ماطال في بحرك- الشاعر محمد الحسن سالم حميد

من طرف **خالد عابدين** الأحد 30 مايو 2010, 4:44 pm

الشاعر محمد الحسن سالم حميد
ما طال ما بحرك فى مى

ما طال ما بحرك فى مى
وتمرك مفدع بالجريد
شدرك أمد حد السمى
طينك معتق بالطمى
نبنيــك أكيد .. نبنيــك هوى
نبنيــك أيوه سوا .. سوا من جديد .. نبنيـــك جديد
ياإيد أبوى على إيد أخوى على إيدى انا
على إيد و إيد
نجدع بعيد فى اللجة من راس ميضنه
حيكومة الفقر الدمار
الكضبن و الصهينة
واللى نقاص أيامنا كاس
اليالطيف سوس البحر نردم قفاهو حجر حجر
من ها الرصيف
الما قدر قدام سريعة الموج يقيف
الماانستر
الارزقية وناس مو00 يا
نسقيها كاس اسقنا يا
نوريها كيف عشق الحياة
سانانا فوق حجر القصاص
سوانا ناس ضرب البحر
جوانا احر من الرصاص
يا ضو حبيبين القسا
طول ما انت غرقان فى الأسى
تبت يدين ما ترمى ساس
ما تبنى مجدك من جديد
تفتح شبابيك الخلاص
تدخل نسيمات النشيد
بيت القصيد يستقبلا
مستقبله .. و الحاضر الماضى التليد
يابلدى يافردة جناحى التانى
وكت الناس تطير لى عالمه
وآ آفجعة الزول البيجيك
ما يلقى فيك غير الهجير ناسا تواتى مسالمه
كل البشاشات القبيل يلقاها ميته مسممه
والجاتا جاتا من الأرض ما جاتا من تال السما
ما أعتى غبنك يا ولد
وأعدل قضيتك وأعظمه
لاترجع السيف الجفير
والدنيا فايره مصادمه
من غير تجيب تار البلد ..
ريح العوارض تهزمه
تطرد مع ابليس الأخير دعاة الضلال
من جنتك يا آدما
تاكل من الشجر الحلال
يغشاك نعاس فى ضل رمى ..
تختاك هضاريب الصعب
كربة ليالى المظلمه
يانيل قبل خاطرك يطيب
أرضك تفزع باللهيب
تكشح تواريب الغضب .. صعب المراس
نوبه و زنوج و بجه و حلب
رطانه عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتله و كمنجه و مسطرين
و طبنجه فى خط التماس
نبنيك سوا نبنيــك أكيد .. نبنيــك هوى
نبنيــك أيوه سوا .. سوا من وجديد .. نبنيـــك جديد

من طرف **يس مصطفي** الأحد 30 مايو 2010, 6:20 pm

اوقف يازعيم 0 القصيده سمحه وخيار محلي لكن نحن عايزين اشعار البلد0 يعني بدل محمد الحسن سالم يكون محمد الحسن فضل

عفوا ياسين اهنيك على غيرتك وانتمائك القوى ولكنه الإبداع وتذوقه فنحن بشر ونتذوق الشيء الجميل ولانغفل أشعار المنطقة –خاصة وان الشاعر حميد شاعر قامة فى الشمال وفى السودان عموما إضافة الى انه شاعر الغلابة والمظلومين والغبش ونحنا الآن نقرأ اى شعر قديم أو حديث يتضمن الظلم نفصله لأنفسنا –الاتتفق معى لو ان حميد استوعب وفهم هذه القضية ومن أهلها فقط لقال فيها الكتير – فحميد شاعر كبير فهو القائل:

الغبش الشالوا شيلن فى وشى الجوع قالوا لا لا

بى بكية اختى البترضع والضياع واقف قبالا

بى تويب امى المفضل خير وشر ساترابو حالا

رغم انفك ياموانع والكبار القالوا لا لا

ما حا اقعد ما حا اركع للخمالة

وكان حفاير صبرى قلت فى الضلوع بحفر لى دالة

عفوا ياسين وفعلا القصيدة التى اوردها خالد جميلة وزى ماقلت خيار محلى ولكن اتفق معك الاصل فى الموضوع القضية وشعراء المنطقة وعاداتها وثقافتها وادبها وتراثها ونحن وانتم والجميع لها

