كيف تتخيل صورة العضو حازم وعمله وشكله.. بوست للضحك..

حازم بعد الناس كلها حيرها.. عايزين كل زول يخمن ويتخيل
أولاً... بتخيلو ما حازم.. زول ود بلد تاكل وتقش إيدك في هدمو
من كتاباته الرصينة بتخيلو.. زول خريج
من كلامو عن الشهداء.. بتخيلو كان ضابط أو صنو ذلك
قريتو.. بتخيلو من شري..
أو من الجيهي الفوقانيي يعني من الحيبة وأنت طالع
...................ز
شكلو:- بتخيلو عندو نخرة طويلة
بتخيلو ما مشلخ منصوري
برضو بتخيلو متزوج ومطلق .. ليه ما عارف إحساس كدة
....................
أها نشوف باقي الناس يتخيلوهو كيف؟

من طرف **ابو مصطفى** الخميس 05 أغسطس 2010, 8:21 pm

حازم دا غايتو يا خالى صديق ؟؟؟ بتخيلو زول ومن ناس الصعيدية اى من السلمات ولا فوق ؟؟؟ نخرتو طويلة واضانه صغيرة قول كيف ؟؟ اصلا قال الاستاذ عبد الله الطيب ان القاعدة العامة الاسماء لاتعلل ولكن لكل قاعدة شواذ ومن ذلك الحنبلى وهو الرجل المنتفخ البطن والحنظلى وهو الرجل قصير الاذن وصغير العينيين ومعناه الرجل شديد الذكاء ومن ذلك خديجة وهى من الخديج ولعل الخديج هو الشى الناقص ؟؟ ومن ذلك الطفل الخديج اى الذى يولد ناقصا وهكذا لكن وصف حازم يا خالى صديق ؟؟ اضف اليه حاد الذكاء وعيينيه صغيرةوشكله او لون بشرته اخضر وهو حسب تخيلى زول رسمى شديد وزول نصيحة وزول فتران ماهو سمين ولكن زول زى السمكة فى الطين الربوب ما بتقدر تقبضه كل كله ومن ذلك حير كل الناس فى المنتدى وكمان شوف العجب العجيب انو جاء عند اهلى وعرف ناس البيت كلهم وطلع زول عارفوا ماهو فى ؟؟؟

تحياتى

ابو مصطفى

من طرف **م بروي** الخميس 05 أغسطس 2010, 8:59 pm

الشكل ما بعرفو لكن
العمربين47 ــ 57
العمل ضابط ولا زال
الرجل تفتيحه خالص
وزول نكته ووناس
قرأ كتير وحصيلتو
الثقافية مرتفعة
أبو مصطفى وواحد تاني
عارفنو زي جوع بطنن
منطقتو بين عصمةوبوني
وبعد ده ماعرفناهو
بقالك ياصديق ما جبنا رخوه؟؟

من طرف **خالد عابدين** الخميس 05 أغسطس 2010, 9:50 pm

اعتقد
انه مربوع القامه
عريض شوية
قمحي اللون
عنده جلحات

وشو عريض
مامشلخ
وماهو ادروج
حليق اللحية
وشارب معتدل

العمل : اتفق مع محمد بروي في ذلك
وكذلك العمر
هو تفتيحه لكنه يترك اثارا
قريتو : اتفق مع الباشمهندس صديق . : من الحيبي ولا قبلي

ابو مصطفي يااستاذ محمد بروي ماعرفو والزول ده سوالوا الصوعة ومصرانو قايم عليهو ومزازيني انا بالتلفونات حازم حازم وحازم قال ضرب لك قلت لو اي ضرب لكن اداني حبال بلا بقر - لكني طعمت الجبادة ورميتا - اها شايفا نتقت وبديت اسانق - انا واعوذ بالله من انا - عااارف نفسي من زمااان لغيم بس اوع الكلد يشرم

نان تاني فضل شنو ؟

Rolling Eyes

ها ها ها كل زول جاب وصف أحسن من التاي؟؟؟ والله حكاية حازم

ولكن زول زى السمكة فى الطين الربوب... أبو مصطفى قال كدة

الفي الطين الربروب ده ما السحيلي يا أبو مصطفى وكت البحر يشرد.. اصلك ما تقدر تقبضو؟؟؟

