عندما كنتُ في سنة أولى إبتدائي

لا أعرف بالضبط من أي سن يبدأ يتذكر الإنسان، ولهذه السن نسبة معروفة عند علماء البيولوجي، يحصل تفاوت قليل وكثير بين الناس حسب الجينات، وحسب السلسلة الوراثية. ولكني أظن نفسي أتذكر منذ وقت باكر جداً..قد يقل عن أربعة سنوات.. لأني كنت أذكر أحداث لأمي ،حدثت لى، كانت تنط، وتنخلع، أو أحداث حدثت في البلد، أذكرها لها.. كانت تنط وتنخلع وتندهش، تقول لى معقول إنت تتذكر هذه الحادثة وهذه القصة، إنت عمرك كان كدة بس؟
من ضمن الأحداث التي ذكرتها لها واندهشت فيها..
كانت لنا ساقية صغيرة.. مربوطة في أرض المشايخة تسمى الارض( مـِعـَيتيقة) بعدين نسبة لأن الأرض في شري ضيقة، جاء ساق معنا الصيف.. في ارض ( معيتيقة) هذه علي ود الشيخ وزوجته فاطني بت كواب..وزوجته( بت قروني) وعملوا راكوبة كبيرة بين نخلتين معمولة ومعروشة بالجريد.. ونظموها وعملوا فيها غرفة نوم.. وغرفة استقبال كأروع ما يكون..تذكرت هذه الأشياء عندما حضرت مغترباً للخليج، وأنا كما ذكرت سابقاً، لم أبحث عن الاغتراب كبقية المغتربين.. وإنما نقلت من قسم هندسة هلتون الخرطوم الى قسم هندسة هلتون أبوظبي.. كما نقل عدد كبير من زملائي في الاقسام المختلفة في هلتون الخرطوم الي فنادق هلتون أخرى حول العالم..
فوق، جنب جدو ل الساقي، فاطني بت كواب قالت لي، صديق كدي دق لينا الطنبور بي خشمك.. وكان معروفاً عند الناس أني أدق الطنبور بصوت خشمي، كأحسن ما يكون الإيقاع، حتى تحسبه طنبوراً حسياً، مجسداً..
أمي لم ترضى طلبها ذلك، وكنت أنظر الى وجهها، رأيتها تعض شفتها، كناية لكي أرفض لها، مع أن فاطني بت كواب صديقتها،صعب على أمر المرأة وإلحاحها في الطلب، وعز على أن لا أجاملها، فانصعت لطلبها وتجاهلت أمر أمي الخفي، وهي بالطبع غير قادرة أمام صديقتها ، المجاهرة برفض الطلب..
كانن قاعدات أمام الجدول، تحت شتلة تمرة موحوماااد.. تمرها شايل أحمر لسه ما استوى.. قطعت جريدة نخلة، نقرشتها، ثلثتها كقوائم الطنبور، وضعتها في إبطي كمن يحمل طنبوراً.وبدأت العزف وأتبعها بنقر رجلي على الأرض لحفظ الإيقاع.. علقت فاطني بت كواب قائلة( أديب والله أديب من نقرة كراعو أديب) انتهي الأمر الذي كنتم فيه تستفتيان.. ولكن عند أمي لم ينتهي، كنت أخشاها، لما نرجع البيت تديني علقة جامدة، أو مر عتاب.. حمى اعترتني بالليل، ولكنها حمى خفيفة، ليست كتلك.....
أمي قالت لى المرة سحرتك.. كلو من عنادك!!!! قدر ما عضيت لك.. وأوميت لك.. تجاهلتني.. المره تروح بيتا ظافرة غانمة في أمان، وإنت تبلى وتوكر في رقبتي بالحمى والسهر...
جابت مبخر.. مخبر... وبخور.. وعود عين... ومعاهو شبايي.. شب. أبيض.. وبخرتني من عينها.. وغملتني بثوب تحت وطأة دخان الشب والعود والبخور الضكر.. لما انقطع أوج الدخان.. عندهم عادة ناس المناصير، يتفحصوا خلاصة وعقابيل الشبايي.. فإن ظهر جهاز ذكورة مرسوماً عليها.. قالت: سحرك راجل( ضبيتو بالله) وإن ظهر عليها جهاز أنوثة قالت: ضبيتا بالله.. سحرتك مرة..
نظرت هي للشبايي وقالت: أيوه أنا عارفاها سحرتك..
نظرت أنا لقاع المبخر لم أر في الشبايي شئ، لاجهاز ذكورة ولا مدلولات أنوثة.. بل شكل الشابيي صار يشبه بذرة الزيتون المحروقة.
