صديق ابو حنه افتقدناك

الاخوه الاعزاء الم تلاحظوا معي ان استاذنا القدير ابوحنه ليس له حضور اليومين ديل في اي قسم من اقسام المنتدي وهذه ليس عادته
انشااءالله المانع خير

صدقتى

وحتى فى الايام السابقة لم تكن له مشاركات عديده كعادته

نسال الله ان يكون سبب غياب كاتبنا واديبنا

خيررر

بس كمان نلتمس له العذر الدنيا مشغوليات

وان شاء الله ما يطول الغيبة

شكرا انتصار علي المرور
الحاجه المحيراني يا انتصار
المهندس صديق عندما يغيب بيعلن عن سبب الغياب
انشاءالله يكون غيابو خير

ولا يا انتصار الزول ده يكون مشي الدامر ؟

هاههاههاهاااهاهاهاهاهااه اسالوا ابراهيم يا انتصار
احتمال يكون لاقوه جنب ست الشاى الفاتح عندها حساب

اخو البنات

ابوحنه

مايظهر الايام لانه ماعند شي بقوله

لان مستلم في المكاراب

واي بوست يتكلم عن الخيار المحلي يمر فوقه ساكت

نحن نقول الاعور

عشان كدا الناس ماتتغش

وبذات الاخوات الكريمات

صاحبات القلوب البيضاء

البرقص مايغتي دقنه

فاكر الناس ماعارفين

لا لا يا ابو سفيان

يا خوي

ابو حنه دايما يغنى للبحيرة

شوف بوستات الغناء التى يحرف معانيها ويغنيها لاجل البحيرة



بس اليومين ديل المنتدى صار اغلبة سياسة وابو حنه ما بيحب يتكلم فى السياسة نهائيا

دا تحليلى غايتو

شكرا يا اميره وانتصار علي المرور
يا سفيان يا قريبي نحنا عرفنا الناس في المنتدي وحتي كان ما محلي فالسؤال واجب وتفقد بعضنا البعض
وافترض ان ابحنه استلم في المكابراب او غيره من الخيارات لم نجده يوما ينتقد احد او يبخس منطقه بل بالعكس دائما سبا ق للخير ونحن علينا الظاهر والسرائر يعلمها الله

وبرضو بنسال عنه ونسال الله يكون سبب الغياب خير

برضو نلاحظت غياب ساري الليل
لكن اليومين ديل كثره غياب الاعضاء وارد واسبابو معروفه

الأخت نجلاء والأخوات الكريمات ... حياكم الله وأبقاكم ... فعلا ً اليومين ديل إفتقدنا القامة أبوحنة ...إن شاء الله يكون سبب غيابه خير ...
الأخ أبوسفيان ... مداخلتك لم تروق لى !!! نحن هنا أعضاء منتدى المناصير بلدى ,فيه تعارفنا وتوثقت علاقاتنا وإجتمع شملنا بغض النظر عن خياراتنا ونأمل أن يكون هذا المنتدى وعاء جامع لكل عيال منصور , فيه تتوحد كلمتهم وتسمو هاماتهم وتتلاقح أفكارهم مما يعود بالنفع والخيرعلى كل أهلنا المناصير فى كل خياراتهم _

للجميع تحياتى وودى ،،،

عمنا ابوحنه .... افتقدنا كثير من الحديث كنا نتوقعه منك ولكن ...... اليوم نفتقدك روحا وجسدا ........

