تعرض عضو كبير بالمنتدي لعملية احتيال

من طرف **الرشيد طه** الإثنين 07 مايو 2012, 2:42 am

تعرض نهار اليوم عضو كبير بالمنتدي لعملية احتيال كبري امام برج كبير بشارع عبيد ختم القصة اخونا وجد مجموعة تحمل موبايل فخم جدا وتبدو عليهم اثار النعمة اوهموه بانهم في حوجة لبعض المال ويريدون بيع الموبايل الآن وجد صاحبنا الموبايل مغري واراد ان يبتزهم بانه لا يحتاج له ولا يحمل المبلغ الكافي بعد خد وهات اتفقوا ان تتم مقايضة بتلفونه علي يدفع لهم الفرق ضحك صاحبنا في سره وتمت عملية المقايضة بعد دفع الفرق وذهب كل في طريقه لكن عندما وصل صاحبنا والفرح يملا جوانحه بالموبايل اللقطة وجد انه استلم ماسورة وماسورة كبيرة ذهب الي محل توكيل قيل له لا علاج لهذا الا خارج السودان

صاحبنا الآن يتحسر ويعض بنان الندم

من طرف **خالد عابدين** الإثنين 07 مايو 2012, 2:53 am

لاحول الله
كفاره والجاتك في الموبايل سامحتك والطمع ودر ماجمع
دار تركب ركبوك
كفاره وربنا يجمع بالغايب ويكفينا شر هؤلاء المحتالين

دا كلام دا—

نقول للزميل المنكوب
الجاتك فى موبايلك او مالك سامحتك—

بس اوعه يكون الفرق
كبير--

الرشيد واثق من كلامو—

واوعه يكون –الايفون—او
البلاك بيرى—وعلى الاخ المنكوب الاتصال بالمشرف الاجتماعى وان اراد سرا لعمل بعض
الاجراءات اللازمة—

وبعدين ما يلوم ان
بقينا غنينا

من طرف **(الحاج شرف)** الإثنين 07 مايو 2012, 3:24 am

كنا دوما نقول لاخواننا يجب التعامل مباشره مع وكلاء المنتج
وعمليه التسوق هى فن
ومن لايجيد فن التسوق عليه بالاستعانه باصحاب الخبره
وعلى صاحبنا هذا الاستعانه بالاخوه بالخارج مادام الموبايل يمكن علاجه هناك

ونقول له مادامت جات فى الموبايل سامحتك
ولكن مادمنا قد اجتمعنا للخير يجب ان نعين صاحبنا هذا
ومنى شخصيا 100 ج تبرعا
والله لايضيع اجر من احسن عملا

من طرف **amira ali** الإثنين 07 مايو 2012, 5:07 am

قول يا لطيف من محن الزمن
الاحتيال صار اشكال

من طرف **ساري الليل** الإثنين 07 مايو 2012, 11:41 am

كفارة وربنا يعوضك انشاء الله

من طرف **م بروي** الإثنين 07 مايو 2012, 1:45 pm

الكورس وصل

كفاره الحجاتك في حوالك سامحتك
الله يعوضك
الخسران يطلع من المسران
لحكمه يعلمها الله
رسله نصلحوا ونرجع لك
عشان تتعوض فيه

بما انه عضو كبير

ونحن نتهتم بكبرائنا

له منا نفس تلفونه القديم ان اراد او نفس الذي خدع به

اوع يكون حاتم يا الرشيد

من طرف **علي الكليس** الإثنين 07 مايو 2012, 5:31 pm

تحياتي الرشيد

يعني طلع منها خالد وسلمان والحاج ....الباقي منو ...سنتابع التعليقات ...واكيد صاحب المقلب سوف يظهر ..