هي لأنها هيأت نفسها وذهنها، أن سحرتني إمرأة
كل أمهات جيلنا يفعلون ذلك وحتى اليوم، ينظرون للشبايي بعد عملية ساونا التبخير..ويطلقون اعتقاداتهم جزافا.
سنة أولى إبتدائي:-
ثماني سنوات وتدخل المدرسة.. ولكنى كنت أتذكر قبل ذلك بأعوام أحداث كثيرة وغزيرة، كأنها البارحة.. تعتبر ثماني سنوات عمر كبير، سبقته أحداث.. قالوا ثماني سنوات عشان تكون قادراً على تجهيد نفسك بنفسك. في الداخلية. تدخلا وتمرقا.. وتطلع سريرك، وتفرش برشك.. بروش كانت تفرش على العناقريب..ثماني سنوات.. عشان سوف تسكن الداخلية بمفردك..
تذكرني أمي كل مرة بأمر المدرسة، وأنك بقيت راجل كبير، يجب أن تمشي المدرسة، لتتعلم، كان يمسكني هاجس غريب، وضعف قوى وقتما أتذكر المدرسة، وأنني سوف افقد اللعب والعوم والشرييك.. وحفر دقيرات الطين والجبادة..وأنني سوف أغيب عن بيتنا أسبوعين.. قالوا لنا أن أولاد الداخلية يطلقوهم كل أسبوعين، ومافي داعي كل أسبوع.. عشان نقرا.. عشان القرايي الأخدناها ما تروح من راسنا..
عشان يقبلوك في سنة أولى إبتدائي في مدرسة شري الأولية.. كان اسمها الإبتدائية وبعدين بقت الأولية.. عشان يقبلوك لازم تكون كسرت سن.. يعني بديت تكسر أسنان اللبن..
جينا قاطعين من الغرب بالمركب ومعى والدي.. وناس كتيرين، جايبين أولادهم للمدرسة.. وقفنا صف.. كشفوا على أسناننا زي الغنم..أو زي الخروف العايزين يشتروهو..بعد زمن ودخول لمكتب الناظر. أعلنوا المقبولين بسنة أولى ابتدائي..
دخلنا الفصل.. كنب بدون مكان للمحابر لأننا نكتب بقلم الرصاص.. أقلام حكومة صرفوها لينا زيها في السوق مافي.. ليها ريحة. ريحة حكومة حكومة.. برايات حديثة زي الهسه مافي.. تبرا بي موس.. وموش كل واحد عندو موس.. تستلف الموس والفصل كلو فيهو موسين تلاتة.. قالوا لينا إنتو محظوظين.. قبل سنتين من دفعتنا. كانوا يكتبوا باقلام إسمها أقلام الأردواز.. على لوح من الأردواز أيضاً. لا أعرف الأردواز شنو؟ لكن قالوا كدة.. العصر نلعب.. وجدنا كمية خرافية من أقلام وألواح الأردواز مكبوبة في العقبة بين بيت الناظر والداخلية.. قالوا كبوها عشان الناس بدأوا عهداً جديداً في الكتابة بأقلام الرصاص على الكراسات.. الكراسات كان يصرفوها لينا.. ما بتشتري ولا كراس واحد.. لها ريحة الورق والطباعة..لما دخلنا أولى إبتدائي
الناظر كان إسمو
صالح من الحلفاوين.. كان جايب معاهو ود أخوهو إسمو داوود يقريهو معاهو.. ولكنه كان في سنة ثالثة ونحن في سنة أولى..
المدرسين الكانوا موجودين
1 بكري الحاج.. من المحس
2 تاج السر نعمان عثمان يا دابو اتعين جديد.. سنة 1963.. كان أستاذ بمعنى الكلمة..
3 أستاذ محمد شريف الطيب سعد من مقرات..
4 أحمد محمد عثمان كارلس
سنة أولى كلها درسنا ليها تاج السر نعمان عثمان حساب. وعربي ودين فقط الدروس في أولى.. ما عندنا علوم ولا تأريخ.. والعلوم كانت تسمي حصة الجغرافيا.. أول يوم في المدرسة شاكلت طالب من المهوة... محمد الحسن عبادي.. شاكلته في الفسحة بين المزيرة ومكتب المعلمين وطربيزة الفطور.. عرفت من الولاد أن الولد ده شكاي للمدرسين. وأنهم سوف يدوني علقة جامدة..حاولت أن استجدى الطالب.. قلت ليه إنت من المهوة؟
قال لى نعم..