ولدنا وأخونا ابو الكراري يهظر.. وأنا ابقى ليهو زي عم.. وقال يمكن قاعد مع ستات الشاي يشرب في شاى.. ياود زمراوي.ز مع إحترامي لى ستات الشاي، كقطاع من قطاع نساء بلادي العاملات، لكن ظروف عمرها ما سمحت لي بالقعاد جنب ستات شاى. حتى اليوم.. مافيها حاجة وليس تكبر، لكن بس ما بيكون عندي زمن
أها يا ابو الكراري.إنت وين! مالك ما مشيت الدامر!
شايف في الصور في المنتدى برضو ستات الشاي قاعدات هناك بي ترابيزهن يبعين في الشاي لى عيال منصور( مصائب قوم عند قوم فوائد..
أنا قلت ليك ولدنا يا ابو الكراري عشان قريبي وإنت ما راعيت حق القرابة.. وقلت ليك اخونا. عشان مافي فارق كبييير بينا. أنا بالمناسبة انجزت كل مهام الحياة في عمر صغير..
يعني دخلت المدرسة ستة سنوات ونصف. الناس عادة يدخلوها ثمانية وتسعة وعشرة سنين في زمنا.. تزوجت صغير وانا لسه طالب في المعهد.. ( متزوج وشغال وبقرا) تلاتة محاور في جبهة واحدة.. تزوجت عمري 27 سنة بتحديد الناس الساكنين العاصمة يعتبر عمر صغير لكن بالنسبة للمناصير القاعدين في البلد يعتبر عمر عادي. عشان اصلو هو هناك مزارع.ز لا عندو قراية عايز يخلصا.. ولاعندو شغل عايز يشتغلوا.. انا من اوائل الناس الذين تزوجوا في دفعتى وليس غريبة على اسرتنا يتزوجوا وهم يقروا.ز يقدروا على ذلك.. رئيس اللجنة عثمان صحن.. عثمان خليفة حسين ود عمتي تزوج وهو في ثانية ثانوي زواجه الأول.. وقدر يدخل المعهد الفني وقتها بجدارة وقدر يمسك العصاية من النص.ز تصدق يا ابو الكراري أن هنالك ناس من دفعتنا يا داب تزوجوا قبل سنتين! خليفة النعيم حسين اهلو في قرية ( المترة) جنب الشلال هو نائب مدير فرع بنك الآن.. في السودان كان يعرف ببنك العمال أو الإسكان ما عارف.. جعفر نعمان عثمان دفعتنا وود عمدتنا برضو تزوج قريب. يا داب بتو في الإبتدائي..وحجيت وأنا في سن34 سنة

المتميزون كالاحجار الكريمه وان وجدناهم في حياتنا ثراء لايقدر بمال معادنهم اصيله تشع بالجمال والابداع حمد الله علي السلامه وطهور انشاءالله
ساحات المنتدي بانتظارك فهيا اتحفنا بالجديد المفيد

سلامتك الباشمهندس ابوحنة
عافية واجر

المرور الكرام علي هذا البوست
اميرة علي
الريس خالد
نجلاء
إقبال
إنتصار
.........
والجايين لسه
تشكروا على المرور بي جاي
يديكم العافية

صديق ابوحنه والله العظيم بالغت الاخوان والاخوات فى المنتدى افتقدوك فى ايام وانت بعيد عنهم طيب انا اقول شنو الافتقدتك بالسنين ونحن فى بلد واحد وبينا 150كيلو بالمناسبه انا خلفتك فى مدينة العين وتلفونى 0505631764 وحمدا لله على سلامتك وماتشوف شر.

أووووووووه أهلنا ناس الكاب.. أهل ابوي. مرحب سعادة مدير باشمهندس المصنع..مصنع تمور وعلف مدينة العين؟ نعم انت خلفتني في السكنى في مدينة العين نعم... أخبارك معاي والله من دفعتي الأخ جمال ابوزيد حامد كرار الرجل القمة والقامة..
المعايش شغلتنا والله كيفك يا زول.. مشتاقين. إن شاء الله نزورك...

[color=indigo]افتقدنا تواجدك باشمهندس ابو حنه
الف حمدلله على سلامتك[/color]

اتخيل جمال ولا مره واحده قال انو بيتصل عليك والبركه فى هذا المنتدى الرائع الوصلنى ليك .اما العمل مديرالانتاج والتشغيل بمصنع بن بروك للصناعاتالبلاستيكيه.

