المحطة الكاب للنزول وابدا اسالم فيها زول زول (ديوان وسبيل المرحوم الجد عثمان الزين)

من طرف **على عيسى** السبت 11 ديسمبر 2010, 7:53 pm

محطة الكاب عرفها جميع المناصير وحملت لكثير منهم ذكريات
وهم يحطون رحلهم اما مسافرين اوعائدين ولكل من السفر اوالعوده احساس يختلف
فلنبدا بالسفر والمغادره بعدة من المحطات قبل الوصول الكاب يكون اللورى شقاب الحويله
واثر التراب على الجسم و العطش اول شى تقطع لك كوزين من سبيل ودالزين وتلقى كميه من العناقربب
مجدعه تاخدلك كويعه وتقوم تخابر فى ودالزين وتحكى ويسالك المرحوم ودالزين بارحيته المعهوده
ويجمع السفار وتعلو الاصوات والحكاوى زولا من سور واخر من شررى وعصمه وحوش فرنيب والعمارين
والجميع يقرقر ...سنواصل

من طرف **حازم** السبت 11 ديسمبر 2010, 8:24 pm

واصل الفواصل ياعلي عيسي
أعجبني العنوان واعجبني سردك
واصلا من زمان معجب جدا بالرجل القامه المرحوم عثمان الزين ( وعثمان طابونه كما يحلو لناس الكاب والقري المجاوره
ليت هذا الهرم الشامح يكرم لننفض الغبار عن تلك المعاني السامية التي كان يتوشحها المرحوم ويحملها بين جوانحه غبطه والتزام قيمي وديني واخلاقي و انساني
ليتك تواصل اخي علي فأن اجترار الماضي يزيل عثرات الزمن الآثن ويفصح عن مكنون اصيل بدأت ايادي الزمن الآتي تهده تكبله , تشده , تحطه, تركله , تدوسه , ولتكن كتاباتك معاول البناء لقيم كاد الخزان والانسان والاثنان يسعيا لمحوها من خارطه البلد الامين لشعب امين في زمن لم يري الامان الا عبر حكاوي من اردناك لتواصل فيه ؟ فواصل للفواصل يامواصل
حازم

الاخ على عيسى –لاتنبش الماضى البعيد—فالجرح كاد ان يندمل—
لنساهم معك على الاقل للتوثيق لثغر المناصير ان صح هذا التعبير--
الكاب المنطقة –المحطة---العم عثمان الزين-العم--خضر--العم النجيض--رحمهم الله غيرهم من مشاهير المنطقة واعيانها-
ذكريات السفر –وساعات طويلة تحت اشجار النيم ---اكل الزوادة ولعب الكشتينة—اكتب عن بعض الذكريات ليس بصفتى من سكانها ولكن من الذين يأتون للسفرعبر تلك المحطة المشهورة - وهى المنفذ الوحيد للسفر فى تلك الفترة –وكانت محطة مهمة خاصة وان المحطات التى تليها او التى تأتى بعدها محطات خلوية تماما—وهى اذن متنفس للمسافرين –
اما نحنا كنا نأتيها باللوارى(وكانت المراكب واللنشى ) وغالبا بعد الفطور –ونتخذ مكاننا تحت اشجار النيم الظليلة –ثم تفتح كراتين الزوادة ونتناول الشاى –او نتجه للمطاعم –لندعم الفطور—ونفرش الكشتينة –وبعد الغداء نسأل عن القطر (قالوا وين ) بعدها يضرب الجرس ايذانا بقطع التذاكر –وغالبا ماتكون هنالك اشاعات عن القطر تتناقل بين الناس عن القطر(قالوا مليان ملى –ممشى مافى –الناس مسطحين)—وحينها ينتابنا الخوف خاصة اذا كان الواحد معه (حريم او طالبات –وعفش وطرود كتيرة)—ثم يضرب الجرس بصوت عالى ي ايذانا بقرب وصول القطر(نقرولو او دقولو) وتلك الضربات تبث الخوف فى نفوس البعض ثم يبدأ الناس فى التحرك والاستعداد واختيار المواقع المناسبة للحصول على مكان مناسب وكذلك لرفع العفش—وسرعان ما تبدأ المشاكل (محلى ومحلك –والعربات القدام فاضية --) ثم تهدأ الامور –ويطلق القطار صافرته ايذانا بالتحرك وتصدر عجلاته اصواتا مصلصلة ويسمع ايقاعا مألوفا لسكان الكاب بان بانه المغادرة و الوداع—
هذه عن رحلة السفر من البلد للصعيد اما العودة فلى عودة لها –وايضا لبرنامج اليوم الذى نقضيه فى الكاب ومعظم تلك السفريات كنا طلبة حيث الاستمتاع اكبر والهم اقل –
كما ذكرت لى عودة باذن الله واختم باقتباس من اغنية صديق احمد :
الكاب قلى كيف انساك ذكراك ديمة شاغلة البال
ايه الغيرك عنى وايه البدل الاحوال----(اكيد الخزان)

من طرف **حازم** الأحد 12 ديسمبر 2010, 2:51 am

والله ياسليمان قلت كلمه وجعت مصاريني بالضحك
محلي ومحلك (العربات القدام فاضيه )
صحيح العربات القدام فاضيات ؟؟؟؟؟؟؟
لكن البمشي ليها منو ؟؟؟؟؟
غايتو دي دايري الباشمهندس صديق ابوحنه يهندسها ويهشكلها
ولارايك شنو ياعلي عيسي
تحياتي شلالات لكما
حازم

من طرف **على عيسى** الأحد 12 ديسمبر 2010, 1:58 pm

الود والتقديرلكم الاخوه سلمان وحازم
وطبعا بعد الوصول الكاب تاخدلك سرحه بخيالك مع المودعين ولايخفى عليك دموع الوالده والخالات والعمات والجارات والجماعه يقولوليك يازول شد حيلك وماتصطح ومايسرقواشنطتك وماتودر قروشك واعمل حسابك من الحراميه وانت مرات تدنقر ومرات ترفع راسك تكتم العبرات وتغالب الدموع وهناك فى ناس مودعين لابصرحوا لابقولوا شى 0(ويارب لمتين للبلد)وكل هذا الصمت الكلامى يكون تحت ضل الصهريج او النيم وتكون متوسد شنطتك الهمباك وانت ساعتها عميان وصميان لابتشوف ولابتسمع وسبحان الله ما ان تفيق من هذا الجرد الوداعى الا تشعر بالجوع وتشتم رائحة الزواده المكرتنه المحتويه على البيض والحمام والدجاج والتمر المبلول والبكابه (قراصة البلح ) التى يمكن ان تقعد اسبوع(ده طبعا احساس الطالب اما الجماعه الكبار خليناهم فى برنده ود الزين .....سنواصل امدونا بتجاربكم واحاسيسكم

