نجم من منتدانا .. صديق ابو حنه .. في ضيافــتي

هنالك ضيف اخترته ان يكون الأول ولكنه اعتذر حاليا لمشغولياته الحالية مع وعد اكييد منه بالإستجابة لاحقا

1. ماذا يعنى لك منتدى المناصير بلدي

الحقيقة هذا سؤال مهم للغاية، منتدى المناصير بلدي هو متصفحي الاول في الشبكة الأثيرية، هنا أهلي ، بعد أن أغرقت دياري ،هنا أجد أبناء جلدتى، أصحاب الهم المشترك، ألاقي ناس يمكن إجازتي ما تكفي أصلهم أو أصل أي واحد في بيتو.. المنتدى ممكن تقولي حضرتك هو زي مجتمع المناصير بالضبط على الطبيعة، بالرغم من الناس المتعلمين فيه، والذين أضافوا كثيراً، لكن هو زي مجتمع المناصير.
بس الحسنة الوحيدة فيهو.. إنو الشكلة لما تقوم في مجتمع المناصير بيكون فيها ( فلق وضرب بالعكاكيز وكدا) وهنا ( الفلق بالكلمات الما منضبطة مرات) ها ها ها
يعني زي مجتمع المناصير، مع المحاولة طبعاً دائماً للتطوير نحو الاحسن.. يعني ممكن تقدري تقولي حضرتك، أني عايش آلام وافراح المجتمع المنصوري في المنتدى، ياهن ناسي وياهن أهلي البفرح بيهم. وافتكر بقدر أتحمل لدرجة كبيرة اي شئ، أنا تأقلمت علىالشعوب التانية كثيراً، عشان كدة التأقلم مع مجتمع المناصير سهل جداً بالنسبة لى. على كل حال المنتدى يشرفني جداً.

الاخت انتصار لك التحيه وانت تأتين بالجديد المبتكر دائما .
مداخلة لضيفك الاول بعد التحية والاحترام :الحنونى يخاف من التقدم فى العمر .تعليقك