من طرف **عباس محمد** الإثنين 07 مايو 2012, 7:18 pm

قدرالله وما شاء فعل
ربنا يعوضه تلفون افضل من تلفونه
بس ما يدقس تانى

من طرف **(الحاج شرف)** الإثنين 07 مايو 2012, 8:17 pm

(الحاج شرف) كتب:
ولكن مادمنا قد اجتمعنا للخير يجب ان نعين صاحبنا هذا
ومنى شخصيا 100 ج تبرعا
والله لايضيع اجر من احسن عملا

من طرف عبد الواحد جبريل

له منا نفس تلفونه القديم ان اراد او نفس الذي خدع به

من طرف أبوسفيان خلف الله

لحكمه يعلمها الله
رسله نصلحوا ونرجع لك
عشان تتعوض فيه

من طرف م

الباقى على المشرف الاجتماعى يشوف شغلو
نحن جاهزيييين

من طرف **ود المناصير** الإثنين 07 مايو 2012, 10:02 pm

علي الكليس كتب:
تحياتي الرشيد
يعني طلع منها خالد وسلمان والحاج ....الباقي منو ...سنتابع التعليقات ...واكيد صاحب المقلب سوف يظهر ..

استاذنا الكليس ... سلام

احسدك على ذكائك

فتش عن المواسير .. وزول المواسير

الجماعة الذكرتهم ديل ناس معايش ... تلفوناتهم .. مش ولا بد

شوف ناس الوجاهات وين ؟؟

شكرا للذين ردوا وشاركوا
فى التخفيف عن النكبة --شكرا للذين ابدوا مساعدتهم --ونقول

ياود عابدين ياريسنا انفلت الامن والناس منكوبا
على الكليس ولى عن بخارى اكربوا سريكم واقلبو الهوبا
سارى الليل وياعادل شررى الاسواق تب سدوا دروبا
ود المناصير يا ابقلما بارع المحتال سولوا اللوبا
-----------------------------------------------
يالمغتربين ويا ناس بى غادى المنكوب ليكم بينادى
ابوسفيان يا ودخلف الله لى عمل الخير دايما نلقاك بادى
ودالزين يا فارس الحوبا وكم مرات عزيتا بلادى
ياصديق وياعبد الواحد المحتال خلو نارو تدودى
يا مصباح وينك ياخالى صاحب السر المن اجدادى
جنيات حجازى الاسد الضارى ارمو المركب وشدو الصارى
يا ودبروى واخوى الهادى المنكوب ليكم بينادى
هبوا جميعكم يا اصحابى بالدعوات والدعم المادى

رهيب والله لو ما رسلوهو البيغادي ديل تاني ما يعلقوا نهائي

من طرف **(الحاج شرف)** الثلاثاء 08 مايو 2012, 5:11 pm

اول مره اعرف شاعر قصيده التمساح لاولاد حاج الماحى هو مشرفنا الاجتماعى

Rolling Eyes

من طرف **ود الطرشان** الثلاثاء 08 مايو 2012, 5:21 pm

كضب كاضب يا الكليس يا كيشا
الفتح باب التبرع في راسو ريشا
مارق زعل الغشة زي دخان الشيشا
ود المناصير في التقديرات جيت الطيشا

من طرف **خالد عابدين** الثلاثاء 08 مايو 2012, 5:24 pm

م بروي كتب:الكورس وصل

بالله طلع منهم

من طرف **علي الكليس** الثلاثاء 08 مايو 2012, 6:11 pm

[color=blue]ود الطرشان كتب:كضب كاضب يا الكليس يا كيشا
الفتح باب التبرع في راسو ريشا
مارق زعل الغشة زي دخان الشيشا
ود المناصير في التقديرات جيت الطيشا[/color]
والله فعلا ياودالطرشان انا فعلا كيشه ماعارف دي فاتت علي كيف ...مفروض اعرفها من قولة تيت خاصه ومصدرها هو الاخ الرشيد ...لكن كنت متخيل ان المعني زول نجيض ومقرم عشان كده استبعدته تماما وماكنت عارف انه ممكن يتخمه

سلمان لسه ما عرفنا المساهمات نرسلا لى منو!
لازم تكون لى صاحب المسروقات
دي هيني
انا شايف بي هناك ود المناصير.. عارض سيارتو للبيع وكمان عارضا لى ود حاج..
اوع يكون عايز يجيب بدلا وبي حقها خروف السمايي وحتى كمان قال بالحرف الواحد. عربية.. وهو خايف يكون ود حاج عربي فهمو تقيل قال ليهو.موش عربية مرة خلا .. لا عربية البي يسافروا بيها

ود المناصير كتب بي هناك

ود حاج وينك ؟ وين فراسة الأعراب ؟ وين ذكاؤك ؟

ارجاني ... جاييك ..

