مرثية المرحوم الشاعرالكبير/ابراهيم الشاعر

قالها الشاعر خلف الله كباشى وقد سمع خبر وفاته عبر الراديو


جيت الليلة جيت ياموت اه يا مفرق الحبان
وجيت الليلة وكتين جيت تشيل من بينا اعز انسان
وجيت الليلة لى ابراهيم كتير خليت وراك احزان
دموع منحدرة تتسابق نزل فيض العيون ريقان
وكل ما تمشى تلقى دموع دموع الحسرة والحرمان
وموتك انت يا ابراهيم موت للكلمة للبيان
موتك انت موت تاريخ نطق فى عالم الكتمان
نوعك انت ما بيموت مخلد ذكرى للازمان
تظل تاريخ تظل نبراس منورة ظاهرة للعيان

نكمل فى وقت لاحق

نواصل

ملامحك تبقى لى كل جيل دروبك ترشد التيهان
ما بقدم بديعك فينا رى نسقيهو للحيضان
ابدا سلسبيلك جارى حالى ونسقى للعطشان
شعر اب حفصة كيف يرثيك وكت ماتت الاوزان
ونظمو الليله شن معناه يفقد لى وتر رنان
انت اشعارو كت مسقاها رامى بذوره فى التكان
خبرك جانا ليلا ظلمه خبرك ذاعتو ام درمان
خبرك خلا كل زول فينا متاسف شديد ندمان
ندمان فى ماسى الدنيا حولت الخليل جثمان
زولا من خلق يا دنيا رافع همه الاوطان
اتعقدت عليهو امالنا ساعة القومه والفيضان
يدافع عن بلد يهواها نترك عشرة وام غربان
ونرحل لى بلادا عامرى مويته جارى بالخيران
وزى ما قال وتانى انا اقول ارض ما بتعرف الكفان
ارض مطروحه بى مكنات ارض ما حرتته التيران
لكن شاءت الاقدار ابت ما تخلى لينا ضمان
راضين بى قضاك مولانا سمح حكم القوى الرحمن


اكتملت القصيدة
مع المعذرة ان كانت هنالك اخطاء املائية اوغير ذلك
المصدر / كتاب عبقرية المناصير