قلت ليهو أمي عندها سكان نوى.. جابت ليهو دردار سمح خلاص ولونو أحمر من عقبتكم عقبة المهوة.. كانت في بكا في المهوة وعينها وقعت على الحجر السمح ده من عقبتكم؟ وشالتو..
قال لى بالله عقبتنا فيها حجار سمحي كدة؟
قلت ليهو نعم
نسى موضوع الشكلة.. وكان قبلها يضج ويصيح حتى خوفني.. ضربتو كف؟ لأنو قال لى إنت ما مفروض تدخل الداخلية، عشان أهلك قريب.. نحن نجي من المهوة.. أبوك صاحب الناظر..
بقصة الدردار هذه نسى قصة الكف
حمدت الله
لأنو الأولاد خوفوني، وقالوا لى أقلاهو راح يفصلوك من الداخلية، ده كان ما فصلوك من المدرسة، خفتا.. لا أعرف قوانين المدرسة، لكن الأولاد القبلنا في سنة تانية قالوا لى كدة!
بعد شوية دخلنا الفصل، سنة أولى.. مستوحشين زي الغنم الجابوها من الخلا..
هيئة الفصل:-
كانت تحفة المدرسة.. المباني من الطوب الأحمر.. مضروبة جير أصفر.. أحسن مباني في البلد كلها المدارس.. والشفخانة.. مافي أي بيت في المناصير كلها من الطوب الأحمر غير المدارس والشفخانة..
نظام المدرسة يشبه حرف إيي الإنجليزية من غير سنة حرف ايي في النص.. زي فردة القوس المربع.. أي خط طولي مع خطين عرضيين في الأطراف..
سنة أولى في الآخر من جيهة العقبة.. وسنة رابعة في الأول من جهة البحر
سنة أولى بعدها مكتب المدرسين.. بعدها سنة تانية.. بعدها سنة ثالثة، بعدها مكتب الناظر.. أمامه زير الناظر والمدرسين.. بعدها سنة رابعة.. ملصوقة في سنة رابعة برندة الأعمال.. كل الشبابيك والأبواب مضروبة بوهية خضراء.. لم ينجرها نجارين المناصير.. قالوا جات من عطبرة..أو بربر.. رائحة البوهية فيها مميزة..
دخلنا سنة أولى.. كوركوا قالوا سنة أولى الفصل.. سنة أولى الفصل..دخلنا وكلنا خوف يقطع قلبنا.. كانت المدارس منظمة.. حتى كنب وأدراج سنة أولى تختلف عن سنة تانية وثالثة ورابعة.. ليه! مافيها مكان للمحابر.. بقية الفصول، الكنبة فيها مكان للمحابر.. نحن نكتب بأقلام الرصاص بس..
دخل علينا في الصف، مدرسنا تاج السر نعمان عثمان.. سوف يكون مسؤولاً عن كل شئون الصف الأول.. ويدرسنا جميع المواد كما ذكرت.. سلم علينا.. وقال كل واحد يقوم يعرف نفسو.. ومن وين هو. أولاد السلمات والضقولة والحنانين والنعوفاب مافي داعي يعرفوني بأسماءهم.. لأني بعرفهم قبل المدرسة.. وجاب كراسة كتب فيها أسماء الطلبة الفي الداخلية وأسماء الطلبة الفي الخارجية..
بدأنا وبدأت معنا مجموعة، ولكني لاحظت بعضهم في سنة تانية وسنة تالتة تخلف عنا.. يبدو أنه هنالك طلبة يعيدون في سنة أولى نفسها وكذلك تانية وثالثة بامر المدرسة، أو أمر ذويهم يصروا على إعادتهم لما يشعروا أنهم يجوا في الترتيب عشرين أو ثلاثين أو أربعين.. يقولوا عشان يقووا دروسهم.. عشان المنافسة كانت صعبة للوسطي.. والإعادة كانت مسموحة..
دخل معنا كبداية في صف أول هذا العدد الذي سوف أذكره.. ولكننا وجدنا عدد آخر في سنة ثانية وثالثة ورابعة لما انتقلنا اليها..
بدأ معنا في سنة أولى
1 علي حسن علي صديق.... من شري قرية أم لقاديب
2 عبد الله سليم علي الشاعر.... من شري قرية أم لقاديب
3 سليمان المنصور.... من شري قرية أم لقاديب
4عبد الله علي عبد الله ...... من شري قرية الدمورة
5تاج السر سليمان الشمباني.... من شري قرية المتيرة
