مجتمع الجزيرة شري

مقطوع من مقال مدرسة شري الأولية..
نسوي موية السكر للحمام عشان يرك على المواضيع ويقرا.. مباصرة في النفوس العسرة..
ومحاولة فتح أقفال النفوس العصية الما بتحب المواضيع المطولة..
مجتمع شري:-
الحقيقة بالرغم من شدة التمسك الأخلاقي في مجتمع المناصير عامة وقتها، إلا أن مجتمع شري، كان مجتمعاً جميلاً سهلاً، يفد إليه طلبة الثانويات والمتوسطة والجامعة من جميع أنحاء المناصير، وكانت هذه الزيارات عادية ومقبولة ومفرحة، وهي تشريف لمجتمع شري، خاصة وهي حاضرتهم في التعليم، ليس بإزائها إلا محطة الكاب، التى أضافت عليها محطة السكة حديد رونقاً خاصاً، مثلما أضافت السكة حديد رونقاً خاصة على محطة الكاب. كذلك أضافت الطبيعة وسحر الخضرة والمجتمع السهل المتعلم في شري، أضاف بريقاً آخر على سحرها الطبيعي، وكل ذلك يصب في بوتقة المناصير الواحدة.. شري حيث الطلبة يتسامرون، ومجاميع الكتشينة، والفرق الرياضية، ولعب الكورة اليومي، والمناقشات العالية الراقية مع الطبقة المثقفة.
طلبة المتوسطة والثانوي والجامعة وزياراتهم المتكررة لمدرسة شري الأولية:-
الحقيقة وظيفة مدرس، كانت حولها هالة كبيرة من التقديس والاحترام والتبجيل، لأنه وقتها المدرس كان عنواناً لأي شي.. والمتعلم عامة له وزنه في المجتمع أكثر من التاجر الجاهل أو الرأسمالي الغير متعلم، عشان كدة كان مجتمع الطلبة محترم برضو في هذه المنظومة المجتمعية.
بمجرد أن تتخارج من الأولية وتدخل الوسطى، تعمك هذه الهيبة، في الحقيقة حتى طالب رابعة ابتدائي نفسه، كانوا قبلنا بدفع ، يختاروا منه معلم المدرسة الصغرى، ويختاروا منه الممرض، ويختاروا منه من يمشي لمدرسة جبيت الخاصة بالسكة حديد زي التدريب المهني مدرسة تابعة للسكة حديد تخرج عمال مهرة، يترقون في السكة الحديد لأعلى درجة وظيفية، منهم الباشمهندس محمد رحمه عمدة المناصير في عطبرة وقتها.. كانت وظيفته في السكة حديد ترقى حتى وصل درجة( قمندة) وقمندة يعني زي قمندان البوليس.. عندو بيت حدادي مدادي من الحكومة في عطبرة، عندو صالون خاص به يرفق بأي قطر مسافر إذا كان في مامورية. عندو تصاريح سفر بالسكة حديد درجة ( نوم) واصلاً هو زي ده! دراستة ستة سنوات دراسية فقط. 4 أولية وسنتان مدرسة جبيت التابعة للسكة حديد.. لكن بعد كدة تصير الخبرة العملية عندو واسعة.. يترقى من درجة
1 عامل ماهر عند التخرج
2 الى فني أول.. صيانة .. مراقبة.. برادة.. كهرباء.. عربات.. دريسة.. شؤون محطة.. حسب تخصصه
3 بعد كدة يترقى الى رئيس صناع
4 بعد كدة يترقى الى ملاحظ
5 بعد كدة مفتش
6 بعد كدة ( قمندة) أي قمندان القسم المعين في السكة حديد، كل هذا من خريج رابعة أولية، وسنتين بعدها،طلبة المتوسطة، والثانويات والجامعة، في إجازاتهم، كانوا يحضرون الينا في المدرسة، نغير منهم، ونراهم نضيفين لابسين جلاليب بيضااا مكوية، شأنهم شأن أساتذتنا، يتعاملون مع صف ثالث ورابع، مرات تقديراً لهم المدرس في الحصة، يكون قاعد ويخليهم يدرسونا، ولسان حالهم يقول أن أستاذكم الذي يدرسكم، أنا سوف أطلع وظيفة أكبر منو! أنا طالب ثانوي وأستاذكم متخرج من معهد شندي سنتين بعد الوسطى، كأنو أنا فتا درجة أستاذ بي غادي! نتعجب منهم ومن نضافتهم ويا دابن جايين من مدارس الصعيد، حالقين حلاقة الصعيد، تدريج وقطعية من تحت لافة فوق الأضان، ونستغرب في قطعية الفقها.. المكنة بتاعة الحلاقة عملتا كدة كيف! نحن يحلقوا لينا كاري بالموس ويقصوا لينا الفوق بالمقص ساكت.. نقول ليهم كدي أكتبوا لينا بالإنجليزي في السبورة.. تكتبوا ، وينضموا كتر إنتو.. نستغرب ونتمحن في التعليم البي يخلي لسان الزول يتلوي كدة كيف! ويتكلم شيتاً غير لهجة المناصير، يحذرونا مرات ويقولوا لينا شايفين فلان الحايم معانا ده! أعملوا حسابكم منو! هو السنة الأخيرة في معهد بخت الرضا، جاييكم مدرس! يجونا في ثالثة وفي رابعة.. قبل المدرس يدخل الحصة وفي الفسحة، نديهم أسامينا عشان يكتبوها لينا بالإنجليزي في السبورة، نشيل ورقة ونحفظا.. ونمنى النفس عشان نتطور ونقرا ونمشي للمدارس دي البي تقري الزول لهجة تانية!
الحقيقة خلقوا مجتمع راقي مستنير، في السماء يجوا يلعبوا الكتشينة مع أساتذتنا.. حتى في سوق النعوفاب تلقاهم واقفين حليقة براهم في نص السوق، يناقشوا المسائل الأكاديمية، مرة ساكت في سوق النعوفاب، حب استطلاع، قلتا أهبش حلقتهن دي ولمتهم دي البي يخافوا منها الناس، والمزارعية والترابلة يتفرجوا عليهم بإعجاب شديد.من بعيد لى بعيد. لمة بتاعة طلبة متوسطة وثانويات وجامعة فيهم عثمان المقدوم في الجامعة، فيهم سليمان حسن اب شعر في المعهد الفني، فيهم عثمان خليفة حسين في الثانوي، فيهم صديق حسن اب شعر في المعهد الفني، فيهم أحمد الحسين الحسن في المعهد الفني، فيهم أحمد محمد أحمد كحيل في جامعة الخرطوم، قلتا لى صديق حسن أب شعر وكان واقف طرف، كدي وريني ثلاثة بالإنجليزي يكتبوها كيف! الباقين خايف منهم، صديق يعرفني وإسمو زي إسمي. طوالي دنقر على الواطة كتب لى ثلاثة بالإنجليزي في سرعة البرق. استغربتا من سرعة الكتابة عندو.. مشيت فرحان على أني تخاطبت مع طلبة جامعيين.وثانويين. نستغرب منهم ومن نضافتهم، وهم يزوروا المدرسة.
.
صديق عبدالله علي أبوحنة
كبار الشخصيات








