ما كل البيوت واحد !!!!!

مني أي بنت سترة وبيت
لانو البيت حنان وامان ومودة وريد
ومحال البيت يكون بس طين وزنكي وحيط
ولا ممكن يكون سكر وصلصة وزيت

كلام البيت كلام تاني
كلام أحساس مقدس وشرع رباني
ريد إنسان عزم واختار فتح باب قلبوا لماني
بني العش الصغير لي بيت طمني و اواني
بيوت الدنيا مختلفات وما كل البيوت واحد
في بيت دافئ وبيت بارد وبيت عمران هوا وتحنان
وبيت جامد بيوت مليانة فرحة وحب وخير وأمان
بيوت عدمانة من الود زمن مسكونة بالإحزان
بيوت زاهية وبيوت واهية بيوت تديك سلام وأمان
عشان فيها النفوس صافية فيها التقوى والإيمان

بيوت الدنيا مختلفات
بيوت متروسه مال وأثاث وخالية من الأمل والناس
بيوت لا لمبة لا بتجاز وناسه لطاف حنان ولذاذ
وفي بيت عالي وحوشو كبير وليه قفير وسيدو وزير
وفي بيت من طين وفي راكوبتو فد زير رغم الساكنو
زول مسكين لكن حقاني وعندو ضمير

بيوت الدنيا مختلفات
بيوت البهجة عنوانا وطول اليوم ضحك وهزار
بيوت طوالى حرقانة مولعه زى تقول من نار
بيوت بتراعي حق الجار وفيها من الخيار أخيار
بيوت لا بتعرف الجيران ولا بتسطلع الأخبار
بيوت تمليك بيوت إيجار وما بتلقاها بالهين ولازم تكرم السمسار
و شوف في سكتك كم بيت وفي كل البيوت أسرار
في بيت مسكون وبيت فاضي وبيت جاحد وبيت راضي
وبيت مشكلتو معروفة وصلت محكمة وقاضي عشان عشرة
سنين وسنين هانت وكل واحد بقي في وادي
وفي بيت حدادي مدادي ما فيه غير أثنين وبيت مليان تقول نادي

بيوت الدنيا مختلفات
وبيت سكانو متألفين علي الحلوة وعلي المرة
وبيت سكانو مختلفين ما بتفقوا بالمرة
وبيت ستو مرة ضيفان مرة ستره وما بتستاهل الهجران وما بتستاهل الضرة
وبيت ستو دوام بتباري في النسوان لا بتعرف تكرم ضيف ولا بتعرف تورق الخضرة

بيوت الدنيا مختلفات
في بيت محروم من الأطفال ومن ضحكت عيون حلوين
وفي بيت كل يوم ناسو عند دكتور كبير اتعابو بالملايين
وبيت أطفالو زي عشرين ومحتاجين وحق كراسة ما لاقين بس عايشين علي الله
وما قادرين اسدوا الدين وناس تانين مرتاحين وهم في الدنيا ما شايلين
وياما وياما وياما تلقي بيوت

بيوت الدنيا مختلفات
بيوت صاخبة وبيوت لا ليها حس لا صوت
وكل الناس وكل ناس البيوت بتموت ويبقي البيت شبر واحد
وبكرة تكون بيوتنا قبور لا هم مويه لا هم نور ويبقي منانا في الجنة
وننسا حكاية السترة وحكاية الريد كأننا لحظة ماكنا
ولا فتشنا يوم لبيت حليل البيت وناس البيت
حليل الدنيا وهم الدنيا وحليل الدنيا بالفيها وكل الفيها لا ماليها لا مكفيها