ماك دايرلك عربية ـ بمعنى عربة.

من طرف **الرشيد طه** الثلاثاء 08 مايو 2012, 6:51 pm

كفاره وربنا يجمع بالغايب ويكفينا شر هؤلاء المحتالين

الغايب تاني وين يا مدير قول الله يكفينا شر المحتالين

الرشيد واثق من كلامو—

افو يا سلمان انا بتين جبت خبر ما حقيقة

كنا دوما نقول لاخواننا يجب التعامل مباشره مع وكلاء المنتج

بالله !!! الشبشي كان بتكسي كان كست نفسها

قول يا لطيف من محن الزمن

يا لطيف يا اميرة

كفارة وربنا يعوضك انشاء الله

مشكور يا ساري الليل ربنا يعوضو

نقول لأخونا المنكوب ألف كفارة عليك ربنا يعوضك اكثر واحسن منه انشاء الله

وتراها المشكلة اتحلت بحمد الله ... ابت نفس الدكتور عبد الواحد (أبو أحمد ) أن يقلل من اثر الأزمة .. ويتبرع بجوال بديل.

لكن والله الزعيـــــــــــــــــــــــــــــــــــــــــــــم سلمان عقيد طلع نوارة المنتدى بدون منازع . الله يفتح لك من ابوابه ويرزقك مالاً وبنون ... ويكرمك بحجة وعمرة كاربة.... قول آمين. والله كتاباتك وشعرك الرصين (يذكرني نكات الرباطاب)... مع اخوك ود المناصير لها وزن خاص جداً في نفوسنا . مع تحياتنا لزملائك الآخرين( الريس والكليس والرشيد والحاج.. .....والى أخر القائمة.

طبعاً هنا سرقة الجوالات لا تخلو من ثلاثة:

اولاً تكون سائق سيارتك وتتحدث ويكون الشارع زحمة ويجوك ناس المواتر يختفوا منك الجوال.

او تاركه في السيارة .. ويجو يكسروا الزجاج (غالباً) يكون المثلث وهذا ما حصل لي سابقاً وتم سرق المسجل ...ولم يعملوا اي شيء آخر بحثوا عن البطاقات و الفلوس

او تتركه في بقالة أو مخبز.. ويصبح في خبر كان. . وأعرف واحد صاحبنا كان يتكلم بالجوال وجاء واحد وقف جنبه كانه جائي يشحد او يستفسر عن شيء وانتظره حتى يكمل مكالمته. وبعد ما خلص منها اتلفت عليه بكل اريحية. وطب في الجوال وشرد. لله في امره شئون.

بالله كل واحد يحكي لينا عن مثل هذه الطرايف والمقالب.

وتقبلوا مروري.

من طرف **الرشيد طه** الثلاثاء 08 مايو 2012, 7:13 pm

الكورس وصل

الكورس ده داير ليهو فنان يا ودبروي عندك مانع

رسله نصلحوا ونرجع لك
عشان تتعوض فيه

ابوسفيان ما بتقصر شكرا نيابة عنو

له منا نفس تلفونه القديم ان اراد او نفس الذي خدع به

اوع يكون حاتم يا الرشيد

د . عبد الواحد شكرا عرض مغري لكن الضحية لا انا لا حاتم مشكور

يعني طلع منها خالد وسلمان والحاج ....الباقي منو

الباقي ما انا يا الكليس لكن برضو ما انا تم تضليلك

الجماعة الذكرتهم ديل ناس معايش ... تلفوناتهم .. مش ولا بد

ود المناصير ابو البنية المذكورين اعلاه هم الوجاهة زاتا وناس الوجاهات وفيهم واحد ماسورة

