دخل القش ما قال كش كش

تذكير بمساهمة فاتح الموضوع :

دخل القش... ما قال كش.. كش..
ده شنو ده!!!
وفي ناس نفس الحجوة يقولوها ( دخل العيش بلا كشكيش)

ابو أحمد..
عواجيز بفكرهم.. شباب بجسدهم..
أبو أحمد
أديتك ساقية المتيرة

صديق عبدالله علي أبوحنة كتب:أسود كتي
كرعيهو ستي

الكدنداية يا صديق لو بتعرف اسمها البلدى

والله ماشاء الله ياهندسه شايفك استقطبت كبار رجال المنتدي علما وادبا ومعرفه بالتراث والموروثات ..وقربت تقتل لينا منتدي القضيه والتي مازالت حتي هذه اللحظه هي الهاجس الاول لاغلب المناصير غيتو حرسناها اخونا ابو ضوه وشايفه نشيط جدا ..عاد النشيل قفتنا ونمشي نلقط من تمر الهبوب ونلقي حاجه نشارك بيها مع الناس ..المشكله ياصديق نحن اتربينا في القضارف و لحسن الحظ انه حبوبتنا لابونا كانت معانا عرفنا منها اشياء كثيره ومعظم الاجازات نقضيها في البلد....ياريت ياصديق الشباب يجمعوا كل هذا التراث بين دفتي كتاب

صديق عبدالله علي أبوحنة كتب:الرابان البي يعلقو فيهو القربي يا النفر..
صاح والله انا غلطان..
كراع في الريف وكراع في سابع اللطيف وكراع وقفوها ابت تقيف ؟

لم توفق فى الإجابة يا صديق ... نترك الفرصة للمتداخلين _

يسلمو علي الكليس وابو سما..
اها يا النفر ( الكدنداية) القالا ليك ابو سما دي رايك فيها شنو؟
.................
طبعا يا ابو سما أنا هنا ريس مركب للشباب ما ضروري أعرف الحاجات دي كلها، يعني أختى واصيب.. والشباب يجاوبوا
.............
مبروك شايف أميرة الحومري مع إنها بت خرطوم لكن كدة كدة قدرت جاوبت ليها واحدي؟ وهذا انجاز.

وشايف محمد بروي صحح المثل..
وقال ليهو تغرق في عينك
وهي كما قال محمد بروي
مريكبي تعدي شرق وغرب
وكان وقعت فيها قشيقشاي تنقلب..

أزرق مـَـسـَـنْ...... يغلب الخيل بلا رَسـَـن مين يعرفو ده شنو؟؟؟؟
الشرح: المَسَنْ : قبل ما تظهر حجارة الجلخ الكهربائية واليدوية. كانت تسن السكاكين في المناصير وامواس الحلاقة اليدوية على قطعة حجر معينة سوداء شديد تسمى ( الصـُـوَان) موجودة في اي بيت منصوري يحضرونها العرب من الخلا.. ويبيعونها يسنون عليها الناس سكاكينهم .
طيب ازرق مسن يغلب الخيل بلا رسن يطلع شنو؟ بعد الشرح ده!!!
.....................
لسه عندنا حجوة قصيرة من النفر ما اتجاوبت.

إجابة أبوسما صحيحة يا باشمهندس ... ومازلنا فى إنتظار إجابة الحجوة الثانيه _

عمتى من سناحتا وقباحتا سنونا فى صفحتا _

عمك الكيك من حصانك يدليك _

بعد التحيه أهلي : وابت نفسي الا المشاركه أزرق مسن دا يبقي لي الغراب ,,لكن هاكم ديل,,,عمتي سادي بيتها وتهرج ,,,أزرق كتاتي كرعيو تلاتي ,,,

