هل منتدى المناصير ضياع للزمن ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

من طرف **ابو مصطفى** السبت 26 يناير 2013, 3:44 pm

الملاحظ ان ناس كتيرة دخلت وخرجت من هذا المنتدى وفى ناس عاوزة تدخل وما لاقى طريقة ؟؟ وفى ناس قطعة + قيمة وفى ناس بيت وحواشة وفى ناس تعويض كامل و فى ناس يشطب ويجلد و كله حاصل فى هذا المنتدى ؟؟؟؟؟؟؟؟؟؟؟؟
عاوز اجابة واضحة وصريحة من كل السادة القراء والمساهمين ؟؟ حملة الاسهم العادية وحملة الاسهم الممتازة ؟؟؟ وكل اعضاء مجلس الادارة والعاملين عليها و حتى العمال والموظفين فى هذا المنتدى يعطون اجابة صريحة ومنطقية وواقعية حتى اقوم احلل هذه الاجابات وعلى ضوءها اتخذ قرار انا براى لكى استفيد من زمنى والاخرين ؟؟؟ واوعكم من الحسادى ؟؟؟ الحسود لايسود ؟؟؟
اسئلة الستبيان ؟؟؟؟؟:....................

السؤال الأول في اليوم الواحد كم من الزمن يأخذ منك المنتدى
السؤال الثاني كم من المال يكلفك الدخول في اليوم
السؤال الثالث كم مقدار الفائدة التى تجنيها من المنتدى
السؤال الرابع كم مقدار الشخصيات التى تعرفت عليها من المنتدى
السؤال الخامس كم مقدار الرابط الذى يقدمه المنتدى بين أبناء القبيلة
السوال السادس كم مقدار عدم الربط بين أبناء القبيلة
السؤال السابع هل كل ما كتبه الكاتبون في الحفظ والصون
السؤال الثامن هل المنتدى وسيلة اتصال انجح وافعل من الأخريات
السؤال التاسع كم مقدار المال الذي تم جمعه عن طريق المنتدى وانفق فى موضعه
السؤال العاشر كم مقدار الأعضاء المتواجدين بصورة يومية ولمسافة أكثر من عام

سوف اعود واحلل هذه الاسئلة واراء الناس بالارقام وعن طريق كل ما تم تطويره من البرامج الاحصائية حتى استطيع ان اتخذ قرار يعود على الناس بالفائدة
ولى عودة
تحياتى
ابو مصطفى

مجهود مقدر أخي مصطفى.. الله يعينك... بس بغض النظر عن وعن .. انشاء الله أنا سوف أتطوع وأجاوب على أسئلتك بعد يوم يومين انشاء الله

لك تحياتي ود جزيرة أووس.

أبومصطفى سلامات نجيب على الأسئلة والتوفيق من الله

في اليوم الواحد كم من الزمن يأخذ منك المنتدى ؟ ج. نصف ساعة

كم من المال يكلفك الدخول في اليوم ؟ بلاش

كم عدد الشخصيات التى تعرفت عليها من المنتدى 70% من الأعضاء الغير مستعارة

كم مقدار الفائدة التى تجنيها من المنتدى؟ ماعندها عدادي

كم مقدار الرابط الذى يقدمه المنتدى بين أبناء القبيلة؟ رابط ما تفكه حواطة الفقرة البقيمو الدين ناس مصباح وناس يسن وبقية الأسئلة ناخدها ملحق ولك تحياتي

كم مقدار الرابط الذى يقدمه المنتدى بين أبناء القبيلة؟ رابط ما تفكه حواطة الفقرة البقيمو الدين ناس مصباح وناس يسن وبقية الأسئلة ناخدها ملحق ولك تحياتي.
>>>>>>>>>>
.زي ما قال ليك مصباح

ا

من طرف **ابو مصطفى** السبت 26 يناير 2013, 7:01 pm

ياسلام ياسلام ؟؟؟؟ ظهر لى ما كنت اتوقعه ؟؟؟ ظهرت لى تماسيح كبيرة جدا ؟؟؟ عشارية ؟؟؟ تاخذ الزول كج رج ؟؟؟ فى مشرع الحنانيين تمساح اسود وعشارى ؟؟؟؟
وفى مشرع ام لقاديب مابين جزيرة كدر وشرق ام لقاديب تمساح كبير ؟؟؟ وفى جنوب الجزيرة شررى من على ناس ولاد نصر الدين برضو ظهر لى تمساح ؟؟؟ طيب انت يا ابومصطفى ابقى عايم وصلح البديقة كويس ؟؟؟ او اعمل عشرة بديقات حتى تصطاد هذه التماسيح الكبيرة بكل دقة وحرفنة متناهية وتصل الى ما تصبو اليه وبينك وبينهم الايام ؟؟؟
تحياتى لكل السادة المررور ولى عودة

تحياتى
ابو مصطفى

من طرف **م بروي** السبت 26 يناير 2013, 8:31 pm

أرقد يا عيش
_______
عافي منك يا بت رباط
لسه خانقه وماسكي الشُباط
أصلو لو فكيتي فنجاط
كتر الأسئلة فينا عاط
الحديث زي ناس المشاط
كلام مشاتر ومشحون غلات
نضمو ألغاز معنى مطاط
مرة صح ومراتن ظُ

ابو مصطفى يا ظريف

ههههههههههههههههههههههههه
دخل فيها شاعر القبيلي
ههههههههه
أرقد يا عيش
_______
عافي منك يا بت رباط
لسه خانقه وماسكي الشُباط
أصلو لو فكيتي فنجاط
كتر الأسئلة فينا عاط
الحديث زي ناس المشاط
كلام مشاتر ومشحون غلات
نضمو ألغاز معنى مطاط
مرة صح ومراتن ظُ....