هبوا جميعكم يا اصحابى بالدعوات والدعم المادى

يا سلمان تكفي الدعوات بس

عربية.. وهو خايف يكون ود حاج عربي فهمو تقيل قال ليهو.موش عربية مرة خلا .. لا عربية البي يسافروا بيها

والله يا هندسة دي اقتطعت فيها وود المناصير يشيل شيلتو مع ود حاج

من طرف **mohamadali** الثلاثاء 08 مايو 2012, 7:48 pm

لقدكثرة الاحتيالات وطرق التفنن فى السودان احكى لكم حادثة لاحد التكاسة قبل ايام طلب منة احدالاشخاص توصيلة الى امدرمان وبعد توصيلة طلب من ضاحب التكسى ان يعطية بطاريتة لكى يتحدث مع شخص ولكن صاحب التاكسى اعطاة الموبايل لكى يتحدث بة فماكان من الحرامى الاان يختفى بالموبائل المصيبة انة لم يكتفى بالموبائل بل قام باتصال صاحب اخونا التكاسى ويقول لة ان صاحبك ضرب شخص فى جبل اولياء واناضابط شرطة فى مركز جبل اولياء وعاوزين نساوم الموضوع وطالبين 450000 فماكان من تجمع التكاسة الا جمع المبلغ ونحويلة لة رصيد بل قام المحتال باتصال اسرتة وقال لهم ان ابوكم فى حادث يحناج لقروش الاحتيال فى السودان تطور واصاب المروة السودانية فى مقتل هذا درس مجانى

من طرف **عباس محمد** الثلاثاء 08 مايو 2012, 7:56 pm

والله انا عرفت الزول وقابلتو بالصدفة
ومااظنكم تجدون له اثر

بس الحكاية بقت ونسه بى جديولا ناشف وضعيف
وانشاءالله التبرعات تصلوا وهومعلم كبير يخدم فى اهل البلد

من طرف **ود المناصير** الثلاثاء 08 مايو 2012, 9:09 pm

صديق عبدالله علي أبوحنة كتب:سلمان لسه ما عرفنا المساهمات نرسلا لى منو!
لازم تكون لى صاحب المسروقات
دي هيني
انا شايف بي هناك ود المناصير.. عارض سيارتو للبيع وكمان عارضا لى ود حاج..
اوع يكون عايز يجيب بدلا وبي حقها خروف السمايي وحتى كمان قال بالحرف الواحد. عربية.. وهو خايف يكون ود حاج عربي فهمو تقيل قال ليهو.موش عربية مرة خلا .. لا عربية البي يسافروا بيها

تسلم يا هندسة ..

الشغلانية كانت شوتة ضفاري لواحد صاحبنا اتهمنا بالضبابية في الطرح من قبل

عشان كدا جبنا سيرة العربية

ود المناصير الله يخلي ليه خ 11 مرتاااح والحمد لله

بس ناس العربية ديل خليهم لي يا هندسة حا اجيهم ليك جيهة

** والله يا باشمهندس انا ما قاعد افتش مشاكل .. لكن الجماعة ديل خاتني في راسن ليه انا ما عارف ؟

ومعليش يا راجل يا طيب .. فأنت اكبر من كل كلامنا .. وتزينك طيبة فايتي الحد ..

الله يكرمك دنيا وأخرى

تعيش يا ود المناصير بحق وحقيقة

سألت الله الكريم الماهل للمظلوم دعاه قابل

ليهو ترجع الموبايل

تنشل يدو الشايل

يصبح طرفو الايمن مايل

يتمني الموت...يبقي الموت هو الساهل

لا يحيي لا يموت الجاهل

الرجال في هجليج تقاتل

هو رجالتو في الموبايل

مني انا ليهو عشرة رسايل

الاولي يرجع الموبايل

الثانية يرجع الموبايل

الثالثة يرجع الموبايل .

