هاك مناصير الباوقة يا بت الماحي..وود الحوري يغني في الجزيرة شري

المناصير في منطقة الباوقة أضافوا ونهلوا من معين هذه المنطقة.. هذه المنطقة يوجد بها أجود وأبرك واجمل فصايل الجعليين.. وهناك نشأ الفنان المنصوري المعروف( ود الحوري) بعد أن هاجر أهله من الجزيرة شري ردحاً من الزمان.. آخر مرة شاهدته في الجزيرة شري عام1972 وهو جالس يغني لحبوبته بالطنبور.. قالت ليهو ياولدي طنبورك دا.. ملوي كدي ما عجبني.. طنبورك ما بيرقص.. الزول ما بيقدر يرقص عليهو.. وهي كانت تتكلم بفطرتها ولاتفرز بين إيقاع الدليب والعرضة والمردوم. ومنطقة الجعليين منطقة الباوقة والجول وفتوار والعبيدية إيقاعهم عرضة... كانت تعني جدة ود الحوري عندما زارها في شري أن الإيقاع لايرقص وعندها لايرقص إلا إيقاع الدليب... يعني لما مشى الباوقة وجانا إيقاعه صار ملوي كتر.. وللعلم الفنان ود الحوري وهو في الباوقة كان يغني بإيقاع الدليب أيضاً لمن يطلبه... من حلتنا شخصياً هنالك مجموعة هاجرت للباوقة ولايزالون يتزاجون مع أفرعهم في المناصير والفي المناصير يتزاجوا منهم.. وكم بنات في حلتنا هم منصوريات من الباوقة متزوجنهم في المناصير.. وكم شبان عندنا متزوجين من منصوريات الباوقة.. خلطة مناصير بي جعليات.. تطلع الخلطة ( زي البسكويت بالعسل) ولذلك لاخوف على المناصير المشوا للمكابراب.. بس الجماعة الأساسيين في البلد بيفتكروهم ما وقفوا معهم في الحارة وتثبيت موطن القبيلة الأصلي في الخيار المحلي.. بس الزمن كفيل بإلتئام الجراح

صديق طولنا من عطرك المقروءمناصير الباوقة منهم جدنا سليمان مكي ولده معتصماولمن شق طريقا للباصات السفرية بين عطبرة والخرطوم تحت مسمي سفريات ابو المعتصم
ومعتصم هذا رجل مزواج الان في حباله اربع وزوجته الرابعة اوالثالثة لا ادري لها قصة عجيبة فهي من جعليين الباوقة كان زوجها مساعد طبي بمنطقة كرقس غرقت بهم مركب توفي هو وابنائه الست ولم ينجي الا الزوجة فقط وبعد سنوات قلائل سمعنا بزواجها من خالنا معتصم بعدما خاف الناس علي حياتها وعقلها والان سمعت ويا لسبحان الله انها انجبت منه بعدد اولادها الغرقي ولله في خلقه شئون
لك ودي والاحترام