من طرف **ود القيايل** الأحد 12 ديسمبر 2010, 3:49 pm

ياجنا السلام جاك
الشغله طين والولادي بنوت وحجي يعلمبها الله
كانت الساعة ساعة فطور وكان يوم يوم الاحد الوليه قامت بدري رصت الهديمات في شنطه الحديد المطفقه والبنيه الحتالي مباراه غادي وجاي ومن كرعينو ابت تزح ياابوي انت مسافر وين ؟ ياابوي اقعد معانا : ياابوي ماتسافر ؟
الدميعات تجري ترترتررررررررر من عويناتو : نان يابتي ناكل شنو؟
يابنيتي بجيبلك الحلاوه ؟ انا يابوي الحلاوه مااااني دايراها : دايراك انت تقعد معانا ؟
فجأه تكورك الوليه ياالحاج انا سويتليك سفوفه بعدين تلقاقها في ركن الشنطه مربوطه بي دلقان ابيض قاطعاهو من طرف توبي الجبتو لي عامنول ؟
خلاص سمح بالحيل ( يهمهم الحاج : الله يخضر ضراعك يابت الاصول ويطول عميرك ) قلت شنو يا الحاج ؟
لا لا ماقلت شي ياوليه ماترخي اضانك ساكت ؟
( افو باود القبايل انت ماك عارف الراجل عندنا مابشكر مرتو ؟ وكمان الواحد لمان يجي من السفر ويدخل البيت مرتو( امرأته) تدخل راسه في السحاره وتضحك نامن تكمل ضحكها وبعداك تمرق تسلم علي راجلها كأنه كان معاها هسع دي او بينه وبينو شكله ؟ افو ياود القبايل داير تنسي الاصول ياجنا ؟
انا مانسيته ياالمسخوت لكن المحيرني البنيه الصغيرونه الماسكي في عراقي ابوها وهو يحنس فيها عشان تخليهو يمشي يخدم الطين
والله ياود القبايل الصرم يفردك من جناك ؟
ياجنا انشاء الله ربنا يحبس منك الصرم ؟
خلاص ياالحاج الفطور مرق :: اوديهو الراكوبه ولا اجيبو ليك في اللارتيقه مع بنتك الخاربه دي
الوليه تهمهم ( انا قبيل قلتلك البنيه دي ماتجلجبه( تقصد ماتدللا او تدلعه) اصلو فراق الجنا حار :: نان نسوي شنو ؟ التمر بالعبدرحيم يادوب تلانه شوالات حق الدكان ماكفتو ؟ المسور البحر تسابو غايتو نحمدك ياكريم
السمن دا جبتيهو من وين ياالمبروكه : ربيع كنت خاتاه ليك وبعدين سويتلك منه في فتيل ينفعك في الغربه ؟
اديهو الاولاد ياالمبروكه انا بباصر نفسي ؟
الاولاد بيتربوا ؟ انشاءالله يقرشوا الحصاء الكلام انت ؟
بعد فطورك دا انا سخنت ليك مويه عشان تتبرد بيها ؟ القطر الاحد الفات جا بدري عشان كدي عليي تسوق الحماره معاك واصلها فاردي جناها لمان تصل المحطه ربط السرج كويس وادها سوطين براها بي تخبر الدرب واللا امبقيت لقيتلك جنايا جاي جاي ركبو فوقها بيتصل ؟
الحاج " مشي بعد فطر كأنو جدع فطورو داك بي قفاه بس لهفان والنفس ماها دايري الاكل ياربي دي يسوها كيفن ؟ والبنيه مباراه ياابوي تطلق في الحماره ليشنو ؟ يابتي مسس س سافر ( الدموع تاااني ترترررررررري ؟
خلاص ياابوي انا ماشي معاك ؟
يابتي يابتيييي يابتي انا ماشي اخدم طين واقع واقوم في الحفر ؟ كيفن اسوقك ؟ البنيه خلاص اجيبليك المويه ؟ يابتي آآآآآآآآآآآآآه آآآآآآآآآآآآآآآه ؟ تف يازمن ؟ آف يامعايش ؟
ياود القبايل ماتحكها شديييد الدميعات البببكوبن في الموت بعدين مابنلقاهن ؟ دحين ياجنا اقيف هنا ونخلي الحاج يطلق في الحماره والبنيه مباراه ودميعاتو يدس فيهن من المبروكه واولادو الباقين ؟؟؟؟
اسف للاطاله ياجنا ؟

من طرف **ودالبلد** الأحد 12 ديسمبر 2010, 4:37 pm

والله ياودالقبائل عيشتنا فى الواقع لامن دموعى جرن من عيونى كأنو الواحد هو المسافر وصاحب القصة.
شكرا يارائع ومزيد من الابداع بس من الحزن ابعد شوى.

من طرف **على عيسى** الإثنين 13 ديسمبر 2010, 12:12 am

ودالقبايل يارائع سلام سلام
النقل تم بالصوره والصوت
الاخ تاج السر اتحفنا

من طرف **حازم** الإثنين 13 ديسمبر 2010, 12:51 am

ود القبايل ياعلي زول من بيئة لاتعرف البوار
ترعرع تحت نخيل البلد الذي لطالما ينادي فالتحيا الخصال الجميله
احسب ان اياديه تعفرت بالتراب وهام بوجهه المحفور مع ترابلة بلادي فاكتسب الاصل والاصول اظنه رضع كألاف الطيبين من ابناء بلدي من ثدي لم يغترف غير الحلال انمله
والده سقاه من زراعيه المثخنتين عزة وفخار

من طرف **HASSAN SULIMAN** الإثنين 13 ديسمبر 2010, 1:34 am

ود الاخت على عيسى لك ودى وتحياتى وما قصرت ورجعتنا الى عصر زهبى وجميل وما اظنه من رجوع فى الوقت القريب واقول لك فى البدء نرفع الاكف الى المولى عز وجل ان يتقبل اخونا عثمان الزين قبولا حسنا ويسكنه فسيح جناته مع الصديقين والشهدا بقدر ما قدم لاهله وبقدر ما انتفع باعماله وافعاله الغير قبل ابناؤه ********
ايضا قبل الحويله فنحن اهل الجزائر فلنا سفر خاص وشاق ابتداءا من اربطه الامتعه ووداع الاهل والجيران وهاك يا دفسه (( يعنى قمته )) من عم او عمه او خال او خاله على حسب الحال والجيب ومرات العمه تكون بايعالا عبور ولا عنبلوك ((عتود يعنى))وتقوى القمته وهناك وداع خاص للحبيب عباره عن معاينه وتبحلق ساااكت بدون كلام يعنى بياده صامته وما احلاها ومن ثم هاك يا دميعات ورجفه وداع ويتم التوجه الى مركب ود حامد اطال الله عمره واداهو العافى للقطوع الى الجزيره شيرى ونقطع المسافه سيرا بالاقدان ومرات حمير مرورا واستمتاعا بمناظر القرا الفوق مدارا وتشيع انوارا بهارا امنا وام الجيمع حتى نصل الى مركب ود موسى عدى وفات بالحنبن يا الحنين وسوف اواصل حتى ابو حمد فى اتكاءه قادمه[b][list=1][*]

