ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

الأخ الباشمهندس الفكي أحمدمحمدأحمد الفكي.. لما شفتا إسمك هنا( انبسط لي بساطي فايتي على القوانين) ياخي مالك ما بتسلم علي ولابتعزيني
في .. دفعتك وصديقك عمر عبد الله وزوجتو.الماتوا وراء بعض بفارق28 يوماً لسه جرحهم حي

من طرف **الفكى احمد** الجمعة 23 يوليو 2010, 5:40 am

الاخ صديق ود عبدالله والله قاعد افكر من يوم شفت اسمك اقولك شنو وابدا كيف لان المفاجاه كانت فوق الوصف
وقدرة الاستيعاب كان صبرت شوية كان حتلقى منى رساله هنقدر ولكنك سباق دائما يا ود اهلنا واحبابنا الكرام الطيبين
ورحم الله من ساف منهم واطال عمر من بقي ومتعنا اجمعين بالصحه والعافيه
تقدر تورينى اخر مره اتلاقينا فيها متين والله زمن يازمان
مع تحياتى للاسره الكريمه
اخوك الفكى احمد

من طرف **خال ابرار** الجمعة 23 يوليو 2010, 6:51 am

ربنا يرحمهم رحمة واسعة والله ياباشمهندس فقد كبير وانا كنت معاهم ايام المرحومة راقدة فى مستشفى عطبرة وعرفتهم اكتر بس لكل اجل كتاب وسبحانه جبار الكسور......

