تقرير عن الافطار الجماعى --مع الصور --

الاخوة الكرام سلام ---
عفوا للتأخير فى رفع تقرير عن الافطار الجماعى –
اولا الحضور :
الريس خالد—الرشيد –الحاج –خال ابرار –يس –الخبير –جبريل—واحمد—
ثانيا –المكان –على شاطىء النيل الازرق—شرق كبرى كوبر—
ثالثا –الناس الذين اتصلوا خلال الافطار—الاخ محمد بروى –الاخ صديق عبد الله –الاخ حازم
بعدين الفطور كان من البيوت ياصديق—ومنظر بديع البحر كارب ومحمرولكنه (ريط) ولكننا توضينا فيه—
بعد الافطار او كما يقولون على هامش الافطار تمت مناقشة –الخطط والبرامج قيد الدراسة والتنفيذ—اهمها –
1-زيارة والى الخرطوم –عن طريق الاخ النائب –وذلك بخصوص قطعة الارض للدار -
2-ايضا تحديد الزمن لمقابلة مندوب منظمة كفالة الايتام
3-ايفاد اعضاء لتصوير منطقتى ام سرح وبحراز—وقد تبرع كل من الاخ الخبير والاخ خال ابرار بالقيام بالمهمة-
4-التنسيق لاجراء لقاء فى الاذاعة الطبية للتحدث عن تراث المنطقة حسب البرنامج الخاص بالاذاعة
5-التحرك لمقابلة بعض المهتمين بالتراث وخاصة تراث المناصير –وكذلك مقابلة الاستاذ وردى—
تخلل هذا النقاش الحديث عن المنتدى والاعضاء والكتابات وكذلك اخبارالبلد –
ويامنوفلى سألت عن نجم الافطار واقول ليك هو يس مصطفى بحماسته وعصيره الذى شربنا ليه بالرجالة (غرنا ) غر-وبحماسته كان يقطع اى حديث ويدفع الناس للامام كلما برد الحديث—كذلك من مفاجأة الافطار اتصال الاخ حازم –وكنا فى اى اتصال نفتح (الاوت الاسبيكر) لنسمع جميعا—
اما النجم المفقود كان الاخ ابو مصطفى—
ولى عودة –ان الله مهل فى الايام---
---الان احاول ارفع الصور---

الله اكبر الله اكبر
عيني بارده
اعتقد هذا اكبر انجاز وباقل عدد من الناس
وهذا المكان واللقاء سيكون محطة الانطلاق والنواه الحقيقية لكل النشطة

والاخ يس ده كله ما كتير عليهو
بس داير ضهر وراهو
وهو الذى قاد من قبل الي تكوين اتحاد او رابطة ابنا المناصير بجامعة السودان للعلوم والتكنولوجيا
وربنا يخليهو
اها شوقتنا شوقتنا واصل واصل

الأخوة الكرام :-
ربنا يتقبل منكم هذا الافطار الجماعى..ونتطلع لمزيد من اللقاءات والاجتماعات بين أعضاء هذا المنتدى الرائع حتى تتبلور الأفكار والنقاشات وتصبح خططا ويشرع فى أمر تنفيذها..
دعواتنا لكم بالنجاح والتوفيق ،،،

الاخ سلمان شكرا ع التقرير الوافى عن الافطار فتقريرى الشخصى عن الافطار فبصراحة كان شرف لا يضاهيه شرف وكانت الفرحةلا تسعنى وانا التقى لاول مره بالاخوان سلمان والرشيد والحاج وجبريل واحمد وسعدت اكثر باتصال الشاعر محمد بروى الذى تحدث مع الجميع باريحيته المعهودة وكذلك اتصال الباشمهندس صديق والسيد حازم.
كانت لحظات جميلة بالرغم من قلة العدد شكرا لكل من حضر واتصل واعتذر شكرا لكم جميعا

والله ياجماعه انا ماعارف ابدا من وين .دعوني اشكر محمد بروي وصديق ابحنه وحازم .لحرصهم علي المهاتفه .وبعدها كل الحضور .والمعتذرين كما اشكر الابن احمد سلمان علي خدامته لنا وانشاء الله يكون دا فطور اول وتعقبه لمات تانيه