من طرف **يس مصطفي** الإثنين 31 مايو 2010, 6:09 pm

شكرا سلمان علي السطرين الاخريين

من طرف **خالد عابدين** الإثنين 31 مايو 2010, 6:20 pm

يس مصطفي كتب:اوقف يازعيم 0 القصيده سمحه وخيار محلي لكن نحن عايزين اشعار البلد0 يعني بدل محمد الحسن سالم يكون محمد الحسن فضل

الاخ ياسين
إذا حضر الماء بطل التيمم (ان شاء الله تكون اقتنعت بعد ماقريت كلام الاخ سلمان)

مشكور الاخ الزعيم سلمان على الرد الشافي ونضمك تاني مابيتعقب

بس اسمح لي أديك قصيدة تانية لي حميد (الجابرية )

كان ضحوية ...وكُنَا نسنِّد في المحروت
وفجأة يهّوي مَكبر صوت
قال : الريس مار بي فوقنا
من شغلتنا قلعنا عِروقنا
فكَينالُو حبل وآسوقنا
وإنماسكنا يطمّن روقنا
قمنا جميع الحلي مَرقنا ...
البيشوفنا.. يقول وآآ شوقنا
كان ضحوية ... وكانت عين شمس الله قوية
وكان الريس في عَربية ...
واقف طولو.. تحت شمسية
هللّنّالو ... هلّجنّالو ...لوّحنّالو بالطورية
فرَّ عبايتو.. وهزَّ عصايتو ...
وهزوا بنادقن الضابطية
صفقنالن.. صفقة قوية
زغردنالن ... يويا أيويا
هدّن عندنا خمسة دقائق
قدمنالو كتاب الله ...درقة وسيف ... تبروقة هدية
.. قـُـفّة تمودة .. وفاس دهبية
وكنا قبُل بيّتنَا النية ...
بين بتين علّينا اليافطة ...
اليافطة أم زيق الدمورية
وانعبينا هتافاً واحد :-
الجابرية تحيّي الثورة ...
دايرين بوسطة ومدرسة وسطى
الشفخانة وسوق منضبطة
قام الريس.. روّح باسم
وقام خاطبنا بنهج الثورة الصارم وحازم
أمّن.. لازم من شفخانة ومدرسة وسطي
والتعمير بالعون الذاتي
إلا البوسطة .. دي ينظر فيها
أما السوق ... السوق منضبطة
للتُجَار الأسعار واضحة
وللمستهلك باينة وواضحة ...
جاملتوهن تبقى الغلطة
وإنكفّينا
رفعنا إيدينا ...هزيناهن بالتأييد:
لا تفريط في قوت الشعب ...
سحقاً سحقاً للرجعية
الجابرية ضراع الثورة ...
بالإنتاج حنبني بلدنا
كانوا في جيهة .. وإحنا في جيهة
هن ينهبّبّوا بالكابات ...
وما همّانا الصيف وعَرقَنا
فات الريس وإنفّرقنا
إنفرتقنا على الجابرية
كنا ببنضم وما صدّقّنا
بالجابرية تجيها البوسطة
الشفخانة ومدرسة وسطى
قلنا يا ريت لو وصلوا فطور
وإنحزّمنا ضبحنا التور
كُنا أقلا ضِمّننِا النور
أو يا ريت لو زدنا الصفقة ..
وعاش ويسقط ويويا أيييويا
كُنا أقلا ضِمنا الموية
كنا بننضم بي إيدينا ...
دا أحسن ريس مَّرّْ علينا
ومن الله خَلقنا وشفنا خِلقنا ...
دا أول ريس زاتو يجينا
وكونو يجينا
يقنّب بينا...
يشوف البينا .... كفاية علينا
آ الجابرية يجوكي الحُكَما
آ الجابرية تواصلي البرة
آ الجابرية ولادِك تقرا
نمشي الليلة نصاقر الرادي
نمشي الليلة نحضر النشرة
وكنا نرجِِّع في كلماتو
إلا في ستة من الجابرية ...
قالوا .. تعبكم خارم بارم
يذهب حاكم خلف الحاكم
والجابرية تظل في حالها ...
حِلّة حياتا تسُر الظالم
صُدفة تموت وتحَيا اطفالا
لا جلكوز لا تقرا رسالة
ولا .. راح يطلع منها عالم
ما بينصفكم إلا ضراعكم
عّبّوا ضراعكم يا رجّالة
وخَلّوا بصركم دغري وسالم
حُكم العسكر ما بينشكر
كلو درادر ... كلو مظالم
وما هو قدركن تَحيو همالة
مقصودين والقاصد فاهم
وقاطعناهن ...
حاربناهن..
تميناها البينا شتائم
حالتُن أحسن ناس في الحلة
إيدا نزيهة ... عقولا نبيهة
قلنا بَعرفوا ... وقلنا فواهم