اها جاك تمساح من تالا فقاعا
احمر عينو نصاعا
مباريى فريستو بالساعا
وللقرابة اصلو ماراعا
الا تقول سمعا وطاعا

ايوه سمعونا الكلام الكويس. عليكم الله لا تحرقوا اعصابنا بأشياء تحرق الدم .. الآن الحديث أصبح ذات شجون من الزعماء أبو حنة.. محمد البروي.. والشيخ مصباح.

اخي أبو مصطفى.... شكراً كتيراً على الحرفنة بتاعتك ومقدراتك وتشبيهك ودهاك.

الأخ أبومصطفى شبكتك اتملت حوت وحوتا كبار

كم مقدار عدم الربط بين أبناء القبيلة ؟ عدم الربط صفر والربط أصبح واقع معاش وماك شايف الرحلات وحفلات الشاي الحبل متين حبل المناصير القوي. جريدة من تمر كجار وديسه من جزائر الدميري وسعف دومه من دومة الخليفة ودحمتو.ومساره ضقيل.وفتاله عجب سيدو

هل كل ما كتبه الكاتبون في الحفظ والصون؟ الريس خالد ما بقصر وكل مافيه الفائدة مما كتب محفوظ خاصة مايخص التراث وغربال الريس وبقية اعضاء الإدارة زين ناعم.

هل المنتدى وسيلة اتصال انجح وافعل من الأخريات ؟ في رأي المتواضع أحسن وأفضل من غيره إن صدقت النوايا وأخلصنا في العمل.

كم مقدار المال الذي تم جمعه عن طريق المنتدى وانفق فى موضعه ؟ أبعدنا من المال وأنت محاسب من الدرجة الأولى

كم مقدار الأعضاء المتواجدين بصورة يومية ولمسافة أكثر من عام
سؤال يستحق الوقفة عنده وأنا وقفت كما وقف حمار الشيخ في العقبة . لك التحية أبومصطفى

من طرف **م بروي** الأحد 27 يناير 2013, 2:41 pm

سلمان عقيد النعوفابى كتب:اها جاك تمساح من تالا فقاعا
احمر عينو نصاعا
مباريى فريستو بالساعا
وللقرابة اصلو ماراعا
الا تقول سمعا وطاعا

_____________

الطيب ما طلع اشاعه
حمارتو الغبشي قام باعه
ومراكبو الموزون شراعه
وحيضانو سماحة القراعه
مخدره فيها الزراعه
ودكانو المليان بضاعه
كلها اعلن ضياعه
قال أنا صاحب قناعه
ومسوي قناعتو شماعه
البارح شرب البتاعه
يتعتع ماشي كم ساعه
قبل ما يصلوا الجماعه
اتشنقل جوه بلاعه

اخي ابو مصطفي ياخطير
ناس دماج باقي عقلهم كبير
والسبب يشربوا من ثلاثة بحور
بحر ودريه وبحرودعميري
وبحير الحاره المعروف
ابومصطفي من فوق جبل العلقة
جبق جمبلق من الكير
اتيت بالعجب العجيب
اتلخبت الراس والدمغ صار يدور
الله يعينا في الجواب المدروس

من طرف **ابو مصطفى** الأحد 27 يناير 2013, 3:22 pm

يا سلام ياسلام والله يا جماعة انا متكيف شديد من كل الجماعة المرور ؟؟؟؟ ويسلم كل المرور الذين حاولوا الاجابة على الاسئلة والذين قراؤا ومروا فوق الاسئلة ؟؟ بدون تعليق وانا لسع فى الانتظار وكل يغنى ويمنى نفسه بليلى وما ادراك ما ليلى العامرية ؟؟
فتاة لا توصف وكل العاشقين فى محاولة للظفر بليلى والله يلم الجماعة فى حبل ليلى ؟؟
ارجع مرة اخرى لى حكاية التماسيح التى ظهرت لى وكلها فيها تماسيح كبيرة ومتمرسة ؟؟؟ لكن مع هذه التماسيح والتى تم القبض عليها فى شبكة ابو مصطفى ؟؟؟ تم القبض على كانكيج كبير ؟؟؟؟ ايوه كانكيج كبير خالص ؟؟ انا قايل عايش فى البحر دا من زمن الانجليز؟؟ انتو عرفتو يا جماعة هذا الكانكيج ؟؟؟ وبالتحديد يسكن هذا الكانكيج فى الجزيرة شيرى وفى كانديقة فقاعة ؟؟؟ ومرات هذا الكانكيج يسافر ويغترب على الجزائر لا تحت ؟؟؟؟ طيب كلام جميل ؟؟؟ كل التماسيح فى هذا البوست بى نستفيد منها لكن الكانكيج دا نعمل بيه شنو ؟؟؟ وكمان اقولكم كانكيج لسانو سليط وطالقوا فوق الناس ويغنى كمان ويشتم ؟؟؟
طيب يا جماعة عشان ما يودر يومنا والمشكلة نمرقوا من الشبكة دى زاتو كيف ؟؟؟ وهذه مشكلة ؟؟؟ قطع الشبكى حقتى مرة واحدة ؟؟؟ ويا جماعة انتو عارفين اخوكم ابو مصطفى راجل طيب ومحب للخير وما عاوز يضيع هذا الكانكيج ؟؟؟قام عرض المشكلة على كل الاهل والبلد من برتى للعال ووصلوا لى عقوبة معينة وبالذات الاهل فى الغراء ام نضارة قالوا نحن بطبعنا وناس الجزيرة منارة النيل لا يعز علينا ان نقتل هذا الكانكيج الكبير وهو شيخ فى بحره وقرروا ناس الجزيرة شيرى وبقية المناصير ان يلغى به فى بحر المالح ؟؟؟ وقد كان والان هو فى بحر المالح بين شواطى السعودية وبورتسودان وحتى الامم المتحدة وريناها مشكلتنا معاه ورفقا بكل الكائنات وحماية الحياة البرية والبحرية وكل المنظمات عارفه الضرر الذى لحق بى ابو مصطفى من هذا الكانكيج الكبير ؟؟؟؟
ارجع الى موضوعى الاساسى وهى العشرة اسئلة المطروحة وهى عاوزة اجابات ومشكور الدكتور مصباح وكل السادة المرور الذين اجابوا او من حاول الاجابة وهى سوف تكون ختام هذا البوست انشاء الله
وارجع مرة اخرى خالى الصدوق زى ناس محمد بروى اه اسف( الكانكيج) لا يعجبو العجب ولا الصيام فى رجب كلامو ماعندو كله كلامو عند بت جبريل ؟؟؟
ولى عودة
وتحيات حارات للخال ودعقيد وكل المرور ولى عودة
ولى عودة
ابو مصطفى