الليلة شيخ أحمد ذاتو بي جاي والله ما شاء الله..
نعم دي من البوستات البريئة وما فيها شجار ولا عفار.. تريح الأعصاب وتشحذ الذاكرة
..........................
نعم يا أبو احمد هو الغراب..
...........
الغريبة نحن السودانيين عامة نقول ازرق ونعني بها اسود..
اول مرة نبهني على هذه الظاهرة استاذ في كلية الفنون الجميلة..
مرة قاعدين بعدين معنا استاذ فنون تخصص تلوين في كلية الفنون.
قامت جات سيرة واحد.
قال ليهو شكلو كيف!
قال ليهو أزرق كدة؟
ضحك استاذ التلوين وقال عليك الله يا هيثم في زول ازرق؟
وازرق طبعا هي سماوي
............
هنا جات ازرق مسن يغلب الخيل بلا رسن.ز
نعم وهو الغراب. في السباق يغلب الخيل حتى ولو نزع عن الخيل رسنها. والرسن هو قيد الدابة

أزرق كتاتي دي يا شيخ احمد خلو يجيك أبو سما.. اصلو مربياهو بت عاشة.. المرأة البالا طويل سلبة
..................
الشئ الملفت في هذه الأمثال انها منتشرة في المناصير من حدودا لى حدودا.حتى حبوبة علي الكليس شالتا ومشت القضارف مشت تحجيهم فيها هناك..
انا كنت مفتكر موش معروفة للمناصير كلهم وكل منطقة داخل المناصير لها مسمياتها.
لكن شعرت بأن الأمثال دي من إجابات الناس انها منتشرة انتشار النار في الهشيم
شوف الإجابات دي هسي دي جات من وين؟
من الطرف من نص القبيلة من الآخر..
حاجة عجيبة ناسنا الأوائل
يا ترى فيم الإختلافات بين شبابنا الجديد؟
سحرونا والله شنو؟

أنا كنت مفتكر الاحاجي القصيرة دي محلية موغلة في المحلية. يعني بتاعات ناس الحنانين والضقولة والنعوفاب.ناس شري ما بيعرفوها. وبتاعات ناس السليمانية ناس برتي ما بيعرفوها، وبتاعات ناس حوش فرنيب والزيناب.ز ناس المديمر ما بيعرفوها وكدة..
لكن لقيت العكس
هذا يدل على أن الإجتماعيات زمان بالرغم من صعوبة المواصلات كانت قوية شديد
حتى عهدنا القريب ده نحن بكا في برتي والله أم سفاية والله الشمخية كنا نمشي ليهو بالحمار. حتى عروسات في ساني والله العرفا والله أب سباع والله وديي أم عون والله الهريوب كنا نمشي نحضر البوش بوش العرب تعجبك وغالبا ما تكون بوشهم في الخريف..
انا ده بالحمارة مشيت برتي والعال والشمخية. ابوي الله يرحمو كان عندو حمارة معروفة مشاية ( بت ريح) شكلها زي الفرس وعاااالية زي الفرس لونها كبدي زي الحصان وطويلة حتى ضنبها سابل زي الحصان كانت معروفة في البلد . تشجع الزول على المشاوير. يعني ممكن تقوم بها بعد شراب الشاي من برتي تحصل الفطور في الحنانين.. وكنا مبيتين مرة في باشي في برتي.. وكان هنالك سبوع في الضقولة كنا عايزين نحضرو تاني يوم بالله شربنا الشاي في برتي حصلنا فطور السبوع في الضقولة..
هسي دي المواصلات سااااهلة شئ مراكب يامها وسزوكي وشي عربات. لكن تجد الإجتماعيات فترت
......................
هذا غرض من أغراض كثيرة نقصدها من نشر هذه الاحاجي القصيرة هنا..
دمتم

بعد التحيه أهلي : الكليس حبابك الف ياناصح اههههههههههههه والله ضحكتني شديد مالك سانحه ,,,,لك التحيه ايضا رمانة منتدانا عمنا صديق ,,انا يوسف وبعدين نحن ام احمد ما لامين فيها لكن ليك علي اول ما الم فيها وتقول كدي تبكر بي ولد اقوم مسميه احمد ...
ومن التحايا المزيد للنفر ..عندي الحل يا امتا الدومي ول التمره ....

