ياقـــــشيش نـــص الخلا الفوق فى العتامير

كثير من الناس وانا منهم كنا نعتقد بان المقصود بعبارة (ياقشيش نص الخلا)—ننطق كلمة(نص) بضم النون –الا ان الاستاذ الشمبانى اوضح رأيا اخر وقال المقصود (نَص)—بفتح النون –وهو كما قال نوع من القش ينبت فى الخلا وهو شديد الخضرة والنعومة –ايضا سبق ان ذكر ذلك الاستاذ الشاعر محمد حسن فضل –
وهذه المفردة من قصيدة الريلة المنصورية—
ياقشيش نص الخلا الفوق فى العتامير
البكركر رعدو ديمة سماهو عكير
وكما هو معروف التصغير عند المناصيركثير –كما ان كلمة (قشيش) وردت كثير جدا فى شعر المنطقة (واورد الزملاء فى المنتدى بعضها –-منها
ياقشيش وادى الكربكان
عوج ألبل وفقع الضان (كناية عن الكثرة والجودة)
وايضا:
ياقشيش ارض العفا الفوقو المى يومات
البرقو شلب شلب للشرقه ما بات
البشيل من ام حوايه على الرقيقات
وكذلك:
يالقشيش الضله الهرع
الفوقو وابل العينى انتبع
ايضا:
ياقشيش اب سيح وام سرح
المطرو سوت كتح القمح
اشعار قوية وذكرنا ذلك ايضا فى موضوع (العلاقة بين البادية وشعر المناصير)—
اما الموضوع الاساسى فهو كلمة (نص) فيما سبق ذكره –وما اورده الاستاذ الشمبانى –والذى وعد بان يأتى بالخبر اليقين بالنسبة للريلة والتى اتفق الجميع على منصوريتها –بأنه سوف يأتى وبالمصادر بشاعر هذه القصيدة الرائعة (التى كتلتها الهملى )—نتمنى ان نعرف الشاعر المنصورى لها رغم اننى لدى الكثير ولكن لدى تحفظات حتى اتضاح الرؤى واكتمال المصادر--

جميل يا سلمان واصل السرد التراثي الانيق

شكرا استاذ سلمان عقيد كلمه نص الخلا زى ماقلت ولكن كل ناس معتبرنا نص (منتصف ) وتنطق كذلك عند الكثير
ومنها
ياقيش نص الخلا ابرقا لميحه
يالكتل سلمان على ضل الطليحه
وياقشيش نص الخلا اب قومتا قميزات
البشيلوك الوليدات فى الحزيزات

قلنا سليمان كلامو دا دايرلو زولا يفك حرف الخلا
يطلع لينا نادر يجيب لينا الخلا زاتو
رائعين فكلاكما اجاد وابدع وحروفكما تحمل اصالة انسان اودعها كما عاش وهوي وهام وسوي ولكن اختطفت من سنابك بت ام ساق حيث كانت بعيدة عن هدب الفريق هنالك لاساقيه فتتعشي اظنها علي قشيش نص الخلا
الشكر سليمان والشكر الابن نادر
الخبير وينك يازول يعلم الله مشتاقين ومشتاقون ( مشتاقين الاخيره دي اعصر عليها
متعكم جميعا بالصحه والعافيه وكلامكما يزيد الزول شبرين زي ماقال القامه بروي

اهلا بيك حازم والله الشوق بحيرة عديل وبخصوص البحر والبحيرات فان سلمان عقيد يثبت كل يوم انه بحر المحيط الما قاسو مركابي