سلام لكل العملاقه وتعظيم سلام لصاحب البيت
المنتدى ابدا ما كان ضياع اخونا ابومصطفى بالعكس حسينا انو نحنا اتلمين فى دارنا بعد ما اشتتنا فى بقاع الارض اتعرفنا على الكبير والصغير اصباحنا نتفقد بعضنا اصبحت بينا علاقات قويه جدا بسبب المنتدى حتى قضيه المناصير كنا نجهل عنها الكثير وبقينا نواكب الحاصل فى البلد ناهيك عن المنتدى الاجتماعى غايتو كمغتربيين ما علينا الا ان نقول جزاك الله الف خير اخونا خالد عابدين وكل المشرفيين
وتقبل مرورى ابو مصطفى

تشكر ابو مصطفي طرح راقي من انسان راقي...بعيدا عن الكع والكف

كدي نذاكر ونجي نجاوب برواقه

بوست جاب بت الحومري تب ما ساهل....

من طرف **ابو مصطفى** الإثنين 28 يناير 2013, 4:48 pm

من هنا وفى هذا الصباح الاغر احى كل السادة المرور من كبيرهم لى صغيرهم
واحى اميرة بت الحومرى ونجلاء زمرواى وكل السادة المرور وفى انتظار الاجابات
حتى نستطيع ان نتخذ القرار وما تفتكروا ان القرار حاجة ساهلة سوف يمر بى مراحل كبيرة وكثيرة واول حاجة اجمع اراء الناس واحول الاراء الى ارقام سواء كانت موجبة اوسالبة ؟؟؟ وبعدها وعن طريق التحليل الاحصائى نشوف الوسط الحسابى كم حتى لا نكون مشاترين زى ما بقول خالى محمد ودبروى ؟؟ بعيدا من الشتارة ؟؟ وحتى الشتارة وهى تعنى التشتت نقوم نجيب ليها الانحراف المعيارى ؟؟؟ وهو عبارة عن مجموع الوسط الحسابى من اوساط اخر لكى نعالج التشتت علميا ؟؟؟؟ وبعد ما جبنا الانحراف المعيارى نقوم نجيب الاجابة المعيارية ؟؟؟ وعندما نخت الاجابة المعيارية نشوف راى اى زول ونقارنوا بى الاجابة المعيارية
ونشوف النسبة كم ؟؟ وهل هى بعيدة او قريبة من الاجابة المعيارية وكل الشى دا عن طريق برامج ماهو كلام لعب عيال ساكت والمهم نحن شغالين وترانا شغالين بس انتو ربنا يديكم العافية جاوبوا لينا العشرة اسئلة الفوق
ولى عودة
تحياتى
ابو مصطفى

من طرف **ابو مصطفى** السبت 02 فبراير 2013, 6:17 pm

يا ناس انتو ويييييييييييييييييييييييييييين ؟؟؟؟

تحياتى
ابو مصطفى

من طرف **tamador alsyed** السبت 02 فبراير 2013, 6:45 pm

من بعد الســـــــــــــــــــــــــــــــــــــلام..
تحيه كبيـــــــــــــــــــره لصاحب البوست وقد اصبت بطرحك هذا الباب...سلام علكم طيبين المرور الكرام ..

نحاول نرد قدر عرفتنا

السؤال الأول في
اليوم الواحد كم من الزمن يأخذ منك المنتدى؟؟ صراحه الدخول ماكل يوم اغلب الايام الجمعه والسبت والزمن حسب الحاله التى يعيشها المنتدى

السؤال الثاني كم من
المال يكلفك الدخول في اليوم ؟؟جنيه فى حالة عدم تفعيل خدمة الشهر وتكلف16جنيه

السؤال الثالث كم
مقدار الفائدة التى تجنيها من المنتدى؟؟بعض الاشياء لايصلح الحصر بها فهى لاتعد ولاتحصى

السؤال الرابع كم
مقدار الشخصيات التى تعرفت عليها من المنتدى؟؟تقريبا 77%

السؤال الخامس كم
مقدار الرابط الذى يقدمه المنتدى بين أبناء القبيلة ؟؟تقريبا 70%

السوال السادس كم
مقدار عدم الربط بين أبناء القبيلة ؟؟40%

السؤال السابع هل كل
ما كتبه الكاتبون في الحفظ والصون ؟؟نؤمن بهذ فمديرنا القوى الامين

