هل ضاعت الأسرة مع الإنترنت ؟

نبدأ هذا الموضوع وأرجو أن تكون مساهات الأعضاء فيه حيوية ومفيدة وليست مغلوطة ومخلوطة إلا بما يناسب المناسبه .

نبدأ بسؤال رئيس ونفصله في الصفحات التالية

ماهو أثر الإنترنت على إدارة الزوجة لمجالات الحياة المعيشية ؟

انطلقت الثورة المعلوماتية في النصف الثاني من القرن العشرين وزادت حدتها وانتشرت بعد تقدم وسائل الاتصال وعمت أجزاء العالم بعد دخول الإنترنت. فالانترنت قد قد يساعد في زيادة قدرات ومهارات أفراد الأسرة ومنهم الزوجة أو قد يكون وبالا وبلاء عليها.

فأثر استخدام الزوجة للإنترنت على إدارتها مجالات الحياة المعيشية يتوقف على عوامل كثيرة منها ؟

1- تعليم الزوجة أي مستوى الزوجة التعليمي

2- مستوى دخل الاسرة

3- عمل الزوجة هل هي من العاملات أم ربات البيوت

4- عدد أفراد الأسرة وأعمارهم

ويظهر أثر هذه العوامل لو دخلت بيت أي أسرة في :

1- يظهر ذلك في إدارة مجال الغذاء ، نوعية الوجبات وتكرارها وربما طغت نوعية من الطعام على الأكل ( قراصة دائما ) أو ربما اعتمدت المرأة على أكل المطاعم

2- إدارة الملابس والزي في البيت ، ملابس الأولاد وسخانة أو غير مكوية أو تكرار اللبسة دائما

3- إدارة المسكن والبيت أو الشقة - النظافة ، الغسيل ، البخور أو رائحة البيت تضربك من الباب إلا تقفل أنفك

4- رعاية الأطفال والاعتناء بمظهرهم وترتيب الأولويات ومتابعة دروسهم وجلساتهم في البيت

5- الصحة والجمال الاهتمام بصحة المنزل واهتمام المرأة بنفسها وما تجيك ايديها ملطخة بالعجين

هذا ما أردت ايراده ونسمع تعليقاتكم

التحية لك الابنة تماضر ونحب أن نقول أن الانترنت مهم في البيت وداخل كل أسرة ولكن نوصي بالآتي:

1- الاهتمام بعمل مواقع عربية على شبكة الإنترنت تعطي معلومات للزوجة في جميع مجالات إدارة شؤون أسرتها

2- اهتمام وزارة التربية والتعليم بإدخال مناهج تفيد الطالبات عن كيفية الاستخدام الأمثل لشبكة الإنترنت

3- الإكثار من برامج إرشادية للزوجات والأمهات بتوعيتهن عن كيفية إدارة مجالات الحياة المعيشية عبر وسائل الإعلام والجمعيات الخيرية.

4-تكثيف جهود الجهات المعنية بشؤون الأسرة بعمل ندوات للزوجات

دكتور مصباح بعد التحية حقية النت اضافة جيدة جدا للبيت وكل افراد الاسرة اطفال وكبار كل بما يناسبة وتجدني مستغرب شوية من كلام بنتنا تماضر فلقد وردت كلمة ( تسحب منها النت )
ليس من حق الزوج ابدا سحب النت من الزوجة فكل شيء يتم باالحديث والتفاهم فهذا حق اصيل باالنسبة لها فلها وقتها ولها خصوصيتها ولكن يجب مراقبة الاولاد خاصة في سن المراهقة وهنا ممكن سحب النت منهم في اوقات معينة
اما موضوع تأثير السلبي لما يترتب علية من اخذ وقت كبير علي حساب متطلبات الاسرة هذة حالات نادرة فاالمرأة اليوم ولنقل الزوجة ماعادت كما كانت فمعظم الزوجات يعملن في حقل الوظيفة وليس لهن ذاك الوقت المهدور ودخولهن للنت ايجابي جدا ولماذا لاتكون الصورة معكوسة بمعني ان الرجل هو الذي يقضي معظم وقتة امام النت علي حساب اسرتة خاصة وان ظاهرة مشاهدة كرة القدم ولعب الكوشتينة باتت معروفة كمشكلة باالنسبة للرجال

الأخ المهنس الباحث هاشم لك التحية وللأسرة الإنترنت وفر كثير من الزمن للأسرة عامة ثقضى أشغال كثيرة من خلاله ويمكن يكون وفر قروش كمان بقدر ما يأخذ فهو يعطي ولكن عايزين الزوجة وربة البيت تتحكم فيه بمهارة وقت لها ووقت لمراقبة الأولاد والزوج كمان وربنا يطول في أعمارنا ونشوف العجائب. والإنترنت من عجائب العالم و ليس الدنيا كما يقال.