2. وماذا تعنى لك المناصير نفسها

السؤال ده حضرتك.. بامانة في مناصير ممكن يضاربو فيهو لو سألتيهو ليهم! ليه! أنا افتكر المناصير هي ذاتي هي نفسي هي كينونتى.. هي داري الواسعة الكبيرة البعتزا بيها.. يعني موش دعوة للقبلية ولا للعصبية. لا لا هذه بغيضة يا استاذة.. ودينا حثانا على تركها. لكن أنا حينما أتحدث عن المناصير، أتحدث عن نوعية الناس المعينة البي تسكن في الرقعة دي من بلادي.. هذه الرقعة منحتهم الذكاء والزكاء.. والكرم والشهامة. والإقدام وتثوير الواقع.. شوفي سبحان الله. يعني كان ما إنت إتشديت في الحياة ما بتفكر، عقلك ما بيتحرك عشان يبرز خطط.. ولدنا لقينا نفسنا في أراضي ضيقة نسبياً.. ومصادر الرزق معدودة.. لكن ده ما خلانا نكره بلدنا أو نفارقا. برعنا في بناء الجالوص.. والشغل خارجها من المهن المختلفة ونجيب ونعود لها بفرحة وبمحبة. ثورنا واقعنا. حتى بعض الجبال الناس ساقوها وزرعوها شتل وبرسيم.. أراضي الجروف المنحدرة الناس قدروا يطوعوها في شكل حيضان صغيرة ويرووها بالوابورات الزراعية. النخيل كان أمان من الفقر.. يعني عشنا فيها وطورناها.. ربنا لما وضعنا في هذه الرقعة الجغرافية موش ساكت. عايز يشوفنا نشكر نعمتو والله لا.. أنا افتكر في الرقعة دي ما كان في حد يقدر يطورها ويقتات منها وتكفيه غير المناصير.. لانهم مزارعين ناجحين وناس عينهم نجيضة.. شوفي مثلا الجنوبيين. ربنا أداهم أراضي سمحة وسماء مدرار. لكن كان فقط يزرع حول القطية ما يكفي أكلو بس.. ويعمل ليهو المريسة مثلاً ولا يثور باقي الاراضي.. عشان كدة جاء الكسل عندهم.. المزارع المنصوري قبل الشمس تشرق يكون في حقل الزراعة.. ما أحتجنا لى يد من برة عشان تدينا.. حتى في العاصمة تجد ناس في العيد الكبير عشان يرضوا حريمهم الواحد يبيع تلاجة البيت عشان يشتري ضحية، بعدين لى قدام ممكن يجيب تلاجة... في المناصير لا.. اي بيت يضحي وزيادة.. وحاجات كتيرة زي دي.
عن إذن حضرتك رشفة من عصيركم ده! حلقى جفا بي سؤالك ده
بقا جاتنا حكاية التهجير.. وبأمانة الناس الكان عندهم راس الخيط من مجالس وغيرها أوحوا للمسؤولين إنو الهجرة أحسن ليهم.. وإنو راح يستبدلوا باراضي أحسن من أراضيهم. المسؤولين ما عندهم مصلحة.يهجروك. ما كان في جرح ما كان في تصور لألم الفرقة وفراق مراتع الصبا. ما كان في تصور عن أن الذي تركناه ممكن يكون أفضل. العقل ما أسعف الجسد بالتفكير السليم المناسب.. بدأ الم الفراق بعد أن هاجرت مجموعات.. وتوحدت القبيلة على قلب رجل واحد في إنو لازم يكون في موضع قدم للقبيلة وأرض تعتز بها وتفتخر بها وتثورها.. نعم أنا ضحيت من أجل بلدي في أن يقوم خزان مثلاً ينفع الناس.. لكن لما أهاجر من موطنى الاصلى. أصغر طفل من المناطق الانا هاجرت ليها ممكن يسئ إليا.. ويقول لى منصوري منصوري ساكت! قاعد في أرض الناس! أرضك وينا!الشعب السوداني معظمو جاهل، ما بيعرف قيمة التضحية الحقيقية، عشان كده طفل أهاني! هو لو يفهم الفهم الصحيح إنو انا ضحيت من أجلو هو، مفروض يشيلني في راسو. لكن إنت ما بتقدر تغير مفاهيم الناس بين يوم وليلة. عشان كدة شعرانا قالوا( ارض عـِرِضْ ما للعـَرِضْ) يعني زي العـِرضْ زي الشرف يعنيَ مافيها مساومة إلا الشديد القوي.. وهو خزان يستفيد منو بني وطني كلهم وأستفيد منو من باب اولى انا المنصوري!
