ناس البحر حلوين خلاص

هذه دقة طنبور يتغنى بها شبابنها فى الخلاء وسأحكى أين سمعتها .مشينا عرس ود محمد ود عوض الكريم ود ملغوم فى ودى أم عون وكنا مجموعة مخلوطة عرب بحر وعرب خلاء أنا وأحمد ود محمد ودنعوم اعتبرونا من عرب البحر وكان معنا عمر ود عبدالله ود صديق وأخوه محمد ومنصور ود محمد ود صديق وأخوه حامد وهو موضوع هذه الرحلة وكان قائدنا أحمد ود عبدابى وهو كبيرنا , وصلنا مكان العرس عصيرا بدرى , اترصوا الناس فى استقبالنا وضربت الدلوكة وكربتت الجمال وصاح صوت فنان قالوا جابه بلة ود محمد ود نعوم من نورى أنا ماسمعت غير الصيد النزل واااااااااا نارى الليل وما شفت غير كل الجماعة الجيت معاهم جوة الدارة راكزين للصوط بقيادة أحمد ود عبدابى الا أنا وحامد ود محمد ود صديق برة الدارة ,فحامد قال لى شفت كل الناس ديل بعد ما تبدأ الحفلة سيرقصوا ويبتهجوا بهذا الجهاز فأنا نظرت للجهاز فوجدته رادى قديم مهلهل ولكن ثابت كثبوت سن حامد الوحيد فى فكه الأعلى ومن هنا ممكن أن يعرف ود عبدالله الحنونى صديق من هو حامد ود محمد ود صديق وممكن أن يعرف من خلال الشبه فى صورتى من هو ود حاج وأنا وأنتم منتظرين قصة ناس البحر حلوين خلاص من رادى حامد ولكن فى الحلقة القادمة .

ود حاج سلام ود عابدابى ده اللينا المن العابداب اللاتى العقبة

العابداب ديل نعرفن بلحيل..
(ود عبدابى) المرحوم رحمة الله عليه وأسكنه فسيح الجنات..
كان راجل ضكر..
حفر العديد من الآبار فى جزيرة شررى..
أقام بها ردحا من الزمن.حتى رحمه الله ساق الشمار والفول..
معظم قعادو كان مع حدورى..
زول مشهور بالفراسه وطولت البال..
مات فى حادث البئر الشهير فى قرية (صلحه)بجزيرة شررى..
صلحه يسكنها آل نصر الدين منهم الزعيم (عبد الغنى نصر الدين)العضو الفاعل والفاهم فى هذا المنتدى..
إستشهد فى هذه البئر مع(ود عابدابى محمد)صاحب البئر المرحوم حمزة سليمان نصر الدين وابن أخيه عبد الله محمد سليمان..كانت حادثه مفجعه هزت شررى بأكملها والمناطق المجاورة..لهم الرحمة والمغفرة فى هذا المقام الطيب الذكر..
توجد مقبرة ود عابدابى (بود كوتيه)داخل جزيرة شررى بجوار حمزة سليمان والمكرمين من أموات الجزيرة شررى..
لكل موتانا الرحمه وأن تنزل عليهم جميعا شآبيبها وتعمهم مغفرة الله وعفوه..
لك تحيه خاصة أخى (ود حاج)..

يسلم ود حاج ويسلموا المرور..
انا ما جبت خبرك وعرفتك من أول بوست يا ود حاج.. العصفورة بتاعتي جابت لى كل التفاصيل عنك.. تفاصيل أنت ذاتك ما بتعرفا..
أما ود صديق غايتو شبهتو
وهو من الصداديق ناس عبد الله ود صديق رحمو الله

لك التحية والتقدير.. ود حاج عربي البحر كما يحلو لك. والتحية والتقدير لإبن عمنا علي الحمود.. بالترحم على أخواننا حمزة سليمان نصرالدين ,ابن اخيه عبد الله محمد سليمان نصر الدين وود عبدابي لهم الرحمة والمغفرة ..ربنا يجعل الجنة مثواهم. والله كانت حادثة فعلاً مؤلمة وحزينة ... . وشكرا لك في التفاصيل لرواد المنتدى.. وبالمناسبة كنت عاوز اكتب يوم الأربعاء قبل حديثك ولم أجد الزمن الكافي.. و من حديث ود حاج ذكر الأخ عمر عبد الله ود صديق وأخوانه.. والله انه الرجل الفارس الشجاع الشهم والطيبة والبسمة على شفتيه.. وبالرغم من فرق العمر لكننا نحن زمان كنا في البلد نتذكر ونرى ذلك ورفقاء دربه عمر السلوم ومحمد الأمين على الحسن ومحجوب ود علوي . وكانت مجموعة متجانسة ومحبوبة ولا يخلو مجتمعهم من الطرفة والنكتة والمزح مختلطاً أحياناً بالشعر.. وما عارف تعليق الناس الباقين عنهم شنو؟ وبالرغم أنهم لم تتاح لهم الفرصة في التعليم لكنهم يتمتعون بامكانيات كبيرة في الفهم..والذكاء وغيره.. وهذه طبعاً لما كانت الأيام بخيرها والبلد بخيرها والناس طيبين .. وما يعرفون ويصنفون الناس بين هذا وذاك .. بس بالله عليكم هل حا ترجع لنا هذه الأيام وله لا؟؟؟ ويا حليل ويا حليل أيام زمان. لهم التحايا الطيبة من البعد .

وتقبلوا تحياتي العطرة.