تسلم دكتور مصباح.. ويسلموا المرور.. الموضوع شائك ومعقد.. ولا نحمل الزوجة فيه وزر.. ولانحمل الزوج.. يمكنك أن تقول هو كل العلم التقني الحديث ، بما فيه الأنترنت.. زي حكاية السـُـكـَّـر... هو مادة طيبة حلال.. في ناس تصنع منه الشاي.. وتصنع منه الباسطة.. وفي ناس تصنع منه العرقي..
برضو يمكنك أن تقول في هذا المنعطف الزماني الخطير.. تقدم العلم وتخلفت الأخلاق.. لازم ترتفع الأخلاق بالتربية الدينية الصحيحة ، وليست المسيسة ، ترتفع الى مستوى العلم والتقنية الجديدة ، وترتفق بها في حياتها..
بعدين الفقرة دي........

- يظهر ذلك في إدارة مجال الغذاء ، نوعية الوجبات وتكرارها وربما طغت نوعية من الطعام على الأكل ( قراصة دائما ) أو ربما اعتمدت المرأة على أكل المطاعم

لا إلا ما ندر. المرأة ربة البيت الحصيفة قادرة توائم بين الأثنين..
.............
والفقرة دي

الاهتمام بعمل مواقع عربية على شبكة الإنترنت تعطي معلومات للزوجة في جميع مجالات إدارة شؤون أسرتها

بكل أسف المواقع العربية أزفت المواقع.. ودائما تبحث عن الطالح، والغش والخداع، والمواد المسمومة والاباحية معظمها ما فيها فائدة لربة البيت... الآن حسب التجربة ربة البيت اصبح وصي عليها عقلها دون سائر البشر..
.............
والفقرة دي

أو رائحة البيت تضربك من الباب إلا تقفل أنفك

معقول للدرجة دي؟
تقفل أنفك من شنو؟ يعني ربة البيت مهملة للدرجة دي قعدت في النت وسابت اي حاجة.. وهل قفل الأنف خلاص بيغنيك.. ما افتكر.. معظم السودانيات نضيفات والله في اي شئ... وقادرات يوفقن بين النت ومهام الزوج والبيت والأطفال.. إلا ما ندر.. بعدين وين الزوج! هل قاعد يساعد في النظافة..! بعدين الآن يوجد من معطرات الجو.. لو بخيت منو بخة واحدة، كافي أن تكون ريحة الشقة مسك.. مسك.. لمدة اسبوع.. حتى لو قبل ذلك ضبحت ليك فيها كلب..
...............
وبعدين دي

..................

الصحة والجمال الاهتمام بصحة المنزل واهتمام المرأة بنفسها

والله يا دكتور كل الجاليات العربية عندنا في الخليج تتحدث عن اهتمام المرأة السودانية بزينتها وبزيها.. وبرونقها.. ونظافتها..دلكة .. بخور.. دخان... كريمات.. عطور.. مقدرة فائقة على إختيار زيها.. بل في الحقيقة الناس هنا يعيبوا على الرجل السوداني.. وكثيرا ما يقولوها لينا..( ياخي والله السودانيين ديل حيرونا؟ نسوانهم من احلى الجاليات العربية نضافة وزينة.. تلقاهم بالأمسيات متكسرين قاعدين في مقاهي الحبش الما يسووا.. وغريبة.. صاحبات مقهى الشيشة حبشيات.. وكل الزبائن سودانيين. حبشي واحد قاعد زبون مافي؟؟ حاجة تحير؟؟؟؟)
والفقرة دي كمان

وما تجيك ايديها ملطخة بالعجين

تجيك وين أيديها ملطخة بالعجين؟؟؟ معقولة دي؟
تجيك.. هو أنت قاعد وين لما تجيك؟؟ طيب ما تجي إنتا!!
والبيخليها يديها ملطخة بالعجين شنو؟ تضرب في القراصة يعني!! القراصة صارت من السهولة بمكان عملها والمضارب والآلات الموجودة البي تخلي المرأة تعملا ولا تتلطخ يديها بالعجين!حتى القراصة ذاتها ما صارت وجبة اساسية..
ما افتكر دي موجودة في بناتنا يا دكتور.. ياخي في البلد ما بتجيك يديها ملطخة بالعجين.. وطيب نفرض جاتك ويديها ملطخة بالعجين؟ منو السبب في لطيخ يديها بالعجين؟؟؟
موش عشان تعمل ليكم الفطور إنت وأولادك؟؟؟ وأنتم السبب!!
طيب حتى لو جاتك ملطخة يديها بالعجين.. هذه أوسمة وشرف العمل والجهاد والحياة والصبر على المكاره.. يمكن أنت مقصر في حقها.. لو جاتني يديها ملطخة بالعجين. بحك ليها العجين الناشف على أياديها بي يدي.. وبمسحن ليها بي منديل. وبريحن ليها بي ريحة.. وابوس يديها ،وبسكت .. المرة الجاية ما حاتجيني ديها ملطخة بالعجين.. او المرة الجاية موش تجيني انا بجيها..
...............
يمكنك أن تقول أن العلم المادي تقدم.. والأخلاق تخلفت.. محتاجين لفهم راقي يشفع الأخلاق عشان ترتفق بالعلم وتمضي قدما...