يطلعوا فالصو.. وقٌطّاع رحَمة
عينة شماتة وخارم بارم
وإحنا القُصّر واثقين فيها
وقطّعناها معاهم جملة .. وقاطعناهم
صاروا في جيهة ... ونحن في جيهة
ومر اليوم ... الشهر ... الحول
والجابرية بلد في حالا
قواسي شيوخا ... مآسي أطفالا
عذابات ناسا
من القُرّاصة ولي قَرّاصا ...
... حلة تعافر ومقطوع راسا
عشرين كيلو من الجابرية ...
صِبية تساسق بي كراسا
آ الجابرية عذابك فينا ...
لاكي القرية.. ولاكي مدينة
وفد في وفد يقوم ويجينا
... دايرة دراسة وإجراءات
عون أمريكي وقرض ألماني وحاحاءات
وحد ما نشوفلنا مسعولين ...
مسعولين أو خواجات
نجري نلم قدحاتنا عليها ....
ترطن ترجع زي ما جات
الشفخانة وعايزة دراسة ...
مدرسة وسطى وإجراءات
ولما المطوحة طالت بينا
إنذكرنا العون الذاتي
إنحزمنا وقلنا برانا ... نبني نقوًم للشفخانة
طوبة في طوبة وقوّمناها
ويوما التمت .. جات السلطة ...
عربي وعجمي ومرة رطانة
الشفخانة دا ماهو بكانا
وهاك يا تلتلة هاك يا ورطة
وغصباً عنك يا الجابرية ...
وغصباً عنك يا أحوالا
وحُميّاتا وموت أطفالا
وحُمرة عينكن يا رجّالة
قوة انشكت بين النقطة
وفي الجابرية تحوم الشرطة
هووا كلاب الحلة وصنوا
ومن يوم داك ما شفنا السِتًة
................
وفد الحلة السافر جانا ...
قال إنأكد شاف الخرطة
ونحن بدل نبني الشفخانة ...
إنسرعنا بنينا النقطة
الشفخانة دا ماهو بكانا ...
وكانت غلطة انقلبت ورطة
إنفاهمتو مع المسعول ؟؟ ؟؟؟
إنفاهمنا مع المسعول
وقال حا يقوم للشفخانة
أو يدفعلنا حق اطيانا
مع إنو النقطة وكت بُنيانا ...
قوَمتوها بلا زنزانة
وفي تقديرنا كلام معقول
كونو يقوَم لي الشفخانة
حاجة تضحك
محرقة هانة
إنتو تقيفوا مع المسعول
وألا الكنتو تقيفوا معانا؟
قلنا:-
خفنا نفقِد الجاي ...
خفنا نفشّل باقي الخطة
هو فضل جاي ؟ ... هي فضلت خطة؟
وانفرتقنا على الجابرية ....
وانعلقنا
تجينا البوسطة ومدرسة وسطى
والشفخانة قصاد النقطة
تجينا ... تجينا ... وما أنيقننا
ناس إنولدو ... وواحدين ماتوا
لما الريّس ودوشتو فاتوا
وبعد خراج أرواح وعذاب
فاتوا العسكر وجو الأحزاب ...
ونفس الوجع اتجدد تاني
ونفس الحلم الراح تحتاني
حتلناهو ... جمعنا رفاتو
نفس اليافطة في نفس الحتة :
الجابرية تحيي الشعب
دايرين بوسطة ومدرسة وسطى
والشفخانة بديل النقطة
فينا انكلم شيخ الحلة
صنقع ...دنقر ... صلي وسلم
وكانوا كلاب الحلة يهووا
وقال كلمتنا تكون فد واحدي ...
شان ننقوى وما ننزلا
شان مشهادنا وعدل الحلة
نحن نفوّز شيخ البلة
وزاد هوهيو ... كلوب الحلة
وبعضنا عارض ... رده وفاوض
شيخ الحلة القام حمسنا ...
بلة الحمش الزول ما دلة
أول فاهم.. وقبلو ولدنا ...
وراح يحكملنا بشرع الله
هو .. هو ... هووا كلابنا
لما أستغرب شيخ الحلة
وإنفرقنا على الجابرية
إنفرقنا ويوم الليلة انجمعنا عموم الحلة
شيخ الحلة قرأ القرآن ...
صنو كلاب الحلة وهووا
وبلة إنقدم سمَّي وصلَّى ...
صنو شوية ... وهو هو هووا
قام وإنكلم ... عن ينكلم كان ينقسم
النسوان الجاي تتهامز
الصبيان الجاي تنغامز
وكان ينبسم ... وكانو كلاب الحلة يهووا
شكَّر وشتَّم ... هو هو هووا
حلَّل وحرَّم ... هو هو هووا
هوَّد وسابنا ... وفات ودانا الآخرة وجابنا
قاطعناهو وصوتو إنوطَّا
أصلاً واطي وتاني إنوطَّا
دايرن بوسطة ومدرسة وسطى ...
