براعم المناصير لايجيدون أكل القراصة وقد يأكلونها بالملعقة

صديق عبدالله علي أبوحنة كتب: ناس كتيرة ما بتعرف تأكل القراصة، حتى فيهم ناس كبار ما بيعرفوا ياكلوها. القراصة من تحت، قطعة وفي النص الملاح ومن فوق قطعة. في ناس تآكل لقمتا من قطعة القراصة الفوق بس، وتقعد تباري القطعة الفوق دى لغاية ما تكملا وتسيب ضهر الملاح مكشوف، ومن غير ما تهبش القطعة التحت، ودا غلط . أكل القراصة الصاح، تقطع قبلك وأثناء ما تاخد لقمتك تكون أخذت شئ من القطعة الفوق وتكون أخذتا شئ من الملاح فى النص، وتكون أخذت شئ من القطعة التحتانية الفي قعر الصحن، يعنى لما تقطع لقمتك، تقطعا زى قطع الطورية. اما اذا كان ملاح القراصة دمعة فنحن قاعدين نكبوا عليها من فوق، يعنى فوق ضهر القراصة، بعدين براهو بنزل يتخللا وممكن المرة الشاطري تقدها كدة شوية بي قعر المفراك تفوججا جاي وجاي عشان تتسرب فيها الدمعة.. يعني مليح القراصة بالدمعة يختلف عن مليح القراصة بالملاح أو البامية المفروكة. برضو القراصة الفيها الدمعة. تحفر تحتك .ما تقعد تباري القطعة البي فوق لامن تسد في طرف جيرانك...

غايتو يا باشمهندس اليوم اكتشفت انى ما بعرف آكل القراصة ...لانه لو عملت بطريقتك دى معناها الزول اضافرو تتنصّل من السخانة عشان كدا الناس بتاكل الطبقة الفوق عشان باردة بحكم تعرضها للهواء ....لكن و الله هندسة فى الإتيكيت يا استاذنا ....موضوع خفيف الظل و منكم نتعلم يعطيك العافية

والله موضوعك رائع ومأشالله عليك هندسة فى كل حاجة (نجرب الهندسة بتاعتك دى فى فطور الجمعة )

يا صديق اخوى نحن ما بنودر تراثنا ساكت الواحد من يوم ما يولد وياكل الكسرى نختلو قدحوا مليان قراصة ويحفر نامت يشبع ؟؟؟ وبعدين اقولك انت قايل الاكل الاخر بى يربى الشفع على باليمين الكسرة والقراصة هى التخلى الواحد ليه عنقرة ؟؟؟


تحياتى

ابو مصطفى

حاجة رهيبة

(عالم ابو حنه )انا داير اعرفك ياهندسات (وليس هندسه ) انت شنو وشغال بي راس ولاحاجة تانية ( P L C) مثلا
او ...... ام لديك 44 روح ...
ولا الحاصل شنو ورينا .....
(ياخ ماشاء الله وربنا يحفظكم اقصد يحفظك يا تاريخ وتكنولوجيا و....و...و... المناصير)
اقترح وجود شبكة ابو حنه العنكبوتية لندخل عبر قوقل او ... لناخذ المعلومة التي نريدها.
ارجو الافادة !!!!

معتصم تشكر ياخي ده من كرمكم..
أظن أنت عندك فكرة عن نظام الــــPLC
وكمان أظنكم شغالين بيهو كمهندسين...نحن هنا شغالين عليهو منذ15 سنة..الآن شغلنا كلو بقا عليهو..
نظام سهل في التشغيل...لكن إذا اتلكلك عليك؟ رجوعو حاجة تطمم البطن وهو مربوط مع نظامSCADA
في التشغيل..سواء في الكهرباء أوالمياه..أوأي مصنع كبير

تشكر ياهندسة وانشاء الله يكون هنالك تواصل في هذا المجال ونستفيد من خبراتكم

بعد التحيه أهلي : شكرا القامه أب حنه لكن الشي دي زي ماقال د.اليسع سمبوسه ....