شكرا لجميع المتداخلين—
ويا ابو مصطفى كلامك فى محلو هنالك الكثير من البلاغة كالاستعارة والتشبيه والمجاز وغيرها فى الشعر المنصورى –مصداقا لحديثك فى الحديث عن بعد المكان وصعوبة اواستحالة لوصول اليه-اذكر هنا ابيات قيل انها للسيد ود الحسين—عشان المصدر مهم (ذكرها لى احد الموجهين التربويين ببورتسودان ) والذى عمل مدرسا بمدرسة شرى الاولية فى الخمسينات –ذكر ان السيد قال:
النقيرة الفوقا الغمام --(القش—النبات –الذى تسقيه السحب- باستمرار
من جبال الكاب وقدام—(جبال جهة الغرب)
حارسا اللقرع والنعام—(اللقرع-الاقرع واظنه نوع من الثعابين--)
عليها درب الراعى ماحام –وهذا يعنى ان هذا النبات لم يصله الراعى او بهائمه وهو على الطبيعة وبكر بل يستحيل الوصول اليه—
وهذا الاتفاق معك اخى ابو مصطفى لايعنى ان كلمة نص تعنى منتصف—واتفق مع الرأيين –وهما واردان—واللهم زدنا علما-
ايضا نلاحظ التصغير (قشيش) –وذكرنا فى موضوع (علاقة اشعار المناصير بالبادية) ان ان هنالك الكثير من الاوصاف لاشياء لها علاقة مباشرة بالخلا والعتامير –وذلك يرجع للارتباط الاجتماعى (بين ناس البحر وناس الخلا) بالاضافة لان ناس الخلا كانوا لايقلون عن ناس البحر فى الكسب وكانوا (مرتاحين)—فكثر استخدام عبارات تشير لذلك (قشيش نص الخلا –الجدى المرعاك الخريف –ودالاريل –ثم الرعد –البرق –المطر---الخ)-
نرجع تانى للتصغير ولكن فى البحر-فنجد كلمة(شتيل او شتيلة ) فتشبه البنت مثلا بالشتيلة –وقد يكون ذلك راجعا لصغرها سنها وخضرتها (رغم ان الخدرة تنسب دايما لليمون –او اللوبا---) -ايضا بان تكون نضرة ويانعة—ورويانة (ورويانة دى ياابو مصطفى فيها الكثير )—
فنجد: الشتيل الفوق اللديق
سيدوا حاجروا معلى السبيق
او:
الشتيلة الفوق جدولا
داير امد ايى اتناولا
الحراريس قالوا لى لا
نقطع الليد من مفصلا
--والشتيلة الفوق اللديق او التى فوق الجدول –يعنى ان الماء يصلها باستمرار ودون انقطاع-
مع ملاحظة عدم ذكر التمرة او التشبيه به-كثيرا –ولكنه قد يأتى فى الاشعار التى ليست لها علاقة بالتتشبيه المباشر بالفرد المشبه- واشير بان الوصف او التشبيه بالشتيل ايضا عند الشايقية فنجد-(شتيلة قريرة الفجر نبحن بوابيرا-
-او الشتيلة الدابة ماتنت جريدا--)
كذلك قد ترجع اهمية ذكر الشتل او الشتيل فى الشعريرجع الى ان الذى لديه او يمتلك الشتل والتمر يكون ممن يملكون الثروة او الاعيان –وكذلك الزراعة عموما والتأصيل لها –كما ورد فى حوار الشاعر الكبير على ود سلمان واحد اصحابه الذى ذكر له فى انهم بممارسة هذه الحرفة (الزراعة)يضيعون الكثير—وقد قارن بينهم وبين الناس الذى سافروا واتوا بالجديد—فقال الشاعر معتزا بممارسة الزراعة:
ياعبودة كان هزونا البتل ديل

نقيف بالنهار ومانرقد الليل

لقيت كسبا بلا ام قادوس هواويل (ام قادوس الساقية)

ست حيضان ولااردب شواويل

ندفن المات وللحى وصاصيل (وصاصيل –يصل ويزور الناس)