الاخوان –على –ود القبائل-حازم -السر-حسن–ســـــــــــــــلام—
فعلا فاقدين صديق وحا ينزل فيها بالتقيل—خاصة سفر باللنشى—
و ياجماعة عشان مايكون الموضوع خاص بالقطر وشكلنا اجترينا الذكريات وسافرنا بيها –لازم نقف فى الكاب –ولان القطر الاخ دكتور اليسع كان قد فتح بوست مسبقا –عشان كده نحنا (بس نزازى الكاب دى بالتوثيق ) حتى نوفيها حقها—
--والله ياتاج السر كلامك صاح ود القبائل دا ماهو هين وكتّاب—ونحنا لحدى مايظهر صديق نخلى يبقى شيخنا—بعجين شيخنا دى (ماتقبلوها لى جيهى تانية)—فقط يبقى شيخ الكتاب على الاقل لى حدى مايجى صديق—فالزول روائى من الدرجة الاولى—
ارجع للكاب تانى—والسفر كما ذكرنا كنا نقضى نهارا كاملا نتحرك مابين النيم الظليل والدكاكين والقهاوى(سبحان الله الان بقى النهار دا يوصلك الخرطوم) –وجلسات الكوشتينة—ولان الجمع كبير غالبا مانقابل ناس من جيهتنا لم نقابله فى الاجازة –اما الزملاء من المناطق القريبة للكاب فنلاقيهم العصير قريب موعد القطر—ايضا لى مع الكاب ذكريات اخر—فعظم اصحابى ممن يجيدون كرة القدم –(كما انا فى السابق طبعا—اى زمن الشباب)—منهم –الكابتن خضر النجيض –وشقيقه على –عادل الزاكى –الجوكر –طابونة(حنك)–وغيرهم –كما انى كنت عضو رابطة طلاب المناصير بالجامعات والمعاهد العليا فى اواسط الثمانينات—فكنا ننظم الدورت الرياضية –ونقوم بتحكيمها –فتتم استضافتنا بالكاب –قمة الكرم –ونستمتع بالمباريات –هذا جعلنى اتعرف على الكثير من الشباب وقتها—وحتى الان هنالك من يتذكرنا بتلك المباريات والبرامج التى اقامتها الرابطة—
---لى عوة ان الله مهل فى الايام---

من طرف **HASSAN SULIMAN** الإثنين 13 ديسمبر 2010, 3:48 am

الاخ الفاضل جدا"سلمان عقيد لك تحيه خاصه وشايفك مركز على زكريات الكاب والكشتينه والكوره وشنو حكايتك مع الكاب وانا قايتو دايرك تجدع لينا حاجه من الزمن الجميل وزكريات رابطه ابناء المناصير والكورسات مع ناس محمد على وايضا" كنت كابتن فريق شررى الغرب قبل الانفصال [b][quote]

من طرف **على عيسى** الإثنين 13 ديسمبر 2010, 5:38 pm

الاخوة حازم وسلمان والخال الحسن
سلامات سلامات
اكيد لهذه الحقبة من الزمن ذكريات لاتنسى
ونشاطات لرابطة ابناء المناصير بالجامعات
وذكريات سفار وتسفار اتحفونا ..اتحفونا

من طرف **على عيسى** الإثنين 13 ديسمبر 2010, 6:54 pm

طبعا الجماعه خليناهم فى الدواوين يتفاكروا الضراع فى الجزيرى بى كم وقالوا تاية فلان فى ودحيسونه وناس فلان فى ابودليق وفلان داك مانى دايرنو زولا خمله وخلينا لى ام العيال شوية مصاريف وقتلها ان حكت برك بيعى النعجى الكبيرى وغايتو ساعة المونى تبقى فى بى ملاح كالبيق والاسبروق والالبينى نتتم والتمر واللوبا الطيب والعفن مالى القساسيب والباقين فى العقاب مابقصروا ووصيت حاج احمد يضبح السنه
......ونريد لقائكم

من طرف **ابو مصطفى** الإثنين 13 ديسمبر 2010, 7:18 pm

الاخ على عيسى والاخ حازم وسلمان كل مرة يديها طزة وحسن سليمان هى الذكرى وقطر كريمه (كريم ) وكريمة كبت ؟؟؟ ولعله هذا مسطلح يردده ابوسفيان خلف الله كثير جدا فى ابو حمد الثانوية عندما كنا طلابا والسفر بالقطر كنا نبدا السفر من الجزائر ( دماج ياغرة اوطانى ) كدى السفر من دماج الى راس الجزيرة والله يقطع القلب تب ؟؟؟ وكنت عندما اصل الى مركب ودموسى اعتبر نفسى خلاص وصلت ابوحمد ؟؟؟ وتلقى اللوارى واقفات فى الطوينة لورى يسوقه احمد حامد ولورى اخر من كير ابعلى ولورى ود الجدى جاء اخيرا لكن لورى احمد حامد هو المداوم فى الخط
وعندها ينتابنى شعور غريب بالذات عندما اقابل طلاب وطالبات الجزائر وناس الغرب والشرق ؟؟؟ والله زمن جميل جدا جدا ولاتوصف حلاته ؟؟؟ والظريف فى الامر مرة من المرات اللورى فاتنا وبقينا عاوزين طريقة نلم فى القطر ما اصلوا القطر يجى بالليل فى الكاب
وما لقينا طريقة ومن العمارين واخذنا البحر بى تحت واذكر معاى زول لكن الان نسيت اسمه وهو طالب لكن يقراء فى بربر النموذجية على ما افتكر ؟؟؟ومشينا مسافة طويلة حتى وصلنا بلد ناس بليلى موسى عمر بليلى ؟؟ وعندها كانت الساعة ساعة غداء وتغدينا ووجدت جمال متجه الى الكاب وقالوا الطلبة ديل كان دايرين يحصلوا القطر يركبوا فوق جمل واحد الى الكاب حتى يلموا فى القطر وبالفعل كنا خائفين ان الجمل يمشى لاقدام ويعمل حركات ونحن ناس حمير والله الواحد راكب لكن جسمه كلو خدران عديل كدة على الرغم من اننا مشايخة عرب ؟؟ والمهم وصلنا الكاب والجماعة فرحوا فرح شديد والكتشينة مدورة والزوادة ما تديك الدرب ؟؟ واذكر الزوادة كانت بى فراخ حمام وتمر عجوة رهيبة ؟؟؟ والناس اتلمت فوقنا وحمدا لله على السلامة ؟؟ وجاء قطر كريمة والدنيا ليل ولم نجد مقعدا غير السطيح ؟؟؟

