مطعم شري السياحي مجدداً.. حاجة غريبة.

الليلة العصفورة بتاعتي من الجنس اللطيف..
جات من جامعتا بي شنطتا.. وهي غير عضو في المنتدى هنا.. شافت ليك الرشيد.. والنفر.. والحاج شرف الدين... وسلمان عقيد.. وعلي الكليس متماسكين ويتونسوا.. وضحك وقرقراب.. وماشين على مطعم شري السياحي.. ذلك المطعم الذي حكى عنه خال ابرار الزول الصادق..
اثناء ذلك العصفورة جاها خاطر؟
قالت ياربي الريس خالد عابدين مالو ماهو معاهم؟ ما كلموه والله حردان من حاجة!
كبر في دماغ العصفورة بالرغم من إنو رفاقتا في الجامعة فاتوها.. كبر في دماغا وقالت إلا تشوف نهاية الموضوع ده! وتحصحص منو؟
حاجة واحدة استغربت ليها؟
قالت علي الكليس ده اللماهو مع الجماعة ديل شنو؟
هو طوالي قاعد ينتقد بعض التصرفات في المنتدى، ياربي مرقد ليهم شعرة جلدو؟
والله علي الكليس قاعد يمشي ( محل ماها ملبني )
لكن قالت برضو بشارة خير. زمان برضو علي الكليس زار صديق مع أعضاء المنتدى في شقتو في الرياض!
وهذا ينم عن سلوك حضاري لابناء المناصير وخاصة القادة مثل شخصية لها وزنها زي علي الكليس
..........................
اها العصفورة قررت أن تنتحي ناحية ، لغاية ما تشوف الجماعة ديل يتقطعوا وين؟
لبدت كدة العصفورة
قلة خير شافت ليك أصحابك إتقطعوا تووووش في مطعم شري السياحي!
وكانت قريبة من المطعم
وراقتها رائحة الشواءات والدسم والمرق والشوربة التى تفوح رائحتها الزكية وهي بالقرب من المطعم..
ودار في خاطرها..
ياربي لو ظهرت ليهم ما ممكن يعزموني معاهم.. وكمان دخلوه ممكن يدخل حمارو.. ممكن برضو أعزم صاحباتي المنصوريات معاي.. الواقفات منتظرات!!!
عشان برضو ما اكون بت واحدي معاهم. عشان تكون الحكاية جوغة!
اصلو ناس قادة المناصير ديل ما قاعدين يؤمنوا بمشاركة المرأة في الحياة العامة..
وقبل كدة هناء عضو المنتدى اشتغلتهم في عدم إشراكهم المرأة في العمل العام، مع أنها تبوأته في الحياة العامة!
........................
أها العصفورة اتلصقت شديد في الباب الخلفي للمطعم..
وكمان هي من الطالبات المرطبات. وأبوها زول منصوري ثري.. فلما راقها رائحة الشواء. كمان هي ماها ساهلة. ندهت على الجرسون.. وقالت ليهو. لو سمحت.. انا منصورية . ويعجبني أكل مطعم شري السياحي عشان هو مطعم راقي ويمثل حاضرة بلدي والمحلي الذي كافحنا كثيراً من أجله... الجرسون المنصوري عجبوا الكلام.. وعجبوا الأخضر الليموني وقال كدة مدا خشمو وظهرت السن المشرومة فيه!
وجرى جهز ليها الطلب وزادوا قدر طلب تاني هوادة فوقو.. عشان عايز يقدم السبت، يمكن يلقى اللحد!
عمل كدة المسكين!
اها العصفورة لما ضمنت جانب الجرسون. أتوهطت ودلدلت رجليها وقالت ليهو : عندى منك طلب!
قال ليها تأمر يا عسل. أجيب ليك المافي.. هاكي طلبك بالهناء والشفاء وكمان زدتو ليكي قدر طلب زيادي فوقو!وتعالي كل يوم.
قالت ليهو: روح الجماعة المناصير ديلاك الدخلوا هسي دي وقعدوا على الطاولة ديك قول ليهم؟ مالكم نسيتوا ريسكم خالد عابدين.. وما جاء معاكم؟
صاحبنا الجرسون الذي بدا يدب في أوصاله روح شعلقة الحب المافي.. المن طرف واحد.. ما كضب.. مشى رخى راسو امام سلمان عقيد وقال ليهو عبارات العصفورة بي ضبانتا..
رد عليهو سلمان قال ليهو : أوووووو.. والله الريس خالد كلمناه وماني مندسين منو شى ؟ بس منعو من الحضور الشديد القوى..
.................
اها العصفورة شالتو بي ضبانتو ورسلتو ليا وانا نشرتو..
خليهم كان فالحين يقولوا الكلام ده ما صاح.....
بعدين انا قلت للعصفورة. عاد عيب عليهم الجماعة ديل. أنا مطعم شري السياحي ده ؟ اسمع بيهو في الحلم
ليه ما عزموني أنا لما جيت في إجازتي السودان ليه ما عزموني فيهو. عشان أكتب عنو وأشكرو للناس حتى يزوروهو. وتكون ليهم فائدة في البزنس..
ليه ما يعزموني.
عاد البركة في قريبتي نجلاء زمراوي العزمتني في بيتا..
خليهم ديل يا عصفورة وخلي ليهم مطعم شري السياحي بتاعهم ده؟
أولى بي ناس شري انا والله اولى بيها ناس كبنة وأم دييمي!
عاد يا يمة برى..