6 سليمان محمد أحمد الشمباني..... من شري قرية المتيرة
7عمر يس صديق ...... من شري قرية بهيي( بهية)
8 البشير صديق مكي..... من شري قرية بهيي
9حسين الحسن مصطفى.... من شري قرية العبابسة
10سليمان الأمين الحاج .... من شري قرية فقاعة
11محمد أحمد محمد الأمين.( محمد بروي) من شري قرية فقاعة
12 عبد القادر الأمين الحسن..... من شري قرية فقاعة
13حامد علي محمد الإمامي...... من شري راس الجزيري.. الإماماب
14سراج الدين خلف الله..... من شري قرية كاسر
15 عدنان.......... شرق شري
16 بخيت بشير الماحي.... من شري المهوة..
17 إبراهيم أحمد حبيب الله..... من شري المهوة
18 خليفة عمر على بابكر... شري.. العوناب
19سليمان حامد سليمان.. من العمارين
20غالب عبد العزيز حماد... قرية الهجيليج
22 عيسى صديق فضيلي.... قرية التولاب
23 عثمان علي الحمباقي... قرية أم كريكبة
24حمزة الدقير محمد أحمد حجازي.... قرية كوينة
25 عباس الدقير محمد أحمد حجازي.... قرية كوينة
26 عبدالله صديق عمر( الكـِرِجْ) قرية عصمة
27إدريس حميدان إدريس حميدان... قرية الصفيحة
28ود ناجي محمد أحمد ناجي........ قرية العقيبة
29 عمر محمد علي ضقولي .... قرية الضقولة
30محمد الفكي علي..... قرية الصغيراب
31 عباس سليمان السلومي.... قرية الشلال
32عطا الفضيل سليمان سيد أحمد... قرية الصفيحة
33 قسم السيد حوماااد دين... من جزيرة دربي
34 محمد علي أبو زيد... قرية دربي
35 حسن إبراهيم أحمد الغاني.. جزيرة أوس
36 مكي عبد الرحيم .... قرية كمساب
37 عبد الرحمن علي حمادابي.. جهة أوس أو كمساب
38 سليمان بطران كاره... جزيرة شرري
39 عبد الله محمد علي الشيخ.... جزيرة شرري
40 ألياس الصادق..... قرية السنودة..
41 زيدان علي خليفة... قرية السلمات
42 خليفة محمد المدين.. قرية التولاب
هذه تقريباً الدفعة التي بدأنا بها في أولى إبتدائي.. وقد تخلف معظمهم عنا في مراحل دراسية آتية..
بعد أن أخذ الأسماء المدرس تاج السر نعمان عثمان.. قال أبواتكم واقفين على باب الفصل في الخارج.. يطلعوا تلاتة تلاتة.. عشان يودعوكم ويدوكم مصاريفكم.. تاني أسبوعين ما راح تشوفوهم.. طلعنا تلاتة تلاتة.. أبوي ودعني وقال لى بقيت راجل كبير عاد شد حيلك.. وأداني مصاريف ريال.. قلت ليهو تاني ما راح نشوفكم؟ قال لى: كلها أسبوعين وتجي تقضي معانا الخميس والجمعة.. بكيت.. ونزلت على طامة كبري.. الدماع روق روق... تف... تف.. دخلت الفصل وكلي أسى وحزن يخيم على جميع افكاري. تذكرت اللعب والعوم.. سرحت.. تذكرت أختى عاشة.. تذكرت زوجة عمي عاشة تحجينا بالليل.. فاطني السمحي.. حجوة السحاريي.. حجوة البعاتي التي كانت تخوفنا بها.. هواجس لاحصر لها.. سوف أعيش مع ناس أغراب.. داخلية تطلع سريرك براك.. تفرش البرش عليهو براك.. دقيت زول... دقاك زول... وأي.. حاجة تخوف.. الجلد في المدرسة موت.. الأولاد الكبار يخوفونا.. تانية وتالتة ورابعة.. يالها من مصيبة... تاني حصة تاج السر نعمان سرحت فيها.. وما عرفتهم بيقولوا شنو؟ لكن كبداية.. كانت ونسة عامة.. وتعريف بالمدرسة.. البلد كانت هادية.. عدد الناس قليل.. المدرس كأنه إله.. تخاف منو.. في الدرب ما بتمشى معاه..
خاتمة:-
هذه كانت سنة أولى إبتدائي