من طرف **منوفلى** الخميس 05 أغسطس 2010, 11:07 pm

رجل شهم وشجاع
متعلم لانو متلي في التعبير (الانشاء كلها لابآس )
قمحي لانو احساسه رهيف زي الفطير
زي التمساح يعوم عكس التيار
زكي
دخري

من طرف **منوفلى** الخميس 05 أغسطس 2010, 11:09 pm

متعلم لانو ما متلي في التعبير (الانشاء كلها لابآس )

من طرف **خال ابرار** الجمعة 06 أغسطس 2010, 7:05 am

اصلع الراس ذو لحية بيضاء طويلة وعادة ما يحف الشارب
طويل الاذنين والانف
نظره ضعيف يلبس نظارات
من الضفة الشرقية حدود الجزيرات لحدى شرى
فى الخمسينات من عمره
فصل من الجامعة بسبب مشكلة مع عميد الكلية
متزوج من امراتين واحدة منصورية والتانية من مدنى
له سبعة ابناء الكبير يدرس وادى النيل كلية التربية
اها بعد دا قال باااااااااااع ما عرفتو؟؟

راجل اخلاقو عاليه ومساهماته جميله اذا استثنينا بعض الهفوات.ولكن للاسف اختار هذا الغموض الذي أراه غير مبرر.وبما انه ملتزم بالقواعد العامه فيجب ان ندعه وشأنه.

من طرف **ود القيايل** السبت 07 أغسطس 2010, 4:15 pm

زول طويل ونحيف وعمره بين 45 وال55 راجل كلامو واضح ونضموا دقرررري زي بول الجمل وود بلد اصيل ... بس الناس تدور تدارق الا درقته ربه وربنا يحفظه .......

من طرف **خالد عابدين** الأحد 08 أغسطس 2010, 4:45 pm

عنوان هذا البوست

كيف تتخيل صورة العضو حازم وعمله وشكله.. بوست للضحك.

من طرف **zoooba** الأحد 08 أغسطس 2010, 6:56 pm

رأس صغير وأنف طويله
مربوع ما قصير وما طويل سمييييييين
عيون صغار وبرضو اضنينو صغار وعندو جلحات
ومنطقتو من شيرى وانت ماشى على بوني
زول مثقف وكلامو كتير
وقراء الجامعه وهو في الجيش
حالياً موظف كبير في الاستخبارات العسكريه
راجل مرتين

من طرف **الهيثم** الأحد 08 أغسطس 2010, 7:21 pm

رغم انو الاخ حازم اختار لنفسة الغموض
برضو نحن نشارك بتصور شخصيتة،فقط من باب المشاركة، و حازم اشار بانى اعرفة زى جوع بطنى ، لكن والله لما قال الكلام ده انا مابعرفة، لكن من طريقة كلامو، تاكدت انومابعيد من مؤسسات البلدولو (سابقا) وخمنت شخصيتين، لكن بعد كلامك عن القائد المنصورى فى دارفور واصابتة وانجازاتةفى الميدان، الصورة قربت لى نوعا ما .
الاوصاف:ـ
1- طويل
2- ابيض اللون
3- ليس بالضعيف
4- رائد او مقدم بالجيش
5- من حجر البيضاء
6- ماعندو صلعة

أخيرا بعد وداع المطار للطيب ود أختى إتضح حازم إنو( عشا البايتات بلا منازع)..

والله يا هيثم الدسوقى بعد وصفك لشخصية حازم ذكرتنى القال لى صاحبوتعرف لى البضبحو فى الضحية ليهو قرون يقول بعاع شنو؟

من طرف **الهيثم** الثلاثاء 10 أغسطس 2010, 3:42 pm

طولت ما ضحكت زى ده
مشكور يا نصر الله

من طرف **ابو مصطفى** الأحد 15 أغسطس 2010, 4:31 am

انتو ناس تخمنو ساكت وكلامكم دا كلو ماهو فى محلو ؟؟؟؟ قولوالى كيف ؟؟؟؟؟ انا ابو مصطفى والله شفت حازم على الطبيعة ولكن والله كان قلت ليكم وصفه الان كذك وكذا اكون كذبت عليكم ؟؟؟ حازم دا ما عندو وصف زى السمكة فى الطين الوحل حتى انشفتو فى السهلى اكان ما تقولوا الزول دا يبالغ مرة يبقى احمر ومرة يبقى اصفر ومرة يرقش غايتو زى الحاوى ؟؟؟؟؟

تحياتى
ابو مصطفى

من طرف **منوفلى** الأحد 15 أغسطس 2010, 7:37 am

يبقالي انت لي هنا كملت الوان الطيف كلها
الا نشوف ليك فوق البنفسجية وتحت الحمراء.

