غزل النجوم

مجادعات شعرية بين الاستاذ خلف الله على كباشى والمرحوم عمراحمد عمر لهيفان (بونى)
هذه المجادعات خلدت ادبا راقيا يعبر عن عبقرية المناصير الحقيقية عله يكون ادبا يدرس فى كتب التعليم الادبية فى المدارس
كما ان هنالك بعض المداخلات من بعض الشعراء فى كوستى وربك خلدت حوارا وتواصلا ادبيا من على بعد المسافات لتقريب وجهات النظر
والمتعة الشعرية علنا نجد من الوقت مايسمح لنا بمواصلة توثيق هذا الادب الراقى

نواصل
راكب الحورية
الاستاذ/خلف الله كباشى

راكب الحورية الحبيب لاجاء ودعنى ولاالسلام
تجرى من عينيه الدموع وفى اليمين خاتيه خمخام
اطلق الصفارة انذار والمساعد بلغ تمام
مانظر لى حالى الحزين اصلوا عشق وطوالى قام
جنن ابوحفصة وبهدلوا حتى عينى جفت المنام
بى قصاد هجانى لفة احكم السير مسك الزمام
فى ام سرح ختالا اربعة وشفتو جارى وفاج الغمام
فى دقائق حالا وصل لى جبل شيكابى قدام
انا ليك يا السرجين جيت وقيع وقولى سمحة تصل بالسلام
قولى توصل من دون الم لاصداع لاغى لاطمام
عن محمد على طه جات وشفتو قام قابلا باحترام
قنبت طال بيها الحنين وفى البلد تانى عقيله حام
واصلت سيره من ابو سباع والمدوت وصلتو دون كلام
قبل ماتوصل فى قطب فوق عطاالمنان طيفه حام
لما فى بربرعاد وصل الوداع يانسل الكرام
بنحضن الريد لامن تعود نحضن الاسى نحضن الام
بنقرا فيها حروفك ونعيد ونقرا مابين السين ولام

رسالة من الشاعرعمر لهيفان الى
الاستاذ/خلف الله كباشى

لامتين فى مدح البنات ***نحن والايام ياخلف
نحن نمشى نغازل النجوم ***والنجوم لاتيه لاصلف
نحن عدينا زمن طويل ***والايام ماشات فى تلف
فى البنات بنغنى ونقول***والقريحة تجود غير كلف
النجوم الوافى العهود***حبهن صادق ومافى لف
وكل ليل تظهر فى الميعاد***وديل علاقات هدى السلف
هن مصابيح وزينة للكون***ليك لواكدت وحلف
النجوم من شوفة بتغيب*** وكل ليل تلقاهن زلف
حواء كانت سبب الخروج***وروجت لى ادم قطف
من شجرة جات بالخطوب***ولحظة من الجنة انخطف
انجدع فى الكون العريض***حالى فى اخطر منعطف
جاثى يتامل فى النجوم***ومن كليمات ربك لطف
النجوم باسمات الثغور***والكثير فى ريده انجرف
النجوم والليل والخضار***ريدة تدى العاشق شرف
النجوم ظاهرات ساطعات***وبى جماله عتيق اعترف
بيها نشكر رب الانام***وليك حق لو دمعك زرف
وبين زليخا اكانت زمان***فى قصورة وداخل غرف
ويوسف المجدوع فى السجون***خططتلو الفخ والهرف
مااطيل والامثال كتار***والبنات بتكيد من طرف
عيش مع الانجم فى مساك***وبى بنات نعش اهنا واترف
راكب الحورية ماعاد***وانت مجروح دمعك نزف
فر لى اجنحته خلاك***ومن حياتو حنانك حذف
ديل بنات حواء بيخدعن ***كل محب وترالريد عزف
نحن بالانجم مكتفين *** من درر والبنوت خزف

انتهى

رد الرساله اعلاه من الاستاذ/خلف الله كباشى
بعنوان لوكان ماالبنات

ياعمر لوكان ما البنات مافى زولا طرفه يسهر
ومافى زول نص الليل يقوم يشوف جمال النجم الظهر
الغرام احيانا يكون جنة عامرة ملاها الزهر
والحبيب لو صد وجفا تبقى كل الايا ضجر
ياعمر فى وصف البنات كم يجود بالنغم الوتر
وكم لبيب قال فوق البنات فى القوام والجيد والشعر
النجوم دايما مابتطل وفى زمن يخفيها القمر
والقمر من وجه البنات شل جمال الضو البهر
راكب الحورية ماعاد وبى فراقو علينا اثر
وانت لو شفتها يا عمر للنجوم ما كنت شكر
داير اوصف ليك فوقه واقول الا قاسى على يا عمر
الجمال منها بس يقيف وجل ربى الخلق البشر
بى حروف ابجد هى ستين وزايدة فوقن تسعة عشر
لو حذف حرفين فى الاخير تلقى اول اسمك ظهر
تتعرف من دون البنات طيبه فايح ند وعنبر
عاد خروج ادم للعبوس من شقانا وقسمة وقدر
وفى دخول يوسف للسجون كان درس لينا ملان عبر
ياعمر قلبى مثل عتيق فى جمالن تاه وانحسر
حفصة ابوها حليلو مسكين فى العشق ماشاف البطر
كلما رك على غصن طيروجافا ومنو طار فر
وكل مايمسى عليهو ليل دمعو زى سبلوق انحدر
واصلو عاد من كتر الهيام للنجيمات خاوه عاشر
وما حصل غناله النجوم والبنات دونن ماذكر
الا برضى بقول ليك كلام فى النجوم والليل والقمر
لما يجتمعن ليك سوا والحبيب للنسمة عطر
تبقى اسعد زول فى هواك وليك حق لوليها سامر

انتهى

ربنا يحفظك الأخ عباس محمد مساهماتك في المنتدي تدل علي انك نجم حقيقي أتمني لك التوفيق تقبل مروري وفي انتظار المذيد من المساهمات

رسالة من الاستاذ/خلف الله الى الشاعر عمر لهيفان
بعنوان : قولى كيف الشورة آعمر

قولى كيف الشورة آعمر والقليب ابى ما يعترف
قتلولاتبالى جراس قال محال دمعك مابجف
قال لى انظم فوق البنات رتب الابيات وولف
الحروف الخمسة اذكره وفيها مايفضل فد حرف
***
الخدود والجيد والسبيب حلوه تستاهل للوصف
غنى لى مضمور الحشا الدوام نديان يهتف
قولى ليك مبروك ياعمر ومن كتير آلامى خفف
ياعمر خل وصف النجوم ومن درب سوسن لاتلف
***
النجوم احيانا تغيب والقمر ايضا ينخسف
انت لوشفتها فى الرقيص الصفوف تبراها وتلف
والصدير الفوقوالسبيب عومو زى وزين الجرف
تبكى زى واكتر كمان فى سيول الريدتنجرف
***
ياعمر نصبرلامتين ما الصبرللريق ينشف
العمر ضيعنا آلام وللثمار لابد بنقطف
نبقى زى الرهبان عديل وفى ظلال الريد نعتكف
وننسى كل الناس حولنا وبالديار الافراح تلف

انتهى

رساله من الشاعر عمر لهيفان
الى الاستاذ/خلف الله كباشى
بعنوان : ياخلف ما دار تقتنع

