شذرات من شجرة وريفة في تربية الفلذات (منقول)

من الطرايف الواحد ما بينساها.. ونتمنى من الأخوان الكرام والمرور ما يفهمونا خلط.. يعني خلط الجامعة دي موجود في كل جامعات السودان... كانت لنا زميلة في الكلية اسمها ايمان صلاح الدين من (حلب الأبيض) ومرطبة جداً وأهلها مبسوطين خالص في ذلك الزمان وأعتقد بأنها كانت جميلة شديد وبشهادة الجميع وهذا الجمال هو هبة من الله سبحانه وتعالى.. ومسمنها الدهباية.. ويمكن الأخ مصطفى سمع اسمها في الجامعة..وأي طالب بيعرفها وكان هنالك مساعد تدريس في كلية الطب اسمه الجمري من شندي قد تعرف عليها واصبحوا أصدقاء في الكافتريا والحدائق والمكتبة والطلاب كانوا متغاظين من الحكاية دي خالص وخاصة أولاد كلية الإقتصاد.. وفي مساء يوم هبت مطر شديد في مدني... وجاء الطلاب في الصباح للكافتريا للبحث عن الشمارات والأخبار الجديدة على لوحات النشاط .. وفجأة ظهر لهم كاركاتير مرسوم فيه بنت بصورة ايمان صلاح الدين وهي رافعة يديها إلى السماء والمطر صابي ..وتدعو .. يا الجمري تلحقني... وطبعاً هذا الجمري يقول عنه فقير أو شيخ أو فكي.. وبسبب هذا الكاراكاتير حصلت مشكلة اوشكت بأن تترك الطالبة الجامعة. وايام الإختبارات تجي ايمان لأخونا الريح عبد الله لكي يشرح لها .. وهي كل اسبوع تسافر الخرطوم وساكنة في العمارات ولا بتذاكر.. ويوم أثناء الشرح قالت للريح والله يا الريح خطك بقى يشبه خط الدكاترة.. فالريح اغتاظ شديد وقال لها بس الدكاترة ديل مجننك(يعني الخيل تجقلب والشكر لي حماد).

ولك التحية أخي مصطفى والقصص كتيرة في الجامعات والطرائف كثيرة... غايتو نحكي في قصص .. ربنا يسامحنا عليها.

بالمناسبة الأخوان حسن ومحمد علي اولاد عمي ... وأنا ومحمد علي تزوجنا في يوم واحد ونزلنا في فندق القرين فلدج واسامه ابن أخي وحسن متزوج بنت أخي.. ومصعب بشير نحن أخواله وأنا نسيبه (وهو ابن عم البرجوب وأخوانه) اتمنى أن تتعرف عليهم أكثر.

وشكراً كثيراً والسلام عليكم ورحمة الله.

ادامكما الله زخرا ابو مصطفي و الاستاذ عبد الغني وبارك لكما اسمتعنا بالسرد الجميل والذكريات الحلوه
......... ارشح هذا البوست لنيل جائزه احسن بوست لا دخلو كف لا كع الي الان.....

شكراً الأخت نجلاء زمراوي وعوداً حميداً للمنتدى بعد طول غياب وعشان الكف والكع نحنا إقترحنا قفل منتدى قضية المناصير لما فيه ما فيه نسأل الله أن يجعلنا مفاتيح للخير مغاليق للشر

شكراً الأخوان أبو مصطفى وشكراً الزعيم عبد الغني على هذه المجادعات الجميلة

أبو مصطفى سلامات مالك تاني بقيت تلخبط وداير ترمينا مع خالك ملك فقاعه ود البروي وبعدين خالك ده الزول يخاف من غشمو خالك ده الزول إن وقع في خشمو ما بتعب معاه تعب شديد زي تمساح سلامي نايبه يجرح وضنبو لفاح

ولكن أمرنا لله نسوي شنو طالما وكلتني بالموضوع ونستحمل أنا وإنت البي تجينا من خالك , عاد أسمع أولاً خالك ود بروي عنده فرد بنية وشكلوا كدي عاوز يسعاها ما أظن بيعرسلها , غايتو بيني وبينك إن كان إنت وولدك ممكن تطولوا بالكم ممكن يكون العرس بعد عمراً طويل ويكون ود البروي ضرب رأسوا الزهايمر وودر ويكون الساعة ديك ماهو عارفها هي بنتو ولا بنت الجيران الساعة ديك ممكن ولدك مصطفي يعرسها

أنا خايف للزمن داك أنا وإنت وولدك كلنا نكون خرفنا والزهايمر ضرب روسينا

ولكن الحلول ما بتكمل ممكن لو قدمنا له المهر مرتين قدر بقرة بني إسرائيل أظن ساعتها ممكن يفكر

