من رميات ود الحوري

من طرف **خالد عابدين** الإثنين 11 يوليو 2011, 2:21 pm

ما بتدوم الخيرا ما دام
أخدي مشوارك يا جدي الشام
بي بعيد تديني السلام
بنخاف لابد نتلام
في العبوس الخيرا ما دام
**
يا قلُب مالَك تقول وَحْ
ويا وجع في سيدك نبَحْ
يا الدِفيفِيق الما وضح
لا إتغملْ لا شكوك سِبح
طيرو فوق العرجون نبح
**
يا قلب مالك بِتـَهِم
ترعى غنم إبليس تقسِّم
ربي كان قاسملَك قسم
في جنينة أم المون تشم
زي أم عجباً ما بيتم
ريدا زي عارية الهدم
ليلة تفرق وليلة تلم
في الشِتيل الشايل مِترَدم
سيدو فَسلان رامي الهِدم
عِن قُعاد الضُل يحرِّم
**
من صغير تبيت جِنيْ
حالي عُشرة وراضي والديْ
ما بيقولو لي الجيران أفيْ
إتقلَبْ جاي الجرِح نيْ
إتقلَبْ جاي الجمُر حيْ
داير أدُق طمبوري النِقيْ
ما بيونسني الليل شوي
داير أوصِّفا سمحة الزي
يا الولوف..أنا حِن علي
قلبي في كرعين الحِدي
وإنتا نايم وأنا جمري حي
**
أنا من صغير فوق الهانة والميل
فرشي نار وغُتاي المَلِيل
ليّا درَّت وعَتمت قبيل
ما حلبتها فأمري بستيل
**
النفس يا حوري أطربا
والهِِمُوم مِنّك بعدا
والحِمول فوق سِيدا أسندا
**
قلبي حافظ لي مِن مشا
البِسوِّي الخير بيلقا
والبِسوِّي الشر بيرجا
مالي ومال الهم مِتِل دا
**
يا كريم تديني الصبُر
يا لطيف تديني الصبُر
والثبات في كل الأمُر
النفِس غشّاشة و تضُر
المكتوب من الله يمُر
جنبها إبليس حافر مَقُر
شركو لي وكت الموت يضُر
يا الرسول من طبّاتُو كُر
الليلة حلوة وباكر المُـر
**
يا القلوباب أرفعوا الكف
ويا الفريعاب أرفعوا الكف
أقروا ياسين وكتِّروا التَف
الكويريق الما خلف
واليعوم تالاك إنزقف
حالي يا ست الريد وقف
وإنتي ليه ربطِك معاي مرق بف
**
أنا يا قِشيش هود الكُربِكان
الشِرِب بالنجمة رويان
عوّج أَلبِل وفقََّّع الضان
كل ما إتلقى في بكان
مرَّة كِلوة ومرَّة مُصران
فرّقتنا الماليها امان
كل واحداً بقى في بكان
**
إنتا يا إبليس لا تِتقَمِش
لا يغُرك عَجَب النَفِس
وإن لِقِيتلَك خير غادي أمش
نِحنا وإيّاك لا نِتهَبِش
ما بخليك ياك يا تبش

رائع...
احسن غيرت صوره الولد الفى المركب كل ما اشوفها تمسكنى خوفه

كلام والله ... شكرا يا ريس .. طلاتك دائما نجد فيها المؤانسة ..وآسف على كلمة طلاتك لأن امثالك نريدهم أن يتخذوا من المنتدى بيتا وسكنا
فأنتم والله نعم القدوة .. وأنتم والله نعم الإخوة

الرائعون
الاخت هويدا - شكرا على مرورك - وحكاية الوليد الفي المركب يمكن تعبير للمئات من اطفالنا واخوتنا الصغار في المناصير الذين لازالو يمتطون مراكب الياماها وهي تصارع امواج البحيرة الضخمة ذهابا وايابا يوميا من والي المدرسة - كان الله في عونهم وعوننا

الرائع الزول الكتاب جدا ود المناصير الاسم على المسمى - معقوله الكلام الكبير جدا ده فوقنا ونحن لازلنا أقزام نتحسس مواقع اقلامنا في حضراتكم ,وربنا يجعلنا عند حسن الظن
ود الحوري من فتحنا سمعنا رمياتو واغانيهو ويمكن كنت احفظ اغلب هذه الرميات اعلاه مع صوت نقرشة الطمبور الحنين الذي يفصل مابين الرمية والاخرى ولاحظت أن هناك رمية مفقودة يقول فيها

ناس نكير قالوا لي عكروت
عندو سندالي وعندو نبوت
إن وقف قبلك مابيفوت
إلا ياخدك حتن تفوت (أو تموت) لا أذكر

من رميات ود الحوري

من رميات ود الحوري

رد: من رميات ود الحوري

رد: من رميات ود الحوري

رد: من رميات ود الحوري