يا خلف مادار تقتنع والبنات بى ريدن كلف
قوى حبل الصبر المتين واوعة من ايدك يتنتف
الجرس مابتنفع محب وللدموع الشايلة كفكف
بى درب سوسن لاتحوم المصايب بيك تعصف
***
فى الغرام حظك ياخلف ظنى من الحظ النتف
لاتشيل حمل الريد تقيل وابقى من الريده خفف
لاتحوم تبراه السراب واوعة من الراى التلف
خوفى زى قيس تبقى مجنون وتعشق الغزلان تولف
***
انا بى درب سوسن مابجى وعارفو لى الاهوال يكتنف
النجوم مالن ياخلف لى محبها ديمه تعطف
كين تشاهده فى كل ليل وكل ماعينيك هفت ترف
النجوم بى جاى وبى جاى فيها انواع ومليون صنف
***
المغيرب قوم ياخلف بى دريب التمرة الوقف
تمشى شاطى النيل العجيب ومنو بى كفيك اغرف
عشة الصفصاف عاملة سور فى سياج مدعوم بالطرف
والضفادع فى دجى الليل لما موسيقاها تعزف
اعذب الالحان تنشده وحتى للاسماع تشنف
القمرفى ايام المحاق النجوم فى المويه تلصف
فى عقد منظوم ومنثور لى بشر ماظن يئتلف
عكس تيار سوسن تعوم وبى خصل سوسن تقدف
تنجدع فى شاطى الامان وتبقى من الريد منصرف
***
الطبيعة جماله خلاب فى تناسق مابيختلف
ترجع اليبت هانى مسرورهادى لما الليل ينتصف
تبقى اسعد زول فى هواك والديار الافراح تحف

انتهى

الاخت عازة مرورك اسعدنا ودب فينا حماسة
ودفعة تدعنا الى اكمال المشوار
فشكرا على المرور

الأخ عباس تحياتي
إبداااااااااااااااااااااااااع
بالله واصل وماتخلي شئ

واصل يا استاذ عباس ... وثق واسعد الناس ..

وكمان لو جبت مجادعات الخلف مع الحداد تبقى ما قصرت

ربنا يجزيك خير ...

الاخ ود المناصير مرورك اسعدنا
لاننا حيثما اجتهدنا من اجل بلادنا عراقة التاريخ والاصالة وجدناك امامنا تحمل الهم الاكبر
تسلم يا ملك ويازعيم

الاخ ودعون الله تشكر على المرور

رسالة من الاستاذ خلف الله كباشى
الى الشاعر/عمر لهيفان
بعنوان:نضمك ماهو صح

ياعمر نضمك ماهوصح والمشاعر ماها شرفه
والقلوب المليانة ريد يالبيب مابتعرف جفه
والنجوم ليها مجال سمر لوسماها الليلات صفه
النجوم الفى دجى الليل ثابته تلقاها مواقفه
تبكى كترالريد والحنين تبكى حزنانه عواطفه
القمر فى السماء لوظهر تلقى كل النجم اختفى
ولى دريب التمرة الوقف تشوف هناك سوسن واقفه
واقفه منتظرة لقا الحبيب والعيون يزرف سرسفه
وتلقى كل الطيرفى الجريد ليها بى الحانو زفه
والمحب يوم يلقى الحبيب فى ظلال من ريد وارفه
ينسى ماحوله من النجوم ومن سماها الريد ينسفه
النجوم من دون البنات ياعمر قاسى اوصفه
والنجوم والليل فى الغرام للحبيب تبقى مرادفه
ويبكى دايما فى كل ليل النجوم قصدى اكاشفه
والنجوم دائما يساله لوبقت سوسن تعرفه
والضفاف من دون البنات الجمال قاسى يصادفه
ماالضفاف زينته فى البنات لما تبراها تلاطفه
والضفادع لوما البنات لى منو الالحان تعزفه
مافى زول يسعد دون حنان حقيقة لى نفسك اعرفه
ياعمر قولى فى هواك كل بنات الريد والفه
والنجوم برضى بقوله ليك من حياتك ضمه احذفه
وعيش مع ستات الجمال ناس فريدة وراجا ووقا
والاكيد قولى بقوله ليك دون حنانن ما ليك شفه

انتهى

هنا دخل من مدينة كوستى بالنيل الابيض الشاعرالكبير
احمد محمد صالح النضيف برسالة للشاعرين الكبيرين
خلف الله على كباشى وعمراحمد عمرلهيفان
الرسالة بعنوان : الحكم بيناتكم صعب
والى نص الرساله

استاذ خلف ليك مليون سلام من مقطرومن معلب
وبى لهيفان برضو مليون وبى ثقتكم الف مرحب
انتو ناس وارثين الادب ومن منابعكم بنشرب
واختلاف وجهات النظر لى قضية الود ماخرب
والزول يعجبو التحت ايدو صح والصاروفى طرفه انشاءالله حب
حواء ضلعت ابونا ادم غشه ابليس اده ...مقلب
ولو قبيل ماضاق الثمار كنا هسع ناكل...عنب
وبرضو صاح امراة العزيزقدت قميص يوسف من عقب
وسيدنا يوسف دخل السجون وهو كان فى اعرق نسب
ولولا امه كمان ياعمرابوه ماكان ليه انجب
والغزل فى القيد الحسان وخاصة لو غزلا مهذب
بيه سلك الطنبور يرن والنجم فى سماه يطرب
والحمام يزداد فى الهديل والقمارى تسوى العجب
والضفادع الساكنة الجروف تنطرب وفى الحجرة تلعب
والحنة والصندل والعطورشن نسويبن يا اب شنب
والمسافر وعنده البنات مابوكل زولا اعزب
ومن جمال ليلى وعفته ابن الملوح بيها انجزب
وعنترة الصنديد الخشن كين يقابل عبلة ينكب
وبرضو ياخلف الله النجم المكارم ليه تنسب
والسفر يحتاج لى رحل وراحله فوقه تشيل القرب
والنجوم ليك ياها الدليل انشاءالله حتى النجم ام ضنب
وشوف بنات نعش الحليوات فيهن بنات اشعارنا تنضب
ديل مصابيح الدنيا صاح ترجم الشيطان باللهب
البتوه فى الوديان يطش يشلو شيل طب العصب
يكون مرق من موت محقق بنجمة ومن موقف كان صعب
كم شباب لوكان ما النجم ياهلك ياراسو شيب
ولولاالقمربرضو كمان بقول مابتعرف ابريل من رجب
وفى الختام ليك راى الصريح انتو كايسين ليكم سبب
انتو ناس فايقين ياخلف وفى دياركم مرق الرطب
ونحن فى كوستى مرطبين بقينا نتكل فوق شعب
وانتو ضرعا عتمان عديل والبشوفو يقول موجب
ولوالحكاية لقيته جدول كنت بدرى انا فيها تلب
الا جيت فوق القيف وقف لقيت مسورا فاض وتسب
فيه تمساح انا مابعوم ولافى بنطون ولافى مركب
وفى النهاية بقول ياصديق الحكم بيناتكم صعب
اما عن لاراشى السخيف اصلو كان راجل ابن كلب
ارتشى الخائن يوم داك وفعلا اتحيز للحلب
لولا تحيزوا كان السخيف تحيز هوالهلال فعلا كان غلب
تحية فى الاخرللخزين وهاشم الفى الفارغات كتب
لايقول لى كتب عن شنو فى ابوحمد ريح للخطب
وقالوا لى فى الخرطوم يحوم وقالوا جارى وراء المرتب
وقالوا لى داير يغترب ان شاءالله يبقى مضولوالطلب