الفكي تسلم ياخي.. اصلك دائماً زول راقي ومهذب للحد البعيد.. وزول حكيم وراسي وهادي حتى في اللعب زمان ماك زي أولاد ودعيسى شواطين... اقبل تعزيتك والله وأنا ذاتو أعزيك فيهو لأنو صديقك وصاحبك ودرستو سوا ..إنت وهاشم عباس وحسن الدكيمي وحسن الحلبي... أقولك آخر مرة إتلاقينا فيها متين... قبل 21 سنة بالتحديد في صيف1989 في الثورة في شارع الشنقيطي مقابل زقلونا.. هسه سموها أظن الحارة15. أنا سكن في الثورة الحارة الأولى قريب من كبري النص وثالث بيت من شارع الشنقيطي..جاي ماشي أشيل لى رغيف من الدكان.. لقيتك إنت ومرتك واقفين في الشارع منتظرين تاكسي.. فرحت لى جنس فرحة، ما عرفتا أبدأ من وين... الفكي حق الله بق الله.. تسالمنا وتطايبنا.. قلت ليك إتفضلوا على البيت قلت لى لا والله مستعجلين.. والسبب الجابك بي هناك جنبنا.. قلت لى بت كرب أم الهمبوك توفيت أمس وجينا نعزي فيها.. أو أظن الهمبوك نفسو.. في زقلونا.. قلت ليك هم جيرانا ونحن البارح كنا معاهم في الدافنة... أها بعدها بشهر طوالي أنا إنتدبوني من هلتون الخرطوم مترقياً الى هلتون العين بالأمارات العربية.. وأنا لم أبحث عن الهجرة.لأنو وضعي كان في هلتون الخرطوم على ما يرام.لكن جات كدة...10 سنوات في هلتون الخرطوم 4 سنوات في هلتون العين سنة في هلتون لندن ستة شهور في هلتون باريس سنة في هلتون أبوظبي ..
إشتغلت في الهلتون خمسة سنوات بعدها لقيت وضع أحسن مع هيئة الماء والكهرباء في ابوظبي التي لازلت أعمل بها منذ1994.....................
والله يا الفكي شوق بحر...
لم أنسى ليالي أبوحمد وأنت كنت مدرس في مقرات وممتحن شهادة ثانوية للترفيع.مع إنك من المرة الأولى جبت نسبة كويسة .. لكن همك كان كبير وهدفك كان كبير... كنت تجينا كل يوم خميس تبيت معانا بداخلية المدرسة المتوسطة عشان تشم ريحة البلد.. وكنا وقتها شلة تعجبك في المدرسة.. ناس سليمان توم والشمباني وعبد الله عموره وجعفر نعمان.. وغيرهم من أولاد شري.. نونس للصباح ونغني وندق الرتوتي..... يعجبني فيك الطموح دائماً يا الفكي وتغيير واقعك الى الأحسن.. وعزة النفس، ولذلك تعرضت للزحزحة كثيراً في مواقعك العملية ولن يضيرك ذلك شيئاً ولم يضيرك بدليل أنك دائماً الى الأمام.. وأنت تحب تثور واقعك.. لم ترضى بحقل التدريس كزملائك حسن الدكيمي وحسن الحلبي والمحاكم كهاشم عباس وإنتو أولاد دفعة وامتحنت مرة ثانية حتى نلت مرادك بدراسة الهندسة..
لما إنتو طلعتو ا من مدرسة شري الأولية نحنا لسه ما دخلناها.. لكن نتعارف من قبل المدرسة بحكم الجيرة والجوار..لن أنسى ضحكة زينب بت الفكي الى الابد وطيبتها لامن الزمن كان عديل.وقد كانت إمرأة جميلة راقية مهذبة حنونة. قعدت ستة شهور مع ناس الروضة مرة عبد الله ود العجمي لامن دخلت الداخلية.. عمر أخوي ليس مثلي زمن دراستو كلو قضاهو في الخارجية برضو مع ناس الروضة هذه المرأة الصالحة... كنا نلعب أنا وإدريس وهاشم حسن الفكي وعمر حسن الفكي والرشيد كان اصغر منا.. ويوسف عثمان مصطفي وبقية أولاد ود عيسى والعبابسة لا نعرف في اي بيت أكلنا البيوت كلها أهلنا.. كان أكلنا عند بت خليفة نتغدي وكان أكلنا عند سكينة بت السيد نتغدي وكان دخلنا عند خلوفة مرة ود عيسى نتغدي وكان دخلنا عند الحمرة مرة ود كرب نتغدي وكان دخلنا عند زينب بت الفكي نتغدا.. وكان دخلنا عند حسينيي نتغدا.. مافي فرز.. زينب بت الفكي رحمها الله لم تمهلها الدنيا توفيت أظن وهي لم تبلغ الخمسين سنه..