الزوجة الثانية

من بعد الســــــــــــــــــــلام

(ورمضان كريم وتصوموا وتفطروا على الف خيييير))

كل رجل بالحياة يبحث عن تكوين ذاته وتكوين اسمه وتكوين اسرته وعند بلوغهم المرحلة التى يختارون فيها من ستشاركهم البنيان لا يتعبون كثيرا بعضهم يختارون بالظاهر وبعضهم يختارون بالنسب وبعضهم ينحازون لمن لها مال وبعضهم لا يبدون رأى ينتظروا خيار اهلهم و....الخ..وتبدا الرحله وبالتأكيد من اختار بنفسه ودرس وفهم خياره لن يتعب كمن اختارو له فقط لتنجب له اطفال ولتراعى له بيته ..وبالرغم من كل هذا تستمر الحياة ولكن ربما تتعسر وربما تتعسر جدا وربما تقف وياتى السؤال هل تصبح الزوجه الثانية الحل؟؟ولما يضع الرجال جميع المشاكل على كاهل زوجاتهم كان بهم ملائكه لا يخطئون ؟؟ولما الانانية عندهم تفوق حبهم لزوجاتهم واطفالهم وبيتهم؟؟لما يفكر الشخص منهم فقط كيف يريح نفسه؟؟ومامصير ابناءه؟؟وهل سينجح مع الزوجه الاخرى ؟؟ام سيحقق نفس الفشل مع سابقتها؟؟



انا عن نفسى بشوف مافى سبب مرضى تمام للجوء الرجل الى الزوجة الثانية غير الاسباب الفرضيه مثل:الزوجة الاولى لا تنجب..هنا له كامل الحق ولكن بالمقابل ان كان هو لاينجب هى ايضا لها كامل الحق..وغير ذلك كل من يلجئ لخيار الزوجه الثانية شخص فاشل فشل بالمحافظه على بيته الاول وسيفشل فى الثانى فشل بان يكون زوج مثالى وسيفشل للمرة الثانية فشل بان يكون اب جيد وسيفشل بان يكون مربى جيد..

غايتو عفيت منك الناس كلها لبدت مع انو الغالبية من الرجال يفكرون بالزوجة الثانية، لي عودة لموضوعك واتمني ان يشارك الجميع بآرائهم حتي نصل لبر الأمان .

الزوجة الثانية !!!

من بعد السلام..

مشكور يالسيد ابراهيم ع المرور ...والناس عملت نايييمه عديل ومنتظرين طلتك ورأيك

سلام كبير للسيد الكبير ابوحنه..

الزوجة الثانية؟؟حل ام مشكله؟؟

خايف

ههههههههههههههههه خايف من شنو؟؟؟؟؟وصل رأيك باعلى صوت ...واطمن اذا رايك حل ماح اكلمل المدام بس برسل ليها رساله اخليها تجى هنا تتفاهم معانا

وصل رأيك باعلى صوت

صوت العنج

بعد التحيه اهلي : الزوجه الواحده هي التي تستحق المناقشه فكثرة الزوجات هي الاصل ولا خلاف علي افضليتها للزوجه والرجل والمجتمع ومن تزوج بواحده فهو الفاشل لانه غير قادر علي العدل اذا ثني وثلث وربع ,,,هذا راي لايخص بيئه محدده بل للانسانية جمعاء ,,ولكن للبشر والمجتمعات قيود من صنعهم يتقيدون بها ولايقدرون علي الفكاك منها ......

الاخت تماضر سلام عليك

العجبنى فى موضوعك انو خوف ابوحنة

من بعد السلام...

السيد يوسف احترم رأيك جدا ولكن اختلف معك جداااااا وجدا

انت بالمناسبه جبت التايه بس مافى مكانه ..مفروض عشان خاطر الانسانيه والمجتمع تكون واحده يعنى ماهى الانسانيه دى ما بانك تتزوج كم وحده وتنجب اكبر عدد من الاببناء دى والله بتخرب الانسانيه والمجتمع ....الواحده دى صدقنى 99.9ماقادرين يعدلوا معاها او ينصفوها فكيف بالمثنى وغيره..وعلى فكره مافشل وابدا الفشل فى انك ماتقدر تعدل هنا تمشى تطبظه وتجيب وحده تانيه وبعدين الاطفال البيجوا ديل حقوقهم وين؟؟رعايتم على حساب منو؟وهل سيتفرق الاب بين منازله الاربعه لكل طفل؟؟هل سيعطى هذا الاب كل طفل له حقه الكامل من العناية والرعاية؟؟هل يستطيع هذا الاب الانصاف بين ابناءه؟؟وهل يستطيع تربيتهم جميعهم على اكمل وجه؟؟وهل يستطيع ان يسكنهم كما يمنون؟؟وان يطعمهم من افضل الطعام؟؟والاهم من ذلك هل يستطيع تعليمهم على احسن وجه؟؟؟وهل يستطيع ؟؟؟ وهل يستطيع؟؟

