عاوز العمودية رايكم شنو ؟؟؟؟؟؟؟؟؟؟؟؟

من طرف **ابو مصطفى** السبت 16 مارس 2013, 5:51 pm

تذكير بمساهمة فاتح الموضوع :

احبائى الكرام الاخوة والاخوات رواد المنتدى .............
السلام عليكم ورحمة الله ..................
الحقيقة الواضح ماهو فاضح ؟؟؟؟؟؟؟؟؟؟ والصلاة فيها السر والجهر ..................
وعندى موضوع طول معشعش فى راسى .................
اللهو............ اناخو الساترى بالى ؟؟؟؟؟؟ ........... ايوه ايوه ........ اخير تسمعوا منى
مالى الكلام يجيكم من طرف الناس ؟................. ؟...............
موضوع العمودية ؟؟؟ ايوه عاوز ابقى عمدة ............... لكن مانى عارف ابداء من وين وينتهى بى المطاف وين ؟؟؟؟
كدى بسم الله ... داير كل الناس عدو وصليح يورينى ابقى عمدة كيف ؟؟؟؟؟ .............. خلاص انا تعبان كان ما بقيت عمدة
يبقى لى سوف اصاب بى حاجات كبيرة ................
لكن انا عارف فى بعض الجماعة مابرضو ..... وفى بعض الجماعة دايرين ابو مصطفى دا يبقى عمدة ؟؟؟؟؟؟ لكن انا برضو فى عيب كبير .....
بخاف من المسئولية ؟؟؟؟؟ يعنى داير عمودية .......... بس الناس كان فى عقد ......... يقولوا لى تعال ياعمدة فلان داير يعرس ويعقد لى جناه
تشرف يا عمدة ........ واجى احضر المراسيم ويكون عندى جلابية اضانها كبيرى وتوب يجرجر اقل حاجة 20 ضراع من البوبلين اليابانى ؟؟؟؟؟؟
وجزمة جلد نمر كبيرى ؟؟ صوفها اقل حاجة يوزن كيلو ؟؟؟ وعندى ركابة عودها من التك ؟؟؟؟؟؟ او من الابنوس .......... وعندما اجى مافى زول يكون لابس زى ؟ لانه عمدة لازم يكون مميز ؟؟؟؟؟؟؟؟؟ واسمع الناس والخدام فى المناسبة يقولوا صينية دا لى عمدة ؟؟؟؟ .............. بعدين مانى عاوز اى قرش يدخل فى جلابيتى كلو كلو ...........او تكون فى واحدة عاملة شكلة مع راجلها ......... وتجينى تقول لى ياعمدة تعال شوف كلام الراجل دا ............ واجيب المجلس واجى اقعد حليقة ونسمع كلام الطرف الاول والطرف الثانى ................ او تكون فى اطيان عاوزة قسيم برضو اجى اقسمها ......... او تكون فى طالب او طالبة عجز عن دفع الرسوم ويقولوا ليهو جيب ولى امرك ........... ويقوم يقول ليهم نحن عندنا عمدة دا كل شى واى شى ........... ؟؟؟؟
فكل العاوزه من الاخوة رواد المنتدى ................. يصوتوا لى بان اكون عمدة على الهواء وفى البر وفى البحر وهذه حاجة والحاجة الثانية عاوز عدد خمسة رجال وثلاثة نسوان يكونوا لى مجلس العمودية .............. الرجال بى مواصفاات معينة اقل حاجة الواحد يكون سريع النهمة ومطيع لى كلام العمدة ويكون
زول يعتمد عليه ........... ويكون ذو همة ودموا خفيف ويفهمها طايرى ؟؟؟ راجل بليد مع العمدة ماينفع ............. وراجل ياكل كثير برضو مع العمدة ما بنفع .................. اما النسوان .......... الثلاثة المعيار الوحيد لى دخول مجلس العمدة هو ان تكون عندها املاك واطيان وقادرة على راجلها ........ يعنى كان وقفت كده وقذت يديها فى نصها ونهرت ....... الراجل دا جسمو يقوم شوك شوك ...............ويجى جارى فردة لابسة وفردة حفيانه ...........
اسع قلت اشوف ناس منتدى المناصير ديل فى المشروع بتاعى دا واشوف رايهم شنو ؟؟؟؟؟ ........... وما تدخلوا لى عوام الناس فى هذا المشروع عاوز الناس تبعد من الحسادى والمرازيه وتقول رايها فى هذا المشروع الكبير ؟؟؟؟؟؟؟؟؟؟

تحياتى
ابو مصطفى
ولى عودة

من طرف **إبراهيم حجازى** الأحد 14 أبريل 2013, 9:45 pm

دخلت لكى اعبر لكم عن اعجابى لمداخلتكم
والاستمتاع بالحوار والقفشات لتخرجنا من
عك الحياة لواحة ظليلة ووافرة و... دمتم
وألف مبروك يا دكتورة عازة العمودية

من طرف **ابو مصطفى** الإثنين 15 أبريل 2013, 12:44 am

التحية للسادة المرور اول بالتبادى ؟؟؟ لصاحبة العمودية الجديدة دكتورة عزة ؟؟؟؟؟؟
والبحث مطلب اساسى لاختبار قدرتك الاجتماعية والاكاديمة وبالذات القدرة البحثية فى ادارة الازمات وفض النزاعات ؟؟؟؟ ودا كلام واضح ؟؟
والتحية لابراهيم ود محمد ود حجازى ؟؟؟ ود اسد ابو سباع ؟؟؟ والله ابوك رحمه الله
فرق معاى والله فرق كبير ؟؟؟ والماعندو كبير يمشى يشترى كبير ؟؟؟؟
والتحية للكان فى الرجال حبوب
يا حليلو الكان فى الرجال حبوب .... ركبو فوق جريدة شوكها ماشى جنوب ؟؟
الريس خالد عابدين ؟؟؟ سلام مطبوق ؟؟؟
وحقيقة العمدة مشغول والحياة بقت غالية جدا جدا جدا ؟؟ دى الوقت ياريس صفر معاك الواحد ؟؟ اردب الفيتريت وارد القضارف بقى بى الشى الفلانى ؟؟؟؟؟
زيت السمسم وارد حمرة الوز بقى بى الشى الفلانى .... اردب البلح مشرق المناصير معدوم ؟؟؟ عجوة رباطاب كاربين السعر بركاوى شايقية سعر غالى ؟؟
هو شنو الماهو غالى ؟؟ عندها جرد العمدة كل الممتلكات ووجد حوالى اربعة وعشرين كيلة فيتريت مصروف يومى غداء وعشاء بس فطور دامو للحيران والخلاوى وفول خالى زيت عليهو حبة ملح ؟؟؟ وبرضو قطع ؟؟
وحاول العمدة ان يندثر فى جلباب تاجر عملة ؟؟؟؟ وقطع تذكرته وسلم البت عازة
كل العمودية بما تحوى وفك البيرق ؟؟؟ واذا حصل استقرار فى السودان ورجعت الحياة الى ايام زمان وبقت الكيلة بى ريال سوف يعود العمدة ويا دار ما دخلك شر ؟؟؟؟
تحياتى
ابو مصفى
عمدة سابق

من طرف **ابو مصطفى** الإثنين 15 أبريل 2013, 3:10 pm

دكتور........... دكتورة ........... دكتورة
نحن الان فى جنيف ..... درجة الحرارة 32 تحت الصفر ..... ؟؟ الناس هنا
واحدين لابسين وواحدين ......... عريانين ..... ؟؟؟ مايهمنا يهمنا كيف نحضر مؤتمر المانحين ونشوف حل لمسالة العجز فى ديوان العمدة لان الميزانية والموازنة معجزة بواقع 135000 يور او مايعادلها حسب سعر الصرف السودانى ؟؟؟
العجز اثر على ميزانية الخلاوى ..............
اثر على ميزانية الضيوف ................
اثر على ميزانية المقاطيع واللافين صينية .............
اثر على ميزانية النسوان المطلقات والعزبات والارامل ............
اثر على ميزانية زريبة العمدة من بقر وحمير وضان ومعوز ..... حيث ضرب المحل هذه السنة الارض .... السبب الاساسى الذى جعل العمدة لافى صينية
ومربط الفلكنة فى كل دولة ومادى قرعتو ...............؟؟؟
المهم فى الموضوع ........... اليوم 15 فى اربعة وهذا اليوم يوم تاريخى
لعمل كرامة العمدة السنوية ... سوا الكرامة يا عزة ......... الكرامة ....
لانى متاكد فى ناس من عمنول مافى واحد لقى ليهو عضم كداهو ..... سوى الكرامة السنوية وبجيك راجع ؟؟

تحياتى
ابو مصطفى

من طرف **علي الحمود** الإثنين 15 أبريل 2013, 8:56 pm

أفّو أفّو!!!!!!!!!!!!!!!!!!
لو تذكر أخى أبو مصطفى فى بدايات هذا البوست قلت ليك حا تدفع التمن غالى..
العمودية ماها لعب!!!!!!!!!!!!!!
الشغله دى صعبه جدا جدا وما أى زول بقدر عليها..
لكن تعشمت فيك خيرا وراعنى هروبك الكبير وأخافنى جدا!!!!!!!!!!!!!!
وكمان تخليها لى أختنا عزه ؟
والله كلام عجيب!!!!!!!!!!!!!
إنت البطيرك شنو؟؟
قايل نفسك على ولا السيسى تمشى تجيب المنح من أوربا؟؟
سوّى ليك شبك كتير وأمشى دماج شيّد ليك ديوان فوق راس الحجر وأبقى عمده هناك..الشغله هناك ساهله نوعا ما..
عمودية الجرافه دى صعبه شديد...وأنت شكلك كده متجرس جرسه شينه..
أنا ما كنت قايلك كدى !!
لم يخب ظنى فيك بعد ولا زلت أؤيّد عموديتك المزعومه..
لك ودى وتقديرى واحترامى..