صديق عبدالله علي أبوحنة كتب:المناصير في منطقة الباوقة أضافوا ونهلوا من معين هذه المنطقة.. هذه المنطقة يوجد بها أجود وأبرك واجمل فصايل الجعليين.. وهناك نشأ الفنان المنصوري المعروف( ود الحوري) بعد أن هاجر أهله من الجزيرة شري ردحاً من الزمان.. آخر مرة شاهدته في الجزيرة شري عام1972 وهو جالس يغني لحبوبته بالطنبور.. قالت ليهو ياولدي طنبورك دا.. ملوي كدي ما عجبني.. طنبورك ما بيرقص.. الزول ما بيقدر يرقص عليهو.. وهي كانت تتكلم بفطرتها ولاتفرز بين إيقاع الدليب والعرضة والمردوم. ومنطقة الجعليين منطقة الباوقة والجول وفتوار والعبيدية إيقاعهم عرضة... كانت تعني جدة ود الحوري عندما زارها في شري أن الإيقاع لايرقص وعندها لايرقص إلا إيقاع الدليب... يعني لما مشى الباوقة وجانا إيقاعه صار ملوي كتر.. وللعلم الفنان ود الحوري وهو في الباوقة كان يغني بإيقاع الدليب أيضاً لمن يطلبه... من حلتنا شخصياً هنالك مجموعة هاجرت للباوقة ولايزالون يتزاجون مع أفرعهم في المناصير والفي المناصير يتزاجوا منهم.. وكم بنات في حلتنا هم منصوريات من الباوقة متزوجنهم في المناصير.. وكم شبان عندنا متزوجين من منصوريات الباوقة.. خلطة مناصير بي جعليات.. تطلع الخلطة ( زي البسكويت بالعسل) ولذلك لاخوف على المناصير المشوا للمكابراب.. بس الجماعة الأساسيين في البلد بيفتكروهم ما وقفوا معهم في الحارة وتثبيت موطن القبيلة الأصلي في الخيار المحلي.. بس الزمن كفيل بإلتئام الجراح

يا سلام عليك يا استاذ صديق دايما تسعدنا و تتحفنا بالمواضيع اللطيفة ربنا يديك الصحة و العافية
حقيقة كلام الجدة ربنا يرحمها صحيح فمع عوجة الطمبور هناك عوجة اللسان من أثر البئة الجعلية فى الباوقة .فقد بدا عبد الكريم بالدلوكة و كم كانت له صولات و جولات فى ديار الجعليين و ما حولها .....و كان الطرب يستبد بالناس فقد رأيت بأم عينى رجل لم يجد أحدا ليجلده بالصوت فجلد نفسه على قدميه حتى سال الدم غزيرا و عجبت حينها و خفت -كنت طفلة حينها- و عن الحفلة ....فكان رحمه الله يسكر الناس طربا بصورة لا يمكن تصورها .و كان ايضا يجيدالغناءو على ايقاع الدليب و كان الاهل من المناصير يطلبون منه اغنية (الله لينا ) و رائعة و د البروى (منصورى موقد نار) او السلام الجمهورى للمناصير فى كل مكان ....كان ايضا يعزف مقطوعات بالطمبور يرقص عليها كل الناس مثل (سمحة بالحيل بت نجومى ) و كان الشباب يقفون صفا و يصفقون على ايقاع الدليب و الرتوتى و بعض الكبار يصدرون اصوات من صدورهم اعتقد انها ما يسمى بالحمحمة ؟؟؟أو الحمبى؟؟؟غير متأكدة و لكنها جميلة جدا و اذكر الجدات و رقصهن الجميل ...اذن عبد الكريم كان يطرب الناس بأى لون تغنى فهو يجيد ه إجادة تامة....كان يلحن لنا الاناشيد و يلاعبنا كثيرا و يجعل من نفسه مهرجا ليضحكنا ....كان بيته قبلة للفنانين الشعبيين مثل بابكر ود السافل , محمد الحسن قيقم ,نور الجلال , كمال الربيع و غيرهم وكان له معجبون من خارج السودان يأتون لزيارته ....رحم الله أبو ناجم رحمة واسعة و غفر له .....و اشكرك كثيرا و من كل قلبى أخى و أستاذى صديق ....بجى راجعة (انت عارفنى قاعدة انهب بوستاتك خاصة الفيها اسمى ) لك الود و التقدير

واللة ياجماعة خليتونا نشك نحن فى السودان ولا برة مناصير باوقة ومناصير وقر ومناصير غرب الفكرة الاساسية ابن جدى نحن قبيلة سودانية متفاعلة مع ماحولها قد يكون المنشاء منطقة المناصير ولكن المناصير كعنصر ذاب فى محيطة الباوقة وقر الغرب فهو فى بيئة سودانية ولاتجعلونا نشعر وكاننا اسباط بنى اسرائيل