إنت قايل الزهايمر بعيد من خالك هسع لما فيه الخرف , ده عندهم وراثه , خالك مرات يوقف عربيته ونهاية الشغل يقعد يفتش فيها ويشحد في الناس يفتشوها معاه وهي واقفه تحت مكان شغله , خالك مرات يضهب من بيته ومرات يودي بنته المدرسة وينساها ما يرجع يجيبها

شكراً الأستاذة نجلاء زمراوي على ردكم واشادتكم الكريمة .. وشكراً على ذوقكم الراقي.. وترشيحكم بأحسن بوست .. والله رفعتي علينا الروح المعنوية.. وانا كنت خايف واحد يديني سوط عنج...والله بصراحة أنا منذ تأسيس هذا المنتدى لا يمكن أن افوت أي تعليق منكم.. لأنه في تقديري وتقدير غيري لا يشمل أي نوع من الإساءة أو التجريح لأحد وتجده دائماً موزون وعليه طابع الدين والخلق والشيء المهم كمان دعوتكم الكريمة دائماً لأي صاحب بوست بالخير والدعاء الحسن وخاصة للأفراح والأتراح .. ولا يمكن أن تفوت عليكم أي منها ..وهذه اشياء والله يمكن نفقدها كثيراً.

وانا شخصياً نحب نذكر كل هذه المجادعات كما سماها أخونا الدكتور حسين للترفيه.. والونسة العادية ومعظمها حصل بالفعل وكلكم الحمد لله تخرجتوا من الجامعات.. وبالتالي الحديث عنها عادي بالنسبة للجميع. إضافة لذلك الواحد صراحة بتألم شديد جداً لما أخونا الكليس مثلاً يسرد لنا بقصص ومآسي في البلد.. يعني الواحد يقول شنو ؟؟ بالله عليكم الله ليه بس يعني وفي هذا الوقت بالذات والعالم كله يغلي والناس ما لاقينا البيأكلوه. والله للتاريخ اتذكر وأنا مسافر إلى مدنى (انا طالب في الجامعة) نهاية الأسبوع تقريباً عام (1979) وعند مواصلات السوق الشعبي ويقابلني واحد منصوري بعرفه حق المعرفة من سور.. واعطاني 5 جنيهات... تتخيلوا 5 جنيهات. وهي ممكن تصرفك 6 شهور وأنت في نعمة شديدة؟؟ طيب .. الآن مثلاً واحد من الناس المعارضين في البلد القالوا عنهم وعنهم........ ولا قدر الله عنده والدته أو والده مريض أو هو شخصياً ومحتاج لمساعدة كبيرة كيف ناس الخرطوم والمقتدرين مثلاً واللي جماعتهم هاجروا لمناطق التهجير كيف يكون ردهم؟؟ واشياء كثيرة وكثيرة وبالتالي.. نحن نبتعد دائماً في الحديث والتعليق في مثل هذه الأمور بالرغم أن أننا ملمين بالكثير الكثير وحقيقة إننا نخاف بعدين ناس يقوموا يدعو عليك وهذه الدعوة تجيك وتجي لأولادك؟ اللهم احفظنا جميعاًمن كل شر.

الشكر موصول مرة ثانية للأستاذة نجلاء/ الدكتور حسين/ الأستاذ محمد البروي/جوكرنا الأستاذ أبو مصطفى/أخونا النفر/الأستاذ عباس/ الأستاذ ود جيب الله / والباقين لهم التحية وكل من مر نسال لكم دوام الصحة والعافية .. في هذه الإستراحة الوريفة وهذا البوست الرائع جداً.

وبالمناسبة حكاوي وطرايف الجامعة ما انتهت لسع أدوني فرصة نرتاح شوية ونقبل عليها .

انت يا عبد الغنى مصعب ده ابوه زولا معروف فى كريمة لدى كل المناصير فى كريمة يعنى الا تعرفه بالبرجوب وتحياتى وسلامى

شكراً أخي محمد الحسن طيفور للمعلومة .. يعني أبوه بشير سليمان نعمان.. ووالدته بنت نصرالدين بنت عمنا .. وابن عمه اسحاق محمد سليمان.. وما في داعي نذكر البرجوب .. وبعدين خليت كل لب الموضوع والنكات والطرف وغيرها.. بس مسكت في دي وحدها.

