تبكي بـــس يابــــــلد

من طرف **علي الحمود** الخميس 07 فبراير 2013, 8:13 pm

قوم يا عشاي ..
قوم للعَشا ..
قوم.. واِنتَكِي
وقام واِنتَكَى ..

ويلقى الحسن
في صفْحَتو
وقِدَّامْ وَشِي ..

- إن جيت بلدنا إنكسِّرت ..
_ أيِ .. آ .. الحسن ..

- كَسَرَا البحر ؟
_ أيِ .. آ .. الحسن ..

- يابا البحر دا .. بحرْ بلدنا ؟
_ أيِ .. آ .. الحسن

- الزول يكسِّر بلدو ؟؟
والضو .. سكَتْ ..
طقْطَق أصابِع ولدو
فِسْ .. إنجِلِسْ ..
فِسْ .. إنجِلِسْ ..

- يابا المدارس اندمَّرت ؟؟
صاح والجوامع اِنكسَّرت ؟؟
_ أيِ .. آ .. الحسن

- يابا .. الجوامع .. هيل مِنُو ؟
_ هِيل الله .. نُــوم ..

- حتَّى المدارس حقَّتُو ؟؟
_ لا لا الْلتْ الحيكومة .. نوم ..

- هُو الزول يكسِّر حقُّو كيف ؟؟
والضو يَطَلْوِحْ بُو اِندهاشْ ..
ما يلقى قيف
.. لا بان لُو .. بَرْ .

وأمُّونَة صُوتا من البعيد ..
نوم .. يا .. قَشَرْ

- صِحْ يابا في الجامع ،
جا تمساح واِنبَطَحْ ؟؟
_ أيِ .. آ .. الحسن

- يابا التماسيح .. مسلمين ؟
_ لا مجرمين

- لابسين دقون .. لافِّين طِرحْ ؟؟
_ ..........

- ما تَضْرَبُوهُن بالسلاحْ ،
وتَكَتِلُوهُن .. تاحْ .. تَرَحْ ؟
والضوْ .. سرحْ

وأمُّونة صوته من البعيد ..
حَلِقَه إنجَرَحْ :

نوم يا قَشَرْ ..
نوم قبْل أجيك

- يابا البحر دا ولَدْ مِنو ؟
_ ولد المطر

- ويابا المطر ؟
_ بت السحاب

- ويابا السحاب ؟
_ خير للبشر

- ويابا البشر ؟
_ هُول ربَّنا

- ونان ربـــ ..
وأمُّونة تجري من البعيد ..
يقطع كلامو وتنْحَسُو
تَجْبِدْ أضانُو وتقْرُصُو
لا تقْلِدُو ..
جيب القَشَر دا
علي رفاقتو نرَقِدُو ..
أمُّونة هَزَّتَا تمْغِسُو ..

- أنا دايْر أنوم في صدر أبوي ..
شان البحر ..
وقام إنحشر ..
في صدر أبوهُو وحدَّثُو :-
في مرَّة جُونا ..
رجال كبار .. كبآر ..
غَمَتُولِي في إيدِي ..
قروش كتار .. كتآر ..
أمُّونة شالتا فنَّتا ..
الراجِل أبْ دِقناً كبير
سبَّاله دنْقَر لقَّطَا ..
وأنا قُم بكيت
أمُّونة فكَّت صُرَّتَا
وأدتني صندوق بسكَوِيت ..

_ بعدين ؟
- سكَتّ .. وأمُّونة قامت ..
شَوّ .. بَكَت ..
وتلْفَح نعالَه .. وتَفْلَعُو ..
نوم .. يا .. قَشَرْ
نوم .. قَبْلَ أجيك

- أنا داير أنوم في صدر أبوي ..
شان البحر
وقام إنحشَرْ .. في صدرَ أبو
ونام الحسنْ
في آخر المسا ..

وصنَّت عيون النوم
يجيها بعد تعَبْ ..
سرْسارو داخل المدرسة .
والضو غَمَد

..
.
من قصيدة / الضوء وجهجة التساب
للراحل / محمد الحسن سالم حميد .. له الرحمة والمغفرة ..

جزاك الله خير اخى على الحمود قصيدة معبرة عن حالنا والله قصيدة مبكيه.
رحم الله الشاعر حميد واسكنه فسيح جناته

من طرف **علي الكليس** الخميس 07 فبراير 2013, 10:46 pm

تسلم سعادته ود الحمود وتسلم (المناصير) القبيله من كل شر

تبكي بـــس يابــــــلد

تبكي بـــس يابــــــلد

رد: تبكي بـــس يابــــــلد

رد: تبكي بـــس يابــــــلد