يا أخوانامحمد أحمد محمد الأمين مشى وين؟

شاعرنا الكبير، شاعر القبيلي، مالو طووول كدي من منتداهو.محمد بروي.. حمود ود فاطني بت سليمان. يا ناس السعودية، الزول ده غتس وين؟
باقي دايما الشعراء المرهفين، مرات تجيهم حردة كدي، حتى من نفسهم بلا سبب.. ياربي لاتكون لمت فيهو حردة الشعراء؟
كدي شوفوهو لينا يا ناس المملكة واتفقدوه نيابة عن أعضاء المنتدى كلهم..
وقولوا ليهو طلتك قاعدة تفرحنا.

يعنى يا صديق سبقتنى .... توارد خواطر ما طبيعي
اليوم جاية اكتب بوست عنو
وعن ابراهيم حجازي
لان محمد بروى وابراهيم اخوي غيابهم طاااااااااااااااااال عن المنتدى
ابراهيم على الاقل مرة مرة طلة خفيفه
بس محمد بروى محتاج زول يناديه عدييييل
شكلو نسي درب المنتدى

علشان كدا
يا محمد بروي
ويا ابراهيم حجازي
رجاءا رجاءا .... ما تبعدوا كتير عن المنتدى
نتمنى لمة كل الناس الرايعين بمنتدانا

من طرف **محاسن** الإثنين 23 سبتمبر 2013, 4:32 pm

يمكن يكون ممتحن
يمكن يكون يذاكر
يمكن يكون عندو امتحانات
يمكن يكون يقرا

من طرف **علي الكليس** الإثنين 23 سبتمبر 2013, 5:00 pm

مثله يفتقد ومن قبله ودالمناصير......انا باقي لي ياصديق المساله تحتاج للتقصي والبحث . سالت عنه احد العائدين من ابها (عبدالله صديق ) وذكر انه بخير

تقصد عبد الله صديق عمر.. من عصمة. يا الكليس
لا حمود ومصباح ديل عكس يا الكليس. ما بيحردوا من أهلهم مهما كان.. دي نوعيات أصبح عندها تعقيم وجرعات..
هسي دي بس بيكون مشاغل بس من حمود..

تسلم صديق....
ذهبت الي صالون سهام وجدته عامر بالعمالقه والشعراء والضيوف.....ولكنني لم اجده بينهم سالت وبحثت ولم يجبني احد....
انشاء الله يكون بخير وصحه وعافيه....

من طرف **علي الكليس** الجمعة 27 سبتمبر 2013, 8:07 pm

محاسن كتب:يمكن يكون ممتحن
يمكن يكون يذاكر
يمكن يكون عندو امتحانات
يمكن يكون يقرا

ويمكن لالا يامحاسن؟؟؟؟؟؟؟؟؟؟؟؟

طالت الغيبة ود العمه عسى المانع خير .

الحكايه شنو باقي لينا نذيع اوصافه في نشرة الساعه 8...واليومين ديل كمان اخذ وداخته في رجليه ...

ان شاء المانع خير-----نرجو من الاخوة بالسعودية خاصة الاتصال عليه وإفادتنا وتطميننا على صحته ---

ان شاء الله خير ما من عوايد الدكتور الغياب اوعا بس يكون زعلتو باقى المنتدى دا فيهو ناس مساخيط

من طرف **الفكى احمد** الخميس 03 أكتوبر 2013, 5:54 pm

حقيقة مامن عوايدو شاعرنا المرهف ود البروى ، حتى تلفونه لايمكن الوصول إليه .
حاجه محيره ، وحتى جرفو ليهو زمن مانزل عليهو ، بس إن شاء الله خير ...

وينو الحبيب نور الظلام ليه انطفى
ومالو القمر من دارنا ياناس اختفى
--نكرر النداء للاخوة بالسعودية بالاتصال على الزول دا وشوفولينا خبرو

من طرف **النفر** الأحد 06 أكتوبر 2013, 5:45 am

التحايا والود لكل إخوتى المتداخلين ... شاعرنا ود البروى بخير وصحة جيدة ويبلغكم التحايا والود .... الرجل مفعم بحب أهله ويتوق لمنتداه ... فقط هى مشاغل الحياة التى حالت دون إطلالته البهية ... قريبا ً سيطل عليكم وبمعيته الكثير المفيد _

