أين حواء المنصورية ؟

حواء المنصورية كتبنا عنها كثيرا في هذا المنتدى وأفرد لها الأخ خالد قسما خاصا سمي باسم منتدى المرأة وعين له مشرفا قديرا أختنا انتصار وبدأ النشاط منهن وأتحفن المنتدى بالكثير ولكن في هذه الأيام أرى الهمة فترت والأقلام احتجبت والصحف جفت ولكن الأقلام لم ترفع نهائيا فلماذا هذا الغياب والفتور من حواء المنصورية.

نعذر منهن من في بلاد الخليج ربما لقرب موعد الامتحانات ولكن ما بال من منهن بالسودان خوفي يكن متجهات نحو كاودا وعاوزين نرى كتاباتهن تزين المنتدى ... أين نجلاء وهناء ومنظمة الشلال الرابع ... ومن المغتربات أين المشرف وأين بنت الحومري ... وغيرهن نسأل الله أن يكون المانع خيرا.

أضم صوتي إلى صوت الدكتور الراقي مصباح

وأقول .. أين حواء المنتدى ؟؟

المنتدى من غيرهن يكتنفه ـ بوار ـ ونشاف ـ غريب

والدليل على الغياب عدم الرد وشايف ياود المناصير لازم نشمر وندخل الخص ( الخس ) وكمان يدينا يتملن عجين وياحليل أيام الأيادي الناعمة تمتلئ بعجين دقيق القمح الأصلى وتحسبة لما ينشف زي الأسمنت وحليل زمن دخاخين الخص ورائحة البعر والشعال مع رائحة السخينة والله خلاص الأكل أصبح من المطاعم.

ده نحولها لي قاموس ابحنة

هييي عايزات تعلقن كسلكن فوق قاموس أب حنة!
أكتبن اكتبن. ولازم كتابات عن الإجازة زي ما انا كتبتا..

فعلا سوف يؤثر علينا سفر الأميرات والمنتدى زي ما قال الريس نشمر وندخل الخس وأصله في السودان كترن الحبشيات ومن طرف البلد تجد واحدة لا يتعدى إجارها الشهري 300 جنيه وربنا يستر من ديل الحبشيات . وإن شاء الله يعود الجميع بخير بعد التمتع بالإجازة وشكلنا السنة ده عاولين وسوف نحرس العرين زإلى عودتكم منتظرين.

هي كلمة (كتر) نحولها للقاموس.

]دي يا دابا بي تتحول يا استاذة اميرة علي..دي تمام

لك التحيه دكتور مصباح

ونشكرك كتير على السؤال عن حواء المنصورية

والتحية لكل المرور الذين سألوا عن حواء المنصورية

ونتمنى ان تعود حواء المنصورية وتنور المنتدى بوجودها

حواء المنصورية الحديثة بالمناسبة خطرة جداً وموقدي نار ما بتغفر اقل غلطة..
منصوري موقد نار
ومنصورية موقدي نار
دي تبقى جهنم عديييل كدة!

لك التحية بنت أبي سباع يدي أكلتني كم مرات عشان اتصل واطمأن على صحتكم والدكتور والعيال وقلت ربما الاختبارات والتسوق ألف حمدا للسلامة على العودة وأظنه قريب سوف ترد إلينا بلاغات بنات حواء بالغياب لظروف السفر وحتى الآن ثلاث مغتربات الاميرتان وانتصار ولا تخافي العقاب هنا وهناك محروس والعذوبية قادرين عليها.

أين حواء المنصورية!!!؟؟؟
إنشقت الأرض وبلعتا؟؟؟!!!

والله فقد كبير –لاركان قوية فى المنتدى –ولكن مشاغل
كتيرة قد تمنع الناس من التواصل الدايم والنشاط—الصدوق قال –(انشقت الارض وبلعتا
)وانا قلت فوقا:




انشقت الارض
وبلعتا


وين حواء المنصورية
ووين طلتا


ادارة المنتدى عدمت
حيلتا


وللصدوق رفعت شكوتا


ولى مصباح الجاب
سيرتا


والمطابخ الناس ساطتا


والتلاجات تب فضتا


ويا كريم عجل عودتا



:

شكرا ابننا سلمان وحواء الله يعينها هذه الأيام مشغوليات السفر والاختبارات في بلاد المهجر وغلاء أسعار حطم حيويتها في السودان وهي التي دائما تشيل هم البيت لك التحية حواء وإن شاء الله تعودين أقوى.

تشكر دكتور مصباح لسؤالك عن حواء المنصوريه
وقد كنت خارج البلاد والحمد الله وصلنا بخير وانشاء الله نقدم الجديد المفيد

الشكر لكل المتاخلين وحمدا لله على السلامة نجلاء وفي الصيف دائما تنشغل حواء المنصورية والتي نشفق عليها من الحمول عليها وكمان شايف المغتربات أكثر شغلا إجازات وتجهيزات وهاعندهن شغلات حتى الحبشيان هنا غاليات وربنا يعين البنيات.