أيوه نعم يا نصر الدين.ز مصنع بروك..

شكرا بلسم بت صاحبي وقريبتي على المرور بي جاي
.................
بس دايرين قريبنا ده أبو سفيان زول الحيبة يجي بي جاي. يدينا الخبر ويكفر ليناما جاء..

ألف حمدا ً لله على سلامتك يا صديق وكفارة وأجر وعافية _

أخونا وحبيبنا ومرجعنا متعك الله بالصحة والعافية
حمدا لله علي سلامتك، وانشاء الله بلغت الصحة التامة
وانشاء الله الأسرة بخير وعافية ياباشمهندس
أنا طبعا عارف الحمة الأسيوية كويس
لأني هنامنذالعام 2009
ربنا يحفظك والأسرة وكل المسلمين من كل مكروه

سلامات المهندس صديق ولا بأس وطهور إن شاء الله وربنا يديك العافية

المحترم صديق لك التحيه
اولا اي زول يختار البيريحو مع احترام خيارات البعض وفي النهايه كلنا اهل اكان في المحلي او غيره بس اصعب حاجه الاستهتار والتقليل من شان بعضنا البعض ولا هذا ولا ذاك من شيمتك
واهم حاجه ان الانسان يكون واثق من نفسه ومن ان اختياره تم بناء عن رغبه
وبعدين يا هندسه انت ما محتاج تثبت خيارك يكفي تمجيدك وفخرك باهلك الاصل
ويكفي انك لم تسئ الي احد او الي اختياروتحترم الكل
تقبل مروري واحتراماتي

الاخ ابو حنه لاباس عليك طهور ان شاء الله
يقول الله تعالى (وسارعوا الى مغفرة من ربكم وجنة عرضها السموات والارض اعدت للمتقين)
*الذين ينفقون فى السراء والضراء والكاظمين الغيظ والعافين عن الناس والله يحب المحسنين)

والله يا هندسة انا ما كان قصدى حاجة تسئ ليك بس انت فهمت غلط وغلط شديد جدا انت فى المقام الاول عمنا وفى المقام الثانى اكبر مننا فى السن يعنى ما ممكن اسيئ ليك باى حال من الاحوال ومع العلم اننى اكثر قارى لكتاباتك

بس انت اذا كان فهمت كلامى انا قاصد انك فى الدامر مكان الاعتصام

لك العتبى حتى ترضى يا عم

استاذنا الكبير ابوحنه

والله دى ما عوايدك انك تزعل

بنعرفك قلبك كبيييير يشمل كل المناصير .. وانت كبير فى القدر والمكانه وستظل كبيرا

وبنعرفك دوما شخص مسامح

فياريت ماتزعل من كلام ابو سفيان

التمس لاخيك العذر

صديق عبدالله علي أبوحنة كتب:
أبو سفيان
مالك قبلت عليا كدة الليلة!
ما كنا كويسين في بوست حولية شيخك الشايقي.. واثنيت عليا ثناءاً يقسمو منو!
الليلة القلبك عليا شنو؟ بدون سبب وجيه وجبت فنجان موية وطمبجتو بي برميل موية؟
والله ما بتقدر من المناقرة؟

الخلق اتلمت وعملت مجلس ناس مصباح والنفعابي وكم أعمام حكمو عليك ابو سفيان بالبطحة .. من عموم المجلس نط زول حساس وأكيد هو أخونا النفر قال : بأناس نحن في القرن الكم؟ وفجأة ظهر صاحب الحق ( ابحنة) ونطق بالعفو والعافية

:::::::

