حسن أحمد الفكي

انتو يا خالى صديق نسيتو اهم اثنين من اصدقائى :--------------
1- محجوب حسن احمد الفكى - ام درمان الاحامدة
2- السمانى حسن احمد الفكى - ام درمان الاحامدة
والشى الذى يجعلنى ادخل
الى هذا الموضوع اصلى جيت من الجزائروتم قبولى بمدرسة شيرى المتوسطة بنين واول مرة فى حياتى ارى واعرف صندوق البريد والبرق والزول يكتب الجواب ويضعه فى صندوق عند ناس حسن الفكى والجواب يسافر الى ام درمان وعموم الخرطوم ؟؟؟ بالله شوف سوف ياخذ كم يوم او شهر وشوف الجواب الان ؟؟؟؟؟
ناس حسن الفكى على فكرة من اوائل الناس الذين ادخلوا خدمة التلغراف والبريد والبرق فى المناصير ؟؟؟؟ الله قادر ؟؟؟

كتب صديق عبد الله
بعدو الحكيم.. ( الحبيب) يسموهو الحبيب منصوري
الحكيم ده يا صديق من عصمة وهو الحبيب عمر صديق شقيق بابكر عمر صديق والد الشاعر حبيب وعمر ومحمد بكورى والحبيب وبابكر الاثنين اخوال والدى المرحوم طه اشقاء والدته المرحومة الحاجة فاطمة عمر صديق وكان الحبيب عليه رحمة الله زوجا لعمة امى المرحومة الحاجة فاطمة عيسى مضوى شقيقة جدنا على عيسى مضوى الله يطول عمرو وتزوج واحدة اخرى من الكربكان مكان عمله .
نسأل الله ان يشمل الجميع برحمته

مشكور ياهندسه علي هذا الارث والتراث
متعك الله بالصحه ونفع بك المنطقه
حازم

مشكور ياهندسه كلماتك لها طعم وسردك له رائحه
متعك الله بالصحه والعافيه ونفع بك المنطقه
والله كنا نحفظ تلك المقاطع
الليله ياالجبنه تبقبقي
في برندة حسن الفكي
لانعلم من يكون حسن الفكي ولماذ تبقبق الجبنه في برندته فقط
اذ هنالك المئات من البرندات تعج بالبن
لك الود ثانيه علي تلك المعلومات ونحن منتظيرين ابداعاتك ياهندسه ولينا واصل الفواصل
والسلام حازم

تسلم ياهندسة على هذا الابداع المتواصل
وزى مابقولو محل مايختوك فى الجرح بطيب وعينى باردى عليك وقصة برندت حسن الفكى دى انا زمان فاكرة برندت جدى حسن ود احمد ( والد الولدة الله يرحمهم )لانة كان عنده برنده طوويلى معروشة بى حطب فلنكان السكة حديد

تخريمة
حازم دا بجى الساعة كم برعى البرم كل ماجى الصباح بدرى بلقاهو سبقنى طلق غنمة عليهو

الأخ صديق سلامات والله كفيت ووفيت وما خليت كبيرة ولاصغيرة ولاشاردة ولاواردة فى سيرة جدنا المرحوم حسن الفكى بس عندى تصحيح فالمرحومة الحاجة بت خليفة اسمها فاطمة وليس زينب وهى بنت خليفة مصطفى
أخ كل من عثمان مصطفى {ودكرب }وسليمان مصطفى القميرى والحاج محمد والد الأخ مصطفى بالسعودية
وبالنسبة للحاج بن عثمان مصطفى الذى اختطفه التمساح فقد عثر على جثته فى الكريتى ولم يستطع التمساح
أن يمس جسده بخدش . وبالنسبة للرجل اللذى لم ينزل من مركب عبدالله العجمى طواعية الا بحيلة حسن الفكى ،
أنا كنت حاضرا فالرجل كان شابا مفتول العضلات يقف على دير المركب وبيده عكاز أضحم من عود الجوز
وكل حين يضرب به المركب ويهددكل من يدنو من المركب وينادى بأعلى صوت ، أنا حماد الشندى يا.....
وينادى باسم أحد معارفه من النعوفاب لا أذكر اسمه قائلا له ، جيب سيفك وتعال الشرايه أهانونى ؛
وكان الناس يمنعون كل من يريد أن يتصدى له وأذكر منهم المرحوم شوال وابراهيم عثمان عبادى وغيرهم .
وبعد أن تمت السيطرة على الرجل تسابق بعض الشباب عوما فى البحر لأخذ العكاز فقد شوهد بعيدا تتقاذفه
أمواج الدميرى وكان من نصيب المرحوم سليم الحلبى .