تحياتى
ولى عودة

من طرف **ابو مصطفى** الثلاثاء 14 ديسمبر 2010, 3:28 pm

حقيقة الرحلة من دماج الى مركب ودموسى طويلة جدا ومرات نلقى لينا ناس يقدمونا بى حمير من راس الجزيرة اوس الى ام عسل مقابل العشامين ونعدى بالمركب ومن هنا ناخذ حبل الشرق حتى نصل الى الفعال وجبل الفعال معروف ونصل الى مركب على حسن وناس كبجون اى فى دقن اللمر ؟؟ ونعدى مرة اخرى الى الجزيرة شرى ونبدا الجزيرة شيرى من اولها والى راسها حيث مركب ودموسى ؟؟ وودموسى عدى وفات يا الحنينة ؟؟اجمل الطالبات يا الحنينة عندها نفسنا يبرد شوية والله بالتقريب مشى كدارى ما يقارب 4 ساعات لاننا نطلع من دماج على المركب فطورا بدرى وتسمع الحاجات الليلة الطلبة مسافرين ؟؟؟ ووقتها ما كنا عارفين الحاصل شنو ؟؟؟ بس نحن ماشين وجايين ؟؟؟ المهم وصلنا الطوينة واللورى فاتنا وركبنا الجمال وهذا زاد من خوفى لانى اول مرة اسافر وما حصل والله شفت القطر ؟؟؟ اول مرة فى حياتى اشوف القطر ووكت شفتو الله يعلم ما لقيت لى محل اخت فيه كراعى الا السطوح ؟؟؟ وسطحت ؟؟اول مرة فى حياتى لكن ما نمت من الخوف القطر املس ؟؟ ويمشى يمين وشمال ؟؟ هى رحلة معاناة لكن جميلة ؟؟
وعندها وصلنا فى ابوحمد وهذه اول مدينة اراها فى حياتى ؟؟ حقيقة بقت لى تشبه الرياض او القاهرة او دمشق ؟؟؟؟ من شدة جمالها لانو زول الجزائر فى حياتو ماشاف المطاعم الكبيرة والكافتيريات وقدرة الفول الكبيرة ؟؟ وكان الهم كيف نحصل على فول من هذه القدرة كل الحلم الحصول على فول وليس حلوى ؟؟؟
ومعروفة ابو حمد بردها ما بشبه البرد وحرها ما بشبه الحر ؟؟؟ وكان ما اخاف الكذب مناخها زى مناخ البحر الابيض المتوسط ؟؟؟ المهم ذهبنا الى الداخلية وكان المدير صعب جدا اسمه عيسى محمد عمر
ودق جرس الطابور وتكلم ورحب بالطلاب الجدد من منطقة المناصير والرباطاب ؟؟ ولكنى من حبى للغة الانجليزية لا انسى استاذها على طه استاذ اللغة والقواعد واستاذ عبد الوهاب من ناس الغرب استاذ الادب الانجليزى حيث كانت اجمل حصة لى هى حصة الادب الانجليزى وكتاب اولفر توست وربيكا حيث المتعة ومعاه استاذ الرياضيات استاذ الفضيل حيث جتا س وجا ص ونها س توول الى ص عندما جتا سى تساوى الواحد ؟؟؟ ايوه اخر واحد فى الصف الطيب العوضابى قوم وعوض فى حل المسالة ؟؟؟ ولكن من ذكرياتى المحزنة فى ابو حمد الثانوية هنالك شعور يراودنى كل صباح وكل مساء ان طلاب ابو حمد الثانوية لا يدخلونا الجامعة على الاطلاق وكنا نسمع ذلك ونحن فى اللورى من الناس الكبار ؟؟؟ حتى انه والله واحد قال لى وانا فى طريقى الى المدرسة عبر المحيط على العصافير صعب ( يقصد دخول الجامعة ) وقال لى وانا قلبى يتقطع عليه من الغيظ وقال لى بالذات اولاد المناصير ؟؟ وانا كاتم جواى والله كلامه دا لا انساه الى يوم القيامة ولعل الزول الان موجود فى المناصير غير انه مقيم فى الرباطاب ؟؟ وتاتى المعجزات بان دخلت الى جامعة الجزيرة بنسبة 76.5% ووقتها كانت حاجة كبيرة ؟؟؟؟

ولى عودة

ابو مصطفى

من طرف **على عيسى** الثلاثاء 14 ديسمبر 2010, 6:09 pm

ابو مصطفى
سلام سلام
والله عصامياتكم تتحف القارى وتشجع
وياريت ياابو مصطفى فى قلائل من الدقائق
تعقد لنا مقارنات بين (جيل الشبل الصاعد مصطفى )
(الشنط المدبدبه والزمزميه والترحيل والرسوم كم والبيتزا وكات شب ولفشكرى )
وجيلنا البعروره والخرتاى والشعر المخنفس ......وعوووووووووووووك
ابو مصطفى نعاين لك

من طرف **ابو مصطفى** الأربعاء 15 ديسمبر 2010, 3:24 pm

والله يا على التحية ليك ؟؟ لكن المقارنة بين الجيل القديم والجيل الجديد دى زى شنو الواحد يقولك داير اعمل كده وكده والاخ الذى يسمع اليه يقوله بعيدة دنقلا من دارفور ؟؟؟ يعنى فى حاجة اسمها قاب جنريشا ((GAP GENERATION )) بيننا والجيل الجديد فياعلى الجيل الجديد ولد فى رحم السعادة والحياة السهلة ولكن نحنا ولدنا من وفى رحم المعاناة اسع تشوف الشنط كيف دباديب ما تديك الدرب ونحن ياعلى خرتاية كبيرة والله انا كنت عندما اصل الى مدرسة شيرى بى خرتايتى الكبيرة صفحتى توجعنى يومين ما الخرتاية كبيرة وهى من الدمور وارد اتبره سوق الدامر وهى مليئة بى الدقة والتمر ولعل الدقة هى الشطة والملح مسحونات مع بعض ؟؟ ومعروف ان يوم الاربعاء والثلاثاء ايام جوع وكنا نقوم نعمل البعرورة بالدقة وهى ان نفت الكسرة المفضلة فى الصينية ونكب عليها الدقة والله يا على طاعمة كيف ؟؟؟لكن اسع شفت ناس مصطفى يا ماما انا عاوز سانتدوتش بالجبنة والمربى ومرات بيرقر ومرات بيتزا وحاجات نحن كانت تبقى لينا خيال خيال . واللبس كيف اخر جزم ايطالية وشراب دبل لكن ياعلى والله انا كنت اقوم من دماج ولى مدرسة العشامين عندى شدة ؟؟؟ والله شدة شديد كيف ؟؟؟وهى نعال من البلاستيك وكان اخذت صيحة فى البلد وذلك من شدة متانتها تقاوم الحجار والدقيش وبعد فترة طويلة اختفت الشدة وجاءت الشقيانة ومرات يقولوا ليها تموت تخلو ؟؟ ولى وقتا قريب هى موجودة وانت قايلها مصنوعة من شنو ماهى عقاب لستك اللورى ويفصل وما فى زول بى يلبسوا الا الناس الفقرانين زينا كدة ؟؟؟ وتعال شوف كمان الجماعة تسمع الترحيل جاء وماجاء والله نحن ترحيلنا كرعينا ديل بس سنين ودنين نامت ضفرينا طمسن فى اللحم من شدة الظليط والقطيع من الحجار ؟؟؟ حقيقة المقارنة ياعلى بين جيل زمان والان بعيدة دنقلا من دارفور لكن الجماعة برضوا اعيب عليهم ما شغالين بى عاداتنا وتقاليدنا واندثرت بطول الزمن ؟؟؟؟وحصلت طفرة كبيرة ادت الى التغير والتحول ولكن انا عاوز الولد يعرف يضبح ويسلخ البهيمة ويسوى البسوى ابوه زمان ودا بقى فى مشكلة ؟؟ وبقيت انت اذا قلت دا صاح ودا غلط تكون هنالك فى ثورة وقد تؤدى الى تمرد ودا البقينا نخاف منه اليوم ؟؟؟؟
كيفن بى نثور على الربونا
بى فتل الجريد والليف
وكل الثار على الرباه.
ما لقى زول معاه يقيف
وتبقى شهور عسلنا باريس روما جنيف
ياعلى الله يسهل علينا وعليهم يمهل ؟؟؟