السؤال الثامن هل
المنتدى وسيلة اتصال انجح وافعل من الأخريات ؟؟ممكن نقول ناجح اكثر من الاخريات بنسبة 200%

السؤال التاسع كم
مقدار المال الذي تم جمعه عن طريق المنتدى وانفق فى موضعه ؟؟؟عاد دا بسرق اجابته منك اصلا الليله اول يوم اقرا الاشتراك حق الصندوق

السؤال العاشر كم
مقدار الأعضاء المتواجدين بصورة يومية ولمسافة أكثر من عام ؟؟؟ودا برضو نسرق اجابته من الناس المغتربين باقى لى بتابعوا اكتر

ملاحظه( ليتنا نقفعند هذه العباره قليلا ,,الملاحظ ان ناس كتيرة
دخلت وخرجت من هذا المنتدى,,
ونسأل انفسنا عن اجابه لها واسمح لى اخى صاحب البوست ان اضيف السؤال الحادى عشر ..فى رأيك ماهى اقوى اسباب نزوح البعض عن هذا المنتدى؟؟؟؟

تحياتى...

من طرف **ابو مصطفى** السبت 02 فبراير 2013, 7:32 pm

ياسلام يا سلام يا تماضر رفعتى من روحى المعنوية ؟؟؟؟ والف الف شكرى لك ؟؟ والتحية لكل السادة المرور وانا شخصيا عاوز اجوبة مليانة زى حقتك دى ؟؟؟؟ لك شكرى وتقديرى

تحياتى
ابو مصطفى

من طرف **ابو مصطفى** الإثنين 11 فبراير 2013, 6:48 pm

حتى الان بلغ عدد الطلاب الجالسين للامتحان ثمانية طلاب ؟؟ من المجموع الكلى والمقدر لهذه الورقة وهو عدد 75 طالب وطالبة ؟؟؟؟؟
من الاشياء الجميلة والمعتبرة اثنت غرفة الكنترول ولجنة التصحيح على الاداء الممتاز للطالبة تماضر السيد ؟؟؟؟؟ والطالبة نجلاء زمراوى نوعا ما بدرجة مقبول من حيث الاداء ؟؟؟
اما عن اداء الطلاب ومنهم طلاب عائدون من العام السابق ؟؟ وقد سبق ان جلس بعضهم لهذه الورقة اكثر من ثلاثة مرات ؟؟؟؟ ومنهم الطالب محمد بروى ؟؟؟ عائد من مدرسة محمد حسين ومنهم الطالب ؟؟؟ صديق عبد الله على ابوحنة طالب شاطر لكن عائد ايضا لظروف اسرية قاهرة تتمثل فى الفقر اعاذنا الله واياكم من الفقر والحرمان ؟؟ والعدم ولكن تحسن وضعه الان بعد الاغتراب ؟؟؟ ومن الطلاب غير العائدون الطالب النابغة عبد الغنى نصر الدين الذى اشادت باداءه لجنة التصحيح والكنترول ؟؟؟؟ نتمى له حياة عملية وعلمية موفقة ؟؟؟
ايضا من الملاحظات التى وردت والسلوك غير المنضبط وسط الطلاب الجالسين للامتحان الطالب الردى وغير المنضبط ( محمد بروى والذى يلقب بالكانكيج وسط زملائه قد احدث شكلة كبيرة فى صحن فتة امام دكان هارون الفوراووى وابكر العجلاتى ؟؟؟ حيث تدخلت قوات امن المجتمع والشرطة المحلية وقوات الدفاع الجوى والمطافى وحرس الحدود وكل الشرطة بما فيها الاحتياطى المركزى لفض النزاع الذى كان سببا فيه الكانكيج ؟؟؟؟؟
عليه فقد قررت وزارة التربية والتعليم واصدرت القرار التالى ؟؟ واليكم نصه
يتم حرمان الطالب محمد بروى من الجلوس لاى امتجان وعليه يذهب غير اسفين عليه ونتمى له حياة عملية غير الدراسة ؟؟؟ ونرجو من كل الشرطة التعاون معنا فى ضبط سلوك هذا المشاغب ؟؟؟؟؟
سيداتى انساتى ساتى وخلال اربعة وعشرين ساعة سوف تقوم غرفة الكنترول بفرز النتائج واعلان العشرة الاوائل وانشاء الله سوف يتم اعلان ذلك فى الراديو
خليكم معانا على راديو دنيا دبنقة من اذاعة شنقلى طوباية احتمال تلقى عقرباية
وسوف نوافيكم بالمزيد وكونوا معنا ؟؟؟؟

ولى عودة تحياتى
ابو مصطفى

من طرف **ساري الليل** السبت 16 فبراير 2013, 3:15 am

ابو مصطفى كتب:
السؤال الأول في اليوم الواحد كم من الزمن يأخذ منك المنتدى
السؤال الثاني كم من المال يكلفك الدخول في اليوم
السؤال الثالث كم مقدار الفائدة التى تجنيها من المنتدى
السؤال الرابع كم مقدار الشخصيات التى تعرفت عليها من المنتدى
السؤال الخامس كم مقدار الرابط الذى يقدمه المنتدى بين أبناء القبيلة
السوال السادس كم مقدار عدم الربط بين أبناء القبيلة
السؤال السابع هل كل ما كتبه الكاتبون في الحفظ والصون
السؤال الثامن هل المنتدى وسيلة اتصال انجح وافعل من الأخريات
السؤال التاسع كم مقدار المال الذي تم جمعه عن طريق المنتدى وانفق فى موضعه
السؤال العاشر كم مقدار الأعضاء المتواجدين بصورة يومية ولمسافة أكثر من عام