ننزل فى دقيس ننزل على النيل

جنوب الرحمة من ايات مكاييل
وايضا –هذا الاعتزاز بالنفس وبالعمل ايضا يتضح فى اغنية (الله هوى)—فى :
العريبى الجالب الملح والمسافر وجايب السمح
مابجيب مهرك يام شلخ الا واحدا سايق القمح
وتورو تحت الارقوق ينح-
نرجع تانى للشتيل ونلاحظ حتى فى مأساة سراية بابورى وهى المطرة الشهيرة التى ضربت المنطقة –ذكر الشاعر واظنه الفكى ود الباهى :
جانا ساعة ليل مو نهار
حسو يرمز وقلنا طيار
شال شتيل ناس احمد الخال
المقرع (المجبد) والدابو شال-
وقال ايضا –
شتلى فوق الوادى اتردم
وفوقو حس الكرجات رطن
مما يعنى الاعتزاز بالنفس والفخر –هذا بالاضافة لما ذكرناه بالجمال والنضارة والخضرة –وكما اوردته ايضا فى التشبيه (بالديس) دييسى –وهى ديما خضراء يانعة لوجودها فى وسط النيل او بجواره –اوفى شلالاته –على شاكلة :
يادييسة شلال دماج-
شكرا للجميع وعفوا اذا خرجنا خارج النص

والله ياسلمان ماشأ الله تبارك الله غايتو تخيلت منظر الكرجه فوق الزراعه وكانوا اهلنا يتفائلون باالكرجه أذكر حبوبتي الله يرحمها تقول ( خير ياكيرجه ) السفار فوق درب اتمني من الله سبحانه وتعالي ان نجتمع في المناصير بعد ان يأخذ الجميع حقوقهم وتكون المناصير جنه من جنان الارض ونتلاقي في المناسبات بل اتمني من الله ان أعيش في المناصير وان تكون خاتمتي هناك أمين يارب العالمين

ماشاء الله استاذ سلمان
وعلى الشاعر
ياعبود اخوى علق تورك ارقوق
وصل وسولك سبيلا لى شربوق
ان فى سنجه عبدالله الصعيد فوق
اصلو اب يرزق الماهو مرزوق
وقالو
وين يالفى سام حموده
مرنقه طالعات حدوده
ماعارف القال
ضحكتى ضحكنا ضاحكين خوه واسلام
بكيتى بكينا باكين كلنا ايتام
شك

ماشاء الله استاذ سلمان
وعلى الشاعر
ياعبود اخوى علق تورك ارقوق
وصل وسولك سبيلا لى شربوق
ان فى سنجه عبدالله الصعيد فوق
اصلو اب يرزق الماهو مرزوق
وقالو
وين يالفى سام حموده
مرنقه طالعات حدوده
ماعارف القال
ضحكتى ضحكنا ضاحكين خوه واسلام
بكيتى بكينا باكين كلنا ايتام
شك

شكرا للاخوة المتداخلين--
وياخالد حصلنا بى قصائد جدك الجميلة دى --
وحكاية ناس الطوف دى كنت فاكرا حقة الشاعر الكبير على ود سلمان --
الاخ نادر شكر على المرور والاضافة --
وقصيدة الشاعر فعلا تأصل للعمل بالزراعة وفيها دعوة للبقاء فى البلد --والعمل بالزراعة كما تدعو على الرضا بالرزق المقسوم مع العمل --وهى بالمناسبة انا اوردتها فى بوست الشاعر الكبير -من قبل وايضا مصدرى الشاعر عثمان سلمان (اب امنى)--وفيها ايضا:
رزقك رزقك ان سويت مشى الطير

رزقك رزقك ان سويت جرى الخيل

وان رح محل العيش بلا كيل (يقصد القضارف)

فى العندو الكتير وفى العندو قلّيل
---اكرر شكرى وتقديرى للذين تداخلوا وعدلوا واضافوا---

------------وان الله مهل فى الايام جاييكم تانى-----------

شكرا لاخوه بى المنتدى لهذة الكلمات البسيطه ذات المفردات الرائعة والمفاهيم الحلوة نتمنى من الاخوة المزيد المزيد من اشعار اهلنا الكرام مع تحياتى لكم بالتوفيق والنجاح يارب