من طرف **ابو مصطفى** الإثنين 15 أبريل 2013, 10:57 pm

اول حاجة سلام ........ وتانى سلام ....
انت وين ياعلى ..... والله يا على كدى تعال جاى .... انا عندى معاك كلام ...
اسمع ياعلى ... انت ما وقفت معاى .... ووريتنى الصعب شنو .... وانا ركبت راسى وفكيتها فى روحى والجماعة مبروك مبروك ياعمدة وخلاص انا حسيت بى راسى بقى كبير خلاص والخرب الحكاية كلها عبد الغنى ود نصر الدين داك الشغال فى السعودية قام نط رسل الجزمة جلد نمر والجلابية والملفحة يعنى هيكل العمدة ..... وكل الشى البذكروا من كلامك ياعلى ؟؟؟ قلت لى ديوانك فيه كم عنقريب ... وانا قلت ليك فيه 12 عنقريب وثلاثة حبالن مقطعات من الكراب ... وواحد جقدو مكسور اتكسر يوم سماية فرحين بت على جارتنا هنا فى الجرافة
يا على ..... الحكاية صعبة واصعب حاجة مواجهة المشاكل حقة الناس ؟؟ وحلحلت المشاكل ؟؟؟ وطبعا ياعلى العمدة راجل طيب وعلى نياتو ؟؟؟ والجماعة هناك الاكل والشاى جارى الحساب فى الدكان وديل داخلين وديل مارقين نامت لقيت نفسى محاصر بالديون وكبيت الزوغة ؟؟؟ لكن اوعدك انا جاى راجع ؟؟؟

تحياتى
ابو مصطفى

هل تعلم أن البرجوب الرجل المشهور المنصورى رجل الأعمال شركاته فى شارع البلديه..
هل تعلم أخى أبو مصطفى أن هذا الرجل يمارس العموديه بكل نكران ذات..
ولك أن تذهب إلى ذلك الشارع وترى أرتال المناصير والرباطاب الذين يتحلقون حول زوبا ست الشاى فى انتظار لحظة من زمنه الغالى وهم يطرحون المشاكل:
شى صهاريج وشى مساجد وشى مدارس وشى عرس بنات وشى ناس عيانه وشلوقه..
تآآمن بالعموديه أخى أبو مصطفى..
أنا غايتو شخصيا أرشح بعدك البرجوب عمدة للمناصير من هول ما شفت..
آخر حاجه وفد الكربكان مشكلتو قيد الحل وحتى الداير موبايل إشتروهو ليهو بأمر السكرتيرة..هكذ هى العموديه أخى أبو مصطفى ولا أنا ما قلت الحق؟؟
كدى سجل زياره عرضا هناك لترى كيف تمارس عمودية المناصير...
لك الود أخى أبو مصطفى..

من طرف **عازه** الجمعة 26 أبريل 2013, 6:49 pm

الاخ ود الحمود العمدة ابو مصطفي برضو زولا ماساهل الا القروش خزلاهو وهسع ليهو سنه غاطس في بلاد العم سام وقال عايز يجيب دولارات كتيره لانو قال لينا المشاكل 90% قروش 10% سوء تفاهم بين الاطراف وماشاءلله عمدانا كلمتو واحده ومواقفو قويه وشجاعه لكن دايره ليها حبة كشكوشات وانت تشوف لما يجيب الدولارات ويجي المشاكل البحلها قدر كيف لكن عاد الريس ماطمني وقالي يمكن في لافي في برندات السوق العربي الخازوق يجيب كشكوشات السودان شنطه ملانه مابتملا زريبة العمده خرفان اصلو خروف واحد مافضل فيها لاكرام الضيوف واجتمع مجلس العمده لعمل معالجه سريعه للوضع الاقتصادي وقرر وضع نغمات خرفان في الزريبه حتي لايتهزه موقف العموديه ولطمأنة الضيوف ونسبه لمسئولية الحبوبه عازه عن التدهور المالي الحاصل قرر ابتعاثها الي الضهب في منطقه غير موجوده علي GPS وفي الختام تمني لها حظا موفقا وذلك بالحصول علي كميه تعيد الي العموديه امجادها

انا ارشحك عشان تكون عمده ومعاك انشاء الله
وانت أصلك عمده تب ما فيك كلام بس يالباش مهندس اديني منصب الجلاد ده انت ما بتقدر ليهو نحنا شباب
الكرباج ألموت اللحمر

من طرف **عازه** السبت 27 أبريل 2013, 3:33 pm

مرحب مرحب محمد الشيخ بروي جانا زولا ماهو ساهل لي منزل العمده وبايع العمده ابو مصطفي تستاهل العمده يجيك بي نفسو ويرحب بيك في دارك ولكن مشغول بجمع الكشكوشات لكن نحن ماعندنا ضيف بي يطلع بلاضبيحه يلا ياجماعه اضبحو واعملو الخروف شيه وماتنسو المراره ظبطوها والشطه والدكوه والليمون كتروها وجيبو مويه من الزير البارد ختوها وبعد تكرموهو اظبطو ليهو راسو بي شاي كارب وانشاءلله دار العمده يعجبو ويبقي لينا ضيف دائم الف شكر ليك محمد الشيخ بروي

من طرف **ابو مصطفى** السبت 27 أبريل 2013, 4:33 pm

السادة المرور سلام ......... وتانى سلام ........ خبر ونجيب نجيد الكلام
ارحب ترحيب حار جدا جدا بالاخ محمد الشيخ ( والغريب فى الامر فى كل مناسبة القى فيها الشيخ بروى والده .. وكمان مسمينى سيد البلد امس فى عرس بت قمر الافندى فى الجرافة والعصر مشينا عرس حسين حسن الفكى برضو لقيتو قاعد )....... الشيخ بروى رجل ماساهل وذلك الشبل من هذا الاسد ؟؟؟
حبابك فى ديوان العمدة وحباب ناس شيرى جميعا ؟؟؟؟

ياعلى ..... الناس عاملة حليقة نمل فى شارع البلدية ... دا شى طبيعى .. حمدانى راسمالى ... دا شى طبيعى ... لكن هل العمودية قروش بس ؟؟
طبعا لا والف لا ؟؟؟
زمان المهدى قال حرسه فى ناس لسع ماجاءوا يا شيخ المهدى ... (ناس امدرمان) قال اليه خليهم ؟؟؟ المابتجيبو الحبة ......... كشكوش يعنى ... بى تجيبو المحبة ؟؟؟؟ وين المحبة ؟؟؟؟ يا على فى الله ساكت ....
ياعزة بجيك راجع ؟؟؟ وعاوزك تراجعى لى ملفات كل العاملين فى ساحة العمدة
واى زول طلعى ليهو جواز الكترونى ؟؟ الا العجائز من سن 80 وماشى على التسعين ديل لع ؟؟؟ لانو احتمال يحجزوهم مننا هنا فى اوربا وتقوم حقوق الانسان تتدخل ؟؟؟

تحياتى
ولى عودة
ابو مصطفى

من طرف **عازه** السبت 27 أبريل 2013, 5:34 pm

هلا هلا العمده ابو مصطفي ظهر وظهرت معاهو الخيرات الحككايه فيها جوازات الكترونيه اظن ميعاد السفر قرب والظاهر لي اوربا وانا بحدثهم كلهم بي نضمك وبقولهم العندو الجواز الاخضر يجددو بالالكتروني والماعندو يطلع جديد وبي نجهز ليهم البصات عشان يجو الخرطوم لكن بالتبادي انا عندي سعال صغيروسرك في بئر انت بعت الارض لي مستثمر ولاشنو والعجائز ذي ناس حبوبه عازه مصيرهم شنو والناس الحاترحله بالطيارت حايمشووووووو وين انا خائفه يبقو فلاشا نسعل الله السلامه يالعمده انا مشيت بعيد يمكن موديهم الحج وجايبون راجعين

