أين حواء المنصورية ؟

غابت حواء المنصورية عن المنتدى !!! ماهي الأسباب ؟
1- نقول يمكن تكون المشغولية لكن ما معقول للدرجة هذه .
2- نقول يمكن هابت أو أهيبت من المنتدى لا و ألف لا.
3- نقول يمكن جرفها سيل الفيس بوك والتويتر وغيره فهذا الفيس أنا شخصيا لا أحبذه .
4- نقول أبو العيال منعها لا وألف لا !!
5- نقول المنتدى أصبح غير مقنع لها وبموضوعاته .
6 - نقول يمكن عاوزة تنسلخ من منصوريتها.
7- السبب على ما أظن موضوعات المنتدى وتعليقاته.
8 - يمكن السبب الخلافات الدائرة بين أعضاء المنتدى واختفاء بعضهم.
9 - ده حرداب عديل والبقاء حرداب إن شاء الله حرداب الجقر.
10 - المشغولية بالأولاد والاختبارات والإجازات والنزهات وغيرها من الآفات.
11- هي مشغولية هذا العصر شغل بلا شغل الناس مشغولة والزمن جاري والناس جاري والكرده ما لحقها والعايرة أديها سوط .....

حرداب

إن شاء يا هندسة يكون موه حرداب الجقر أين الحماس الكان موجود عند بنات حواء وكل شئ يا هندسة بدون المرأة لا يكون لها طعم ولا تخرج كما يراد لها وشوف البيت لما تغيب منه ربته ماذا يحدث نحن هنا في العمل جرت عادتنا أن نسأل الشخص أو الأخ عندما نراه شارد الزهن أو بالو مشغول يازول مالك ( إما السيارة خربانة ، أو المرأة عيانة ، أو الثلاجة عطلانة ) فالمرأة وجودها مهم فعشان كده أملنا كبير في عودة حواء.

الله يخليك ويديك العافيه يا خال ، ماهي حواء وحدها الغائبه من المنتدى ونشاطاته شوف حتى آدم بقى يتعزز شوف في أي وقت شاهد كم شخص موجود في المنتدى حتى على مدار الأربعه وعشرين ساعه تجدهم قلائل ، لكن نعم غياب حواء مؤثر وواضح أرجو أن يكون المانع خير ، بارك الله فيك يادكتور في تفقدك الناس .

عبد الحفيظ قال:أرجو أن يكون المانع خير

وأنا أقول
ليك أسبوعين ما جيت.. مالك يا زول خليت.. إن شاء الله المانع خير
شان عارف الناس رايدنك.. فوق الأشواق راجنك.. واليوم يبقالنا كتير

حواء المنصورية هي الكل في الكل زي ما قال مصباح.. الراجل مسلم ليها في كل حاجة زمان في المناصير.. بالرغم من أمية الرجل المنصوري في المناصير.. لكن كلمتها فوق.. هي ماسكة الميز.. الراجل يروح الزراعة ما عارف فطورو شنو؟ هي تدبرو.. هي تقود عملية الهبر.. هي تقود عملية حش قش الجروف.. هي الطبيب للأولاد والبنات.. حتى ظننا أن أمهاتنا أنصاف آلهة.. كلمتها مسموعة.. محترمة مقدرة.. عندها سطوة روحية.. الباشي تخدمها كلها من قطيع البصل لغاية مروق الصواني برة جاهزة..تنوم آخر الناس.. تقوم أول الناس.. هي مشرفة تماما على تربية الأغنام.. دوعيل الخرفان.. تقوم بمهمة الأسرة كلها من صرف وأكل والرجل يكون غائب سنة في الطين في الصعيد.. حاشا ما قالوا زلت والله غلطت..حواء المنصورية تختلف عن أي حواء في العالم وليس السودان فقط

الناس يا ابن الأخت اتجهوا نحو الفيس والفيس خطير جدا وفيه اختراق يوميا وآمل أن يعمل الناس حسابهم كثير واحذر من الاختراقات. وكلامك صاح حتى آدم تكاسل عن المنتدى والشباب قالوا المنتدى حق العجائز الزي وزيك ولكن أملنا أن تعود الطيور لأوكارها بطانا.
يا أخوي صديق الحريم باين عليهن أثرت فيهن العولمة ونحن لسنا بطمعانين في الكثير المهم الدارة ما تكون فاضية حتى ينصرف الصفاقين.

