المناصير ... صمود وثبات في وجه الظلم والمعاناة

نواصل :
ولا دانقه لاقاطوع لا جَكُب كلو راح فى بحر السيول
وانعكس مجراه من الجنوب داهم الأشجار والحقول
وأم لقاديب جاها كاسر طلع الجبل وحوش العَمول
وانحدر تيارو عكسى بالفراسيب ميسو عبضول
لارحم ناسا غــلابه ولا مريضا يشكى معلول
ولا عجوز صاحب عنقريب ولا صبيا عضلو مفتول
حتى صار الجار القريب ليهو أصبح صعب الوصول
وانعدم كل مظهر حياة ، والبلد عماها المحول
وأصبح الكل بى يعانى عيشتو صعبه وفكرو مشلول
والهموم زادت على الناس وكل زول عن زاتو معزول
رب أرحم شيخا كبير إيدو ترعش وجسمو منحول
فى مكان دار بيتو خايض ماشى جايى حايم يجول
أحفظه واستره يارب لايجن لا يبقى مهبول
وأم وحيدى تسل فى الجريد من ركام بييتا قبل يزول
تحاول التقدر عليهو جارى توبا وراها مبلول
قايمى وحيدا وتصارع أصلو كل زول بالو مشغول
ده الحصل فى الحسبه إجرام وانتهاك مين عنو مسئول؟
يتبع بإذن الله..

تشكر أخى ود المناصيــــر
نواصل ما انقطع من القصيدة
الحصل فى الحسبه إجرام وإنتهاك مين عنو مسئول؟
ده الحرام والله يا ناس فى الشرع والدين مى مقبـــول
كيف تجبروا المابى الفراق وللوطن مشدود ومغلول
لا متين هذى المآسى خوفى لسنوات قد تطـــــــــول
بقينا لاجئين فى بلادنا ، هله هله مصيرنا يبدو مجهول
أصلو كان النيه صافية ، ياحكومة الحكم الشمــــول
قفلة الخزان ما بتجوز ، قبل ما تشوفوا لنا الحلول
وكان قبل واقعة الغراق ، تعملوا الواجب ومعقــــول
تبنوا لينا بديل محلى ، نأوى ليهو وماتخلوا زول
حينها يرضى الناس عنكم ، ويكون ستار الظلم مسدول
والبقية تأتى لاحقا بإذن الله ...

فى أبيات ناقصة ما أكملتها لأنو أذان الجمهة أذن ، وهى :ــ
وفى المناضلين مااستكانوا وماهمهم تهديد مهدد ولا نضم مسموم ومعسول
نتمنى ربنا يصلح الحـــال ، ويصمــد الناس زى أبو الهـــــــول
ويتلم عيـــال منصور من جديــــد ، ويمشوا سالكين درب الوصول
إنتهى ،،،،