أيوة أيوه يوسف. تسلم..
اسع عليك الله يا يوسف البنوت الكتااار ديل ما لقيت ليك عروس!
بس أول ما تلقاها. أول ولد سميهو أحمد..
وأنا لومك بي 10 يوم ضيافة دي من عندي من شهر العسل في اي فندق تختارو في العاصمة.

المبدع النفر سلام—

عمى الكيك من حمارك يدليك—هو ان تنزل من الحمار لقضاء الحاجة—

طيب عرفنا عمى طويل ومابلحق الكعكول ,وهو الدرب
–
طيب عمى طويل ومابحلق دقنتو دا شنو

عمتى من سناحتا وقباحتا سنونا فى صفحتا _ هى الدومة ... إجابتك صحيحة أخى يوسف ... تقبل تحياتى وودى ،،،

عمى الكيك من حمارك يدليك—هو ان تنزل من الحمار لقضاء الحاجة— إجابتك صحيحة يا الأرباب سلمان ...تقبل تحياتى وودى ،،،

كراع فى الريف وكراع فى سابع اللطيف وكراع وقفوها أبت تقيف ...مازلنا فى إنتظار الإجابة ؟

صديق عبدالله علي أبوحنة كتب:ابو أحمد..
عواجيز بفكرهم.. شباب بجسدهم..
أبو أحمد
أديتك ساقية المتيرة

لا يا ابوحنة ادينا ساقة البصرة

بعدين في امرأة عندها خمسه اولاد وبنت تعرفها لي

تقصد ساقة ولاد البصير يا ابو احمد
ناس علي محمد البصير وبابكر محمد البصير..وتاج السر
لا أنا اديتك ساقية ناس حرجولي..والله ساقية محومااد ود فرح احسن
بعدين يا أبو أحمد حكاية في مرة عندها ولدين وبت وتلاتة بنات وولد. ده كان زمان؟ هسي دي والله مرتك ما تعرفا عندها كم؟
زمان الولادي عزيزي
والله لو مات شافع ساكت زمان البلد دي من آخرها ولى أولا تعرف..
ولو مات زول كبير. الناس دي حتى مشاعرهم تتغير والبلد كلها تحزن.. والناس تتكسر في الفراش.. والحزن يعم البلد..
هسي دي والله أرخص حاجة في السودان صارت نفس الإنسان.. يموت بي جاي الزول وتلقى الناس تتونس وتضحك. بل يحفروا في القبر ويتونسوا ويضحكوا ويقطعوا..
الزول يموت ابوه في السودان تلقاهو يضحك ويقول نكت . شاهدنا ذلك بأعيننا..
بأمانة الناس في السودان الآن اتمسخت من المشاعر الجياشة تماما. زنقة الحياة.. غضب إلهي.. مسخ كامل من عدم المشاعر..
لا مبالاه بشكل عجيب
حياة اشبه بالموات
الناس شكل ارجوزات حايمة
مافي لذة حياة
مافي متعه
ده لو قلت ليهو فلاني عندها ست بنات وخمسة أولاد تعرفا منو دي؟
حا يقول ليك( إنت شايفني داية؟)
الناس زهجانة من اولادا
كان في زول بيشتريهم كان ادوه ليهم

عمتي من حفاها وجفاها قالبي الملي فوق قفاها

دي القراصة بتاعة الرماد يا علي الكليس موش قراصة الدوكة
القراصة الحقيقية صاحبة الإسم بتاعة الرضاف البي يدفنوها بالرماد ديك..
والله حلوة حلاة بالذات باللبن الحليب.. وتكون معمولة من الدخن..
هسي دي حريم الزمن ده في واحدي بي تقدر تعملا؟
والله إلا تجيب ليك مرة من ناس شيخ العرب ود حاج.. والله الهبارمة ناس محمد بشير هبرم

في واحدي بي إسم عمتى كدة.. كدة.. لكن ما بتتقال هنا! لكن اهلنا زمان كان عادي عندهم..

