الشاعرعطا الكنيبلى فى رثاء الاستاذ الراحل محمد عبد الله سيد احمد بعنوان(انفقه القلم)

قيل شهر تقريبا كنت ضمن حضور احتفال طلاب جامعة المناصير بجامعة أم درمان الإسلامية بتخريخ طلاب الجامعه وبعض الخريجين من جامعات أخرى يقصر الشباب والأطفال –وطلب منى أن اكون ضمن الذين يقدمون الشهادات التقديرية للخريجين وتشرفت بذلك مع كل من الأخوان –محمد خير حسن خليفة –وحسن خليفة-والمهندس والشاعر الشاب عطا الكنيبلى-أتمنى ان يكون الأبناء المتخرجون دفعة جديدة من اجل نهضة المنطقة-كما شارك فى الحفل فنان الطمبور –خالد عثمان النجيب-وقدم الشاعر كننيبلى فاصلا فى الشعر الجميل اثبت من خلاله انه شاعر كبير وقدم قصائد كثيرة في الخزان وفى الغزل ومنها (الدم ماشفع-انفقه القلم-البت دى بتودى وتجيب-شبر شك وغيرها ) وأتمنى إلا اكون قدم اخطأت فى التسميات-المهم فى الأمر شدت انتباهى قصيدة (انفقه القلم ) والتى قالها فى رثاء الاشتاذ الراحل المقيم محمد عبد الله سيد احمد والتى سوف أوردها هنا واتاسف اذا اخطأت فى بعض الكلمات لأنى كتبتها من خلال التسجيل والذى طلبته مخصوض من الأبناء في الرابطة وهم مشكورين أرسلوا لى ال(cd )

انفقــــــــــــه القلــــــــــــــــــــــــــــــــلم
أنت مارق ماشى وين والبلد الألم
مالك يارسول أذنت ومشيت تبناك عدم
انت هزاك الحصل هد الاحتمال ندمت الندم
واللا السد قفل بوابة النفس سد يا محترم
قلت أحسن تفوت البلد البيوت
شربيك الخيوط شرا جاى أحسن منو الزول يموت
صالون الكلام مليان بالسكوت ماعون الكلام زاير مابفوت
الموت الجبر استعجل شوى هو السد الفقر مازال جرحو نى
النضم الكتر كان يكويك كى لامن حرقوك وانتحر القلم
اسفين يابلد ميت لك ولد بالهم انشرق
وشرقان انتظار فى نفس الغرق
من ربك—قال اله ماسكين فيهو اه
مسكونا البشر عبونا انشداه
عن معنى الخطر
من نبيك –قال محمد كلفن ابقو اخوة وما جايبن خبر
ما اسمك—قال محمد سيد وطنا مرمد عند الفرقة غمد كرهان البحر
ما دينك—قال رسالة لى كل اليشر
وفى موية الشراب شركاء للركب
بس موية الغراق فضوا ليها ناس فضوا ليها رب
طيب ماقصدك تموت قال عشان احيا وأقول البحر أتنكب
قد يسمعنى زول مابين الترب
ورغم ادراكو يسأل مالحاصل اذن
قالو نحنا ابلد امة كنا فى نظر الطبيعة
أضيق كلمة كنا فى لغتا الوسيعة
أتفرقنا أول واتفرقنا تانى واتفرقنا تالت
اتعلقنا مرة فى اللاشى نغالط
حسبناها ساكت بى حرة قلوب من غير اى جدوى قررناها نرجى ننتظر الأرض
واحدين قالوا لالا السما ايدا اقوى بتمطر حل مشاكل
لامن هاجمت السواحل جيش الانتظار
فكر وكر خاسر الشاطئ المسالم أمسى الليلة جاسر
وانشر النزاع زى شرة بحرنا فوق كل البقاع
الرادى الجرايد حردت فى الحناسى قدر المستطاع
من حقك تكاجر لو حقك يباع بس زيد النزاع
وموعودين بعد داك بى حل مستطاع
يبقى الجلسة ترفع وانت فوق الارض لسع
خليت ناس بترضع لكن لايهمك مليون ميل مربع
مليون طفل يتم اطفالو الصغار
ارقد رحمة واعلم لو هب( الغيار)
لكن اوعه تحلم انو يقوم غبار
ما الليد التحنس من خلف الجبار
أكد لابترقص لابتضرب تجرس
والناس الكبار لسع يامحمد فى حلقة شجار
من يكسب ليصغر ومن يصغر ليكسب
وكلنا انتظار وعند المنعطف تاريخ وانعطف
احلف انك انت خير يازول حلف
برضك ماك انت جيت من ياتو صف
كان أحسن نضحى لكن للأسف يبقى الجلسة تفتح ---أنت مالك لورحلت
قال دى كانت أحلى غلطة وكنت بعز ترابى ايوة انا خفت خفت
خفت الصحراء تنفض ماداخل جرابى من عزاصل بلدى ويتهمل عقابى
بس رسلت اخويا كان مهتم وقارى
ناجح قمحو اخضر فى قلب الصحارى
بس عاجز انو يفخر زى تربال مأجر فى طينا غريب
والشين المضارى وماكلمنى عنو كم سنة والكفالة راح ياخدوها منو
وبينو وبين بحرنا ممنوع التصافى انتهت الإجابة
قالو لو مدالك ايدو
قالو لو مداها ينجد اصدق منو مافى
ولو مداها انجدو أسرع منى مافى
بس لو مدوها ليهو بقطعا من مكانا واجدعا فى الفيافى غادى من البحر
انتهت الإجابة-
ارقد يامحمد ترقد رحمة عافى نحنا الفيها فيها
نترتع ترانا فى الدنيا السفيهة
وإبليسين معانا والبلد الأمانة وفى الكتف الامانة ويوم نتلاقى نحكى
اكرر للاخ الكنيبلى اذا اخطأت فى بعض الكلمات وأحيانا لا استطيع التمييز مهما حاولت التركيز وذلك للتصفيق من الحضورالذى يتخلل هذه القصيدة الرائعة إعجابا بها -
قصدت بذلك التذكير بالاستاذ المجاهد محمد عبد الله سيد احمد وأن نكتب عنه (وخاصة الاخ الرشيد) فما قدمه كثير وباذن الله تتحقق كل الاشياء التى كان يتمنى ان تحقق وله الرحمة0

