هل المبدع محمد النصري وجعفر السقيد عندهم علاقة بالمناصير

أنا عايز زول متخصص يرد على سؤالي ده!
لأنو سوف أبني عليه كتابات تاريخية! هامة
ليه؟ ملاحظ محمد النصري فيهو شبه بالمناصير شكلا.. ثم عندو رميات قبل كل أغنية هي دقات طنبور منصورية مائة في المائة.. من ضمنها الجبنة تبقبقي.. هل هنالك منصوري أثرّ فيهو أم له نسب منصوري؟ حتى حفلتو القريبة دي سهرتو.. دق أكثر من دقة طنبور ورمية منصورية؟
طبعا عندي بعض المعلومات من ناس عنه وعن جعفر السقيد.ز واحد فيهم قالوا أمو منصورية من جهة برتي.. وكمان قالوا واحد فيهم عندو علاقة بأعراب المناصير.. لا أدري
النصري أنا بتكيف ليهو جدا..
جعفر السقيد ماشي الحال زيو وزي فناني الطنبور المرو على الساحة بإبداع بسيط متزايد عن الذين سبقوه.. برضو ما ممكن يفوت عيسي بروي وصديق أحمد مثلا
لكن محمد النصري أنا بعتبرو صوفي قبل ما يكون مغني.. ومرة فعلا توقف عن الغناء.. إلا جابوا ليهو كم شيخ كدة! بعضهم قال ليهو الغناء حلال
وبعضهم قال ليهو أبعد من غناء البنوت الباقي حلال
أو جيب الكلام مباري
محمد النصري تطور ظااااهر في مسار أغنية الطنبور صوتاً وأداءاً وعزفاً..
كدي زول يقول لينا هل فيه دم منصوري؟
يبقى لى الإبداع ده ما منطلق من فراغ.. والإبداع أصلو حق المناصير في أي حاجة
حتى في قوة الراس والحسادي!   زي ما قال الهادي عقيد..نحن ناس مفكرين جدا! نستغل فكرنا في الحسادي! واللولوه! أول لو ما كدي؟ كان قضيتنا دي زمان اتحلت..
..
كان في مسرحية سودانية الأيام الفاتت في النادي السوداني في أبوظبي انتاج محلي
البطل قال لى حبيبتو( بأمانة قضيتي معاك زي قضية المناصير ! ما بتتحلا.. وزي اغتصاب الصهاينة للقدس!)
زي ما قال الهادي عقيد، عندنا قوة الراس والحسادي.. وزي ما قالت سهام .. الجيل الجديد ده يختلف كتير بنات وولاد.. لكن برضو قوة الراس في!

الاخ ابوحنة
كدي نخلي السقيد والنصري ونقول حاجة في مقولة او فرية انو المناصير فيهم الحسادة وقوة الراس!!!!!
معلوم انو الطفل الشجاع دائما يتحدي ولا يتراجع ولذلك يوصف بقوة الراس , المنصوري كذلك اذا لم تصل معه الي اتفاق او تقنعه بوجهة نظرك فلن تستطيع ان ترجعه او توقفه فهو لا يهاب ولا يتردد ولذلك يوصف بقوة الراس, انها الشجاعة اخي صديق!!!!!!!!!!
اما الحسادة والكرم فلا يجتمعان
لا تفتروا علي اهلكم!!!!!!!

صحيح يا أب حمد.. أنك إذا ما قدرت تقنعه! لايلين لك
  وكما ذكرت فإن الحسادة والكرم لايجتمعان.
 والكرم مثبت عندنا من الأعداء قبل الأصدقاء، إذن الحسادة شئ وهمي، ربما لا وجود له.طالما هي لاتجتمع مع الكرم... هي يمكن موش حسادة، وإنما غيرة تقمصت ثوب الحسد.. والغيرة فيها محمدة( وفي ذلك فليتنافس المتنافسون)

ومن الغيرة جاء نجاح أبناء المناصير في ظروف كانت صعبة للغاية.. نحن زمان عشان تروح المدرسة المتوسطة..  لازم تقابل القطر.. وعشان تقابل القطر.. ده موضوع
  تمشي بي كرعيك... وتركب مركب.. وتركب حمارة.. وتقطع عقبة الدغفلي حوالي 20 كيلو والطريق كم ناس ماتوا في صحراء الدغفلي.. أو طريق الكاب من شري حتى تقابل القطر.. عشان يشيلك يوديك مدرستك؟ كنا نغير من أبناء القبائل الأخرى، عشان كدة نجحنا..
 ممكن تتخيل مثلا بابكر خير الله.. أو خلف الله محمد علي كباشي، أو عمر على الحسين.. جايين من أصقاع برتي بالحمير  قاطعين كل هذه الفيافي على ظهر حمارة! ويربطوا حميرهم في الحنانين ، عشان يجوا بكرة ناس السوق يرجعوهن.. ويركبوا مراكب.. ومشوار تاني لغاية ما يصلوا القطر..
لولا الغيرة لما نجحوا..
 إذن من عندي سميها الغيرة، أترك موضوع الحسادة..

