمناصير عواطفنا

وبالمناصير مواقفنا

ولّما تهب عواصفنا

ما حيله قوانيك؟

وأرض عرض ماللعرض
حب الأرض سنة وفرض
لو قالوا لابد ننطــــــرد
بي حالنا دونك ننقرض

من طرف **الرشيد طه** الثلاثاء 16 أغسطس 2011, 3:03 am

كرم الله حامد خلف الله كتب:نحن لا نحكم يا اخى الرشيد وكفانا فتن الامر انتهى والفجر ابلج وكل الناس صرفوا واذا كان المنطق كما تقول انت ما خيارك الخرطوم ؟ دعنا اخى الكريم نمشى لى قدام ؟ كما قال احد العارفيين مشاكل الخزان قامت من القناويت وستحل من القناويت انشاء الله وسنعضدد مبادرة كل الخيارات متاحة لكل المناصير اديك كلام بين قوسيين ( اخونا فنان طبعا بنى فى الطوينة واولادة فى عطبرة وهو يعمل فى الكاب فعندما سالتة لماذا هذا قال نقضى الاجازات فى المحلى ) انتهى فيا اخى الرشيد تعال قضى اجازتك فى المحلى اى شخص يفرز الكيمان بعد دا عند ه هوى نفسى ما عندة شغلة ؟ ياخى ناس المحلى راضين بى ناس المكابراب والفداء انت مالك خلى الخلق لى خالقها وكفاك فتن

فى هذا الشهر الكريم

السيد كرم الله عاجز عن افهمك او تفهمنى انا لا ادعو الى فتن لكن لن اسمح ان تتسرب المناصير بالطريقة التى تريدون كل زول مخير فى خياره وكل زول يمشى محل ما اختار دى مشكلة طالما انت اخترت خيار تانى داير شنو فى خيارات الناس ما تمشى محل اخترت وبعدين شنو حكاية كل الناس صرفوا

السيد كرم الله ان كنت تفهم مخطط السد وتشارك فيه فهذه مصيبة اما ان كنت لا تفهم فالمصيبة اكبر

من طرف **ALIHADOWRY** الثلاثاء 16 أغسطس 2011, 5:49 am

الاخ ود المناصير اسف لعدم اهتمامى بالاجتماعيات اما بخصوص التناقض كما تقول انا اعتبر الشهيد محمد احمد ظة شهيد كلمة حق وهى غير الشهادة المتعارف علها دينيا اما بخصوص المناصير قد قدم الاستاذ خالد عابدين سؤال فاستفسرنا منة هل يريد المناصير حقوقهم ام يريدون التمدد فى ماتبقى المناصير حتى يحدد اهل الخيار المحلى امرهم ان كان تمدد فهاهم الغوغاء يخرجون مايريدون من المناصير اما ان كانت حقوق فنحن وكل الناس مع حقوقهم دون التعدى على حقوق الغير

من طرف **(الحاج شرف)** الثلاثاء 16 أغسطس 2011, 3:55 pm

طيب قبل كدة ما رحلنا الناس

وتاني ظهروا ناس صارفين حا نرحلم وتاني حايظهروا ناس صارفين !!!!

ونحن نضارب ونحارب حروب الحكومة بالوكالة من غير ان تخسر الحكومة حتي ثمن الترحيل !!!!

التاثير لم يعد بالمجاورة والاحتكاك يعني ما شرط الزول يكون قاعد معاك في البلد عشان يؤثر علي باقي الناس او يستفزهم !!!!!!!!!! الشغل ممكن يكون بالتلفون !!!! وزي مافي ناس كتار صرفوا ليهم من غير ما يكونوا مستحقين حتي الواحد يقولوا ليه اسمك طلع تعال استلم انت خسران شنو