قبل حضوري الي الخرطوم كان ياخذ مني اكثر من اربعه (4)ساعات يوميا
ولكن زحمه العاصمة بدا تقل الساعات الي ان وصلت ثلاثة ساعات في الاسبوع بل اليوم
قبل فتره بنشط خدمه سوداني بتاعة الشهر نت واتصال
واليوم بنشط خدمه اليوم فقط حسب الحوجه
مقدار الفائده كبيره جدا جدا لاتقدر بالكم
ومقدار الشخصيات كثيره ايضا ويحملون كل معاني الروعة والابداع
عدد كبير من الشخصيات الرائعة
ومايعجبني ان معظمهم يدرك ويعي قضية اهلة تماما
ومعظمهم متشبع بحب وطنه الصغير المناصير
معدل الربط هذه مساله احصائيه بحته ولكن اعتقد انه ساهم ومازال يساهم في ربط ابناء القبيله
مايكتب لااعتقد انه في الحفظ والصون
المنتدي اجتماعيا انجع وسيله اتصال حتي الان

من طرف **ابو مصطفى** السبت 16 فبراير 2013, 2:09 pm

ياسلام يا سلام ؟؟ دخل علينا طالب يرجى منه ؟؟؟؟ دخل علينا طالب الامتياز سارى الليل ؟؟ والناس نيام ؟؟؟؟ وكل زول فى هذه البسيطة ينام على شقه الذى يريحه لكن هنا فى هذا المنتدى العامر كتاب لا ينامون امثال سارى الليل ؟؟ كانت اجاباته منطقية وتتسم بالجدية ؟؟؟؟ الطالب سارى الليل لا غبار عليه ؟؟؟ غير انه مرات لديه بعض الغطسات الطويلة ؟؟؟؟
ترجو غرفة الكنترول من الطلاب المزيد من الاجابات الدقيقة والعلمية وهنالك جائزة مالية ضخمة مقدمة من شركة عتيلى لخدمات العروسات والمناسبات
ومقدارها مليون جنيه سودانى وللعلم بان المبلغ طرف ابو مصطفى ؟؟؟ وكل طالب مجتهد سوف يفوز بهذه الجائزة ؟؟ وذلك حسب المعايير الدولية الموضوعة للاجابات والمدة الزمنية لكل سؤال ؟؟؟؟ عليه من يانس فى نفسه الكفاءة فى الاجابة على كامل الورقة الاتصال على ابو مصطفى

وشكرا ,,,,,,,,,و
الادارة

تحياتى
ابو مصطفى

من طرف **عازه** السبت 16 فبراير 2013, 5:11 pm

مشكور كتير ابو مصطفي
1- ساعتات في المتوسط
2-جنيه
3- 75% مما احتاجه من الشبكه العنكبوتيه اجده في المنتدي
4- 70%
5- 50%
6- 50%
7- نعم
8- نعم
9- لا اعرف
10 لا اعرف
مع شكري

من طرف **ابو مصطفى** الأحد 17 فبراير 2013, 4:41 pm

ياسلام يا سلام لغتى هى لغة الارقام وكل شى بالرقم نفهمه ؟؟؟ دخلت علينا طالبة ممتازة بكل المواصفات حيث اجابة اجابات منطقية وعقلانية ؟؟ ويا سبحان الله ؟؟؟
بربكم قارنوا بين اجابات عازة والاجابات الاخرى ؟؟؟؟ كم هى دقيقة الاولى ؟؟؟
الطالبة عازة حتى الان وحسب افادة غرفة الكنترول للتصحيح اجابت بنسبة 80% من حجم الورقة وهذه اشادة كبرى ؟؟؟؟
ارجع مرة اخرى الى موضوع الجائزة المقدمة من شركة عتيلى للخدمات والان تم ايداع المبلغ فى البنك وصدقونى سوف نرسل للفائز مبلغ المليون جنيه حتى لو بقى فى جزر الواق الواق ؟؟؟؟ فقط ارسل لنا فى رسالة خاصة رقم حسابك فى بلدك وعنوان البنك فى بلد ؟؟؟؟؟ انتو تضحكوا مش كده ؟؟؟ معليش قايلين ابو مصطفى بى يلعب لعب والله شنو ؟؟؟؟

تحياتى
ابو مصطفى

من طرف **عازه** الأحد 17 فبراير 2013, 5:37 pm

شكرا ليك يابو مصطفي دي كتيره علي لكن بقي فيها جوائزومليوووووووووون كمان مافي طريقه اشف اجابات السؤالين الاخيرات من اسفل المنتدي واجيك راجعه للتعديل ولا جمعنا الورق خلاص مايرجع ثاني

من طرف **عازه** الأحد 17 فبراير 2013, 5:37 pm

شكرا ليك يابو مصطفي دي كتيره علي لكن بقي فيها جوائزومليوووووووووون كمان مافي طريقه اشف اجابات السؤالين الاخيرات من اسفل المنتدي واجيك راجعه للتعديل ولا جمعنا الورق خلاص مايرجع ثاني هههههههههههههه