....بجى راجعة (انت عارفنى قاعدة انهب بوستاتك خاصة الفيها اسمى هههههههههه) لك الود و التقدير

خلاص انهبي يا بت..
...........
دكتور اليسع وعلي حدوري. شكرا على المرور بي جاي

سمحي بلحيل ....بت نجومي
تبتبت الحيل ... بت نجومي
اخييها الخير ...بت نجومي
وشاي العصير ... بت نجومي
علي ايقاع (الجابودي) وهذا ايقاع خاص بمناصير البادية...حتي الرمية العبوس الخيرها مادام هي رمية بادية المناصير وخاصة الذين ينتشرون في صحراء بيوضة وبت نجومي نفسها هاجرت الي الباوقة ومن ثم الي كدباس وأخيرا تزوجها ابن عمها الهيس وأنجب منها أصدقاءنا عبد الواحد والشيخ وأخوانهم
تقبلوا مروري

اخينا صديق ابوحنة
لك منى عاطر التحايا
بخصوص اهلنا الجعلين فى منطقة الباوقة ولتصحيح مارود افيدك يا صديق الجعلين ليسوا هم الاغلبية فى منطقة الباوقة وليسوا هم سكانها الاصليين واول من قطن الباوقة وذلك قبل قيام مشروع الباوقة الزراعى فى العام 1917م على ايام العهد الانجليزى هم الانقرياب ( العبدلاب ) من ايام نهايات الدولة السودانية وهذا للتصحيح .
الجعلين لهم فرعين هما السعداب والمسلماب .
المناصير ايضا لهم حى كامل (قديم) اسمه المناصير واخر اسمه طمس ولهم عدد مقدر بالتكاوين (جعلين سعداب ومسلماب) كما يوجد مناصير فى مناطق خارج الاحياء الموجودة بالباوقة حواليها يعنى وجلهم من القادمون من كبنة وبوادى المناصير .
بالنسبة لمعلومة دكتور اليسع هى صحيحة جدنا سليمان مكى قدم والده من حجر البيضة فى نهاية القرن قبل الماضى حوالى 1899ثم وجاء الى منطقة الجول عبر الطوف وعمل مع الصيادين والتقى الصديقالت من اهالى الجعلين ثم تزوج بنته المعروفة بفاطمة البقارية والتى قتلت رجلاً من البقارة وهى والدة جدنا سليمان مكى الحسن وابناؤه وهم هاشم والسر رحمه الله ومعتصم وحمدالنيل ونصرالدين وحافظ وبناته وهم امنة وعلوية ( والدتى) وام الحسين وهلالية زينب وامال اطال اعمارهم .
بخصوص باصات خالنا معتصم صحيح هى اول مواصلات ترحيل بين الدامر والخرطوم بحرى (موقف شندى) وطبعا فتح الخط وكانت عبارة عربات نيسان (القلابات) معمول لها صندوق بتاع بصات وكان اسمها اكسبريس نيسان ابو الخلف ، وابو الخلف هذا سعودى صديق لخالنا الذى يدير له اعماله بمنطقة القنفذة .