عدد المساهمات: 4206
نقاط: 14193
تصويتات لمشاركاتي: 17
تاريخ التسجيل: 14/07/2010





.




رد: مـدرســة شــري الأولـيـــة
من طرف صديق عبدالله علي أبوحنة في الأحد مارس 04, 2012 3:25 pm

.
الدكاكين في شري:-
كنا كطلبة داخلية غير مسموح لنا بالتجول في شري، أثناء الدراسة، إلا بعد أن تستأذن من الأستاذ ضابط الداخلية، ويكتب اسمك في دفتر.. ويحدد لك الزمن.. وممنوع طبعاً تمشي البحر تعوم وأنت في الداخلية، وكان لقوك عمتا عشرة جلدات في الطابور الصباحي، بعد أن تحضر ولي أمرك.. ولكن بعد تأخذ الإذن مسموح ليك تحوم في شري من أم لقاديب لغاية راس الجزيري.. وتروح تشتري حاجياتك من دكاكين شري..
دكان العامل:-
في أم حصي.. قاعد فيهو العامل بي نفسو. مرات ولدو ختم رحمو الله.. غلام ود العامل كان لسه يتعلم في التجارة والبيع، وأبوه مسوي ليهو ماكينة خياطة يخيط فيها.. كان دكان العامل مشهور بأنو يجيب حاجات الطلبة. كراسات وأقلام.. كان ضاع منك كراس تجي تشتري منو! لأنو ما كان بي نحتاج نشتري كراسات، لأن وزارة التربية والتعليم تصرف لنا كل شئ، الكراسات. الاقلام.. الكتب.. المحّايات.. الحبر بقا للطلبة المبرزين في سنة ثانية.. ويعمم الحبر بالمحابر على الدرج في سنة ثالثة ورابعة.. مافي حاجة اسمها أقلام حبر جاف والله سائل.. محابر وعندك ريشة كدة زي القصبة وفيها حاجة كدة اسمها( سنَّة) السنة كان ثمنها تعريفة. بعد سنتك البي يصرفوها ليك تضيع ممكن تشتري سنة من دكان العامل..ونحن في ثالثة ظهرت بصفة قليلة أقلام اسمها أقلام (طَروبـِن) تملأ بي ملاي.. قلة من الطلبة كان عندهم. الباقين يكتبوا بي ريش وسنن ويغمسوا من المحبرة الفوق الدرج.. كل درج فيهو عدة محابر يملاهن الفراش سليمان ود سموعي بالحبر، الكانت تجيبوا وزراة التربية والتعليم، حتى لمان مشينا المتوسطة المحابر موجودة تملا منها قلمك بتاع الحبر. وكان ما عندك قلم تكتب بالريشة والسنة مافي زول بيسألك..
دكان حسن الفكي:-
دكان بتاع كبارات وما كنا نذهب ليهو كتير من المدرسة.. فيهو احتياجات المواطنين الكبيرة، وكان حسن الفكي تاجراً كبيراً لايلتفت لحاجات الطلبة الصغيرة ، مسطرة، قلم رصاص ، محاية، دي كانت تباع في الدكاكين الأخرى.. حسن الفكي كان دكانه، شاي سكر ، زيت .عدس، رز، جاز، ومعظمو بالصفايح والإجمالي.. ومن هذا الدكان من خزينة حسن الفكي، تصرف مواهي المعلمين، ومواهي الخدامات، وموهي الممرض والحكيم باشا..كل الوظائف الحكومية، كانت الوزارات المختلفة تودع الرواتب قبل ثلاثة شهور من صرفها.. وكان حسن الفكي وكيل الاستلام..
دكان عثمان عبادي:-
