الآن نكتب ونحن في حضرة المحاسب الكبير الصغير المعز عبد الرحمن

دى ميزة حلوة من مزايا المنتدى
انه الناس تتواصل
فكلنا اهل واخوان

المعز عبد الرحمن خليفة.. المنصوري ود المنصورية والمنصوري
ود أخت الرشيد..
زول جامعي في الكمبيوتر. دابو اتخرج قبل سنتين.. زول حساس شديد. لم تطب نفسه إلا أن يحضر محملاً بالهدايا لى عمو صديق أب حنة
قلت ليهو مافي داعي ياخي .كل شئ موجود..
ربنا يتم ليهو على خير
زي مرتبط في السودان
ربنا يجعلوا بيت مال وعيال وحلال.. لما يحين وقتو وفي زمنو
جاني سايق ( كامري) وذاتو عامري بالدين ومحبة أهلو
.....
زمان أبوي لما يجي الخرطوم. لابد أن يمر على طه ود اللفندي في البيت وكان متضايق لازم يمر عليهو في الشغل . حتى يسافر
قال لى يا ولدي ناس ود اللفندي ديل عندنا معاهم سرارة
شوف الكبار كان يعرفوا الكبار ويدوهم حقهم في التقدير
.........
لأن الموقع موقع إنشاءات طلعت مع المعز لامن مسكتوا الدرب البي يوديهو ابوظبي.. واطمأنيت عليهو.. يقول ليك( العريس بي تكون مباراه الملائكة.. لامن يعرس ويتم العرس والأربعين)
شوف مجرد النية الإسلام يكافئ عليها..
( إنما الأعمال بالنيات، ولكا امرئ ما نوى)
واي شروط صلاة أو حج.. أو صوم تلقى فيها النية شئ اساسي
عشان كدة أول ما تنوي لبيت الحلال.. طوالي تؤجر.. وتُحـْرس.. على حسب اعتقاد مناصيرنا
سلام مربع للمعز لدين الله الفاطمي
ود أخت الرشيد طه الافندي
وناس ود اللفندي ديل كما ذكرت قبل كدة نحنا متزوجين منهم
صهيبة بت زريقة بت الحرم بت أب حنة.. دي متزوجا محومااد ود العمدة أم ناس كارس..
اها أخو كارس بابكر عليه رحمة الله مات في شبابو
بابكر ده ود عمتي متزوج اخت الرشيد
وحلفت بالتكتلا . أخت ناس الرشيد قالت انا بعد بابكر ما بتزوج تاني.. خلاص رجالي ولادي اربيهم وابقى ليهم ام وابو.. ده حظي من الدنيا.بلاش رجال بعد كدة!. وفعلاً كانت عند كلمتها تماماً ربتهم لامن خرجتهم من الجامعات
شايفين مرجلة المنصوريات ديل كيف؟
شايفين طه ود اللفندي ربى ترباية كيف؟
شايفين الزولة دي صميمة كيف؟
ديل موش ناس يستاهلوا يناسبوهم؟
عشان كدة قدمنا المعز لغاية الشارع العام وإحتفينا بيهو.. عشان أختو أكرمتنا في أولادنا عندهم
وعشان براً بعلاقة طه ود اللفندي وعبد الله الحنوني
وعشان خوة الرشيد معانا
وعشان توصيات الرشيد المتكررة
والملحة لى ود أختو عشان يزورني في داري
وعشان خوة المنتدي هنا
هذا الذي جمعنا تبقى حقيقية
زي ما قالت إنتصار حجازي ... جزاها الله خير

باشمهندس صديق
لا ادرى ماذا اقول حقيقة شكرا لك على الاطراء وشكرا لك وانت تعرفنا على الاسرة الممتدة
المعز ما زال شابا غضا يحتاج للنصح والارشاد لذلك كنت مصرا على زيارته لك وانت تتمتع بكل هذا العلم والتجربة والخبرات واكيد سيستفيد من علمك وخبرتك فى الحياة فلا تبخل عليه بالرعاية والنصح والضو ما بيقولو سو وانت ضو قبيلة
صديق متعك الله بالصحة والعافية