والشفخانة بديل النقطة
التموين وزيادة الحصة ....
كهربة موية وسوق منضبطة
بلة انبرع وقال ببنيهن ...
هو هو هووا كلابنا
واستغربنا قبل بالمرة
لامن نهتف ترسى كلابنا
لامن ينضم بلة يهووا
بلة انحمس وقال بسقينا ...
وبي إذن الله يضوى الحلة
هتف الشيخ وهتفنا وراهو :
لا تبديل لشرع الله .... هو هو هو
لا ولاء لغير الله ...... طاء طاء طاء
عاش الفارس أمل الحلة
بلة الطاهر علي حسب الله
عاش الفارس أمل الحلة
بلة الطاهر علي حسب الله
.....
بلة الطاهر علي حسب الله
كبَّر فينا وقام إندلي ...
ولسة كلاب الحلة يهووا ...
وزاد هوهيون كبشاً ضاع
من مرحاتو وصاقع باع
بلة الطاهر علي بلاّع
.........
بلة الطاهر علي بلاّع
كانت أول مرة نشوفو ...
يومنا الشفنا اللاندكروزر
اللونا مخطَط
والبنوت الراسا مرَبط ....
التنبوبر
لوري مكوَّش أقمشة ..سكر ...
حتى الفوفو ... وعتل تؤجر
وأمحي المنكر بي معروفو
بلة الطاهر علي بلاع ...
أكرمناهو .... أكرمن ضيوفو
يشبه مرت الشيخ في وشيهو ...
لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برانا نغيير قولنا
إلا كبار الحلة بقولوا ...
بلة دا هولنا
بلة دا أصلا من ها الحِلة
إلا أنربى وقرأ في الخارج
رافق جدو الفتح التركي
وسيرتو انقطعت في المهدية
وررَرَة سمعنا أستوطن برة ...
وقام إنزوج من مصرية
جابت علي ... علي جاب الطاهر
حتى الطاهر خلَّف بلة
جدو انشيطن أخير ما لانا
بلة أنسركن وبقي مولانا وجاء وبرانا
أقرب واحد لي حاج بلة ....
أقرب واحد شيخ الحلة
بلة الطاهر علي حسب الله
أول مرة يصلي معانا ...قدمناهو وقم أمَّانا
صوتو مرخرخ لامن يقرأ
يقرأ ويقطع .. زي البطرا
لامن يركع جسمو متختخ
عند السجدة سجودو ممخمخ
شيخ الحلة بقول عن امرو
زول غرقان في الدين من عمرو
ستة سنين .. قابض في جمرو
وما فكاهو طريق الله ...
صوتو وِدِر من كترة ذكرو
وجسمو التختخو.. شدَة صبرو
قلنا حقيقة الزول بي عذرو
وفتنا قناعة.. ومااااانا قناعة
إلا الستة.. الصاروا جماعة
قالوا .. دا زول تربايته مياعة
ما يشبهنا ورفعو وضاعة
زول زول دنيا ودنيا صياعة
قصة دينو ودقنو بضاعة
وإحنا أصواتنا ... يا إما مباعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ... ومدرسة وسطى
والشفخانة وموية ونور
كونو يجيبا دا ما منظور
وزيادة الحصة ... الزول زول سوق
زول من جدو يلف ويدور
ويا الجابرية دا مطلب عادل ...
كونو تطيبي ... تكاتبي وتقري
ضوك يشلع ... دشك يرشع
ونحن دفعنا ضرايب بدري
ولسه بندفع ... لسع ... لسع
بس يا جماعة ... إن قضينا حياتنا تباعة
وصنيت رادي ... وقول في الفاضي
خوفنا نقوم ما نلقى أراضي
ونحن أساسنا وراسنا زراعة
والجابرية إن دايرة شفاعا
ما بيشفعلها إلا ضُراعا
عبو ضراعكن يا رجَالا ...
وخلو بصركم دغري وسالم
عبو ضراعكن آ رجالا ...
شيخ الحلة أضلَّ وضلَّ
وأسألوا بُرَّة وحاجة السُرَّة
عن التيبان وحكاية الصُّرة
شن لمه بلة وشيخ الحِلة مع شرع الله
والناس ديل العارضين برة
جربناهن كمين مرة
وتاني نجرب شان ننضرَّ؟!
ويا الجابرية معاكي سلامة ...
كان الفوقك ما فات مرة
كان كلماتن ناشف ريقا ... كانت مرة
إلا حقيقة ... وغلبنا نطيقا ...
وين في الصُرمة ... وقِل القدرة
وسكتناهن بس ما صنو
وقاطعناهن تاني المرة
وما من واحد فيهن ترَا