انتهى

رساله من الشاعر عمر لهيفان
الى الشاعر احمدمحمدصالح النضيف بكوستى
اى رد عليه رسالته
بعنوان: لاتروح لاهاى لاجنيف

ليك سلام يا استاذ خلف وعبرك الاشواق للنضيف
انا بى صداقتكم بفتخر وبالرسايل زدت تشريف
انتو منبع صافى وزلال وانتو قمة وقدرا منيف
من معينكم نحن ننهل وينهل ابورنات والطريف
النضيف استاذنا الجليل فوق معلقتك داير اقيف
نحن جدول صافى رقراق لافى تمساح لافيه قيف
كل راى زول ليه احترام كان وضيع اوكان زول شريف
وانت حكمك بينا مقبول موحكم لاراشى السخيف
يا النضيف داير اقول كلام وداير اقولك فى اسلوب ظريف
نحن لو كايسين السبب انت حايم فوق الرصيف
والدليل داير تتلب فى جديولا ناشف وضعيف
الا قلت لقيت التساب وما اقتحمت عبابوالمخيف
انا ما بخالفكم فى البنات وفى السبيب الهدل الكتيف
الا اسمع بس داير اقول وين فى بت تستقبل الضيف
عندك امسك بنوت شعيب ليها جابوالقوى والعفيف
وبتك الربيته فى البيت يوم تفوت كسحابة فى صيف
ماسمع قصة قيس تميم البنات زادنه...كتيف
والمهلهل والذل غشة وما استفاد من الكم وكيف
وابن فاتك خايف العار انتحر بى طعنة من سيف
وبى سبب منو فارق رحل جدك ابراهيم الحنيف
وما عليهن يبكى يعقوب وبى سبب يوسف صار كفيف
والقبايل ماانتمت للبنات همدان او...ثقيف
وداير اقول لولاها النجوم عجلة الكون كانت تقيف
وما بنعرف عددالسنين وما بنشوف لاشتاء لاخريف
والضفادع لو مافى ليل مابتعرف لحنا...لطيف
وبرضو اقول لومافيش نجوم مافى ليل فيه تشوفوطيف
والرطب ما كان استوى وللشجر مابنسمع...حفيف
وشوف عطارد والمشترى وليهن الزهرة كمان بضيف
وانظر المريخ وشوف زحل زينه للكون وزاده تثقيف
وفى الافق انظرللهلال بادى كالعرجون النحيف
ولو اعدد ليك فى النجوم عندى من ميزاته ارشيف
والحكم بيناتنا ان صعب لاتروح لاهاى لاجنيف
وان بقيت عديتنا فايقين من نخيلنا بنفتل الليف
وفى الاخير الاف السلام للفتيح ابو دما خفيف

انتهى

رسالة من خلف الله كباشى
الى الشاعرعمر لهيفان
بعنوان: فى دى ماك صادق وماك امين

يالبيب الضامر الكحيل جات رسالتك حاملة ياسمين
من حروفه تفوح العطور وبين سطوره اصبحنا تايهين
فيها اشعرتنا بالقديم وبى قوافى المنظوم رصين
وفى النجوم عددت اصناف وبى محاسنه اصبح سجين
وفى الرجال احصيت الكثيرللبنات صاروا مضيعين
ما البشر اصلا يا لبيب فى امور يبقو مسيرين
ابونا ساب هاجر والذبيح شان تكون زمزم لينا عين
تسقى للعربان والحجيج وتبقى للزوار المعين
وكونو ما تكرم بت ضيوف فى دى ماك صادق وماك امين
البنات بتخوض الحروب ورابحة هزمت هكس اللعين
ماشفت كيف حبوبة النضيف واقفه من خلف المجاهدين
خلدت فى كورتى تاريخ ظل خالد عبر السنين
ولو رجع تابعت البنات تلقى قول ذات النطاقين
وابنة الخياط بذكره وكم مواقف بالملايين
ولما تكبر وتعجز خلاص وتبقى للمشايات رهين
الولاد دورهم يقتصر ودابو دور البنوت يحين
يغمرنك هن بالحنان والولاد فى الغربة طاشين
والنجوم تختفى من سماك لما يسود ابيض العين
والعلم اثبت ياعمر النجوم عدمانه اكسجين
ما بتناسب لى زول يعيش خاصة ناس سوسن ونسرين
والنجوم الله مسخرة لينا لو طالعت يس
والاله شان نحيا اوجدة فى مدارات تجرى لى حين
ولينا بدل الزهرة زهرات ناضرة فى ايلول وتشرين
والهلال اسمه من الهلال الفيه كابتن ودالحسين
وناس المهلهل وابن فاتك للنجوم كانوا مساهرين
والسبب كلو من البنات وبرضو بالريده متيمين
وفى الختام اهدى سلامى ليك وللجرف والفيه ساكنين
والسلام عبرك للبيب الشمال جبل اوس المتين
والسلام من هنا تهدى ليك حفصة يملاها الجراكين

انتهى

رسالة من الشاعر /عمر لهيفان
الى الاستاذ/خلف الله كباشى
بعنوان: فى دى ماتقولى كضاب

يا خلف اشواقى الكتار ليك بضمنة داخل خطاب
وشوقى لى شوفتك والمهم وقالوا نص الشوف الجواب
ياخلف روضت الحروف وجيت تشكر فى ناس رحاب
ما البنات راكوبة خريف ما بتمنع من السحاب
البنات من قدم العهود كيدهن معروف فى الكتاب
انزلوا الوحى ودونو لى نبينا العالى الجناب
وهو اعظم كيد فى الوجود وفى دى ماتقول لى كضاب
وقالوا معروف عاشق البنات فى النهاية بيجنى السراب
من زمن هابيل وقابيل وحكمة لليوم جابه الغراب
ماعرف قابيل شن يسو وجنبو وارى اخوه التراب
والسبب كلو من البنات وغيره هابيل ما لى اسباب
واوحى ربك امرو لى لوط سير باهلك وسيب العقاب
وكين مراة لوط اتلفتت بى تلفته جاها العذاب
وعندك ام عمرو بن كلثوم وهند كانت ست المصاب
اججت نيران الحروب وراحوا فيها الشيب والشباب
ام جميل حمالة الحطب وجيده مربوط فيه العقاب
وفى جهنم تحشر ضحى ولابسة من قطرانه جلباب
يا خلف زوجات الرسول فيهن القرآن جاء منساب
وسورة التحريم انزلت وفى دواخله تحمل عتاب
وفى البنات النابغات قلال فى اصابع اليد بالحساب
لاتقول امات البشر وفى الانابيب يوجد انجاب
أثبتت فى العلم الحديث وجربت فى مدينة الضباب
والبنات همهن الوحيد الكحل ومنكير والخضاب
وكلهن عورة بلا نقاش وللرجال ما فرضوا الحجاب
ولاتقول حبوبة النضيف ليك ينحاز وفى امرو يرتاب
ياخلف قوم صيد النجوم والنجوم سويها احباب
أقرأ فيها أسجاع العرب للنجوم كم سجعت أعراب
وبرضو فى القرآن أنزلت ترجم الشيطان بالشهاب
النجوم تهديك الطريق كين تكون فى حالة ضهاب
وكل ليل فى سماها تلمع وما بتسجل منك غياب
يا خلف يكفيك قوس قزح يعترض فى الوانه جذاب
منو سوسن لابسة فستان وبرضو ناس نسرين وناس رباب
وياخلف لولاها النجوم ما اتعرف شعبان ولا آب
ولينا فيها منافع كتار وحولها الكون لافى دولاب
وبرضو فيها ارسطو طاليس فى الكتب افردلها ابواب
وبعدو هرمس فيها احتار وياما بعدو احتارت الباب
ولى قيام الساعة العقول فيها يعجز كشف النقاب
ياخلف خليها القشور وابقى متمسك باللباب
فى النهاية سلامى الكتير يبدا من النوبة للساب
اما حفصة سلامى مليون ليها مرصوص برة ورتاب

