اقوال وحكم فى الشعر المنصورى

قال مخاطبا نفسه معاتبا
انتى ميسك وينو اليفيك الاوان فات
الفروض ناساه لى فى الذكرى ماجات
تتذكرى اليوم التجيك فيهو السؤلات
تجاوبى غصب عن ماارتكبتى من الخطايات
يوم لاينفع مال لايدخل الناس فيهو واسطات
الا يدخل شفيع الامه يقول سامحوهو فى الفات
...............
ياجنى الزول ان اباك لاتنجلبلو.
ان بقيت زى المطروالسيل تكبلو
بى يخليك ويتبع الريح التهبلو
...................
الريد الكتير لابد تعقبو عداوه
والقلب ان مرض بى هينى مابداوه
والزين والكعب ميزانن مابساوه
وان حصل القنع ياستى لانتلاوه
.........

حقيقة يانادر القلب ان مرض بى هينى مابداوة....شكرا تقبل مرورى

nader nor elhadi ali كتب:

...............
ياجنى الزول ان اباك لاتنجلبلو.
ان بقيت زى المطروالسيل تكبلو
بى يخليك ويتبع الريح التهبلو
...................

.........

يا سلام فعلا إن من البيان لسحرا........تقبل مرورى و إعجابى بمموضوعك الجميل أخى

قال أحدهم

ما بتدوم يا حورى ما بتدوم
لا تخُتْ فى البطالة لوم
بالشّهَف مااااااااا بيكبر الكوم
و الرِّزق من الله مقســــــــــــوم


و يقول أيضاً
يا كريم تدينى الصبر
و يااا لطيف تلزمنى الصبر
و الثبات فى كل الأمُر
النفِس غشّاشـــــــــــة و تضُر
جنبها إبليس حافر مقُــــــــــــــــر
وشرَكو لى وكت الموت يضُر
يا الرســــــــــــول من طبّاتو كُرْ
الليلة حِلْوة و باااااكر المــــــــــــــــر

شكرا مونتارى على المرور ويديك العافيه

شكرا بت الماحى على والمرور واثرائك للموضوع..يديك العافية.

يامونتارى وبت الماحى واحد قال.
الزول الاباك ياقلبى يقن منو
خاطرو معاك خرب ساكت يفر بى سنو
الضحك البعد غلت النفوس كيفنو؟؟
كم لله من دفن الجنى وفات منو