من طرف **ابو مصطفى** السبت 27 أبريل 2013, 6:16 pm

اخ ؟؟؟؟؟؟؟؟؟؟؟؟؟ اخ ؟؟؟؟؟؟؟؟؟؟؟ اخ ؟؟؟؟؟؟؟؟؟ قلبك كعب ؟؟؟؟؟؟؟؟؟ قلبك كعب ؟؟؟
لاببيع العمدة ولا بشترى ولاهو سمسار ولا بلعب القمار العمدة زول طار ؟؟؟؟ واحدين عاوز اوديهم الحج وواحدين لقيت ليهم شغل فى اوربا وهو الفضل منو فى السودان ماسافر غير جماعة العمدة ابو مصطفى ؟؟؟الشغل لقيتو
فى الدول الاسكندنافية ؟؟؟ 100 طباخ .. 250 حارس بوابة . 350 كاتب ... 450 معلم لغة عربية لغير الناطقين بها ... 360 شيوخ غفرفى السويد لعمدة بلدية وست سكتر اغنى مقاطعة فى السويد ... وزعيمهم على الحمود
وشى وحاجات تانى بحكيها ليكى لمن اجى راجع ؟؟؟

تحياتى
ولى عودة
ابو مصطفى

من طرف **عازه** السبت 27 أبريل 2013, 6:40 pm

اففففففففففففففو انا عارفه عمدانه راكز جد والشينه مابتجي منو اصلو عزيز وكريم ومابيفرط في شبر من ارضو لكن بس سعلتك ليطمئن قلبي اكتر عليك ياولدي خائفه الخواجات ديل يغشوك لكن اكان جوك دقري عارفاك بي تلجمهم والفكرة جميله ياولدي احسن من تجيب الكشكوشات وينتهو منهم تعلمهم كيف يصطادو الكشكوشات بتوفير وظائف لهم واهلنا ديل ذي ماعارف ان نجح للعسكريه وان فشل للطوريه ماجبت لينا وظائف جناينيه حبوبتك عازه عايزه تعمل شهادة تسنين ومابتعرف شغله غير جناينيه وكمان وظائف شيوخ الغفر والحراس اتوفقت فيهم لكن كان ذدتهم شويه مابطال لانو اهلك ديل ناس حارة وابطال وديمه رافعين راسنا فوق والمعلمين والكتبه ديل شغل افنديه اهلننا ديل ماعندهم غرض فيهم كتير قلل النسبه شويه ومره قالو حصلت مشكله واحد منصوري قاليهم ياجماعه الافنديه والنسوان بي جاااي والرجال يقيفو بالجنبه الثانيه اما الطباخين ذيد العدد شويه لانو حانعمل هدف كبير في اوربا وثقافة القراصه بالبصله لازم تسود في كل العالم في البدايه حايرفضو ويقولو مانكلش خبز نئ ولكن حايتعودوا عليها لما يدمنوها واخيرا لا اعرف كيف اشكر مساعيكم الحثيثه من اجل تغيير ظروف القبيله واسأل الله لكم التوفيق والسداد

من طرف **عازه** الإثنين 29 أبريل 2013, 7:37 pm

اليكم قصيدة محمد سالم حميد الحلم الجميل هديه من عزة الي كل المتداخلين بديوان العمده ابو مصطفي

حلمان والحلم جميل
من بكرة عليك يا ولدي
عبِّيت النيل في فتيل
طنبجت عتامير بلدي
على طول المليون ميل
تمسحت الصحراء الكبرى
أهدتني العرب الخيل
كلهاري وكل صحاري
العالم وقلت يا ليل
نصبح على خير على طير
بيغارد ريحة الشيل
نصبح على بسمة حب
على شوف إنساني و شوق
نسمة حنيّة تهب
من تحت القلب وفوق
بجناح الرحمة تخب
قمرية تسوِّي القوق
يا يوسف فِطن الجب
يا يوسف هلاَّ مروق
قمرية جناح جبريل
شايلاله بشارة خير
للناس الشجر الطير
وين تاني بنرجى الغيم
وننتاوق تالا بروق
إلاَّ اللهم عشان يتبرد
جو محروق
يتحمم قلبِ نخيل
في المطرة كما المعشوق
مع ريح العشق يميل
ما فضّل من عطشان
الطين عدم الله شقوق
بيوضة على روشان
مستنِّي نزول النيل
في الخاطر طفلة تكيل
لي عابرة من القنديل
بترشرش في الحيشان
والشارع كلو سبيل
والخيل الصاهلة صهيل
على ضهرها زي سبلوق
مصبوبة كهارب الليل
بتمشّط وبر النوق
بينقِّط حبلِ غسيل
في الحجر السوَّا عروق
الحلفى الطرفي عديل
التشِّق والمعيوق
القائم والمسيوق
الكلو بيشرب نيل
الأيدي الخدرا تشيل
تكشح في الفأل ماروق
وبيوضة تشد الحيل
مفروضة بيرخي السوق
من عزَّتو يأبى يحوق
ما الطيِّب كلُّو قليل
للدنيا تستِّف شوق
ترحل مواويل
مواويل
يا ولدي الحلم جميل
بس كيف يا بلدي تروق
الحال الزلَّة أصيل
والفأل الطلَّ شروق
الماسك دربو عديل
يا ولاَّ ولا المسيوق
نفس التحت ألمي طويل
شن ضيقك وإنت الفوق
لو ريقك بلَّه النيل
ما تعطش إلاَ الشوق

من طرف **ابو مصطفى** الثلاثاء 30 أبريل 2013, 5:10 pm

كل يوم نكتشف فيك حاجات حلوة بالجد ؟؟؟؟ عجوز انتى العمودية دى الليلى جننتك ؟؟
الحاجات دى من زمان كنت خاتاها وين ؟؟؟ نحن سرحنا ومرحنا داخل هذه المفردات ؟؟؟؟ اس اسسسسسسسسسس اسسسسسسسسسس يا ولد اسكت ؟؟ الولد قال حبوبة جنت وطلقت وبقت تغنى ؟؟؟ وكت قريت ليهو القصيدة ؟؟؟
التحية مجددا لك عازة وانتى تقبضى على جمر القضية وحارسة قصتنا ؟؟؟ وقصة العمودية ؟؟؟ وتعيشى ؟؟ يومين تلاتة واجيك راجع ؟؟
يا امى الله يسلمك
يديك طول العمر فى الدنيا يوم ما يزعلك ؟؟؟؟؟؟؟؟؟ وابعرفوا شنو ؟؟؟ كلام الناس المتثقفين وافنديه ؟؟ باقى العمدة ثقافتو ضحلة شوية ؟؟؟

تحياتى
ولى عودة

من طرف **عازه** الأربعاء 01 مايو 2013, 5:25 pm

حبوبتك مابتخرف ياولدي رغم انها عمرها عمر اوطان قاري وحافظي القران. ومليانه بي حب الرسول وكل انسان. تحاول تبعد الاحزان. لكن مرات تخونه قواها وتسرح في كل زمان ومكان. تبحث عن نسيان. تبحث عن نسيان. تبحث عن نسيان. لك التحيه عمدانا ابو مصطفي