عبد الواحد ابراهيم محمد كتب:اخينا صديق ابوحنة
لك منى عاطر التحايا
بخصوص اهلنا الجعلين فى منطقة الباوقة ولتصحيح مارود افيدك يا صديق الجعلين ليسوا هم الاغلبية فى منطقة الباوقة وليسوا هم سكانها الاصليين واول من قطن الباوقة وذلك قبل قيام مشروع الباوقة الزراعى فى العام 1917م على ايام العهد الانجليزى هم الانقرياب ( العبدلاب ) من ايام نهايات الدولة السودانية وهذا للتصحيح .
الجعلين لهم فرعين هما السعداب والمسلماب .
المناصير ايضا لهم حى كامل (قديم) اسمه المناصير واخر اسمه طمس ولهم عدد مقدر بالتكاوين (جعلين سعداب ومسلماب) كما يوجد مناصير فى مناطق خارج الاحياء الموجودة بالباوقة حواليها يعنى وجلهم من القادمون من كبنة وبوادى المناصير .
بالنسبة لمعلومة دكتور اليسع هى صحيحة جدنا سليمان مكى قدم والده من حجر البيضة فى نهاية القرن قبل الماضى حوالى 1899ثم وجاء الى منطقة الجول عبر الطوف وعمل مع الصيادين والتقى الصديقالت من اهالى الجعلين ثم تزوج بنته المعروفة بفاطمة البقارية والتى قتلت رجلاً من البقارة وهى والدة جدنا سليمان مكى الحسن وابناؤه وهم هاشم والسر رحمه الله ومعتصم وحمدالنيل ونصرالدين وحافظ وبناته وهم امنة وعلوية ( والدتى) وام الحسين وهلالية زينب وامال اطال اعمارهم .
بخصوص باصات خالنا معتصم صحيح هى اول مواصلات ترحيل بين الدامر والخرطوم بحرى (موقف شندى) وطبعا فتح الخط وكانت عبارة عربات نيسان (القلابات) معمول لها صندوق بتاع بصات وكان اسمها اكسبريس نيسان ابو الخلف ، وابو الخلف هذا سعودى صديق لخالنا الذى يدير له اعماله بمنطقة القنفذة .

كفيت وو فيت ايها الاخ الكريم ...و لدى تصحيح بسيط و هو أن حى المناصير هو نفسه =حلة طمس الذى هو نفسه =حى التكاوين شمال الذى وُلِدتُ وو ترعرت فيه انا ....كما إن الباوقة رغم انها كوكتيل من القبايل السودانية المختلفة إلا ان الطرب فيها لإيقاع الدلوكة بشكل غالب الذى إختص به الجعليون
تقديرى و احترامى

شكرا للمهندس صديق الذي جمعني بابن خالتي عبد الواحد واظن اننا لم نتقابل
اها ياصديق هسع عليك الله في اجر اكبر من كدي
عبد الواحد لك ودي والاحترام
طبعا انا اليسع ودي فاطمة بت زينب بت سيرابي وسليمان مكي عليه رحمة الله هو خال الوالدة عليهما رحمة الله جميعا
شفت البلد دي ضيقة كيف
لكم جميعا ودي واحترامي ولبت الماحي التي جعلت ذلك ممكنا

محمد حبيب بشير هبرم كتب:سمحي بلحيل ....بت نجومي
تبتبت الحيل ... بت نجومي
اخييها الخير ...بت نجومي
وشاي العصير ... بت نجومي
علي ايقاع (الجابودي) وهذا ايقاع خاص بمناصير البادية...حتي الرمية العبوس الخيرها مادام هي رمية بادية المناصير وخاصة الذين ينتشرون في صحراء بيوضة وبت نجومي نفسها هاجرت الي الباوقة ومن ثم الي كدباس وأخيرا تزوجها ابن عمها الهيس وأنجب منها أصدقاءنا عبد الواحد والشيخ وأخوانهم
تقبلوا مروري

بما أننى استلمت التوكيل رسمى بشأن هذا البوست , اتقدم بالشكر الجزيل للاستاذ محمد حبيب هبرم على مروره الطيب من هنا و على تعليقه الشعرى اللطيف ....فعلا اياها دى الاغنية زااااااااااتها و بت نجومى هى قريبتنا نسيبتنا فإبنها عبد الواحد هو زوج بت خالى .....و فعلا إنه عـــــــــــالم صغير .
واااااااافر الاحترام و التقدير

أنا سلمت البوست ده لى بت الماحي..وهي ما بتقصر..