من طرف **هويدا ابوشعر** السبت 14 مايو 2011, 1:15 am

هذا كان اول يوم فى اولى ابتدائى. ياريت تكمل

دقيقة يا نورة إنت
فعلاً كان أول يوم في أولى إبتدائي..
لكن كان نيتي في باب المشاهير في المناصير
بعد أن كتبت عن مناصير قامة
وكتبت عن منصوريات قامة
كمان أكتب عن أماكن قامة
من ضمنها مدرسة شري الإبتدائية.. في هذا البحث يومها ممكن أكتب كل شي..
لكن لابأس ممكن أكمل هنا أولى إبتدائي كلها وأفصلها عن الحديث العام عن مدرسة شري الإبتدائية ويا ريت ناس تكتب عن كبنة الإبتدائية
وبرتي الإبتدائية بي هناك في موقع المشاهير
والكاب الإبتدائية.. في موقع المشاهير بي هناك..

من طرف **هويدا ابوشعر** السبت 14 مايو 2011, 2:22 am

لمن افتح المنتدى لاخ الحنونى اول حاجة اشوفها كتاباتك الجديده وتعليقاتك الجديده لانها حقيقة تجسد المعنى الحقيقي لهذا المنتدى وبعدها اشوف باقى المنتدى

من طرف **انتصار حجازي** السبت 14 مايو 2011, 3:23 am

صديق
عندى سؤال .. كيف تتذكر زملاؤك فى اولى ابتدائي
ماشاء الله تبارك الله
او يمكن لان البلد ناس محصورين وبيعرفوا بعض

انا بتذكر فعلا احداث كثيرة فى اولى ابتدائي
بس زميلات الدراسة في الابتدائي .. استحالة