حقيقه الاخ سلمان اوفى
ولكن نعقب
نجم الافطار حقيقه كان الشبل احمد سلمان عقيد والذى قام بتصوير الافطار ولم يظهر فى الصوره
ضيف الافطار ابن عمتنا المهندس احمد خليفه طيب الاسماء
المفاجات كان اتصال اخونا محمد البروى من السعوديه واخونا صديق عبدالله من الامارات والاخ حازم من موقع عمله بالخرطوم
الاخ جبريل وصل بعد الافطار وبعد نهايه المحادثات
شخصيه التقى بها لاول مره ابن اخ دفعتى على حمدانه الدكتور خال ابرار
ماكنا نتوقعه وصول عدد من الشباب والطلاب خاصه من اعضاء المنتدى لحضور الافطار وقد عملنا حساب ذلك ولم يحضر منهم احد
الاعتزار هنا لاخونا احمد الفيل لاننا فى لحظه حضورنا للموقع تذكره اخونا الرشيد ولم نتمكن من الاتصال به لضيق الزمن ونعتزر له نيابه عن اخونا الرشيد
اخونا منوفلى كنت محل سؤال متكرر من اخونا يسين مصطفى وقد حصر اسماء بعينها انت منها لا محال كما قال
عدم تمكين الشبل احمد من التصوير مع المجموعه حرم اخونا الهادى عقيد من رؤيه ابن اخيه المصور البارع
امتدت اللمه حتى الحاديه عشر ليلا
لو تمكنا من تصوير الافطار بالفيديو لظن الاخوان بالخارج اننا فى احدى الشؤاطى العالميه لندن باريس وكده

الأخوة الأعزاء رغم دخولنا كان متأخر لكن والله عمل جميل ومشرف واصرار شباب بحق وحقيقة ونسأل الله أن يجمعكم في الجنة ببركة هذا الشهر الكريم

سلام لكل الاخوة المتداخلين
دائما الميل يبدأ بخطوة وهذه بداية جميلة وموفقة ان شاء الله ونتمنا ان تكون فى كل المناسبات لمات لانه من خلالها يمكن ان تتولد الافكار ،
والله يا الحاج الصور جميله ولكن حرمنا من رؤية ابن اخى احمد ولكن الجايات يقولوا اكتر من الرايحات .

شكرا الشاعر المرهف محمد بروي. طبعا للاسف انا حضرت بعد المكالمه إنشاء الله سوف يكون لناشرف اللقاء بك قريبا.مع تمنياتي لك بدوام الصحه والعافيه .

بداية الغيث قطرة

شكرا للاخوان الذين قاموا بتنفيذ الافطار وشكر اجزله للاخ يس وكل الاخوان وربنا يديم التلاقي والموده والله صور رائعه بس زول واحد أقبضه كدي اقول عرفته ماهو في ألا نفرتين اتنين كلامهم وملامحهم واحده
وشكر موصول للقامه محمد بروي والباشمهندس صديق ابحنه والاخ فتح الرحمن عون الله والنفر والاخ نور الهادي وربنا يجيبكم بالسلامه وانشاء الله نحتفل بيكم هنا بالخرطوم باذن الله
والشكر كتيييير لتلك الشله التي تسعي للمبادرات الجميله ...حازم

اولا السلام عليكم جميعا
الشكر كل الشكر لكل الذين حملوا هم المناصير وكافحوا من اجل نشر تاريخها وثقافتها والشكر لكم ايضا وانتم تقومون بهذه الافطارات الجماعية وصراحة زول ما هو منكم ندمان فى حياتو ندم .
وانا صراحة كان اشتراكى بالمنتدى متاخرا وذلك لبعدى عن الاخبار وظروف العمل بود مدنى لكن نوعدكم ان نكون معكم فى كل كبيرة وصغيرة تخص قبيلة المناصير
وشكرا

شكرا ابننا الدكتور خلف الله على اللسيدى--العريس --وانت لسع ماسافرت-

رمضان كريم .نشكر الاخوه اصحاب الفكره والمنفذين .والله لو عندى خبر كان جيتكم من مدنى .لكن نامل فى لقاء عيدى يجمع الجميع 0

شكرا ليك عمى سلمان عقيد ورمضان كريم
موضوع السفر حا يكون بعد العيد مباشرة ان شاء الله
وايضا نشكركم على التواصل معنا عبر هذا المنتدى الجميل

ابن اخى الدكتور خلف الله كيف صحتك ان شاء الله طيب وبعد تسافر ورينا اخبارك لكى نتواصل معك .

عمى نور الهادى أخبارك وكيف عامل مع الغربة ورمضان كريم ونحن والله مشتاقين ليك شديد وان شاء الله بعد اجى السعودية حا اكون معاك على اتصال ونوريك أخبارنا والسفر بعد العيد ان شاء الله
لك تحياتى

الهادى و سلمان كدى براحة عرفونا بود اخوكم الاخ خلف الله العريس ومبروك ليهو

ياسلمان الحقنا الزول ده قبل مايسافر مالامين فيه .ده الحال نحن معاه فى مدنى .ولك التحيه .