هذا دكان عامر جداً فيه احتياجات الطلبة والأطفال والناس الكبار.. موجود في منتصف فريق العبابسة بقرية شري.. برندة وداخلها الدكان ومن خلفه باب جانبي حيث يسكن أهله.. تلقى من برة حيطة الدكان بتاعة عثمان عبادي دي كلها مقددة من أثر المسامير بصورة ملفتة.. عشان كان تاجر جلود ينشفها على صفحة الدكان،ويدقها بالمسامير، ما يخلي جلد حايم في سوق النعوفاب والله في شري إلا يشتريهو.. ويشقوا ويعلقوا على صفحة حيطة الدكان وينشفوا ويجففوا ويجمعهن بالكميات الكبيرة ويشحنهن بالمراكب الى الكاب،والجلد المقدد ما بيشتريهو، خرم واحد بتاع سكين يلقاها فرصة ينقص السعر النص، ثم عن طريق عربات البضاعة بالقطر في السكة حديد إلى أم درمان ، كانت شغلانية متعبة ولكن من ورائها يجني ربحاً طائلاً.. بعد ما يضمن الجلود وصلت أم درمان يقوم يسافر وراها من هنا . ويقبض ثمنها ويجي من أم درمان محملاً بالبضائع التى يحتاج إليها المواطنين.. وكان بالنسبة للطلبة في مدرسة شري الأولية يجيب كل ما يخص الطلبة والأطفال.. ملابس. أحذية الشدة.. حلويات بأنواعها.. وخاصة حلاوة لكوم الأبيض والأحمر كانت مقرطسة في صناديق زمان كقطع صغيرة.. كل صندوق فيه خمسة وعشرين حبة.. كان بعضنا يشتري منه صندوق حلاوة اللكوم ويروح يبيعوا في المدرسة.. الصندوق كان سعرو ريال تروح تبيع للطلبة الحبة بي تعريفة.. ربحك فيه يكون قرشين ونص ويطلع معاك الدقيق بتاعة اللكوم ربح برضو تلحسو أو تبيعو.. وكان يجيب عثمان عبادي قصب السكر. يقصصوا ويبيعوا للطلبة أمام دكانه..
وقتها لم ينشأ في ساقية العبابسة دكان أحمد القميري.. ما نشأ هذا الدكان إلا بعد أخوه النذير القميري سافر السعودية ودعم له الدكان..
دكان سليم علي الشاعر:-
كان هذا في قرية أم لقاديب. برضو ده دكان كبارات ومعظمو بالإجمالي وفيه حاجيات الأسر وقليل من حاجيات الطلبة . كان معداً لحاجيات الناس الكبار.. ومرات تلقى حاج سليم خاتي عنقريبو في نص الدكان .. وولدو عثمان سليم الرجل القامة رحمو الله خاتي مكنتو ويخيط.. برضو دكان سليم كان مكان عشان يستلم القروش من الناس البي يجوا يدققوا في طاحونة سليم.. يدوه حق الدقيق في الدكان مع أن الطاحونة بعيدة من الدكان.. عندو صَـرَّة عين كدة رحمو الله. يصر عين ووزي تشوفو مقبل غادي، وهو ما مقبل غادي .. يعاين ليك ويعاين لى قروش الدِقِّـيـَقْ في إ يدك! يقول ليك دَقّّقـَتّ بي كم يا أبني! تقول ليهو عندي كذا ربع.. الربع دقيقو كان بي قرشين..كان ممكن يستلم الشخص الذي في الطاحونة القروش .. ولكن وقتها كان يدقق للناس وفني الطاحونة الرجل القامة الطيب ود الحسين .. وقال لى حاج سليم أنا ما بمسك القروش تدخلني في حساب.. وعليه صار سليم يكون متواجد في دكانو يستلم حصيلة القروش من الأولاد... أحياناً في أولاد كذابين يكون دَقَّـقْ خمسة أرباع عيش، يقول ليهو ربعين! مثلاً ولكن مرات حاج سليم كان ذكياً. هو يعرف الأسرة دي أسرة منو! ويعرف استهلاكها كم! في الأسبوع.. حافظ جميع الأسر في شري وخارج شري.. حتى مركب عمك قصيرون كانت تجي من جزيرة سور محملة بالعيش عشان يدققوه هو سليم كمان حافظ أسر سور .. وعشان كدة مرات يروح يسأل أهل بعض الطلبة يقول ليهم يوم داك دققتوا كم ربع.! وكان أحياناً يقبض بعض الأولاد الجوا دققوا حرامية وأهلهم يدوهم علقة.. ومرات سليم يقول ليهم لى أهلهم الولد ده! تاني ما يجيني مع عيش الدقيق.. حتى أهلهم مرات يخلوا القروش يجيبوها بي نفسهم..
دكان سلمان علي الشاعر:-