العم صديق
والله جوعتنا
وقربت اقوم اصحي ام الاولاد اقول ليها كدي عوسي ليكي طرقه
لينا
في حاجه في القراصه لازم نقولا
لو قراصه بي دمعه مافي مشكله اللحمه ظاااهره انت وضراعك
ولو بي ملاح اوعك تدخل يدك اول خلي گل الناس تبدأ عشان يزحو العضم واللحمه عليك
ولو كان فطير بي لبن دخل يدك اول عشان تعمل ليگ حفره وتتملي باللبن ذي الجمام وكده
وتسلم يازعيم

يعني إنت حاضر زمن الجمام يا الباشق.. نحن قلنا ساري الليل هو البي يعرف الجمام، عشان اخد ليهو فترة في البلد يمشي ويجي..وبعدين شرري ما فيها حرف خور عشان يعملوا فيهو جمام..

الموضوع عن القراصة او السمبوسه كما اكد دكتور اليسع والقراصة هى قراصة الحجر.
المشكله الجيل الجديد من نساء المناصير لايجدون صنع القراصة اولا. والقراصة حتى تكون منصورية ميه الميه تعتمد على طريقة ضرب العجين بالطريقه الصحيحه .ولاحظ اهلنا يقولوا لعجين القراصة اضربى العجين وللكسره مددى العجين وللفطير اعجنى العجين وهذه دقة اللهجة المنصوريه كما ذكر صاحب المقال فى موضع سابق فعجين القراصة يضرب واليد مبسوطة داخل القدح وتحرك يمين وشمال واعلى واسفل مع اضافة الدقيق بالتدريج واليد داخل الماء حتى يتخلل الهواء العجين وتكون قراصة طريه حمراء .اما اذا عجن اى نقبض ونبسط اليد كما فى عجين الفطير او الرهوفى تكون قراصة قويه ولا تكون حمرا بسهوله لان العجين لم يتخلله الهواء .

يااااا
أهل القراصة جوا.. ناس هويدا
ووروكم طريقة عمل القراصة الصحيحة... وين انتصار صاحبة المطبخ المنصوري تعالي شوفي

أيوه يا دكتور اليسع تعال ياخي
القراصة هي قراصة الرضاف على الجمر بتاعة العرب... كما ذكرت أنت يا دكتور
وهي عندنا نسميها( العـُصـَّاره) اي السمبوسة بي لهجة مناصير العاصمة
اما السمبوسة عندنا في المحلي هي سمبوسة السفر الفيها التمر
والعصارة كمان نقول ليها( البرادي) يا بت سويلك قطعة برادي حاااره الولد مستعجل حمارتو مشدوده وفوق ضهرا حزمتين قصب.. البرادي حاجة كدة باستعجال قدر تكفي ليها نفر نفرين وهي نفسها العصارة مصغرة

الأخ صديق والله موضوعك شيق ونحن في السعودية اغلب أيام الأسبوع قراصة واليوم أنا غداي بقراصة وملوخية مفروكة ومعها بصل أخضر والطمام والشطة خضراء بي دكوة وليمون

ياااااه
يا شيخ فتح الرحمن.. بالهنا والشفا.. ماك منصوري اصيل عاد وود اصلا..

الخال العزيز الحنوني .....

لك التحية

والله رجعتنا لي زمن قديييييييييم ..زمن الزمن زين..

زمن السنبوس ..زمن العصارة ..زمن البرادى...

وآخييرا بلغة الشايقية القراصة ...

وتجول في خاطرى حكاية وأناصغير قاعد مع جدي نصر الدين في الدكان (في أم عطرون ) جاء حمد خير ود صديق

مشدد جمالو طالع الخلاء قالي ياولد أدني كيلو دقيق فينا ..خالي حامد قالو داير تسوها زلابية ..

قالو لا دار أسويها عصارة بي سمن..وكان ضقتها ياحامد كلو يوم تجني في الخلاء....

ياسلالالالام بالله يابحنه شوف البساطه دي ......

إنت تعرف الناس ديك لو أكلو هوت ضوق ولا بيتزا.

كان ماتو بي تسمم؛؛؛؛؛ ..

لهم الرحمة لقد زهبوا وتركونا في هذه الفانية.....

ود الأخت إبراهيم محمد سليمان. بركة الشفناك والله.. أيام جميلة بالجد ربنا يعيدا بأحسن منهان إن شاء الله... تسلم على المرور ايام ايام وانتم اطفال صغار نشوفكم. سبحان الله.. غايتو الدنيا دي.
إن شاء الله تجمعنا من جديد.. واحدين في أم عطرون وواحدين في أم درمان وواحدين في كريمة وواحدين في ابوظبي وواحدين يقروا بره.. ربنا يجمع الشمل..