من طرف **ahmed alkhabir** الأحد 15 أغسطس 2010, 4:28 pm

هي البنفسجية وتحت الحمراء الوان ولا اشعة يا اخ منفلي ؟؟؟

من طرف **ابو مصطفى** الثلاثاء 17 أغسطس 2010, 3:04 am

والله حتى الان الناس عاوزة تعرف حازم وشكلو كيف ؟؟؟
كل زول عاوز يعرف حازم انا اوريه شكلو الحقيقى لكن عندى شرط ؟؟؟ يكتب من خمسة مواضيع ولافوق فى المنتدى ومواضيع تؤدى الى تطوير المناصير وحل مشكلة المناصير ؟؟؟؟

تحياتى
ابو مصطفى
القاهرة

من طرف **منوفلى** الأربعاء 18 أغسطس 2010, 7:38 am

[هي البنفسجية وتحت الحمراء الوان ولا اشعة يا اخ منفلي ؟؟؟[/
الآن اعذرني يالخبير
بعد الجماعة يجيبوا لينا مجانية التعليم انشاء الله بندجل الجامعة والكتوف تتساوى ونعرف الفرق بين الالوان والاشعة

من طرف **nader nor elhadi ali** الأحد 22 أغسطس 2010, 5:06 am

كملت خلاس عذرا عمنا ابوجنه رغم انك قلت مساحه للضحك

من طرف **منوفلى** الأحد 22 أغسطس 2010, 7:21 am

يا صديق ابو حنة
شايفك وقفت الكتابة هنا ؟؟؟؟؟؟
نقول هيثم الدسوقي ( جاب ضقلة يكركر)

من طرف **ابو ايمان** الإثنين 23 أغسطس 2010, 3:19 pm

اطرحوا مواضيع هادفة

أيوة ايوة خلاص يا شباب وصلت غرضا المطلوب وهو عدة اسباب
بوست للضحك ترفيهي كدة من غير مس بالغريق طبعاً والحمدلله كل المتداخلين كانوا تمام
تاني هو بوست للإبداع من الكوميديا ونشوف فيهو مواهب الناس وقد ابدعوا
برضو بوست يبين وسع او ضيق شخصية اخونا حازم.. وقد اثبت حازم إنو صدرو واسع ويتحمل النقد والمزاح والجد بصورة واحدة طالما إختار لنفسه الغموض في الأول زي ما قال هيثم. لكن هسه خلاص ما الناس عرفتو وبالتالي يكون غرض البوست تحقق.
برضو زمان درسونا حسابات ( الإحتمالات) وعندها مسائل معينة وتوقعات.. وتنبؤات أظن لسه موجودة في منهج الرياضيات.. إفتكر ناس الأداب عندهم حاجة إسمها الإحصاء
هنا طبعاً غرض البوست كل واحد يضع إحتمالاتو هنا وبعدين بعد تنكشف ابعاد شخصية حازم الحقيقية. الواحد يقيس نفسو الى اي مدى إحتمالاتو اصابت أو أخفقت، والنبي صلى الله عليه وسلم عندو حديث يقول؟( إتقوا فراسة المؤمن)
الغرض الأخير من البوست هو موضوع قصير مرن سلس قفشات.موش زي مواضيعي الطويلة ديك كل مرة
الحاجات التوثيقية المعلوماتية مرات تكون مرة ومرات تكون حلوة لنفس القارئ.
ولذلك قصدنا هنا التنويع
النفس البشرية ماها نفساً عجيبي خلاصصص. عايزة مباصرة
هي كالعصفور الصغير الماسكو في يدك، كان ضغطا عليهو شديد يموت.. وكان فتحتا يدك وفريت أصابعيك يطير. يعني سياسة بين بين...
لذلك قصدنا التخفيف ترفقاً بأنفسنا في المقام الأول وترفقاً بالقاري، وبرضو تنويع وكدة