اخى يوسف تعدد الزوجات من اسهل مايمكن حدوثه وبتعدد الزوجات يأتى تعدد الابناء ولكن ماذا يحدث بعد هذا التعدد؟؟؟

(اعرفوا ايها الرجال ان كنتم لا تعلمون اى واحد اتزوج على زوجته وكان لديه منها ذريه فليعلم حد اليقين انه سقط من نظر ابناءه حين كسر قلب امهم ..انه خرج من صدر ابناءه حين جعل لامهم بديل...انه فقد حب ابناءه ولكن فقط يظل الرابط الوحيد بينه وبينهم هو وصيت اللا تعالى ..وبالوالدين احسانا))

معليش على الاخطاء ياجماعه عندى مشكله فى الكيبات..(وصية الله تعالى)

وعليك السلام يالسيد المجذوب..

والله انت عارف هو خاف شكلوا عندو النيه

المجذوب والله موضوع تماضر خوفني..
لالالا ما عندي النية ابداً تماضر عايزة تودينا في داهية!

ههههههههههههههههه لا لا مدام مافى نية انت فى الامان ياباشا نحن كنا دايرين الناس العندها النيه او العملته او المن يتلموا فى مناسبه ماعندهم سيره غير الواحد لو عرس والواحد يشوفلوا مره ذى الناس والبقولوا كده ديل بس راحوا وين الناس ديل انا ماعارفه

( فإن خفتم ألا تعدلوا فواحدة )
...................................
وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ ۖ فَلَا تَمِيلُوا كُلَّ الْمَيْلِ فَتَذَرُوهَا كَالْمُعَلَّقَةِ ۚ وَإِنْ تُصْلِحُوا وَتَتَّقُوا فَإِنَّ اللَّهَ كَانَ غَفُورًا رَحِيمًا (129)

الخلقن ذاتو قال: لن تستطيعوا أن تعدلوا بيناتن..
ومشى في التأكيد زيادة
وقال
ولو حرصتم..
زمان كان يصنعوا بعض عربات البضاعة في ورشة العمرة في عطبرة.. بعدين تلقا مكتوب على عربية البضاعة. هذه العربة لاتسير بين خط نيالا وبابنوسة..
أو هذه العربة لاتسير بين خط عطبرة هيا..
ليه!
اسباب هندسية كثيرة يطول شرحها الآن..
لكن على اقل تقدير لو جاء ملاحظ فاشل وراح رابط هذه العربة في قطر ونسى أنها مكتوب عليها ملاحظة..
ماذا يحصل
طوالي راح تتقلب هذه العربة وقد تقلب القطر كلو وتتسبب في كوارث..
هذه الصناعة البني آدمية!
فما بالك بالله الصنع النسوان نفسو.. قال لن تستطيعوا أن تعدلوا بين النساء ولو حرصتم..
نجي نحنا نقول نقدر..ونمشي نشرع في الفقه، ونقول بس ميل القلوب الله عفا عنو! والنبي عليه السلام كان يريد السيدة عائشة أكتر من رفاقاتا.. وكان يقول لما الغيرة تاكل قلب الباقيات.. ( اللهم هذا قسمي فيما أملك ولا تؤاخذني في مالا أملك!)
هذا النبي عليه السلام ووضعه مختلف وابيح له زواج تسعة لأغراض تربوية وأغراض دينية ولكي ينشر الإسلام ويؤلف بين الأعراب والقبائل.. وضع خاص يعني.. لاينسحب على الأمة..
.......
أما بالنسبة لميل القلوب الآن.. اصبح ضروري للزوجة.. الحب يعني.. الرومانسية يعنى.. العشق.. التتيم.. الوله.. الهيام... الجوى.. لذاذات التباريح.. الغواية..أهم شئ ميل القلب عند البت اليوم.. بل هو الأساس..
يعني مافي شي مرغوب غير ميل القلوب.. عشان كدة الزوجة تحب أن يكون زوجها كله لها، كما هي كلها له، بلا منازع وبلا مشارك وبى شريك. عشان تبدع وتتفرغ للإبداع.. عشان تنتج اطفال أصحاء..
إذا كان الرجل ينتج الصاروخ مثلا.. فإن المرأة تنتج الرجل الذي انتج الصاروخ.. لابد أن يكون عمل المرأة المنزلى مقيم زي عمل الرجل خارج المنزل..
لكن طبعا الضروريات تبيح المحظورات.. يعني لو عقيم. يحق له الزواج
أو لو مريضة مرضا لايرجي شفاءه
كدة ممكن
أما غير كدة فلا تعدد ابداً..
والغربية بعض مشرعي الدين تستهويهم هذه المسائل المشرعة للضرورة ويقعوا ليك في الحكاية خبط.. واحدي واثنين وتلاتة واربعة .. بل بعضهم يصل اربعة ويطلق واحدي.. الشينة فيهم .. ويروح يتزوج واحدي تاني.. وقد يغري واحدي تتنازل ويسجل ليها بيت مثلا ويجيب ليها دهب عشان تتطلق ويروح يتزوج واحدي تاني سمحي وكدا..
هو الدين كدا!
يعني عايز تطبق شرع الله في دي بس!
يعني عرفتا شرع الله في دي بس!
يعني فلاحتك بقت في دي بس!
الله ده ما شرعو كتييييييير في حاجات تانية كتييييرة
ليه بس بقت فلاحتى عند بقيرتي..