,,,,

,,,,

العاشرة اما يرجع الموبايل او يرجع الموبايل

حتي لو رجع الموبايل

الاستاذ مو زول ساهل

برضو سيوصلوا الموبايل

الحاج شرف ممكن يحوط لينا المحتالين ديل، يخليهم يرجعوا الموبايل.. أو يسختهم..
إنتو قلتو يا ريس عضو كبير بالمنتدى
كبير سن والله كبير مكانة إجتماعية!

من طرف **ود حاج** الأربعاء 09 مايو 2012, 8:03 pm

اتصل بشخصى الضعيف الريس خالد عابدين فى وقت متأخر من الليل وأمرنى أن أتولى رئاسة لجنة الطوارى التى ستتولى أمر البحث عن الجناة وتعهد سعادته بدفع كل تكاليف الحملة كما حدد مواعيد مع العضوء المنكوب لكى يمدنا بوصف الجناة وشكل العربية ولونا وأنا بدورى أفضل أن نعرف ماركة اللستاك فلو كانت برجستون فستسهل لنا مهمة البحث .

الآن وبعد أوامر الريس خالد حملت سلاحى وفى الطريق الى منزل المجنى عليه وفى المساء ترقبوا مؤتمر صحفى سيتحدث فيه الناطق الرسمى بأسم الموقع الحاج شرف الدين وشخصى الضعيف .كع كرع .

من طرف **(الحاج شرف)** الأربعاء 09 مايو 2012, 11:44 pm

انا شخصيا ماعندى مانع مادام اللجنه المكونه عندها تكاليف ومنصرفات وكده
وبصفتى احد اعضاء هذه اللجنه والتى يرئاسها اخونا نقد اقصد ودحاج
اولا وفى هذا المساء سوف اكون متواجدا بشارع المطار مع تقاطع شارع 15
ممكن نتقابل هناك ونتعشى على حساب التكاليف
وبعد داك ممكن نبدا عمليه البحث
بشرط يكون مقر اللجنه مكتب دائم بشارع البلديه
او اى شارع طولى بالخرطوم وسط
نحن غير مسموح لنا بالتواجد باطراف العاصمه
نرجوا عدم التعليق لاسباب امنيه
الجنه لم تكلف اى جهه بجمع تبرعات لتحرير هجليج اااه اقصد تعويض المجنى عليه
نحن الان بصدد فتح حساب باحد المصارف الداخليه
وسوف انتدب نفسى على حساب التكاليف بفتح حساب بالامارات
والسعوديه وقطر وهولندا وليبيا
وامريكا
واخيرا
غير مسموح لاعضاء المنتدى الاتصال باعضاء اللجنه
وشكرا

من طرف **الرشيد طه** الخميس 10 مايو 2012, 2:53 am

بما انني صاحب البوست والرواية اعلن الآتي :-

اولا اشكر جميع الاخوة والاخوات الذين مروا علي البوست وابدوا تعاطفا وسندا كبيرا مع ضحية الاحتيال

ثانيا احي روح التضامن التي ظهرت من جميع الاعضاء

ثالثا اشجب وادين المحاولات التي يقودها .... ... لتهميش صاحب البوست

رابعا والاهم هناك بيان هام فترقبوه

ولا نامت اعين الجبناء

كلام منطق وعقل صاحب البوست—

تخطى مقصود لك وللمشرف الاجتماعى—رغم ان
ود حاج اخذ الموافقة من الريس وعلى العين والرأس ولكن كان تكون اللجنة من –ود حاج
(حسب موافقة الريس ) وصاحب البوست والمشرف الاجتماعى –يعنى ثالوث كده—لذلك لم
يتبقى الا الافصاح اكثر—وفى انتظار البيان الهام---رغم اننا اخذنا الامر مأخذ
العطف ولكن لا يكون التخطى هكذا--

من طرف **ساري الليل** الخميس 10 مايو 2012, 3:40 am

ود الطرشان كتب:كضب كاضب يا الكليس يا كيشا
الفتح باب التبرع في راسو ريشا
مارق زعل الغشة زي دخان الشيشا
ود المناصير في التقديرات جيت الطيشا