من طرف **عباس محمد** الأحد 06 أكتوبر 2013, 1:18 pm

ظهر القامة النفر وظهر معه الخبر الجميل عن نسيبنا ودبروى
نتمنى الا تطول غيبته

من طرف **نجلاء زمراوي** الأحد 06 أكتوبر 2013, 1:25 pm

اميره الحومرى كتب:ان شاء الله خير ما من عوايد الدكتور الغياب اوعا بس يكون زعلتو باقى المنتدى دا فيهو ناس مساخيط

الله يستر يا اميره...
والله كل ما ادخل المنتدي ابحث في كل البوستات عسي ان يكون له اثر بين الحضور..
لكن نقول الغائب عزرو معاهو...

من طرف **عادل شرري** الأحد 06 أكتوبر 2013, 11:37 pm

محمد ويييييييييييييييييييييييييييييييييييييييييييييين
الخال تمني لك السلامة والعودة

بعد جفت جروف الصبر والتصبير ما سلمنا للاقدار
بعد بحت صويتات المدن والريف نشب عرق الوله تاوار
تشتاق لك خلوق من برتي حتي العار
مالك يامحوماااد قاطع الأخبار
شوفتك يا محوماااد تسعد الأنظار
كلامك يا محومااااد يطرب السمار
صوتك يامحوماااد احلي من مزمار
كتاباتك تغازل اللوحة والأحبار
نسائل في نجوم الليل
غزلان الشتات والبيد
نسائل في مياه النيل
غنيوات الدلال والريد
نسائل عنك الرايحين والجايين والصاحيين والنايميين نسائل عنك السفار
نكتب في جرايد الهم
نفتش بي حروف الدم
نفتش نحنا في التنقير وفي الإسفير نعاين فوق علي الأقمار
داك منصوري موقد نار
صبح منصوري ذاتو النار

نفتش فى العشيش جمار

سألنا القمرى والسوار

خايفين هبة الإعصار

نعاين للفريخ الطار

نحفر فى رماد النار

سأل منصورى موقد نار

سألنا النجم و الأقمار

سألنا رمالنا والسمار

سألنا مراكب السفار

نكوس للبينا دايماً بار

وينك يا معين الجار

وينك ثلة من أبرار

عرفناك زخة من أمطار

عرفناك نسمة الأسحار

تعال بُعدك فراقك حار

تعال شان بيك تهل أنوار

تعال يا الفارس المغوار

قوافيك سيفك البتار

سلاح النظم والأشعار

واصل وزع الأفكار

تعال شان نكمل المشوار

خلاص دايرين نجيب التار

خلاص دايرين نجيب التار

مالك يامحوماااد قاطع الأخبار

النجم فى السما اختفى وغابت الاقمار

بقت الخلوق مابتفرز الليل من نهار

جرفك بعد كان مفرهد وحتا للنوار

بقى حزنان مهضلم يبكى سيد الدار

وفى المنتدى على الجميع كان فراقك حار

انت كنت ضرا وكنت
ضلو وكت هلالو الليهو بهار

وكت حنين ودايما تطلوا ومابتقطع الأخبار

ان شاء الله تعود سريع وتفرح بك المناصير من برتى حتى العار

شكرا الاخ سامى ونهنيك على هذا الابداع –حاولنا مساعدتك –وزى ما قال الدمير للشاعر –الشعر راجيك من ابيك ونحنا ساكت بى نحاكيك—رحمها الله --

اخيرا ظهر الزعيم---
ياناس ياعسل ودبروى وصل--------------- مسكين يئن بى شوق دفين ودر عميرو متل كتار

من طرف **م بروي** الثلاثاء 08 أكتوبر 2013, 3:41 am

االباشمهندس صديق
احبابي الكرام
انتصار
محاسن
كليس
نجلاء
نصرالدين
سلمان
أميره
الفكي
النفر
عباس
عادل
ودعون الله
سامي
أها حافي كده بدون القاب
الماهو منكم انتو ندمان في حياتو ندم
أولاً آسف جدا لشغلكم بالسؤال عني
وأنا زولا قزم أقل من يحيطني العظام أمثالكم بكل هذا الاهتمام
نعم كنت مشغول شديييد لكن لا أكذب من صدقتهم وصدقوني المحبه الكبيرة
الحكاية مطعمة بشوية قرفه من الكتابه هنا وهناك
معقول سته وخمسون عضو متصل والمشاركات كلها من أمس؟
احباط شديييييييييد