صاح ياهندسه ...عمتي من حفاها وجفاها قالبي الملي فوق قفاها ..هي القراصه المصنوعه علي الرضاف ومااحلاها

هاكم دي ياهندسه وبقية الاخوان
حي كر ميت ميت قام يعيط

علي الكليس كتب...حي كر ميت ميت قام يعيط.

ديل ناس اللجنة بتاعين قضية المناصير يا علي الكليس!

صديق عبدالله علي أبوحنة كتب:

علي الكليس كتب...حي كر ميت ميت قام يعيط.

ديل ناس اللجنة بتاعين قضية المناصير يا علي الكليس!

]color=red]

حلوه شديد ياهندسه والله ضحكتني جنس ضحك دي فكرت فيها كيف... والله احسن حاجه الواحد يكتل الهم بالفرح ويجي يتونس معاكم بي جاي ونحافظ علي بقية عميرنا دا من الضغط والسكري ...بس المشكله قليب الحاجي يعملوا ليهو شنوماهو راضي الحصل للبلد وموجوع شديد من الظلم الحاصل والوجع الاكثر ظلم ذوي القربي

[/color]

صديق عبدالله علي أبوحنة كتب:

علي الكليس كتب...حي كر ميت ميت قام يعيط.

ديل ناس اللجنة بتاعين قضية المناصير يا علي الكليس!

ما صاح طبعا ديل ما بيعيطو بيغمغمو بس

هاهاها سلمان
نعم..
نرجع لى موضوعنا..
علي الكليس قال: حي كر ميت ميت قام يعيط
الإجابة هي: الراديو.. يا علي الكليس
...............
المقصود التسليكي، والعرفاني، والتربوي من الإجابة الفاتت القبل الفوق دي..هو طبعاً كان مقصود بأن تجد النفوس بعض حظها القليل من الإجابة الفاتت.. بصورة من الصور ، في شكل هبشة صغيرة،تمسح على خواطر الناس بماء معادلة الكلام..
في إنو نحن قضيتنا معانا في جميع البوستات والمواضيع ، حتى لو تونسنا في مثل هذه الأمثال والأحاجي القصيرة..
عشان ما يقوم يجي واحد يقولك خلاص قضيتكم غلبتكم، جيتوا بي جاي تحجوا
...........
حتى لو تلاحظ في الردود مافي زول طرا زول بالإسم.. وما ينبغي لنا..
يعني بوستينا هذا.. تراث.. تراث.. واحاجي. لكن ملح الطعام ضروري مرات لحلو المذاق..تسمى ( الأضداد) في لغة الكتابة، يعني مثلا ممكن يكون هنالك بوست يتكلم عن ( استخراج السكر من البنجر) فجأة تكون هنالك فقرة وترويحة في البوست تتكلم عن استخراج الملح في بورتسودان. وقيل( تتمايز الاشياء بأضدادها)
وطبعاً التحية والتبجيل والإحترام والتقدير والإمتنان لاي منصوري ساهم من أجل إسعاد أهله، فكان مخطئ له أجر.. وكان صائب له أجران..
......................

كان ختوا سكن. كان شالوا رطن
لسه ما تأكدنا منها
زي ما قالوا هي الجنزير والله غيرها
.........................
نسمع

بعد التحيه أهلي : أول شئ نقبض الربطه الجات دي في زمن عزت فيه الربط بعداك نشوف حكاية الحجا ,,,,شكرا كتيييييييييييير عمنا صديق علي هذه المكرمه وإن شاء الله نعمه دائمه ,,,,نقوم ندلف ,,,لا لا ندلف شنو نجي لي الحجا ,,نعم الارباب سلمان ياهو ذاتو بي صفاتو الكانون ,واحدي بي واحدي يا ارباب دا يكون الجدول ....

تسلم حبيبنا يوسف. والله هذا من كرمكم يا زول
والله يا يوسف انا شايف الجدول دي صحيحة..