من طرف **ابو مصطفى** الأحد 17 فبراير 2013, 5:58 pm

حسب قرار لجنة الامتحان الورقة هى ورقة الكترونية ؟؟؟ وانتى تعلمى تماما ؟؟ ماذا تعنى الورقة الالكترونية ؟؟ وهى قابلة للتعديل والارجاع والاسترجاع ؟؟؟ لذلك قررت لجنة الكنترول ان قرار التصحيح سوف يؤخذ بعد اربعة شهور من بداية نشر الورقة ؟؟؟؟ عليه يمكن ان يعدل الطالب وينقح فى اجابته فى هذه المدة ؟؟؟؟
لكن المعايير الموضوعة للتصحيح هى اصعب من الامتحان نفسه ؟؟؟؟ ببساطة يمكن ترى نفسك فى اجاباتك كلها صحيحة وحسب المعايير الدولية ترى انها كلها ليست مكتملة من حيث الاجابة بنسبة 100% وبالتالى صعب جدا الوصول الى الواحد الصحيح ؟؟؟ اى 100%

تحياتى
ابو مصطفى

من طرف **عازه** الأحد 17 فبراير 2013, 6:12 pm

حبطني يابو مصطفي بمعايير التصحيح دي لكن كدي الجائزه مليون بالقديم ولا بالجديد ؟عشان اجتهد فيها شديد وخصوصا نحن من الواق واق ذاتو

من طرف **ابو مصطفى** الأحد 17 فبراير 2013, 6:37 pm

مافى مشكلة ولا تحبطى ؟؟؟ فممكن اشرح ليك معايير التصحيح الدولية ؟؟؟
تعنى شنو ؟؟؟؟ هى عشرة اسئلة ؟؟؟ يعنى زى تقولى عشرة مواد ؟؟؟ مثلا ؟؟؟
نقوم نشوف اجابات الطلاب كلهم ونطلع منها الوسط المرجح بالاوزان ؟؟؟؟ اوع تقولى لى دا شنو كمان ؟؟؟؟ وبعد داك نقوم نشوف الانحراف المعيارى لهذه الحكاية( الدرجات ) ؟؟؟ يعنى الطلبة الحارزون درجة اعلى من الوسط المرجح والادنى من الوسط المرجح ودا يسمى التشتت وتانى نجيب ليه الوسط المتحرك ؟؟؟ وهنا توضع الدرجة المعيارية ؟؟؟ ببساطة ممكن يكون اعلى زول جايب 60% وهى اعلى اجابة وممكن كم طالب يجيبوا على السؤال وكلهم يجيبوا 100 من 100 ويكون الزول الجايب 99.9% من السؤال ساقط ؟؟ فى السؤال نفسه وببساطه ناخذ اعلى درجة مثلا 80% من السؤال وادنى درجة 20% ونعمل الشغل الذى شرحته لك من قبل حتى نصل الى الدرجة المعيارية والتى على ضوءها وضعت معايير التصحيح الدولية بالتالى هى مقايس عدالة وديمقراطية مبالغ فيها اما عن طريقة ارسال المبلغ مافى مشكلة بالنسبة للدول العربية عندنا البنك العربى ؟ فرع السودان وهذه ببساطة تتم التحويلات اما بالنسبة للدول الاوربية عندنا شركات التحويل الفورى ؟؟؟ لجميع دول العالم ماعدا نيجيريا ؟؟ اوع تكونى مغتربة فى نيجيريا ياعازة ؟؟؟ بس كل شى الا ناس نيجيريا ديل ماعندنا طريقة نتعامل معاهم وانتى عارفة السبب شنو ؟؟؟؟

تحياتى
ولى عودة

من طرف **عازه** الأحد 17 فبراير 2013, 7:24 pm

ههههههههههه شكلنا كدا بالمعايير الدوليه دي وشغل الاحصاء الثقيل دا ماحاينجح احد انا غايتو اتنازلت المثل يقول (الكديس لما ماوصل مكان اللبن قال مر)وانا بقول الجائزه كد كدا ماحاتصلني لاني في بلد الواق واق المافيها بنوك ولا حسابات العالم اصبح قريه صغيره الا قريتنا مازالت كبيره

من طرف **م بروي** الأحد 17 فبراير 2013, 7:28 pm

ابو مصطفى كتب:ياسلام يا سلام لغتى هى لغة الارقام وكل شى بالرقم نفهمه ؟؟؟ دخلت علينا طالبة ممتازة بكل المواصفات حيث اجابة اجابات منطقية وعقلانية ؟؟ ويا سبحان الله ؟؟؟
بربكم قارنوا بين اجابات عازة والاجابات الاخرى ؟؟؟؟ كم هى دقيقة الاولى ؟؟؟
الطالبة عازة حتى الان وحسب افادة غرفة الكنترول للتصحيح اجابت بنسبة 80% من حجم الورقة وهذه اشادة كبرى ؟؟؟؟
ارجع مرة اخرى الى موضوع الجائزة المقدمة من شركة عتيلى للخدمات والان تم ايداع المبلغ فى البنك وصدقونى سوف نرسل للفائز مبلغ المليون جنيه حتى لو بقى فى جزر الواق الواق ؟؟؟؟ فقط ارسل لنا فى رسالة خاصة رقم حسابك فى بلدك وعنوان البنك فى بلد ؟؟؟؟؟ انتو تضحكوا مش كده ؟؟؟ معليش قايلين ابو مصطفى بى يلعب لعب والله شنو ؟؟؟؟