الليلى عاد قوم قدد البوغة دى كلها وزازا نقح بالقمرا

من طرف **م بروي** الثلاثاء 08 أكتوبر 2013, 3:58 am

ود عون الله كتب:بعد جفت جروف الصبر والتصبير ما سلمنا للاقدار
بعد بحت صويتات المدن والريف نشب عرق الوله تاوار
تشتاق لك خلوق من برتي حتي العار
مالك يامحوماااد قاطع الأخبار
شوفتك يا محوماااد تسعد الأنظار
كلامك يا محومااااد يطرب السمار
صوتك يامحوماااد احلي من مزمار
كتاباتك تغازل اللوحة والأحبار
نسائل في نجوم الليل
غزلان الشتات والبيد
نسائل في مياه النيل
غنيوات الدلال والريد
نسائل عنك الرايحين والجايين والصاحيين والنايميين نسائل عنك السفار
نكتب في جرايد الهم
نفتش بي حروف الدم
نفتش نحنا في التنقير وفي الإسفير نعاين فوق علي الأقمار
داك منصوري موقد نار
صبح منصوري ذاتو النار

أوتر يا شعر و ارتاح

حضوراً يطرب الأوتار

أسرف يا خيال وأشرُف

على جرف الفرح والبار

ولداً بار

وخبراً سار

حسيس مسدار

قلباً حار

ولداً نور وموقد نار

شوق وأشواق وشك أقدار

بنايات الوهم ممدودة

كل جدار يحرسو جدار

وأحزان الزمن مصفوفه

حزماً حازمه مافي هزار

مساحات الفرح محزونه

طواريهو الوله مسنونه

أفكار الألم مسجونه

ليلاً جنَّ وجن أفكار

يا قمر الأخوه الصافي

نتوق لتعدد الأقمار

يا ليل المحبه الهادي

سوق خطواتنا للسمار

يا سر الصداقه الفينا

حاول كتر الأسرار

نشعر بي قصور أشعارنا

شعوراً ما حوته أشعار

ـــــــــــــــــــــــــــــــــــــ
لقبه
_______
المسخوت ود الطرشان كسر الجدول جنب
الويكي التحت ... وانتو ما جايبين خبر
ــــــــــــــــــــــــــــ
ود عون الله ...انا فخور بيك

من طرف **م بروي** الثلاثاء 08 أكتوبر 2013, 4:02 am

سلمان عقيد النعوفابى كتب:الليلى عاد قوم قدد البوغة دى كلها وزازا نقح بالقمرا

ههههههههههه
الله يجازي محنك
انا هسه مشغول شديييد
باكر الصباح جايييكم انت وسامي
لعل الشعر يساعدني اقدم قريب مما قدمتموه
صاحبي..انا والله مشتاق ليك

ألف مليون تحيه وسلام لحَـمَـودى شاعرنا الهمام سمح الشِـعر عذب الكلام
تانى ماتنقطع زى القطعة دى ـ كنا بصدد عمل مظاهرة مليونية يوم الجمعة نطالب
فيها بعدم تكرار مثل هذه الغيبة الطويلة بدون إذن وبدون خبر ...
مع خالص التحيات وبحور الشوق ...