يعني عايز تطبق شرع الله في دي بس!
يعني عرفتا شرع الله في دي بس!
يعني فلاحتك بقت في دي بس!
الله ده ما شرعو كتييييييير في حاجات تانية كتييييرة
ليه بس بقت فلاحتى عند بقيرتي..

الاخ صديق سلام عليك

ياخى انت متجرس ونحن قبلنا عذرك

وبقيت تشيل وتجيب فى المبررات الحاصل شنو .. دا كلو خوف ولا عاوز تقنع الناس الماخايفين

الاصل فى الزواج التعددية كما جاء فى القران الكريم

وكما حثنانا رسولنا الكريم على التكاثر وقال تناسلوا تكاثروا فانى مباه بكم الامم

خال ابرار
هههههههههه
آي صوت العنج لحقني طرفو يا محمد
عشان كدة جرييت واطي
.............................
ود عبد السيد..
المرة دي بريييد للحريم مدعوم بالنصوص.. شفتا الخوف يسوي كيفن!

بعد التحيه أهلي : الكبير ابحنه الاصل في الدين التعدد ولامزايده علي ذلك فهي حكمة الخالق ,,,

يا يوسف زي ما قال ليك علي الكليس هو واحدي الزمن ده الناس قادرين عليها! الحكاية بقت صعبة..
أما العايز يعدد مثنى ولاثلات ورباع.. حا يقول بعاع.. يعني على كيفو

الإخوان الكرام وصاحبة البوست ، لكم تحياتي الزوجة الثانية البقدر عليها اليسويها بعد القناعة التامة والإقناع لأصحاب الحق فكم من شخص متزوج أكثر من واحدة وناجح مائة في المائة وكم من شخص جالس مع واحدة ومنجضة ليه الحب في جضومة ويحضرني هنا حادثة لشخصين أحدهما شاعرنا الكبير إبراهيم الشاعر رحمة الله عليه لما تزوج ابن اخته سليمان حامد رحمه الله بالزوجة الثانية قال له :

ياود الأخت سلمني

لو ما بنخاف الإني

كلنا بنريد الحني

والقول الثاني للصحفي المنصوري عبدالله محمد أحمد الصادق كان يقرأ في جريدة والجماعة حولينه يتكلمون في الزواج وزواج الثانية وهو ما جايب خبر ولكي يكون معهم في الصورة سألوه ما رأيك في الزوجة الثانية فقال لهم : والله لو كانت الزوجات مثل العندي ما في إنسان يفكر حتى في الأولى ، يعني الراجل الحب حرقان وليس نضجان في جضومه. قصص للواقعة وأرجو أن لا أكون قد جرحت أحدا في هذا الشهر الكريم . والبنية تماضر لم نعرف رأيها وهي على ما أظن غير متزوجة والتجربة غير موجودة وهذا اجتهاد منها ولكل إنسان وجهة نظر وكل المتداخلين بما فيهم العبد لله أعرفهم رافعين الكاكايا وتقبلوا مروري.