انتو دحين جبتو سيرت (الكادق)والخشة والله انا زمان حبوبتى الله يرحما من المكاب.تخش السمن وتسلاهو وتدينى الحشك والله (الحشك)ده بضم الحاء والشين حاجه عجيبة الما ضاقو نص عمرو ضائع..الحشك اكيد الباشمهندس صديق يكون ربوهو بيهو لانو البهائم ناس الحنانين والضقولة عندهم كميات كبيرة..

الدكتور سلمان عقيد برضو يحب الحشك لانو اهلنا النعوفاب يهتمون بالبهائم والضان عندهن راقد همطرش..وبعدين شررى دى مشهورة بزراعة القرع على الضفاف بعد نزول البحر وظهور (القاريق)اتمنى واكاد اجزم ان صديق يعرف هذه الحتة ويكون شرّك لام قيردونا فيها.أنا شخصيا أبكى تلك الضفاف بحرقة حتى هذه اللحظة..وكم مرة الدبسى إنشرمت منى فى الجباده وسدرت حزينا بعد ما اكلت شوية غمولى
..آآآآآآه يا زمن نحن وين والزمن الزين وين آآآآآآآآآآآآآآآآآآآآآه...

نبارك للمنتخب الوطنى فوزه المستحق على نظيره الزامبى بهدفين دون رد أحرزهما مهند الطاهر وسيف مساوى.فى المباراة التى جرت بين صقور الجديان والرصاصات النحاسية أمس باستاد الهلال والتى حضرها جمع غفيرمن السودانيين أكد خلالها صقور الجديان ونمور السودان علو كعبهم ومواصلة مشوارهم للذهاب للبرازيل 2014فى تصفيات كاس العالم باذن الواحد الاحد..أنا شايف الناس الجنبى فرحانين جدا عشان كده أديتها كوز ونزلتو على هذا البوست الظريف الشفيف الخفيف يشيل الهم والكدر بالناس الحلوين الموجودين فيهو.لكم جميعا الحب والتحية والتجلة

على الحمود جاب إضافات حلوة يا سلمان. بجيك يا قريبي. علي الحمود راجع بي رواقة ياخي وين القصيدة منصورية مكملة عايزنك تلحنا وتقولا..
يلا قول لينا حجوة قصيرة يا علي الحمود!

تسلم ياهندسة ونحن نقول لي أبوحميد الشجر الكبار فيه الصمغ وهذا التراث المنصوري الذي نخشى عليه من الضياع.

صديق عبدالله علي أبوحنة كتب:

علي الكليس كتب...حي كر ميت ميت قام يعيط.

ديل ناس اللجنة بتاعين قضية المناصير يا علي الكليس!

يا باشمهندس دي ما درسونا ليها في البوست ده, وكمان شايف النعوفابي لغاها من المقرر, كان عاوزين تدرسوها خلونا نشوف لينا مدرسة تاني من بدري وكمان لازم ترجع لي رسومي وتدفع لي تعويض عن الاضرار النفسية

ها هاها أبو احمد
راجل زكي..
ديك كانت ( تخريمة)..نبتة لسان طير قايمة جنب الملوخيي.. وملخناها.. خلاص. خليك مع الملوخيي و المقرر المدرسي الاساسي

[سلمان عقيد النعوفابى عفوا صديق –الكليس-ابوسما-
[لاتخرجوا من مضمون
البوست –نرجو الالتزام بمايكتب من ثقافة وتراث تهم المنطقة
[وياصديق بهذه الطريقة
سوف ينفرط العقد ونتوه ---ويقل الابداع--

الارباب كيفك ...مالك داير تدينا احساس انك زي الالفه الفي الفصل ..التخريمات هذه لابد منها وماذكره صديق هو نوع من المداعبه لااكثر ونحن فهمناه في هذا السياق والرجل بلطائفه هذه حبب الينا الدخول في هذا الجانب من التراث ....مزيد من الحريه والديقراطيه...ولن ينفرط العقد بل يحلو

كتب صديق ابوحنه
نرجع لى موضوعنا..
علي الكليس قال: حي كر ميت ميت قام يعيط
الإجابة هي: الراديو.. يا علي الكليس