من طرف **منوفلى** الثلاثاء 24 أغسطس 2010, 2:05 am

مشكور دوما اخونا صديق ابو حنة

ياجماعة الحبوبتو سيداحبيه منو

من طرف **بت الماحى** الأربعاء 06 أكتوبر 2010, 4:55 pm

لا حووووووووووووووووول............... بالله انا الوحيدة الطلعت مسطحة تسطيحة كبيرة خلاص لانى لما كنا بتناقش فى الوحدة و الانفصال معاهو هو و العوناب و آخرين كنت قد رسمت له صورة و هى كالاتى:
شاب يتراوح عمره بين 20-35
طويل و ضعييييف (من كترة النضم)
خريج
مثقف جدا زى ما واضح من مشاركاته
إرهابى
من شرى

من طرف **حازم** الأربعاء 06 أكتوبر 2010, 5:21 pm

السلام ياهندسه شيل الحال السويتو فيني دا علي اوريك ياهو ؟
طبعا في ناس كتبوا حاجات جميله واخرين كتبوا حسب اختلاف الرأي الذي كاد ان يفسد الود
المهم انا مقدر وممتن للذين تحدثوا في شخصيه حازم بحديث يلفه الاحترام والمحبه
اما الذين قالوا مالم يقله مالك في الخمر برضوا لهم شلالات من الود والترحاب واكثر من الذين اطروا علي . ذلك لأنهم قد اصابهم رشاش قلمي فلهم العتبي حتي يرضوا وان لاقصد ولانية لي سوي انصلاح الحال وتبديل المآل
والشكر موصول ثانيه الباشمهندس صديق
والسلام حازم

من طرف **حازم** الأربعاء 06 أكتوبر 2010, 5:30 pm

بعدين يابت الماحي
الناس دي كلها ضاربي خارج التخته ومافي زول كلاموا صاح
الا زول واحد بس
وكل هذه التخمينات كانت قبل مقابله اي من الاخوان وبعدين الارهاب الجابوا شنو يابت الناس شايفاني راكب لي طياره ومتجه الي خزان مروي
فقط اتشبه بالرجال وان التشبه بالرجال فلاح ؟ لك وللنزير العنوناب احترامي ....

من طرف **بت الماحى** الأربعاء 06 أكتوبر 2010, 8:34 pm

حازم كتب:بعدين يابت الماحي
الناس دي كلها ضاربي خارج التخته ومافي زول كلاموا صاح
الا زول واحد بس
وكل هذه التخمينات كانت قبل مقابله اي من الاخوان وبعدين الارهاب الجابوا شنو يابت الناس شايفاني راكب لي طياره ومتجه الي خزان مروي
فقط اتشبه بالرجال وان التشبه بالرجال فلاح ؟ لك وللنزير العنوناب احترامي ....

طيب الزول الكلامو صاح يرفع ايدو يا ناس....
يا أخى يا حازم و الله انا دخلت فى البوست لأنه للطرفة و الترويح و كل الكلام القلتو انا دا مزاااااااااااح بحت و مشاكسة لا غير و انت لا يمكن تكون ارهابى و اقول لك اختلفنا فى الرأى ....نعم و لكننى أحسب أن الود باق لأننا اهل ........وافر التقدير و الاحترام......

بت الماحى كتبت ارهابى ومن شرى .دى بتخوف عديل .وانت مش من شرى الارهابى عندكم منو تانى .حازم نظامى .فى الاربعينات .ذو شخصيه جازبه مع الهيبه .ممتلى القامه طويل .نظامى دى من كلام التصويب خارج التخته الذكرها فى معرض حديثه .من الجهه الفوق لا يعرف عن البلد كثيرا لكنه راكب الموجه .له كنيه .لم اقابله قط.

من طرف **ابو مصطفى** الأحد 11 سبتمبر 2011, 6:35 pm

يبقى لى حازم مولود فى القناويت ؟؟؟؟ محل قيامة المناصير قامت

من طرف **ود المناصير** الأحد 11 سبتمبر 2011, 8:21 pm

كلام زعل ما بنقبلو

اخوي صديق حازم ده عندنا معاهو صلة رحم من جهة الوالد والوالده وطالما هو قريبا لي اذن يقرب لك ايضاً لكن ذي ما بيقولوا البعد جفاي ويمكن قابلته مرة واحدة وهو من القناويت وفوق هذا ان صدقت التخمين .