نعم .....اين حواء المنصوريه...كما تسال الدكتور مصباح
اتسال انا


لعل منعهن خير اري احجامهن عن المنتدي في الفتره السابقه
والحمدالله اليوم ظهرت بت الحومري
يا جماعه مالكن خليتني اخوجل براي....اصلو الخال ابو احمد كان عندو راي في خوجيلنا !!!!

لالالا يا نجلاء
الخال أبو احمد ده زول فاهم أنا بعرفو من زمان..
أنت موش الاولاد قالوا لكي اخير ليك تمشي على منتدى المناصير سمح وزين.. ومضمون مالا الفيس بوك.. اسمعي نصيحة اولاد الزمن ده.

حواء انشغلت بالاجازات وكمان جاي رمضان والله يعننا وربنا لا يحرمنا من طلاتها. وأظن الفيس بوك سيكون خطيرا على المنتدى وربنا يستر.

الدكتور مصباح والمهندس صديق
سلام من الله عليكم


من الشايفاهو ده باقي لي حانبقي برانا في المنتدي...حتي حواء المنصوريه تمثل حضورا ميه في الميه في الفيس
كدي يا اخواني واخواتي نعيد حساباتنا في منتدانا ونبحث عن الاشياء التي جعلته طاردا ولابد من ان نجعله جاذبا لانه سبب في تقويه علاقاتنا وازددنا معرفه باهلنا وبلدنا وتراثنا وعاداتنا وتقاليدنا
من وجه نظري هنالك بعض الاشياء لابد من ان نقف عندها ونعدلها....اتفقنا ام اختلفنا في النهايه نحن ابناء عمومه واهل وكما قال اخونا عباس الحكومه نجحت في تفريقنا فلابد من ان نتحد ونتعاون لكي ترسو سفينتا الي بر الامان
اخوتي واخواتي
فالنعفو ونصفح وليكن ديدنا المسامح كريم اي لا نزعل من بعضنا نتيجه لسوء فهم او خطا غير مقصود
وان لا نجعل قضيتنا تعشعش فوق رؤوسنا وتكون سبب لتفرقه بل يجب ان تجمعنا القضيه لان القوه في الوحده
وان لانتقد بعضنا البعض في اي صغيره وكبيره فاختلاف الراي لا يفسد لود قضيه
فاذا اجتهد بعضنا ولم ينجح فالنشكره علي اجتهاده ونبحث عن وسيله اخري للنجاح
ولا تكن البوستات اغلبها مناقره ومهاتره....زي ما قالو نا س الفيس.....بل يجب ان يكون المنتدي مرجع للكل لان به عباقره وشعراء وكتاب فاليستفد منه ابناءنا


معذره قد اطلت عليكم
فاذا وفقت فمن الله واذا اخطأت فمن الشيطان

آه الموية مبعوجة بيغادي ونحن ما جايبين خبر والمنتدى إن شاء الله سيظل صامدا وعامر بأهله إن شاء سيظل وسيظل لأهلنا المناصير.

سبحان الله
مر عام على هذا البوست
ما اسرع مرور الايام
وما اشبة الليلة بالبارحه
نتمنى ان تمر السنين بنا وباعمارنا ونحن فى طاعة الله والى الله اقرب


ارجع لموضوع البوست
اتمنى عودة كل حوائيات بلادى ممن تركن المنتدى
وابتعدن عنه

ادرى ان منتدانا ملئ بالمشاكل والمشاحنات
ولكن بالتاكيد هنالك واحات ظليلة وستزداد ظلا بعودة الحوائيات

فكثرة وجود الاخوات لة ميزة مهمة لان المراة بطبعها تبعد عن المواضيع والنقاشات الحادة
فبوجودها بكثرة ستكثر الواحات الظليلة

فعودي يا حواااااااااااء

عودي يا تماضر وانت تمثلين نموذج مشرف لفتيات بلادي
عودى يا اميرات بلادى بنت الحومرى وبنت على
عودي يا زووبا فبغيابك افتقدنا قلم نسائي قوي
عودي يا الشلال الرابع وانت بوجودك بيننا تتحسسين اماكن الخير فينا

اتمنى عودة كل الحوائيات

جيناكم ما لقيناكم جيتونا ما لقيتونا كدى اها النعملى استفهمات ونقط زى ابو مصطفى واليومين ديل راح وين والاخت نجلاء اليله ماظهرت ؟؟؟؟؟؟؟
ماتقولى اتعقبنا)ا اا)

عدنا ولامعنى لحضورنا بغياااااااااااااااااب الساس فاين انتم؟؟

حواء تغيب وتجي ولكل إنسان ظروفة لكن طلتها تنور المنتدى.