تماضر خااااااااتيه فتحتي للرجال الموضوع دا وخليتيهم يقومو ويقعدو وواحدين موترنين غايتو يوسف ثابت مامعروف الحاصل شنو لكن ودابحنه مجرس تاااب وقال هووووي انا استأذن خلوه

جلا ـ بلغة اهل الضمنة

باص - بلغة اهل الكتشينة

انا من راى الاخ يوسف الاصل التعدد ومعروف ربنا لما يحرم او يبيح او يفرض امر ما يكون لاسباب تعرف بحكمة مشروعيته فلولا ان االه ادرى بطبائع عباده لم يبيحه والان الواقع يثبت لينا صحة هذا الامر اذ ان اعدادالاناث فى تزايد بينما اعداد الذكور فى تناقص ولو الناس ما كانت من المتعددين البنات الكتار ديل ياكلو نيم *** بس انا اشترط ان يكون قادر من كل النواحى بما فيها العدل والنساء المفروض يتقبلوا هذا الامر بواقعية اذ فيه حلول لمشاكل العنوسة التى تضرب باطنابها الان وما ورائها من مشاكل جمةوالواحدة ماتكون انانية والنفوس لو اتطايبت الناس بى تعيش مع بعض ومن هذا نقبل بان التعدد ليس غاية فى ذاته ةانما وسيلة لاغراض اسمى وحلول لمشاكل متفاقمة يوما بعد يوم

من بعد الســـــــــــــــــــلام

السيد خال ابرار....

الناس دى ماشكلها مبيته النية بس دى شكلهم راجين بس عيد الضحيه عديل وربنا يستر....

وهههههههه انت كان باريت المسلسل حق الزوجه الرابعه واحدى مابتلم فيها مابنصحك ياولدى تواصل فى المسلسل دا..

بس عليك الله العرضوا ليها الكم كيلوا حقات الذهب ديل ورفضت دى لمونى فيها وانا بقوم معاها بالواجب مجنونه دى هو فى زول عارف يجيب حلق ساى

..اسعدنى مرورك...

السيد الرئع ابوحنة..بعد كلامك دا مابقى فى كلام ينصر دينك (مع انو كنا بنجرر فيهم عشان نعرف فى بطون الناس دى فى شنو بس شكلوا الفى كتييير

السيد المجذوب والسيد يوسف....

خمسة يحفظها الرجل:
"الرجال قوامون علي النساء"
"مثنى وثلاث ورباع..."
"ان كيدهن عظيم"
"للذكر مثل حظ الانثين"
...

"النساء ناقصات عقل ودين"
وخمسة ينساها الرجل
"خيركم خيركم لاهله"
"رفقآ بالقوارير"
"استوصو بالنساء خيرآ"
"مااكرم النساء الإ كريم ولا أهانهنا الإ لئيم..."
"بشروا ولا تنفروا"
"ولن تعدلوا ولوحرصتم"

فسبحان الله وعجبنآ لك ايها الرجل تفسرون ماتريدون من من الكتاب والسنة ونتنسون ماتريدون برغم انه ايضآ من الكتاب والسنة.

الخـــــــــــــــــــــــــــال كيفنك...والنجاض حااااصل يعنى مش ..انا بكلم

السيد مصباح....

من بعد السلام..واسعدنا مرورك جدا..وعجبنا رايك...

