يوميات واحد فاضي

الفكرة عرض وتجسيد حقيقي من غير رتوش
لممارسة الحياة العادية
 لكن دعوني اعرض نموذج سريع ليوم عندي
الغربية كل يوم هنا في الغربة نسخة من الاخر
غالبا مايكون نفس الناس, نفس العمل, نفس الطريق الذي تسلكه
تبدأ الحياة منذ اذان الفجر
بعدها اخذ العيال الي المدرسة
الرجوع الي البيت وانام قليلا حتي الساعة التاسعة
ثم الذهاب الي العمل
قبل الساعة الواحدة في عجل ومباصرة الزحمة الي المدارس
قبل صلاة العصر لازم الغداء حتي نتجهز واخذ الاولاد الي المسجد الي حلقة التحفيظ
الساعة الرابعة نباصر الزحمة حتي نصل الي مكان العمل
الساعة العاشرة استلم لستة الطلبات التي تصلني عبر الشات من ام العيال
والذهاب بها الي السوق  مواد تمونية  ثم اغشي المكتبة بلستة اخري من  طلبات المدرسة
غالبا ما يكون وصول البيت الساعة الحادية عشر هذا اذا سلم الطريق من الزحمة وقلت الطلبات
ثم يبدأ فصل اخر من المسرحية مع عبد الرحمن وزينب
وعبد الرحمن هذا طفل غير عادي
بين العبقرية والجنون ,بين الطبيعي والاطبيعي .بين الدرويش والنصيح 
كل الذي استطيع تشخيصه الان سوف يعيش انسان غير عادي
تمتد مسرحيتهم الي الساعة الواحدة صباحا هذا اذا رافوا لحالي
بعد ها  النوم ليصبح يوم جديد
*هذه المناظر... العرض لاحقا

جهاد يا  عبد الواحد.. تصدق كلنا كدي..
 أنا مرة قلت لى زوجتى بعد الخبرة دي كلها أنا قادر أعيشكم في السودان مهما كان الوضع صعب؟ أيه رايكم نمشى.. كلهم قالوا لالالالالالالا
.......
 عمر أب حنة أخوى زمان  الله يرحمو وهو  بي لوريهو  وأعمالو التجارية. زول صاحب نظرة ، لما قالوا التهجير.. قال لا ما نهاجر.. نقعد نعمر المحلي مع الناس.. لكن كخط دفاع تاني. الناس الميتين ناس الورثة. يعني البقوا ناس آخرة. ناخد ليهم حقهم في المكابراب.. نستفيد منو.. يستفيد صاحب الحوجة العايز يسكن من أهلنا لامن يقضي أمورو..
 وفعلا
 أبوي متوفي
 وعمتى متوفية
 وعمي متوفي
 طلعت ليهم بيوت في المكابراب
 والناس الحيين في المحلي عشان يعمروا المحلي
 أها إجازتي الفاتت لقيت أخواتي قالن البيت والحواشة دي أصلنا ما مستفيدين منها.. واحدي ساكني في حلفا والتانية بعيدة.. أختى..
 وطبعا يعجبوك الجعليين واقعدين في الحواشات والبيوت بيع بالهبل.  عايزين يرجعوا أراضيهم بصورة أو بأخرى ،والمناصير طبعا جايين من البلد شايفين شوية الملايين دي قروش كتيرة بي حسابهم..
 أها قلت لى أخواتي حالف حق ورثة ما أيعوا لى جعليين.. قمت أشتريت حقهن منهن.. وقلت ليهن لى قدام ممكن أعملو خلوة لتحفيظ القرآن.
 أها يوم داك قلت للمدام أنا ما بحب حياة العاصمة.نمشى نرمي لينا مائة نعجة ومائة خروف في المزرعة ونزرع برسيم ونقعد
 بلاش من شلهتة الغربة دي؟
 قالوا لالالالالالا
 الناس يقولوا علينا شنو؟
 نحن نشجع المحلي
نمشى نسكن في التهجير؟
 قلت ليهم أها نمشى وين؟
 قالوا نقعد هنا
 والله نهاجر دولة تاني؟
 قلت ليهم لى متين عاد!

........
 ملحوظة
أنت الكتابات دي بقت مقلوبة كدي مالا.ز الأول في الآخر والآخر في الأول.. والله أنا راي كدي؟ شايفا