يوجد في قرية المتيرة. قرب جدول الساقي.. يرجاك قاعد فيهو سلمان ود الشاعر.. كان رجلاً ظريفاً صاحب نكتة.. دائما يلبس العراقي والسروال ويتلفح التوب.. توب ساكوبيس أبيض ناصع.. كان رجلاً من عاداته لاتفوته جنازة ولا دافنة. حتى ولو في جوف الليل. يجي الغرب للمقابر.. عالي الهمة.. كان صديقاً للوالد عبد الله وعندهم هظار ومزاح مع بعض.. بما أن حاج سلمان على الشاعر رحمه الله رحمة واسعة كان عندو أكثر من مرأة تزوجها فقد عمل برندة في الدكان مقفلة ووضع فيها ماكينة خياطة. كان ابنه عثمان سلمان علي الشاعر يا داب في بداياته يتعلم كيف يخيط..الملابس وخاصة الملابس الستاتية.. كان مشهور دكان سلمان ببيع( الشُرَاك) ( شَرَكَة) من حديد يصنعوها في أم درمان يجيبا بالكمية.. ونحن كأطفال نشرك للطيور كنا نعرف نوعية الشركة الجيدة القوية الحديدا قوي. كانت الشراك الجيدة في دكان سلمان ود الشاعر. أصلية.. بقية الدكاكين فيها شراك طبعا.. لكن الشُرَاك الجيدة عند سلمان علي الشاعر.. كانت هنالك شركة خفيفة تقبض الطيور الصغيرة علج.. صليعة.. دي سعرها قرشين.. الشركة الكبيرة تقبض الطيور الكبيرة.. قمري بليب.. قطا.. دي سعرها شلن.. والشراك الصغيرة مرات الطيور بعد تقبض فيها تشيلا وتطير بيها وتروح تضعها في عش في تمرة طويلة ، خلاص تاني شركتك تكون راحت عليك.. عشان كدة في بعض الطلبة الشركة بعد ما يشركوها يربطوها بي خيط بي مسمار يدفنوه في التراب عشان لما تقبض الطيرة الكبيرة ما تطير بيها.. كمان كان عندنا مشكلة مع السَرَاتي( الحدأة) السراتي تكون حارسانا. أول ما شركتك ما تقبض والطيرة تفرفر فيها وإنت جاي عليها تلقى السرتويي ختفتا بي طيرتا وشركتا وصعدت بها لأعلى تمرة تأكلها هناك وتخلي ليك شركتك هناك. السرتويي كانت حرامية جدا وكانت معذبانا.. عشان كدة كنا نربط الشركة منها بي خيط في الأرض .وعش السراتي في أعلى النخلة كان دائماً ملىء بشراك الأطفال. كفاية التشيل الطيرة القابضة في الشركة وتخلي ليك شركتك.. عشان الشركة خصارة غالية بي خمسة قروش.. كمان في أولاد حرامية هو عايز الشركة والطيرة القابضة الإثنين ما تشيلهم السرتويي يقوم يربط الشركة بي خيط..في مسمار قوي ويدفنو في التراب ويضع جنب الشركة من جهة راسها شوالة قديمة قطعة شوال كدة.. والسرتويي طبعاً حراميي تجي من هناك متحمي أول ما تشوف الشركة قبضت.. تجي جاري تشيل الطيرة، كرعيها ,أظافرا توكر في الخيشة.. وعاد تعال شوف نتفشا فيها، نقطع لها قدومتا السنيني ديك ومرات نحرقا بالنار ونكتلا.. عشان نقول نقلل عدد السراتي.وننتقم منها. وأصعب حاجة شركتك لما تلقط. يقول ليك شركتي لقطتت.. يعني الهبار هبر في الطيرة والشركة هبرت والطيرة طارت ما قبضت.. والسبب أن جهاز ( الهبـَّار) الذي تسبب عليهو الدودي أو الحبي ما كويس.. الشراك تجي من الصعيد عليها هبار حديد ما بينفع معانا.. طوالى نقلعوا ونسوي ليها هبَّار عود محسحس سميح كدي أقل حاجة يهبر في الطيرة.. هبار الحديد مرات لامن الطيرة تاكل الدودي وتمعطا ما يهبر فيها.. ما كويس..
دكان عثمان ود سليمان ود طه:-