والبنيه تماضر دى انسه لسه وبدرى عليها شديد والكلام دا شلاقه ساى منها ..وعشان مااى حاجه الانعيشه حتى نحكم عليها فى حاجات ممكن من الحياة العامه تقدر تصل فيها لى قرار...وصراحه انا رأى والقصد الخلانى اكتب البوست دا كلو لاوقفه مع حواء عشان مايجيبوا ليها ضره ولا ضد ادم عشان مايدبل انا واقفه مع الاطفال البجوا حرام انانية الكبار تحرمهم من حياتم حرام الكبار يعيشوا زمنهم وزمن اولادم من حقهم يعيشوا فى جو اسرى متناغم من حقهم يصحوا كل يوم الصباح ويصبحوا على امهم وابوهم ومن حقهم يتعلموا الاحترام لما يشوفوا امهم وابوهم بحترموا بعض كيف ومن حقهم يعرفوا التقدير والحب ومعنى العشرة ومعنى زوج وزوجه من داخل منزله وطبعا دا كلوا بعرفوا عن طريق امهم وابوهم برضو...والكلام كتير وصراحه صعب جدا وجدا وجدا ومستحيل زول يقنعنى انو المتزوج واحده وعايش معاها ومع اولادوا ح يكون ذى المتزوج اتنين او تلاته مستحيل اكيد فى خانات ح تكون فاضيه اكيد ح يجى يوم اولاده يكونوا محتاجين لى هنا وهو ساعته ح يكون هناك وغير كده حاجات كتيره ماهو العدل دا ما الا بين الزوجات بس ...والكلام دا كلو فى الاخر مابينفى انو فعلا فى واحد ممكن يكون متزوج اكتر من وحده وناجح بس فى قانون الندره...ولكل منا قناعته وارائه فتقبلوا رائى ..

الانيقه محاسن......

اختك دقست سااااااااااى انا مالى ومال دا اسى برى برى تانى توبه

حريقه:بى لغتكم دى^_^

السيد محمدعلى نصر الدين...

نحن لسنا ضدالتعدد نحن فقط نخشى ان لاتعدلوا ولنتم حقا لن تعدلوا

هههههههههههههههههههههههههههه انت بالذات ياخال ابرار ماكان تجى البوست دا تدبل قال ماقولنا ليك طول مانت ماسك فى سيرة الدبيل دى مابتلقى ليك وحده ساااى..وبعدين انت قطرك دا صفارتوا وجعت راسنا تب ماناوى تخلينا نأكل لينا ضلعه فى عقدك ولاشنو...


تفطروا بالهناء ...طبعا نحن هنا لسه بدرى علينا شوية..

الساده المتداخلين لكم جزيل الشكر ونتلمى فى ساعة خير

بعد التحيه أهلي : اولا سلام عمنا ابحنه بعاع دي مافهتما لاني خلقت في احسن تقويم ,,,,ثانيا انا بناقش من حيث المبدأ ايهما افضل ,,ماعن تجارب شخصيه يعني ياما ناس معرسين واحده والطلاق حصل يعني شنو وياما مثنين ومربعين كمان وفي امان الله ,,,

tamador alsyed كتب:السيد مصباح....

من بعد السلام..واسعدنا مرورك جدا..وعجبنا رايك...

والبنيه تماضر دى انسه لسه وبدرى عليها شديد والكلام دا شلاقه ساى منها ..وعشان مااى حاجه الانعيشه حتى نحكم عليها فى حاجات ممكن من الحياة العامه تقدر تصل فيها لى قرار...وصراحه انا رأى والقصد الخلانى اكتب البوست دا كلو لاوقفه مع حواء عشان مايجيبوا ليها ضره ولا ضد ادم عشان مايدبل انا واقفه مع الاطفال البجوا حرام انانية الكبار تحرمهم من حياتم حرام الكبار يعيشوا زمنهم وزمن اولادم من حقهم يعيشوا فى جو اسرى متناغم من حقهم يصحوا كل يوم الصباح ويصبحوا على امهم وابوهم ومن حقهم يتعلموا الاحترام لما يشوفوا امهم وابوهم بحترموا بعض كيف ومن حقهم يعرفوا التقدير والحب ومعنى العشرة ومعنى زوج وزوجه من داخل منزله وطبعا دا كلوا بعرفوا عن طريق امهم وابوهم برضو...والكلام كتير وصراحه صعب جدا وجدا وجدا ومستحيل زول يقنعنى انو المتزوج واحده وعايش معاها ومع اولادوا ح يكون ذى المتزوج اتنين او تلاته مستحيل اكيد فى خانات ح تكون فاضيه اكيد ح يجى يوم اولاده يكونوا محتاجين لى هنا وهو ساعته ح يكون هناك وغير كده حاجات كتيره ماهو العدل دا ما الا بين الزوجات بس ...والكلام دا كلو فى الاخر مابينفى انو فعلا فى واحد ممكن يكون متزوج اكتر من وحده وناجح بس فى قانون الندره...ولكل منا قناعته وارائه فتقبلوا رائى ..