والله حيرتونا

صراحة أمتحان لقياس قدرة ودرجة الذكاة لدي اعضاء المنتدي

اولا: بما أن الخبر صادر من الاخ الرشيد وهو رجل اعلامي حصيف يعرف ماهو الخبر ؟؟وماهي المعلومه ؟وكيف تنشر؟

أستبعد الرشيد من التقديرات

تعالو نرشح ونتوقع ونخمن من يكون ذلك العضو ضحية الاحتيال

من طرف **نورالهادى** الخميس 10 مايو 2012, 3:41 am

الموضوع مسخن ونحنا ما جايبين خبر أولا كفار لأخونا المنكوب والجاتك فى مالك سامحتك وأنا اقترح بأن يعمل له كشف دكيكينى كدى والكشف تحدد قيمته حسب حجم النكبة يعنى نعرف فى الأول الفرق وماركة التلفون البديل والمستبدل به لكى نقدر نحدد حجم النكبة .

من طرف **خالد عابدين** الخميس 10 مايو 2012, 4:11 am

توضيح
تم تكليف الاخ ود حاج لرئاسة لجنة التقصي وذلك لخبراته الوراثية والتراكمية المكتسبه في عقر الأتر مهما كان سواء في فرناغه أو ظلط - بادية أو حضر
وذلك لكشف الجناة والوصول لاماكن اختباؤهم
الأخ العضو المنكوب وصديقه يرجى التعاون مع السيد رئيس لجنة التقصي ومن يختارهم لمعاونته في مهمته
المؤتمر سيقدمه الاخ ودالحاج مع الأخ سلمان مدير الشئون الاجتماعية وليس الاخ الحاج شرف
شكرا جزيلا

من طرف **نورالهادى** الخميس 10 مايو 2012, 5:22 am

من طرف **نورالهادى** الخميس 10 مايو 2012, 5:26 am

من طرف **(الحاج شرف)** الخميس 10 مايو 2012, 5:28 am

خالد عابدين كتب:توضيح
تم تكليف الاخ ود حاج لرئاسة لجنة التقصي

المؤتمر سيقدمه الاخ ودالحاج مع الأخ سلمان مدير الشئون الاجتماعية وليس الاخ الحاج شرف
شكرا جزيلا

اصلا نحن متعودين
اى لجنه فيها تكاليف +منصرفات مابدونا ليها
معليش ياريس
تحوم وتجينا فى الدوحه
وكل ماتستبعد سيسى يجيك سيسى اخر

من طرف **(الحاج شرف)** الخميس 10 مايو 2012, 5:50 am

نورالهادى كتب:اوأنا اقترح بأن يعمل له كشف دكيكينى كدى والكشف تحدد قيمته ماركة التلفون البديل والمستبدل به .

اقتراح معقول من هولندا
وانا اقترح ان يتم تسطير الورقه بشكل جدول
تكون الاسماء راسيه
والعملات افقيه متلا
دولار ريال درهم فرنك استرلينى جنيه سودانى ين يابانى

يستبعد كل من يطلب الددخول فى هذه اللجنه

من طرف **ود حاج** الخميس 10 مايو 2012, 5:57 am

وحاتك يا الحاج ما فى سيسى أنا الآن اتصلت بصاحب الموضوع وهو قال بدوره سينسق مع المشرف الاجتماعى لزيارة المنكوب فى منزله ولكن صاحب الموضوع يتخوف من سيارة المشرف قال لسع ما رخسها ولونها الأسود يتشاوم منه ولكن تبقى أوامر الريس خالد طلبات ويجب أن تنفذ وأنا رئيس اللجنة وأمش فتش عن نقد ليساعدك فى شارع البلدية . وقول للمدام ود حاج سكره زيادة ويحب الزلابية مع الشاى ونحن فى الطريق الى منزلك كع كرع .