شكرا" جزيلا" استاذنا النشط دوما" النعوفابى شكرا" كثيرا" باشمهندس عطا الكنيبلى يرحمك الله رحمة واسعة صاحب القلم الذى لم يتوانى يوما فى الدفاع عن قضية المناصير الاستاذ محمد عبدالله سيداحمد...
القصيدة رائعة روعة شاعرنا عطا وهذا الرجل صاحب مواقف معنا نحن كطلاب جامعة وادى النيل ولا اذكر اليوم الذى تخلف فيه عن احتفالات الرابطة بابنائها
له منا جزيل الشكر
وسنظل نردد:
"مامعنى الابادة عدم الموية يقتلك وتكتلك الزيادة"
و"انسد سد" وغيرها من الروائع
اكرر الشكر ومزيد من الابداع

الاستاذ سلمان تحياتى وانت تتحفنا يوميا بالروائع والتحية للمبدع باشمهندس عطا والذى لم اتشرف بلقاءه او معرفته حتى الان وقد قرأت له قصيدة الدم ما شفع وايقنت انه شاعر مبدع وياريت لو واحد ينزلها هنا مع كل كتاباته فى بوست خاص
ساكتب عن الراحل العزيز

رحم الله الاستا محمد عبدالله سيد احمد الشاعر عطاء الكنيبلى من منطقة الهادياب جوار برتى يااخ خالد واشهر قصايدو شبير شق
للاستا محمد النصرى

شكرا الأخ مونتاري على المعلومة
والقصيدة إسمها شبر شك وليس شق
شكرا يامونتاري وان شاء الله النصر حليفكم

شكرا سلمان وانت تتحفنا بالروائع شكرا خالد عابدين ومونتارى وخال ابرار والشكر الكثير للمبدع حقا باشمهندس عطا الكنيبلى تامل روعة هذا الابداع :

فجرك يا جريح يشرق لا تهم

الله الله الله على هذا الابداع
يا اخوانا رجاء خاص لمو لينا اشعار الزول الرائع ده كلها وجيبوها هنا رجاء خاص تقعد جنب روائع مبدعنا ورائعنا محمد بروى والله نحن مدينون لهذا السد الذى استخرج لنا هذه اللالى والدرر ولك الله يا مناصير كل هذا الابداع ولا فى زول جايب خبر تحياتى ايها المبدعون .

شكرا يااستاذ وانت تفتح لنا افاق هذا الشاعر القامه واتنفق القلم لحسن حظى من الذبن حضروا ولادتها فى عطبره عندما جاءنا نباوفاء الاستاذ محمد عبدالله سيداحمد وغيرها من القصائد الاخرى والاستاذ عطا من الذين يمسكون القلم ويكتبون بمجرد وجود حدث يشد انتباهه او يستفزه واخره قصائده التى رد على واحده تتبرأ من المناصير لمجرد ان زوجها جعلى
فقال لها عطا
تتبرى من الانتماء شوفى المنو البيحنسك
ياخاينه خدامين ....... كان قصدى بلدى تونسك
تحكيلك التاريخ شموخ او بى اصولها تحدثك
تتبرى تبره البلد حتى ان بقت بتورثك
فى مطلع قصيده طويله اعدكم بعد ارجع عطبره انزلها كامله
وايضا من قصائده
ياوجع القصائد كينت ماتدفى وتدينا الامان
وياوجع السواعد كينت ماتكفى عن قول اللسان
وتانى
اخر طلقه فارغه
وكلهن احتمالين ياشقى ياشقى
وحيل المنيه افتر من نتعلقه
وتانى
اكلم التخوفك اقولها الخطب مسيسه وفى دين
لكنو دين كعب يعلم العوين فى قله الادب
يجوع المسكين لعيبد الرتب
يجوع الكلاب يلبسن دهب
وتانى
ومن القصائد الغزليه الكثيره المتوفره انشاء الله ننزلها شويه شويه ليكم .
بالمناسبه دى عطا الايام ديل عريس فى غرب عطبره الفاطلاب.

شكرا ياسلمان يارائع دوما
وشكرا لكل الرائعين خلفك
فقط مانريده تحويل هذا البوست فى صفحة الشاعر الخاصه ان امكن
بالتشاور مع الريس