انتهى

رسالة من الاستاذ/خلف الله كباشى
الى الشاعر /عمر لهيفان
بعنوان : فى النهاية بتلقى مقلب

السلام من هنا بهدى ليك نصه صندل ونصه محلب
والتحايا الحلوات تجيك فى الجرف فى داخل علب
ولينا وصل شوقا كتير وشوقنا ليكم ضمة تسب
ولس شايفك هاوى النجوم وفى النجوم صنفت وكتب
صدقت رأى العلم الحديث الفى الانابيب قالوا أنجب
قولى ود منو دا الانجبوا كان عديل أو زولا كعب
مافى انجاب دون بويضات منها الحيوان اقترب
وكن الزايجوت فى القرار فى حماية الخالق الرب
ياعمر وين متل البنات وخاصة فى ساعات الطرب
وفى نجم يديك الحنان ويسعدك فى ساعة الغضب
وفى نجوم بى تبراك ضحى وكل حنانه عليك ينصب
من طلوع الشمس الصباح النجم تلقاه انسحب
وما بفضل ليك فى سماك غير شعاع اصفر مذهب
ولو اصريت على النجوم فى النهاية بتلقى مقلب
والبنات بى طول الزمن ديل معينن مابينضب
واصلو لوكان ماها البنات لى منو الناس تجرى تتعب
داك روح جاب الهدوم وداك اتقدم راح خطب
هل سمع زول يخطب نجم وفى منامك بيه هضرب
قيسه من نفسك يازعيم لما فى السالمية قنب
وقبلها ان كت ساكن الحراز ورحت كايس عيشا أنسب
وفى النهاية رحل جرف توم شان تجيب فى الشيلة الدهب
وشان تجيب بروى للبنات وتبقى فيها الدارة تلب
وأبوعلوبة هناك تلقى هاج وبالعمم فى نصه اتكرب
وانت ناسى الناس حواليك والشبابيل سوت اللب
وانت لابتشعر ولابتحس والبنات بلالن صخب
اما كونو تقول لى عايبات ليهن المقدور انكتب
وبرضو فى القرلآن آى نزل بى براءة ست القلب
وانت بس يكفيك الامير خت للخنساء أعلى الرتب
دار يفضله فوق الرجال وبى مواقفه عقله انشطب
وشوف نزار شن قال فى بلقيس لما فوت عقله جقلب
وما حصل شكر لى نجم وماحصل لى نجم أوهب
أما عن علماء الفلك ماكتير من حدث وكضب
وكل واحد قال يخترع وقصدو اسمه يكون انكتب
وكل عظيم قالوا وراء امرأة بى حنانه يكون مجلبب
القشور فى نظرى النجوم والبنات الغيث والرطب
ماشفت يوم واقف بالقصاد ولمانظرك ليه نقب
مابراك رحت وجيتنى صاد والقلب بالالم انحصب
دون حنانن مافيش علاج ولى حنانن يوهب الرب
ابقى صادق وسيب النجوم والبنات سويها الطلب
شن يجيب البحرق الناس مع الترمى لماه الدهب
فى النهاية سلامى الكتير فى الجرف يصلك معلب

انتهى

رسالة من الاستاذ/خلف الله كباشى
الى الشاعر/عمر لهيفان
بعنوان: بالتجارب عندى تأكيد

شيخ عمر جوابك وصل وكل جواب للشوق يزيد
ذكرنا بالايام الحلى لما كانت أيامنا عيد
ناس شليل ولبدوت ولى دليق وبرضو شريك الجبابيد
يالبيب هيج عواطفى وفى الحليوات عبيتنى ريد
ياعمر داك منبع الحن وداك عاد مامورد القيد
حبهن من داك الزمن يجرى مجرى الدم فى الوريد
حبهن فطره من الازل والدليل آدم ابوالعبيد
حب حواء المن ضلعو جات طاع كلامه وأكل القريد
وجابنا نازلين لى أقسى كون للحساب والنار والوعيد
كان قبيل حباها النجوم ياعمر كان تلقى تأييد
ونحن فوق ريدن ياعمر ومن طريقن قط مابنحيد
هن حنانن فوق كل شى كيف نسيبن ونمشى البعيد
ما النجوم تحرق يا لبيب وبالتجارب عندى تأكيد
ما النجوم غازات تلتهب ساخنة دايما خاتى تبريد
ولو تفكر يوم بس تزور وتبقى راكب أبلو الجديد
وشيل معاك باقات أكسجين المقفل داخل حديد
ما أظن بالك يستريح وبى زيارته تصبح سعيد
انعدام الوزن يأتيك وتكون على نفسك ماك سيد
يلفحك بالهايدروجين وللخلاص عدمان أجاويد
عاد تعال قارن حالى بيك يوم يكون ضالينا الجريد
وجنبى سوسن فاردى لليل والخدود لبست تجاعيد
منظرا يعجب للبلوم ولينا يهديها التغاريد
وأبوعلوبة الرجل الهمام تلقى جاثى هناك فى المسيد
ضفرن التقروق ناس رحاب والسبحة جات فى منظوم فريد
وجابن الابريق للصلاة لى عبادة الحى المجيد
بيقضى ليلته ملانة أذكار بالتسابيح والتهاجيد
وانت صنقر تابع زحل والمجرة أم نجما عديد
البنات عاشقه عانقه وانت ما بتتمدالك ايد
وحتى لوحاولت تمتد بى تسوونا فى جيبو قيد
تعتبر هلوس غير كلام ومستحيل لى نجمك تصيد
النجم نحن نشوفو بس يوم تفارق عينا الغميد
يوم تفارق سوسن الدار ونبقى من الريد مطاريد
البنات يا أستاذ عمر جسدت لى حياتنا تجسيد
وغيره تبقى حياتنا أوهام وضم مابحلولنا النشيد
البنات عشاقن كتاروياما عشاق تاهو فى البيد
وياما ناس طوعوا للحروف منهم بذكرلك لبيد
حتى لى حسان شكرن وفى النجوم انت بقيد وحيد
لاتكون فى همك براك العقد أبرمو من جديد
وعيش مع ستات المثل فى كنانة وارض الجنيد
من نجوم فى بنك الغرام وما أظن يأتيك توريد
والعلاقة البيك والنجوم ياعمر تحتاج لتجميد
والبنات خليها التجود وما تكاجر وتصبح عنيد
ومن نجومك تحصد الروس ونحن لينا الريد هو الحصيد