لن أنسى حوشكم الفاتح على العقبة ذو الباب الجميل، ولن أنسى والدكم أحمد ود الفكي الرجل الهادي صاحب البسمة الخالدة.. ودايماً يعافر في واطاتو يسوق ويحفر قدام بيتكم وجنب الشتلات الفوق بابور حسن الفكي.. كان والدكم هادي الطبع بشوش. قليل الاختلاط بالناس ودائماً زول عمل... جبدوا حاج محمد بالبركة والتدين وهداوة الطبع... لمان توفيت والدة ناس أبوك حاج محمد مشى تزوج حسينيي بت على ود عبد الله من الدمورة.. وجاب فيها ناس الفكي وناس سكينة وناس بلالة وناس شريفي وأخوانهم..قلتا ليك يا الفكي.. نحن من خلقنا شفنا سلامة عليها رحمة الله ما عارفين أمها منو.. هل هي أخت ناس ابوك من أمو؟ والله حاج محمد كان متزوج مرة تانية جاب فيها ناس سلامة دي..كمان بي هناك ناس زهرة بت دفيرة..ورقية بت حاج محمد أم ناس سعيد على العقيد أظن ديل أمهن براها.. حاج محمد ده أظن كان متزوج حريم كتار.. سلامة وكت ماتت والله تأثرت عليها جنس اثر يا الفكي.. لأنو زمان كنا نقعد نذاكر في دانقة حسينيي وكان سلامة تحجينا لكن مرات كانت تدقنا لمان نقول ليها قولي لينا حجوة تاني؟ وكانن يحوجنا معاها ناس فرحين بت المقدوم كانت ساكني بي هناك قبل ما يرحلوا.. وناس أم الحسين بت الروضة وأم الحسن وحليمة أخت ناس كركاب كانوا يحجونا بأحاجي كتيرة... لو تتذكر يا الفكي جنب أهل ناس فرحين طوالي ومحمد صالح البحاري.. كانت هنالك عجوز كبيرة عندها دانقة باب حوشا براهو فاتحي على الجدول إسمها ( بت الرييم) أظن هي قريبة ناس البحاري.. عندها ولد كدة مرة في السنة يجي يزورها من جهة المهوة عندو فاطر دهب كدة وشكلوا زول قيافة ... لكن مراسي من الطراز الأول.. هذه العجوز على دفعة ناس بت بربر وبلالة بت عينة.. أظنك تذكرهم هؤلاء العجائز جداً بلغو المائة سنة أظن؟؟؟ مشيت المكابراب عشان أسلم على بعض بنوت عمر أخوي معرسات هنالك... لقيت سكينة بت السيد هناك قاعدي مع بتها فاطني... قلتا أسلم عليهم بعد ما تسالمنا وتطايبنا أنا وفاطمة قلت ليها أمك وين؟ قالت لى كبرت يا صديق وجبتها معاي هنا.. قلت ليها عاوز أسلم عليها.. قالت لى هسه نايمي وما بتعرفك أمي ( طلقت) يا صديق.. مرة تغبي ومرة تتذكر.. أنا ذاتي بتها فاطني مرات ما بتتذكرني. قلت ليها ما بمشى لامن أسلم على سكينة بت السيد.. بس قلة خير صحت..فاطني قالت لى أمي ما حا تعرفك.. قلتا ليها يا فاطنى حا تعرفني وأؤكد ليك حا تعرفني حتى ولو طالقي.. لأنها كانت بتريدني زي ولادا.. وعندها صداقة عجيبة مع ناس حاج عبد الله وبت حبيب... بالله عليك أمان الله أول ما شالت إبريقا ومصمصت.. وعاينت لى عديل كدة.. إتفقعت بكاء.. وووب على ووب على صديق ود طيبة من وين جيت صديق ود عبد الله.. يا صديق الحنانين كملوا يا صديق.. عبد الله ضو خور حنون وضو البلد مات.. وبت حبيب ماتت وعمر مات والزيني ماتت.. وينك يا صديق يومها قلت أعزيك... قالوا صديق مغترب.. يا صديق الغربة دي حدها وين يعني لامن نموت ما بتجوا... قلت ليها أنا من قبيل منتظرك عشان اسلم عليكي.. شربت معهم الشاي فاطني سوت شاي.. وياالله هي عقلها رجع ليها وقعدت تحكي... وحكت لى قصة الجبنة تبقبقي
يا الجبنة تبقبقي
في برندة حسن الفكي
حتى لبن الطير عندو في
شامة ود البي دا طلقي
..................
حتى فاطمة لم تسلم منها حكت لى بلال عثمان ود العمدة لما تزوج فاطني قبل عمر حسن عبادي وبعدين مات وقالت
....................
قولن لو بخيت عليك
ده الموظف صول.... قولن لو بخيت عليك
ضبايحو عشرة وتور... قولت لو بخيت عليك