ولى عودة
تحياتى
ابو مصطفى

من طرف **على عيسى** الأربعاء 15 ديسمبر 2010, 4:29 pm

ابو مصطغى يارائع سلام سلام
والله كلامك جانى كى فوق مفصل
ولكم تنبا ابن عمتى الاستاذ احمد حمزه (استاذ الانجليزى بالمتوسطه)
ومازال يكررها دفعه مميزه وانا شايف فيهم المستقبل

من طرف **على عيسى** الأربعاء 15 ديسمبر 2010, 4:51 pm

الاخوه العزاء
خلينا ناس فى الدواوين وناس فى ضل النيم والصهريج والدقائق تمر والسعال يكتر القطر قالو وين والسيسيق يكتر للناس المقلقين اما الجماعه المفرشنها ماجايبن خبر والدواويين مليانه ديوان ودالحسين وحاج النعيم والزول المسافر اول مره قلب مقطوع من الخوف ياربى القطر شكل كيف واركب وين وماان تجى الضهريه الا تشوف ناس الكاب يبدوا يحضروا منتظرين السوق ركاب القطر وساعتها تعرف القطر قرب ويدق جرس التذاكر والطلبه تذاكر شنو البفطعوها حق التذاكر يمسكن اسبوع
وما ان يقولوا القطر خاشى الا ترتفع الصيحات ودقات القلب تزيد والنفس ياب يطلع
ويدوا ذلك الشبح المرعب يدك الارض متسحلفا ومتلولوا طاويا للارض بين الجبال والرمال الى المحطه ....وطبعا الاخ سلمان ماخلان شى نقولو وقالو قبلكم فى الكاب مسافرين والا جايين ....بعدده نشوف الجيه

من طرف **ابو مصطفى** الأربعاء 15 ديسمبر 2010, 8:22 pm

والله يا على مشكور كتير ذكرتنى استاذ احمد حمزة واللغة الانجليزية ؟؟؟؟ اول حاجة وين الراجل دا ؟؟ والله صعب بشكل وحازم شديد ؟؟؟ شديد؟؟؟ معليش ما حازم حقنا بتاع المنتدى ؟؟؟ ودا كمان خليهو ؟؟؟ عندو قصة معاى واليومين ديل نائم فى الخط ؟؟ لكن سوف انزل عليه وابل من العقاب الادارى ؟؟؟؟ هو قايل الحكاية دى ساكت طلاقيت ؟؟
وارجع الى موضوعى واستاذى احمد حمزة ودفعتى المميزة وفعلا كلام الراجل صاح دفعتى يا على فيها احمد عيسى على- العمارين واسحاق سلمان النعوفاب وعلى احمد على العقيدشرى ام لقاديب وحسن خير كرار جاه الله بونى واحمد دياب احمد بونى محمد على سعد حسين الجزيرة اوس ؟؟ على عيسى على عوض عصمة الجبل - ابوقريدة عصمة - بليلى موسى عمر بليلى التولاب - احمدات - العمارين - على الازرق - الصابراب - بدر الدين الاسد - الجزيرة سور وهم كثر وكلهم شطار شديد وحقيقة الان فى المواقع العملية المميزة ؟؟؟ زولا مرخى فيهم ماهو فى تب ؟؟ بعدين حتى اللغة الانجليزية دى نجضونا فيها نجاض بالسوط والله احمد حمزة بى صايد وهاشم الشيخ بى صايد والنذير يسن بى صايد وجودى بى صايد وخليفة الرشيد بى صايد وحسن كروم بى صايد وكل هؤلاء جميعا هل تعلم درسونا لغة انجليزية من اولى حتى ثالثة عشان كده لما خشينا العالى قرشنا اولاد الرباطاب قرش فى اللغة الانجليزية بطريقة مبالغ فيها ؟؟ وكانت الجمعية الادبية والنشرة فيها باللغة الانجليزية وحاجات كده دايره زمن ؟؟؟

ولى عودة
ابو مصطفى

الاخ على عيسى والاخوة المتداخلين سلام--
تحصلت على ابيات من اشعار الاستاذ محمد الحسن قمر الدين --وذات علاقة بالسفر والكاب --اردت ان (ادى الموضوع طزا) زى ماذكر ابو مصطفى --وطبعا ابو مصطفى ماخلا شىء وابدع فى سرد السفر بكل جوانبه--
اكرر اردت ان احرك الساكن---مع ملاحظة اننا هنا نتحدث عن الكاب --لان القطر لديه بوست ---فتحه الاخ الدكتور اليسع فى موقع اخر --فالشاعر يصف سفره من قريته حوش فرنيب للكاب --والبحرين المقصودين هنا --ان الناس فى تلك القرى كانوا فى بعض الاحيان يقطعوا بالمركب من الغرب (النعوفاب وماحولها ) الى شرى --ثم من رأس الجريرى شرى للعمارين (الطوينى)--

من بعد حصلنا الخبر
وبالاحد قالونا القطر قمنا بدرنا على السفر
فوق حميرنا نزوزى عرعر مرة بالبر ومرة البحر
ومن بعد بحربن جينا بر انت ليه يالراجل الضكر
طالق السواق للسكر فى المواعيد زاد واخر
جاى ماشى رجولو تنجر وجأ اللورى المجبر
ومن ورا الصندوق مكسر ومن حدارتو خلاص اندفر
جابنا فى الكاب والدنيا حر وفى الحساب قام جاط ونهر
ليلنا طويل طول الشهر وفى الحكايات جريناهو جر
حتى ماشاعرين بالسهر ومن بعيد شفنا النور بهر
وفجأ جانا قطرنا صفّر وللاسف كان مالنو صر
ومافى خانة تشيل فد نفر زولى شلق وتانى دنقر
وللمحلات لف دور والزمن كان زى القدر
وفى النهاية قرارنا الصدر نمشى نقعد فوق الضهر
العفش فى النص محكر
******