يامحمد عمر نحنا حالتنا متكلين عليكم --ودى عوجى دى--طبعا عندكم جو رهيب--
الاخ الرشيد خلف الله دا ولد ابن عمنا على اللسيدى-- النعوفاب-- وهو طبيب --خريج جامعة الجزيزة --ومسافر للسعودية--

فطوركم دا مالو عزابه بس

لك تحياتى العم محمد بروى .كنا متوقعين جيتك .وكان فى ذهنى رده فعلك لمن تشوف البحر كيفن سوى فى فقاعه ...(.تجينا متين مشتهنك).

استاذ سلمان والله جونا من يوم خطوبه الدكتور ماشفنا الشمس .ياريت تجيب الجماعه زياره لينا.

من الامس

رمضان كريم يا شباب

وفطوركم دا كان متين ومالو بلا خبر كان اقلاها هاتفناكم

وانا اليومين ديل زغت كسلا ... وآهي من كسلا .. رمضان اظنو عدى بالظلط ..قراصة بس ...ونوم سااااكت

المهم سلمان كل مرة جايينا بالعجايب ... باسقات ... وفطور على النيل ... ولقاءات وزيارات .. غايتو جنس مغصة

وهكذا هم شبابنا الذين نعول عليهم كثيرا

وهم من نرمي عليهم بكل الثقل .. لثقتنا فيهم ومعرفتنا بهمتهم وروحهم

لكم الشكر والتقدير وأنتم تقدمون لنا في كل يوم تحديا جديدا

شكرا لكم وانتم كل يوم تتبرزون لنا أملا وعشما عظيما

شكرا لكم أنتم تضعون لنا الأسس والبرامج وتشرعون في تنفيذها

ونجد انفسنا عاجزين عن التواصل إلا عبر الكتابة ولكن عهدا ووعدا سنكون معكم قلبا وقالبا قريبا إن شاء الله

وفقكم الله وسدد على طريق الخير خطاكم

ويا ريس يس ... خليك كدا طوالي ضغط عالي .. بس أوعك حرنة سلمان ... ومقالب الحاج ..وطول بال خالد عابدين ... وزوغان ود الطرشان

والتحية لكل المشاركين في الفطور

لكم ودي وتقديري

الاخ ود المناصير

رمضان كريم

كنت اود ان ارسلها لك عبر الرسائل الخاصه

ولكنى اردت ان يطلع عليها الاخرون حتى لا يظنوا اننا عنهم غافلون بيننا وبينهم الايام

مسيره كم وعشرون يوما حتما سنلتقى

وما انزلناه هنا كان من الامس وفى مثل هذا الشهر من العام السابق

لعلنا نجد من يدق على ناقوس الذكرى ويحمل عموده بالبليلى والتمر والقراصه الساخنه

ويقول لنا قابلونى على المقر الدائم لمنتدى المناصير بلدى

مع تحياتى لكل من هو خارج ولايه الخرطوم

مدنى كريمه بورسودان وشقيقاتها يمينا وخلفا

وخارج السودان هولندا والهند والامارات والمملكه والجماهيريه سابقا

مع ودى لك ود المناصير

ما شاء الله ما شاء الله
أن شاء الله دائما لامين وتامين
ووفقكم الله

غايتو خيانات تقيلة
نقرا ونتفرج على الصور بس

يا هويدا الجماعة ديل عندهم حساسية ضد ............

[quote]وماانزلناه كان من الامس فى مثل هذا الشهر من العام السابق[/quo

te]

والله يالحاج أول مرة زول يتوهني ... بالله انا استغربت جدا وما عاينت للتاريخ .. وقلت يكون رمضان دا بدا عندكم بدري واللا انا لسع مزهلل من حر البلد ديك على كل حال نعم الفكرة ونعم التوقيت عشان ناس التكييف ديل يصحو ويكون فطور في الهواء الطلق ... ومعاه كرم منصوري اصيل وحرم وطلق

نحذر الناس من مقالب الحاج ونقع فيها برانا يا يس .. جنس محن ؟؟

غايتو دي حا نردها ليك يا ود الفقرا بس نخاف ننسخت

شكرا الحاج شرف .. وافكارك دائما تسبق الآخرين ..ونتمنى أن نكون حضورا في لقاء هذا العام

وفقكم الله لما يحب ويرضى

ودمتم

معقولة ده مقلب
وانا لحد حسه تايه

الله يجازي محنك يا الحاج

مقلب ابن كلب
أنا قلتا لسه الناس ما فاقوا من سكرة الباسقات ولسه الحاج شرف الدين ما انجما من التعب التعبوا في الباسقات..و( قاصرات الطرف).. والسابقات اللاحقات.. والمغيرات صبحا..

تمام تقبل الله ... انا داير عرف الجنب الحاج دي حوتي محمره ولا طرقه قراصه .. ياسلام والطعمية والزيت يقول عووووووك لبع جد ايامكم والله