من طرف **ابو مصطفى** الأربعاء 01 مايو 2013, 8:09 pm

الليلة يا الفقراء اجمعين ؟؟؟؟؟؟؟؟؟؟؟؟؟؟ اقروا لى يسن ؟؟؟؟ العمدة فى اوربا ورطان ؟؟؟؟ لقد وعده المانحين واليوم عملوا نايمين ؟؟؟ والعمدة اسع نايم فى الرصيف واخر
فكه دفعها لى بتاع الفندق ؟؟؟
طيب ..... فى الاتصال المجانى فى شارع الله فى سويسرا ؟؟؟؟؟؟؟؟؟؟
الو الو .......... الو ............ الله يلوى اضانكم ؟؟؟؟ الو ؟؟؟
نعم سامعك سامعك اتكلم ؟؟؟
الو ؟؟ الو ... الخليج العربى ؟؟؟ وين البلد دا ؟؟؟
السعودية كلم ؟؟ يا خى لوسمحت عاوزين تلفون ؟؟؟ النفر عثمان ؟؟؟؟
الو .... الو ... قفل الخط ؟؟؟
نحاول مرة اخرى ؟؟؟
الو ؟؟؟ الو ... السعودية ؟؟ ايوه نعم ؟؟ معاى منو ؟؟ معاك مدير مكتب دكتور مصباح ؟؟؟؟ بس خلاص الله يرضى عليك ؟؟؟ عاوزين نقابلو ؟؟؟ منو معاى ؟؟؟
انا بقولى العمدة ابو مصطفى ؟؟؟ عمدة ايه وعاوز ايه ؟؟؟ الراجل مشغول ؟؟؟
معليش ارجع لينا بعد شوية ؟؟؟؟ ياولدى ؟؟ انا بعيد ومقطوع ؟؟ الو الو ؟؟ الو ؟؟؟ قفل الخط الله لا كسبك ؟؟
نحول مرة اخرى ؟؟؟ تن رن تن رن ؟؟
الو ......... الو .... الو ايو كلم ؟؟؟؟ معاى منو ؟؟ انت عاوز منو ؟؟؟
روح روح ياشيخ ؟؟؟ السعودية حفر الباطن ؟؟؟ الله يقد بطنك يا شيخ ؟؟
نحاول نشوف حل لمشكلة العمدة عشان يلقى ليهو تحويلة يجى راجع لى اهلو ؟؟؟
؟؟ الو ؟؟؟ الو ؟؟؟ دبى ؟؟ ايوه نعم ؟؟؟ عاوزين صديق ابو حنة ؟؟؟
دا نائم ؟؟ طيب لمن يصحى قولوا ليهو فى زول عاوزك فى التلفون ؟؟؟ ومازال العمدة ماسك سماعة التلفون ؟؟؟ مى التلفون مجانى ؟؟؟ على الحلف ماسك السماعة مكنكج فيها ؟؟؟ نامت بتاع البلدية جاء كشاهو ؟؟؟ ياناس عوك العمدة راح فى خبر كانا ؟؟؟؟
تحياتى
ولى عودة
ابو مصطفى

من طرف **عازه** الأربعاء 01 مايو 2013, 8:20 pm

[quote="ابو مصطفى"][size=24]الليلة يا الفقراء اجمعين ؟؟؟؟؟؟؟؟؟؟؟؟؟؟ اقروا لى يسن ؟؟؟؟ العمدة فى اوربا ورطان ؟؟؟؟ لقد وعده المانحين واليوم عملوا نايمين ؟؟؟ والعمدة اسع نايم فى الرصيف واخر
فكه دفعها لى بتاع الفندق ؟؟؟
هههههههههههه حبوبتك قالت ليك خيرنا كتير ومدفق ماتبقي طماع الضهب مالي الواطه والسمك مالي البحر تعال راجع ياوليدي ديوان العمده مافاقد قروش لكن فاقد الراي السمح وعديل

من طرف **عازه** الخميس 02 مايو 2013, 1:46 am

شبّعنا الضيوف كرم الغيوم الماطرة
ما فرّ القليب مفزوع ولا من خاطرة
والموت القريب انفسنا ما بتتخاترا
تتوطا اب درق و تدوس اسود ا مخاطرة
*******
ما بنخاف سوى من ربك الديان
وشافعنا احتمل سوط العنج عريان
صوته زئير اسد لا كسرة في لا ليان
ووقت الحارة يقدل في الجمر حفيان
*******
مخير فينا سيد نفسو في اقطاعو
فارس الحوبة طايع امره من اتباعو
لا اتذلل و لا امر البينهر طاعو
فايت الطائي في كرمو وطويّل باعو
*******
ما بخاف الصدام لا يخشى نار في معارك
لو وقف اب درق في دربو ليه ما تارك
تخشاه الاسود تتحاشى ليه مسالك
في عينه الشرر زي الشهاب في الحالك
تعال يا مفتخر نوريك حال جنياتنا
لا ظاهرنا بيخالف كمان نياتنا
بتخاف النسور وصقور هي من فراتنا
ويتمنى المحل زي الخريف جيّاتنا
*******
جبارين كسور الامة اسياد مسعى
وكان لرضيعنا بيعادل فوارس تسعة
ان بلغ الفطام اضرب في مية وتسعة
وان اصبح رجل الاحصاء ما بتسعه
*******
لا بتلاوى لو قاوى الحديد بيسايرو
لو شق الصفوف زي الورق يتطايرو
لا جبخانة تثني عزيمتو ولا زخايرو
لو اشّر تطيعو الدنيا تدو الدايرو

من طرف **ابو مصطفى** الخميس 02 مايو 2013, 8:22 pm

والله ياعازة ؟؟؟؟؟؟؟؟؟؟؟ انتى بى تقولوا فى كلام ختر ؟؟؟؟؟؟؟؟؟؟ كلام ختر مرة واحدة ؟؟ لكن بينى وبين الزمن دا ؟؟؟ ناس زى ديل ماهم فى ؟؟؟؟ اسع الناس اتغيرت وكل شى اتغير ؟؟؟ على الحلف ؟؟؟ تنوم وتقوم فى ديوان الجماعة واحتمال العشاء ما يجيك ؟؟ حليل ناس زمان ؟؟؟؟
لبقة ::::::::::::::::::
واحد رباطابى عامل ليهو خلوة للضيفان ؟؟ وبعدين من عصرا بدرى جاء واحد
شايل مخلاتو فوق ضهرو؟؟ رماها بب ؟؟ وقال السلام عليكم وراح يصلى على طول ؟؟؟ واصلو ماوقف ؟؟؟؟ وجاءت مواعيد العشاء ؟؟ وزولك يصلى .. والدنيا برد اربعانى ؟؟؟؟ وزولك يصلى ؟؟؟؟ بعدين الحاج الكبير رسل الولد الصغير كم مرة ؟؟؟ عشان الزول دا يقيف ويختو العشاء ؟؟؟ وكل مرة يقولوا يا ابوى الزول دا يصلى ؟؟؟؟ يا ابوى الزول دا يصلى ؟؟؟؟ بعدين الرباطابى صاحب الخلوة جاع وزهج ؟؟ قالوا يا ولدى خت لنا عشانا ؟؟ عاد فى زول بى يخلى شغلوا ؟؟؟؟

تحياتى
ابو مصطفى

من طرف **عازه** الخميس 02 مايو 2013, 9:35 pm

واحد رباطابى عامل ليهو خلوة للضيفان ؟؟ وبعدين من عصرا بدرى جاء واحد
شايل مخلاتو فوق ضهرو؟؟ رماها بب ؟؟ وقال السلام عليكم وراح يصلى على طول ؟؟؟ واصلو ماوقف ؟؟؟؟ وجاءت مواعيد العشاء ؟؟ وزولك يصلى .. والدنيا برد اربعانى ؟؟؟؟ وزولك يصلى ؟؟؟؟ بعدين الحاج الكبير رسل الولد الصغير كم مرة ؟؟؟ عشان الزول دا يقيف ويختو العشاء ؟؟؟ وكل مرة يقولوا يا ابوى الزول دا يصلى ؟؟؟؟ يا ابوى الزول دا يصلى ؟؟؟؟ بعدين الرباطابى صاحب الخلوة جاع وزهج ؟؟ قالوا يا ولدى خت لنا عشانا ؟؟ عاد فى زول بى يخلى شغلوا ؟؟؟؟

تحياتى
ابو مصطفى
[/size][/quote]
هههههههههههه ظريفه والله
طبعا الرباطاب عندهم سرعة البديهه مره زوجي جاب لي هديه قلت ليهو جبتها من وين يعني قاصده من ياتو بوتيك قالي من المغلق ههههه في البدايه كنت بستغرب لكن شويه لقيت المسأله حلوه اذا اخطأ الاخرون يجب تنبيههم الي ذلك

من طرف **ابو مصطفى** السبت 04 مايو 2013, 2:51 pm

عزة انتى فيك خصيلى ؟؟؟؟؟؟؟؟؟؟؟؟؟؟؟؟؟ قولى لى عرفت كيف ؟؟؟؟
لانو ماشايف كمية من الحروم كان كبار او صغار اتفاعلن معاك فى فترة غياب العمدة ؟ عن الساحة ؟؟؟ اذن الخصيلى دى غيريها ؟؟؟
ياعزة كن خادم القوم تكن سيدهم ؟؟؟
ياعزة لاتعزلى اهلك زى التمر وكت يختو فى التقاه ؟؟ يمرقوا منوا المسوسى والكرموشة والماكلها الطير ؟؟؟؟ لا لا لا ؟؟؟ انا وصيتك ؟؟؟
تحياتى
ابو مصطفى

من طرف **ابو مصطفى** الإثنين 06 مايو 2013, 6:07 pm

إبراهيم حجازى كتب:دخلت لكى اعبر لكم عن اعجابى لمداخلتكم
والاستمتاع بالحوار والقفشات لتخرجنا من
عك الحياة لواحة ظليلة ووافرة و... دمتم
وألف مبروك يا دكتورة عازة العمودية

انت وين يا ود الاسد ؟؟؟؟

من طرف **نجلاء زمراوي** الإثنين 06 مايو 2013, 8:43 pm

اهل الديوان العامر..سلااااامات
غبنا وجينا...ووجدناكم ماشاء الله وتبارك ...شعر...ونسه...نكات..
الله لا تحرمنا من ديوان العمده.

