إخواني وأخواتي الذين لم أراهم

الحمد والشكر أولا وآخرا لله سبحانه وتعالى
ثم الشكر الجزيل لهذا المنتدى ولإدارته الذي عرفنا بإخوة أعزاء وأخوات فضليات
أصبحت أشعر بأن أعضاء هذا المنتدى هم فعلا جزء من اسرتي
أصبحت أشعر كانني أعرفهم من زمن بعيد اعرفهم من زمن الطفولة يفهموني من نصف كلمة يعيشوا معي مشاعري وأفراحي وأحزاني
أجدهم أول من يفرح لفرحي وأول من يواسيني في حزني
يسألوا عني وعن أحوالي أكتر مما يسألوا إخواني أولاد أبوي وأمي
أجدهم الآن متابعين حضوري للسودان لحظة لحظة ويتكلموا عن الترتيبات بعد حضوري أكتر من أهلي

نعم أهلي وإخواني ما مقصرين ولكن إخواني وأخواتي في المنتدى سؤالهم عني أكتر من سؤال أهلي

بعض إخواني وأخواتي في المنتدى أعرفهم من زمان وقابلتهم كتير كأمثلة فقط زي ود البروي والنفر ومصباح وعبد الغني وسلمان عقيد والحاج شرف الدين وغيرهم كتير

وبعضهم أعرفهم وقابلتهم , بس لي سنين ودنين ما قابلتهم قد يصل أو يزيد عن العشرين سنة زي جنابو سامي وعباس محمد وكمان زيهم كتير من زمن ما قابلتهم

وبعضهم لحدي الآن ما شفته وكان قابلته في الطريق بفوت بي جنبو وما بعرفه مع أنهم أقرب إلى قلبي زي اشقائي وأكتر زي أخوي ود الطرشان وساري الليل والعمدة أبو مصطفى وعبد الدافع وعادل شرري والباشمهندس ود جيب الله ومنوفلي والكليس وأختنا محاسن وسهام علي محجوب ودكتوره عازه  وغيرهم كتير أتمنى أن ألقاهم في إجازتي هذه وأتعرف عليهم


بالمناسبة في بعض الناس داخلين بأسماء مستعارة يمكن أعرف أسماءهم الحقيقية لو كتبوها فالمعذرة إن قلت ما بعرف الزول

شكرا جزيلا إخواني سامي وود البروي وفعلا مشتاق ألاقي كتير من الناس الذين كنت أتونس معاهم في هذا المنتدى ولم أراهم حتى الآن وبعضهم من زمن زمن كتير ماشفتهم يمكن لو قابلتهم الآن كمان ما بعرفهم
صحيح أن المنتدى أصبح بوتقه جامعة لعدد من الناس الرائعين ولكن عاوزين يكون هذا التعارف حقيقة واقعة وليس فقط على فضاء المنتدى

وزي ما قال ود البروي الناس الرائعين في هذا المنتدى وكل الناس كانوا رائعين أكيد حا ألقاهم أكتر روعة في الحقيقه

تسلموا أيها الرائعون

والله جد مشتاااااااقين لرؤياك يا دكتور نرحب بك ترحيبا يليق بمقامك السامي عند كل أهل المنتدى وان شاااء الله تنعم باجازة سعيدة بين أهلك وعشيرتك

حتما سنقابلك بمشيئة الله
ونتمنى لك سلامة الوصول
ونتمنى لك اجازة ممتعه بين الاهل وكل الاحباب

نتمني من المولي عز وجل وببركه هذا الشهر الكريم ان يديم التواصل والتراحم بين افراد قبيلتنا *ونحمد الله علي هذه الكميه من الاخوه والاخوات اينما حللنا نجد من يرحب بنا ويكن لنا من المحبه محبه الاخ لاخيه *تصلو بالسلامه وتحياتنا موصوله عبركم لحرمكم المصون امونه او الملكه زي مامسميها انت

نتمني ان تأتي الفرصة التي نقابلك فيها وسمعت عنك كثيرا من اخي محمد علي والخال محمود تاج السر البشير وتكلموا عنك كثيرا مماسرنا كثيرا وشوقنا للقياك
نتمني لك العافيه والتوفيق

توصلو بالسلامه دكتور
وتنورو  السودان والدنيا كلها
بس انشاالله ناس الخرطوم يدونا فيكم فرصه
اصلو الزول من يجي  يحوشو  هههه حلوه يحوشو دي
ويسقو جاي ويسوقو جاي
من الباسقات للساحه الخضرا ومن الساحه ( لي كبري الحلفايه)
وتاني مابعرفو لي وين
وفجأن فلان تصحبه السلامه

لم يحالفنا الحظ يادكتور في الاجازه الفاتت نسأل الله ان يوفقك وتصل بالسلامه ونتوفق بمقابلتك واتمناها تكون في القوز

لكم تحياتي أيها الأحباب أنا مشتاق إليكم حتى الثمالة أتمنى ألقاكم جميعا وسأحاول بقدر ما أقدر ألاقي كل الناس
فانتم في قلبي
تسلموا أيها الرائعون

تحياتي لك دكتور حسين النافعابي وانت تتفقد اخوتك اعضاء المنتدي 
وللاسف انا جيت المدينة قبل اربعة شهور وبيت مع ناس اميرة الحومري وزوجها الموقر ودالحوري  ولهم عبرك تحياتي واشواقي 
والله لم اعرف شيئا عنهم خالص بس بعرف الاستاذة اميرة الحومري انها من الكدرو واهلها من شنكوكة ورايتها في حياتي مرة واحدة 
لكن لمن زورتهم وبيت معهم حسيت اني بعرفهم من قبل عشرة سنة حقيقة نعم الاهل ونعم الاخوان  واكرر تحياتي واشواقي لهم .
وكنت اسمع بيك منذو الصغر وكنت امني النفسي ملاقاتك واسلم عليك ونسبة لضيق الوقت لم اتوفق بذلك وبرضو يتكرر الحظ النعس 
لعدم ملاقاتك لانو ناوي عمرة رمضان في اواخرة وانت حاتكون في السودان   نسأل الله ان يوصلك بالسلامة وتقضي اجازة سعيدة وسط الاهل والاحباب  ويجيبك للمملكة سالم غانم باذنة تعالي وكان في العمر باقي بي نتلاقي

الأخ الكريم الدكتور حسين النافعابي وحرمه المصون   السلام عليكم ورحمة الله وبركاته... ورمضان كريم وربنا يعوده علينا وعليكم باليمن والخير والبركات.. وانشاء الله العام القادم انت راجع لمدينة المصطفى صلى الله عليه وسلم تسليماً كثيراً في نفس موقعك ومنزلك ومع أحبابك وطلبتكم بالجامعة.
نتمنى لكم اجازة ورحلة موفقة باذن الله وعوداً حميداً وتعودون بالسلامة انشاء الله .. وكل عام وانتم بخير .. الرجاء افادتنا بمواعيد حضورك للسعودية والسلام.