سلامات أخينا الباشمهنس ودأبحنه وكل الآخوه المتداخلين ، عندنا فى المناصير زمان القُراصه خلاف العُصّاره ، فالقراصه تعنى
تلك التى تصنع على [الرُضَاف] بعد أن يحمى بالنار والجمر ثم ينظف ويصب عليه العجين الذى يكون معدا من قبل ويغطى العجين بالجمروالمليلى وتترك على هذا الوضع حتى تنضج ، وقد تصنع من القمح أو الشعير أو الدخن فى الغالب ويمكن أكلها
حتى بعد مضى عدة أيام على صنعها وتؤدم بأى إدام كالحليب أو الروب أو الباميه المفروكه [النِعيميى] أو الملوخيه ... إلخ .
أما العُصّاره ، فهى تخبز على الصاج الحامى [الدوكه]وقديما كانت على الفخار وقد تصنع العصاره من القمح أو الشعير أو الذره وهذه
تسمى بعصارة المريق .
وبمناسبة العصاره تحضرنى حكايه قصيره من زمن السواقى [حليل البلد وحليل مشيها ، تحت ضل السنط غنت سواقيها ].....
فى حلة المتيره بالجزيره شيرى وفى أحد الأيام وفى ظل دكان سلمان الشاعر ، كان الحلبى وسلمان وعطا الفضيل رحمهم الله يتناولون
طعام إفطارهم ، وكان هناك قدح حراز به عصارة قمح بلدى بملاح نِعيميى ، وكان عطا الفضيل كل ما يقطع لقمه ويريد أن
يتناولها تفلت من بين أصابعه داخل القدح الأملس فيحاول الإمساك بها من جديد فتروغ منه [كالسِحيلى]،عندها قال:والله ياالحلبى
العصاره دى بالنعيميى فى قدح الحراز ده إلا الواحد{يندَبالا} عشان يقبُضَا .

يندبا. ضيفا للقاموس يا الفكي.. ها هاها

والله قدر ما حاولت اقرأ يندبالا
غلبني عشان كنت قايله كلام عادي
بس طق
قلت خيرك جاتني
يندبه ليها
او يجي ماشي ليها برااحه وبدون صوت ذي الداير تهجملك زول

الخال العزيز الحنوني...علك رايق....

وإنشاء الله تكون فطرتا بي سمبوس زي كدي ..

لأنو نحنا يوم الجمعة دا يوم اللما عند أمي في البيت الكبيرعند أبونواس صا حبك......

واليوم يبدا بي الجبنة من الساعة 9الى11 وبعد داك يبدأ برنامج الفطور...

ويتكون من سمبوس بي تقلية وسمبوس بي دمعة وفطير بي روب ...

يعني شي عجييب والجماعة طبعا ماشاء الله من البرجوب لي محمد ولدي

كلهم لازم يشكلو حضور يوم الجمعة ..والونسي راقدي شي في البلد وشي في القضية.....

ورحم الله أخونا حبيب بكوري كان لمن يجىء الخرطوم مابيغيب عن اللمه دي خالص..

ولاينتهي الجمع إلا بصلاة الجمعة ......

وأسع أناخلاص الروب قام فيييي بقييت أشوف الكيبورت 10//10 من النعاس....

بجيك راجع بعدين.......

ابراهيم ها ها ها
الروب يروري الزول.. إن شاء الله نزوركم لما نجي السودان.زسلم على محمد ولدك..
وحبيب بابكوري والله كلنا فقدناه..
انا طبعا يا شيخ ابراهيم خالك وعمك في نفس الوقت من جهة محمد سليمان عمك.. وانتم اصغر مننا طبعاً ومن ناحية الوالدة خالك..
أعمل حسابك من الروب في الفطور

الخال الحنوني ......سلام

طبعا أنا أي زول ساكن من وادي شري وغادي بالنسبه لي خال..لانو زمان إنت ماتتخيل الشعور البحسو لمن أكون راكب الحمار وفتا بيت ود الملك وأختا اللفه على الترب وماشي على أم عطرون يسلالالالام ....