انتهى

رسالة من الشاعر/عمر لهيفان
الى الاستاذ/خلف الله كباشى
بعنوان : ماداير تتعظ

ليك سلام أستاذنا الجليل عم مساءا وانعم صباح
عيد سعيد ان شاء الله يغشاك وصحة دايمة وقوة ونصاح
ياخلف فى القيد الحسان ديمة تكتب وديمة سواح
الحروف كيف روضتها وجبت در فى القيد الملاح
أما بينك وبين النجوم هوة واسعة وشاسع براح
فى البنات عددت وحسب وفيها كدت تفوق المتاح
كيف تشكر لى فى البنات وفى الحروب قت حملن سلاح
أما من خلف المجاهدين حسهن مرفوع بالنواح
وما بكونن ديمه قدام يلقو ضرب البيض الصفاح
وفى الطباقة والتقاريق فى دى بس صادقن النجاح
وبرضى صدقتك ياخلف فى الضفيرى وفرك الملاح
فى دى صادق أستاذ خلف وفيها يمكن قولك مباح
وكيف تصد لى آدم تقول حب حواء ذات السماح
وطاع كلامه وأكل القريد وجابنا لى كون حرولفاح
ولو قبيل ما سمع الكلام كنا ما عانينا السناح
وانت ما داير تتعظ وفوق درب آدم ماشى صاح
والمجرب ديما يكون مهما كان مطلوق الصراح
واعى يستلهم للعبر فى غدوه أو عند الرواح
بى جريمة آدم تفتخر ودارتطبقه فى حب نجاح
ولو مشيت فوق درب البنات كل حياتك تبقى أتراح
الهموم بتسد كل فج من حياتك كان نورو لاح
وما سعد قط عاشق البنات وغير هموم مابجنى أرباح
أما الأنجم يا لبيب ضاوى لى دنيانا مصباح
وللبنات اشتقوا الاسم من ثريا زهرة ياصاح
وديك نجوم كونت العصا وديل نجوم فى شكل تمساح
وشوف سهيل زى قلب المحب زايد الخفقان ولماح
أما ابوريا رعى الغنم وفى كنانتو بيحمل رماح
حارس أغنامو من الوحوش والضوارى الليها تجتاح
من بعيد شوف بنوت نعش تبكى جارى الدمح سحاح
مات أبوها الكان حبتو وسبب الأحزان والجراح
أما كونى أعبيك ريد فى البنيات أمات طراح
لما أذكرلك زمان وغير تحب دنيانا أفراح
فى دى ماك صادق ياخلف انت قلبك أصلو ملحاح
انت عبيت قلبك براك وديمة بارودو يسوى تاح
أما أنا ان هلوس بالنجوم فى غرامن ما على جناح
قبلى قيس هلوس بالنجوم وحبو كان أسطورة ومزاح
والا بى حب ليلى هلوس وعقلو فر وطار منو راح
وغيرو آلاف فيهن القيد اندرع ولاقوهو القماح
وبى غرامن انت مفتون وناس تهانى حصانه جماح
أغرتك سوسن بالعيون وبيها قلبك زاد انشراح
ودايرتقول لى عبيتنى ريد وترمى فوقى اللوم وترتاح
العلاقة البيك والبنات قفله وسويله مفتاح
والبنات بى ريدن بقول من زمان ما عمر المراح
فى النهاية سلامى مليون وريحو عنبر وطعمه تفاح

انتهى

تشكر ابومصطفى على اضافة هذه المعلومات
والتى تعطى اضافة بالتعرف على هذا الشاعر الفذ رحمه الله
والذى ادهشنا جميعا بكلماته الرصينة بثقافتها العالية
شكرا على المرور

حياك الله أخى عباس .... مشكور على التوثيق لشعراء بلادى ... مجادعات شعرية فى قمة الروعة _

لك تحياتى وودى ،،،

رسالة من الشاعر/عمر لهيفان
الى الاستاذ/خلف الله كباشى
بعنوان : البنات مافيهن نفع

ياخلف ليك مليون سلام من مقرطس ومن مشمع
ليك والأشواق برسلة من فؤادى وداخل الضلع
ديمة تلقاك انت فى خير منبسط هانى وممتع
ياخلف تكتب فى البنات وقلبك الولهان ما اقتنع
يازميل تذكر زمان كين قبيل ان كنا شفع
فى ليالى النوبه الحنان والقمر بى نورو يسطع
كنا مرات نلعب دليق وبرضو أحيان نلعب شلع
تارة شدت وتارة لبدوت ومرة جربان فينا البقع
فى براءة أطفال غير حدود وبالجبابيد نمشى الترع
لينا سمار كانت نجوم فى ظلامنا الداجى تتطلع
وما عرفنا نغنى البنات وما عرفنا الريده لسع
والبنات كانت ذكريات بيها عند الشعراء نسمع
شبهوها وقالوا غزلان وياهو حيوان يرعى المشع
والمشع اسبابو أنواء بيها تلقى المطر انهمع
والنجوم تلعب دور كبير فيها شولة وطرفة تدمع
وربنا المختارالقدير للنجوم السموات رفع
والخليل بالنجم استدل ولى الاله الخالع ركع
وما استدل ابدا بالبنات ومن عبادة اللات امتنع
يا لبيب لولاها النجوم تبقى كل أيامك جمع
أما الانجاب يافطن التلاقح بقى مصطنع
يلتقى الحيوان بالبويض والقرار أنبوب مخترع
ينسبوا أطفال للأنابيب وتمشى تتباع زى السلع
والاله ان قال كن يكون فى قرار لوكان من قرع
عيسى قول لى ولدوه كيف والله فى زول لأمه جامع
وآدم أصلا كان فى زايجوت والله من الطين انصمع
وناقة ولدت من الحجر وهل سمع بى حجرا وضع
أبوعلوبة الرجل الهمام عافو للغاشنو مشرع
صاحب المسجد والمسيد بالعمم فى نصو انقطع
ولو بعد من درب البنات هس كان ولى نورو يشلع
والبجيب الشيله والهدوم لى زملاء وزع
وكلم الأخوان كلهم وجاب كروت الدعوة وطبع
كم خسر دم قلبو مسكين وللمهر بالمليون دفع
وجابو ودبروى غنى قال الجدى الدابو يرضع
ونطط الكورس وصال وجال وبرضو ضارب الطبله أبدع
وكل مخمور فى الدارة صال ولى هدوم الحاجى قلع
وفى الرقيص جات سوسن تعوم والعريس حس سوطو ولع
والحمام بعد القعده طار وفضل السمبر والبجع
والعريس سيف عشرو انكسر ودابو شاف راس مالو ضيع
وكتين يتم دورين ياخلف يلقى فيه البلا واندرع
حولو بى زول وقيل زولين يشقى يأكل فى مجتمع
والبخيتى تدق النقى يابخيت جيب وتبقى تبلع
مرة يحلم صاحى النهار وفجأة من أحلاموانخلع
يارحاب وين حق الدقيق مى تفتشتو انت آجدع
وزولنا فى قطر الهم ركب والقطر صفربو واسرع
ودابو شلق شاف النجوم نص نهارا ضو شعشع
والمصاريف كل يوم تزيد والمشاكل تمشى تتبع
وقام يشوف تذكرة السفر اما ضنقل واما صنقع
ياخلف لاتبره البنات البنات ما فيهن نفع
فى غناهن دايما تقول وما جنيت غير شيب اوصلع
يالبيب خليها البنات ومن دريبن توب وأرجع
شن يلم قداد الجيوب مع البضوى سماه يلمع
فى النهاية سلامى مليون من معينا صافى ينبع