حمدنا الله على عودتكم اختى تماضر واختى هناء وكلى شوق لرؤيه حواء المنصوريه فى رحله الباسقات

أخيرا وافقت سهام على الحضور وإن شاء الله حواء تزين هذا اللقاء ودائما حواء أقوى من الرجل في رتق النسيج الاجتماعي والتواصل والزيارات والراجل دائما مشغول. فيها سفريات وكفاح وغربة والبحث عن الذهب فأهلا بحواء وهي كالشبكة العنكبوتية تربط بين عيال منصور. تحية لكل منصورية مكابره مجاهده ومربية.

شكرا مصباح انا اكان لقيتن فى كان مشيت خوجلت فى جرف بروى بس خليك مراقب عشان ما البسلى جلابيه وارجع الديوان بس تانى نقعد فى الخس ونعسولكم السناسن بالجبركوله وبطريقه البلد

مروركم أسعدني وياحليل الجبركولة يا سهام  وهل في هذا الزمن من يجيد عمل الجبركولة والتي كنا نشم رائحتها من بعد أمثار ولو عرفت من يجيدها لقطعت الأميال والبحار والفيافي لأكل تلك الجبركولة بسناسن عيش البلد أما الآن الرجلة وما أدراك ما الرجلة لا طعم ولا رائحة حتى عندما تطبخ يرمى نصفها في الزبالة لا أحد يهوب ناحيتها.
شنو يابنت الحومري عرفناك موجودة ويكفي البوست الذي كتبتيه عن رمضان.

اه يا مصباح بقالك الحريم ديل مشن يين يبقى مشن يحشن عشاء الغنم اه شفتا الحال دا والامشلهم باشى  غايتو اكان مشلهم بكى وما كلمنى خشمى دا تانى ما بفتحو معاهن وخليك شاهد

سلام د. مصباح قلنا نسجل حضور القحه ولا صمه الخشم
وعليكم الله الجبركوله شنو .....؟!
تخريمه ....
انا بكتب ويدى فى قلبى يكون ما عندى خطاء املائى

يا اميره المناصير اذكياء يفهموها وهى طايره خليك من الاملاء انا لقيت ناس كتيرين خايفين من حتى زى دى 
طبعا انا عارفاك بتهظرى لانو كتابتك ماشاء الله عليها لكن فى كتير من الناس علقو على حتى زى دى العبره فى توصيل الافكار والتصحيح بطريقه دكتور مصباح لانها غير محرجه ويجب تشجيع الناس فى دخول المنتدى
وما تتطولى الغيبه تعالى قحقحى وامشى اخير من تنقطعى مننا وليكى التحيه من على البعد

المرور أميرة وسهام وبقية عقد حواء الأخطاء الإملائية غضين الطرف عنها لأنه الزي سهام ده حرام نقول ليها عندك غلط والتعبير بأي لغة أو عبارة يكفينا وأحيانا الكسرة قاعد تنشكلك واللبن يقطع والشاي يخرت ولكن كلها مقبولة بملاح جبركولة.

الله يديك العافيه دكتور مصباح وشكرا تذكره المرور بتاعت الاخطاء الاملائيه والسمع يحدث الما سمع .
انا ما زيهم انا اكتب وسارحى ضانى خايفه ينزل جرف بروى يقوم يفلعنى
وعند المغيرب اقوم احلب عنزى
وبالواقود عست فطيرى
وبالجركانه مليتو زيرى
وبعد دا كلو بدخل المنتدى اكتر منهن ....شكرا دكتور مصباح على التزكره
تخريمه :اميره انا عازماك جبركوله بى سناسن

يابت يا سهام انتى عضو نشيط   وبعدين انتى سرحانه وين وكت جرف ود بروى كان طين  نحنا  قاعدين هنا من زمن البحر دميرى


خخخخخخخ

اها لقتينى كيف خلى سناسن وما سناسن ورينى الجبركوله شنو احسن ليك

مبارك وألف مبارك لحواء المنصورية مثاني بنت فائزة الدرويش وأبدا حواء المنصورية لم تخيب ظني وثقتي فيها قوية وإن شاء الله تكون رئيسة الجمهورية. ومبارك الطلة يا إقبال ومزيدا من المشاركات ننتظرها من حواء المنصورية.

اليوم حواء في غايه الفرح...
الاولي علي ولايه نهر النيل...
التحيه لكل بنات بلدي المنصوريات في كل ارجاء المعموريه.....
التحيه لهن وهن يقدمن الغالي والنفيس من اجل رفعه البلد...فحواء يقع عليها عبء كبير ومسؤليه اكبر