من طرف **ابو مصطفى** الإثنين 20 ديسمبر 2010, 7:12 pm

شكرا الخال سلمان عقيد على الطزة القوية وقربت الحلة تقع من طزتك دى ولكن على عيسى اختفى ؟؟؟؟
ونحن فى انتظاره عشان يقسم الملاح وكل زول يديه شمومو فى ايدى والله يجيب على ؟؟؟؟ ويا جنى ما شفتو لى على ؟؟ وغنن بنات شندى ؟؟ على ياعلى يا جبل الحديد المابنتنى ؟؟؟؟

تحياتى
ابو مصطفى

تحياتى
ابو مصطفى

من طرف **حازم** الثلاثاء 21 ديسمبر 2010, 5:28 pm

شكرا لكاتب البوست وشكرا لسليمان وابومصطفي
قلت كيف ياابومصطفي (كريمه كبت)
نحن طبعا لم نتمتع بكريمه وكبها كنا حينها بمدرسه عطبره الحكوميه
من ولادكم كان معانا ولد خلوق اسمه عباس الخليفه اظنه من الجزاير مابتعرف خبروا ياابومصطفي
بعدين العقاب الاداري وصل ومشكور عليه ؟كمان انتظر مني انا

السلام حازم

من طرف **على عيسى** الأربعاء 22 ديسمبر 2010, 12:37 am

الاخ ابومصطفى (مجيد لغة المملكة المتحده التى يهابها الكثير من الطلاب )
فكانت الاشاده من من علمك الاستاذ احمدحمزه الذى تحصل على الدبلوم العالى للغه الانجليزيه من جامعة الخرطوم 1996 ..من المكرمين اوائل البحيره ..المركز الاول نهال ..بنته ..تعريف بسيط لسؤالك عنه .....لك كل ودىوتقديرى

من طرف **على عيسى** الأربعاء 22 ديسمبر 2010, 12:48 am

الاخوة سلمان وابووداعه
سلاممممممممممممممممممممممات
وحسب كلام الاستاذ سلمان بس نسوى الصفقه دنقير بس فوق الكاب مانى مفارقنها تب سفر وعوده وما اصعب الوداع ومااجمل لحظات اللقاء(وينكم ..يالحاقين فى البحر المالح
سلمان..حازم..تاج السر ..ودالقبايل..الحسن ..الجميع يااخوانى الفراق لحظات صعبه

من طرف **على عيسى** الأربعاء 22 ديسمبر 2010, 1:43 am

ياابومصطفى الطيانه السفر مابدوروه المعايش جباره
نتناول قصيدة شاعرنا الكبير المرحوم ابراهيم
حسن..خلاس فلسنا ياحماد بتين القومه
حماد..نشوف التايه تتوافق نحدد يوم بتين كمتهن 2جنيه يابومه
حسن..اخد لوازم المره ارياح معاه هدوم وفى الدكان لقيت فوق الديون مردوه
ديونا مابتفكه خزنة الحاكومه
حما د..مرتك فى الحريم مرتا فقر وملخومه مابتعرف تدبر لى معيشة يوم
دايرى الفخغخه ودايما تطق بلعوم عرس فوق بعدين بى تعرف السكه
حسن ..موقاسى العرس قاسى اللكل والفكه وصاحبك دار توكر عمروا مايتفك
وبعد من عاش تدور تخرب عليه الجكه تقعد فى المجالس وفوق حسن تتحكه

حماد..انت اظن ماك راجلا مفكك صدرك حسان ودمحمد بالعمر موقدرك
حسن..خلنى من حديثك قل بتين السفره
حماد..بديك خبر التايه اخدليك صبره

من طرف **حازم** الأربعاء 22 ديسمبر 2010, 1:48 pm

ياسلام رائع ياعلي عيسي
مجادعتك الاخيره دي بالغت فيها وين من زمان هذه الدرر مكنونه؟
ياريت تواصل مثل هكذا مجادعات تحكي عظمه انسان وحياة اجتماعيه تأبي كشف الحال وتحب ستر المآل وهذا هو سر الترابط الاجتماعي ولما اندثرت تلك القيم الجميله اطلت برأسها ثقافه ( الفي راسو يعرف خلاسو) وشتت يافرده) واكل نارك ) وكثير من الالفاظ التي تدل علي التباعد والتنافر , وهو ماعرفه ابو مصطفي ب (القاب جنريشا) في مداخلته الجريئه وحقيقه ما سردته ياعلي عيسي تجد في طياته كيف ان حسن يريد ستره الحال ويأبي حتي عقد مجالس الصلح والتصالح فهي حسب تربيته الناصعه ابغض الحلال الي نفسه ؟
فالتحيه ليك والتحيه للرجل العلامه صاحب الارث الشعري الغزير سليمان عقيد وكل يوم يثبت انه من جيل يحمل الكثير من الموروثات الشعريه حتي حسبنا انها اندثرت

التحية لك الاخ علي عيسى و لكل الذين علقوا علي العنوان و الذي جعل الكثيرين من قراء المنتدى و مشتركيه من التعليق و المشاركة و بالتاكيد انه التاريخ الرصين و الجميل رغم المعاناة و التعب و لكن الاخوة القراء فالنجعل من هذه الذكريات الدفع الى الامام لكل قضايانا و ذلك لاننا لا نقرا التاريخ الا لكي ننظر الى الامام فلتكن نظرتنا لهذه الحكاوي و الذكريات انطلاقا للامام و لنبحث عن كل ما هو هين و سهلا لابنائنا البربرة حتى لا نتعب نحن وهم نظرتى مختلفة ربما لاننى لست من طارقي ابواب هذه المحطات و لكن اتفق مع ان السرد التاريخي هو الذي يولد الامة الرائدة و الناجحة و التي هي اكبر همنا و لنكثر من الذكريات ايا كانت لانها هي التي تعطر الزمن الجميل

اخونا على انت قلت الصفه دنقير نحنا منتظرين دايرين حاجات من بيت الكلاوى لما الواحديقرأ موضوعك ماحاتكون قرايه فقط قرايه والحواحد يذكر

من طرف **على عيسى** الأحد 26 ديسمبر 2010, 2:25 am

هذا القطا ربطيئا بعد سرعته
نراه يدك الارض متسحافا
ونشوف عمنا المرحوم النجيض كانونو يتلعلع جمره وكفتيرة الشاى
تغلى شاى كلكتى ويطلق باريحيته المعهوده
شاى الكاب ياركاب ...السكر غلاء والشاى حلى
النميرى ايدنا وقرار سمعنا ...والبقول اخ يتلخ
والبقول إخ ...إما نعدها للجمل