تخريمة
متاااابعين بقووة للاحداث وذكرياتك

أتذكر شديد وعذابي في هذه الدنيا أني أتذكر.. عشان كدة ما بغلط لامع بت لا مع اي زول.. عشان ما أتعذب.. لا أستطيع أن انسي.. الأحداث طبعاً.. لكن براي في نفسي بسامح..
ياخي مرة اختى عاشة كانت تعوس في المطبخ وانا ما ودعتها نسيت.. يلا ركبتا اللنش و ويلا على الكاب.. تصدقي ياا نتصار الفترة الدراسية كلها ابكي يوم واحد الحادثة دي ما راحت من بالى.. بس انا عندي حاجات متناقضات كدة.. قوة شخصية.. وقوة عاطفة شديدة... وقوة الذكاء.. لو ذكاء ناشف كان نفعني.. لكن ذكائي مخلوط بالعاطفة معجون بالمودة. معطون في الخيال، منقوع في بحر المحنة على نار لذاذات التباريح..

شكرا استاذ صديق على هذا السرد الرائع ..اولى حقتكم دى نحن قرينا فيها تالته اساس .وبعد داك عملوا لينا برنده الاعمال مكتب وفى جهه الداخليه عملوا سابعه .جنس جوطه ...

جوطة شديدة يا ود عمر الدمري بعدنا حصلت زمان كانت منظمة.........
ضرب جرس الفطور أول يوم قالوا تمشوا الداخلية تفطروا
جينا لقينا ابواتنا مفرشين رادمين سرايرنا كوم قدام خشم حوش الداخلية.. قالوا لمان يفكوكم حا يجي ضابط الداخلية يوزعكم على العنابر..
المهم جينا نفطر..
ما كان في رغيف.. البلد كلها مافيها رغيف بعد ثلاثة سنين من دخولنا حتى أنشأ حسن الفكي فرن رغيف.. وعمل كنتورات مع متعهد الداخلية يشتروا منو الرغيف.. ومرات يكون هو نفسه متعهد الداخلية حسب العطاء..
الفطور كان قراصة بي دمعة وفوقا لحيمات كدة.. الأولاد القدامنا قالوا اول يوم اصلو بيكون جايط كدة لكن بعد كدة يوم فول يوم عدس.. بالفطير بس

حسن الفكي نقل الفرن فوق في العقبة جنب منزله في أول السبعينات لكن قبل كدة كان الفرن تحت جنب دكانو.. ولأنو المناصير ما كان عندهم خبره في عمل الرغيف.. جاب ليهو خباز وعجان من الصعيد من وين جابو ما عارف.. وكان يعلم ناس الدسوقي ود حسن الفكي ناس إبراهيم ود حسن الفكي المهنة والعمل في الفرن ..

اخونا الحنونى لم يواصل سنة اولى ابتدائى حتى الان. فى انتظار البقيه

لما الروح ترجع لى يا أستاذة هويدا بواصل.. تعبان ومدعوك جنس دعكة الله لا وراكي لها..

القديم الجديد..
أولى ابتدائي موضوعها طويل يا هويدا.. ونحن أطفال أبرياء..

من طرف **الفكى احمد** السبت 10 أغسطس 2013, 4:51 pm

إزيك ياصديق والعيد مبارك عليكم وإن شاء الله من العايدين والقابلة زى
ماك داير أوتعيد فى الحنانين مكان الكبارالكانوا طيبين وأمانه ماكانوا
حنينين الله يرحمهم أجمعين ...
والله إنت فعلا تتمتع بذاكرة فولاذية الله يديمها ويحفظها ويبدو أن قوة التذكر
والذاكرة لها علاقة بالنشأة والتنشئة والعاطفة الدفاقة والقلوب الحنينة والمحبة
للخير . والحساسية المفرطة فى ذلك والنقاء الذى لاتشوبه شائبة ، كل ذلك
وغيره عامل أساسى فى قوة الذاكرة حسب تقويمى أنا والله أعلم فهو الذى
يعطى ويمنع .
ماكتبته عن ذكرياتك فى مدرسة شيرى وعن المدرسه نفسها يستحق أن
يطبع فى كتاب مدعما ببعض الصور والخرائط والأسماء ذات العلاقة
ليكون مرجعا يوزع على مدارس المناصير ليعرف أبناء هذا الجيل تاريخ
أول مدرسه إبتدائية فى المناصير وكيفية الحياة والدراسة حينها ...
مع تحياتى لك ولكل المتداخلين ....