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
Rolling Eyes

من طرف **ابو مصطفى** الثلاثاء 16 أغسطس 2011, 5:03 pm

السيد كرم الله عاجز عن افهمك او تفهمنى انا لا ادعو الى فتن لكن لن اسمح ان تتسرب المناصير بالطريقة التى تريدون كل زول مخير فى خياره وكل زول يمشى محل ما اختار دى مشكلة طالما انت اخترت خيار تانى داير شنو فى خيارات الناس ما تمشى محل اخترت وبعدين شنو حكاية كل الناس صرفوا [/color][/b]

[b][color=blue]السيد كرم الله ان كنت تفهم مخطط السد وتشارك فيه فهذه مصيبة اما ان كنت لا تفهم فالمصيبة اكبر[/

شكلوا كده كرم الله فاهم اللعب كويس وعامل فيها حريف وعاوز يفرغ المنطقة لكن دى يلقاها عند غافل ؟؟؟

تحياتى
ابو مصطفى

من طرف **حازم** الثلاثاء 16 أغسطس 2011, 6:15 pm

والتساؤل هو :- رأيكم دام فضلكم في حكاية أصرف وأقبض وتعال أقعد في بيتك في الخيار المحلي وزول بيسألك مافي - (قلنا وتساءلنا أليس هذا أيضا تفريغ للمنطقة من أهلها ؟.
سلام كاتب المقال ابومصطفي سلام ولكل الاخوه المتداخلين
ورمضان كريم
الاخ خالد عابدين ماكنت اريد ان اتداخل وذلك لشده اعجابي بكلمات المتداخلين
والذي دفعني للكتابه لاجب علي سؤالك لأني كنت حاضر عندما اطلق ذلك الشعار ومن مناصريه وذلك بعد دراسه سريعه للاهل بالمناصير وانهم وللظروف السائده سوف ينهار الصف والاجدي ان يكون هذا الانهيار مسيطر عليه وبأيدينا ؟
حتي لايتفلت الناس وان يكونوا تحت قياده واحده جاءت دعوات فاليصرف واليبقي الصارف متمسكا بوطنه ؟ فالبطن اولي من الوطن ؟هكذا كان واقعنا حينها ؟
ولكن تقدمت اداره السد خطوات عندما علمت بالخطه البديله ؟ فكانت ياكرزاي تعال منسلي ؟؟؟ والفلوجه ؟؟ ودعوات الاقتتال ؟ وهدم بيوت الغلابه ؟

وللاسف مازالت القطيعه بين ابناء المناصير
وللاسف مازالت اداره السد من يحرك الناس هنالك

من طرف **ahmed alkhabir** الخميس 18 أغسطس 2011, 5:34 pm

الشعب يريد اسقاط النظام

من طرف **ابو مصطفى** الخميس 18 أغسطس 2011, 5:46 pm

حازم كتب:والتساؤل هو :- رأيكم دام فضلكم في حكاية أصرف وأقبض وتعال أقعد في بيتك في الخيار المحلي وزول بيسألك مافي - (قلنا وتساءلنا أليس هذا أيضا تفريغ للمنطقة من أهلها ؟.
سلام كاتب المقال ابومصطفي سلام ولكل الاخوه المتداخلين
ورمضان كريم
الاخ خالد عابدين ماكنت اريد ان اتداخل وذلك لشده اعجابي بكلمات المتداخلين
والذي دفعني للكتابه لاجب علي سؤالك لأني كنت حاضر عندما اطلق ذلك الشعار ومن مناصريه وذلك بعد دراسه سريعه للاهل بالمناصير وانهم وللظروف السائده سوف ينهار الصف والاجدي ان يكون هذا الانهيار مسيطر عليه وبأيدينا ؟
حتي لايتفلت الناس وان يكونوا تحت قياده واحده جاءت دعوات فاليصرف واليبقي الصارف متمسكا بوطنه ؟ فالبطن اولي من الوطن ؟هكذا كان واقعنا حينها ؟
ولكن تقدمت اداره السد خطوات عندما علمت بالخطه البديله ؟ فكانت ياكرزاي تعال منسلي ؟؟؟ والفلوجه ؟؟ ودعوات الاقتتال ؟ وهدم بيوت الغلابه ؟

