مركز شرطة المناصير

يعجبوك المناصير في اي زمان واي مكان..
<script src='http://img526.imageshack.us/shareable/?i=markazshurtattalmanasee.jpg&p=tl' type='text/javascript'></script><noscript>[ندعوك للتسجيل في المنتدى أو التعريف بنفسك لمعاينة هذه الصورة]</noscript>

هذا يعنى ان لنا جذور فى كل الدول العربية
ان لم اكن مبالغا فى ذلك
وهذا يرفع من قدرنا ويوضح اصالتك يا باشمهندس
تقبل المرور

بسم الله الرحمن الرحيم ليكم جذور ساكت.. ( جضول يعني)
عليك الله شفتا ضربة الجضل في الكراع حارة كيف يا عباس!
بالذات لما يتكسر ليك حرف جضل في كراعك!
في ( الباراويد) مقدور عليه الجضل
لكن كعبي الجضول بتاعة البار يحشو الناس الصيف وبعدين البحر يطلع فوقا وبعدين نجي نحن نعوم
اها ضربة جضل زي ده حاريي جنس حريي. توريك نجوم النهار.لكن سبحان الله كنا ناكلا ونمشي. نجي طالعين من العوم برة في الرملة جنب حجيرة البحر ننقش باقي الجضل الإتكسر في كراعنا بي شوكة مشرق. لامنقاش ولا حاجة.. مناقش طبيعية. ( ننقش مما نزرع)
هو السريحي بتاعة الجضل نقشا صعب خلاص. ما زي كسرة الشوكي تسلها وخلاص. لا لالا الجضل المكسور في كراعك يتحترب. تلقى نفسك تنقش كل مرة تجري وراء اثر الجضل عشان تنضفوا من كراعك والدم يكب.. بعدين تكمد ليك فوقا سفة بتاعة صعوط من ولداَ يسف جنبك.
بالله هسي الزمن ده عوين الزمن ده
لو طعنتوا حاجي صغيييرة
يقول ليك يمكن تجيب لى تيتنوس..!
بابا يوديني آخذ حقنة التيتنوس يمكن يكون شئ مصدي
ياخي زمان تتذكر يا عباس. قدح الحمارة داك البي يعلقوا ليها فيهو في المـُدْوَر. مفلح كدة ومجنون نكب للحمير العيش فيهو ومرات الحمارة تكابس على علوقا يقوم القدح يجرحنا. وتلقاهو مصدي ومجنون ومرات الصبرة تلقاها بايلي فوقو. والله لابيسوي لينا تتنس ولا حاجي
أو القداحي بتاعة الطلس المكسرة المجدعة يجي العصار داك البي يقوم قبل المطر بالله كررو. كركرو.. الهواء يدردق فيهن ونحن نلقط في التمر يوكرن في كرعينا ولا تتنس ولا حاجي

شكرا باشمهندس صديق
كلما اعطيناك حرفا
اعطيتنا ارثا وتاريخ وابداعا
يربط حاضرنا بماضينا حتى لايتلاشى ذلك الماضى التليد
وينمحى اثره من الذاكرة ويذوب فى عالم النسيان
تقبل المرور مرة اخرى

يعني الصلعة الزي بتاعة سلمان عقيد والله شنو! لما ألبس البنطلون!
والله الجلاليب ذاتو ما لقيت فرصة ألبسهم في السودان إلا مرة واحدة
وكنت متمني في عرس نادر ألبس جلابية بس ما لقيت فرصة
برضو قلتا أحسن تشوفونا على الطبيعة أحسن من الغتغيت يا كليس!

يربط حاضرنا بماضينا حتى لايتلاشى ذلك الماضى التليد
وينمحى اثره من الذاكرة ويذوب فى عالم النسيان
تقبل المرور مرة اخرى.

هو كدة كدة الإرث ده راح يتنسي يا عباس
ليه يا عباس
لأنو راح تنشأ أجيال جديدة في قرى التهجير ما عندها أي ثقافة عن البحر.. ولا المراكب.. ولا العوم.. ولا التمر وثقافته ولا الخلاء وثقافته
شوف زمان ثقافتنا عن النخلة قدر شنو!
ثقافتنا عن البحر قدر شنو!
ثقافتنا عن العتمور
علموا أولادكم السباحة........
دي راح يكون حظنا فيها صفر..
مع إنو نشأت عندنا بحيرة كبيرة تتطلب الزول يكون فنان زيادة في العوم لا قدر الله لو غرقت مركب والله حاجة وأنت فيها.. زمان أهو لو تعبتا في البحر وأنت عايم الحجرة قريبة أو تلقى ليك جزيري في نص البحر تنجما فيها بعدين تواصل. لكن دي الوقت أصبحت لجة مياه على مد البصر.. مما يتطلب الأمر اتقان العوم أكثر.. مفروض رتق النسيج يساعد إنو ناس التهجير كل مرة يأخذوا ابناءهم ويمشوا المحلي ولو شهر في السنة يعلموا أولادهم العوم ويحصل اندماج
بكل اسف راح تظهر أجيال من المناصير جديدة بمواصفات جديدة غريبة شوية. محتاجة الحكاية لمصلحين اجتماعيين عندهم بعد نظر يتداركوا المسألة ويكونوا مصلحين ممدودين بجاه ومال وسلطة تنفيذية وقانون.. يقدروا يستعدلوا هذا الثالوث(المحلي+ الفداء+ المناصير الجديدة) عايزة الحكاية لرتق النسيج زول عندو سطوة مالية.. وسطوة روحية وسطوة قانون وسطوه جاه ومكانة مقبولة من المجتمع..
كدة ممكن يحصل إصلاح كبيييير الاثر في البنية المنصورية
أي محاولات اقل من كدة لاتجلب سوي مزيد من التشرذم والدمار والتفرقة...
نحن نشكر الناس المصلحين على حسن نواياهم ولكن كما يقولون حسن النية وحده لايكفى)
المسألة محتاجة لعمق استراتيجي كبيييير
المنعطف الزماني الآن لايسمح به رغم المحاولات في الفرحة بمناصير موحدة.
هو البشاير موجودة.. لكن بيننا وبينها فركة كعب..

شكرا الباشمهنس صديق على الاضافة
وفى ذلك لانملك الا ان نقول الله يجازى الكان السبب
ونعمق ذكرياتنا على اثير الصامدين بالمحلى