43 أحمد سليمان السلومي ( الشلال) هذا بديل عباس السلومي لأن عباس ليس دفعتنا وانما جاء لفترة محدودة ويرجع صف ثالث.لأنه عجز عن حاجات أساسية بعث به لصف أول لمدة شهر عشان يتحمق ويشد الرحال.. ويرجع صفو..
ده كان أسلوب تربية ساعتها في التدريس..
ومرات جابوا دكتور مصباح من أولى لفصلنا في ثانية. عشان يصحح طالب معين ويرجع .. وتاج السر نعمان قال لى مصباح. أديو كف؟ نيابة عني..
أنت في صف أول وهو في صف تاني وعاجز عن السؤال..

ود زينب بت الفكى.. المهندس القامة والمرأة القامة رحمها الله.. العيد يتبارك عليك.. وكل سنة تامين ولامين.
شوق بحر..
يبدو إنو المشغولية عندكم منعتنا من تذوق أشعارك وكتاباتك المطولة الرائعة.. التى فيها طعم البلد وحرازة كير ود عيسى.. وتمر المشرقيي الجنب بيتكم وقريبة من جدول البابور وتمرها( زي القعو) زي ما قلت أنت..
شكرا لمداخلتك والعيد يتبارك علكيم..

تصحيح
هو بابكر بطران كاره
وليس سليمان بطران
ليه سليمان بطران.. كتبه الناظر خطأ وسار عليهو في الشهادة لامن اتصحح فيما بعد.. زي الخطأ الملازم لإسم دكتور كروم لغاية الليلة
كروم اسمو
أبو القاسم علي محمد
لكن الناظر كتبو أبو القاسم عثمان كروم. ودائما هذه الحكاية قاعدة تعمل ليهو اشكال في الأسرة خاصة عند المحامين والورثة بيقولوا ليهو حسن علي كروم موش أخوك.. وبقية أخوانه موش أخوانك؟ قاعدة تعمل ليهو اشكالية دائما..

ابو حنه سلام جبريل سليمان محمد بجاوي دفعتك؟ وعاوزاك توريني تعرف عن ابوي حاجه

سهام موضوع جبريل سليمان ده! ردينا عليهو في بوست( دفعتنا في مدرسة أبوحمد المتوسطة) لامن صاحبي جبريل وصلو الخبر في السودان وزي زعل بأني أصفه أكبر الدفعة..
هسه يا سهام شفتي البرجوب متين؟
موش البرجوب ده لسه شاب..!
أها البرجوب دفعتي وجاري في الصف.. وجاري في العنبر في الداخلية..
الدفعة متفاوته يمه
هل تعلمي أن هنالك من يعيد أربعة خمسة مرات حتى يتمكن من الدخول للوسطى.. مدرسة وسطي واحدة عايزين أربعين طالب فقط لصف أول متوسط.. والباقي يروح الشارع وعدد الممتحنين 500 طالب
ألا تفتكري أن دخول المتوسطة يومها معجزة من عباقرة؟
وموش بلاد الطلبة عشان يعيدوا كتير
لكن غلطة واحدة كافية ترجعك ولاتقبل في المتوسطة..
.........
أنت جبريل تعرفيهو من وين؟ هو من كبنة وأنتو من الجزاير... وهو شغال أمين مخزن مع ناس أبو مصطفى في شركتهم

من طرف **عازه** الإثنين 12 أغسطس 2013, 11:22 pm

ماشاءلله يالخال ذاكره قويه عينه بارده مانسحرك وانت ببلاد يمكن لبان دكر وفحم مافيها الناس مشت قدام شديد فيها واصل وفي انتظار المذيد من الذكريات وانا غايتو بتذكر علقه اخذتها من بنات الهوسا كنت لابسه بنطلون جينز وفنيله وفاكه الشعر ساقتني معاها خالتي زوجة محمد عباس هي استاذه بعد سجلتني في عمر اربعه سنوات قالت لي ارجعي البيت قريب شديد مسكوني ليك من شعري وخبطو بي الواطه كانو كتار لو واحده اثنين كنت قدرت عليهم من اليوم داك كرهت شارع المدرسه والمدرسه لكن علاقتي اتصلحت معاها من ثالثه ولي قدام.