سلام حازم وسلام رجالة المناصير وأهل المنتدى

معليش ما بقدر أخوض في التخمينات وكل الأقدر أقوله أنو حازم راجل ضكران شديد واخو أخوان

أظن والله أعلم أن ملك فقاعة ود البروي وصفه أقرب الأوصاف

نبارك الزواج مرة تانية
ماهو خلاص ظهر في الباسقات..
تاني أنا لما أجي السودان راح أعرفوا طوالي
ايوة يا عز الدين.لنا صلات قرابة نحن وأنتم بي ناس القناويت..
مرة مشينا ليهم في باشي.. وقت جاهلية المناصير وكان عمري15 سنة
والناس المشوا الباشي من جيهتنا بالحمير هم
1 تاج السر نعمان..السلمات

2 محمد علي ضقولي.. الضقولة
3 حمد الفكي على ضقولي...الضقولة
4 أحمد نعمان بدر الضقولة
5 سليمان احمد نعمان بدرالضقولة
6 محمد خليفة الفكي الضقولة
7 خليفة ودعلي..السلمات
8 عيسى عثمان حاج قيلي..الحسيباب
9موسى البقاري.. خور قرين
10بابكر محمد عثمان...السلمات
11 محمد الملك ابراهيم...ساقة القصوراب
12 حسن الفكي علي... الصغيراب
13 الماحي سالم... الصغيراب
14 علي اللسيدي... النعوفاب
15 سليمان ود الطرشان... النعوفاب
16 عقيد عثمان... النعوفاب
17 سلمان محمد الخليفة... النعوفاب
18 علي محمد الخليفة.. النعوفاب
19 علي ود أب ايد النعوفاب
20 حبيب الله إدريس ...النعوفاب
21 إبراهيم فضل... النعوفاب
22 محمد علي بلل..مساند... البللاب
23 سليمان تقله.. البللاب
أكرمونا غاية الكرم وقتها

من طرف **حازم** السبت 17 سبتمبر 2011, 4:40 pm

معقول ياهندسه

لديك ذاكره 5000جيجا

ماشاء الله

ربنا ينعم علي الجميع بالصحه التامه وعلي المتوفيين شآبيب الرحمه

لك وللاخوان ودالمناصير وعزالدين الدقولي ود حسين النافعابي شلالات من الحب والتقدير

ومنتظرين جيتك ياهندسه بس المره دي انشاء الله ماتنشرم الجباده زي المره الفاتت بعدين نقوم نجيك محل ماك قاعد

[ندعوك للتسجيل في المنتدى أو التعريف بنفسك لمعاينة هذه الصورة] لأنو بالجد اشتقنا لهذه الروح المتقده وهذا الادب الجم

وأنا أجيك محل ما قاعد يا حازم.( القومة ليك)
ونلقاك بقيت جد.. بس انا صغيير لسه ما قدركم وما بقيت جد..
أنا لا انسى يا حازم.. مشكلتي اني لا انسى.. لا أنسى الأحداث..
اما أذا زول تلوم معاي وكدة دي بنساها في لحظتها. أو في الحقيقة اسامحو.. وأعمل يلها دلييت طوالي..
لا أحب ان أغلط عشان ضميري ما يؤنبني.. ولذلك كضاب زول يقول انا غلطت في حقو.. أو غلطتا في حق زول..
لذلك الهالة التى أحاطني بها المجتمع، بدون فخر جعلتني أعزف عن اي شئ لا يرضى عنه المجتمع..
بس
الزول الأحمق ما بينفع معاي. كان لاقاني في الدرب ده إنصرف منو

وقال المثل العربي القديم( لكل داء دواء... إلا الحماقة أعيت من يداويها)
بل اسف الحماقة مدفوقة دفق عند مناصيرنا..
لكن البركة في الجيل الجديد القايم ده من البنات والولاد..

المرة دي ما راح تنشرم الحوتي من الجبادة ياحازم بإذن الله..

من طرف **حازم** الخميس 22 سبتمبر 2011, 5:15 pm

منتظرين ياهندسه جيتك

والبلد فرحانه بي طلتك

يالنفر الحقنا بي رميتك

كم يشتاق الكثيرون في المنتدي لرؤيتك

بس اياك ياهندسه تتاخر مرقتك

بالجد مشتاقون لرؤيتك

من طرف **(الحاج شرف)** الخميس 22 سبتمبر 2011, 10:19 pm

مابنقدر نشارك

لاننا لم نشارك وما مشينا

بيتنا بعيد