شكر صاحب البوست –
اتمنى الا يصفنى البعض بانى رفعت بوستا قديما—
فلقد اخترت عنوان قريب من هذا البوست ومن ثم وجدته مشابها تماما له ولعدم التكرار رأيت اكتب فيه –
الاخ نادر يحفظ الكثير من الاشعار ومن النوع القوى –ارجو كتابة المزيد لنعلق عليه ونتأمله جيدا—
فى الشعر المنصورى هنالك الكثير من الحكم والبلاغة والوصف والتشبيه والتصوف والقيم الادبية والمجتمعية وغيرها –ورغم قلة التعليم والثقافة فى تلك الفترة الا ان هنالك اشعارا تحوى مضامين وحكم وبلاغة فى غاية الروعة –وافتكر ان الاخ نادر اختار ابيات قوية جدا فى بداية البوست وهى نموذج لتلك الاشياء—
احيانا تجد هنالك تشابها بينها وبين اشعار الجاهلية واشعار العرب عموما واحيانا نجد فيها كل ضروب البلاغة –وكذلك سمات عديدة كالشجاعة والفراسة والكرم –وغيرها من القيم والسمات والصفات—واحيانا نجد التصوف وذكر القيم التى ينادى بها ديننا الحنيف وكذلك التصوف عموما حتى انه يستصحب احيانا فى النمط او النوع الغزلى من الشعر –
لا اطيل –ولكن اعرض هنا امثلة –
يقول الشاعر الكبير على ود سلمان رحمه الله –
عرفناك يازمان الساعة عصّر
كل ماتزرع الطيب يقوم شر
فى البيت الاول يعنى ان الساعة اوشكت –ورغم ان علمها عند الله لكن مما دفعه لذكر ذلك –ما اتى به فى البيت الثانى –وهو انه كل ما تعمل جميل عملا او فعلا او قولا لاتجد من يعمل به وتقدم الخير فتحصد شرا وذلك نذير لاختفاء القيم الاجتماعية او الاخلاقية او الدينية – وهذه الابيات تذكرنى بابيات الشاعر زهير بن ابى سلمى:
ومن يجعل المعروف فى غير اهله
يكن حمده ذما عليه ويندم
وهكذا رغم انى لا اجيد الغوص فى اعماق اللغة العربية (وكأبو مصطفى اعشق اللغة الانجليزية) واعشق كذلك العامية والشعر العامى –
نرجع تانى للموضوع –ايضا هنالك الكثير من التشبيهات والاستعارة وغيرها –
مثلا فى وصف اسنان الحسناء-بالبرق:
الكسر بنيان ربك سنك –لم يذكر البرق-بينما ايضا حمد ود ضقولى ذكر –
سنونا الرفا فوق عد ام شديدة –فى وصف اسنان او حتى ابتسامة (وغالبا يذكر هنا الفاطر—مثل فاطرا الفوق ابسباع خلا البلد طين)–وفى بيت حمد ذكر بعض صفات البرق او لوازمه (رف –يرف)
وحتى تتضح الصورة اكثر—نلاحظ ابيات للشاعر الكبير عبد الله محمد خير :
فر بسمك شلعن بروق
رغم انف الضو يلمعو
ابيات قوية جدا ولكن ليس هنالك حذف للمشبه او المشبه به—وهكذا—
اما الصور البلاغية الاخرى كثيرة وخاصة الاستعارة بانواعها والكناية والمجاز وغيره-
تشكى من الطريحة تقول تقيلة
نفيسك شمعوا جوا الفتيلة
و—
ياعجو المحس التقيل فدع العراجين
و—
يامسيكة الضربو ابنعوف
وضربو موزون بين الكتوف
وامن الحامداب من الخوف
و-
من القصيدة التى اوردتها الاخ الرشيد (لشاعر مجهول)
فى الرباط مالى التوب هدم
وكب كرب تتوطى الجزم
زايلة يا ام شلاخ ماتتم
خيرا زى الزيق فى الهدم
و-
هناك الكثير والكثير
و-
ان بقى فى العمر بقى راجع ليكم

الهبارمه كان عندهن المال الواحد لمان يبيع جمل او بهيمي يشتري بثمنها ذهب ويصره لوقت الحوجه وكانوا يرحلوا بناتن بالدهب حتي اشتهروا بذلك ...ولعبة (حرت) من اللعبات الشهيرة تلعب بالعكاز فيصيح احدهم حرت فيجروا بعيداً ثم يعودون..... وكانت هناك احدي الحسان يعجب بها الشبان ويزوروها في غياب والدها عندما تكون مع امها واخواتها واعراب البادية غيورين جداً وحينما كانوا بالمنزل شعروا بدخول والدها فقفزوا بالسور وهو يتكون من العيدان وهم يلبسون السراويل الطويلة (السربادوب) وكلما قفز واحد يوكر في عود فيشرط الملابس ويجري فقال احد الذين لم يكونوا معهم في شماتة من حالهم:

وينك يا كشيب الهبرمي الماانصرت
ما بنساكي بلعب بالدناقر حرت
الحامينا كان في مجلسن نتورط
خايفين نطة الحوش القماشها اتشرط