الخال مصباح والهندسه الصدوق لكما عاطر التحايا وأزكاها ، عارف يا صديق القلتو في حواء المنصوريه ما عاد موجود الآن ولا أظن في البلد المناصير ، لأنه كان مثله تماماً موجود عند حواء المنصوريه في القاش لأن الصوره هناك (كوبي آند بيست)للوضع في البلد لكن وين الآن ... القيم والأخلاق والموروثات الجميله مازالت موجوده لكن إيقاع الحياه وتغيير نمطه أحدث تحول جذري في الأسلوب ما جعلنا نبكي على الماضي والأطلال . الخال مصباح يقصد غياب الأخوات والبنات المنصوريات من المنتدى ومنذ زمن ليس بالقصير لم نشاهد مشاركات إلا لمم وقليل جداً إذا قورن بعددهن من عضوات ، نسأل الله لهن العوده وينورن دارهن بعذب حديثهن ، بارك الله فيكم .

من بعد السلاااااااااااااااااااااام...
لك التحيه ايها القامه ...جزييييييل الشكر ..
وانا غايتو جيييييت والغياب عن المنتدي برضو بفقد باقي المواقع طعم ..ربنا يجمع بي باقي الاعضاء من الطرفين (حواء وادم)

تسلم بنتنا تماضر.. أصلك أنت من بناتنا الحيات.. الفاهمات الزكيات والذكيات .. ربنا يزيدك من نعم الدين ونعم الدنيا..
نعم زي ما قلت أنت المواقع التانية ما فيها طعم
 نحن نخلى الناس تمشى تجرب وتجينا تاني أكيد بي فهم إنو موقعنا دا أحسن موقع لأنو نحن هنا أهل
 الحاجة التانية هسع الكلد لما يقبض في الجبادة! لو قاصرتو وضيقتها عليها وجريتو بي خيت الجبادة شديد في الحجرة ينشرم منك طوالي.. وتكون فقدت سمكة مهمة وفقدت ملوح غداك
 الكلد طريقة سينيقو بالجبادة عايز معرفة خاصة
 لما يبدا يبطبط معاك وهو قابض في الجبادة! ترخي ليهو تب خيت الجبادة  لامن يظن إنو هو متحرر من الجبادة.ز وتسانقو بي شويشي على الحجرة شوية شوية.. وتاني ترخي ليهو.. لامن يفتر تب.. بعدين تجرو على الحجرة كدا تقدر تطلعو وما ينشرم منك..
أها نحن هسي دي نرخي الحبل لامن الزول يجرب ويجينا صاد..

لك التحية ود الأخت والسلام للأهل جميعا نقول بيتنا المنصوري ضله بارد وجنوبه داقة وجبنته عاكلة وما عاوزين نكتر بيوت العذابة.
الابنة تماضر لك التحية ونتمنى أن نراكم قريبا في أرض الحرمين بعد وصول الدكتور محمد وكتاباتكم ومساهماتكم مهة في المنتدى.
المهندس صديق الحريمات ديل بيحردوا ويجونة تاني صاديين وكما قلت بقية المنتديات أمرها متفرق ومعظمها أخبار وتلفيق ولوك لما لا يلاك.
الإجازة في الخليج قربت ونتوقع ظهور المغتربات بقوة حرارة الصيف هذا العام.

السلام عليكم 
ويسال منكم الخير

وان شاء الله بينكم وتانى مافى غياب
سبب الانقطاع مشغوليات العمل
والان الحمد لله ننعم بالاجازة

امنياتى ان تعود للمنتدى بقية حوائيات منتدانا