الأخ ابو حنة سلام ومحنة -انا طبعا ما متخصص ولكن اذكر ان جعفر السقيد -كان دائم التردد على مباني صحيفة الوفاق حيث ان صاحبها محمدطه -رحمه الله-واخوته من القرير وهى ذات بلدة القرير وكانوا دائما يقولوا لي الزول ده قريبك بأمه---اشتهر السقيد واصبح فنانا واجريت معه حوارا سألته فيه عن قبيلة امه فقال لي بالحرف الواحد -(كدي المضوع ده انساه هسة)ونشرت العبارة بالنص --في القرير التقيت الفاضلة والدة السقيت عند اسرة محمدطه وسألت عن قبيلتها فضحكت ورفضت الإجابة ولكن امرأة كبيرة في السن كانت بالمجلس قالت لي( المرأة دي عربية ما تنكر !)عموما لدي صورة لوالدة جعفر السقيد  وانت تحدثت عن الشبه ان نجحت في رفعها ههنا -وبي امية تقنية -فسوف افعل -ولكن ان تحدد من الملامح والشبه ان كانت منصورية ام لا ---معلوماتى ان النصري انه مزيج ما بين الشايقية واهالي امري والحامداب وربما لهذا جاءت ملامحه متباينة ---والله اعلم

يسلم كاتبنا البارع ود المدني..
نعم المعلومات القلتها صحيحة.. كلها.. وتأكدت لى من أكثر من مصدر..
السقيد قال ليك الموضوع ده كدي خليهو هسه
والنصري من ناس أمري فعلا..
وعادل السيد زمان جابوه في برنامج في التلفزيون.. المذيع سألوا قال ليهو إنت شايقي؟ قال نعم
وزعيمنا عيسى بروي أكتر من جهر بمنصوريته.. ولكن في البداية كان يقول لى..( كان صرحتا. ناس معينة سوف تحاربني) وفي النهاية صرّح وزاد محبة من معجبيه في القبيلتين، لأن فنو الراقص، وبضاعته الفنية كانت لاتقاوم..
إنها تقديرات المهنة..
على كل ،هي مرحلة.. وأنا أقدرها تماماً
نحن قبيلة مبدعة في أي شئ.. ولكن لا ضير المستقبل معنا يا بكري المدني..
هذه أول مداخلة نلتقي فيها أنا وأنت وجهاً لوجه.. نحترم بعض صاح.. نقدر بعض صاح!.. نعرف بعض صاح!.. لكن يبدو أن كل واحد يعزف في مجالو.. ثم لنا بإذن الله أنا وأنت مساحات من فيض محبة المناصير، سوف تظهر في وقتها..
أشكرك على غيرتك لأهلك في كل كتاباتك..وأشكرك على التداخل هنا..

ابن عمي سلام...
في سؤال محيرني؟
لماذا ينكر هؤلاء منصوريتهم؟؟؟؟

هو ما نكران مية في المية يا بت العم.. تكتيك مرحلي
هذا المجال الفني.. بالرغم من الكلام فيه من البعض.. لكن هو في النهاية واقع..  ( هو الغناء) من أجل الكسب المادي والشهرة..
وهذا المجال ملئ بالأوحال والناس الحاسدين عليك من جهات معينة.. وفيهم ناس كبار وصحفيين ومذيعين وسياسيين. ممكن يرفعوك من ما فيش، وممكن يغتسوك لو أنت بقيت قمة الفن! لأنو فن الطنبور بالذات هنالك جهة عايزاهو يكون حكرا عليها، وأي ابداع لازم يجي من جيهتها هي.. خاصة فن الطنبور إذا كان مقروناً بإيقاع الدليب..
لذلك أن يتحاشاهم الفنان الناشئ ويمشى على هواهم شوية، حسب الموجه.. لامن تقوم ليك ضروس ونوايب. أنت كفنان..
يعني أنا أجد لهم بعض العذر
لكن في دواخلهم كما هم مناصير ولهم صلة بالمناصير..
السوق في أي شئ لايرحم يا بت العم نجلاء
حتى سوق انتصار بتاع الحلل والهدوم والتلاجات والغسالات
دخلتوا الليد الغريبي
الحاج شرف الدين ود شيخنا عرف إنو سوق جاء يعرض فيه بضاعة مزجاة
وأبو مصطفى شخصو للآخر وقال الحاج نفسو في المواضيع دي
نعااااامة
يهرط ساكت

قابلت جعفر السقيد في مكتب احد الاصدقاء الايام التي ملأ فيها الساحة الفنية قلت له لي زمن افتش فيك عشان عاوز اسألك هل صحيح انك منصوري قال لي بلحيل سالته من منطقته في المناصير قال هم عرب ولا اذكر للاسف المنطقة التي ذكرها لكنها علي اي حال تتبع للمناصير طلبت منه التبرع بحفلة لصالح المنطقة ابدي استعداده وانه جاهز في اي وقت واعطاني رقم موبايله .

تسلم يا الرشيد.. برضو دي حسنة تضاف للسقيد.. لكن برضو التقلب حسب الظروف والمشهد وراد أحيانا.. ومقدرة المسألة