وتقبلوا مروري

شكرا محمد--والله شرط الهدم كعب ووصمة وعلامة --ويكون قميصه او سرواله الطويل قد من دبر--
-الاخ محمد ظاهر عليك مشغول انا عارفك تحفظ الكثير لكن مشاغل الدنيا اكثر--
هنالك ابيات من قصيدة مجادعة او لوم لا اريد ان ادخل فى تفاصيلها واتحفظ على ذلك ويمكن يكون نادر يعرف الاسماء--ولكن اورد منها هنا ابيات جميلة فى رد احدهم يلوم صاحبه للحدة وما كانت عليه علاقتهم فى الماضى اظنه على الطيب (وصحح يانادر)-فيقول لصاحبه:
زمان اكنا اصحاب وكان لينا تصويت
وزمان ما كنا بندس منك حلو البيت
الجمل يأكل حويتو ياصاحبى جنيت
انت هو هوك ناس فلان فى الهوة نطيت
ودى الهوة غريقى اطنك تانى ماجيت
وهذا لوم مع التذكير بانه فى الماضى كان يدخل البيت كأنه اخ له ولكن-اخطأ -واجمل التعابير كانت فى البيت الثالث ولايمكن للجمل ان يأكل حويتة--وهذا ما جعل صاحبه(اللائم) يستغرب لماحدث من صاحبه واراد ان يذكره لعله يرجع لصوابه --ولكنه تمادى فى الخطأ --واتى بابيات اخر--
--شكرا للاخ هبرم وللجميع

شكرا استاذ سلمان القصيده لعلى الطيب يوم صاحبه ود عبيسه
زمان اكنا اصحاب وكان لينا تصويت
وزمان ما كنا بندس منك حلو البيت
وبعد ماكنت صافى عكر بقيت ريط
وبعد ماكنت حرير غسلوك وهديت
الجمل باكل حويتو ياصحب جنيت؟؟؟؟
انت هو هوك ناس فلان فى الهوة نطيت
ودى الهوة غريقى اطنك تانى ماجيت

وهذا المرحوم علي ود وداعة وهو شاعر الابيات المشهورة يا قشيش وادي الكربكان يخاطب نفسه
يا خبير عتمور اتبرا
البلد خابرا لي اسمرا
ومافي زولا قدرك جري
ده الجري اللاجابلك مره
ولافي عرقا وصل الترى
العمير قبل لا ورى
النفس منعولة انهره
تاني شوفلك بيتا ضره
واوعك الشي الما تقدره

وهنا يتحدث عن الحياة
اجري فوقا وتجري في ام جور
بالغرب كاردا لي برور
تلبت في بحر المسور
عمت بي صدري بلا طرور
قت بي تتحاش على الخور
مرقت اخدت عتمور كرور

وله ايضا
مابتدوم الدنيا ابتدوم
كم عماراتا بقت روم
وكم خرب ناس نضم الخشوم

شكراً هذا التيم الرائع شكراً ود عقيد فأنت سبب هذا الابداع شكراً لصاحب البوست الرائع نادر (الاسم والمسمي) شكراً عبد الحليم
أحمد حبيب ترك ابله مع ابن عمنا ابزيد محمد بشير وسافر الي المناصير والابل رعت بالليل في حواشة أحد الرباطاب والرباطابي خايف من الابل ونادي ابن خالتنا ابزيد محمد ادريس ليعقل الابل حتي يأتي صاحبها من المناصير والجماعه شاكلوا ابزيد وقالوا له الزول جايينا ضيف وتعقل ابله للرباطابي الكلام دا عيب منك وأحمد ود حبيب ود جبريل مشهور بالهمبته ولو جا وعرف بسوق ابلك يصبحها في دراو
المهم بعد جا احمد حبيب الجماعه كلموهوبالحاصل
فقال:
ود ادريس سلام المابتعرف الضيف

عقلت الشقر رايك معاي انا كيف

نحنا بنركب علي الاصهب ليالي صيف

يا ورر الكدندي المباري القيف

أكان درنا الكعب خابرنه درب الريف

مجادعات فى قمة الروعه بروعة القائمين عليها
نادر الرجل النادر-- سلمان الموسوعة الفريد فى تعابيره
عبدالحليم كباشى قمة الذكاء باصاله اجداده
واخير رجل الهبارمة النورالضرير
الشكر لكم جميعا