هو ليه مناصير العاصمة وكسلا ونهر عطبرة وغيرهم من المدن إتوحدوا يحموا حمي القبيلة! عشان شعروا بالجرح!
بدات حكاية لملمة الأطراف بعد كدة وجبر الكسر من الناس العاقلة الحرا فيهم الجرح. نعم هنالك أخطاء كثيرة من ناسنا ومن غيرنا ما عايزين نخوض فيها ، ممكن لنقص بعض المعلومات الحقيقية ممكن من أشياء اخرى كثيرة..
انا مثلا لو كان في يدي القلم وكنت مسؤول عن التهجير، والناس فعلاً برز ت عندهم محبة لى أرضهم! كان ممكن اقول ليكم! يا جماعة ديار منصور دي العاجباكم انا راح ابني ليكم فيها مجمعات سكنية في المناطق المرشحة ما بتغمرا المياه.. وبأمانة يا جماعة لدي الدقة خط الكنتور ده ما معروف.. انا في الأول راح أسكنكم وابني ليكم المدارس والمستشفيات في أرضكم ذاتا بعيد من خط الموية ، بعدين لامن البحيرة تتملي نقدر نحدد مضارب المياه وتكون آلياتي وما كيناتي جاهزة بسرعة فائقة أقدر احدد للناس مشاريع إعاشة وقبييييل اصلاً سكنهم في ارضهم اكون جهزتو وكهربتهم وغيرها بعيد من مد وحزر البحيرة..أول ما امتلأت البحيرةن يكون كل واحد رحل في بيتو في ارضو وولع كهربة لمبات بيتو..
لكن المشكلة في الناس الضللوا المسؤولين من بني عيال منصور نفسهم. المشكلة في قصر النظر. المشكلة في عدم تصور الم الفراق. المشكلة في عدم تصور التشتت الحصل. المشكلة في الفكر الما قدر يقى الجسد من التقصير الذي جاء مؤخراً..الزول المفكر بي فكروا الثاقب يقدر يجب الحلول الناجعة للمستقبل قبل ما يقع العذاب على الجسد..
لابد ان يكون في نقطة تجَمّـُع للقبيلة في أرض القبيلة نفسها. عشان نحافظ على كينونة البشر المعينين ديل عشان ينجزوا أكثر عشان يستمروا للمستقبل بنفس صفاتهم الحسنة دي.. مركز القبيلة مهم.. زي الدائرة لمان تدوري ترسميها من غير ما تحددي مركز الدائرة وتركزي البرجل عليهو لايمكن تقدري ترسمي دائرة.. كذلك لايمكن تضمني قبيلة مجتمعة لها صفات حسنة من غير ما يكون هنالك مركز ثقل يضم القبيلة في موطنهم الاصلي..
بدات لملمة الشمل والترقيع والتصليح بعد كدة. بفضل المخلصين بفضل الحادبين
صارت عندنا محلية وصار عندنا معتمد وصار لنا إعتراف بأن نظل فيها.. عشان كدة كل ذرات المغنطيس الجاذبة مفروض تجذب في هذا الوقت في إتجاه واحد، هو إسعاد الإنسان الذي صبر بأن يكون لنا موضع قدم في ديارنا وتناسي الخلافات الصغيرة والكبيرة والتوهم الحاصل في إنو لنا اعداء.وفي الحقيقة مالنا أعداء غير الجهل..
عشان كدة وانا بعيد عن ديار منصور لما اسمع بأنو هي موجودة وهي عامرة باهلها هنا عزتي رجعت لى تلقائياً ، حتى ولو انا بعيد عنها. الناس الاثبتو لى قبيلتي عندهم قدر زايد في نفسي..
المناصير تعني لى كل شئ في الحقيقة.