وللاسف مازالت القطيعه بين ابناء المناصير
وللاسف مازالت اداره السد من يحرك الناس هنالك

الكلام دا كلام مليان شديد ياحازم لكن القصة حمار وعار بقت قضية المناصير لاقادرين نلم فى الحبل ولا قادرين نلم فى الحمار

من طرف **ALIHADOWRY** الخميس 18 أغسطس 2011, 9:00 pm

الاخ خالد انا فى انتظار الاجابة

من طرف **ALIHADOWRY** الخميس 18 أغسطس 2011, 9:06 pm

طبعا كنت استغرب مقولات الباشمهندس هاشم على الجزولى ومحاولاتة لربط المناصير بالحضارة السودانية قبل دخول الاسلام الجزيرة العربية فاكتشفت ان ربط الاستاذ هاشم كان قياسا على تشابة نفسية المنصورى مع الحضارات السابقة وهو ماداير الان فى الخيار المحلى فلايمكن ان تصبح ماتملكة خيارا وهو مايصيح فية اصحاب مملكة النوبة

من طرف **yousif** الخميس 18 أغسطس 2011, 11:41 pm

بعد التحيه أهلي : الاستاذ علي حدوري عن أي حق تتحدث للذي صرف حقه واستلم حواشته في عشره أو المكابراب ,,عن أي إستيلاء فالارض للمناصير فمن هاجر فملكيته للارض انتزعت دينا وقانونا والارض لمن افلحها ...وكونك تقيف ول ماتقيف أنا شايف مافارقه كتير لان اصحاب الخيار المحلي أكلو نارن زمان وجاهزين ياكلوها تاني وتالت وليس لنا منه علي احد او علينا والحمد لله ,,,,,,,ويأستاذ الكليس نحن لن نخدع ولكن نباع علنا ولكي تسد كل الزرائع علي إدارة السد ومن شايعها ,,,كل المناصير حر في إختياره ولكن أن تختار أحد الخيارات وتسكن في سواه فهذه الفتنه بعينها ,,,,,,,,,,,,,,,,والله ولي التوفيق

من طرف **ALIHADOWRY** الجمعة 19 أغسطس 2011, 12:10 am

اخى يوسف ماتمتلكة ليس خيارا طبعا الباشمهندس لة الحق فى ارجاع المناصير الى الحضارة النوبية

من طرف **yousif** الجمعة 19 أغسطس 2011, 1:13 am

بعد التحيه أهلي : صدقت أستاذ علي ليس خيارا ,,,بل موطنا ومستقرا نشأنا فيه وآباؤنا الأولون ,,,,فما بالك بالذي يملك عن سنين معدوده ,,,,,,,,,,,,,,فهو خيارنا بلغتهم وموطنا بلغتنا فبأي يفهمون نحن معهم ودونه المهج والارواح ,,,,,,,,,,,,,,,,

من طرف **ALIHADOWRY** الجمعة 19 أغسطس 2011, 2:12 am

هو موطنا وكلنا لة نهوى وافتكر قرار رئيس الجمهورية حسم الامر

من طرف **ALIHADOWRY** السبت 20 أغسطس 2011, 1:41 am

الاخ خالد انا فى انتظار الرد

الاخ حدوري كيف الاحوال اولا ياسيدي شكرا علي تعقيبك علي ما سبق وكتبت في بوستات سابقه تناولت الحضاره القديمه والغرض اساسي من تلك البوستات هو كما ذكرت ربط اهلنا بماضيهم وحضارتهم منذ الاف السنين واننا اصلاء في هذه الارض واصحاب سياده مطلقه من قبل ان تكون دوله جمهوريه السودان بمعني اننا سابقون لتكوين مايعرف باالسودان الحديث واني والحمد الله وجدت هذا في تعليق الاخ يوسف (النفس الحار في انه صاحب حق ولن يتنازل عنه واعني سيادته وحقه المطلق في الارض )