الاخوة المعقبين سلام—

شكرا الاخ الريس على
هذا التوضيح والتوجيه—

وكما قال ود حاج
اللجنة سوف تظل فى حالة انعقاد دائم لحين انفراج الازمة—

ياجماعة القروش
مامشكلة كتيرا وقليلا رايح – الان لازم نجيب المحتالين---

وودحاج اللتر دا
(ينجمو نجام قبورا) –بس يارئيس (اللجنة) العربية اترخصت—

فقط عليك الاتصال
بالاخ الرشيد وشوف البرنامج--

من طرف **amira ali** الخميس 10 مايو 2012, 2:25 pm

سرقووووووو موبايلييييييي
ده بااالغوا فيها
لله درك يا الهادي قاعد تنكت الاشياء ده من وين؟؟؟

من طرف **ود حاج** الجمعة 11 مايو 2012, 3:29 am

بيان رقم واحد

الله أكبر الله أكبر

لله لله نعم للسلطة نعم للجاه

أيها الشعب المنصورى البطل

لقد ظلت لجنتكم طيلة الفترة السابقة فى اجتماعات متواصلة برآسة شخصى الضعيف والسيد صاحب الموضوع والسيد المشرف على الموقع الاجتماعى .فقررنا الآتى .

1- سحب كل الصلاحيات المالية من صاحبنا المنكوب .

2- تسليم كافة الصلاحيات المالية لزوجته لمدة عام .

3- يسلم صاحبنا مصروفه يوميا مع مراعاة قيمة البنزين .

4- يمنع صاحبنا من التحدث مع الأشخاص المشبوهين فى أثناء وقت العمل وفى طريق العودة الى المنزل .

5- تكوين لجنة قانونية لمتابعة هذا الاتفاق برآسة الأستاذة أميرة على .

6- تكوين لجنة مستعجلة لمتابعة المحتالين على أن تدعم هذه اللجنة بعناصر من الأمن .

وسنظل العين الساهرة لحماية أمن المواطن .

صدر تحت توقيى أنا ودحاج وما نامت أعين الجبناء .

من طرف **ود عون الله** الجمعة 11 مايو 2012, 4:01 am

شيخ العرب ود حاج---سلام

يا أخي ما ممكن تزيد الراجل نكبةً فوق نكبة الموبايل

تخريمة

إنت يا شيخ العرب زوجة النكوب ده تقرب ليك شنو

من طرف **نورالهادى** الجمعة 11 مايو 2012, 5:51 am

الأخت أميرة الأميرة شكرا على التعليق بمقاطع الفيديو الجميلة وفعلا يا دفعة حسن يبدو أن ودحاج قريب زوجة المجنى عليه ولكن أنا خائف يكون هذا القانون مطبق عند ناس كتار جدا جدا هنا معنا ومن زمن قديم جدا !

من طرف **الرشيد طه** الجمعة 11 مايو 2012, 9:04 pm

انا شخصيا ماعندى مانع مادام اللجنه المكونه عندها تكاليف ومنصرفات وكده

نحن الان بصدد فتح حساب باحد المصارف الداخليه
وسوف انتدب نفسى على حساب التكاليف بفتح حساب بالامارات
والسعوديه وقطر وهولندا وليبيا
وامريكا

الحاج اخوي انت الناس تفتش تحل مشكلة الممكون وصابر وانت تفتش في حاجات تااانية لكن الحمد لله الريس انتبه وشالك بره اللجنة خاااالص

اصلا نحن متعودين
اى لجنه فيها تكاليف +منصرفات مابدونا ليها
معليش ياريس

ما بدوك ليها عشان حركاتك الفوق دي

من طرف **الرشيد طه** الجمعة 11 مايو 2012, 9:09 pm

الأخ العضو المنكوب وصديقه يرجى التعاون مع السيد رئيس لجنة التقصي ومن يختارهم لمعاونته في مهمته

سامع الكلام ده يا العضو المنكوب ولا نجيبو ليك مكتوب اهم نقطة للتعاون مع اللجنة تسليم الموبايل الماسورة للسيد فاتح البوست والافصاح عن الرقم الحقيقي الذي تم دفعه فرق