طلبك يافارس - أم منصور يا أم الخير

أم منصور يا أم الخير
الاستاذ عبدالرؤوف الكلال

أم منصور يا أم الخير
فتّحي عينك ما تتغشي
بالدولار والشيك الطاير
ترضي توافقي بعد اصرارك
تفقدي كرمك تفقدي جارك
تلقي هناك الوضع مغاير
لا الأقوال الكان بالزمة
ترزحي زين في الوضع الرمه
عرقك نازل دمك فاير
تبقي خلاص فرقتي أولادك
تسلب منك سترة حالك
لما صباحك يصبح باكر
أم منصور طلقانه تلاته
كل العسكر بالبوت شاته
رغم الغلب البيها تباصر
أبداً لا كلّت لا ملّت
لا شالت حق زول انزلّت
لابسه تياب العفه الطاهر
ما غشاها القال غاشيها
لسه محافظة علي ماضيها
كل عاداتها تراثة الزاخر
مالو الليلة الوضع اتغير
ساعة كبر الولد الأصغر
حامي حماها وبيهو تفاخر
أم منصور شن بيوديكي
تسلب كل القيم الفيكي
مادام عارف خيرك ناكر
في ظل الزل والسخرية
في زمن الزمم المشرية
وسط الناس جابوله سماسر
طمس هوية تسلّط عسكر
في أولادك ما يتسيطر
كل في الكل الناهي الآمر
صبرتي كفاية العالم الله
علي تهميشك وما منزله
سوي حساب للحكم الجاير
من النيل متبلل ريقك
كل سماح الساكن ريفك
شين أوضاعك ربك ساتر
مدن الحاجي الليله نهاره
ما تتغشي تشوفي انواره
كل الناس خادعاها مظاهر
وكل أولادك راحوا اتغشوا
من الحرب الدامية اتقشوا
جاهد جاهد ضد الكافر
ايه بالله نسيتوا !
كل الأمة المن يوم جيتوا
ماله لاتقرضت وانتوا حييتوا ؟
وقدر الفضل فيهم صابر
مالو الكافر يصبح زولك
وترضى تقاسم نص بترولك
وقلت البينك وبينهم عامر
كل الأمة غلت في صاجه
أم منصور في وسط الطوه
ماليك حق تقلع بالقوه
أم منصور بي روحه تخاطر
قرّب جرّب ضوق المره
بتلقى هناك الناس الحره
حامي حماها وعينا تساهر
أم منصور أوعك تتغشي
تسيبي وطن أجدادك تمشي
سوي حساب للحكم الجاير
وألف حساب للشيك الطاير !!!