من طرف **ابو مصطفى** الثلاثاء 07 مايو 2013, 4:42 pm

شكرا بت الشيوخ على المرور ؟؟؟ تسلمى ؟؟ حبابك فى ديوان العمدة ؟؟؟؟
لكن صاحبتك دكتورة عزة دى سوت ليها دريبات ؟؟ مرة سفر ومرة مؤتمرات ؟؟؟ غتست ؟؟؟ وفكت حكاية العمودية دى ؟؟؟ دحين اديها النصيحى ؟؟؟؟ يا نجلاء ؟؟
قولى ليها امسكى قوى ؟؟؟ اصلوا نحن عندنا مشكلة ؟؟ فى الجندر ؟؟ دا راجل ودى مره ؟؟ نامت القيامة تقوم العقدة دى ما تتحل ؟؟؟ دحين كايسن الحلل ؟؟ ولى عودة
تحياتى
عمدة بالمعاش ابو مصطفى

من طرف **عازه** الثلاثاء 07 مايو 2013, 4:53 pm

ههههههههههههه قلت لي عمده بالمعاش وفي عمده بي ينزل معاش ماعندك اي طريقه للزوووووووووووووووغه وكلما تقدم بيك السن يادوب رايك ينضج ويبقي تمام ماشايف حبوبتك عزه كيف لكن مرات تجيب حق الخرف تخرب القدامه والوراها نسعل الله السلامه

من طرف **عازه** الثلاثاء 07 مايو 2013, 5:06 pm

اليوم تم رسميا انتخاب العمده ابو مصطفي للمره الثانيه وتمت اقامة احتفالات التنصيب في اجواء تملاها الفرحه والابتهاج وقد تم تكريم الحبوبه عزة وكل بنات حواء لمجهوداتهم في الفتره الانتقاليه والاشراف علي شفافية الانتخابات والحمدلله قد عاد العمده ابو مصطفي الي ادارة شئون عيال منصور بعد ان قدم كثير من الانجازات الملموسه الي القبيله نسأل الله له التوفيق

من طرف **ابو مصطفى** الجمعة 10 مايو 2013, 5:20 pm

الجماعة ناس الرشيد الافندى وغيرو .......... قالوا العمدة كيسو فاضى يا عزة ؟؟؟ انت رايك شنو فى الكلام ؟ دا ؟؟
عمدة قالوا يمسك الجريدة بالقلبه ؟؟؟(مقلوبه ) وقال متعلم ؟؟؟ ؟؟
عمدة ماعندو اى شهادة ؟؟؟؟ كلوا قالوا الناس الحاسدين ؟؟ انتى رايك شنو ؟؟

تحياتى
ولى عودة

ابو مصطفى كتب:الليلة يا الفقراء اجمعين ؟؟؟؟؟؟؟؟؟؟؟؟؟؟ اقروا لى يسن ؟؟؟؟ العمدة فى اوربا ورطان ؟؟؟؟ لقد وعده المانحين واليوم عملوا نايمين ؟؟؟ والعمدة اسع نايم فى الرصيف واخر
فكه دفعها لى بتاع الفندق ؟؟؟
طيب ..... فى الاتصال المجانى فى شارع الله فى سويسرا ؟؟؟؟؟؟؟؟؟؟
الو الو .......... الو ............ الله يلوى اضانكم ؟؟؟؟ الو ؟؟؟
نعم سامعك سامعك اتكلم ؟؟؟
الو ؟؟ الو ... الخليج العربى ؟؟؟ وين البلد دا ؟؟؟
السعودية كلم ؟؟ يا خى لوسمحت عاوزين تلفون ؟؟؟ النفر عثمان ؟؟؟؟
الو .... الو ... قفل الخط ؟؟؟
نحاول مرة اخرى ؟؟؟
الو ؟؟؟ الو ... السعودية ؟؟ ايوه نعم ؟؟ معاى منو ؟؟ معاك مدير مكتب دكتور مصباح ؟؟؟؟ بس خلاص الله يرضى عليك ؟؟؟ عاوزين نقابلو ؟؟؟ منو معاى ؟؟؟
انا بقولى العمدة ابو مصطفى ؟؟؟ عمدة ايه وعاوز ايه ؟؟؟ الراجل مشغول ؟؟؟
معليش ارجع لينا بعد شوية ؟؟؟؟ ياولدى ؟؟ انا بعيد ومقطوع ؟؟ الو الو ؟؟ الو ؟؟؟ قفل الخط الله لا كسبك ؟؟
نحول مرة اخرى ؟؟؟ تن رن تن رن ؟؟
الو ......... الو .... الو ايو كلم ؟؟؟؟ معاى منو ؟؟ انت عاوز منو ؟؟؟
روح روح ياشيخ ؟؟؟ السعودية حفر الباطن ؟؟؟ الله يقد بطنك يا شيخ ؟؟
نحاول نشوف حل لمشكلة العمدة عشان يلقى ليهو تحويلة يجى راجع لى اهلو ؟؟؟
؟؟ الو ؟؟؟ الو ؟؟؟ دبى ؟؟ ايوه نعم ؟؟؟ عاوزين صديق ابو حنة ؟؟؟
دا نائم ؟؟ طيب لمن يصحى قولوا ليهو فى زول عاوزك فى التلفون ؟؟؟ ومازال العمدة ماسك سماعة التلفون ؟؟؟ مى التلفون مجانى ؟؟؟ على الحلف ماسك السماعة مكنكج فيها ؟؟؟ نامت بتاع البلدية جاء كشاهو ؟؟؟ ياناس عوك العمدة راح فى خبر كانا ؟؟؟؟
تحياتى
ولى عودة
ابو مصطفى

الله يجازيك خير أخي أبو مصطفى كلام جميل وروعة في الحديث ربنا يوفقك وأنت تبدع.. والله انقطنا شديد وسامحنا المشغولية كاتلانه. والتحية للمرور الكرام.. واصل ولا تنقطع

من طرف **عازه** السبت 11 مايو 2013, 2:59 am

مشكور الاخ نصر الدين وهلتك علي ديوان العمده بالدنيا قلنا يمكن تهديهوهو لينا شويه من شلهت القروش يحسب ليلو ونهارو بالله ديوان العمده عملو وكالة سفر وسياحه وحوش العمده عملو مخازن والمزيره الكاربه قفله وفتحه دكان ولابس ليهو جلابه فيها جيوب تدخل زول لكن حتي الان هي فارغه كفؤاد ام موسي

من طرف **ابو مصطفى** الأربعاء 22 مايو 2013, 4:08 pm

ياسلام ............... شايف الديوان فيه زول غريب ؟؟؟؟؟؟؟؟؟؟؟؟؟ لابس نضيف ؟
وجسمو نضيف ؟؟؟؟؟؟؟؟؟؟؟؟؟؟ لابس جلابية مكوية سيف ؟؟؟ وتضوى تيترون وارد اليابان يشوفوا حتى العميان ؟؟؟؟
الزول منو ؟؟؟ يا خلائق الله الزول منو ؟؟؟؟؟
السلام عليكم ؟؟؟؟؟؟؟؟ عليكم بالسلام ؟؟؟
الزول منو ؟؟؟ هنا دخلت فرحين بت عقيد وسلمت عليهو سلام بالاحضان ؟؟
خلاص خلاص سوف نجد المعلومة من تلقاء الكلام والسلام والمطايبة ؟؟؟؟
حق الله بق الله .. جماعتك رايقين ؟؟؟ والله بسط جد .... بسط جد .. بسط جد
جماعتك فى الغربة كيفنهن ؟؟؟ والله بسط جد ؟؟ وعلى اليمين ؟؟ الراجل دا واقف عود سلك دقرى وعينو ما بترمش ؟؟؟؟ وعمتو محمود قيل ؟؟ عمة ستة متر وبرضو وارد اليابان وفى ضنبها كنتل من الحرير الناعم مطرز ؟؟؟ وجزمتو ؟؟؟ من شدة ماها نضيفى وتلمع ؟؟ تشوف نفسك فيها ؟؟ نان هو شنو حكاية ؟؟؟ وبت عقيد تسوى فى سلامات ؟؟ ازى الحال سلامات ؟؟؟؟ سلامات ؟؟؟ سلامات ؟؟؟
شبكتها طشت وعلقت الذاكرة حقتها وبقت تسوى فى السلامات نامت الفطور قرب ؟؟ ثم رجعت شبكتها وقالت له ولاد نصر الدين كلهم بى خيير ؟؟؟ ونحنا يادوب عرفنا حاجة انو الزول دا منو وين وماشى وين وجاى على وين ؟؟؟
اتفضل فى ديوان العمدة
العمدة بى يجيك حبابك عشرة ؟؟؟؟