أرباب وخاتي القول... قولن لو بخيت عليك
....................
تضحك فاطمة وقالت.. اها يا صديق الطلقان دوبنو بدا
...............
ودعتهم وانصرفت
................ يا هيثم الدسوقي هييي يا ولد يا مطرطش الفكي موش خالك بس الفكي خالك وعمك إنت أثبتا إنو خالك لكن أنا أثبت لك إنو عمك وعمك قريب كمان موش شيتاً بعيد..عمك ولد ود أعم ابوك طوالي.. حاج محمد ونحن حضرناهو صغار حاج محمد راجل حبوبتك حسينيي هو أخو حسن الفكي لزم.. والدسوقي وإحمد ود الفكي ولاد أعم.. أها شوف الحكاية ... ما أظن إنك ناسيها يا هيثم.. لكن بس إنت تسرعت وقلتا خالي.. أنا هنا أضيف ليها إنو عمك كما تعلم
.................................
محمد خال أبرار ولد صاحبي ودفعتي عيسى.. شكراً .. ليك... وعلى زيارتهم في المستشفى عمر ومرتو.. ما بتقصر في مناصيرك... الدوام لله

الأخ العزيز صديق عبدالله علي أبوحنة أحسن الله عزاؤنا وعزاؤكم في أخونا العزيز عمر وزوجته ونسأل الله أن يجعل قبرهما روضة من رياض الجنة ولم أسمع بخبر وفاتهم إلا عن طريقك وانت تلوم أخونا الفكي أحمد والله تأثرت كثيرا لوفاتهم وهذا حال الدنيا ونسأل الله أن يجعل البركة في أولادهم
اخوك فتح الرحمن محمد الحسن ود عون الله - قرية الكراع