دكان صغير في قرية أم حصي ، ما كنا بنذهب ليهو كتير، عشان فيه حاجات المزارعية بس.. طواري مناجل. سكاكين.. لو عايز تيراب لوبا طيب. لوبا عفن.. تيراب بصل. تيراب جرجير.. كان يشتغل طين في الصعيد عثمان ومن هناك عشان قروشو دي تربح ليهو! يقوم يسويها في لوبا وتواريب وطواري أم ديك الاصلي. من أم درمان ويشحنا من هناك يجي يتلقاها في الكاب.
دكان أحمد ود حسب الله:-

عاملو جنب الخلوة بتاعتو.. وهو دكان متعهد المدرسة.. والتعهد بالتناوب مرة هو، ومرة حاج سليم ومرتو سعيدي في أم لقاديب.. برضو دكان فيهو احتياجات عامة. وحديد البوابير والعيش والسكر والشاي وبعض حاجيات المدرسة البي يحتاجو ليها الطلبة. كان حاج أحمد حسب الله عندو دكان قديم أخيراً طور الدكان في موقعه الجديد وعمل مصلاية كبيييرة أضافها على الخلوة بتاعتو القديمة.. كان رجلاً طيب الجناب عابدا يعزم أولاد حاج الماحي طوالي كل سنة كانت عندهم جولة في المناصير. لازم ليليي تكون عند أحمد ود حسب الله.
دكان حسن بابكر:-

