صابونة هنود

موضوع شيق ياباشمهندس وحكاية الصابونه دي براها والهنود حريصين من افلامهم تحس انو عندهم حاجات كدا لو طبقناها نحن السودانيين كان حال البلد اتغير نحن حقيقه ماعندنا ثقافة التوفير لو الواحد دخله عشرين مليون في الشهر لازم ينتهي منها وينتظر الشهر الجايي نظيف

حكاية الراتب ده يا عازة..
دكتور مصباح ماسك في حكمة حاج الحسن على عون الله( المسكة اولانية) ( السيف مسكتو اولانية)

صديق سلام
والله العنوان جاذب وانا افتكرت الصابونه من النوع التاني وبالذات عندما وجدت تعليق عازه قلت بنات حواء ديل ما يشوفين ليهم صابونه الا يجرن عليها!!!!!

علي العموم موضوع جميل عن ثقافه بلد اجمل.

الهنود يحسبوها بي ربع الدرهم.. والسودانين يحسبوها هنا بالالف درهم وريال..
الهنود عندهم أكله في مطاعمهم هنا بي نص درهم.. وكباية شاي بي نص درهم..
درهم واحد يكون فطر وقام..
واقل اكله هنا في مطاعم السودانين عشرة دراهم وجبة فول بس..
و15 درهم للغداء فاصولية أو طبيخ.. والدرهم الآن يعادل ألف جنيه سوداني بالقديم.. والريال قريب من ذلك..
الهندي راتبو 500 درهم في الشهر
واقل سوداني هنا راتبو2000 درهم في الشهر يعني اتنين مليون سوداني في الشهر يرجاها آخر الشهر مديون
واقل عمالة موظفة راتبها 5000 درهم في الشهر
والعمالة الراقية 20 الف درهم في الشهر. كل زول يرجاها مديون..يعني عشرين مليون سوداني في الشهر يرجاها مديون

والله فعلا العنوان جاذب ومابداخله اكيد جاذب اكتر وحايكون مصيده لكل بنات حواء لانو الصابون الهندي فوائده كثيره خصوصا في غسل الملابس ينظفه شديد.

المثل السوداني في الخليج والمملكة يقول ليك( ياخي إنت قايلني هندي؟)
يعني مقرطا شديد. لكن يا عازة لو اتبعنا طريقتهم دي في التوفير، أكيد حا نستفيد
أما صفاتهم التانية كعبة خلاص
يعني باردين برود شديد.. أبرد من التلج.
قالوا في واحد في نهار رمضان عطشان شديد.. بعدين ايام نميري كان التلج حاجة نادرة خاصة في رمضان.. في العاصمة. يعني كان لقيت ليك ربع لوح.تضحك سنين سنين.. وتفرح وكدة تكون ضمنتا موية باردة لى فطورك. أما تلاجات المنازل ، خليها ساكت، ماتجي الكهرباء إلا ساعتين في اليوم..
اها الراجل ده عطشان شديد. وكان التلج في أم درمان ومعظم مصانعو هناك. كان يوزعوه جنب دكان العدني ..
جاء الزول العطشان ده ولقا بتاع التلج عندو لوحين
قال ليهو عندك تلج ابرد من ده؟)
صاحب التلج اندهش. تلج يعني ابرد منو بيكون شنو؟
بتاع التلج رد عليهو قال ليهو لا عندي تلج ابرد منك؟)
أها الهنود باردين برود يفقع المرارة، وحريمهم أشد بروداً من الرجال، ما تعايني لى سماحتهم وشعرهم الطوال ده!
برود يجنن
كان لقوك واقع في الشارع ما ياخدوا خبرك
وكتير نشوفهم يجوا مارين جنب زول واقع في الشارع أو زول عيان ن يزوغو منو
ولاعندهم شهامة ولانخوة ولا مروءة..
بس في حكاية الصابونة دي فالحين

طبعا يا ابو حنه

انا جيت طايرة قلت صابونه للبشرة وكدا



عموما بالنسبة للبوست

انا الهنود ديل شعب يعجبني جداااا

وكثير هنا فى المنتديات السعودية بناقش موضوع الهنود

لان كل الشعوب العربية بيتعاملوا مع الهنود بانهم اغبياء واحيانا كمان يتم الاستهزاء بهم

بالرغم من انه ثبت ذكاء الهنود جدا

يكفى ان نعلم ان مخترع البريد الساخن

HOTMAIL

هو هندي

اما بخصوص التوفير

فالهنود والبنغاليين وعموما كل الجالية القادمة من شرق اسيا هم مدركون جدا لثقافة الاغتراب