من طرف **م بروي** الأحد 26 ديسمبر 2010, 7:54 pm

فقط حبيت أسجل
حضور وإعجاب بما كتبتم
مشكور ياود عيسى
كلامك جميل
نرحب بك بشدة
راجع لكم

من طرف **على عيسى** الإثنين 27 ديسمبر 2010, 3:30 am

ودالبروى
سلاممممممممممممممممممات
اكيد لجيل تلك الحقبه من الزمان ذكريات لاتنسى
واشعار حملت الكثير الكثير للسفر والوداع .السفر
بالوثبات (مره مركب ومره لنشى ومره بالارجل ومره الحمير واللوارى مؤخرا)
ارجوك لاتطول الغيبه ....نعاين لك

من طرف **native guy** الإثنين 27 ديسمبر 2010, 5:00 am

تشكر ياود الخاله كتيييير
انا زاتو ياودالخاله لي قصه في موضوع القطر دا
كنا مره راجعيين من كريمه فضربت البيض ضرب تقييل
فكبست البطون فحصل ما حصل من الراحه الطيبه

من طرف **على عيسى** الخميس 30 ديسمبر 2010, 2:19 am

يظل المنصورى شارد الازهان راجع بباله وخياله الى تلك الديار الطيبه يعددخطاويه للنزول للمشرع وبين التناقير وللواردين البحر والشايلين الصفايح وللجرف سبروق ملح والبحر فات منو روح ...
والمنصورى زاده فى الغربه اوتار حنينه التى يداعبها ليلا فى ضوء القمر الربابه وبالرغم من مشقة العمل (الطين )فلا شى يلهيه عنها فما ان عزف ودندن الاحملته بساط الريح لتضعه بين الاهل (بلادى سمحه وجميله وبتين ياربي نمشيل.. بلادى) فترسل نسمات الليل البهيج ذلك الصوت الندى لكل من بجواره مطربة محزنة مجسدة لتك اللعوه الغريبه (التى حكى لنا عنها الاستاذ الطيب محمد الطيب ان القصيده التى قالها الشاعر الكبير التجانى يوسف بشيرماهو الا لذلك المنصورى والتى سماه بلوعة الغريب ) فالمنصورى لو عاش بين قصور ذى يزن ماهو بناظر او مستمتع بها ولكنه يستكفى من الدنيا ونعيمها بان يكون بين الاهل.. بين الاهل......

0

بوست على عيسى ده عجبني وموضوعو هام.. يا ريت ألقى لى زمن أقدر أساهم فيهو

من طرف **ابو مصطفى** الخميس 30 ديسمبر 2010, 7:17 pm

وينك يا خالى صديق والله يحلنا منها معيشة الضيق
مالك وكيف وعيالك وتسلم لى يا المرق السنقنيق
مشغول الفكر بيك تملى نسال والخلق مرات تضيق
ادينا طلة فى العبوس ماهى ضاقت وكم مرات تضيق
اديها طله ماهى دار قمر والعمر محسوب دفيفيق

تحياتى
ابو مصطفى

من طرف **حازم** الجمعة 31 ديسمبر 2010, 2:22 pm

الاخوه السلام عليكم وكاتبالمقال الاخ علي عيسي لك التحايا
الاخ ابومصطفي حمدا للسلامه والهندسه صديق وينك ياراجل افتقدك المكان والمجال عسان طيب

من طرف **على عيسى** السبت 01 يناير 2011, 2:43 am

وينك ياهندسه الناس يعاينولك
حازم ادينا من المخزون
ابومصطفى حلتنا تبجبج دايراك تضوق

من طرف **ساري الليل** السبت 01 يناير 2011, 3:27 pm

الاخ علي عيسي لك الشكر وانت تبدع , واصل ونحن متابعين ولنا عوده انشاء الله ,,,

من طرف **حازم** الإثنين 03 يناير 2011, 7:20 pm

الاخ علي عيسي السلام
اعجبني جدا مرور الاخوين قامة بلادي الرائعه بروي والاخ الباشمهندس صديق ابوحنه ( دائما مايخالجني الشعور ان الاخ صديق ابوحنه يرتدي عراقي بلدي وعليه اثر بابور زيته قاطع ويحمل مفتاح انجليزي ويعافر ويعافر والناس منتظرينها تدور ) خيال كدا مارف ليه؟)
والذي زاد هذا البوست ألقا اضافه لهذين القامتين ذاك الشبل بن ذاك الاسد ذاك المربي الشيخ الوقور ذاك الرجل الفهيم الهميم طيب الله ثراه ووسع في قبره فقد كان والده علما من اعلام بلادي الشامخه وكان وكان وكان والله لااريد ان اقسم ظهرك ياعبد الرحمن محمود النعيم لكن والدك كان امه بحالها قمه التفاني والاخلاص وقمه الامانه والسماح وقمه الدراية والنجاح اللهم وسع في قبره يارب العالمين ,
اخي علي عيسي عزرا لهذه الحائده عن طريق البوست ولكن اظنها علي ذات الدرب فمحمود النعيم حمد الملك قامه تتطأطأ لها الرؤؤس اجلالا وشامه شرف وتاج عز وفخار لكل من علمه ذاك المربي حرفا ,
لك ولأبنه الذي لم تسعفني الظروف بلقائه التحيات الزاكيات
والسلام

من طرف **على عيسى** الأربعاء 05 يناير 2011, 3:19 pm

المدنيه و سبل العيش الرغد لم تلهى اهلى اوتستهويهم اويحاول الواحد منهم ان يمتلك عقارا اوان تلوح بخاطره الاستقراريه وجعل المدنية سكن له فى ذلك الزمان بالرغم
من عملهم الذى اتاح لهم ان يكونوا من بواكير ساكنى العاصمة ...امشى فى شرى والحق العيد ياالهى اكون سعيد فبمجرد جمع مايسد الحاجة من المال الا نجدهم تحلقو بالامسيات ودار الحديث عن السفر للبلد وترددوا على دكاكين الهوارين يقضوا حوائجهم
وقهوة الحجر و الترزى المشهور نبعمان ودحسن الذى هوبمثابة نقطة التلاقى وكنترول الاتصال ومعرفة اخبار بعضهم البعض..... ازيدونا بمخزونكم التاريخى