سلام صاحب البوست وسلام لكل المرور

تماضر حيرتينى برايك

وبغض النظر عن ترتيب البيت والريحه والعجين

اصلا الوسخانه وسخانه كان بى نت او غيرو (عذرا للكلمه)

الانترنت مهم جدا لربه المنزل

اولا كوسيله اتصالات

انا شخصيا استفتا جدا ووفرته منو

تانيا كثير من الامهات الواحده ندعوها لمعرفه والانضمام لانترنت تقول ليك لشنو؟ لشنو كيف؟

خليك من التسوق والجمال والاتصال على الاقل تابعى اولادك بيعملو فى شنو فاتحيين اى مواقع طريقه تفكيرم شنو بنزلو شنو فى الانترنت

يا ما شفنا امهات يتهكمو من انضمام اخوتهن للنت واولادوم عاملين عمايل

انا شخصيا دايره اواكب كل صغيره وكبيره علشان اكون ملمه واعرف اولادى بيعملو فى شنو؟

التحيه لصاحب البوست
التحيه للمرور الكرام
المراه في السودان يادكتور ربنا يكون في عونا
خاصه المرأه العامله
تجري بي يدينا وكرعينا زي مابيقولو عشان تقدر تغطي
الواجب تجاه الاسره
الاولاد العمل البيت الزوج الاجماعيات الخاصه والعامه
دي طبعا المرأه بصوره عامه
بعد داك اذا لقت زمن ممكن تخش علي النت
وتشوف الدنيا فيها شنو
والنت بالنسبه لربة الاسره بالغ الاهميه
لانو لو ماتخش على النت حتكون هي في عالم
واولادا في عالم تاني ودا الضياع الحقيقي
النت اصبح متاح بكل سهوله
حتى ولو عبر الهاتف المحمول
يعني المرأه لو قالت اولادي ماعندهم كمبيوتر او تلفونات
حيلقوها في كل مكان وبكل يسر حتى لو في المدارس
وفي راي التاثير السلبي للانترنت ليس على ربه المنزل
وانما عدم مراعاة ربة المنزل لاطفالها في هذا المجال
فلابد من المتابعه اللصيقه جدا للابناء في هذا الاتجاه
وإلا فالاسره معرضه للضياع لا محاله
وابناء هذا الزمن الصحبه بتجيب فيهم
اكثر من العنف والضغط

يا أخونا
قريبتي انتصار مالا ما قالت لى عينك في راسك!
تعليقي ده أووستا فاتتو.. وردت بعدي على محاسن وأميرة.. أوع يكون الحكاية مقصودة بعدين اللاخر كلو هين؟

كدة تمام يا بت أسد أب سباع

الإخوة والأخوات المتداخلون لكم التحية جميعا ومنكم نتعلم الكثير وتعجبني شهامة وأصالة المنصورية ويا ضياع من لم يوفق في اختيار المنصورية وطبعا أنا وصاحبي الصدوق ود عون الله ما خلانا جنب نرقد عليه ولكن نقول الراجل عاوزنا نكون مثله ولكن نحن مازلنا نحن.

الحمد لله على نعمة الإنترنت الذي طال العالم جميعا وأكرر أنه من عجائب العالم. أشكركم إخواني ونتوقع المزيد.

بسم الله الرحمن الرحيم
ان كان من كلمة للاخ والعم والوالد مصباح الحمد لله الذى جعل ارزاق العباد بيده
وان للانترنت فوائد اجلها الاتصال فقد وفر علينا الدراهم والريالات (نحمدك يا الله)
وياقول امى ( العافيه ماتبقى شحدة )ونسال الله ان يعى الجميع رجال ونساء دور
الانترنت حتى يعرف الجميع قدر الراجل ( الانترنت ) والله حقيقة انا لو اريد انوم
لازم اخش النت واسال عن طريقة النوم الصحيح وياما ياالانترنت فيك عجايب..

ود الحمود
محمد سليمان احمد