الرائعة بت الماحي ونحن صغار لما يزورونا كدباس أم طبول لازم الغدا في الباوقة عند حبوبتنا فرحين الله يرحمها عشان كدي أحفظ تضاريس المنطقة بتفاصيلها

محمد حبيب بشير هبرم كتب:الرائعة بت الماحي ونحن صغار لما يزورونا كدباس أم طبول لازم الغدا في الباوقة عند حبوبتنا فرحين الله يرحمها عشان كدي أحفظ تضاريس المنطقة بتفاصيلها

و الله يا استاذ وصلتنا تب ..طبعا المرحومة فارحين جارتنا هل تذكر جارة الخير بنتها و عزفها على الطمبور؟؟؟
.....نحنا بقى كان زوارتنا عند الشيخ ابشر ابو بشرية فى الجول و كان الاطفال تحلق رؤوسهم بنات على أولاد عند ضريح الشيخ و تذبح (ام اربعة كرعين)و ما زلت اتذكر عندما كنا راجعين من الجول انا و ابوى الله يرحمه و راكبين فى لورى سعيد العُمَد و انا اعاين فى المراية عشان أشوف صلعتى عاملة كيف .

دكتور اليسع
الحمدلله لميناك في قريبك يا دكتور يا رائع
.................
بت الماحي... ههههه
صلعتك كانت عاملة كيف في مراية اللوري؟ كان فيها قنبور صوفايات كدة من قدام والله مافيها؟؟

د اليسع حسن احمد كتب:شكرا للمهندس صديق الذي جمعني بابن خالتي عبد الواحد واظن اننا لم نتقابل
اها ياصديق هسع عليك الله في اجر اكبر من كدي
عبد الواحد لك ودي والاحترام
طبعا انا اليسع ودي فاطمة بت زينب بت سيرابي وسليمان مكي عليه رحمة الله هو خال الوالدة عليهما رحمة الله جميعا
شفت البلد دي ضيقة كيف
لكم جميعا ودي واحترامي ولبت الماحي التي جعلت ذلك ممكنا

لا حولة الا بالله انا بالاول قلت الزول الجدو سليمان مكى دى منو صدقت يا اليسع سليمان مكى جدلاحفاد السيراب
وحقا هو خال والدتكم عليها الرحمة... بس ما كنت متصور انو الزول يعرف اقرباؤه من خلال هذا الجهاز العجيب
الذى قرب المسافات التى تباعدت .. ويا اخوى طبعا ذى ما بيقولوا انت دمنا ولحمنا .
تحياتى للاسرة الكريمة .
انا برضو السيراب اقربائى من ناحية الوالد طبعا ( الدومات ) لكن هم الاقرب من ناحية الوالدة اطال الله عمرها .

بت الماحى شكرا على التصحيح وانت برضو لو بقيتى من ناس الماحى ود معلوم بتكونى قربيتى لان اولاد معلوم اولاد خالت ابوى طوالى امهاتهم شقيقات .
زينب بت الشين شقيقة مكة بت الشين والدة والدى

عبد الواحد ابراهيم محمد كتب: بت الماحى شكرا على التصحيح وانت برضو لو بقيتى من ناس الماحى ود معلوم بتكونى قربيتى لان اولاد معلوم اولاد خالت ابوى طوالى امهاتهم شقيقات .
زينب بت الشين شقيقة مكة بت الشين والدة والدى

أخى عبد الواحد الحقيقة انااسمى دا لقب أحمله منذ أن كنت فى عمر الخمس سنوات اطلقه على الوالد رحمة الله عليه نسبة لانى كنت احب المديح وو امدح بصورة كوميدية شوية فقال ساخرا : صدعتى راسنا يا بت الماحى -نسبة لاولاد حاج الماحى - و من ديك و عيك مسك معاى ................اسم الماحى ود معلوم سامعاه عند أهلى الكبار وبيتردد كتير .....كمان بركة اللميت فى قريبك الدكتور المتميزدوما اليسع حسن احمد و ربنا يجمع شمل كل الاهل
وافر الاحترام و التقدير

الزولة الكتااابة دي
بت الماحي ( شادية) برضو غابت مننا. هي ما ساهلة. خريجة جامعة الخرطوم، لما كانت جامعة الخرطوم جامعة الخرطوم..