لك التحية التقدير والشكر أجزله وللحديث بقية.. عاوزين نصلي العصر

وقف رجل بعربته الفارهة أمام بائع
البطيخ وسأله عن سعر البطيخة فقال عشرين جنيه
فقال الرجل ارفع اتنين وناوله أربعين جنيها دون
أي غلاط. وهنا قال قريبه الذي يركب بجانبه في العربة
ياخي البطيخ دا بي عشرة جنيهات او أقل فقال الرجل "
ايوة عارف لكن عاوز الزول ده يندم طول حياتو ويقول
ياريت لو قلت ليهو البطيخة بي خمسين"..
هسع يا ابو مصطفى يا لخبات
لو قلت ليك بديك البنت
مابتندم طول حياتك وتقول
ياريتني لو قلت ليهو أديني
البنت ومعاهاخمسين مليون؟؟؟
كدي تعال إنت والملك بعد تغيب
وافتحوا موضوعكم ده.
(ياولد دس العكاز ده ورا الباب)
نشرك بها للحوت ... ولا ودالمسخوت

شكرا دكتور حسين على الاستجابة
واعلمك انى قابلت هذا الشيخ الكبير فى الحارة التى اسكن فيها
وبمسجد الحارة الذى انا عضو لجنته اذ انه مع دروس الفقة المتكررة وهو يمر على
مساجد كثيرة بامدرمان ولنا شرف اللقاء به والتعرف عليه وهو قد جاب ديار المناصير فى وقت سابق
ولك التحيات الطيبات ولضيوفك الكرام فى هذا البوست الجميل

أخي أبو مصطفى.. والله ذكرتني .. الإسطونة الت سجلت أيام الخزان وسجلها سرنا الشاعر حبيب بكوري .عليه رحمة الله والمغفرة له. وطبعا بمناسبة سوق النعوفاب أخونا حسن سكينة سجل جزء من الإسطوانة. وأول شخص أرسل له هذا الشريط صاحبي حسن مكة الذي تبرع لجماعة بالكاميرا وأرسل لي سي دي طوالي ووزعته لأكثر من 40 نسخة. المهم حسن سكينة الله يطراه بالخير له مكانة خاصة لناس شرري.. وكان يحب ناس شرري كتير ويحب الكشتينة الحريق وقاموا ناس سور غنوا له في قصيدة طويلة نقتطف منها: حسن في الصفقة تعلام حسن ما بجر الغطى العام حسن ركب الحميرة ام لجام.. وإلى نهاية القصيدة.. دحين سوق النعوفاب شيء جميل .. وحقيقة انا واحد من الناس الواحد أتمنى أن آكل فيه كلة لحم ضاف صافي ما فيه كيماويات.. ولكن هده الدنيا كيف نعمل فيها وطبعاً أخر مرة زرت فيها المناصير عام 1998م وجئت قضيت يوم ونصف في البلدمن كريمة مع قريبنا العمدة/ عباس حوة.

لك مليون تحية أخي أبو مصطفى.... وتحياتي ونواصل .

أخي أبو مصطفى....والله كما هو معروف للجميع فإن حسن سكينة شخص نظيف السرية والقلب.. بس يضحك ... ومن الطرائف زمان عند عرس العمدة أخونا الأستاذ ود بروي كان عرسه حديث المجتمع في شري طبعا ً.. وجاب ود جبارة.. وعندما بدأ ود جبارة الفاصل وضرب الطنبور نط حسن سكينة وبشر وقال له.. عليك الله يا ود جبارة دق لي الطنبور في أضاني دي وقصة مشهورة ومعروف والتحية له لود بروي الذي اكتشف لنا حسن سكينة والتحية للجميع.

نرجع لك أقول لك الشخص الذي أعطاني خمسة جنيهات هو ادريس ود الكادان .. عليه رحمة الله أخته زوجة سليمان بطران والد أحمد وأخوانه وعم خير الله وود الخبير وهم أقرباء .. وكان المرحوم عليه رحمة الله شغال في كردفان ومرطب.. نسأل الله أن تكون في ميزان حسناته.

شكراً المرور الكرام والتحية مرة أخرى لأبو مصطفى .. د. حسين.. ود البروي والجميع..

إن ربنا مد في العمر نواصل انشاء الله.

الاساتذه الاعزاء

استاذ عبد الغني ...

استاذ ابو مصطفي .....

اسمتعنا بالخرمجه وياليت الكل يخرمج مثلكم.... وشاعرنا ود بروي زان خرمجتكما...