ياقشيش نص الخلا الروقين براقو
العليك مادردموا البراقا ساقو
انا حالى حال الكلبشو وباكر علاقو
ياجنا الزول المضمر حار فراقو

سلمان عقيد النعوفابى كتب:كثير من الناس وانا منهم كنا نعتقد بان المقصود بعبارة (ياقشيش نص الخلا)—ننطق كلمة(نص) بضم النون –الا ان الاستاذ الشمبانى اوضح رأيا اخر وقال المقصود (نَص)—بفتح النون –وهو كما قال نوع من القش ينبت فى الخلا وهو شديد الخضرة والنعومة –ايضا سبق ان ذكر ذلك الاستاذ الشاعر محمد حسن فضل –
وهذه المفردة من قصيدة الريلة المنصورية—
ياقشيش نص الخلا الفوق فى العتامير
البكركر رعدو ديمة سماهو عكير
وكما هو معروف التصغير عند المناصيركثير –كما ان كلمة (قشيش) وردت كثير جدا فى شعر المنطقة (واورد الزملاء فى المنتدى بعضها –-منها
ياقشيش وادى الكربكان
عوج ألبل وفقع الضان (كناية عن الكثرة والجودة)
وايضا:
ياقشيش ارض العفا الفوقو المى يومات
البرقو شلب شلب للشرقه ما بات
البشيل من ام حوايه على الرقيقات
وكذلك:
يالقشيش الضله الهرع
الفوقو وابل العينى انتبع
ايضا:
ياقشيش اب سيح وام سرح
المطرو سوت كتح القمح
اشعار قوية وذكرنا ذلك ايضا فى موضوع (العلاقة بين البادية وشعر المناصير)—
اما الموضوع الاساسى فهو كلمة (نص) فيما سبق ذكره –وما اورده الاستاذ الشمبانى –والذى وعد بان يأتى بالخبر اليقين بالنسبة للريلة والتى اتفق الجميع على منصوريتها –بأنه سوف يأتى وبالمصادر بشاعر هذه القصيدة الرائعة (التى كتلتها الهملى )—نتمنى ان نعرف الشاعر المنصورى لها رغم اننى لدى الكثير ولكن لدى تحفظات حتى اتضاح الرؤى واكتمال المصادر--

الشكر لسلمان وكل الذين اضافوا وامتعونا حقاً
ويبدو ان زمان كانت المطار كثيرة والخلا يكون اخضر سنه لى حوله
واديك رأس الخيت يا سلمان هذه القصيدة شاعرها من الحيبة الشرقية اسمه خلف الله لكن ياتو خلف الله ما بعرفه ليك لانه اسم خلف الله ده هناك كتير ؟
والزول ده فى النهاية البت دى ما عرسه وابى يفصح عن نفسه عشان القصيدة ما تجيب ليها هدم بيوت يعنى ( زيها وزى القصيدة بتاعت منقة بونى ) وعذراً للكلام البين القوسين ده .

التحية للاخ سلمان والذى اعتبره موسوعة تراثية
يستفيد منها المنتدى فما قراته نقد ادبى وكانى
فى دراسة ادب اللغة العربية بالمدارس الثانويه
فيا سلمان وكل من تداخل معك بدفرة دفرتين
اخونا نادر وريسنا خالد خلدتم لنا ارثا تاريخيا نتباهى به
ولكنى اقول لكم ماكتبتم من اشعار يا ليتكم لو اعدتم كتابتها
فى البوستات الجديدة التى فتحها الريس خالد لكل شاعرعلى حده
حتى نصل فى وقت لاحق لفتح بوست كل شاعر لنجد كل اشعاره قد جمعت فيه
ولكم التحية جميع المرور

شكرا اخى سلمان على الاضافه
واشكرك شكرا جزيلا على الاستجابة
ولكن مازلت اكرر عندما تتضح الحقائق فيما بعد من اثراء النقاش المستفيض
حول هذه المواضيع لابد من وضع كل كلمات شاعر فى خانته المفتوحة من قبل الريس خالد
ولكم وافر الشكر