والله أنا سعيد جدا بتداخل الأخت الاستاذة هويدا.. ولكن العمر تقدمو كلناما بندورو..
هسي دي الفنانين في اللقاءات قاعدين يسألوهن عن عمرهم يا استاذة هويدا!
قالوا المرأة والفنان ما تسألهم عن عمرهم كم!

5. وجبة عالمية تعجبك

أموت في وجبة الكنتاكي... محل ما يبقا أطلبا.. طبعاً هي كنتاكي معاها ملحقات. عكس زوجتى وأولادي يحبوا بيتزا موت.. ودائما نختلف لما نتعشى بره.. في النهاية نضطر نطلبهن الإثنين..

6. عرفنا مدى تقديرك للمراة من خلال مساهماتك .. فماهو رأيك بالمرأة المنصورية

السيدة مقدمة البرنامج مشكورة لاحظت أن كتاباتي كلها تنضح بتقدير المرأة عامة وتقدير دورها في الحياة، مما يغنيني عن إعادة ما كتبت هنا.. لكن بإختصار.جيلنا نحن المرأة كانت معنا شريكة في كل مراحل العمر، ننظر اليها الند بالند.. كمان جات حكاية الشغل، والشغل في الفنادق خاصة، جعلنا نتعامل مع المرأة عادي جدا. بكل بساطة. وفي الحقيقة انا اقدر المراة المفكرة المتعلمة صاحبة الراى المستقل ، يطالعني فيها من أول وهلة فكرها ودينها وخلقها وثقافتها وليس جمالها.. واتعامل معها كزميلة كأخت ..
اما المرأة المنصورية فمختلفة شوية..
ليه!
صرامتها
كرامتها عندها أهم من أي شئ
اصلاً المرأة المنصورية القديمة الرجل وثق فيها فسلمها كل شئ في الحياة في البلد تديره وتتحمل المسؤولية وهو يساعدها في ذلك..
المرأة المنصورية المتعلمة في الجيل الجديد، يميزها الذكاء الشديد والحساسية الشديدة .. حساسة.. بعدين قوة الشخصية.. أتمنى من أخوانهن وآباءهن وأزواجهن.. أن يدوهن مزيد من الثقة بالنفس التى هن جديرات بها.. وكدة ممكن ينجزن اكثر..
الرجل المنصوري بطبعه غيور.. .. الرجل الشرقي عموماً هو كدة.لكن المناصير، بعضهم وليس كلهم . يعني ما عايز المرأة تكون متعلمة أكثر منو.. ما عايز المرأة تكون مفتحة اكثر منو..دائماً عايز يخليها خلف الكواليس..أنا عندي راي أن المرأة المنصورية الحديثة ما ساهلة ابداً.. حتى لو ادوها الماهية والراتب كلو. هي بتقدر تميزو أحسن من زوجها.. عندها نظرة إقتصادية جيدة..وانا دائماً قاعد أقول.ز المرأة كان كرهتك ! الله قال بي قولك.. وكان أحبتك! الله أداك! المرأة تبذل نفسها فداءاً لمن تحب، حب زوجي، حب أبوي.. حب أخوى، حب بنون.. حب وطن.. حب علم.. وكـدا !

7. وماهي تطلعاتك للمرأة المنصورية حتى تكون فى المقدمة دوما

أنا والله لما اشوف مرأة مفكرة مثقفة.. بفرح شديد بفرح كانك قدمت لى وجبة دسمة.. طبيعة نفسي كدة.. تطلعاتي هي كما ذكرتها في الإجابة السابقة. إنو الاخ والوالد والزوج يساعدها على بناء الثقة في نفسها، وأنها هي حارسة نفسها بنفسها، وليس الرجل.. وان يقلل النقة شوية الرجل المنصوري.. يديها مساحة فكرية في تدبير الحياة.. بعدين عشان تكون في المقدمة، أنا أفتكر جاء الوقت الممكن نشوف فيه مرأة منصورية بدرجة وزير..المرأة عامة مواهبها تمنو في الجو الصحي المملوء بالثقة وبعض المفكرين قالوا ( المرأة كالزهرة يقطفها واحد.. ولكن يشم عبيرها الملايين) فعبيرها هو قوة شخصيتها.. أفكارها التى يستفيد منها الناس خاصة الافكار في مجالها الذي خلقه لها ربها وهيأها في أن تكون رائدة فيه.. العبير موش العطر. العبير هي الثقافة .. الدين. الخلق. التفاني. المحبة. المرأة مليئة بالعاطفة نحو الخلق.. المحبة هي ذاتا موش المحبة الواحدة دي البي يحوروها الناس خطأ.. لا هنالك محبة زوجية ودي لفرد واحد.. هنالك محبة أبوية.. هنالك محبة أخوية.. هنالك محبة للابناء. هنالك محبة للزمالة وليس الصداقة.. المرأة عندها عاطفة المحبة والكره مجبولة عليها في الخلقة. مثلاً الرجل الذي ينازع زوجته في المنزل يقلص محبتها تجاه أبنائها. الوالد الذي يشك مجرد شك في إبنته يقلص محبتها العفوية تجاهه..الفطرة الطبيعية يجب أن تنمو وتترعرع في جو سمح ملئ بالعافية والدين والثقة المتبادلة

الأخت انتصار لك التحية ودائما نجدك في المقدمة وأبدا ما خيبت رجائي لك التحية ولأسرتك الكريمة وفي استضافتك لأخينا المهندس صديق ذكرتني ضربات الجزاء (البلنتي ) ودائما ما يختار أول لاعب هو أفضل لاعب في المنتدى وفعلا نجح اختيارك وإن شاء تكون مني وصفة زي ما قال الرائع ود الزومة وفي المحل ده ود بروي عنده رأي وهو عارف إنه أخوه عيسى خير من يجيد الوصف وحكاية الوصف ده عندي معاها حكايات. أخونا صديق سلامات والمرة ده اللمسات بالأيادي الناعمة ونخليك مع بنت أسد أبي سباع وقطعا ستفيد الجميع واعذروني على مداخلتي بين العصا وقشرتها ولكن ودي وإعجابي بكتاباتكم أجبرني على الدخول وتوقعوني دائما الدخول من باب السر.

