غراق البلد

غرقانى جبالا وتموره
حتى خلانا اضحى بحيرة مامعروفة وين ناطوره
حسينا الشتات والفرقه شق مانمشى فى المعمورة
وكيف نقدر نطيقو فراقها بلدا فى الامان اسطوره
من حد برتى لى ام سفاية مافى من الحرامى خطوره
حتى كلابا مانباحة ولابتهوى الكديسة طيوره
لكن نخاف من خطب معزولة يظهر فى نفوسنا حبوره
وتدخل فى نفوسنا بشيش بعدين يتقطم خابوره
قطعا ما بنقول لى اهلنا ختو الطلقة فى الماسوره
لكن نقعد مع الحاكومة لامن تجبر المكسوره
ما دام فى كسرنا الدامى نعمة على الوطن نافوره
والله من اجل البلاد الغالية راضين ندفع الفاتوره


حليل دار منصورحليل دارودقمرالشكر هولا
الزغاريد شق الجبال مع حس الرمطولا
ديل اهل الخلاوى الديمة ممهولا
وحريف قراصة ماها رغيفة بى فولا
ومن قمح البلد معيوسة فوق الدوكة مدبولا
وملاحك يا نعيميتا مشططه يا جبركولا
وكمان فوقك بصل للنفسو مقفولا
ويا حليلكم ويا حليل ونستكم التحت التمردايما تقعدولا

مع المعذرة ان كانت هنالك اخطاء املائية

ونواصل غدا

شنو الابداع ده يا عباس كنت فاكرك ما بتعرف تقول شعر!

الاخ ابو سما تحياتى
اولا الشكر على المداخلة والمرور
ثانيا ماتراه انت دراب غيرك
يراهو حديثا سلسا مموسقا

ولك كل الشكر والتقدير

ونواصل
الخزان دا لو رحلنا تبقى مصيبة يا الاحباب
تفارقوا النيل بى شلالو وموية الترعة تبقى شراب
ويبقى رقادنا فى التابوت وتجاورو بعوضة الزيداب
ما تتغروا بى مالا من الشركات وراهو حساب
وين نلقى الامان زى دا عيشنا نخلى فى القيساب
حلات الخضرة قوق القيف والشتل الجبد يا داب
وحلات قندول الصيف مصنقر سيدو فى اللقداب
وكسر عبلوجة من الحوض وحس طنبورو ليه رباب
لوحة من الجمال مرسومة والله ما بنرضالها اى خراب
دى البلد المخضرى ديمة شرى الغراء كبنة وبرتى ورمال الكاب
مدارس يمين تلاته بحور فاتحة تقرى فى الطلاب
مسورة بى حجر منظوم ومن قوق ضلها العناب
ما شفتو المدرس كيف بشرح درسو باستيعاب
والله واثق من كلامو القالو ما بيرجع يشيلو كتاب

مع المعذرة ان كانت هنالك اخطاء املائيه

نواصل

يازمن حاشاك من اللوم وليه مزازنك بالنبش
وان مرض ما بتلقى العلاج واقرب الناس منك يكش
وان بكيت الليل والصباح ماتغيرو حظو الوحش
وانت مهما تبقى صنديد بى يهينك عدم القرش
والرجال مو شنبا طوال ولاها قمصان وكبر كرش
والرجال ما مالا كتير ولاها عضلات تخمش خمش
والرجال البقضو الغرض حتى لوراقدين فى برش
وتلقى ناس كاتلن اليباس من صغار ما شافوالفرش
من عيونا متل الشرار ان طبقتها تابه ترمش
رضعو من شطر الفراسة والقلوب نار ما بتتهبش
ناس وجوهن متل الحرير تابه ما ببتحمل خدش
وناس كتار كاتلن الفراق والنضم فوق خلق الله وش
وناس حياتهم فوق للسحاب والكلام انترنت ودش
والنهار تلقى الزول عديل وكت تغيب يتلبد يحش
والحريم دا يبقن رجال وتتمغص وما بتلقى البفش
ابقى عشرة على عقابك ما تخل عرضك يتهبش
وما تجاور زولا غشيم بى يخذلك وليك يقش
وكت تجاور جاور حكيم واحذر اب راسا منتش
وما تجاور زول اضينة شد رحالك ومنو اطفش
وانت ان فتش للسفر اتمهل وللرفقة فتش
ولو حصل بين الناس خلاف ابقى حجاز لاتحرش
وان مشيت ميدان القتال ارمى قدام لا تتكمش
وكت تعرس عرس رجال مو دهيبا كلو يرقش
كن رجل ود ناسا اصال وللضعاف ابقالهم عرش
ولو فقدلك زولا عزيز للدموع بى سرعة قشقش
حتى فى الموت تلقى الشمت ابقى صابرلاتتلطش

المعذرة هذه القصيدة تحمل فى طياتها كثير من الحكم
ومجريات الحياة العامة ولا علاقة لها براس الموضوع اعلاه
مع المعذرة ايضا ان كانت هنالك اخطاء املائية

عباس محمد كتب:الاخ ابو سما تحياتى
اولا الشكر على المداخلة والمرور
ثانيا ماتراه انت دراب غيرك
يراهو حديثا سلسا مموسقا

ولك كل الشكر والتقدير

ما فاهم قصدك

القصد اختلاف وجهات النظر لاتفسد للود قضية
فى النهاية هى محاولات لشعراء بلادى فلا بد
ان توثق ولابد ان يعطى حقهم حتى لوكانت بداية محاولات

شكرا ابوسما على مرورك مرة اخرى على اثراء هذا المنتدى

تسلم يا عباس ... وشكرا على نشر هذه الدرر

والتحية للرائع الهادي بوني

واصل يا استاذ .. فنحن في المتابعة

شكرا ودالمناصير على المرور
كلما نجد جديد سنوافى به
ولانبخل على اهلنا ابدا

اولا مشكور كتير ياعباس على نشر هذه الاشعار القيمه وانا بتابع فى هذه القصيدجه فا فنكرت انا شاعر هذه القصيده من فحول الشعر القدماء ومن شاعر هذه القصيده يا عباس

شكرا ودقطر على المرور
هذه القصائد اعلاه شاعرها
الهادى بونى المنصورى الاصيل فى مدينة ابوحمد