كان دكاناً صغيرا.. مافيهو حاجات طلبة. بس يبيع الطحنية للأولاد ويبيع الزيت والجاز البي يضوا بيهو الفوانيس ( كيروسين)
دكان عبد الله( عبديلاهي) ده في قرية فقاعة برضو فيهو الاحتياجات العامة
دكان الطيب ود اللمين:-
برضو دكان صغير فيهو احتياجات الناس العامة.. وبعدو مسكو محومااد ود الطيب ود اللمين. لكن دكان الطيب ود اللمين الاساسي كان في سوق النعوفاب في مقدمة السوق. كان يبيع العيش والدخن.. ويبيع القَـَرضْ..
دكان الصادق ود الجـِزَيـْرِي:-

ده والد إدريس الصادق عندو خرج كدة متجول زي( منداجة) بي لغة عرب المناصير.. غالباً ما يجيب حاجاتو دي يفرشا يوم السوق. كان يبيع شب.. بخور نعلين شدة وباتا.. ومساويك أراك وصحاني بتاعات طلس وعلمون( ألمونيوم) لكن كان جيتو في الجـِزَيـْرِي دي عند أهلو، والله مرأة جاتو دايرة ليها صحن.. طافور. يديها من خرجو وده!.. دكان متحرك.. يعني
دكان إحموده ود كرار:-
ده دكان صغير ومرات يقفل كان ماسكوا إحمودة وبعدو مسكوهو أولادو. سكر شاي. عيش حب. قمح كدة.نحن كطلبة في مدرسة شري الأولية ما كان لينا فيهو احتياجات.
دكان حاج أحمد الحسن عثمان
في حلة القوز، هذا نشأ مؤخراً في منتصف السبعينات.. أما تلك الدكاكين الأخرى قديمة منذ أواخر الخمسينات وبعضها قبل ذلك.
.
صديق عبدالله علي أبوحنة
كبار الشخصيات








عدد المساهمات: 4206
نقاط: 14193
تصويتات لمشاركاتي: 17
تاريخ التسجيل: 14/07/2010





.




رد: مـدرســة شــري الأولـيـــة
من طرف صديق عبدالله علي أبوحنة في الأحد مارس 04, 2012 3:31 pm