تسلم دكتور مصباح على المداخلة، وخلاص أنا وبت أسد اب سباع بي نتوقعك بي باب السر زي ما قلتا إنت..

مشكور دكتور مصباح على هذه المداخلة

واتمنى ان تعدنا بان تكون احد ضيوف برنامجنا

فننهل من علمك ونستفيد من نصائحك كعـَلم مشهود له بالحكمة

وفى خلال هذه المراحل الثلاث اعطنى اسم معلم او معلمة اسمة عالق بذاكرتك وتريد ان تقول له شكراً

ما هو اسم ذلك المعلم

وماهي الكلمة التى تقولها فى حقة ... ولماذا.

الحقيقة سيدتي
السؤال هذا سوف يضعني في حرج.. لأن التعليم في عهدنا كان يختلف. حيث كل المدرسة كان مسخرة بإمكانياتها كلها وأساتذتها كلها مسخرة لإنجاح الطالب.. الناس كانت تعمل كوحدة واحدهن حتى إذا كان هنالك قليل من الإخفاق في مادة معلم معين، المعلمين الباقين يساعدوه في توصيل مادته للطلبة.. وأنت ممتحن مثلاً من الإبتدائي للمتوسطة مسألة رياضيات واحدة مثلاً تجيبا غلط! كانت كافية بعدم دخولك للمتوسطة.. سؤالين غلط في مادة اللغة العربية، يخروجك من أن تدخل المتوسطة.. وهكذا. لذلك الاساتذة كانوا يعملون مع بعض والنجاح محسوب لهم كلهم..
ولكن إن كان لابد من ذلك! دعيني أذكر عدداً منهم

الاخت انتصار كسرت اللقبة بي جاي وخلتنا بي هناك منتظرين الموية

-متابيعين بشغف

فكرة رائعة.

الاخت انتصار كسرت اللقبة بي جاي وخلتنا بي هناك منتظرين الموية

عبد الواحد قلنا نخليكم بي هناك تفنجطوا.
عشان تشوف في ناس مبدعين كيف!
المثل المنصوري يقول ليك( الريس يجيب الهواء من قرونو ) وانتصار ريسة مركب المنتدى توجه الدفي محل ما تريح المركب وتبعد من الشيمي والتلقيحي

ليه أستاذ الخضر عبد الرحيم؟ حبب الينا مادة الدين واللغة العربية.كان زول صارم جدا.. لكن فيه الفكاهة والنكتة. سرير القلب.. شاب وقتها30 سنة يا دوب تخرج. فارع الطول وسيم.. ما اجمل اللحية والشارب عنده وسمت الوقار.. كسته العبادة هيبة. كان راكع ساجد على الدوام. اول ما تخرج تزوج وجاب مرتو واجر بيت قرب مسجد ابوحمد[.. يصلى الصبح حاضر في المسجد ولكن أغلب وقته يجينا الصباح في المدرسة يصلى بنا الصبح مجموعة.. ثم يرجع الى داره ثم يعود الى حصصه. كان نشيطاً.. العزبة المتدلية من عمامته على كتفه يا حلاتا عندو لم اراها في زول زيو حتى الآن.. يذكرني عهد الصحابة. لم ينخرط في اي تنظيم سياسي ولو انخرط لكان رائداً الآن في أهله. كان وسيماً للغاية.. اسمر اللون مع شلوخ ثلاثة طولية جميييلة تشبه شلوخ المناصير..ما أحلى فمه واسنانه وقتما يقابلك هاشاً باشاً كأن الحكمة تتفجر من فمه. له لونية خاصة في التلاوة في سور القرآن. طريقة قراءته وتنغيمه للقرآن حتى الآن أحفظها.. كان يطبق الدين البيان بالعمل.. يعطينا في الكتاب( درس صلاة الجمعة) ثم يذهب الى مسجد ابوحمد يوم الجمعة ويعطيه إمام المسجد المنبر ليصلي صلاة الجمعة ويخطب.. وكثيرا كان ما يتركوه ناس ابوحمد يصلي بهم صلاة الجمعة وخطبته كانت رائعة كلها يقرأها من راسه بلا تلعثم وكانت خطبه دائماً تلامس قضايا الناس.. كان محبوباً من جميع أهل ابوحمد وكلهم يعرفونه. كانوا كثيرا ما يسألونه في المسائل الفقهية. تلقاهو اي مسألة فقهية حافظ شاردها وواردها. يقول ليك المالكية رأيهم كدة! والحنابلة رايهم كدة.. والإمام احمد رايه كدة والإمام الشافعي رأيه كدة في هذه المسألة المعينة، مرات نذهب معه السوق يسقينا شاي.. مرات يفطرنا اثناء ما ماشين في الطريق للسوق يستوقفوه الناس يسألوه عن مسائل فقهية.. يجاوب بكل سرور ونحن نقيف معه نسمع ونستفيد.. صلاة الجنازة كم مات طالب نشرف معه من الغسل حتى الجنازة الصلاة عليها ودفنها والدعاء لها. الحج كم مرة مشى الحج.. يصوم الايام البيض بإستمرار ويصوم عدد من الايام كل سنة..يدرسنا كل شاردة ووارده في النحو . يقول عشان تفوزوا بيها لو جاكم سؤال طاشي في الإمتحان . خاصة كل الاسئلة في الإمتحانات عن طريق القياس بس القاعدة في الكتاب. عشان الذي يضع الإمتحان عايز يشوف مدى ذكاء الطلبة.. نظيفاً في زيه. خطاط على السبورة بصورة مذهلة عكس معظم اساتذة الدين والعربي الآخرين في المدرسة وقته