والله دي من أجمل اللحظات عندي ..رغم إنو مره زنقتني مطر في نص المقابر في الهكعي البعد تمر سليمان أحمد نعمان والمحل داك زمان يقولو فيو خوف والله أخوك إتزنق زنقة والحمار ابى يمشي وبقى يخر ويرجع لى ورا

وزمان اهلنا يقولو الحمار يشوف الجن ...

اها يازول في النهاية نزلتا منو وقدتو بي كرعي لي قريب الضقولة بعدين ركبت ...

اها لمن جيت في واديكم داك أنا والسيل وصلنا سوا يااالله ويااامييين مرقت منو ...

بعداك وصلتا أمعطرون بعد صلاة المغرب والزمن داك خالي حامد حي لكن جدي متوفى....

أهاسلمت عليهم وصليت المغرب في الخلوه الشفتها ديك .والمطر وقفت والزييييييفى كربت ..

وأخوك ضربتوا جوعة بت كلب ..قلت خير معتصم جاب البراد ملان والكبابي تكش كش ومعاهو كسري في طرف الصينية .بقيت أكب وأشرب وكت شربت إتنين خالي حامد خت كبايتو وقام قالي ياود أختي أنت دحين فطر ..

ياسلااااااااام حليل الزمن الجمييييل داك يابحنة؛؛؛؛؛؛؛؛؛؛؛

الموسوعة أبوحنة
ياسلاااام يا أخى أنا قولتَ إتصفح المنتدى وأمشى آكل لى حاجة,أها حسع ريحة القراصة والملاح دى عزبتنى خلااااص.غايتو الله يديك العافية يا أبوحنة.ههههه

ابراهيم حجازي وابراهيم محمد سليمان
الابراهيمان اجتمعوا..
حاول أعمل لك صاج يا ود حجازي في الغربة ينفعك. واشتري الدقيق نمرة اتنين وتعلم تسوي القراصة تشد الحيل بالحيل..
تعرف يا ابراهيم محمد سليمان.. لسه الترب دي نحن نخاف منهان خاصة إذا الحمار حرن لاورا زي حمارك الحرن ده؟
يلعبوا في الكتشينة وانا معاهم في أم عطرون بس اعاين ماني قاعد أعرف ألعب الكتشينة لى يوم الليلي
وعمر أخوي وحامد مغرمين بيها ومعاهم سليمان أب نواس يجيها من البرجوب.. ومعاه أبو علي عيسى عضو المنبر
حامد يقوم يقول لمحمد نصر الدين يا ولد قوم جيب الغداء ومحمد يقول بالله يا حامد بعد دوري ينتهى! أسع ما بجيبو
ومحمد يكون الدور عليهو؟
يقوم حامد يقول لى عمر أخوى الولد ده ما حضر زمن نصر الدين في شبابو زمن ادبونا نحن!
ولادة كبر.. زمان نصر الدين تقول لا، تلقا الكف عند قعر اضانك لامن أضانك تصر!

الخال أبو حنة ...

أول حاجة أنت كنت وين مسجل غياب ؟؟؟

بعدين لقيتك مافي قت أسدليك الفرقة يازول ايدي وجعتني لاإنت لاودبروى بالمناسبه أمشلو في الجرف تحت

شوفو لينا وين ؟؟وبرضو ماتنسى ود المناصير في تفقدو ا إخوانكم ؟؟

برضو خرج ولم يعد؟

أناغايتو وراك ماقصرت تب حتي الكليس أديتو حقو..

الباقي عليك؛؛؛

ابراهيم. أنا كنت في ابوظبي.. وجيت سكن المشروع الماسكو تابع لهيئة كهرباء ومياه ابوظبي التى أعمل فيها
الاولاد في شقتهم في ابوظبي. وكانوا قاعدين معاي في سكن المشروع يروحوا ويجوا اربعة سنين. معهم ابني الكبير أحمد يقرا في جامعة ابوظبي
المشروع يبعد حوالي 70 كيلو عن ابوظبي
قضيت ثلاثة ايام في ابوظبي وجيت راجع.. ممكن أمشي كل يوم واجي . لكن ظروف الشغل تتطلب اني اكون متواجد فيهو بكثرة..