هي في الحقيقة عبادة زي ما قلت ليك يا عبد الواحد.. والنبي صلى الله عليه وسلم قال الدين المعاملة) وقال كان الله في عون العبد، ما كان العبد في عون أخيه)
 وقال: ( الخلق عيال الله، أحبهم لله أنفعهم لعياله)
 ويسميها الصالحين ( الجلوة) ويسمونها ( حضرة المعاملة)
 هنالك الخلوة والجلوة
 الخلوة.لحظات الاختلاء بربك وهي ساعات الصلوات
 الجلوة أن تكون في حالة جلوة في معاملة الناس
 وهنالك حضرة السلام  وحضرة الأحرام
 حضرة السلام أن تكون في سلام مع الناس وتبتدي من خروجك من الصلاة في قولة ( السلام عليكم) ودي معناها سلام على كل الخلق  في أني سوف أكف أذاي عنهم.ز وسلام على الملائكة الذين معك من باب أولى
 وحضرة الأحرام تبدأ من تكبيرة الإحرام بقولة الله أكبر في الصلاة.. كأن المسلم في حالة دورة دائرية
 حضرة إحرام مع ربه . تنتهى بحضرة سلام مع الخلق ومن باب أولى أسرته التى بين جنبيه..
 وقد قال رسول الله صلى الله عليه وسلم( عجباً للمسلم، أمره كله خير)
 فأنت في كفاحك من أجل أسرتك يعتبر عبادة يا سيدي

الاخ الباشمهندس صديق انت كحامل المسك 
اينما صوبت قلمك حمل فكرة وافكار نيرة 
نعم الحياة جهاد  وقصدنا من عرض هذه النماذج ان نقول للناس 
لا ينصلح حال السودان الا اذا تركت الناس  الونسة اثناء العمل ,,الفطور اثناء العمل ,الزيارات 
اضافة الي ذلك لابد من الاستفادة من الليل غالبية الناس ينتهي شغلها مع مغيب الشمس 
المشكلة في السودان كل يرمي بالائمة علي الاخر والافضل للانسان ان يبدأ بصلاح نفسه بغض النظر عما يفعل الاخرين 
ادي وظيفتك علي اكمل وجه
* القصد الاخر عايز اقول ان الاطفال عندهم طاقة وقوة استيعاب والقدرة علي الحفظ وظفوا زمنهم  في حفظ القران
لو كل ناس حي استعانوا بشيخ المسجد عملوا حلقات بعد صلاة العصر حتي المغرب نتائجها مزهلة ولا تؤثر علي الدراسة 
بل من خلال تجربتي تعمل دافع ونشاط وقدرة علي استيعاب الدروس المدرسيةز

يا راجل قوم الصلاة بعد ده تقام 
 يا الهي المراة والمنبه علي 
ابتدا اليوم ,,بابا قوم خلاص جاهزين ,انزل يا احمد شغل السيارة ,يا محمد جيب شنطتك عشان اشيلها لك 
يا ربي مالها الشنطة مليانة كدة ,طالب في الصف الاول لا ادري لماذا هذه الكمية الهائلة من الكتب 
..الشارع الناس كلها سايقة ونعسانة ,,اي خطأ يضيع يومك في انتظار الشرطة او شركة نجم ,شركة نجم هذه شركة تقوم محل الشرطة في حالة الطرفين مؤمنين ..
ومحمد له اسئلة ثابتة يوميا ,السيارة دي سعرها كم ,,السيارة ديك موديل كم ,ولكنه له معرفة محيرة بماركات السيارت 
..المشوار من البيت حتي المدرسة سبعة دقائق اذا صلحت النوايا ولكن الزحمة قد يمتد الي 20دقيقة  ,وانا في عجل حتي لا يفك النعاس مني لارجع اكمل باقي النومة ..
اهل المال والاستثمار يجيدون لعبة الرتوش امام المدرسة اهتمام لو وضع بداخلها لاخرجوا لنا بروفيسرات ,لكني لا اعتقد ذلك 
.يفتح للطالب باب السيارة وينزل له الشنطة ,وتثبت له العربات الاتية حتي يدخل الحوش .. وحين تاتي لاخذه لو ما تاكدوا انت امامهم لن يسمحوا للطالب بالخروج حتي في شمس الحوش ,,,كم تمنيت ان يجد جزء من هذا الاهتمام ابنائي الطلاب في السودان ,,اذا وجدت هذه البيئة النظيفة مع المعلم السوداني الجاد لسبقنا العالم بالف سنة ,,,ولكن هنا مع هذه المظاهر المعلم يفتقد الي الضمير اذا لم تجتهد الام في البيت المحصلة صفر .
..عدت للبيت بنفس الزحمة والنعاس ,,لانام حتي التاسعة صباحا 
لناتي بقصة العمل ,البنغالة والهنود والباكستان ,
نواصل..

الاعزاء..د عبد الواحد
الباشمهندس صديق...
ونستكم حلوه و اصلو متابعين....

رد الله غربتكما سالمين غانمين الي ارض الوطن فالانتماء للوطن لايعادله شئ......