من طرف **الرشيد طه** الجمعة 23 يوليو 2010, 11:14 pm

على قول الباشمهندس صديق انت يا فتح الرحمن ود الاستاذ القدير محمد الحسن عون الله ما بتعزينى فى والدى المغفور له باذن الله طه الافندى رغم حضورك للسودان ولا يبعد منزلنا عنك بضع امتار .
للمعلومية الاخ فتح الرحمن تربطنى به صلة رحم ونسب وجيرة فى البندر والبلد وقد زعلت اشد الزعل من عدم حضوره للتعزية وكنت حتى هذه اللحظة فى قمة الزعل من موقفه هذا ولكن بعد العتاب الذى كتبه الباشمهندس صديق للمهندس الفكى قلت اخير نمشى فى دربو والدنيا ما بتستاهل .
الاخ فتح الرحمن العفو والعافية ونسأل الله ان يغفر لجميع موتانا ويسكنهم فسيح جناته ويمتعنا بالصحة والعافية.

ها ها ها..........
لقاها فرصة الرشيد... غليتو دي فرصة يا الرشيد نقول ليك البركة فينا وفيكم في والدنا طه ود اللفندي.. وأنا بعزيك نيابة عن فتح الرحمن يا الرشيد لامن يجيك
.......................
يافتح الرحمن مقبولة تعزيتك والله.. وعمر صديق شخصي لوالدكم.. زمن عرس عمر أخوي زمان هو كان من أول الحضور في الحنانين جاء من بالليل.. بعد داك استمرت العلاقة بينهما في عطبرة في عهد عزها كان لأولاد المناصير سطوة في عطبرة.. أحمد عوض الكريم.. عمر عبد الله.. سليمان حرجولي.. جبريل عثمان خميس كان هنالك فترة.. أحمد حاج قيلي محمد حاج قيلي.. القاضي الأمين الحاج.. تاج السر الشمباني.. الضابط ود عليمات.. المقدم على الماحي عريبي.. واحد مقدم كان من جيهة كبنة ضابط صف وغيرو وغيرو.. المعلمين في البلد كانوا في الإجازة الصيفية وكت الزمن عديل يقضوا إجازة الصيف معاهم في عطبرة في بيوت العزابة بتاعة المناصير في الحصاية في الداخلة في أم بكول فاتني أن أذكر القامة النذير القميري.. أها المعلمين العايز سينما.. العايز يشرب صافي ما يشرب عكر ساكن قرب البحر.. العايز كل حاجة في اي حاجة على عينك يا تاجر.. أها المعلمين يجوا بنفسيات جديدة لى طلبتهم وكدة
..........................
يا فتح الرحمن ياخي في داعي تقول الكراع وتؤكد على إسمك مع أني كما يبدو لم اقابلك لكن أعرف أن لمحمد الحسن ولد في السعودية إسمو فتح الرحمن.. اعرف ذلك واسرة عون الله علم على رأسه نار لايحتاج الي دليل أول يوم أدخل المنبر إنت والرشيد عرفتكم من أساميكم وكدة.. عبد الله الحسن عون الله عمك الدفعة القدامنا في أبوحمد وكنا في داخلية واحدة وهو رجل حاد الذكاء كوالده.. عبد الله قبل شهور ضرب لى تلفون وكان في منطقة قريبة من الأمارات في سلطنة عمان ودعوته لزيارتي ولكن لم يجد الفرصة أظنه رجع
سلا م سلام

يا فتح الرحمن المرحوم عمر كما تعرف كان في السعودية من سنة1979 الي سنة1988 واشتغل في جيزان شركة الارتفاع واشتغل في أبها واشتغل في الخفجي واشتغل في الرياض.. وجاب معاهو شاحنة مارسيدس كبيرة كان شغال بيها وبعدين عمل لوري وبص واشياء أخرى.. الحمد لله ترك لأولادو حاجات كويسة وبيت في الراشدين أم درمان.. ودكان وحافلتين.. ربنا يتقبلو