ياهندسه الحاجات الحديثه دي مادخلت في حجانا ومعظم الحجي دا كان قبل الرادي والتلفزيون والناس بالليل مافي حاجه يقطعوا بيها الوقت الا الونسي في الحاجات دي ...وبعدين اظنك هبشت الزعيم في اجابتك مع انه الراجل زمان قال لي انا معاكم ويظهر الحاجات الصغيره الزي دي الما منظوره توري حاجه ....معليش سلمان لايسمعنا
ادني ساقي عشان احلها ليك

سلمان عقيد النعوفابى كتب:عفوا كبيرنا رأيا وخبرة على الكليس –فقط عن تجربة اعرف متى ينزلق البوست –وسعدت باستمرار هذا البوست
واخرج الناس دررا اقراها واتابعها بشغف –وهذا الاستمرار سببه ان الناس كانت تكتب
فى المضمون والمطلوب –وحتى مجرد التخريمة احيانا تجر الناس وتجر البوست وتبعده عن
هدفه –ليس الفا ولاغيرو فقط من فرط سعادتى اردت ان يستمر هذا الكلام الجميل –ومثل هؤلاء
المبدعين والحادبين على التراث ليسوا بحوجة لالفا ومن انا حتى اكون الفا---فقط
اريد يخرج اؤلئك النفر المزيد من الابداع –
--للجميع شكرى
واحترامى--

شكرا ياارباب ياكبير علي هذا التواضع وانت من انت في التراث بكل انواعه وفنونه واشكاله والله اننا نتلغف ماتكتب ونستمتع جدا بكل الحروف التي تنثرها دررا في هذا المنتدي الرائع بروعة مشرفه والاخوه المتداخلين.. والله بالرغم من الفتره القصيره التي عرفناك فيها الا اننا احببناك لخصال كثيره جميله تحملها بين جنبيك تدل علي الاصاله وحسن المنبت وسمو الاخلاق والترفع عن الصغائر وحب الخير للناس .. وانا هنا لااريد ان اقصم ظهرك ولكنها حقائق خاصه واننا ماتعودنا ان نمدح الرجال تملقا او تزلفا لغرض لكن ماكان لنا ان نغض الطرف عن خصال جميله اصبحت نادره في هذا الزمن
اما القضيه المشكله انها اصبحت واحده من هموننا التي لافكاك منها والله ياسلمان دخلت معانا حتي بيوتنا .. ادعو الله ان تحل حتي نرتاح من هذا الهم بس غض الطرف عن الحاجات الصغيره وسنعمل جاهدين ان يستمرهذا البوست في مهمته الاساسيه
وعشان مانطلع من الموضوع وري اخونا الصدوق حل الحجوه التي تقول حي كر ميت وميت قام يعيط ... وهي سبب هذه البلاوي