برضو ورا وشيهو ومرق
وبى شويش براحة اتسرق
والجميع بى شوقوا اتحرق

من طرف **م بروي** الإثنين 14 أكتوبر 2013, 5:43 am

سامى احمد محمد كتب:نفتش فى العشيش جمار

سألنا القمرى والسوار

خايفين هبة الإعصار

نعاين للفريخ الطار

نحفر فى رماد النار

سأل منصورى موقد نار

سألنا النجم و الأقمار

سألنا رمالنا والسمار

سألنا مراكب السفار

نكوس للبينا دايماً بار

وينك يا معين الجار

وينك ثلة من أبرار

عرفناك زخة من أمطار

عرفناك نسمة الأسحار

تعال بُعدك فراقك حار

تعال شان بيك تهل أنوار

تعال يا الفارس المغوار

قوافيك سيفك البتار

سلاح النظم والأشعار

واصل وزع الأفكار

تعال شان نكمل المشوار

خلاص دايرين نجيب التار

خلاص دايرين نجيب التار

عذراً يا سليل أخيار

وعذراً يا سماء السمار

وعذراً يا شذى الأزهار

وعذراً يا سليم أفكار

وعذراً سيفنا البتار

بنينا من القصور أقصار

ونتحوي في قفا الأسرار

الدغل الركبنا حمار

والخِمَل البتلنا كتار

راجعين نرفع الأشعار

ورافعين الموده شعار

جايين بي حماس ثوار

لاعِزيل ولافي خيار

ولافي مخبى لا في أسرار

من طرف **abuahmed** الإثنين 14 أكتوبر 2013, 4:33 pm

الله يجازي محنك ياصديق
انا ماني عارف محمد احمد محمد الامين هو الاسم اللاتيني لشاعر القبيلة محمد بروي, وعنوان البوست لم يثر فضولي ولذلك لم ادخل عليه الا بعد ما رايت دخول اصدقائي عليه وفيهم محمد بروي وعندما دخلت وجدت الابداع.
شكيتك علي الله يا ابوحنة كان تودرني قدر دا
انت زول مبدع وممتع وتقدم المعلومات في اطباق مختلفة تجعلها ترسخ في الذهن
حباب محمد احمد محمد الامين وانا من الان مسجل اسمي في مسيرة الفكي المليونية
اوعك تكرر الطبع الشين دا
يسلموا الرايعيين

هههههههههه أب أحمد..
تاني أي بوست هنا في منتدى المناصير لازم تشوف خبرو شنو؟

من طرف **م بروي** الأربعاء 16 أكتوبر 2013, 4:32 pm

سلمان عقيد النعوفابى كتب:مالك يامحوماااد قاطع الأخبار

النجم فى السما اختفى وغابت الاقمار

بقت الخلوق مابتفرز الليل من نهار

جرفك بعد كان مفرهد وحتا للنوار

بقى حزنان مهضلم يبكى سيد الدار

وفى المنتدى على الجميع كان فراقك حار

انت كنت ضرا وكنت
ضلو وكت هلالو الليهو بهار

وكت حنين ودايما تطلوا ومابتقطع الأخبار

ان شاء الله تعود سريع وتفرح بك المناصير من برتى حتى العار

شكرا الاخ سامى ونهنيك على هذا الابداع –حاولنا مساعدتك –وزى ما قال الدمير للشاعر –الشعر راجيك من ابيك ونحنا ساكت بى نحاكيك—رحمها الله --

ساقتك يالسلومي تدور

وجماعتك لعبت الأدوار

الجدول متندح مويه

كسرو هناك جنب البار

سبلوقو اللي كان شلال

عند الرأس وصل سرسار

لا صبحت حياضنا مندي

ولا أصبح خدارنا خدار

عيشنا الكان تقيل قندولو

السني بس حصادنا عدار

في ضل التمر حسرات

وفي(ضل الخسار)في خسار

انحسرت شواطيء الفرحه

تخبط من مسار لمسار

وانهدمت(قيافي) البهجه

وهاجر منها (السًوار)

في سر الليالي الهادي

سطعت أنجم الأسرار

وأحلامنا الجميلة الليلي

سربت أعمق الأغوار

العرف المخابي عمومه

يسأل هسه عن الصار

وزولك ياوسيم الطلعه

على المخموشه عبى وسار

____________

_لقبه
المدعو خالد عابدين دسى المحافير

من طرف **م بروي** الأربعاء 16 أكتوبر 2013, 4:40 pm

الفكى احمد كتب:ألف مليون تحيه وسلام لحَـمَـودى شاعرنا الهمام سمح الشِـعر عذب الكلام
تانى ماتنقطع زى القطعة دى ـ كنا بصدد عمل مظاهرة مليونية يوم الجمعة نطالب
فيها بعدم تكرار مثل هذه الغيبة الطويلة بدون إذن وبدون خبر ...
مع خالص التحيات وبحور الشوق ...