من طرف **خالد عابدين** السبت 24 يوليو 2010, 4:40 am

ربنا يتقبلهم ويحسن اليهم ويجعل الجنة مثواهم ويجعل البركة في ذريتهم والفقد واحد

كنت احاول التذكر عندما قرأت هذا البوست للباشمهندس صديق وذكر فيه اخيه المرحوم عمر رحمة الله عليه .
تذكرت واعتقد زمن مابعيد سنة 95 كنا في بربر النموذجية والبحر كان دميري وشرد مسافة . جاء تانكر كبير محمل بالوقود للعبور للغرب (ابوحراز) ببنطون بربر
التانكر كان ضخم والبنطون صغير ، اول ما التانكر رجع خلف ودخل في البنطون ،باللساتك الخلفية الثمانية . و الامامية مازالت في الحدارة . البنطون رجع هو ايضا وانسحب ، لاادري لاحساس سائق البنطون بعدم قدرة البنطون على حمولة التانكر ام لسبب اخر ، المهم البنطون رجع وتزحلق التانكر الضخم بسائقه وصاحبه الي داخل البحر . ونجا الرجلين اثناء غرق التانكر الذي اصبح داخل الماء .
سمعنا نحن بالقصة في الداخلية وجينا تحت عند البحر عشان نتفرج ونشوف الشيء دا يمرقو كيفن من البحر .
كان هنالك عربتين ونش عادية على ما اذكر واقفات على جهه ولم يستطيعوا اخراجه بهن . فجلبوا ونشا ضخما من عطبره - يتبع للسكة حديد حسب ماسمعنا واستطاعت هذه الآلة سحب مقدمة التانكر الامامية الي الحجرة وظهر كذلك منتصف الفنطاس والغطاء الفوق .
جلبوا اربعة فناطيس لواري وموتور لسحب الوقود من التانكر الي هذه الفناطيس ولا اعرف ان كان اختلط الوقود بالماء ام لا . شرع الموتور في الازيز و السحب والتفريغ مباشرة حتى يصبح هذا الغريق خفيفا ويتم سحبه كليا الي اليابسة .هذه العملية وهذا العمل كان في المشرع الرئيسي للبنطون وأخذ وقتا طويلا وتراكمت العربات الخاصة واللواري المسافرة التي تريد العبور للغرب وكان مافي طريقة للعبور لان المشرع معطل بماذكرناه سابقا
تجمهر الناس وكانت الدنيا سخانة والبحر زي ماقلت شارد ، وبربر تعجبك جروفا الكبيرة الواسعة والتي يسموها بالجزيرة .وبعد البحر من السوق حيث الاكل والشاي بالنسبة للمنتظرين من العابرين للغرب
تحلق السواقين امام ست الشاي الوحيدة والتي اذكر جيدا بانها كانت تبيع بليلة عدسية مع الشاي .
المساعدية تجمهروا هم ايضا وبمعاونة بعض الاهالي كانوا يحفروا في الطين لفتح مشرع اخر يدخلهم للبنطون على بعد امتار من المشرع القديم
انتهى العمل وقاموا بجلب بعض التراب اليابس وضرضروه فوق الطريق الجديد ولكنه كان لايعجب لانه ما أن تطأ عليه الاتحس بأنه يتهربك تحتك
جاء احد اللواري داخلا الي المشرع نزل سائقه ووجد الحادث ورأى المشرع الجديد ، كان يلبس جلابية وعمه محدرة شوية ومركوب اتجه الي المكان الجديد وعاينه ودق برجله عدة مرات على المسار الجديد وتفقده جيدا ، ولاد المناصير الكانوا معانا قالوا دا عمر عبدالله .
رجع مرة اخرى الي لوريه ، ركب و ادار محرك اللوري وجاء راجع خلف مع التفاته للخلف عبر شباك اللوري
عندما وصل منطقة الطين والطريق الجديد للبنطون ، عاد يعجبوك المساعديه بالصاجات ، اللوري يئن والطين ينطاير والسواق بكل ثبات ضاغط ابنص وراجع خلف والدخاخين طالعي والمساعدية شغالين جدع في الصاجات والناس تتفرج وواحدين خاتين ايديهن في راسن من الشفقة وخوف ان يغوص هذا اللوري في الطين فيصعب اخراجه خاصة انه كان مشحون بالبضائع ، وواحدين قالوا الزول دا مانصيح كان يصبر شوية مانحن من قبيل قاعدين ، والمشرع لين
واصل اللوري رجوعه والمساعديه عملهم حتى الدخول بسلام للبنطون وسط زهول الجميع وتعجبهم
ما اقول لك نحن ولاد المناصير في تلك اللحظات حسينا بالفخر والزهو والجموع صفقت وصفقنا معاهم والبعض يسأل الزول دا من وين بالله ؟ دا من المناصير - والله راجل لكن
ناس اللوري ده من وين ؟ الناس ديل مناصير يازول _ آي والله ظاهر عليهو
كانت تلك التعليقات الدائرة ونحن في تلك اللحظات كان كل واحد منا يحس بأنه صاحب اللوري وهو السايقو -
اما باقي السواقين القاعدين ياكلوا في البليلي ويشربوا في الشاي ومنتظرين زول يفتح المشرع او يجف ، فبعد ان رأوا ماحدث ، هرع كل واحد منهم الي عربته وادار محركها واستعد للدخول .
ذلكم كان هو المرحوم عمر عبدالله اول مشاهدة لي له وآخرها ولم اسمع بخبر وفاته الا عندما كتب ذلك الباشمهندس صديق في احد البوستات السابقة
نسأل الله له الرحمة والمغفرة وجنة عرضها السموات والارض
بقي ان اقول أن الشاحنة المرسيدس التي ذكرتها ياباشمهندس ، شاهدناها نحن ولاد كبنة وكنا ماشين امتحانات الشهادة الابتدائية راكبين الحمير وماشين شري للامتحانات
رايتها لاول مرة وكانت ضخمة تميل للون الاخضر ، سالنا منها في داخلية شري ، قالولنا العربية دي حقت ناس الحنوني ولدن مغترب ومن ديك وعيك
لما سمعت باسم الباشمهندس صديق وقريت بعض كتاباته وعرفت انو صديق عبدالله الحنوني ، تذكرت تلك الشاحنة الضخمة وربطت مابينها وهو.
اذن هذا هو الزول المغترب ،سيد العربيي الجهامي العند ناس الحنوني
الآن فقط عرفت .
شكرا هندسة صديق والفكي
شكرا الاستاذين فتح الرحمن والرشيد والدكتور خال ابرار
بالمناسبة ياهندسة دفعتك أغلبهم بقوا أجداد بس محافظين زي ماقلت انت (أو لم تلاحظ ان ابن دفعتك عيسى حمدانه هوخال ابرار ودفعتك جدها )