عصفورة بالجد خطيرة—ياربى –من :
رحلة عصافير الخريف-ام
عصافير مابنخاف من كر برانا نطير—نرك فوق شدرة من شدرك—(طاولة من طاولات مطعم شرى الانيق)—
وبالتأكيد ما من عصافير ود الطرشان الذى ان الاوان ليقول :خسارا وا خساراعصفورى من ايدى طارا—لكن من حق الصدوق ان يقول :
رانيا عصفورا شدالى فى عيونا انا شفتا حالى
رانيا يا بدر الليالى حالا جبتى لى شمارى

شايفين صدق كلامي
وشهد شاهد من اهلها..
عايزين نسمع كلام بقية أعضاء وفد الغداء
شكرا يا سلمان على الصدق وإثبات الواقعة

والله دا لوما ضكر زى مايقولوا
يا باشمهندس صديق هم ماعارفين الدنيا ضيقة ولا شنو
ولا العالم اصبح قرية مع ذلك عصفورتك ماشاء الله الله يحفظها

لانك زول قلبك ابيض العصافير ابدا ما بتقصر معاك؟؟؟؟؟؟؟
الاجازه الجايه انشاء الله نعزمك في مطاعم شاليهات البحيره

تسلمي قريبتي نجلاء. العصافير أنا بحن عليها وبعاملها الند بالند. بدون رياء بدون طمع بدون ملق.. نتعامل مع الزول بي عقلو فيهو شنو من العلم النافع.. في الدين والدنيا..
والعصافير يؤذيها ما يؤذيها، أن يطمع في ما عندها أحد.. تكون طليقة حرة، تهب الناس معاني الحياة السامية الغير مؤوفة من آلفات سخايم البشر المحدودة..
عشان كدة العصافير تعتبرني أخ وزميل وصديق، وتأتي الىّ بعرش بلقيس.. عشان كدة الناس البي يندسوا ويمشوا ياكلوا يعملوا حسابهم..

سهام هاكي أخبار العصافير

غايتو انا عصافيرك دي خوفتني والله يستر ماتكون من حاجات بسم الله علينا غايتو انا بديت اشك في الكلام دا

غايتو انا عصافيرك دي خوفتني والله يستر ماتكون من حاجات بسم الله علينا غايتو انا بديت اشك في الكلام دا