لقد تاهت هذه الكلمات ومعانيها ورست فى غير مشرعها فمعذرة ،

فكرة الكتاب رائعة يا دكتور اليسع... بجيك في إجازتي في جامعتكم...
بس لغة النشر في النت غير لغة الكتاب التي تحتاج لضبط وتنقيح وتدقيق. وهذا مجالكم يا ناس الدراما واللغة.
بالنسبة للكلمات التي قلتها في حقنا.. هي من ذوقك والله ومن تواضعك( إن للعلم سطوة، تقود الى الاستعلاء والتكبر، وأن التواضع هو أصل الخلق الرصين)
بالنسبة للتـأليف سبق أن كتبت كتاب عن المناصير إسمه( الطياني) الآن المحاولة جارية لإعاده طبعه.... كما قدمت بحوث في رسالة الماستر مطبوعة ومغلفة.. كان قد أهديت الى كلية التقنية العليا في ابوظبي منها.. واهديت الى جامعة الإمارات.. شوية شوية عشان الناس ما يملوا هنا بنكتب.. مرات البحث يكون شبه عقيم.. والسيوري والريسيرشنق.. يكون بلغة التخصص. وغير مهضوم للعامة.. لكن زي ما لاحظت أنت يا دكتور
التدلي تحت تحت للناس الغبش والدراما..ده البي يكون بيهو التفاعل.... وأنت ظاهر عليك يا دكتور زولاً حنيين.عشان كدة دمعتك قريبة.. وهذه يقول الصالحون ولاية.. الزول الدمعتو قريبة قلبو لين.. وديك بي هناك ربنا قال عنهم( ثُمَّ قَسَتْ قُلُوبُكُم مِّن بَعْدِ ذَٰلِكَ فَهِيَ كَالْحِجَارَةِ أَوْ أَشَدُّ قَسْوَةً ۚ وَإِنَّ مِنَ الْحِجَارَةِ لَمَا يَتَفَجَّرُ مِنْهُ الْأَنْهَارُ ۚ وَإِنَّ مِنْهَا لَمَا يَشَّقَّقُ فَيَخْرُجُ مِنْهُ الْمَاءُ ۚ وَإِنَّ مِنْهَا لَمَا يَهْبِطُ مِنْ خَشْيَةِ اللَّـهِ ۗ وَمَا اللَّـهُ بِغَافِلٍ عَمَّا تَعْمَلُونَ )شايف كيف الزول الدمعتو قريبة يا دكتور عندو درجة من الولاية.والزول الغافل ومتبلد ولايتجاوب مع الأحداث الله قال قلبو أقسى من الحجارة؟؟؟.
والدراما هي لغة الحاصل.. يعني الموجود تعجنوا وتخبزوا وتعمل منو زلابية بعد ما كان دقيق لايلفت النظر. او تعمل منو كيك أو جاتوه.. أول ما صار جاتوه صار دراما يعني لفت النظر وبقا حلو. محبوب.لكن ياهو نفس الحدث الذي عاشة الزول العادي.. بس هنا بمرآة رجل الدراما... والرجل الدرامي ناقد زكي وذكى للمجتمع
الجاتوه اصلاً دقيق.. منظره غير ملفت..( يعني الأحداث داخل المجتمع تمر عادية على الرجل العادي)
أول ما تتعمل دراما.. تكون مضحكة ومعالجة وعندها قدرة جذب بقدر تلقى الرجل الدرامي من علوم الدراما.وفن الموهبة شئ اساسي والخبرة والتمارين وتلاقح افكار الكبار مع الصغار من الدراميين.
الشاعر زي بتاع الدراما.. حاجات عادية يصورها ليك ( قبة الحسن)
رجل الدراما هو في الحقيقة مهندس يبني ويهندس أفراح وأتراح المجتمع في اسلوب درامي شيق
أو قل دكتور يعالج آهات المجتمع في كبسولات..
شوف مثلاً المساحة التي تستغلها رسمة كاريكاتير في جريدة . مساحة بسيطة جداً. لكن نبرة ونغمة وجملة الكاريكاتير قد يحتاج كاتب أن يكتب صفحات في جريدة ليصل لنفس المعنى الذي وصل إليه بتاع الكريكاتير في نصف سطر من الكتابة وفي اربعة بوصات من المساحة.
الدراما فن إبداع حقيقي ووصفة من ضمن الوصفات
اللي هي الشعراء والفنانيين والملحنيين والمبدعين والصحفيين وكل الفئات ذات المواهب
لك ودي يا دكتور اليسع
دمت في الحفظ والصون