من طرف **خال ابرار** السبت 24 يوليو 2010, 5:00 am

مداخلة بسيطة يا خالد بى مناسبة عمر عبدالله كنا فى الكلية بنلعب تنس الطاولة وفى واحد شايقى كلو مرة يتحدى زول يقول ليهو تعال والله الليلة اجيهك جيهة مناصير يعنى ح اغلبك غلب شديد انا استغربت في كلامو وفى مرة من المرات قال كدا قلت لى تعال يازول دى شنو جيهة مناصير قالى ما المناصير ديل اى شئ يعملو يجيهو جيه شديدة..
اها ليهو الحق عمر عبدالله جيهلهن العربية..تحياتى

ربنا يرحمو يا خالد ويا محمد.. وكل المرور بي جاي.. القصة الحكيتا ماها غريبة على عمر.. يا خالد.. واللواري دي نحن المناصير أتعبتنا. تقول فيها سحر.. كم لوري عمل حادث جسيم وكم ناس ماتوا.. قبل كدة فقد نا واحد من أروع ابناء المناصير وتجارهم.. وهو علي محمد الخليفة ود أب شوال وطاهو اللوري وهو خال سلمان ونور الهادي ده من أروع أبناء المناصير.. وأجدع واحد في أخوانو ونوارتهم وضلهم ..وبعدو لوري ناس ود مصطفى من كبنة وغيرو وغيرو... أما بالنسبة للمرحوم عمر القصة الحكيتا ماها غريبة عليهو عمر.. عمر من أميز صفاتو.. الشجاعة وعدم التردد والصدق والقداميي والانفاق على المساكين وتحليل رزقو من التجارة هذه التي أصبحت كلها ملوثة.. عمر عندو آلاف القصص من الشجاعة والكرم وهو عضو مؤثر جدا في أسرتنا عشان كد فرق معانا فرقة كبيرة خلاص.. وزول حبوب ولاينسى العشرة ويعز الصداقة ويقدر المعروف..كم مرة أتحدثت معاهو رحمه الله في شجاعتو الزايدة دي الما بتنفع الزمن ده؟ وغيرو وغيرو.. مرة قلتا ليهو ياعمر بعض الناس القلة يتحدثوا قالوا عمر نفسو حار معانا شوية في اللوري خفف على مناصيرك شوية؟؟ ضحك رحمو الله وقال لى عمرو نفسي ما كان حار مع زول مسكين والله ما عندو حق الأجرة.. كتير الناس ظلمونا في حق أجرتنا ونعفيهم؟؟ قال لى الإشتكوني ليك ديل أنا عارفهم! معظمهم تجار من مناصيرنا وعايزين يتهربوا من الأجرة.. هو وكت ماعندو حق الأجرة شاحن لوري ليه؟ ديل مستهبلين، أنا آخذ منهم وأرد على الضعفاء ده حق الضعفاء.. \ مئات المرات عفينا ناس ضعفاء ومئات المرات شلنا حريم متعسرات في الولادة أو عيانات ماشات يتعالجوا في الخرطوم وما عندهم وجيع.. دفعنا لهن حق المستشفي وحريم وناس بعد أنزلهم في أم درمان ما عندهم محل يبيتوا فيهو أجيبهم معاي في بيتي في الراشدين.. وحريم الواحدة ولدا يكون شغال في القضارف ارسل معاها ولدي يدخلا المستشفى ويعالجا وأدفع ليها لامن ولدا يجي بعد اسبوع بعدين كان دفع دفع والله مادفع ما دفع، كتير طلبة وطالبات شلناهم مجان.. كتير طلبة وطالبات دفعنا لهم حق المدرسة أو الجامعة لأنو نعرفهم شاطرين وصادقين وما عندهم زول يدفع ليهم؟ حسني وأجر نعملا... بالجد يا خالد عابدين عمر كان كذلك أنا يمكن على الأقل سافرت معه بالشاحنة ولوريهو أكثر من خمسين مرة.. زول حبوب بمعني الكلمة وناس كتيرين في البلد وخارج البلد يذكروا لى ذلك.. ربنا يرحمو..قصص كثيرة في السفر تروى عن شجاعته ودايما ربنا ينصروا فيها.. لولا ضيق الوقت لحكوت لك الكثير المدهش. عمر بعد جاء من السعودية إشتغل بالتجارة واللواري حوالي21 سنة وتوفي عن58 سنة وهو عمر صغير بمقاييس اليوم زوجته توفيت عن56 سنة ..الزينة بنت عمنا وهي من منصوريات كسلا رحمها الله.. عمر حياتو كلها كفاح إشتغل في ورشة عطبرة السكة حديد وفي كوستي وأبوحمد وكوستي وأم روابة والخرطوم تدرج فيها الى أن وصل وظيفة ( قمندة) زي ناس محمد رحمه رحمو الله.. بعدها مشى السعودية سنة1979 بعقد عمل من زميلو في السكة حديد النزير القميري من شري.. رحمه الله جرحو ما بيندمل وماهو كتير على الله.. توفي بالسرطان اللعين ويقال بي حوامتهم الكتيرة دي في اللوري وشق صحراء العتامير في إتجاه صحراء ابوحمد .. وكان يمشي حلفا القديمة وشلاتين وتوشكي وحلايب وأ بو رماد وكت التجارة كسدت وشيل الركاب قل وبقى ما فيهو فايدة توجه نحو حلايب.. يقال نفايات ذرية مدفونه في جهة ما في هذه المناطق يصدر منه إشعاع كيمائي والله أعلم..

الأخ صديق والله اوصاف أخونا عمر لا يمكن الأنسان يعددها والله هو أخو أخوان وصاحب نكته وهظار وانا لي معة عدة جلسات وسافرت معة والله فقده أثر علينا كثيرا وكانني أراه امامي جالس وأسأل الله أن يجعل الجنة مثواه هو وزوجته

من طرف **النفر** السبت 24 يوليو 2010, 6:49 pm

اللهم أغفر وأرحم أخونا عمرعبدالله وزوجته وأجعل قبورهم روضة من رياض الجنة وأحشرهم مع الصديقيين والشهداء وحسن أولئك رفيقا. ولقد حضرت عزائه بالبلد00 المرحوم رجل عزيز وأخو أخوان وقد عرفته عن قرب بالسعودية وكان ينزل معى بالمنزل بجدة فى أثناء مروره الى السودان .نسأل الله لهما المغفرة والرحمة ولجميع موتانا وأعزائنا اللذين فقدناهم فى رمشة عين .وهذا حال الدنيا وكل من عليها فان ولا يبقى الا وجه ربك ذو الجلال والاكرام ..والحمد لله بنعمة النسيان 00

