بت الماحي سمحي سماحي.. عبد الدائم تيساً قايم

صديق عبدالله علي أبوحنة كتب:بسم الله الرحمن الرحيم
أول ما شاهدت إسم بت الماحي هنا تبادر الى ذهني هذا البيت الشعري من الأهازيج الذي يرويه الأطفال، هذه الأهازيج التي سوف اروي قصتها
....................
دعوني أن ارحب بالعضوة المحترمة أختنا بت الماحي من مناصير الباوقة..
ديل أهلنا ودمنا ولحمنا وناسنا وهم أول من نفذ الهجرة الطوعية زمااان
ديل ناسنا وأهلنا وروحنا
وعلى رأسهم الفنان ود الحوري الذي رفع راسنا في منطقة الجعليين كلها وهو منصوري كما هومعروف
...............
عندي طلب
اين هؤلاء الناس في الباوقة. في حى المناصير
أرجو أن تسلمي عليهم ومن مات ربنا يرحمو
عايز اعرف هذه الأسماء عايشة ووين ساكنين هسي دي
1 مهيرة بت سعد
2 زينب النعيم سعد
3
4 مديني صباح الخير
5 سمد أو صمد صباح الخير
6 حاج سعيد راجل مديني
7حسن صباح الخير

أها نجي لى قصة بت الماحي
في الجزيرة شري وفي قرية كِـدِر كان يسكن عبد الدائم وزوجته بت الماحي.. وكانوا ناس عندهم غنم كتيري للغاية وعندهم تمر كتير.. لمان التمر يطلع يجوا الشفع يخرتوا التمر.. لمان تشوفهم بت الماحي تقول ليهم( فالحين ولادي ما تجروا تعالوا تعالوا أديكم أم راس وأم نص. بعدين كان أنا مافي السبيطي ما تملخوها والتمرة ما تنتشوها نتش كدة تكتلوا الشطر كلو .. التمرة أم راس العايزين تقطعوها أبرموها برم لامن تقع في أيدكم كدة الشطر كلو يسلم وما بيموت.. تشيل تديهم وتقول( صدقة لى دار قدام) بعدين لمان يشوفهم يوم تاني عبد الدائم. يقطع ليهو سلميي ويديهم فوق راسهم ويكردن.. يلا يقولوا هذه الأهازيج في زمن الطفولة يغيظوهو ويقولون له( عبد الدايم تيساً قايم .. بت الماحي سمحي سماحي) تيساً قايم يعني كالثور الهائج يطعن بقرونه.. والتيس لمان يهيج ممكن يقد بطن زول بي قرونو
.........................
اجدد الشكر لأختنا العضوة الكريمة بت الماحي واهلاً بها في ساحة أهلها المناصير الواسعي

م بروي كتب:ود أب حنه
زول الجنه
عند الحاره ما بستنى
بالنضم السمح جننا
ترليون مراحب ببنت الماحي

د اليسع حسن احمد كتب:بيت الماحي سمحي سماحي
طربت من الكلام حتي كاد الناس مغازلتي في الشوارع
في مناصير الباوقة ايضا شيخ السليمانية جدنا سليمان مكي علية رحمة الله ورضوانه وهو يا صديق خال حبوبتنا ام امنا سيرية الله يرحمها وهم من صالحاب المناصير وعرفت بعدها ان عمدة امكي صرة الرباطاب ود بيناوي قريبهم وهو من الصالحاب ايضا ولا ادري من هاجر لمن
وسليمان مكي ابنه معتصم خالي الرجل المزواج والفارس هو اول من افتتح طريق عطبرة الخرطوم ببصات النيسان الشهيرة سفريات ابو المعتصم وكان البص يتحرك الخامسة صباحا من عطبرة ويفطر الناس بالفول الكارب في العالياب او حوش بانقا ويصل الخرطوم مابين الثانية والرابعة عصرا -سبحان من يطوي الفلا طيا
وحلة المناصير بالباوقة هي حلة مشهورة جدا ولها حكايات خاصة في المسكوت عنه وسأحكي لك عندما نلتقي كفاحا ان كان في العمر بقية
وبت الماحي اضافة حقيقية للمنتدي لمعرفتي الشخصية بها وبقلمها البازخ
واسالني انا عن الشعور الذي ينتاب المرء عندما يلاقي اهلوا بعد ذل الفراق ومسغبة المنافي
عشان كده ترن في مسامعي قولتك الشهيرة المناصير قبيلي ما ها كبيري عشان كدي نبقي عشرة في بعض
ويا صديق كل ما تشرق شمس اشعر بعظم المسئولية الملقاة علي رقابنا وكلما عظم الحب بيننا وسري صدقني سننجز الكثير من اجل اهلنا
لكم ودي جميعا والاحترام

ابو مصطفى كتب:بت الماحى انت منصورية مية المية ام بربراوية ؟؟؟؟


تحياتى
ابو مصطفى

د اليسع حسن احمد كتب:الاخ الكريم ابو مصطفي
بت الماحي منصورية تلحم
اهلهاعائلة الحوري الشهيرة من شيري وك\أقدار المناصير هاجروا للباوقة الماء والنضار لكنهم احتفظوا بمنصورية كاملة الدسم
وبت الماحي تقيم من سنوات بالسعودية وهي استاذة ادب انجليزي
تعافر الشعر وكتابة القصة القصيرة بالانجليزية ولها قصة قصيرة نشرت بصحيفة ستيزن في الاسبوع الماضي
وبت الماحي ام لفارسين ربنا يحفظهم واسرتها الان بعطبرة
لكم ودي جميعا والاحترام