وبلة
كان هو طريق الناس وخيارا
فوزناهو.. وجانا زيارة
كرمنالو التور وعرضنا ...
وخليناهم برة الدارة
دايرن بوسطة ومدرسة وسطى ...
موية وكهربا والشفخانة ...
زيادة الحصة وسوق منضبطة
وصدو كلاب الحلة يهووا ...
ينضم بلة يهووا معاهو
نهتف نحن يزيد هوهيوا
مافي شهر جاتنا الخرسانة ...
جانا السيخ ... الطوب ... الرملة ...
جا الأسمنت شكارة شكارة
عديناهن ألف شكارة
وكرمنالن خيرا جانا
وكل كلاب الحلة الهوَّن ...
طفشناهن بالجبخانة
وفي صنانا تدودي الزانة
إنغالطنا كتير في بعضنا ...
أولى المدرسة واللا البوسطة ؟
أولى المدرسة
والشفخانة ؟؟؟؟
الشفخانة محل النقطة
ونان النقطة؟؟؟؟؟..
.نحن أهالي ... وودنا صافي
بيننا معزَّّة جرائم مافي ...
وما بنحتاج لي شرطة ونقطة
تحصل عِلة في شيخ الحلة
ونان النقطة؟؟؟؟
نحن الإيدنا بنت للنقطة ...
والجيَرنا زبالة أطيانا
ناس السلطة إن دارو النقطة ...
يمشوا بكان أرض الشفخانة
وما طالبانا خلاف زنزانة
مدرسة بوسطة ... مدرسة بوسطة
ستين طلبة وعشرين أوسطى
شغالين ما ملَو سخانة
مدرسة بوسطة ...
وقلنا غُنانا:-
يا الجابرية الله أدّانا...
حاج البلة المبروك جانا
جاب المدرسة جاب البوسطة
وبكرة يرجّع للشفخانة
نصحى نصابح موية الدُّش
نمسي نلاقي الضوْ عمّانا
مدرسة بوسطة ... مدرسة بوسطة
وتاوق ... وتاوق ... وتاوق ...اخ
وفجأة تبين تتضخ الخرطة
وكب تنتصب الميضنة ...أخ
أخ من حظك يا الجابرية
سابع جامع في الجابرية
سابع جامع وبالجبرية
وصدوا كلاب الحلة يهووا ...
أخ يا الناس الحالن قطَا
في البلدان الحظها فاجع
بق يا الصاح الماك متراجع
وحرِّق دبش الدنيا الغلطة
بق وانفرَق في الجابرية
بق في أرحامنا في شافع نافع
ترفعو أمو في حيطة الجامع
يكتب .. (يسقط دجل السلطة (
ويسقط بلة وشيخنا التابع
كشّفناك وكشفنا الخطة
تحيا كلابك يا الجابرية
ويحيا ضراع الزيتن طالع
والبيصارع مُر الواقع
تحيا ترابك والطورية
الجابرية تحيي الشارع
دايرين كهرباء
دايرين موية
دايرين سلطة وسوق منضبطة
دايرن هسة زيادة الحصة ..
الشفخانة بديل النقطة
دايرين بوسطة ومدرسة وسطى
والله بنعبدوا في ايت حتة
دايرين بوسطة ومدرسة وسطى
والله بنعبدوا في ايت حتة