جزاك الله الف خير

السلام للرسول سيد الانام (صلي الله عليه وسلم )صاحب البوست

م بروي كتب:يالطيب بنت ليك مافي

انت يا ابو مصطفي الكلام ده وااااضح وخالك ما بقول كلام يقع واطه تقول حكومة ورافع الراية افو ده شاعر القبيلة يا اخوي اخبرلك درب تاني

تخريمة

عند ولد ممتحن السنة دي دعواتكم يا ود بروي له بالنجاح

م بروي كتب:ياسلمان أوعك تحوم بي هنا
حضر عكازك يا أبو مصطفى
أنا غايتو أي بوست بعتبروا حوشي
أجي من برا شايل لي حزمة قش
أرميها في أي حته فاضية
منجلي أغزو في المزيرة
بعد ما أشرب لي نص كوز
والنص التاني أكشحوا فوق الجداد
العنقريب أجرو جر وأخلي دربو قضيب قطر
والشعار(خرمج في كل مكان..وما عليك من سلمان)
ورفديي رفديي قطع ماهيي قطع ماهيي.
حتى الخرمجه ضايقونا فيها ناس نجلاء
احتكار مافي؟؟
لقبه
يالطيب بنت ليك مافي
لكن أبشرك الخرف قرب
وقريبتك قالت بتي ومخيره فيها
وما عندنا أحسن من مصطفى
اسرع خرف خرفك ياراجل.
(دي شريكة حياة واللا شربكة حياه)
ياربي يكون ضربلها تلفون حسين
ده ما برضو بتاع لخبته زيك

شفتو يا جماعة والله خالى محمد ودبروى ما بريح زول واى حاجة لازم يحرك سكونها ؟؟؟ اسع انت بعد رميت قشك فى الحوش وشربت من الزير ؟؟؟
الجداد مالك عليهو ؟؟ نافعنا فى قبيض الحشرات ؟؟؟
وبعدين سلمان انت مالك مانعوا من الحوامة بى هنا ؟؟؟؟ يا ودعقيد ؟؟؟ خلى بالك انت فيك انى ؟؟؟ فيك واو كبير ؟؟ ان بقى شاعر القبيلة منعك من دخول الحيشان ؟؟؟

تحياتى
ولى عودة
ابو مصطفى

مرحب بيك الزعيم أبو مصطفي وألف مليون حبابك وحبابك عشرة تجي تقضى إجازتك معانا وتقضى عمرتك ما بين مكة والمدينة وترقد الونسة

بسم الله الرحمن الرحيم
على قول ابو مصطفى الحكايه دى مالا طلعت الجبل كدى
جينا نشكر صاحب البوست للمعلومات القيمه بس لقينا الجمعه طيبه ما شاء الله
وان شاء الله دوما مجتمعين فى الخير

الأخ أبو مصطفى.. لك التحية والتقدير ومرحب بك .. ومليون مرحباً نتمنى أن توفق في زيارة مدينة الرسول صلى الله عليه وسلم.. وبعدين تقول لشيخنا حسين يا زول انا ماني ماشي أهلي عاوز أقعد معاكم هنا .. وانشاء الله ما في زول بسألك.. لك التوفيق والسداد.

نعم المدير وصل.. والموت الأحمر.

حكاية زعيم دي ذكرتني شيء لازم أذكره . اخونا محمد علي محمد خير من أبناء السادي من أوائل المناصير كان مقيم هنا في الرياض في أواسط السبعينات .. والراجل مشهود له بالكرم الكثير وكان مشرع عديل وخدم الكثير الكثير من أهلنا المناصير وكان منزله دائماً مفتوح للجميع والغداء شيء ثابت يوم الجمعة في منزله من عطبرة وبربر وغيرها. وكان صديق شديد لقريبنا الـ (كله شين) .. وأي منصور يبيعرف كله شين .. كان للأخ محمد علي ضابط كبير في الخارجية وأرسل له فيزا وجاء سائق معه.. ولكنه لم يرتاح معه.. وشايف ان الراتب المخصص له لا يساوي مكانته الإجتماعية في السودان.. . وبعد فترة أقل من سنة جاء إليه وأحضر جواز سفره وفتحه امامه وقال له دق لي تأشيرة خروجي نهائي هنا؟؟ أنا لست بنقالي .. يا أخي راتبك دا ما يكلني فطور وغدا.. فراح الضابط إلى محمد علي وقال له يا أخي انت جبت لي زعيم .. انت ما جبت لي سواق؟؟ وبالفعل ذهب كله شين إلى بلده عزيز مكرم.. وجاء بعذ فترة اشتغل مع محمد عثمان الميرغني في المدينة المنورة,.. وأخيراً ذهب السودان وأشتغل... في الحكومة ...وللحديث يطول ويطول.

تحياتي مرة أخرى للدكتور حسين والمتداخلين.

كلام جميل يا ابو صطفى عساه يصل دكتور حسين

تخريمة
وعسى تصل رسالتنا لدكتور حسين عبر نافذته الراقية
بان يكرر الاتصال بالشيخ الكبير الذى ذكرته له فى هذه النافذة

تقبل المروور

كلام رائع يا أبو مصطفى نرجو أن تعاود وسوف نعاود ونتمنى أن يعاود الزعيم الكبير ود البروي وكمان صاحب الرأي السديد زعيم الرياض الأخ عبد الغني



لكم تحياتي يا رائعين