قصيدة فى الصحافة

[center]القصيدة قيلت عندما ذكر اسحاق احمد فضل الله فى عموده اخر الليل وصف المناصير
بسكان القرن السادس فاجادت قريحة شاعرنا بهذه الكلمات ادناه

نحن ايانا ولادقمر العفاف والعز والنسب
نحن فتشناها الشعوب غيرنا قصدير نحن الدهب
نحن معروفين من قديم عننا التاريخ كم كتب
فى ام دويمة التاريخ عريق استيوار نصبولوالنصب
كربكان كانت وماتزال فيها كم جنرال اتقلب
نحن موطنا نحبه حب فى حضنا ولابنو لب
نحن قبل الاول نجى بى نفوز لولا الناس رتب
مالها دى اللتنا بقت كدى كل يوم واقعين فى مطب
اليطير سد مروى الكبير بيو ياما وطنا اخرب
الديار صاطه وخربه للخلايق جاب التعب
فرق الوالد والجنى غرق الشايل للرطب
نحن للمولى نصلى يوت ربنا المافى غيروا رب
من سماهو ينزل غضب يرمى فوقو النجمه ام ضنب
يتبعج يمسحا من طرف لاعجم يفضلوا لاعرب
يتبتر مثل الظالمين الجثث تمرق فى لبب
العقال ينجو من الهلاك ما بنلوم زول من دون سبب
الخليل فى النار اترمى نجا ربو وحرق الحطب
الزعيم الكان زول عديل لينا كم قرر وكم كضب
مالو يوعدنا تلات سنين اى زول محتار فى السبب
يذهب الفى راسو العوين لينا لا قدر لا حسب
البلد مليانة عقال مالو طالقلو قليل ادب
السلام للمهدى الامام اصلو لا كضب لا نصب
حولو يا ما اتلموا الخلق فى زمانو الظلم اتحجب
جينا فى عهدا يا لطيف ساطوا دارنا الجوا من القنب
فى مهب الريح الوطن جمرو فى الاطراف هبوا هب
الرصاص ما برهبلو زول ما بفيد لو للحق سلب
ابن كنعان مات بالنمت كان مصيرو مصير اب لهب
حسنى فى قفص الاتهام ومن ديارو معمر هرب
نحن زاتو نفسنا مقبوض للكريم رافعين كم طلب
ابن يعقوب فات الحدود من قديم شايل فيك غضب
يا مسيكين جدك دقس مالو ما غير للعتب
اخر الليل آخرو الخراب غالبا غاصب ومغتصب
العجوز العوقة العميل اب خلقتا تشبه الضب
عان زلوط عدمان الشنب عوعا لمان كشحولو حب
الديوك زاته خشم بيوت وانت ديك السد ليك لقب
مادى قدومتو على الشمس فارى ريشو ونفش الضنب
النخيرات ابريق حسين نفرو الا يخرب الترب
انت طفاشى لاجذور قالوا جيت شرق النيل جلب
انت ملعون معدوم اصل للمحس بالزور انتسب
المحس للحق صناديد كم وكم ركبوهو الصعب
شفنا فى كجبار الصمود ولعوهو وشفنا اللهب
ود جلال كان ليهم سفير روحو لى حق الغير وهب
فيها مر ديار ودقمر للاهل عايش واستحب
الخلق عايشى على الضفاف من اعالى النيل للمصب
مالو بعد الخزان نقوم دابو ارتحنا من التعب
اسأل السكنوا العتامير الفقر فيهم طب طب
ونحن من ضل لى ضل ننوم الفقر طار فارقنا تب
السمك راقد خربزيز وفى جروفنا زرعنا القصب
لاسماد لا بوقه لا جاز يا حليل ايام الكرب
نحن لو مانى مؤدبين والله لى جدو نسبو سب
وعافى من اهلى المناصير للبلد شالووقالوا وب
البلد فى حالها القبيل المنازل صبوها صب

بحمد الله اكتملت القصيدة فهل من مطلع

تشكر عباس . على التوثيق لملحمة رد الإعتبار

ورد بالقصيدة

اخر الليل آخرو الخراب غالبا غاصب ومغتصب

إختلف مع الشاعر فى توصيفه لآخر الليل ، رغم أنك أخى عباس كما يبدو لى سحبت بيتا آخر ولو كنت مكانه لقلت :



آخر الليل فيهو القيام والهيام والشوق والعشق

بالتلاوة وذكر الكريم والنحيب للظلمات يشـــــــــــــق

ليه تزم فيهو المناصير بى كلام زولاً يطربـــــــــــق

وهم معروفين ناس دواس يوم تولهج نارة وتبق

شكرا الاخ سامى على الاضافة والمرور
وكانك تقول للباشمهندس الفكى انا وراك طوالى
كلامك اجمل من حيث الحكمة والمنطق ولطيف القول
ولكننا ننقل كتابة الشعراء بمايريدون من التعبير فهذا فكرهم وليس فكرنا

الشبكة قبضت بياض كبير
شكرا الارباب على المرور