يا سلام فكره ممتازه
الحمد الله لقينا لينا قناه نقدر نتابعها بمزاااااااااج.....باقي القنوات كلها انتقلبت مصارعه غير حره....

تسلمي يا زعيمه ويسلم ضيفك
دي,,,,ماده اعلانيه بين البرنامج
باقي لي يا زعيمه حنبقي اسيرين هذه القناه الي ان ياتي الفرج من رب العالمين,,,وتنتهي برامج المصارعه البغادي دي

قايتو لو ما المغتربين ...علي المنتدي السلام!!!!

[quote="نجلاء زمراوي"]يا سلام فكره ممتازه
الحمد الله لقينا لينا قناه نقدر نتابعها بمزاااااااااج.....باقي القنوات كلها انتقلبت مصارعه غير حره....

تسلمي يا زعيمه ويسلم ضيفك
دي,,,,ماده اعلانيه بين البرنامج
باقي لي يا زعيمه حنبقي اسيرين هذه القناه الي ان ياتي الفرج من رب العالمين,,,وتنتهي برامج المصارعه البغادي دي

قايتو لو ما المغتربين ...علي المنتدي السلام
[]نجلاء والله ضحكتينى لدرجه ما تتخيليها]
ا[]نتصار جزاك الله الف خير وانتى رافعه راسنا دوما بافكراك وكتاباتك المهذبه والتى تدل على معدنك الاصيل
الحنونى استاذنا القدير دايما عندما اقراء كتاباتك يدور فى خاطرى سؤال ....الموسعه الكامله عن المناصيرقاموس المناصير اللغوى منو الورثه من اولادك وهل ليهم اهتمامات بالمناصير ذى ما انت مهتم ؟!!!!

ها ها هههه
لا نجلاء بي هناك مصارعة حرة؟؟
موش مصارعة غير حرة!!! مصارعة حرة عشان كل واحد حر يشرق ويغرب. على كيفو!. عشان كدة حرة
نجلاء تعرفي( الحمارة الحرة!!( يقول ليك حمارتي دي حرة!
أوع اميرة علي تسمعنا... مسمياها ( مقطوعة الطـُرَاا...
...........
شرفت صحفية منتدانا أميرة الحومري بجي أرد على أسئلتك!

الحنونى استاذنا القدير دايما عندما اقراء كتاباتك يدور فى خاطرى سؤال ....الموسوعه الكامله عن المناصيرقاموس المناصير اللغوى منو الورثه من اولادك وهل ليهم اهتمامات بالمناصير ذى ما انت مهتم ؟!!!!