تحياتى
ابو مصطفى

أقبض
زولكم دا يفك فلستو

من طرف **عازه** الأحد 17 فبراير 2013, 7:41 pm

شكلك مركز شديد الاخ ود بروي هههههههههههههه

من طرف **ابو مصطفى** الأحد 17 فبراير 2013, 7:42 pm

بسم الله يا سيدى الحسن ؟؟؟؟؟؟؟؟؟؟؟ بسم الله يا الشيخ الجعلى راجل كدباس ؟؟

اسع دا جاء ناطى من وين ؟؟ زى ناس بسم الله ؟؟؟؟؟
بسم الله تلحقنا وتحضرنا ؟؟ دا منو ؟؟؟ يا الفى ؟
دا طالب مفصول من قبل اللجنة ؟؟؟ وطالب لا عاوز يتعلم ولا يخلى الاخرين يتعلموا ؟؟؟ طالب مشاغب ؟؟؟؟ وقلبوا كعب ؟؟؟ ياكل حق الناس ؟؟؟ ويسرق كل شى يجده فى فناء المدرسة ؟؟؟؟
من الادارة الى جميع الطلاب الجالسون للامتحان ؟؟؟؟؟
نحذر كل الطلاب الاوفياء بعدم التعامل مع الطالب المفصول من مدرستنا
الطالب محمد بروى والذى سبق ان جلس لهذه الورقة اربعه مرات ولم يباصى ؟؟؟؟
عليه الاعزاء الطلاب لا تكترثوا لهذا الطالب المشاغب حتى لا يحول موضوع الامتحان ودمتم

تحياتى
ابو مصطفى

من طرف **نجلاء زمراوي** الأحد 17 فبراير 2013, 7:56 pm

كدي عاد وقت جابتلها جوائز الندخل نحل ...

1/ثلاثه ساعات,,,غير متواصله متقطعه علي مدار اليوم

2/جنيه في اليوم

3/65%

4/99%

5/40%

6/40%

7/لا ابدا ليس في الحفظ والصون

8/؟مافي خيارات

9/ ؟مافي خيارات

10/من هنا احي الكليس لتواجده الدائم المستمر طول الوقت من غير انقطاع....اما بقيه الاعضاء ..غيب وتعال

من طرف **عازه** الأحد 17 فبراير 2013, 8:11 pm

بما اني بفكر في الجائزه قبل مااحل الامتحان من اولي اساس حتي الان حسع ودبروي طلع مشكله في الحسابات اها اذا قترحنا تحول الجائزه الي رصيد ؟الفائز يعطيك رقم تلفونه وتحوله الي زووووووووووووووول.............. هههههههههههههه يعني ضائعين فيها في الحالتين عشان كدا احسن الجوائز الماديه وموثقه ذي الشروق مرت من هنا

من طرف **ابو مصطفى** الأحد 17 فبراير 2013, 8:25 pm

احى السادة المرور ونجلاء زمراوى على المشاركة العملية فى حل الامتحان ؟؟؟
لكن ياعازة ماتشتغلى بى كلام ودبروى دا واحد لخباط والحسابات مافييها مشكلة
ومحمد بروى مفصول بى قرار من الادارة العليا للتصحيح وهو طالب غير نزيه ؟؟؟؟
لو حصل انو فزتى بالجائزة وهى مليون جنيه بالقديم ؟؟؟ حتى لوبقت بلدك تتعامل بالدولار سوف نحول لك دولارتك دى لو فزتى ؟؟؟؟ وانا شخصيا بقيت اشك فى الاداء بتاعك ؟؟؟ لانك انتى شغالة بى كلام الناس فلان قال وفلان سوى ؟؟؟؟ ياعازة خليك جادة معانا نحن اصلنا ماقاعدين نلعب ولا نهظر ؟؟؟؟ كل شى سوف يكون امامك فى الشاشة ؟؟؟؟
سوف نعمل كل شى بى اكسل شيت ونرفقه للسادة الطلاب المجتهدون ؟؟؟؟
لا تشتغلى بى كلام الناس عليك التفكير المنطقى فى الحلول والباقى خلى على الله
لكن من باريتى لى الطلاب المفصولين انا قنعت من خيرا فيك ؟؟؟؟

تحياتى
ابو مصطفى

من طرف **عازه** الأحد 17 فبراير 2013, 8:41 pm

المشكله انك محاسب شاطر عشان كدا تعامل نقدي ماعايزين بس ياتلفزيون ياخلاطه يابتوجاز وبالفيديو تتوثق ذي مابعمل محمد موسي في الشروق مرت من هنا دي مطالبنا نحن الجالسون الي الامتحان واذا ضمنت لي دي بركز شديد معاك وود بروي دا بيني وبينك حا اخليهو و احسن يكون مفصول ماهو مشاغب شديد واذا نزل امتحان حايركز شديد وبسم الله يالشيخ الجعلي تلحقنا حايشيل الجائزه اصلو كدا كدا ضائعين مع ودبروي و ابومصطفي

من طرف **ابو مصطفى** الأحد 17 فبراير 2013, 8:58 pm

طيب مافى مشكلة سوف نرفع الامر الى غرفة الكنترول بصدد تحويل الجائزة الى اشياء عينية فى حدود المليون جنيه ؟؟؟؟ وتكون زى ما انت قلت يا عازة لكن محمد بروى ابعدى منه راجل لخباط شديد ؟؟؟ وسوف ترفض كل اجاباته حتى لو جلس للامتحان وما ظنى لانه سبق ان فصل ؟؟؟؟ على العموم مافى مشكلة سوف تحول الجائزة الى اشياء عينية ونوثق ذلك بالفيديو ونرفع كل الملفات عبر الشبكة
حظا اوفر ياعازة ولك تحياتى
ولى عودة
ابو مصطفى