بدون هزار عليك بالاعتزاز والما لامك مادارك 

الاخوه الكرام الاخوات الكريمات

تعقيب علي ماردفي الموضوع

الشكر لكل الذين خاضوا في الموضوع

اولا البوست

يحمل عنوان

افتقدناك يابوحنة

لاحظوا معي معني البوست نجلاء افتقدت ابوحنه

افتقدته وفي الزمن بالذات نسبه لحوجته ونحن في المحك نكون اولانكون



المنطقه تلتهب

والكل في سباق مع الزمن من اجل القضيه

نجد ابوحنه لم يظهر كعادته القديم يضرع المنتدي شمالا وجنوب

وافتدنه اخواته كرجل حوبات في تلك المرحله

انا وضحت نقاط ليس الا

مازال سؤالي جاري هل استلمت افي المكابراب ام لا

بالنسبه الناس البكتب عن انه في ناس في المنتدي استلموا

مافي واحد رحل من المناصير وبكتب انها كويس ومافي واحدقعدفيها يكتب انهاماكويسه

اي واحد رحل من المناصير الي منطقه الفداء والمكابراب

ماشفناه يشكر المناصير

بعدين يابوحنه

انا مافي زول يحرشنه انا ماعندي معك تار الكلام في المنتدي فقط لايتعداه

كلمه يحرش كتير في حقه

بعدين المناقره عشان شنو

الفرق بين وبيني

شاشع في العمر انا من مواليد



1972

انت عمري قضيتو كل دراسات خبره في الحياه العلميه والعمليه

)بالنسبه للحقوق انا لم يكن لي حق عشان اعطيه او اعفاه لاي شخص

انا مازلت في كفاله الوالده والوالد

انا افتكر كلام كان واضع

الاخوه المداخلين بعضهم فسر كلام علي هواه

علي العموم

يغني المغني والكل علي ليلاه يطرب

وكررعلي كل المتداخلين ان يكتبوا عن الموضوع

ليه افتقدته قريبته في هذا التوقيت

ابن الخال سفيان عهدناك دوما قلبك ابيض ومرح وحديثك ذو شجون

فلا تجعل مثل هذه الاشياء الصغيره تا خذ حيزا من اهتماماتك فنحن في مرحله اتحاد ولم شمل وليس مرحله تفرقه

احيانا يخوننا التعبير فيسئ الاخرون فهمنا بالرغم ان نوايانا تكون طيبه

ووالله والله لم اسال عن استاذنا القدير ابو حنه الا لانني فقدت تواجده كعضو ومنتدي بيننا شانه شان غيره من الاعضاء

وليس لي اي قصد

تخريمه يعني اليومين ديل نعمل حسابنا مانسال من اي زول ولا شنو

ويا بشمهندس ابوحنه

ويا استاذ سفيان

كونوا كما عهدناكم

أولا، عايزك تقول لى كفارةيا أبو سفيان، ما قلتها في ردك..

الله يعطيك العافية يا نجلاء

وفعلا نحن اليومين ديل ايام وحدة وتضامن

ويا بشمهندس ابوحنه

ويا استاذ سفيان

كونوا كما عهدناكم

شكلوا سحروكم يا اخوتى

حكي في عهد الخليفه المامون ان رحل ادعي

انه نبي وزج به قي السجل

لمااوتي به الي الخليفه المامون

ساله الخليفه

الي اي قوم





فقال الرجل

انتم تركتوني ابداءرسالتي

وضعتموني في السجن حين وصول الرساله

انت ترد علي كل البوستات

ولم يرد علي حمدعلي سلامات اخي القادم من السودان

عند وفاة عمي لم تتكرم ولوبسطر واحد للعزاء

بارغم من ترد علي جميه البوستات الفارغه والمليانه

ايضا تتهمني بان لم اكتب بوستات المفيده

الان تتهمني بان المناقره عاد عندي

الناس بتحرشني

وفي النهايه نحن نقوم نترفع عن الصغاير

اكن كل الود والتقدير لاخوات لنا في المنتدي

انتصار-نجلاء- ا

علي ردودهن في هذا الموضوع

في حين عجز االاخرون

في النهايه حمدالف عاي سلامتك من حمية اسيا

والله يستر عليك من سعال اوربا

الحمد لله على السلامة الأخ الكبير قلبا ومعنى وسمة وصفة الباشمهندس صديق

وربنا يديك العافية ... ويحفظك لأولادك ولمناصيرك ولسودانك

...