تحياتى
ابو مصطفى

من طرف **ابو مصطفى** الخميس 23 مايو 2013, 3:08 pm

عبد الغني نصر الدين كتب:
ابو مصطفى كتب:الليلة يا الفقراء اجمعين ؟؟؟؟؟؟؟؟؟؟؟؟؟؟ اقروا لى يسن ؟؟؟؟ العمدة فى اوربا ورطان ؟؟؟؟ لقد وعده المانحين واليوم عملوا نايمين ؟؟؟ والعمدة اسع نايم فى الرصيف واخر
فكه دفعها لى بتاع الفندق ؟؟؟
طيب ..... فى الاتصال المجانى فى شارع الله فى سويسرا ؟؟؟؟؟؟؟؟؟؟
الو الو .......... الو ............ الله يلوى اضانكم ؟؟؟؟ الو ؟؟؟
نعم سامعك سامعك اتكلم ؟؟؟
الو ؟؟ الو ... الخليج العربى ؟؟؟ وين البلد دا ؟؟؟
السعودية كلم ؟؟ يا خى لوسمحت عاوزين تلفون ؟؟؟ النفر عثمان ؟؟؟؟
الو .... الو ... قفل الخط ؟؟؟
نحاول مرة اخرى ؟؟؟
الو ؟؟؟ الو ... السعودية ؟؟ ايوه نعم ؟؟ معاى منو ؟؟ معاك مدير مكتب دكتور مصباح ؟؟؟؟ بس خلاص الله يرضى عليك ؟؟؟ عاوزين نقابلو ؟؟؟ منو معاى ؟؟؟
انا بقولى العمدة ابو مصطفى ؟؟؟ عمدة ايه وعاوز ايه ؟؟؟ الراجل مشغول ؟؟؟
معليش ارجع لينا بعد شوية ؟؟؟؟ ياولدى ؟؟ انا بعيد ومقطوع ؟؟ الو الو ؟؟ الو ؟؟؟ قفل الخط الله لا كسبك ؟؟
نحول مرة اخرى ؟؟؟ تن رن تن رن ؟؟
الو ......... الو .... الو ايو كلم ؟؟؟؟ معاى منو ؟؟ انت عاوز منو ؟؟؟
روح روح ياشيخ ؟؟؟ السعودية حفر الباطن ؟؟؟ الله يقد بطنك يا شيخ ؟؟
نحاول نشوف حل لمشكلة العمدة عشان يلقى ليهو تحويلة يجى راجع لى اهلو ؟؟؟
؟؟ الو ؟؟؟ الو ؟؟؟ دبى ؟؟ ايوه نعم ؟؟؟ عاوزين صديق ابو حنة ؟؟؟
دا نائم ؟؟ طيب لمن يصحى قولوا ليهو فى زول عاوزك فى التلفون ؟؟؟ ومازال العمدة ماسك سماعة التلفون ؟؟؟ مى التلفون مجانى ؟؟؟ على الحلف ماسك السماعة مكنكج فيها ؟؟؟ نامت بتاع البلدية جاء كشاهو ؟؟؟ ياناس عوك العمدة راح فى خبر كانا ؟؟؟؟
تحياتى
ولى عودة
ابو مصطفى

الله يجازيك خير أخي أبو مصطفى كلام جميل وروعة في الحديث ربنا يوفقك وأنت تبدع.. والله انقطنا شديد وسامحنا المشغولية كاتلانه. والتحية للمرور الكرام.. واصل ولا تنقطع

عبد الغنى انت والله كترت المحلبية ؟؟؟؟؟؟؟؟؟؟؟؟؟؟؟ انت وين يازول انت وين ؟؟ الحكاية شنو ؟؟؟؟ البلد براك خربانى ؟؟؟
تحياتى
ابو مصطفى

من طرف **ابو مصطفى** الأربعاء 29 مايو 2013, 2:45 pm

سلام سلام ................. سلام وكلام ؟؟؟؟؟؟؟؟؟؟؟؟؟؟؟؟؟؟؟؟؟؟؟

من طرف **عازه** الأربعاء 29 مايو 2013, 3:39 pm

سلام العمدة بي حالو في دارو الله يحفظو ويخلي ومن القروش يعطي ومن العربات يحمي وللمناصير يعلي دا شعر حبوبتي لينا قبل مائة سنه الان بهديهو ليك

من طرف **ابو مصطفى** الأربعاء 19 يونيو 2013, 5:59 pm

عازة انت وين ياهندسة ؟؟؟؟؟؟ شفتى العمدة بقى مثقف كيف ؟؟؟ خلى بالك اوربا دى اثرت فيه ؟؟؟؟ وبقى يتكلم كلام كبار كبار ؟؟؟
هو اصلوا قبيل يقراء الجريدة بالمقلوب ؟؟؟؟ و والواو الضكر مافك ؟؟؟؟ لكن يا جبل ماهزاك ريح ؟؟؟
العمدة بقى يتكلم عن النظام الغذائى وتجارة العملة وفروقات سعر الصرف ؟؟؟ والميزانية والموازنة ؟؟ والارباح والخسائر ؟؟؟؟
ونسى عشى حمارو ؟؟؟ المربوط فى الغرب قريب الشهرين ؟؟؟ ونسى عراقى المليان زيت ورجوع ومقدود بى وراء ؟؟؟؟
وبقى يلبس البدل والكرفتات ؟؟؟ الله قادر ؟؟ الله قادر ؟؟؟
والله انا مانى قايل القروش دى بى تغير الزول وتغير الناس كده ؟؟؟ والزول العجوز تخلى سمح ووشيه مطلوق ؟؟؟؟؟
على اليمين امس فى احياء امدرمان شفت لى عجوز جدعت فوق الثمانين ؟؟؟؟ لكن فى عمر الزهور ؟؟؟ ما الفكة فى وشى ساونة وشى مكوة
وشى كريم ؟؟؟ وشى جهاز يربطو فى البطن ؟؟؟
من اجمل النكات عندى جارتى شغالة فى شركة كيونت ( تبيع وتشترى على الانترنت .... وكم مرة مشت القاهرة دبى تركيا ؟؟؟ )
ومرة جاءت تسلم علينا وقامت قالت لى انت عارف يا استاذ انا عندى جهاز بايدكس جهاز بايدكس ؟؟؟ دا يجدد الطاقة ويجعل الخلايا النائمة تصحها ؟؟؟؟ فلو امراتك دى تعبانة بس تربط الجهاز دا فى صفحتها وتتشتغل ؟؟؟ والحقيقة ؟؟؟ دخلنى الشك ؟؟؟
ياربى المره دى داير تغطس حجرها ؟؟ ياربى المرة دى دايره شنو ؟؟؟ خلى بالك ام العيال يا دوب ليلها هود ؟؟؟؟ من انتصار كيونت دى دخلت عليها دابها دايره تغيب قمرها ؟؟؟؟ على العموم احذروا السرطان والعمدة بى يحذركم من هنا ؟؟ واحفظوا قروشكم لليوم الاسود ؟؟؟

تحياتى
ابو مصطفى

من طرف **عازه** الأربعاء 19 يونيو 2013, 6:31 pm

هههههههههههههههه يالعمده الخواجات ديل مايدقسوك ساي احسن ليك ارجع لي عريريقك وطوريتك الطاقه دي نحن عندنا ليها علاج بس شمس الله الحمره والحمدلله يالعمده جرفك سمح بالحيل احسن من اكبر نادي رياضي نجري ورا الغنمايات نكون عملنا رياضه للرجلين نحفر بالطوريه رياضه للظهر واليدين وباقي السموم الفي الجسم الشمس بي تطلعه حبوبتك تنصحك يالعمده ماتنداح مع الخواجات ديل كتير تضرب في الجداد وتنسي الملاح المفروك ياعمدانا الفرك دا بي يزلق اي مرض وفقك الله ياعمدانا وشفت صورك لابس الكرفته الا قلت العمده دا خانق نفسو لي شنو اوعههه يكون زهج مننا وعايز يعمل في نفسو حاجه لاسمح الله تسلم كتير ياعمد والله يحفظك الي ديار منصور ويسدد خطاك

