قصيدة للشاعر محمد حسن فضل يحكي فيها الماآآآآآآآآآآآآآسي التي تعرض لها في حياته

من روائع الاستاذ الشاعر المنصوري محمد حسن فضل

قصيدة يتحدث فيها عن المأأأأأأأسي التي مرت عليه في حياته
وربنا يطول في عمره وينعم عليه بالعافيه

ياوطنا عزيز محبوب ومن خيراتو لابس توب متوشح مياه النيل ومن جلد النمر مركوب ومحدر عمة العزه وسيفا بالدماء مخضوب وفوق الدنيا اتربع

اكلت جمر واكلنا جمر لكت صبر ولكنا صبر ومهما عكرت الايام بكره تروق وبي تنقع

يمكن ذكره لاهل الحي تزيد البي ولي ايام زمان ترجع زمنا الكنا نحنا صغار نلعب في ضراء الاشجار ونصيد يومي للاطيار ومرات بالحجار نفلع

حليل اهلي وحليل الريف واتزكر ليالي الصيف وقت حر الهجير يسطع

الطوريه والكربال وانا التربال ومن سعف النخل نعال ونقط عرقي ساخن سال ومن فوق التراب ترع
وحس طوريتي في الدراب يسوي الكع ومن النقعه للفحلاب اقوم واقع ومن الطين لبس جلباب ودائما للصباح اقرع

وانا المأساتي زي ماسأتو مامعروفه لي أسع

يمكن من قرار مقصود زمان ادانا بالشلوت وما بيفوت وسكن جوه الضلوع زرع
ويمكن من ازاهير في مهب الريح واحي وحيح فيها تميل وتترنع

وااااااااااااشوقي للابناء محاسن واسمهان وبهاء ويزيد والله للزهراء وحليوه وحلوي قولت ابا ومتين يالله تترعرع

وأاااسفا علي اما رؤؤؤؤؤف رحلت ونار الفرقه لي اكلت ودموع الحسره لي بلت وماله الدنيا تتفلت وقلعت للعلي حلت وانا المن شوقه ما بقنع

وليها اردد الدعوات وياما بكنها الدمعات وشيمات الدموع تجدع

وانا المأساتي زي ماسأتو مامعروفه لي أسع

إتملا جسمي سميات قطيع من المرض يرتع اقع مشفي واقوم مشفي واقول يارب متين اشفي ويانفسا صبح مكتوم لا يندلا لا يطلع

واخت اللقمه في حلقي واضغت بي احاسيسي ومن المويه اتجرع
وتقاويني وتلاويني وتعاند تابأ تتبلع ودون العافي مافي خير افتش فيها لي كتير وخايف من صديري يطير وكل احشائي تتقطع

البي مابرشها نيل اقحقح وحدي طول الليل وكلبي والدي تسع وواحد فيهم مبرقع
وانا المأساتي زي ماسأتو مامعروفه لي أسع

ويمكن من كلام الناس ومنو اعوذ برب الناس ودائما منو بترفع تسألو من محمد وين زمااااان خلي البلد ودع
ومحمد وين يدوش في مدائن الدنيا وبين سكانه يتسكع ومحمد وين مطول ويبقي دا ينجع
ومحمد وين مجنون عمرو مابينفع وما عارفين محمد وين محمد للسموم كركع وفوق ضهر الهموم كوع

سواد الدنيا زادو سواد وحالو البيو حال شحاد وومعلم الله قاطع الزاد وفوق خلق الله يتوقع

بقيت ضهبان وسط غابات تجيني وحوش من الأحباط تصارعني وليها انا ماقدرت اصرع

ولو ماكنت زول صبار ومؤمن بي قضاء الاقدار والمكتوبه مابتندار الحال كان يكون افظع

وانا المأساتي زي ماسأتو مامعروفه لي أسع

يابخت البقيمو الليل مع القرأن خايفين غضبة الرحمن مناهم جنة الرضوان وانا ال يالله اتركع
يمكن لعنة التمباك كريه بالمره مابتلاك نتفتف وليهو مابنبلع
ويمكن من رجل مسخوت تملي يصوت وشرب من الحرام شعشع
ويمكن دعوه من حبوبه مشرط توبه وبي حالو مسوي مقنع

ويمكن من ولد ابواتو ياكلو النار يلوك ومطول الاظفار ومثل اخواتو يدلع
ويمكن من بنات كاسيات كاشفات الرؤؤس ماشات وقالن نحنا عصريات وكيفن نحنا نتقنع
ويمكن من ظلم انسان لانسان هناك في القدس والشيشان قنابل فوقو تتفقع

ويمكن من ظلم قاتل واقع فوق عيال منصور عايشين في ظلام وصخوربحرهم سو و عشره بحور وكسرو للتمر والدور والناس فوق حقوقه تدور عشره سنين وعشره شهور
ومنو المسؤؤل ؟ومليانه الامانه طيور بوم ونعام وابو الزرزور وصاحب الحاشي قاطع الشي وبي عكازو يتسكع