في الدنيا ماعون الزحام
لوفيها بس نفرين تمام
وبعدن يضيع كل الكلام
ياهو المهندس وام زمام

من اجل الغالين أمثالكم تحترق دفاتر الأعذار
وتتلعثم الأحرف ويكش الكلام.
ما أروعك

من طرف **م بروي** الأربعاء 16 أكتوبر 2013, 5:01 pm

abuahmed كتب:الله يجازي محنك ياصديق
انا ماني عارف محمد احمد محمد الامين هو الاسم اللاتيني لشاعر القبيلة محمد بروي, وعنوان البوست لم يثر فضولي ولذلك لم ادخل عليه الا بعد ما رايت دخول اصدقائي عليه وفيهم محمد بروي وعندما دخلت وجدت الابداع.
شكيتك علي الله يا ابوحنة كان تودرني قدر دا
انت زول مبدع وممتع وتقدم المعلومات في اطباق مختلفة تجعلها ترسخ في الذهن
حباب محمد احمد محمد الامين وانا من الان مسجل اسمي في مسيرة الفكي المليونية
اوعك تكرر الطبع الشين دا
يسلموا الرايعيين

الحميلي الله يرحمه ...جاء شري
مشى المرحوم الدمكي(علي محمد نعمان) يشرب من المزيره
واحد في المجلس قال للدمكي عليك الله ياعلي أملأ الكوز معاك
قام الحميلي قال ليهو (أول إنت يا الدمكي اسمك علي؟)
الدمكي قال ليهو أيوه اسمي علي واسمي الدمكي
بقالك الزمن ده اسم واحد بكفي؟
محمد أحمد محمد الأمين...محمد بروي...ود البروي...محمد الأمين..في الأشعه المنصوري...حمودي..
وهنا جات عليها أبو آثر ... وأبو أحمد وأبو مجاهد ...خايف تجي أبو الزفت
سجلت اسمك في مسيرة الفكي المليونية كتبت منو؟
أبو أحمد أنزل كل الأسماء التي تخص سعادتكم هنا ؟ واللا خايف من الهوى
كنا نحبك واصبحنا اكتر من كده

من طرف **م بروي** الأربعاء 16 أكتوبر 2013, 5:04 pm

صديق عبدالله علي أبوحنة كتب:هههههههههه أب أحمد..
تاني أي بوست هنا في منتدى المناصير لازم تشوف خبرو شنو؟

كل سنة وأنت طيب يا هندسه
لعلك والأسرة الكريمه بألف خير
صاحبك ده كل بوست يشوف خبرو ويشيل في ايدو حب الديك

من طرف **abuahmed** الأحد 20 أكتوبر 2013, 4:14 pm

قرقر قر قر
ابوحنة وابو ااثر
اه يا مساخيت
اتمليتو في الشربوت وجيتو علي المنتدي
يا ود الامين شوف كشف المليونية وحا تلقاني مسجل بكل الاسماء
وطبعا ما ب تغبي عليك
تسلموا يا رايعين
وكل سنة وانت طيبين والقابلة مدراء كبار في ارض المليون ميل قبل الانفصال

سهام قالت شربوت ما مسكر.نحن جبناهو من صالونا بي هناك.. يا أبو أحمد..
وطبعا في اللغة
ما تقول شربوت غير مسكر؟
معناها هنالك شربوت مسكر..
وغير ترمز للغيرية.. غيرية الصنف والنوع..

من طرف **انتصار حجازي** الأحد 22 يونيو 2014, 6:37 am

سلمان عقيد النعوفابى كتب:مالك يامحوماااد قاطع الأخبار

محمد بروى مالو قاطع الاخبار
لعل المانع خير
افتقدناه

سلام للجميع..........الكلام دا خلو على ياصديق وانتصار...اجيبو ليكم تب..

من طرف **م بروي** الأربعاء 25 يونيو 2014, 6:15 pm

انتصار حجازي كتب:
سلمان عقيد النعوفابى كتب:مالك يامحوماااد قاطع الأخبار

محمد بروى مالو قاطع الاخبار
لعل المانع خير
افتقدناه

يسعل منك الخير يابنيتي

من طرف **م بروي** الأربعاء 25 يونيو 2014, 6:23 pm

سلمان عقيد النعوفابى كتب:سلام للجميع..........الكلام دا خلو على ياصديق وانتصار...اجيبو ليكم تب..

الزول لما يكون راقي وسمح ....يعجب الناس ويمتلك
النواصي منهم والحواف ...
لما يستخدمها فيتو كمان الا تقوم تسعى ليك حمارا فالح
عشان تباري الملمات تجامل معاهو ...وقعنا..
.. مايقدر عليك الا صاحبك (ام ضنب)