انتهى

التحية لك استاذ عثمان النفر وانت القامة التى
تدور فى فلك هؤلاء الشعراء الافذاذ
تشكر على المرور

دي الشعر الاصلي المووتق
الدفاق كي جريان النيل
صح لسانه
كما قالت العرب

شكرا ابوسفيان على المرور
عل ذلك يخفف عليكم فى غربتكم
فلك التحية

رسالة من الشاعر /عمر لهيفان
الى الشاعر/احمد محمدصالح النضيف بكوستى
بعنوان : فعلا حواء أمى

أيوة فعلا حواء أمى ومافى زول معصوم من خطأ
نحن نتحمل للصعاب والسبب من حواء غلطة
غلطته التاريخ يذكره وفى صحافة البيضة نقطة
خيروها فى احلى الثمار تمشى تأكل ليها حنطة
أظهرت سوآتنا لليوم ومن فراديس جاتنا هابطة
القيام مفروض والصيام والبطون بالجوع نربطة
وفى جلوس وسجود للممات منو أرجلنا مظلله
وجينا لى كون فيه الشقا وفيه عيشتنا مبسطة
وفى المعايش مهما نكد بى صواميله مقرطة
ونارنا لابد واردنها والزبانية البيها حايطة
والصراط البيه العبور وكونو نحشر ذاته ورطة
وكنا فى غنى من كل ده وجاتنا بس من ثقة مفرطة
فى الفراديس كنا عايشين وفيها نأكل أحلى باسطة
ولحم طير مما نشتهى كان ندور وزين أو قطة
والكواعب فيها اتراب من مسرحة ومن ممشطة
بيها حواء الجاك موشوى وبى قدر غلطاته نعطى
حواء جابتنا لى أصلنا ولى ترابنا الليها نوطة
وبى دى ماك داير تقتنع والأمور مادارتضبطه
السلام جاييك يا النضيف يبدأ من كوستى المحطة
ويشمل الجنبك والبعيد من فؤادى الماله قبطة
الدرر كين جات منكم بالفرح ماخدلى نطة
ذاتى لى شوفتكم اشتق يعلم الكاشف المغطى
داير أقوم لى كوستى أهاجر ودايرأرسم لى خطة
والاله يجمع للأرض أصلو داحيها وباسطة
الفتح نظم للدرر وفى النظم يا أرقى وسطة
ليه شوقا ماليه حد ريحو عنبر وطعمو قشطة
ولى قريب الله السلام فى محل ما راح وحطه
يا النضيف أستاذى الجليل جدولى التالاك موطة
وذاتى أقول ماعندى جدول بس نجوم فى سماها خرطة
زينه سواها الله للكون وفى الجمال فيها أحلى لقطه
تهدى للتايهين حيارى وللبيسرع وللبيبطه
والسلام من استاذ خلف الماحصل ينبوعه قطه

انتهى

والله ياعباس طبعا سخص شويعر صغير
نرضو اقول الشعر عشان كدا انا مبسوط جدا
زمان قبل فتر ه واحد لاسل شريط في شعر زي دا جاء
شافي وشمعه اتبسط منو وشاله حتي اليوم ماجابوا الكلام ليه
10سنوات وانا افتش فيه
عشان كدا انت فشيتي فلك مني الاف التحايا
واشكر كتير يازوق

رساله من الشاعر /احمد محمد صالح النضيف
الى الشاعر/عمر لهيفان
بعنوان : المابتلحقو جدعو
الضحية الليها ننحر والكبش معروف بالمجر

يا لبيب أمشى وتبختر*** حواء أمك لوتطير فر
جزء منك الا أقصر*** مخلوقه من ضلعة ابوالبشر
البنات غاليات المهر*** من تمامة الدين للمهر
فى حشاها تشيل كم شهر*** وتحضنك فى زمن الصغر
ليك تكوس النوم وتسهر*** لما تكبر ليها تنهر
*****
النجوم صاح بيها السفر*** خاصة لو فى البر او فى البحر
كم هدت لى ماشى ودر*** وبرضو مابتعصم من قدر
*****
السلام جاييك ياعمر ***يغشى لى خلف الله بالمر
انتو ياكم أهل المقر*** وليكم انتو القافية تنجر
منكم وصلتنا الدرر*** ومن قصيدكم نحن نبغر
حاشا ماهو رتيب مكرر*** ماشى منساب ماهو أشتر
*****
السلام لى كل البشر*** للمسير وما مخير
للنخيل والطير والشجر***للدباس الفوقو زمر
السلام لى مد البصر***والرمى الجبادى بصر
للرماله المدرى بحر*** وللكسح والجاى منجر
وللنجيل العرقو كمتر*** وللسعيدى نداها قطر
للبعد طلعتها ما شخر*** وللمارقد للعينى أخر
للصمد فى الشدة وصبر*** للحمد لى الله وشكر
للمسك طوريتو دنقر***وللرمى التيراب فى الحفر
صبارتو جات بى شايا أحمر***وجاتو فكت ريقو وفطر
وللقلع اشميقو مسر *** وللكسر لحمارتو مدور
وللبشوف لى غيرو يبغر***وللبيخدم مو مؤجر
السلام لى ستات الشعر***وللنجوم الحول القمر
يبدأ من ذوالقعدة وصفر***ويشمل الهجرى شهر شهر
السلام لى ليالى السمر***وللقدح وسلكو الموتر
السلام بالطيب معطر***وللضريرى أم حقا أصفر
يبقى جرتق وبرشا أحمر***وفركة فوقه عريس مبطر
زغردولو وهز بشر*** يا الحسود الله أكبر
داره فيها غزالا أشقر*** جبينة يطرح وتانى ينصر
عيونها فيها سهما خطر*** عطرو فاح الجو تعطر
السلام الخالى ونشر*** للكبد والشرو والكشر
فى الصحاف البيضة ينشر*** فوق شمالنا الغالى ينشر
للفى الصفيح يا دوب مدور*** وللدفيفيق دابو أخضر
السوالى أم راس والطير نقر*** وللعمل لى نصه كدر
وللنجيض الحالى سكر*** الحولو نزلنا المعسكر
السلام من كوستى انهمر*** جاى نازل زى المطر
جاى بالبصات والقطر*** وجسر جوى يصل دار قمر
فى الختام أسمع ياعمر*** أنا ما بخاف جدولك الضكر
والدميرى أم بحرا عكر*** حتى لو كان دودو قرقر
ونحن ناس فى الحق بنظهر*** والعينو واحدى نقولو أعور
والحديث يحتاج لمحور*** فى النجوم وستات الحور
النضيف فى نهايتو اعتذر*** والفتح يهديكم درر
السؤال اللينا حير***الخزين لايبقى ودر
والما ملون بيدور ظهر*** ومالو صاحب الكير ماظهر

انتهى

رساله من الشاعر /قريب الله احمد فرج بربك
الى الشاعر/عمر لهيفان
بعنوان : ومض النجوم