فالاغتراب معناها انك حضرت لبلد غير بلدك لكي توفر قرشين وترجع

وعلى فكرة الهنود بيحددوا سنوات اغترابهم .. يعنى الواحد يقول لك انا محدد خمسة سنوات وارجع باذن الله

وفعلا لانها حصلت مع واحد طبيب هندي صديق زوجي خمسة سنوات ورجع .. لانهم بيحسبوها بالمل



صدرت قبل فترة فى جريدة الشرق الاوسط احصائية عن الاموال التى تخرج خارج السعودية عن طريق الاجانب

فى اعلى الاحصائية هم الهنود وكل مواطني دول شرق اسيا

آآآخر الاحصائية هم السودانيين لان السودانيين الاغتراب يعنى عندهم الفشخرة وبس .. وشوفوني

علشان كدا قروشهم بيصرفوها في غربتهم

انا جيت طايرة قلت صابونه للبشرة وكدا

ها ها ها
صابونة غسيل دي يمه
صابونة لبشرة عرفناها
وكدة دي لازم تكون واقي للشمس بنسبة75%
أو تكون الآية الكريمة(صِبْغَةَ اللَّهِ وَمَنْ أَحْسَنُ مِنَ اللَّهِ صِبْغَةً وَنَحْنُ لَهُ عَابِدُونَ) يعني كفاية علينا صبغة ربنا لينا.. البشرة المنصورية دي خلاقي ماها محتاجة لصابونة بشرة..
........
بعدين استاذة انتصار شرحت لنا شرحاً ضافياعلمياً عن حالات الهنود
فعلا هم العرب بي يضطهدوهم ويذلوهم ويرسلوهم. العرب يعني العرب المغتربين من جميع الجنسيات موش ناس البلد. ناس البلد كمان بيذلوهم زيادة..
لكن زي ما ذكرت انتصار( مافي معلوم)( رفيق جنجال مافي)وللباكستانيين( خان ترتيب زيادة مافي.. خلّـِي ولـّـِىْ)( كـَـشـْـرَه)

خلي يعني خليهو
ولّي. هي الكلمة العربية( دعه يولي)يعني
فيقولوا( خلِّي ولِّي)

الأخ صديق أخوك مصباح يقول ساكت ويحكي أمثال وحكم. الصابونة ده سوف أحكيها للحاكومة. نذهب للتسوق فنجد أن ثلاثة أرباع الحساب يطلع للصابون صابون غسيل بأنواعه ، صابون حمام بأنواعه، صابون غسيل الأواني، صابون غسيل الأرضيات، صابون غسيل الحمامات، صابون للغسالة العادية، صابون للغسالة الأوتماتيكية ، وصابون أطفال ، صابون الكبار، صابون المساء، صباون الصباح .... وهلم جر وبارك الله في دخول الهند ونزع البركة من دخول السودانيين وغيرهم . هل تصدق قبل اسبوع كانت في قضية بنغالي حول لبلاده 800 مليون ريال سعودي وراتبه لا يتعدى 500 ريال. لك التحية صديق.

مصباح قال... صابون المساء، صابون الصباح ...

أول المساء عندو صابون يا دكتور أوو؟
كان الله في عون حكومتكم الرشيدة من انواع الصابون هذا..
اضيف ليهو الكولوريكس.. والمبيييض والمعطر للغسالة..
ياخي زمان في المناصير
الحريم البي يحشن في الجرف. بس يجكن توبن في حجيرة البحر ونحن ننقز ليهن فوقو بس بي رملة حجيرة البحر بلا صابون. والواحدي تلقاها ما سكي توبا تهبب فيهو في الجرف، يتعبق بي نسائم البحر وريحة أزهار اللوبيا. بعد تلبسو الواحدي حلاة ريحتو دي خلاقي!
لامبييض ولامعطر ولا صابون غسالة عادي ولا صابون غسالة اتوماتيك.
غايتو( الله يضرِك يا الحرازي)

أخ صديق الطرقي التي كانت تغسل في حجيرة البحر بالكرنكي وشرها على اللوبيا عند البحر ولبسها ملودحه ومكرفسه شوية. إنها الغسيل والطهارة بعينها وما أجمل التطهير بالتراب وحكمة الله في التراب وزي ماقلت والله رائحة الثوب داك حكاية براها وطبعا ثوب الأم الذي كنا نجد فيه رائحة ما أزكاها وما أحلاها ورقدة في ظل الصباح والام تعمل في الفطور وانت راقد فوق عنقريبن صغير ومتغتي بالطرقة والجنوب هابه تغمد شوية خمسة دقائق تشم رائحة العافية . إنها البراءة في زمن البراءة والطيبة والمحنة ولك شكري صديق