وتاريخنا العريق مجهول حقيقي من الدماء مصدور موثق في كل مرجع عشان الناس يعرفوهو ويعرفونا ويعزونا في المناهج قلنا يوضع ولكن لينا مين يسمع ودا الزائد وجعنا وجع
وانا المأساتي زي ماسأتو مامعروفه لي أسع

الزول وكتين يكون فقران اليل والنهار حيران افكار عقلو تتوزع منو تهاجر الاشعار والاحلام تصير اشجار وتصلو سمانا تتفرع وفجاءه يخمها الاعصار وفوق الدائمي تتصدع

ياما ضغت مره سفر ومره قطر ومره بحر وحتي الريح قعد من فوقا واتربع
نزلت في بلاد الشام قوية عزيمتي بالاحلام حريص ماسك ورا وقدام وبعد ايام عند بيت الله قلبي خشع
وسلك دربا وعر وفراق وقلت قدامي فاتو رفاقو ماشي وعيني للافاق وشفت لي نور قريب يشلع
وقلت خلاص دريبي مرق وبرق العيني لي برق وجريت وقلبي دقدق دق لقيتو سحاب يكركو صوتو كالمدفع
موجوع وجعو زي وجعي ومولول دمعو زي دمعي ومكسوف فوق دريبي رجع وبي باقي المروه الفي لافح خرجي فوق كتفي وبي عكازي انضرع
وجم بحر السراب صنقر والسلوكه في ايدي وكتير فكر وقلت كدي النقوم ازرع
عمك تيرابي في اباطي وبديت بسم الله خطواتي مره عالي ومره واطي واعاين جائي ديك مريكب صغيري وفيها حواتي واعاين جائي ديك قطاطي وانا الداير اضيع حياتي وقدر يا أخواني ماسرع صدقو ماشي لي هسع
ولي هسع احاوش فيها وتجري ومني شاردي ويابخت البقوم من نومو ترجا محينه وفاردي يكنكج بي سنونو وبي الايادي ويحلب منها ويرضع

وانا المأساتي زي ماسأتو مامعروفه لي أسع

تخفف عني افكاري وتعزف لي اوتاري وتغني لي اشعاري وتقول واناري واناري وناري انا شومه مابتشبع
وانا وكلماتي والاقلام نخادع نفسي بالاوهام وياما قلنا ليها كلام عنيده عنيده لا انفدعت ولا تخضع
لملم لي احاسيسي واقيف بينلتن اتحزم واقولها يلا نتقدم وكيفن نحنا نضعضع

وا أسفاه الالام معاولا فوقي تتبدد والاحلام جداولا فوقي تتقدد وبي كونشبري اردم قلت تنسدد والمقدوده لا تشبع ولا تنفع
وسألت كتير عرافين وناس عارفين وقالو لي اسأل منها الشافوها قالو عجوز مكركبي من سنة ستين شؤما وشؤم ابدأ ما بتعرف اللين حقيره حقيره وديمه مباري للمسكين
تفطسو تغطسو جوه قعر الطين وكذاب البقول يقلع

وانا المأساتي زي ماسأتو مامعروفه لي أسع

وعزرا اذا أخطأت

مع تحياتي (ميسره موسي )

من طرف **عباس محمد** الأربعاء 05 مارس 2014, 1:09 pm

مشكور الاخ ميسرة بهذه الاضافة من التوثيق
لهذا الشاعر الرائع والذى يملك حب صادق لبلده الاصل

من طرف **الفكى احمد** الأربعاء 05 مارس 2014, 7:22 pm

رائعة من روائع شاعرنا المخضرم محمد حسن فضل ذات معان ودلالات
تشكر اخى ميسره ، وأرجو أن تكون عدلت عن فكرة ترك المنتدى ...

تسلم اخي ميسره
هذه روعة من رائع دومأ
استاذنا:محمد حسن فضل
الذي احب وطنه وربانا على ذلك

قصيدة للشاعر محمد حسن فضل يحكي فيها الماآآآآآآآآآآآآآسي التي تعرض لها في حياته

قصيدة للشاعر محمد حسن فضل يحكي فيها الماآآآآآآآآآآآآآسي التي تعرض لها في حياته

رد: قصيدة للشاعر محمد حسن فضل يحكي فيها الماآآآآآآآآآآآآآسي التي تعرض لها في حياته

رد: قصيدة للشاعر محمد حسن فضل يحكي فيها الماآآآآآآآآآآآآآسي التي تعرض لها في حياته

رد: قصيدة للشاعر محمد حسن فضل يحكي فيها الماآآآآآآآآآآآآآسي التي تعرض لها في حياته