القامة علي الكليس قلت لى الأحاجي دي قبل الروادي.. هي ممكن تقول بدأت قبل الروادي ولكن استمرت بعد الروادي خاصة الرادي أب بطارية..
.......
بخصوص الحل كدي نخلي أولاد العجايز يدخلوا.. كان ما حلوه.. بعدين بديك ساقية الفقرة في كبنة.. ياخي زمان نجي بالمركب مع الوالد المراكب البي تجر الكاب.. وبرضو لما جاء اللنشي..
ياخي في جدول ساقي مابين الحقني والبرجوب والعجولة.. موصل بطريقة يكاد يعجز عنها خيال الإنسان.. تمر مقرقر من جوة معمول في شكل مواسير قبل الناس يعرفوا المواسير يمرر موية الساقي عشان يسقى منطقة بار تحت التمر في الحقني. ياخي قريب واحد كيلو معمول كدة ومثبت على مكان حدر وإنت ماشي من البحر تشوفو..
تاني حاجة يا علي الكليس.. برضو من البحر وأنت ماشي.. جهة الكاب.. في أول قرية ( السادي ) هنالك جبل كبييير عالي على سن القيف مع البحر.. هذا الجبل ربطوا عليهو ساقي.. بعلو شاهق جداً.. وفيها ( ألس ) يعني ممكن يكون أطول ألس شفتو في حياتي..
من هذا المكان بالذات تستطيع أن تروي الواطة بي فوق.. وغيره لاحياة لمن تنادي.. وفوق العلو الشاهق ده. تربط الساقية والتكل ويسوق الزول البقر عشان تطلع الموية.. تخيل لو وقع زول من فوق والله طفل يسوق فوق التكل.. والله يتفرتك حتة حتة. يعني طول هذه الساقية ممكن تقول حوالي ستة طوابق بناية بي ستة طوابق.. وكلو طرور مرصوص ومثبت بي حبال.. لا مسمار ولا صامولة.. ويقول ليك ( الراعي واعي).. بي هناك الحلفاويين طبعا لما رحلوهم خشم القربة.. ذهلوا لذلك المناخ الجديد الممطر.. يعني خافوا .. خاصة أنهم رحلوا من مناخ صحراوي وشبه صحراوي.. يعني المطر بهدلتهم بهدلة وخوفتهم تخويف.. وهم طبعا الناس بيضعوا النكات عليهم في رقة الدين أو عدم المعرفة بأحكام الدين.. يعني زي ما السودانيين يجيبوا نكات بتاعة سرعة بديهة ويلزقوها فوق الرباطاب.. أو يجيبوا نكات بتاعة عوارة وحماقة ويلزقوها فوق الجعليين.. خشم القربة فيهو كان في الستينات مناخ ممطرورعد ذو صوت غريب وفركعة رعدة غريب. زي القنابل العنقودية كدة.. الحلفاوي خامش وليداتو عليهو ولاميهم وكل ما يسمع صوت رعدة..( هاسب يا شيه) حاسب يا شيخ.. ( هاسب يا شيه.. تحتك أطفال ) هو طبعا ما عندو تصور للذات الألهية جعلت وعلت .. يستمد معرفته بالاشياء المجسدة من صنع البشر.. أها بعد الرعدة دي أتاريهو الحلفاوي ده.. قبيل المربع بتاعهم في قرى التهجير كان مبني في حلق وادي قديم.. ويقول ليك المثل عند عرب المناصير( السيل يعرف مجراه) يعني حتى كان مجري سيل قديم لو بعد مية سنة. وتغير المناخ ولو لسنة واحدة ممكن يرجع تاني السيل لنفس المجرى..
أها بعد شوية جاء السيل وشال البيوت الفي المربوع والحلفاوي خمش وليداتو وطلع فوق راس حجر وظل يكرر بدهشة.( ياهي نقول لك هاسب يا شيه ... هاسب يا شيه! ما سمعتا... ( اهو العملية اللي إنت عملتو ده؟ تـِـفـِلْ ما يعملو!!)طفل ما يعملو! شايف ديل كمان مساكين يا علي التهجير واختلاف البيئة عمل فيهم ايه!!
ناسنا زمان كان يطالبوا بأن يرحلوهم الرهد..!! موش حقو نحمد الله ..
عشان تراثنا ما يتغير وأحاجينا القصيرة ما تتغير..
هو المنصوري شبكتو بتاع الرصاص ( قضيتو حاره) شبكتو بتاع الرصاص دي شايلا معاه، محل ما يلقى محل يكشحا.. .. عشان كدة نحن قضيتنا حااارة في جوفنا.
كان جينا لقسم الاحاجي أو مررنا على جميع اقسام المنتدى قضيتنا حااارة بي بوخا وما اجترار هذه الأحاجي إلا جزو من حرارة القضية..
يتذكر فيها الناس الزمن الجميل.. ورياض اطفال مفتوحة بلا ثمن. يتعلم من الأطفال والناشئة شحذ الفكر وتحريك العقل. وبداية الحساب والعد والإعتماد على النفس وحلاوة وتحبيب الدروس في شكل احاجي ..
والزعيم سلمان يا علي الكليس هو زول محب للتراث من الطراز الأول..
هو بس مجرد خوف من ان البوست قد ينزلق عن التراث لتجارب ماثلة..
مجرد خوف..
قالوا الحق عز وجل وعلا لمان عايز يخلق بشر. ويجعلوا خليفه. تحدث مع ملائكته.. والملائكة المكرمين كان عندهم تجارب مع فصايل سابقة دمويين وما بيستاهلو يكونوا خلائف الارض.. بعدين الملائكة المكرمين كانوا عايزين يطلبوا هذه القيمة لأنفسهم قيمة خلافة الارض.. وهم ناقشوا الحق جل وعلا من تجارب سابقة مماثلة إنو جنى ود اب نادم ده؟ ( اكلو ناشف لاتبلو) زي ما قال الزعيم سلمان في بوست حيوانات تتكلم....
يعني سلمان منطلق من تجارب سابقة انزلقت فيها بعض البوستات . موش بوستينا ده!
ويحكي القرآن الكريم حكاية محاورة الملائكة دي عن التجارب السابقة المنزلقة مع رب العزة جل وعلا .. يحكيها في هذا الايات الكريمات..أجمل حكاية (وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً ۖ قَالُوا أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ ۖ قَالَ إِنِّي أَعْلَمُ مَا لَا تَعْلَمُونَ ) نحن دائما نتحسس سلاحنا معانا كما يفعل الجندي الغيور على تراب وطنه، ونحن في جميع المناشط والمكاره..
...............
كان ماجاء زول حلا المثل يا استاذ علي الكليس يبقا نديك
ساقية الفقرة في كبنة الفقرة
أو نديك ساقية السادي.. العاااالية غالية ترفرف فوق السارية...........