من طرف **ahmed alkhabir** الإثنين 31 مايو 2010, 6:59 pm

بس يا جماعة ... إن قضينا حياتنا تباعة
وصنيت رادي ... وقول في الفاضي
خوفنا نقوم ما نلقى أراضي
ونحن أساسنا وراسنا زراعة
والجابرية إن دايرة شفاعا
ما بيشفعلها إلا ضُراعا
عبو ضراعكن يا رجَالا ...
وخلو بصركم دغري وسالم
عبو ضراعكن آ رجالا ...

شكرا يا خالد علي هذا الابداع
والله حميد دا بعدو الا نقول هل غادر الشعراء من متردم

من طرف **يس مصطفي** الإثنين 31 مايو 2010, 9:00 pm

شكرا الاخ الخبير ونحن انشاء الله مابنكون تباعه
وشكلو الزعيم دا شويه شويه ماشي مندحرج

من طرف **خالد عابدين** الإثنين 31 مايو 2010, 9:16 pm

نان قريبك محمد الحسن فضل ده ماتجيب لنا أشعارو , هو نحن لامين فيها
بعدين حميد زول قومي وماتضيق نظرتك شديد وزي ماقال لك سلمان (حميد لسان الغبش ) وآه ياغبش وكتين يضيع عرق الجباه الشم شمار في مرقة
وشكرا يالخبير على المرور

من طرف **الرشيد طه** الأربعاء 02 يونيو 2010, 9:17 pm

الاخوة الزعماء الكبار خالد سلمان والخبير
سلامات
والله انا رايى زى الاخ يس مع اعترافى التام بالشاعر الكبير حميد وينسب للشاعر حميد قوله لو فى شاعر ممكن ينافسنى هو الكنيبلى . وحميد شاعر لا يحتاج للتوثيق مثل شعرانا وواحد فيهم حميد زاتو معترف بيهو .

من طرف **ود المناصير** الخميس 03 يونيو 2010, 1:34 am

حاجة غريبة جدا .. تختلفون حول حميد وتسألون عن محمد حسن فضل وأن رفعت له قصيدة صوتية في القسم الخاص بشعراء المناصير وما في حد قال لينا عوافي إلا النعوفابي الله يديهو العافي :
ما بتهددنا ما بتهدد حوت بالغراق وتقول راسن ينشطب
التماسيح ما بيبقوا فار حتى لو مويتك تجقلب
أهلي بانين لبيت أبوك خلي بيت عمدانا التلب
غادي ليكم ختا تاريخ وفر عمداكم كالكلب
كربكان برضوا بضيفا ليك درتك في حروب الغرب

حيرتونا

من طرف **خالد عابدين** الخميس 03 يونيو 2010, 3:57 am

ود المناصير كتب:حاجة غريبة جدا .. تختلفون حول حميد وتسألون عن محمد حسن فضل وأن رفعت له قصيدة صوتية في القسم الخاص بشعراء المناصير وما في حد قال لينا عوافي إلا النعوفابي الله يديهو العافي :
ما بتهددنا ما بتهدد حوت بالغراق وتقول راسن ينشطب
التماسيح ما بيبقوا فار حتى لو مويتك تجقلب
أهلي بانين لبيت أبوك خلي بيت عمدانا التلب
غادي ليكم ختا تاريخ وفر عمداكم كالكلب
كربكان برضوا بضيفا ليك درتك في حروب الغرب

حيرتونا

حبيبنا ود المناصير
استاذنا محمد حسن فضل شاعر يعرفه الكل لايختلف اثنان حوله قدم الكثير بكل صدق وانفعال ولازالت كلماته ترن في اذني ونحن في الطابور في مدرسة عون الله المتوسطه عندما ضربت قوات التحالف العراق في بداية التسعينات لازلت اذكر هتافه بحياة الاسلام والعروبة والعراق وقولته في الطابور بكل انفعال ( والله لو جاء خواجة اسع هنا الا اشرب من الدمه ) وكان سيفعلها لو فعلا حضر واحد من خواجات السياحة والاثار في تلك الايام .
عذرا للخروج عن الموضوع ولكنا هنا نحتاج للتوثيق لكل اعمال شاعرنا واستاذنا محمد حسن فضل واشكرك على تنفيذك لضربة البداية وفي انتظار البقية .
حميد ياود المناصير تعجبني بعض قصائده خاصة الاتنين اللاتي قمنا باضافتهن سابقا ودار النقاش حولهن ( انتو ال كهنه دي جات كيف )
شكرا للاخوة الذين عطرونا بمرورهم

من طرف **ود المناصير** الجمعة 04 يونيو 2010, 3:52 am

والله يا خالد الجابرية دي لو عايزا مسموعة اليوم وبصوت حميد شخصيا أرفعها ليك

ماطال في بحرك- الشاعر محمد الحسن سالم حميد

ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد

رد: ماطال في بحرك- الشاعر محمد الحسن سالم حميد