شكرا ام وضاح علي المرور
امين... ربنا يرد غربتنا.... وغربة الوطن

نهديكم احدي روائع محجوب شريف
  

باكر تعرف تقرا وتكتب
وياما ترتب
نحنا بنحلم وكم نتمني
هل تحقق كل ما تحب
تبني حياتا الند بالند
اي مكانة وخانة تسد
هدهدا هدهد كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تفكفك سيبا تلكلك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
افتح بابك آمن تب
زي ما النهر بيلقي مصب
اي حمامة بتلقي الحب
تلقي الورده الندي في الكم
تلقي حداها جناها الام
يرضع صافي حليب الحب
نقدل نحن الجد والعم
تملا عيونا كهارب سد
بابا جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتبي اكتبي الف المد
حمام وسلام وسعادة بجد
اكتبي اكتبي ياء المد
سرير وعصير وعبير ينشم
اكتبي اكتبي واو المد
حقول وعقول تقرا المجهول كتاب الغد
اكتبي علم وسلم
لا حد يئن لا تسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب

انا بحار غريب  والله في اهلي 
وفي بحرا كبير هدار
مللت الغربة يا ناسي
وما قادر اواجه شدة التيار
باقي عمري الشفتو انجم
وشتات عمري يا ايامي اتلم
اشوف زولي واشوف ناسي 
واشوفك انت يا يمة
ومثل الناس يكون لي دار
           فيها صغار
مناي واحلام مع الترتار
عشان خاطرك تخاطرني
بدور ارتاح  انا ملاح
انا ملاح     انا ملاح     
                                                   ,,,,,,,,,,,,,,,,,,,,,,,,,,,اسماعيل حسن

ما شاء الله عليكم وربنا يوفقكم لعرض مثل هذه الأفكار وتمثيل للواقع وقياس لما في السودان ودول المهجر . كنت أتمنى أن أشارككم وأضيف لما كتبتموه وعلقتم عليه ولكن آلام الرجل والظهر تهجم علي كل مرة وربنا يدينا الصحة. لكم الشكر.

دكتور مصباح مرورك يعجبنا 
نتمني ان يمن الله عليك بالصحة والعافية 
نتمني مشاركتك وسوف تكون اضافة حقيقة
ونحن من سردنا لواقع عايزين نوصل مفاهيم معينة اكتسبناها من الغربة 
وهي قيمة الوقت والعمل 
ايضا كيف يؤهل الانسان نفسه ,,لا يوجد تخصص افضل من تخصص 
ولكن يوجد انسان متميز في تخصصه واخر مثل عامة الناس 
اذ لابد للانسان ان يبحث عن شئ يميزه عن الاخرين .والشئ هذا ليس بالضرورة ان يكون كبيرا بل مختلف.

يجونا عايدين يا الله يجونا عايدين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ الغريب مهما طال غيابو مصيرو يرجع لى وطنو وصحابو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تحياتى
ابو مصطفى

عبد الواحد جبريل كتب:الفكرة عرض وتجسيد حقيقي من غير رتوش
لممارسة الحياة العادية
 لكن دعوني اعرض نموذج سريع ليوم عندي
الغربية كل يوم هنا في الغربة نسخة من الاخر
غالبا مايكون نفس الناس, نفس العمل, نفس الطريق الذي تسلكه
تبدأ الحياة منذ اذان الفجر
بعدها اخذ العيال الي المدرسة
الرجوع الي البيت وانام قليلا حتي الساعة التاسعة
ثم الذهاب الي العمل
قبل الساعة الواحدة في عجل ومباصرة الزحمة الي المدارس
قبل صلاة العصر لازم الغداء حتي نتجهز واخذ الاولاد الي المسجد الي حلقة التحفيظ
الساعة الرابعة نباصر الزحمة حتي نصل الي مكان العمل
الساعة العاشرة استلم لستة الطلبات التي تصلني عبر الشات من ام العيال
والذهاب بها الي السوق  مواد تمونية  ثم اغشي المكتبة بلستة اخري من  طلبات المدرسة
غالبا ما يكون وصول البيت الساعة الحادية عشر هذا اذا سلم الطريق من الزحمة وقلت الطلبات
ثم يبدأ فصل اخر من المسرحية مع عبد الرحمن وزينب
وعبد الرحمن هذا طفل غير عادي
بين العبقرية والجنون ,بين الطبيعي والاطبيعي .بين الدرويش والنصيح 
كل الذي استطيع تشخيصه الان سوف يعيش انسان غير عادي
تمتد مسرحيتهم الي الساعة الواحدة صباحا هذا اذا رافوا لحالي
بعد ها  النوم ليصبح يوم جديد
*هذه المناظر... العرض لاحقا

بعد دا كلو ويوميات واحد فاضي الله يكون في عونكم اخوانه المغتربين حقيقه برنامج مذدحم بمشاغل الحياه ربنا يوفقكم اكتر واكتر يارب شكرا دكتور عبدالواحد اسلوب متميز

شكرا الصديق ابو مصطفي علي المرور 
 يجوك عايدين وين بلدك حتلت حتلة اللنشي

دكتورة عازة لك التحية 
شكرا علي المرور 
نحاول نثرثر ورسم الواقع مع الزحمة 
ولكن احيانا تصبح اكبر من المباصرة معها 
المنتدي نجد فيه السلوي والمتنفس  بالشكية