نعم عندهم إهتمامات يا استاذة، خاصة رحاب.. الكبيرة. احمد برضو المستوى الثالث تسويق وإدارة. جامعة ابوظبي ، رؤى 14 سنة برضو تهتم شديد بي لهجتنا .. اُبي ست سنوات لسه ما عارف حاجة.
اما حكاية قاموس. القاموس عايز معايشة للمناصير. الوحيدة التى توفرت لها المعايشة هي رحاب.. وتعرف كل لهجة المناصير وتحبها وزولة نكتة كده طالعة زي ابوها ودمها خفيف. اما حكاية قاموس يصعب عليهم. لأن قاموسنا عايز معايشة حقيقية وفترات طويلة في البلد.. صيف شتاء خريف. تطلع خلاء تنزل بحر تروح اول المناصير تروح آخر المناصير تدخل جزاير تعايش ناس تبيت مع ناس وكدة..
صعب عليهم حكاية قاموس. يا استاذة اميرة الحومري
..................

ضيفنا العزيز هل تنوي ترك الاغتراب والعوده الي احضان الوطن؟

اذا لم تكن مهندسا ماذا كنت تتمني ان تكون؟

تخريمه طبعا دي مداخلات بالتلفون.....انقطع الاتصال

الرائعة إنتصار تحياتى وفكرة رائعة حتى نتعرف أكثر على شخصيات لها وزنها وتسلمى.أما بخصوص ضيفك الكريم فهو موسوعة ونعم الإختيار وربنا يديهُ الصحة والعافية.وهذا سؤالى :
يا أبوحنة تحمل الكثير من قصص أهلنا المناصير هل فكرت فى تجميع هذة القصص فى كتاب ؟ ..حتى يتعرف الآخرون علينا؟ وإن كُنت لاتفكر فلماذا لا؟ الخزان فرض واقع جديد والتُراث والإرث الذى تحملة داخلك مُلك لقبيلة كاملة ولأجيال قادمة فهلا وثقت لنا يا أبوحنة؟

من باب السر ندخل والسلام عليكم أهلنا الطيبين يابنات شوية شوية على أخونا الباشمهندس وزمن الحلقة ليس بمحدود والمخرج لن يؤشر بانتهاء زمن البرنامج المنتدى قاعد ومحروس بخالد عابدين وإخوانه وانتصار تقطع من جلدها ووقتها لإدارة هذا الحواروالحنوني عنده صبر أيوب ويؤثر على نفسه والذي أتمنى أن يسنفيد منه أبناؤنا أولاد المناصير . وبعجبني فيك ياصديق أنك جامع للماضي ومدرك للحاضر تعرف أعضاء المنتدى جيدا لأن كثير من ابنائنا مولودين في الخراطيم وكسلا وغيرها ولكني أراك تتعامل معهم بأسلوب معلمك الخضر عبدالرحيم. وبعدين ماشاء المناصير ديل كلهم وصافين شايف عبدالواحد قالك قلبتي اللقبة بجاي وإن شاء مويتك ياانتصار تعم الجميع

اليوم باب السر وجدته مغلق من غير العادة وأظن الكهرباء قاطعة. شكرا لكما

دكتور مصباح باب الاستديو مفتوح على مصراعية

ويبدو ان فترة الاستراحه اثناء الحلقة طالت

وبانتظار ضيفنا الكريم

وبانتظارك يا دكتور مصباح باسئلة لضيفنا باشمهندس صديق ابو حنه

با شمهندس صديق

1. باشمهندس من خلال متابعتنا لكتاباتك ..فانت بالتأكيد قارئ ممتاز .. ماهي نوعية الكتب التى تجذبك اكثر من غيرها .. روائية ام دينية ام سياسية ام العلمية .. الخ

2. اسم كتاب استمتعت بقراءته ولا زال عالق بذاكرتك

3. اخر كتاب قرأته

4. مذيع برامج عربي مخضرم بنظرك وتتابع برامجه

5. برنامج تلفزيونى تتابعة باستمتاع