وبصراحه اري ان هناك مسأله اهم واعمق واغلي من الحقوق الماديه ( موضوع التعويض المادي ) هناك اشياء لاتعوض باالماده مثلا وجودك في الارض ومنبتك ومنبت اجدادك الصراع يدور في ان تكون بلا هويه وذلك بنزع الارض وان تكون مثل المنبت ويدفع اجيالنا الثمن وتلاحقنا لعناتهم مثل التي حدثت للفسلطنين عندما فرض البعض في بيع الاراضي لليهود ومثل تلك التي حدثت في حلفا حديثي عن الماضي وربطه باالحاضر عنيت به لفت الانظار الي انه لايعقل ولايمكن بأي حال من الاحوال ان نقطع تواصل الاجيال في هذه الارض تواصل الاجيال الذي بدأ ببدايه اول حضاره ظهرت في النيل وهناك جهات تحاول ان تغير التاريخ وتزوره ويكون ذلك بمحاوله تشكيل جديد للسودان ( انظر المقال المقتبس من الصحافه بواسطه النفر ايضا مقال لحسين خوجلي اثار لغط بخصوص هويه السودان وانها يجب ان تكون عربيه ايضا هناك مقال مكتوب عن هويه السودان في بوست في هذا المنتدي )

كل هذا الصراع نحن جزء منه شئينا ام ابينا وهناك ثمن سوف يدفع ان نحن تهاونا

وفي الختام انبه الي انه من الواجب شرعا الدفاع عن حق الوجود هذا الحق الذي اعطاني له الله سبحانه وتعالي

وهو الذي خلقني وخلق الارض ولايجب ان تعطي لمخلوق مهما كان قدره كما انه من الواجب الدفاع عن المكتسبات الثقافيه والحضاريه المتوارثه اما عن فهم المسؤلين القاصر ومحاولتهم لطمس هذا التاريخ وان تكون البدايه ببدايه توليهم للحكم وفصلهم للجنوب ومحاربه الاقليات ومحاوله فرض ثقافه معينه علي الاخرين فهذا لن يكون باالقوه الجبريه وانما لكل ثقافه طريقتها التي تسود بها علي الاخريات كما هو معروف في القول ( حضارات سادت ثم بادت )

اما التاريخ القديم فهو تراث انساني لابد من استصحابه وما علم الاثار الا لهذا الغرض ونحن والحمد الله الف مره استفدنا من هذا الفضل العلمي في الاكتشافات الاخيره

واخيرا اكرر ان لايكون النقاش متمركز في الحقوق الماديه فقط فهناك اغلي واهم مليون مره من هذه الحقوق الماديه

كما انه حتي هذه سوف تعود اليك في القريب العاجل بأكثر مما كان وبأكثر مما تتوقع بس حاول ان تتفكر وتتمعن وان لم تستطع فعليك باالصبر والتأني تظهر لك النتائج حتما

من طرف **ود المناصير** السبت 20 أغسطس 2011, 5:24 am

ALIHADOWRY كتب:هو موطنا وكلنا لة نهوى وافتكر قرار رئيس الجمهورية حسم الامر

الرئيس منو ؟

والأمر شنو ؟

حدوري مالك تزوغ وتربط

من طرف **ALIHADOWRY** السبت 20 أغسطس 2011, 6:15 am

اخى الرئيس هو من قدمت لة المناصير الشهداء تلو الشهيد اما القرار فهو القرار سبعين

من طرف **ALIHADOWRY** السبت 20 أغسطس 2011, 6:18 am

اخى هاشم شكرا لاهتمامك بتوثيق ماضى وحاضر ومستقبل ولكن عنيت امر اخر ولك الشكر

من طرف **ود المناصير** السبت 20 أغسطس 2011, 7:25 am

ALIHADOWRY كتب:اخى الرئيس هو من قدمت لة المناصير الشهداء تلو الشهيد اما القرار فهو القرار سبعين

والله يا حدوري السكن حول البحيرة ما بيقرروا رئيس ولا مليون قرار سبعين

نقرروا نحن المناصير وبس