الخبير علي ود وداعة

ترجع اصوله الى قبيلة الكبابيش . عاش اهله في خلاء الغرب منطقة ام سرح ثم نزحو الى منطقة الزيداب وعادو الى ام سرح بعد اصيبو بحمى قتلت منهم عددا كبيرا فقال قصيدته:
ان بقيت حاحيت الجداد تاني للزيداب ماني صاد
ثم هاجرو الى خلاء الشرق مناطق برق السموم والمحطات وبعد ان ضرب الجفاف نزل الى برتي شرق واخيرا استقر ببرتي غرب حجر الغراب واولاده الان بالمكابراب القرية 2.
توفى في بداية الالفينات بعد عمر طويل الا رحمه الله رحمة واسعة.
كان يطلق على نفسه الخبير واللنقيب في قصائده فهو فعلا خبير لانه تجول مع ابله في المناطق من الكاسنجر وحتى ابوحمد بل حتى مصر في الخلا والبحر ومن نوري وحتى الزيداب في الخلا والبحر كذلك وعمل بالزراعة في منطقة القاش وقد وثق بشعره لهذه الفترة في القاش:
18 نفر مافينا حد يصلي
والعاقل يقول دقولنا ود سقدلي
يسوي الجبنة جموع الحديثو مسلي
وقد ادى هذا التجوال الى انتشار شعره في كل هذه المناطق وكدليل على ذلك ان كثير من رميات المرحوم ود الحوري هي من كلماته ونفس نقرشة الطنبور فقد كان يدندن باشعاره ملحنة ومن اشهر قصائده يا قشيش وادي الكربكان:
يا قشيش وادي الكربكان عوج البل وفقع الضان
فرقتنا الماليها امان وكل واحدا بقى في بكان
مابتدوم الدنيا آبتدوم
كم عماراتا بقت روم
وكم خرب ناس نضم الخشوم
المشيرقية الفي المرون
من حلاتا تلصق السنون
ناس فريقكن رمو العيون
كل زولا شركو مدفون
جيت اقيل في ضلو انوم
الحراريس قالولي شوم
ينقضي المن الله مقسوم
زايلي يالمابتدي العجب
خيرا زي الضل مقلب
زايلي يا ام خيرا ورا الحد
بابا يوم يفتح ويوم يسد
وفي الغزل:
عندها الحيا ملبوس هدم
ودابو لا انشرط لا قدم
السنون اب رعدا ينم
يا لبيب في الصايدك وهم
يا قلب قتلك لا تهم
من عرف مقصودك يتم
الله يجمع شملك تلم
في جنينة ناظر القسم
تلقى فيها الليمون تشم
وتلقى موز ليهو الريق يجم
وقصيدة اخرى:
الكفل زي مهر النهيب
والقدم ماهو اطرق اديب
الشلخ مرسوم زي قضيب
فوقو قايدي الروبة ام وضيب
السنون اللبن الحليب
عارفو خاطري بلاها آبطيب
لي يجيبا اب فرجا قريب
وتشرب الشاي عندي شيب شيب
وتحكي وكت الخاطر يطيب
اللهج مشرق ود خطيب
والنضم نقير اب صليب
انت تكانة الفراسيب
في الوصف قدام ناس حبيب
سيدو سوالو سماد قريب
يا فريع السلم اب وضيب
اوعى راي امات قرابيب
سيدو ندمان لامن يشيب
وفي الحياة:
اجري فوقا وتجري في ام جور
وبالغرب كاردا لي برور
كم سريت وكم قرن سرور
ومرة من الكاب ماشي دور
مرة من عن ناس الجبور
وتاني لميت ناس القبور
جلبت في بحر المسور
وعمت بي صدري بلا طرور
قت بي تتحاش على الخور
مرقت اخدت عتمور كرور
**************
ياخبير عتمور اتبرا
البلد خابرا لي اسمرا
ومافي زولا قدرك جرى
ده الجري الما جابلك مره
وما في عرقا وصل الترى
العمير قبل لا ورى
تاني شوفلك بيتا ضره
النفس منعوله انهره
واوعك الشي الما تقدره