تسلم يا النقر على التعزية والبركة فيكم في ود علي سلمان داك المات زمان.. النزير أظنو.. وجعني شديد... هل تصدق يا النفر عندي ليهو شريط فيديو يظهر فيه هو فترة طويلة.. كان كلنا سافرنا بلوري عمر للعيد الكبير للبلد.. وفي ساني كنا بنفطر صورناهم في قهوة محمد ودعلي في ساني

أظن يا الفكي حكاية الجرجير بالشاي دي إنت متذكرها لمان كنتا عامل ترفيع وامتحان شاهادة وأنت مدرس في الرباطاب.. وكنتا تزورنا في مدرسة ابوحمد الوسطي.. انا ما حكيتا ليك.. اكيد حكاها ليك الشمباني. أو يكون حكاها ليك الشمباني في شري
وخلاصتها وهي في اول أسبوع باشرنا الدراسة في المدرسة في سنة اولى وسطي.أبوحمد. ونحنا قبلونا حوالي29 طالب منصوري وكل مدارس الرباطاب 11 طالب فقط.الفصل فيهو اربعين اولى وسطي
أها أولاد الرباطاب في الأول كانوا عايزين يستفزونا.. وكانوا يقولوا لنا أنتم ما بتشبهونا أنتم شايقية الشايقية طردوكم. جيتو هنا.. وكانوا يقولون لنا عروب
المهم إتفقنا كل واحد يعمل حاجة
واحد شال عكاز
واحد لبس سكين على ضراعو واحد جاء بي سديري واحدين قطعوا نيم للدق وقلنا موت موت خصارة خسارة حتى لو رفتونا كلنا.. نحن أزكي منهم ودخلنا مدرستهم 29 طالب كلهم أوائل وخلينا ليهم باقي الحداشر فقط
أها الجماعة قالوا لى وقالوا للشمباني عشان نلقى سبب عليهم يقوموا يضحكوا.. صديق عبد الله والشمباني في الغداء بعد الناس يتغدوا يجيبوا شاي ويختوا جنبوا جرجير ويأكلوا الجرجير بالشاي يعني جقمة شاي معاها جرجيراي ونعاين لهم.. اول ما يضحكوا المجموعة تقوم.. موش نحن اولاد اولى برانا. لا الدفع القدامنا من أبناء المناصير كانت مساندانا..
بس نفذنا الخطة.. أول ما ضحكوا.. الكرابيج والسيطان وقعت فيهم وجلد موت أحمر.. أنا والشمباني ذاتو ختينا جرجيرنا وشاينا ده؟ واشتركنا مع الجماعة في الدق.. فجأة واحد طباخ قوي جداً جداً وسريع نهمة وهو ساكن كجي في مقرات. لكن ابوهو من ناس عصمة وأمو من الرباطاب... إسمو سليم على الضو.. جاء طائر من المطبخ ونطا .كان هنالك فاصل بين الكافتيريا والمطبخ.. بس قال لينا يخسي عليكم. عايزين تشمتوا الناس فيكم.. إنتو ناجحين عليهم وقال هذا الكلام للجماعة الهايجين شديد.. وقفل بابات الصفرة.. وكان كلنا عندنا احترام لسليم على الضو.. سليم خاف على اولاد المناصير إنو الموضوع يصل الإدارة... قال الخائن الله يخونو البي يكلم ضابط الداخلية أنا بعرف آذيهو كيف؟ اولاد الرباطاب خافوا مافي واحد قدر كلم الإدارة اصلوا عددهم كان بسيط.. غايتو جنس حقارة المدرسة مدرستهم كان جينا للجد وفي معقلهم وفي كبرى مدن الرباطاب وفتحوا لنا خانة فيها.. غايتو المناصير جنس قوة عين؟
هذه قصة الجرجير بالشاي يا الفكي انا ما عارف إنتا سمعتها وين؟

يرجع الفكي لى منتداهو بالعافي والسلامي هو وأسرتو معززين مكرمين من المعمعة الحاصلي هناك دي

ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله

رد: ياود زينب بت الفكي مالك ما بتسلم علي ولابتعزيني في دفعتك وصديقك عمر عبد الله