من طرف **عازه** الأحد 17 فبراير 2013, 9:19 pm

السؤال التاسع :::: فقط ثلاثة ألف وتسعمائة خمسة وخمسون جنيها لاغير + خمسمائة ريال سعودي
السؤال العاشر :50 شخص يوميا

عازه كتب:السؤال التاسع :::: فقط ثلاثة ألف وتسعمائة خمسة وخمسون جنيها لاغير + خمسمائة ريال سعودي
السؤال العاشر :50 شخص يوميا

!!!!!!!!!!!!!!لا والف لا

ابو مصطفي اذ ا اعتمدت نتيجه الملاحق بتاعت عازه نحن نطالب بان يجلس محمد بروي للا متحان وحاشاهو من اللخبطه؟؟؟

من طرف **عازه** الإثنين 18 فبراير 2013, 1:01 am

يانجلاء انتي الحراشه عليك شنو احسن تتفقي معاي ونتقاسم الجائزه حتي لو حاجه عينيه شهر معاك وشهر معاي وود بروي دا لو نزل حايضيعنا الاثنين

من طرف **نداء** الإثنين 18 فبراير 2013, 1:11 am

حياتى مالاقاني امتحان صعب كده
لوسمحت يااستاذ مافي خيارات عشان انا جيت جديده

من طرف **ابو مصطفى** الإثنين 18 فبراير 2013, 6:15 pm

ياسلام يا سلام ؟؟؟ عدد اقبال البنات فى الجلوس لهذه الورقة بدا يزيد والحمد لله ؟؟؟
الخيارات سوف تطرح فيما بعد يا نداء وانت تنادى بان تكون هنالك خيارات ومافى مشكلة سوف نعرضها لاحقا انشاء الله ,,,,,
ارجع الى عازة والاخت نجلاء هونوا على انفسكم ؟؟؟؟ كل شى سوف يحل وانا متاكد فى طلاب شطار جدا جدا لكن حتى الان هم شغالين ونحن ننتظر الى ان يحل كل الامتحان
وتقبل نتيجة الملاحق يا نجلاء حسب قرار الادارة العليا

تحياتى
ولى عودة
ابو مصطفى

من طرف **م بروي** الثلاثاء 19 فبراير 2013, 1:33 pm

عازه كتب:شكلك مركز شديد الاخ ود بروي هههههههههههههه

يا دكتوره ده قبل كده
أمنتو على جرفي قام أكلو
كيف ما أركز؟؟؟
الجرف أكلو...الجرافه أكلها..الجريف جاييهو بلاء

من طرف **م بروي** الثلاثاء 19 فبراير 2013, 1:41 pm

عازه كتب:يانجلاء انتي الحراشه عليك شنو احسن تتفقي معاي ونتقاسم الجائزه حتي لو حاجه عينيه شهر معاك وشهر معاي وود بروي دا لو نزل حايضيعنا الاثنين

أقبض
دكتوره بصاصه

من طرف **م بروي** الثلاثاء 19 فبراير 2013, 1:45 pm

نجلاء زمراوي كتب:
عازه كتب:السؤال التاسع :::: فقط ثلاثة ألف وتسعمائة خمسة وخمسون جنيها لاغير + خمسمائة ريال سعودي
السؤال العاشر :50 شخص يوميا

!!!!!!!!!!!!!!لا والف لا

ابو مصطفي اذ ا اعتمدت نتيجه الملاحق بتاعت عازه نحن نطالب بان يجلس محمد بروي للا متحان وحاشاهو من اللخبطه؟؟؟

المراقب مرتشي
والدكتوره تبص
والزعيمه نجلاء تجامل
ده محل نجلس فيهو لإمتحان؟؟؟

من طرف **ابو مصطفى** الثلاثاء 19 فبراير 2013, 3:09 pm

ياسلام يا سلام كم انا سعيد هذا العام عن اداء الطلاب وبالذات البنات ؟؟؟ انتو يا جماعة بنات المناصير عموما شاطرات خلاص ؟؟؟؟ موقدات نار ؟؟؟ لكن الملاحظ بعض الطلاب غير منضبطين حتى فى كل شى ؟؟؟
الطالب محمد بروى ؟؟؟ سوف يتم فتح بلاغ فيه ؟؟؟؟؟ لانه يتهم الادارة بالتلاعب فى رسوم الامتحان ؟؟؟ مع العلم بانه هو الطالب الوحيد الذى لم يسدد رسوم الامتحان وتم طرده من القاعة كم مرة ولكن المشكلة دمو بقرى ؟؟؟ وبعد دا كله يحلم بالجائزة الكبرى ؟؟؟؟؟ الجائزة المليونية ؟؟؟ والله دا عشم الكلب فى موية الابريق ؟؟؟؟ عشم الكلب فى موية الابريق ؟؟؟ ؟؟

تحياتى
ولى عودة
ابو مصطفى

من طرف **عازه** الثلاثاء 19 فبراير 2013, 8:08 pm

الاخ ابو مصطفي الغايه تبرر الوسيله انا عايزه الجائزه ومراقبتكم ضعيفه شديد بصيت لكن برضو احسن ليك من ود بروي اللخباط ونجلاء الحراشه انا ببص بي هدؤ ومامشغابه

من طرف **م بروي** الأربعاء 20 فبراير 2013, 4:02 am

عازه كتب:الاخ ابو مصطفي الغايه تبرر الوسيله انا عايزه الجائزه ومراقبتكم ضعيفه شديد بصيت لكن برضو احسن ليك من ود بروي اللخباط ونجلاء الحراشه انا ببص بي هدؤ ومامشغابه

ياريت لو بص بس
يبقالي البخرات مكدسه كمان