.
التجارة في المدرسة:-
التجارة في المدرسة كانت تزدهر فترة العصرية بعد ساعات الراحة. يخرجوا الطلبة خارج سور الداخلية يلعبوا.. البيع بالصباح كان ممنوع في المدرسة إلا في فسحة الفطور.مثلاً.. فراش المدرسة سليمان ود سموعي كان يجيب جنى الجداد المسلوق. الحبة بي تعريفة.. المنى بت الرحمة طباخة كانت تبيع الزلابية تمشي ليها بي ورا في شبابيك المطبخ الفاتحة على الشارع تناولك.. الحبتين بي قرش .. لأنو هي كطباخة كان ممنوع تطلع برة المطبخ تبيع.. كانت تعمل الزلابية من دقيق الفينو.. زيرو رقم واحد.. وكانت تجيد صنع الزلابية بصورة مذهلة وزلابيتها حلوة شديد. لأنو الزلابية البي يسوها أهلنا معظمهم ما بيعرفوا ليها.. ويعملوها من دقيق القمح العادي بلا خميرة.. تطلع مسمطة وقوية وشرباني في الزيت، إيدك كلها تـَفـِقْ زيت لما تأكلها.. كان يستكتروا دقيق الفينة وما بيشتروه يعتبروه شغل صعيد.. أما الخميرة لا فورية ولاعادية! .كانت غير موجوده.. وكانت المنى بت الرحمة تسافر تجيبا من فوق. من عطبرة .. كانت مرأة ظريفة ونضيفة وسمحة.. عشان كدة المدرسين كان يشتروا زلابيتها.. مرات تديها ولدا قسم السيد يبيعا ليها في حَلـَّة كدة يبيعا في المدرسة.. حتى ناس العطمانين وهي قريتها، كان يشتروا منها الصباح زلابية يشربوا بيها الشاي قبل ما تمشي هي المدرسة يجوا يشتروا منها يلقوها تعوس في خُسَّها.. كل يوم تعملا.. كنت أجي أشتري منها مرات عند أهلا..
إدريس الصادق والتجارة:-
إدريس الصادق كان يجي يفرش خرج أبوه داك قدام باب الداخلية يبيع بسكويت. لكوم.. طحنية بالعصر..
دادق:-
دادق برضو يجي يفرش من دكان أبوه قدام باب الداخلية وكان مشهور يبيع( الكريز) الكرز يفتح علبة الكريز ويديك حبة بي مويتا بي معلقة كدة في خشمك وتديهو تعريفة.. على الحبة بي مويتا في معلقة.
عثمان علي الأمين وبيع التمر:- عثمان علي الأمين من أوس.. كان يجي شايل فوق خرج على حمار لما التمر يمرق سبايط تمر أم راس وأم نص.. ومهرود.. يبيع للطلبة. دائما تمر الجزاير يمرق بدري قبل تمرنا لافوق. عشان الحرارة والجبال والتربة الحجرية. يبيع ملية الكوز المتوسط بي قر شين..هسي دي بقا عثمان متعهد كبير وساكن بيت ملك في العاصمة في الجرافة وتزوج بنت خالتنا..
أولاد المزارعية:-أولاد المزارعية كان العندو بطيخة نجيضة. والله شمامة.. يشققا.. ويجي شايلا في صينية يبيع الفشقي بي تعريفة..وغالباً دي كان يعملوها ، أولاد قرية المتيرة وقرية أم لقاديب وقرية فقاعة، لأن أهلهم كانوا مزارعية وسمودة، يحرصوا على الخضروات الموسمية بجانب المحصول الأساسي من قمح وذره.
علي كلمون والتجارة:-
برضو علي كلمون كان يجي بي حمارة يبيع في المدرسة يفرش يجيب حلاوة حربة ولكوم يبيع وابوه كان عندو دكان.. مرات أخوه الكبير سليمان كلمون يجي يبيع برضو.
التجارة المتجولة حول حرم الداخلية:-
ديل كان يكونوا شايلين كرتلات. تدفع تعريفة وتختار رسمة على الكرتلة.. والجائزة مثلا تكون ( ديك) أو صندوق حلاوة لكوم.. أو شركة كبيرة.. عثمان عبادي كان يجيب الكرتلات دي يبيعا يجيبا من أم درمان.. برضو الشايل ليهو صندوق حلاوة لكوم لافي بيهو يبيع الحبة بي تعريفة وكدا.
غداء المدرسين:-