من طرف **حازم** الأربعاء 05 يناير 2011, 4:04 pm

الاخ علي عيسي السلام عليك
اولا مشكور علي هذا البوست الناجح من عادتي اني اقوم بقراءة ومتابعه واسترجاع كل تعليقات الاخوه قبل قراءة التعليق الجديد وانا أطالع التعليقات اعلاه وانظر الي صوره العضو ( ومهتم جدا بهذه التفاصيل) اذا بي اتوقف عند صوره احد الاعضاء كتب بداخلها كلمات آه بدون سابق انزار اصابني مااصاب الاخ السر ووصف ود القبايل للحظات الرحيل ؟
فكرت كثير في تلك الكلمات
لاأنكر بأني لم اري امامي والعبره تسد حلقي والدموع تتري والفكر يدور والقلب يتقطع ألما هي احدي عشر كلمه وحرفا عطف واسم اشاره وحرف جر
ادري ان الراحلين الي دار الاخره يلتقون ويتسامرون ويسألون بعضهم البعض ؟ اين فلان واخباره فيقول ألم يأتي بعد ؟ فقد دفنته بيدي وقعدت في مأتمه وواسيت اهله معقول ؟
تلك هي الدار الاخره واسرار اللقيا فيها ولكن تلك الصوره وماكتب فيها محال يرجع ومحال تعود تلك الايام الطيبه وذلك الالق الجميل ؟
اخي علي لااريد ان استرسل وتعاهدت مع نفسي سأفتح لها بوستا جديدا وسأدعوا كل الرقيقين ومحبي الالفه والتآلف لزرف دموع المحبه تحت ذلك المكان الذي لن يعود ابدا
سأحكي عن عظمه آخذ الصوره وكلماته الصائبه وسأحكي عن المكان وروعته وعن الانسان وذكرياته ؟
اظن صاحبها تألم لوحده ولقد نسي اننا أكثر أيلاما منه ( علي الرحيل المر _ الفراق ولحظاته_ الارث وأناته)
لااريد الاطاله وسأختزن تلك الآهات لذلك البوست الجديد وتلك الصوره التي تحكي الألفه التي غابت , هي دعوي لعاشقي المكان والانسان والازمان الجميله
غدا ان ابقاني الله صحيحا معافي سأكتب عنها في المنتدي الاجتماعي ولو وافق السيد المدير في السياسي والصحافي وكل منتديات بلادي

من طرف **على عيسى** الأحد 09 يناير 2011, 2:31 am

البنيان اكتمل ..والجيوب مليانه بالقروش وكثرت الافكار والرؤى والتحلق بالامسيات والجماعه فكروا فى الرجوع والبلد ..لمتين الرجوع لى بلدى لمتين يتكتب لى رجوع لى بلدا قليب يريد والنوم مابيكون ممنوع..وبالرغم من عمل النهار المضنى لن يشل فكرهم وتاخذهم غفله اونسيان لمرتع صباهم ومعاناة الاهل والمنطقة ولايبخل الواحد بمايملك اوتنهد قوى الطموح لديهم
حسن..دايرين نبنى شركه كبيره فى امدرمان ونعمل ليها المينا ء بورسودان تكون بلدنا مقدمه ظاهره فى السودان تساعد الغربى والزول القبيل فقران
حماد...دايرين نشترى العربات ومن عند العكد يندلن السلمات
محمد..عربات شنو الداير تجيب علينا انضم فى المدارس وشوف خبار الكينا
عبدالله..اسمعوا ياجماعه انا داير اقول لى كلام وكلام مظبوط وداير تفهموه تمام لازم مايكون بيناتنا اى خصام بلدنا صعيبه دايرى الراجل الخدام ويخلص فى العمل مايسمع اى كلام بى اذن الاله تعدى بلدنا لاقدام....
رغم بساطة العمل الا ان النفوس مليئة بالطموح والكبرياء والعزه فيرى احدهم تاسيس عمل استثمارى يرفع اسم المنطقة ويعودعليها بالربح الوفير والمساعده للمحتاجين..وثانيا..يرى فتح الطريق ووضع ملامحه وتسهيل حركة السفر ..واخر يرى فتح المدارس والشفخانات..ويختم ..عبدالله بالنصائح والمواعظ
تابى الرماح اذا اجتمعن تكسرا ...واذا افترقن تكسرت احادا

من طرف **ساري الليل** الثلاثاء 18 يناير 2011, 3:29 am

مازلنا نتطلع ونقرأ في هذا البوست الجميل واصل الابداع ولنا وقفات يا عمو علي عيسي .

من طرف **على عيسى** السبت 22 يناير 2011, 9:09 pm

الناس قالوا نازلين البلد
لملموا احتياجاتهم وهداياهم لكبارم وكسوة اللبو توب اثنى عشر دموريه واللم الجورسى والسارى وام العيال الكلوش والوليدات عراريق الدموريه والشدد
وملو المجاوز بالسكر والباتيل والبن وقفاف الصعيد ربطوها والقريشات فى الجزلان ومدبس بالدبوس الكبير فى العراقى التحت الجلابيه وخلاص حسابم قطعوه وبنيانم سلموه
وحددوا مواعيد القيام والكلام بقى كتر وحماد قطع التذاكر وفى عفش شحنوه صحبة راكب الاستلام الكاب ..وعودتنا لكم العوده ورحلة القطر والنزول الكاب

من طرف **م بروي** الأحد 23 يناير 2011, 1:53 pm

الأخ علي عيسى
سلام واحترام
يازول نضمك سمح بالحيل
التحايا لكل أهلنا بالعمارين
وكمان التعازي في الوالدة بت خلف الله

من طرف **على عيسى** الإثنين 31 يناير 2011, 10:43 pm

لك التحايا ودالبروى والسوالف مننا ومنكم
الله يغفر لهم ويرحمهم يتقبلهم يارب

من طرف **على عيسى** الإثنين 31 يناير 2011, 11:09 pm

الشعور بالعوده الى الديار مابتوصف ولانجد له مثيلاونظيرا من الكلمات يااخوان الغربه سيف سنين وطعم مر ذاقه كل من فارق بغرض عمل اوعلم حتى ذلك اليافع الصغير الذى وصف وتوصف لنفسه انه لاطعم لدروسه مادام ان هنالك غربه وسفر وركوب قطر ...الجميع ركبوه القطر وراجين الصفاره تنذر ..ودوى نداء القطار معلنا العوده الى الديار واستلهب مشاعر الجميع واستهلت بالبشرى الوجوه..وفرش الجماعه وكوعو والونسه عكلت والضحك والقرقراب والترتيب للنزول وين ناس فى كحيله وناس الكاب وحدين الدغفلى وناس الجزاير شايلاهم الهاشميه سفرم بعيد شى حمير وشى مراكب وشى بالكرعين ..صعيبه دروبك بلدنا وبعيده وقاسى اسفار ..وياخوان وينو عبدالخير الفى شدر القريش طايش بنلقى كتير ..فى ناس طاشين فى الجنينه والقضارف والجزيرى واهلم بسال منهم..يااخوان عاد ديل حكايتم كيفنها لملمو عقابكم ياناس وما تكرموا زول والخمله شيلو والبنكسر ماتخلو ...

من طرف **الرشيد طه** الإثنين 31 يناير 2011, 11:15 pm

من زمن وكل مرة احاول المشاركة فى هذا البوست المترع بالمفردات والذكريات لكن مشاغل كثيرة تحول دون ذلك .
تسجيل مرور واعجاب وحضور حتى حين المشاركة.