خـُوُخـِيـِي

انا ما عارفة الخوخي دى شنو
بس البعرفوا فى قضية المناصير
بينطبق عليها القول غيب وتعال تلقانا نحن يانا نحن

لا جديد .... بس صرف عربي كتير

يأبو مصطفى
الكلام ده وراه كلام
الباشمهندس صديق يقصد كلام تأاااانى بمعنى
الخوخى مثلها مثل الحشكنيت والضريسه وكلها حاجأت تلصق فى الزول ومابتنفك منو

وكذلك عندنأ مثلها فى قضيتنا دى
ربنا يحل الحلا ... ..

هههههههههههههههههه
ابو مصطفى والحاج ضحكوني
عشان كدة قضية المناصير بقت زي الخوخيي
مع الاعتراف لـ أبو مصطفى والحاج أن يكونوا من سكان المحلي
وكذلك انتصار عشان غابت عننا كتير برضو لو عايزة تسكن في المحلي تسكن
......
لكن الخوخيي دي راح يوصفا ليكم بدقة متناهية محمد بروي..

وبرضو بي نعذرا استاذة انتصار عشان كانت غايبة عنا وعشان بت عاصمة ما بتعرف الخوخيي.. لكن عندها مترجم راح يوصفا ليها صاح

السلام للخال!!
فعلا قضية المناصير خوّخت بقت خوخى...
(نبات الفطريات)الذى يعرف فى المناصيرب(فسوة الضبعه)..
خوخى حسب فهمى زى الحاجه القديمه خالص بنت فوقها العنكبوت..
القرع يخوخ والبطيخ والشمام يخوّخ..
خوخى من خخ ..خوّخ..أخ تف..يعنى قضيتنا وصلت هذا المستوى أقصد التخويخ والخوخ نوع من النباتات فيه الكثير من العلاج..
يقولك فلان خوّخ.بى لهجتنا يعنى (عفن)بكسر العين..
هل يا خال أنا قريب من المعنى الذى ترمى إليه.أم بره الشبكه؟؟

الخوخي تعني الخوخي

مرحبا بانتصار وعودا حميدا وانشاء الله تبقي اخر الاحزان....

كان عارفين الخوخي تجيبك كان من زمااااان عمدتنا عمل ليها البوست

محلي محلي خيارنا محلي ......

تشكرى نجلاء واخبارك ان شاء الله تمام والبركة فيكم فى جدتكم

وانا ما جابتنى اى خوخيات
اللى جابنى عزاء عمنا حسين السيد
حبيت ادخل واسجل تعزيتى لانو صاحب ابوى وغير كدا بنتو هى زوجة خالى


قلبت ليك الخوخية ونسة يا ابو حنه
رايك شنو يا ابو حنه قسم القضية دا تنشر فيهو كتير عسى ولعل ينعدل الحال
انا شايفة الحكاية فيهو سخنت وماشة من سئ لأسوأ ما عارفاهم مالهم

ناس الخوخيي سلام--كلمة بحتا صديق مما فى ---وهى فى الاساس او الغالب--بيت العنكبوت--ويشبه بها اى شئ من شأنه يخوف وخاصة الاطفال--كريش او صوف--مثلا صوفية حمامة طايرة يقال للطفل (عاين خخ) وهكذا وكما يخوف الطفل من النار بلفظ (أح) ويكرر اللفظ عدة مرات--واصبحت تقال الخوخيى كما ذكر تقريبا لاى شى قديم ويكون اشبه ببيت العنكبوت فى المخزن القديم وعلى فم الجرارى التى يحفظ فيها الاشياء فى المخزن وهكذا--اما رد الاخ الحمود--فعلا يقال لبعض الفواكه والخضروات انها خوخت--للشبه ولكنه بعيد شويه فى المعنى مع تشابه اللفظ لان المعنى هنا يراد به ---(التحلل ) اى ان الشمامةاو البطيخة خوخت-وفى مسدار الحاردلو--
الشم (خوخت) بردن ليالي الحرة
والبراق برق من منا جاب القرة
شوف عيني الصقير بي جناحو كفت الفرة
تلقاها أم خدود الليلة مرقت برة
الشم يقصد بها الشمس--وخوخت هنا تعنى الضعف والوهن--سبحان الله ليستبين المعنى او التطابق مع بيت العنكبوت --الاضعف والاوهن-----وضعفت الشمس اى قلت حراراتها اى جاء فصل اخر غير الصيف وهنا المقصود الخريف ---
الاخت انتصار نورتى المنتدى مجددا---وفى انتظار الدكتور ود عون الله والله يعين الجميع--

الاخ صاحب البوست جاب الخوخيي بى هنا لذكاء منه ربما يريد ان يصرف الناس ويقلل من حدة النقاش الداير--وجاب حاجات من البيئة عشان يذكر الناس---
وارى ان علاقة القضية بالخوخيي قد تكون القضية ركنت وضعفت --او كلما اراد الناس ان ترفع وتيرتها تقول ليهم الحكومة (خخخ) وقد تكون ماسك اشياء---او قد تكون القبيلة تشتت وتفرعت وهكذا--

يا ولد الخوخى جاتك