من طرف **ابو مصطفى** الخميس 20 يونيو 2013, 2:15 pm

تحياتى دكتره .......... امس فى مقابر حمد النيل ------------ دفنا عمنا سالم ------------ وقام الشيخ بروى - سلم على سلام حار وقال لى ازيك ياعمدة .......... وكان جنبى محمد بروى .... لوى حنكو وقال بسم الله عمدة شنو ..... ؟؟؟ شفتى ياعزة ؟؟؟
اسع الحكاية دى كيف .. عاد جنس حسادى ؟؟؟ حتى الزول ان بقى داير يحلم الناس تحسدوا فى حلمو ؟؟؟ ياربى تسهل علينا وعلى الناس ؟؟؟

تحياتى
ابو مصطفى
عمدة سابق ؟؟

من طرف **عازه** الخميس 20 يونيو 2013, 3:39 pm

والله يالعمده قصة طويله مع الحسادة لكن انا المره دي بغلطك وبقول ليك ود بروي يكون بس ماعرفك لانك باريت الخواجات بدل وكرفتات ومامعروف يمكن تكون حفظت ليك كلمتين من بلاد سام قعدت تتفنجر بيهم لي ود بروي الزول منصوري حار ومااستحمل

من طرف **عازه** الخميس 20 يونيو 2013, 3:57 pm

ابو مصطفى كتب:عزة انتى فيك خصيلى ؟؟؟؟؟؟؟؟؟؟؟؟؟؟؟؟؟ قولى لى عرفت كيف ؟؟؟؟
لانو ماشايف كمية من الحروم كان كبار او صغار اتفاعلن معاك فى فترة غياب العمدة ؟ عن الساحة ؟؟؟ اذن الخصيلى دى غيريها ؟؟؟
ياعزة كن خادم القوم تكن سيدهم ؟؟؟
ياعزة لاتعزلى اهلك زى التمر وكت يختو فى التقاه ؟؟ يمرقوا منوا المسوسى والكرموشة والماكلها الطير ؟؟؟؟ لا لا لا ؟؟؟ انا وصيتك ؟؟؟
تحياتى
ابو مصطفى
مشكور كتير العمده وكل انسان عندو هفوات حبوبتك زوووووووووووله مخرفه والنظر ضعيف يمكن اكون هفيت مره اومرتين ولكن اهلي ديل مافيهم كرموش ديل دهب المناصير الاصيل اخلاق وطيبه وزوق وفهم وروعه الكلو سماح ماعارفه اعبر كيف والله ياابو مصطفي انا فرحانه كيف بي اهلي ديل ماتتخيل قدر كيف انا من عرفت ديار منصور كلها خمسه سنه لكن عمري يتحسب منها ولا جايييييييي الفات كلو مامحسوب كلهم اقمار والله عظيم اقمار تضوي وكلهم نجوم في نظري وانت ذادت مكانتك عندي غلت لانك عمده بالجد وتقول النصيحه اعترف باني اخفقت عندما سلمتني العموديه وزوووووول هبب لي مافي وهذا اجماع من الكل بان العموديه لايستحقها غير ابو مصطفي وانا فرحانه بي رايهم لانو صاح ميه الميه تسلم كتير ياعمده والله يوفقك مسؤلياتك كتيره وانت مباري الدولار والريال الله يكون في عونك هههههههههه

من طرف **ابو مصطفى** الخميس 20 يونيو 2013, 5:57 pm

عزة قولى بسم الله ؟؟ انتى مالك بقيتى تنكتى فى الكلام القديم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
خلى بالك احتمال تكون فى ثورة من الداخل ؟؟؟؟؟؟؟؟؟؟ اخ يا عمدة ؟؟؟ حكايتك ؟؟؟ بقت جايطة ؟؟؟ عمودية وطارت ؟؟؟
ياعزة ماتبقى مغرورة ؟؟؟ اوع يكون اصابك غرور السلطة ؟؟؟ على الرغم من سلطة العمودية محدودة ؟؟؟ ياعزة فى ملفات سرية عندى ؟؟؟
لسع انتى ما اطلعت عليها ملفات مشفرة ؟؟؟؟ شفرتها عندى انا وكينز فى اليابان ؟؟؟ ماتحاولى تلملمى حرومك ديل وتحاولى تعملى انقلاب ؟؟؟
انا بحذرك ؟؟
والله يا جماعة انا خايف ؟؟؟ عمدة خايف ؟؟؟؟ من انقلاب عزة على كل شى واستلام كل شى من مال وادارة وناس ؟؟؟؟ وبلد بى حالها ؟؟؟؟
والله ياعمدة انت لازم تسافر وتغادر الان قبل بكرة ؟؟؟ قبل اعلان نباء الانقلاب فى الاذاعة ؟؟؟؟ طيب طيب انوم واشوف بكرة الخبر شنو ؟؟؟
تحياتى
ابو مصطفى

من طرف **عازه** الخميس 20 يونيو 2013, 6:17 pm

ههههههههههه اطمن ياعمدانا ارمي قدام ورا مؤمن وكان قلت كلمة خائف دي مره ثانيه ياها العموديه طارت منك نحن ناس قلبنا حجر ذي حجارة بلدنا مابنخاف ولا عندنا تره لا ورا
وكدي فكه لينا شفرة الملفات السريه وشفرتك في بير والعجب لو فيها حبة دولارات وضحاكات حايكونو بامان حتي من العمده ذاتو حبوبتك تقوم تسافر لي دول بره نمسح الشلوخ باليزر رغم اني يحبهم شديد ومابتخيل وشئ من غيرهم ولا اقول ليك حاجه انا الشلوخ دي مابقدر اتنازل منها انت عارف ليه لانها اصالة ومرتاحه زمني دا كلو ياوليدي مابشيل لي جنسيه واحمدالله يوم واحد ماشكو في سودانيتي لانها مسجله في وشي اصالتي وعزة بلدي لذلك موضوع بره دا خليناهو بس انت اسرع ولعلنا النور عشان لما يجينا ضيف يانعطيهو عصير يانولع ليهو النور

من طرف **ابو مصطفى** الجمعة 21 يونيو 2013, 3:19 pm

اجمع واطرح تانى ؟؟؟؟؟؟؟؟؟؟؟؟؟؟؟ واجى راجع ؟؟؟؟؟؟؟؟؟؟؟؟

من طرف **عازه** الأحد 23 يونيو 2013, 3:57 pm

جن اليجننك يالعمد من الله خلقك شفت ليك عمده بي يحسب يجمع ويطرح العمده يقول افووووووووووو اضبحو ولا تحسيو وزعو القروش وماتحسبو وانت تجمع وتطرح اكان شربتنا كباية شاي تخصمه من الايراد ياولدي دي عموديه ولا دكان هههههههههه

من طرف **ابو مصطفى** الأحد 23 يونيو 2013, 5:00 pm

عزة ؟؟؟ انت ساريه ليكى فى ليلا بلا قمرة ؟؟؟ يابتى ؟؟ القرش الابيض لليوم الاسود ؟؟؟
نحن لابد من نجمع ونطرح ؟؟ الحياة طلعت الجبل ؟؟؟ والناس بقت تهاجر فوق القروش هجرة سنين ؟؟؟؟
الكسرى بقت صعبة ؟؟؟؟ اول زمان اكل العيش بقى ساهل ؟؟؟؟؟ زمان يابتى ؟؟؟؟
ابنعرف الطاحونة .......... العيش فوق المرحاكه .... اسع بقت الطاحونة داير قروش ؟؟ والملاح بى قروش ؟؟؟؟
انت ياعزة دحين المرحاكة شفتيها ؟؟؟؟ بسم الله البت دى بقت مبدله ونست تراث اجدادها ؟؟؟ عاد وحات النبى كسرة المرحاكة طاعمى وحلوة حلاة النبى ؟؟؟
بعدين ؟؟ البابور دى ذاتها جات علينا موضة جديدة ؟؟ فى عهد ناس ابوحنة دخلوا لينا البابور والجاز والسماد ؟؟ عضم العيش دا فيه مرض ؟؟
وحات النبى قالوا يسوى السرطان ؟؟؟؟ لكن عيشنا البى نعرفوا ويسوقوا تور الساقى ؟؟؟؟ مى موية من البحر وللواطه وقال كدى فقع وشال النوار ؟؟؟؟ وحات النبى تحكى لى حبوبة بت نمر ؟؟؟ نحن مرة على ثلاثة يوم عشانا وغدانا بليلى لوبيا عفن ؟؟؟؟ قسم بالله لوبى عفن ؟؟؟؟ على اليمين ياعزة الحياة طلعت الجبل والناس جارى فوقها ؟؟؟
وعاد الله يهون ؟؟؟ جات الموضة والعولمة ؟؟؟؟ اسع انا جيت من اوربا امبارح ؟؟؟؟ بنات الفريق كلهن لبسن المزركش والمجبص والمحزق وواحد خريزات خريزات وحزيزات حزيزات وقالن ماشين نسلم على عولمة ؟؟؟ بعدين الحريم قالن لهن يابنوت انتن عولمة دى شنى الجبتنها فى العمدة ؟؟ البنات قالن عمدة بقى عولمة شايل تلفون جلكسى ؟؟؟ عمدة بقى عولمة ؟؟
تحياتى
ولى عودة