هههههههههههههه
والله سوالو حمارين يا سلمان...
هل يا سلمان الزول إذا حاول يطبق الأحاجي دي في بيتو هسي دي. ممكنة؟؟
يعني اطفالك في الحاج يوسف.. مرة مرة تديهم هبشة صغيرة في التراث كدة.
إنت شوف حبوبة ناس علي الكليس راحت القضارف وبرضو مصرة تعرفهم تراث بلدهم.
ياخي يا علي الكليس زمان القضارف دي عشان الزراعة كانت جاذبة لناس الشمال. عشان عقليتهم تجارية..
أنا احب القضارف جدا.. وكنت قاعد ازورا كتير.. وفيها مناصير طبعا
جنبكم برضو في ود الحوري زول من كبنة وقريبنا. احمد الدقير محمد احمد حجازي. كان تاجر هناك.. ابوهم بعد ماتت امهم مرة كبنة تزوج عمتنا خلييفة بت حومااد تومي. وسكن بها حلة كوينة. حتى هسي دي اولادها ناس فكي الدقير عندهم حقيق هناك في حتة قريبي من كبنة وقريبة برضو للحيبة تمسى ( دار خيرين)
برضو في القضارف عندي صاحبي مهندس كبير هسي دي في ابوظبي.. هم شوايقة وتجار عيش وعندهم كمية كبييييرة من الحواشات وهم ختمية وشايقية
يقولوا ليهم. ابوبكر بشير الخليفة ابوه عندو دكان في سوق القضارف.. عندو ولدو صغير كان مسميهو نميري. مرة قلت ليهو يا خليفة الخلفاء.انا عارفك بتكره نميري. ولدك ده سميتو نميري لي شنو؟
قال لى عشان اناديهو أقول ليهو تعال هنا يا نميري يا كلب.. وزول يقدر يسألني مافي.. لأنو ولدي...
برضو بعرف شيوخ القضارف. محمد الفضل محمد طاهر بكر.. الرشيد الطاهر عمو.. طوالي.. ديم بكر كلو حقهم عشان هم عمد القضارف.. برضو بعرف اب القاسم الياس نائب مدير ماليه القضارف. كانت ساحرة لاتقاوم القضارف في السبعينات والثمانينات. خضرة وجمال وقيزان. طبيعة ساحرة..