يا أخوانا حاجاتي الناشرها هنا عن تراث المناصير، ما بتجيب لى دكتوراه

والله يالخال أنت أخذت الدكتوراه بجداره بكتاباتك عن تراث المناصير . أحسن ليك من التعب والجرجره و حرق أعصاب هذا بعد تنجح في المناقشه في شئ متعارف عليه هو حاجات العقد أتخيل معاي حاتكون شنو فاقده المأذون فقط تخرب الميزانيه سنه كامله والتصحيح عايز شهر و طباعة النسخ موضوع والتسليم واجتماع مجلس الجامعه وأجازة النتيجه عايزه شهور يعني بعد تعب تطلع الوريقه وفائده مافيها.

فيها فايدة يا بت أختى.. إنت قايلة انا داير لي فيها قروش وراتب ومرتب. وتاني نحاضر في جامعات.. لا لا لا
عايزها مكانة إجتماعية بس!
هسي دي لمان يختوا ليك حرف د. قدام إسمك وبعدين يجن بنات التلفزيون د يلاك ينادن خالك اثناء الحلقة يا دكتور كدة ويا دكتور رايك شنو؟ ويا دكتور ورينا الحل!
موش أخير من كلمة يا باشمهندس دي بلا حرف دال!قدام إسمي!
تصدقي يا عازة مرة اتابع في حلقة في التلفزيون.. والمذيعة كل مرة تقول للضيف
يادكتور كدة
ويادكتور رايك شنو! وهي خالفة رجل فوق رجل
انا قلت ضيفا ده! اكيد عندو دكتوراه في الذَرّه
لقيتو ليك في آخر البرنامج هو ماخد الدكتوراه بتاعتو في أغنية ( يا رشا يا كحيل) قالوا عمل ليها تحليل ونقد.. وهي كلمات الشاعر عبد الرحمن الريح وعبد الرحمن الريح العملا ذاتو طالع من الخلوة وبعدين قرا لغاية ثانية اولية!
طبعا لاحترامنا للتخصص والناس المتخصصين فيهو
لكن هو ضيفا ده هنا في البرنامج تعدى حدودو وتكلم كمان في هندسة التشغيل.وناس السودان لما الزول يكون دكتور ويخت حرف الدال ده قدام إسمو! خلاص تاني يسمعوا ليهو في اي حاجة يتحدث فيها حتى لو( قدر ظروفك)
اشكرك على كلماتك( انت كدة أخذتها بجدارة يا خال وما محتاج)

تسلم يا باشمهندس الفكي..
وانت والله مثال للطموح والتعلم والتعليم..أنتم جيل التعليم الحقيقي وكت كان التعليم في ندرة شديدة.

قلت لي في النهايه الدكتوراه في غنيه عليك الله كتاباتك في التراث دي مابتجيب درجة بروف .لكن يالخال هو أكيد بكون تعب وشقا شديد لأن ألدراسه النظريه أصعب بي مليون مره من الدراسه العمليه أسهل ليك تحضر في هندستك دي وماتزوق كدا ولا كدا .

يعني يا عازة تعب في شنو! تعب في دراسة أغنية يا رشا يا كحيل!! في نقدها وتحليلا
هو ذاتو عبد الرحمن الريح بيكون ألفها امام قعدة كباية شاي بس!

هاهاها أنا أقول أخوي الجابدو منو أتاري أنت.لماأخذت الوريقه بنت أختك أخر تصاوير ولابسه الروب والمباركه والبارد والخبايز والحلاوه لافه قالي بالله شوف فرحانه كيف تقول جايباها في الفيزياء النوويه.

الخال والد يقولوا
أفرحي بها يا عازة هي ليست وريقة هي دكتوراه يا بت في عين اي واحد لما نقاشتيها وأخذتيها عن جدارة عمتنا الفرحة كلنا

بسم الله الرحمن الرحيم

قررت اداره المنتدي <بعد اذن الاداره>منح الدكتوراه للدكتور صديق ابوحنه


من الان وصاعدا لابد ان نناديك بدكتور وانت اهل لها
وزي ما قالت عازه بلا جرجره ووجع قلب...وانت اصلا جدير بيها ومرجع لكل المناصير<المتمنصرين>اظنها كدي كما ذكروا في التقسيم في احد البوستات السابقه

برووف الحنوني
درجة الدكتوراه شويه عليك
القاموس فقط يكفي
تخريمه
عندك ذاكرة (ون تيرا)
حاشية
تيرا = ١٠٠٠ قيقا

تسلموا نور الهادي وود الطرشان ونجلاء ودكتورة عازة..
والله شهادتكم كفاية. يديكم العافية

الفخرية دي بتنفع لكن يا با شمهندس الفكي! نحن عايزين الحقيقية نقعد كدة في الواطة وندرس ليها!