من طرف **عازه** الأحد 23 يونيو 2013, 5:49 pm

ياهو دا الكلام الصاح يالعمده العولمه دي الضيعت الجنيه السوداني شفت زمن المحراكه جنيهنا بي كم والان جنيهنا هبط بالربشوت اي ناس ابو حنه ديل جابو لينا البابور والبابور مستورد والمستورد ندفعو بالدولار والدولار حق الخواجه نحن ندعم في الخواجات بترفعنا عن صناعة ومنتجات بلدنا ولهثنا الدائم خلف المستورد عزه رقاده في العنقريب والبرش ودقيقه بالمرحاكه وثوبه من الدمور ونعلينها شقيانه الحمدلله موفره قروشي انت بس خليك ياعمده مع العولمه العولمه دي قرش لا لليوم الاسود ولا الابيض مابتخلي واسكت ساي لا تقول لينا العيشه طلعت الجبل ولا نزلت البحر ههههههههههه

من طرف **ابو مصطفى** الأحد 23 يونيو 2013, 6:37 pm

عولمة والله يادكتورة عزة انت زاتك قاعدى تحبى العولمة ؟؟؟ ياخى انتى تشبهى العولمة ؟؟؟ يكفينا شر العولمة ؟؟؟؟
ههههههههههههههههههههههههههههههه ؟؟؟ انت ياعزة ؟؟؟؟ نسوان المغتربين ؟؟؟ كلهن يحبن العولمة ؟؟؟؟ حتى رجالن يحبو العولمة ؟؟؟
يوم داك الغريب دا امس ؟؟ اى والله قاعدين نشرب فى شاى المغرب فوق كبرى الحلفاية فوق البحر .. وزى عاوزين نعمل اجندة كدى وبرتكولات كدى بتاعة ناس كبار كدى ووناقش حكاية اللقاء الاسرى وناخذ ومرة ندى ؟؟ جانا واحد يقولوا ليهو محمد ودبروى ؟؟؟ عاد ياعزة اقولك شنو ؟؟ وحات الله لابس جلابية اسمها كمبيوتر قالوا مترها بى 150 جنيه سودانى ومايعادل 75 ريال سعودى حسب كلام ناس ودعقيد وعامل عمة قالوا اسمها
سوقنى معاك يا حمام ؟؟؟ عمة رصتها اسمها سوقنى معاك ياحمام نظام من وراء فارى كدى ؟؟؟ وبعدين قعدنا وجاء الشاى وانا اصلى ياعزة بقيت اعاين للزول الحضرة داء ؟؟ نفسوا بارد وريحتو طيبى مى جائى من البلد الطيبى ؟؟ وفجاة كدى التلفون دق ؟؟؟؟ تر تر تر حس النغمة ماها زى نغمت تلفونك ياعزة ؟؟ بسم الله نغمة تلفونك تقطع المعوز من الكر وتطلق الحمير ؟؟؟؟ قالوا دا تلفون اسمو ايفون ؟؟
الا التعامل مع التكتلوجيا صعب .. شغل سحب سحب ومليس مليس ؟؟؟ زى الزول البى يقلب فى الورقة ؟؟؟ الله قادر ؟؟؟
ياعزة لاتجرى وراء العولمة بى تغرقى انا خايف عليكى
تحياتى
ابو مصطفى

من طرف **عازه** الأحد 23 يونيو 2013, 7:02 pm

الواقع ياعمده في المنزل السوداني المستورد 90% اكان ماوصل 100% عند العمده ابومصطفي وحبوبتو مالو لو رجعنا للعنقريب السوداني بدل السراير الماليزيه مالو لو رجعنا الي البرش السوداني المزركش وجميل ونسينا قصة المراتب والملايات الامريكيه لكن ياعمده المرحاكه دي مامعانا معقوله يالعمده انا اطحن دقيق ناس البيت كلهم واعوس ليهم بالحطب بعد داك ياكلو الجردقه حبوبتكم اقرب مستشفي انعاش سكر وملح ماينفعه الا علاج مستورد احسن الطاحونه ولا رايك شنو ياعمدانا اكان قلت مرحاكه مرحاكه لكن فيتريت ماندقق هههههههههه
معقوووووووووووووله يازول ود بروي دا تربالي ساي عريريقي وطاقيه الظاهر انت حلمان شفت ليك زول تاني كدي اسشهد واستغفر وانسي الهلوسه بتاعت العولمه وركز كويس دا ود بروي ولا شبهو

من طرف **ابو مصطفى** الثلاثاء 25 يونيو 2013, 5:07 pm

يا عزة انا خلاص ؟؟؟؟ العمودية تانى مانى زولا ليها ؟؟؟؟؟ سسببت لى الحسادى والمشاكل ؟؟؟؟؟ دحين شدى حيلك ؟؟؟؟
بجيك راجع ؟؟؟؟؟؟ عندى راكوبة خمسة عشر عود ولمينى فى النص عاوز انصبها ؟؟؟؟ وخمسة ازيار كبار عاوز اربطهم ؟؟؟
وبعدين العصر بقدر اكون فضيت شوية ؟؟؟ سوى الغداء يمكن نجى عليكم ؟ الدوكى اوقديها بى بعر الحمير او البقر ؟؟؟؟
خلى الكسرى تبقى طاعمى والملاح كارب لاتسوى الشى الشويى ؟؟ الناس كتار جاين عليكم ؟؟؟؟

تحياتى
ابو مصطفى

من طرف **الرشيد طه** الثلاثاء 25 يونيو 2013, 5:09 pm

ابو مصطفى كتب:
ابو مصفى
عمدة سابق

[/size]

عمدة سابق انت يا اخوي بتين بقيت عمدة لامن تقول سابق ولاحق حاجة عجيبة

من طرف **عباس محمد** الثلاثاء 25 يونيو 2013, 5:51 pm

نحمد الله بان ظهر الرشيد

ومبرووك يا ابو مصطفى

بالعمودية السابقة واللاحقة اللى بيشردوا منها الناس

من طرف **ابو مصطفى** الثلاثاء 25 يونيو 2013, 6:08 pm

على اليمين ياعباس ؟؟؟؟؟؟؟؟؟؟ فى ناس واحدين ضارباهم جنس حسادى ؟؟؟؟ اول شى انا قايل قبيل وقت البحر جانا وكنس البلد من حدها لى حدها ؟؟؟؟؟ قلت خلاص الحسادى حقة المناصير غرقت فى الخزان ؟؟؟ لكن خلى بالك الناس من الكاب وانت ماشى لافوق الحسادى حفتهم لسع قاعدة ؟؟؟؟ اسع عليك الله ود اللفندى دا ؟؟ شايلها معاى تقيلى خلاص ؟؟؟؟ اى والله شايلها معاى تقيلى ؟؟؟؟ التقول انا اكلت مرتبو ؟؟؟؟؟
بعدين ود اللفندى دا ماهو من الليلى ؟؟؟؟؟ شايلها مع العمدة تقيلى خلاص ؟؟؟ الولد دا يسوى فى البف ؟؟؟ بف ؟؟؟؟ لكن انا بادبو ؟؟؟
اول حاجة بشكيه على اهلو ؟؟؟ كان قلبو على خلاص كان ما قلبو على برضو ؟؟ لازم يقعد فى مواعينو ؟؟؟؟؟ وبرضو معاهو واحد من ناس الجزائر لكن طيرتو ؟؟؟ طار الطيرة البى عدلها ؟؟؟؟؟ يقولوا ليهو احمد عبد الوهاب ؟؟؟؟؟ لكن ياعباس ؟؟؟؟ حرم ود اللفندى دا صحتو عاجباهو ؟؟؟؟ عصا ما بتجيب منو شى ؟؟؟؟ انا شفتو امس القريبة دى المغرب عند الدكتور حسن عثمان الحسن ؟؟؟؟ عاد دابو جاء من السعودية هو وزوجته بت اسد ابسباع البقولوا ليها انتصار ؟؟؟ كدى اصبر لى شوية خلناالنعدى الملم القدامنا دا بتاع يوم الجمعة وبعد داك اشوف حكاية الزول دا معاى شنو ؟؟؟؟

تحياتى
ابو مصطفى