متابعة لسيرة حسن الفكى رحمه الله الذى كان الكل يجله ويقدره ويعجب بذكائه الحاد وكناونحن صغار وحتى
بعد أن كبرنا نهابه ونظرتنا تجاهه تختلف عن نظرتنا لنظرائه لشىء نحسه ولاندرى كنهه وقد كان مجلسهم
والذى فى حالة انعقاد مستمرة هو والمرحوم حسن أحمد بابكر بالصباح فى ظل الصباح ومن ثم ظل العصر
كان مجلس رأى ومشوره وصلح .
كان اذا باع سلعة أو أدان أحد أوأقرضه لايطارده بل يتركه حتى ولو لم يسدد له ، ولمثل هذه الخلق وغيرها
كانو يسمونه ـ البغرفو منو ـ وماثره كثيرة لايسع المجال لحصرها ، نسأل الله له الرحمة .

عند حافة كبر ودعيسى وقرب النخيل الباسق وعند شجرة السنط وفى أواخر الخمسينيات ،كان هباك حشد غفير
من الناس كبار وصغار يترقبون حدثا مهما ألا هو تجربة تشغيل أول طلمبة رى فى شيرى ،
وكانت النظرات تتابع باعجاب خطوات المخضرم العم الطيب الحسين أمد الله فى أيامه وهو يضع بثقة اللمسات
الأخيرة تمهيدا للتشغيل ، وماهى الا لحظات فاذا بالبابور ـ يبكبك ـ ويقطع ذلك الهدوء والترقب باعلانه بنفسه
عن نفسه واذا بالماء يندفع وبقوة محدثا صوتا يماثل صراخ من خرج لتوه من رحم الغيب للوجود ، وسط
الضجيج والتصفيق وكلمات الاستحسان والاعجاب .فكانت لحظة تاريخية بدأ بعدها العد التنازلى للسواقى
والبقر وقد قال فى هذا الشأن وقبل لحظات من التشغيل ،قال الاستاذ الكبير ، نعمان سليمان قمر ،له منى التحايا
وكان حينها تلميذا بمدرسة شيرى الأولية مقيما مع أسرة المرحوم حسن بابكر ،قال :{ياالله تدور البابور ،
نتحلى من حكم بقور ، حكم الحلبى وودعبضول } وهم من سمودة ساقية المتيرة وفعلا انتهت فترة حكم
البقر والسواقى ببابور المرحوم حسن الفكى ...

انا قربت افتح فيك بلاغ
انا منصوري اما وابا ابوي من جماميع السليمانية والجماميع دي مسمية علي جدي ابو ابوي ويبدو والله اعلم ان الجماميع تنازلو وباركو لولدهم من الهبرمية ولو بتعرف ناس حسن ود ابرماد ونا الحنشية والمترة ديل اهل ابوي حسن احمد حليب فضلالله علي جامع
ولك ودي والاحترام
بس المعايش طفشت جدنا احمد وساق محراتو وتيرانو وفز من مشاكل المواريث وفجيخ الروسين فوق عصبة الجدول وهاجر جنوبا حتي استقر به المقام في اراضي الرباطاب واها ومن ديك وعيك
وتلك قصة اخري

الرجال قامات والناس مقامات والنار ما بتخلى الرماد ما بتعرف لى يا صديق ابحنة حسن الفكى رحمه الله منزوج كم امراه ماشاء الله اولاده كتار ؟؟؟




تحياتى

ابو مصطفى

أبو مصطفى
مشتاقين
ذكرنا في البوست إنو متزوج من مرتين فقط..

شكرا خالى صديق على المعلومة اصلوا المنتدى دا كبر وعرض بقينا مرات ما بنشوف من شدة الحكاية ما كبرت وكترت ؟؟؟


لك تحياتى

ابو مصطفى

بالمناسبة ياهندسة نسيت اذكر ليك حاجة
الشنطة بتاعت الاسعافات الاولية موجودة
لازال محتفظ بيها عمى ((الدسوقى)) وغيرها
من الاشياء القيمة،،ومن طبيعة عمى الدسوقى
بحتفظ بالاشياء التراثية واذكر منها /سيف من الفضة /ولحدى الضحية الفاتت
لقيت الطاقية بتاعتو موجودة ،، واذكر انو الطاقية مصنوعة من السعف وملبسة بى حرير ،،او قطيفة ،،على مااعتقد مامتاٌكد بالضبط ،،
واقول ليك حاجة بتصدقنى ،،لحدى الان موجودة ريحة عرقو فى الطاقية
((وممكن تساٌل هيثم الدسوقى من الكلام دة))