سهام علي محجوب كتب: ابو حنه سلام جبريل سليمان محمد بجاوي دفعتك؟ وعاوزاك توريني تعرف عن ابوي حاجه

يااااا قُــــدره
لما جبريل قدم لكلية البوليس الساعة ديك الحنوني اغترب ..!

ود الطرشان
أنت بت حلتك دي تقصد جبريل الزابط.. العقيد.. من ناس ( السويقات)!!!! الساكن الكلاكلة؟
ههههههههه
ده برضو زول ظريف خلاص... ويعزني جنس معزة.. ويحترمنى جنس احترام
جمعتني به الظروف في كوستي
قول لى كيف؟
دي قصة طوييييلة دايره ليها فاقة
المهم عندي بيت ملك في كوستى.. وما مأجرو.. بس قافل فيهو شوية عفش.. والسبب في شرائه أهلكم ناس برتي ناس جعفر عثمان زعيم كوستى.. وناس الحاج فتح الرحمن وولاده
بس البيت ده عرفني على ناس جزاير قمة الروعة..
ناس سليمان محمد عثمان
وحسن عثمان
وعمر يس
وعبد العاطي
والماحي
ومحمد مدني
وسليمان عيسى ود رسيمي.. من دار قمره.. أبوه الزول البي يصلح البنادق داك! ديل ناس أمري
وعلي قمر
ومحجوب
ومحمد عثمان ساعد
وسليمان خليفه
ومحمد خليفه
وكاره
وكمان البراتة الشغالين في كنانة
يعجبوك البراتة.. ظرفاء شديد..
..........

عاد ياود الطرشان انا من دربي وانت من بوني وقدره من الشرق اعمل حسابك تلفون واحد والجنبك دي تلم فيك بي شبشبا ومافي طريقه تضربني وضربك عاد الواحد يدق امو شكرا علي المعلومه يمين عندك سلك ضارب

قريت البوست ياصديق ولفت نظري تطابق الاسماء بعدين انت قلت دفعة البرجوب والبرجوب دا شكلو كدي شباب لسع والله اعلم باالاعمار اسع البشوف ود الطرشان يقول اصغر مني مع انو انا اختو الصغنجرونيه

لا يا سهام ود الطرشان ده زول فنجري خااالص وظريف.. وجاني مخصوص وزارني السنة الفاتت في شقتي بالرياض.. وعمل فيا جنس مقلب؟
زول بتاع مقالب.. وزي ما قلتي زي العندو سلك ضارب..( هندسة) دي ثقافة جيانا يا سهام.. أنت قريبة لينا ذاتك بي ثقافتك دي؟ هسي دي بنات الزمن ده ما بيقولوا ليك سلك ضارب..
نحن زمان نقول
عندو سلك ضارب
جاااري نور طويل؟
مسييح مكنة؟
عاضي كرونة؟
في بوست لذيذ خلاص يا سهام وشارك فيهو ظرفاء كتاار من المنتدى هنا وأثروه بالنقاش أبحثي عنو.. تضحكي لامن تموتي..
.......
ود الطرشان حاول يلخبت بين جبريل ده! وجبريل داك! دائما يحب يتوه الناس... هو ذاتو عندو بوست زمان مشى لستة صفحات.. توه الأعضاء هنا قال ليهم أنا قابلت صديق أبو حنة في أبوظبي.. والصور جاياكم؟ على اليمين لعب بالأعضاء هنا جنس لعب؟
صدقتي
عندو سلك عريان
تراكي يمة كشفتي أوراقو لينا

عندما كنتُ في سنة أولى إبتدائي

عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي

رد: عندما كنتُ في سنة أولى إبتدائي