ومض النجوم والليل وأطياف الخيال
سحر الكواكب السابحة فى بحر الجمال
خلونى زيك ياعمر سالك دروب عشقا طوال
والأرنب الجوة القمر شايفنا مما كان جهال
وهج النجيمات الرزين احساسى ياخى عليها مال
ورقصت حروف كل الشعرشربت ضياها من الهلال
ونور الهلال هزم الظلام فارسا فحل بى سيفو جال
ولو تم دور واستدار صافى اللجين فى الرملة سال
ولو كنت شاعر أوأديب اسمك نجم وللناس مثال
وفى الواقعة أقسم بيها الله قسم عظيم وأصدق مقال
وأنا قلبى هام بين النجوم وماخل للبنوت مجال
وشوف كم حبيب قلبو اتحرق وكم ساقوناسا للضلال
وكم من قلوب كانت خصيبة بقت هشيم ونعيمه زال
راجع تواريخ الهوى كيف جن قيس وما نال منال
ورميو مات من الغرام أما المحلق حالو حال
ديل اشتكو الهم للنجوم ولقو عندها الرد للسؤال
ريد البنات خيط عنكبوت واهى ودوامو من المحال
همس النسيم لمن لقاك محتار تعال يا خلف تعال
قوم ياخلف شوف النجوم تمسح هموم زى الجبال
وفى صفحة النيل بالمساء وضاحة سرت الف بال
سيب يا خلف ريد البنات وأخلق مع النجمات وصال
وسلامى ليك أستاذ عمر ينبوع حروفك كان زلال
عمى النضيف فارس الشعر تاج فوق رؤوسنا بلاجدال
اما الفتح صاحبى السمح هادى الطبع سمح الخصال
ياهم نسيمات الادب الهابة من ارض الشمال
خلونا نسكر وننتشى وسكر الشعر سكرا حلال

انتهى

رسالة من الشاعر/ عمر لهيفان
الى الشاعر/قريب الله احمد فرج بربك
بعنوان : وهج الحروف

وهج الحروف الجات تشع منظومة فى سطور الورق
وكل الكلام القلتو يافرح القلوب من جوفى لسع مامرق
خليتنى ألملم فى الخيال وجبينى يتصبب عرق
ما قدرت أرد ماقدرت أقول زى التقول عقلى انسرق
ياودفرج درك وصل نشل البشابى من الغرق
يحمل هموم نجما أفل لما النهار بالضو شرق
ليك السلام مليون سلام من النسيم الطف وأرق
والليلة بشراك يا نجوم فى كوستى لاقالك درق
يا ودفرج ليك التحايا الحارة بى طيبة العبق
مرسولة من ارض الشمال وسعف النخيل منسوج طبق
من الحويضات الروت بى موية النيل الزلال وكسر اللبق
منداحة تبحث عن قريب الله فى كوستى وربق
فى ظلمة الليل البهيم تصطاد نجوم يا خوى مابتعرف قلق
ديل غربن ديل شرقن حتى الصباح كين نورو لاح وفجرو انفلق
أما النضيف أستاذ جليل ليه احترام القبلو بالشعر انطلق
وفى ظنى بينو والنجوم التار قديم وينحاز على اللابسات حلق
أما فتح يهوى الجمال كل الجمال هاوى الطبع قلبو اتحرق
قال غنى للنجمات زمان وما زال يغنى ان لاح ضياهن أوبرق
أما البنات فيهن يقول أصل الحياة وغير البنات صابو الارق
وكونو يحب بنوت نعش بنوت فكر بنوت دهر بنوت مجسدة مافرق
أستاذ خلف ما أنفك من قيد البنات مهما نتق
وأصبح متيم فى الغرام والقيد خصل فيهن لتق
غرقان يشابى يدور نجوم تهديه حن لكنو من قيد ما انعتق
وصحن الوتر فى ايدو متوالية بالضرب انفتق
امن أنا مازلت فى غزل النجوم وأنا برضى شايف لى حق
أهوى النجوم أهوى القمر وراجيه يظهر من جديد بعد المحق
وكل القبيل عشقو البنات يكفينى قيس وعزاه عمرو الانمحق
يادفرج ليك السلام مليون سلام وكل السلام المستحق

انتهى

رسالة من الشاعر/فتحى حسن عمربربك
الى الشاعر/عمر لهيفان
بعنوان : النضيف ما فصل الخلاف

السلام والشوق الكتير ليك برسلو عبر الاثير
ياعمر ليك مليون سلام ولى خلف أستاذنا الكبير
نحمد الله الجعل القلم ريح الناس من مشاوير
جاب تحف تحكى عن الجمال فى قوالب من قوارير
كل من طالعه ابتهج بى حلاوة أسلوبه النضير
كالنجوم تلمع فى السماء من نجوما فى المناصير
جات قصايدكم كالنسيم فايحة أرياحة تقول عبير
بى حروفكم أنا منتشى والنجوم عاشقه من صغير
فيها ياما قلت أشعار وفى هواها أنا لليوم أسير
ساعة أغازل فيها بالليل أبقى زى الطفل الغرير
تصطفى النفس وتنشرح من هموم يرتاح الضمير
والهلال منها لى تحت جلا مالك الكون القدير
البنات يا أستاذ عمر غيرن الحياة كيفن تسير
وأصلو عاد لوكان ما البنات مابنغنى مع الطنابير
كالنجوم فى الارض حلوات لما يندلن فى العصير
الملون فوقن سمح تلمحن زى العصافير
بى ادب لابسات الطرح كالزهور بينات الخدير
حشمتن فى الروح واللبس ما بتشوفن لو ماك قدير
فى النجوم ياخوى والبنات الكلام طعمو يكون عصير
يا أساتذة خلافكم جميل للأدب عطر كالغرير
باختلافكم ولد ابداع كالدهب ملفوف بالحرير
النضيف ما فصل الخلاف أصلو معروف انسان بصير
قمة فى الابداع والنظم فيها كوستى سراجا منير
السلام ليكم وللأهل والخزين ولى هاشم الكبير

انتهى

رساله من الشاعر/عمر لهيفان
الى الشاعر/ فتحى حسن عمر بربك

من أريج نسمات الشمال ومن نخيلو الشال مدندح
من قماريه التقوقى ومن بلومه الداجى صادح
من خرير نيلو البيجرى ومن مزارعوا الديمى كادح
من وتر سلكو وقديحو وكل غناى وكل مادح
الشمال بى كل جزايرو بالفيه غرقان أو مطفح
البكمتر فى النجايل وتلقى فى الشتلات يصفح
وكل اشواق الغلابا ليك برسله يا أستاذ فتح
درك المنظوم لى وصل ونورو لى آفاق يفتح
سابنى دايما بالى شارد وحتى كان نايم مفتح
لى دياركم صرت مشدود والمناصير فيها ما ارتح
وقدر ما غالبت للشوق ما قدر والله أفلح
الشوارد شاردة منى والاله للحال يصلح
هاجت أشواقى العنيفة وما قدر لى جماحة اكبح
والخيال داك الكان عريض زى خريم الميبر صبح
فى البنات كم بعت وشريت وغير غناى منها ما ربح
والنجوم فى كوستى طلت وبى لهاها أنا ساى أسبح
يافتح ليك مليون سلام من فؤاد بالشوق منشرح
للنضيف أستاذى الجليل ولى قريضو الببرة الجرح
ولى قريب الله الأديب ولى سلاسة اسلوبه المرح
الدرر وصلت منكم ولى قلوبنا الصادى تفرح
داير أقولك أستاذ فتح وقولى ليك والله صح صح
اليراع يهمس لى تعال وبالكلام ما قادر أفصح
النجوم فايدته يا لبيب للعرى البينا بتنصح
والتعارف كان بالنجوم وراح أزور ان عشت ونصح
النجوم ما زينه للكون ولى سماك دايما تسمح
النجوم جات فى توب جديد وللتعارف بينا تسبح
يا فتح آخر رسالتى خل بريدك ديمة طامح
وفى النهاية آلاف السلام من خلف وأسلوبه السمح