يا سلا عليك ياودكباشى اخرجت الدرر
المشكله العروق الابت تغز فى التره دى
واصل لا تقيف

الاخ عبد الحليم شكرا علي الابداع الجميل
الان بمساهماتك الجميلة اكدت للعالم روعة اشعارنا وتراثنا المنسيي
شكرا مرة اخري
واصل

ياسلاااااااااام
الاخ عبدالحليم كباشي
واصل واتحفنا بالمزيد من التوثيق لهذا الرجل المبدع الخبير علي ود وداعة
منتظرين

لك التحية عبد الحليم
ارجو ان تفرغ ما في زاكرتك والاخرين

قريبى عبدالحليم الرائع والله انت زول مرجع فى الشعر القديم فأتمنى ان تواصل بدون انقطاع ولك فائق الشكر .

شكرا عبد الحليم علي هذه الدرر.
واصل

والله الشي البدخلنا المنتدي دا الشعر وخاصة شعر المناسبات والتراث لا تنجموا يا ود كباشي ونادر تقبلوا مروري

الشكر لكل الذين مروا ونواصل
فاطرا البعد الرقدة بان
فوق طوالع نصب الحصان
قشو عد السنتين ضمان
والسمن جابولو جركان
عمي يا خالي الناس حنان
مابيقولولك يا فلان
فرقتنا الماليها امان
وكل واحدا بقى في بكان
يالصحابي الماهو فنان
ان بقت جات جيتا ضمان
فوقي براد بي لبن ضان
ومحلبية وعلبة دهان
*************
فاطرا الشال غادي للفج
جر فوق الوادي اب علج
بيهو فرحان سيد القرج
شاربا ام شلالا هرج
في مفالق نيل راس ارج
اضحكي آم فاطرا مفلج
مابتضيق علا علي فرج
**************
شاربا القاسي علي المعام
في جزيرة ناس ود امام
وحاجبا الفي الليل هل تام
واصبحو الناس شالو اللجام
العيون الرضع امو نام
في هبج قيزان الرغام
الشلخ مرسوم يا سلام
زي بحور السيف اب قيام
السنون الكشف الظلام
الوجيه يستاهل زمام
يضوي زي قمرات القسام
يا خبير الفجي ام كتام
لا تموت يبقى السب غزام

يا عبد الحليم النم دا عجبني بلحيل

شكرا هبرم وهاك دي الزول جاكم عديل
يا خبير اب رملا سراب
لا تقنب بالقرهاب
انكرب قول يا ود ضياب
وقوم امش لافوق علي الكاب
البلد ديك كلها اصحاب
العرس ما طلع اب سحاب
بت رجالا ليهم اشناب
بي تشوف خيرتا في الكتاب
البتكلو عليها العقاب
بي تجيبا وتجي بالدباب
**************
لهيجا الجابو ود مقبول من الكاب
وسنونا السيلو مجلوب ماهو قلاب
سرها آبتديهو سيد الليها ضناب
في داير اجيب لا حولو ما جاب
يكضب لامن الناس عرفو كضاب
اصلو غسال السعن ماببقى رواب
******************
سادرت فوق برق السموم
بقة ام حوارا ينوم
سيدا في خت نعمان عموم
ما اظن يلدنو حروم
ما انطلق بالحلال يحوم
زولي ظاهر وصفو مفهوم
سنو برق الساري الهجوم
حاجبو خط الدارس العلوم
لهجو شاي الرقعة اللقوم( اقوم امشي)

شكرا الاخ حليم--
نضم زى الرصاص --
ودا العايزنو يالضبط --عايزين نخرج المفردات دى ونبحث من خلالها الكثير-
--سو الفر--

شكراً شكراً الرائع عبد الحليم ونشاالله نلقي الفاقه ونعلق

والله ياعبدالحليم انا اعرفك من الدفعة القدامى ذكى ولماح
وهذا ليس غريبا عنك بان تاتى بهذا التراث الموثق لاجدادنا
بما فيه من قصص وتسلية للقارى
فلك مليون سلام وكل السلام المستحق