كانت هنالك غرفة واحدة في داخلية المدرسة قريبة من الباب.. يسكن فيها ضابط الداخلية.. وخارج سور المدرسة من جهة المستشفى هنالك سكن للمعلمين مبنى على طراز ممتاز، بالرغم من أن المناصير بنايين، لكن جوا بنوه ناس بربر في أوائل الخمسينات.. غداء المدرسين يطلع من مطبخ المدرسة ، الخير كان وافر لايؤثر ذلك في شي. الشاي. كل حاجة. لايطبخوا أي شئ ولا شاي.. كل شئ يجيهم من المطبخ، وكانت الهدايا تأتيهم من المزارعين، طماطم، بصل أخضر ، عجور، شمام ، بطيخ، ما بيودوها للمدرسين، يجيبوها هنا في المطبخ، مثلاً الماهل رحمو الله كان يجي شايل بطيخة يجيبا للخدامات، يقول ليها : بعدين قطعيها للمدرسين مع غداهم! هي تقطع منها وتشيل باقيها.. بعدين رئيسة الخدامات تكلم الأساتذة تقول ليهم البطيخة القبيل ديك مع الغداء جابا فلان.. ناس زي ديل كتار يهدوا خاصة في مواسم الطماطم والخضار، وكان هنالك ناس في شري متخصصين في الخضروات السريعة، مرات جربوا زرعوا الجزر والباذنجان، والموز..
أثنين طلبة كبار تديهم الخدامات الصينية يشيلوها يا الله ويامين يوصلوها في السكن الخارجي برة بالقرب من المستشفى البيوت الفاتحة على الداخلية. ضابط الداخلية يتحرك عليهم هناك يتغدوا مع بعض.. أها نحن هنا نكون إتغدينا زي الساعة إثنين وشوية كدة وضرب جرس الراحة.. كل زول لازم يقطع الحركة ويطلع في سريرو. يقرأ، ينوم، المهم يخنس، وإلا يكتب مهرجل ويقدم في طابور الداخلية المسائي ويجلد خمس جلدات.. أثناء الراحة بيكون الطلبة خلدوا الى الراحة، كل زول لزم سريرو. لكن أثناء هذه الراحة، كانت هنالك فرصة تتم لبعض الطلبة البي يتحاوموا، بسبب، بدون سبب، جنب خشم باب الداخلية!
ليه! ترقباً لصينية المدرسين بعد ياكلوا. طبعا لازم الصينية يكون فيها باقي مما لذ وطاب.. باقي لحم باقي دمعة باقي بطيخ باقي شمام.. والخدامات بيكون راحن أهلن وقفلن المطبخ، بس خلن المطبخ الخارجي البي يرصوا فيهو الصواني بابو فاتح، عشان الطلبة لما يرجعوا صينية المعلمين يتركوها فيهو لى بكرة لامن يجن الصباح يغسلنها،
أها ثلاثة أربعة طلبة كدة يتحاوموا يترقبوا صينية المعلمين.. معظمهم من رؤساء العنابر، عشان مافي طالب عادي أو طالب صغير يتحاوم في زمن الراحة..
واحد من المدرسين يطلع بره باب الحوش بتاعهم ويقول ياولالالالالالاد.. يا ولد.. يا ولالالالاد) بصوت عالي. الكلمة دي معناها شنو! معناها صينية الغداء فضيت تعالوا شيلوها..
كلمة يا ولد دي تنسمع في الداخلية كلها، مرات يكون عندنا حظ نجري نجيب صينية المعلمين مرات الطلبة الكبار يظفروا بذلك.. نجري نجيب الصينية.. مرات تكون كسرة بس! نكبها في صحن ونسوي ليها دقة ونعجنا بي موية.. مرات تلقى ليك عضم ما ممصوص كويس فيهو باقي لحمة، تخلص عليهو! مرات شوية دمعة.. وإذا مع الغداء بطيخة.. البطيخ عندنا في المناصير ما بيقطعوه زي ناس الصعيد يجردوه من ظهرها الأخضر لا. البطيخ يشقق سرايح بظهره.. كامل. تمسكا وتاكل. طبعا المدرسين يأكلوا الأحمر في البطيخة، بعد الأخضر في الابيض طبعاً، نحن نخلص على الأبيض الفيها ومرات ندي الأخضر كدّه.. سبحان الله ناكل وراء خشوم ناس أكلوا.. ما معروف عندهم شنو.. نكد عضم زول كان ياكل فيه.. لكن إفتراضاَ أن المعلم نضيف وزول راقي ومتسوك.. ما علينا نأكل البواقي.. عمرو ما جاتنا حاجة ولا أصابنا مرض..
.
صديق عبدالله علي أبوحنة
كبار الشخصيات








عدد المساهمات: 4206
نقاط: 14193
تصويتات لمشاركاتي: 17
تاريخ التسجيل: 14/07/2010





.




رد: مـدرســة شــري الأولـيـــة

والله ياباشمهندس صديق انا ضحكت ضحك شديد لمان شرقت
حتى الناس المعاى فى المكتب قالوا الزول دا جن الزول دا مالو
لانهم لايعرفون الانطباع الذى تغلغل بداخلى
سرد روائى لايقل من كتب تنشر وهذا ليس تحيزا لانى من جزيرة شرى
حتى عمى من ضمن المذكورين فى هذا الموضوع ولكنها الحقيقة المجردة
التى تحكى عن واقع وتاريخ ملى بالاثارة والدهشه تريح كل من اطلع على
هذا البوست من بنى منصور
تقبل المرور