انتهى
ملحوظة :--كل هذة المساجلات اعلاه كانت فى التسعينات

بحمدالله وتوفيقه تم توثيق غزل النجوم
لعل المتصفح عضوا كان أو زائرا يجد من المتعة والدهشة مايؤكد له سمو ثقافتنا وادبنا وحضارتنا وتراثنا والذى لم يجد طريقا ممهدا فى وسائل الاعلام الذى يتحكم فيه الآخرون الذين يحيكون لنا الممانعة فى كل سانحة قابلة للظهور

واليكم ادناه نبذة عن الشاعران الكبيران صاحبا هذا الادب المتجذر فى قبيلة المناصير بالسودان

خلف الله على كباشى
مواليد المناصير(برتى)1955م
المراحل التعليمية:
برتى الاولية
ابوحمد المتوسطة
بورتسودان الثانوية
معلم بمرحلة الاساس

عمر احمد عمر لهيفان
مواليد المناصير(بونى) 1956م
المراحل التعليمية:
برتى الاولية
دنقلا المتوسطة
دنقلا الاهلية الثانوية
يمتهن الترزية

والشكر اجزله للاستاذ/اسماعيل مصطفى عوض السيد الذى جمع هذه الدرر واجتهد فى ترتيبها وتوثيقها بالكتاب
والحقوق محفوظة لصاحب التوثيق على الهواء الطلق اى الشبكة العنكبوتية
عباس محمد حسب الله عطاالمنان
شرى الاولية
شرى المتوسطة
عطبرة الثانوية
جامعة الخرطوم/مدرسة العلوم الادارية
معلم بمدارس شرى الثانوية بالمناصير سابقا
حاليا مراقب مالى بشركة سالكا للنقل/الخرطوم
مع المعذرة ان كانت هناك اخطاء املائية اوخلاف ذلك

تشكر أخي عباس -----وفيت وكفيت

والله ما عاوزين الحكاية تقيف كدي

شعراء أقل من هؤلاء وجعوا وشنا في التلفزيون

يا ليت شعراؤنا يصلوا الميديا

بهم نفتخر

أكرر شكري

مشكور إبننا الأستاذ عباس ما قصرت تب لجمعك مثل هذا الدر الدفين والكلام الرصين والأدب الرفيع والنظم البديع ، أين كان كل هذا فهو أجود من كثير مما يذاع وينشر . وما أحوجنا اليوم لمن ينبرى لمثل هذه الأعمال وغيرها من تراث المناصير بحثا وتنقيبا وجمعا وحفظا وتوثيقا ونشرا حتى لا تضيع كما ضاع من قبلها الكثير بسبب الإهمال والتفريط حيث لم يهتم بأدبنا وتراثنا من بنى جلدتنا أحد فى حين إهتم به غيرنا أكثر من إهتمامنا نحن . وغيرنا ينقبون ويوثقون وينشرون لأقل الأعمال شأنا ....

شكرا دكتور ودعون الله على المرور مرة اخرى
هذا ماعنيناه من اجل ظهور مكامن الثقافة لدينا للآخر
ولك تحياتى وودى

عمنا الباشمهندس صديق لك مليون سلام
وانت تمثل القاموس المعرفى الاجتماعى من اجل بلادى
وجدتك بيننا ومعنا احصيت مااحصيت ولكنى اقول لك ان ابن عمى
هاشم عباس فى المعاش وسلك التجارة بمدينة شندى واخيه السر مناضل بالمحلى بشرى
اما عن ماذكرت بابى محمد وعيسى هو لقب لمحمد وهذا للتصحيح وعن اعمامى لم تترك شى الا عدم
ذكرك للعم محمد صالح حسب الله والد الاستاذ العلم /المنصورى مدير التعليم بالدامر سابقا والان بالمعاش ويسكن المكابرات فلعلى ياصديق اوفيتك بماتريد وفاء بوفاء وكل ماذكرت من اولاد حسب الله فى رحمة المولى عز وجل طيب الله مسكنهم
ولك اسمى تحياتى وتقديرى

ابن قريتنا الفكى احمد لعل هذه الدرر وجدتموها وانتم
فى مهجركم ترياقا شافيا موثقا لثقافة مناصيرنا
تشكر على المرور يا باشمهندس

والله شديد شده ياعبس الله يحفظك ويزيدك علما حتى تكون مناره لى اهلك الغبش وكلم ا عقده عشان يتحفنا من علمه الرجل موسوعه علميه كبيره انا اعرفه

شكرا ودقطر على المرور
مروركم يسعدنا ويشد من ازرنا
تسلم يا ملك القوز

انحن لازم نشكرك ومثلك لازم يكرم الا الدنيا كعه والشهره فيها للمتاعيس لا يسوى شى وترفع لهم الاعلام الا الرجال الصامدين الشامخين كنخلنا مثلك الله يحفظهم ويزدهم علما

الاخ عباس
تقبل تحياتي ،،،،،،،،،،، والله جدا عمل رائع
نسأل الله ان يجعله في ميزان حسناتك بما وثقت لشعرائنا ..........
والتحية لك ولمجهوداتك ومساهمتلك

وتقبل مروري..........

شكرا الاخ صالح على المرور
ولقد علمت قريبا انك بدات فى مثل هذا العمل
ولم تجد المسانده فقد كفيناك ذلك ونحن من اجلكم نجتهد ونوثق
ولك تحياتى

قصيدة خارج اطار غزل النجوم
نكتبها هنا لارتباطها باحد الشعراء الافذاذ الذين شاركوا فى
كتاب غزل النجوم الا وهو الشاعر /احمد محمد صالح النضيف
بمدينة كوستى وقد نظم هذه القصيدة لجزيرة شرى الغراء

والى مطلع القصيدة

ياشرى كنت جاييكى
وجايى ابوس اياديكى
واجر النم واقول فيكى
مهما قلت من كلمات ما بتملك تواسيكى
ومهما قلت من احرف ما بتملك نواصيكى
يا الحرف البفك الريق ويا الجرف الملان ويكى
يا النخلات ويا الشتلات تربالك بيسقيكى
شينك شاع ملأ الأكوان راس مالى وغتا شيكى
راتك رحمة لى اهلك للفات والمقيم فيكى
ياتك فى خشم طفلة يمة وتبتسم ليكى
مشتاق قعدة فى ظلك واسمع صوت قماريكى
شينك شوقى زاد شوقى للخضرة وشواطيكى
راتك راية مرفوعة وانت المولى راعيكى
ياتك يا شذى وياسمين وكت عادل يغنيكى
بريدك يا شرى وشررى واسمع صوت سواقيكى

انتهت القصيدة
والشكر اجزله للانسان الخلوق/ عطا الفضيل سليمان سيداحمد/الصفيحة