عن إذنك نجلاء
نشاغل ود المناصير
يا ضل مفروش جوات الحوش مقشوش و نضيف من قول الزيف مرشوش بي موية ريد و حنان و البن في النار و تهب ريحتك وأنا رأسي يدوش … ياخي متقريف ليك

شكرا أبو سفيان مقبولة منك قولة كفارة.. والبركة فيكم في عمكم، يعني أتاريك صاريها لى من وفاة عمكم! ياخي البركة فيكم وربنا يتغمده برحمته، يعميني والله ما شفت بوست عمكم ده، والموت ما فيهو شمت، لو كان شفتا كنت عزيت، الناس أهل.
بعدين نحن دائما ناس مجموعة، وناس جماعة، نحاول نعالج مشاكل الناس في البلد بأقل أضرار، والموضوع الذي تتحدث عنه، هو حق ورثة طالبوا بحقهم، فقد عالجه المرحوم عمر قبل وفاته، أما أنا والله كما ذكرت لم أستلم حق أي نخلة أو ارض، وعفيت حقي لأخواتي بالرغم من أن الناس يتشاكلوا ويتشاكوا في البلد وحصلت فتن أعوذ بالله منها، لكن نحن حنانين البحر وحنانين كسلا ووقر لم تدور بيناتنا اي مشكلة في هذا الموضوع، وتراني أنا حماراً قالع وتدو، لاني قاعد في البلد ولاني قاعد في أماكن التهجير ولاني قاعد في السودان، وحقي محل ما يرسى، صدقة وكرامة للضعفاء والمساكين والمحتاجين واصحاب العوز والنقص والضعف
شكرا شيخنا عبد الرحمن محمود النعيم، والعريس محمد خليفة طلحة، وود الطرشان، وأهو البوست ده جاب ليكم ود المناصير .. شكراً ساري الليل وعمر سلمان علي الشاعر، واي زول نسيت إسمو بدون قصد ما يجي يلومني كمان بتكون جات بدون قصد أبو الكراري ولدنا نجم الموسم ونجم ميدان العدالة

ماشاءالله وتبارك الله

والله مناصير موقدين نار وتطبقون ما اوصي به ديننا الحنيف من عفو وتسامح واخاء

والله يا هندسه ابو سفيان قلبو ابيييييييييييض وغير الونسه والضحك ما عندو شئ ها جاك كلامي اصلو الزول من كثره ما طيبان لايمك انك ما عزيتو اه في طيبه قدر دي وقالوا في المثل الما دارك ما لامك

ويا ابوسفيان صديق منتظر منك قوله كفاره وانت مزعلو اي اناس انتم انكم ملائكمه يمشون علي الارض

ما اجملها من اخوه في الله لم نري بعضنا ونتشاجر ونتصالح فيما بيننا

فهنئيا بالمناصير بابنائها ودمتم عزه وشموخ

تخريمه والله كنت خايفه البوست ينقلب مشكله باقي المشاكل خليناها بيغادي

وبعدين يا سفيان وينه حكاوي محمد المنتظرينها وانشاءالله يكون بخير وترك الاهل طيبين

الخال العزيز أبو حنة ؛؛؛؛
حمدلي سلامي؛؛
ومعليش علي التأخير لأنو اليومين ديل نحنا قاسمين الأسبوع 3يوم في الدامر
و4يوم في الشغل؛؛؛
وأنا النزله جاتني في الحج وكملت ليها علبة أموكلان وماسوا فيها شي؛؛؛
ونسأل الله السلامه تقول جاي من حصان ما من بشر؛؛؛
وأوصيك بالقرض والملح وزيت السمسم؛؛؛؛
مع عاجل الشفاء ياخال.....

شكرا ابو حنا