رثاء الراحل محمد حجازي

مالو كل ما تندمل اجروح مالو تاني جرحنا ينزف
وكلو ما نمرق من بطن آهة تاني بينا الأقدار تعسف
... ما الفرح اصبح عسير كل نبع للأفراح يجف
كابي دمعتنا على الحصير قلنا زمن الأحزان أزف
شالت الدنيا اسد ابو سباع ود حجازي الما بيتوصف
كان سفير لدار ودقمر في الرباطاب حضن الجرف
كان زعيم وكان كلو أوصاف وكل خير باسمو يهتف
لو وصفنا الناس بالكرم موحوماد أول من يتوصف
كلو غيرة على دار قمر ومن طريق الخير ما بيلف
البلد شايلا في الفؤاد وبي فراقا هو ما معترف
عاشق الضفاف ابحميد ومن حنانا دوما بيغرف
في المحلي خيارو العزيز ما هو زي اب فهما تلف
ما بيفوت دار قمر تب يبقى باسم الخونة يهتف
في البلد مقتول بالفراق حبو ليها ممنوع الصرف
ما بيساوم فيها بالمال وغيرا بوطن ما بعترف
الكلام دخري بجيبو ليك لا بدور لا بلفلف
وكت يعزمك عزيمتو تبدأ دوام بالحلف
ديمة يلقاك طربان ما البجيك صاري ومتلف
كلو مشاكل الوطن العظيم روحو واهبا ليهن وقف
قلبو ثابت جبل الحديد ما هو عولاقا يرتجف
مسبل الروح فدا للوطن واسمو دون الناس يتعرف
في الرجال سمحة مواقفا وموقفك دائما مشرف
ربي ليك دعوات الجميع كل ما يكتب شاعر يؤلف
ابحميد في الفردوس يكون ربي سكنو في الرفارف
بين جنانك يا رب يطوف ونفسو طيبة الليهو بتهف
والحبيب يلقاه هناك ولبنات الحور يلاطف
في سعادة يكون للأبد وبالسراط يجي ماري منجرف
والمناصير تهنا وتعيش وكل باكي للدمعات تجف