بعد السلام عليكم ورحمه الله وبركاته

رمضان كريم واعاده الله علينا سنوات ودهورا طويله

ادام الله لنا نعمة العافية والصحة

منذ فتره ليست بالقصيرة لم اتصفح هذا المنتدي كما كانت عادتي ولعل لرمضان نصيب من ذلك

فقداني لعزيز واخ وصديق في قمة الزهد في هذه الفانية , واخلاقه العاليه وسمح سيرته بين الناس جعلت في حياتي فراغ

عشمنا ان تكون سيرته هي القدوره لنا في مسار هذه الفانية

أشار الي احدأعضاء ورواد هذا المنتدي بالدخول في هذا الموضوع

أولا لدي سؤال للاخت تماضر وأتمني ان تجيب عليه بكل صدق

ماهي دواعيها لكتابة هذا الموضوع ؟؟؟؟!!!!1

بعد الاجابة لي عودة انشاء الله

رمضان كريم

السلام عليكم

غايتو لقينا الزحمة دى بى هنا وقلنا نديها كوز

أنا غايتو داير أوصل ليكم حاجة.

أناأمى نمرة 4 لوالدى وجابانا14 من ولد لى بت.

نمرة 4

يعنى أبوى ماخد مع أمى 3.

شكرا

معناهوأنا نفسى محدثانى أدبل ومانى خايف من زول ومانى داسو.

خاصة وأننى مغتى ماعونى وماخد بت عمى.

شكرا مرة تانية ورمضان كريم

انتو ياساري الليل واب حنه داير اسالكم محمد علي نصر الدين قاعد يسكر ؟

الكلام القالوا ده الا يكون ما واعي

يا استاذ هاشم انا ماقت داير ادبل ووذلك لاسباب كتيرة لكن قت مادام ربنا اباحه وبالقران وفى زول قادر على تبعياته الناس حقو تشجعو لان وكما اسلفت فيه حلول لمشاكل العنوسة وسط بنات حواء

واحدة سمحة قالت : عليكم الله الرجال ديل ما لن ومال الدبيل وزيادة المشاكل !!!

واحدة شينة وكبيرة قالت : والله انا كان بقيت راجل نسوانى ما ينقصن من الربعة يوم وحد !!!

الاخ محمد علي نصر الدين اتفقنا هذا هو الخط المرسوم وهناك طرف اخر متفق معنا في هذا الخط من بنات حواء

اتفقنا ولك تحياتى

من بعد الســـــــــــــــــــــــلام...

الاخ سارى الليل...

يامرحب بيك من تانى بين ناسك فى المنتدى وربنا يرحم ويتقبل صديقك ويجعل مسواه العلا من الجنان...

وصراحة الخلانى اكتب الموضوع دا كنا بنحضر فى مسلسل الزوجه الرابعه وفى زول اتناقش معاى فى حكاية التعدد دى وبعد المسلسل انا كنت دخلت المنتدى ويدى اكلتنى وكتبت..بس بصراحه اكتر الموضوع دا من اكتر المواضبع الغايظانى فى حياتى عشان انا بشوف وكلنا بنشوف اطفال وشباب وبنات ضايعين بسبب الحاجات دى يااما اهلهم مطلقين يااما مالقوا عناية كافيه يااما اصلا الابوا مافاضى عشانيسال عن واحد من اولادو والكثير الكثير من المعاناه وانا اتعايشت مع كم شخصيه من بينم الابوها متزوج اكتر من وحده ومن بينم الامها اتطلقت عشان اتزوجوا فيها ومن بينم ال....الخ....عشان كده اناذى ماقولت انا بكره انانية الكبار سوا الرجل البتزوج من غير سبب او الام البتتطلق عشان ح يتزوجوا عليها وهم هنا الاتنين بنسوا اولادهم ومستقبل اولادهم وحياة اولادهم ..فاعلموا ايها الاباء كما انا لديكم حقوق على ابنائكم هم ايضا كذلك اتقوا الله فى ابنائكم ثم اصنعوا ماشئتم ان تصنعوا فحسابكم عند بارئكم...

من بعد السلام..

والله اكرم..

ويامراحب باليد على الحمود..

وماشاء الله وربنا يسعدكم ويحفظكم..

ومبروووك مقدما وربنا يهدينا جميعا